Khawthlang lam a nî a her liam dawn mek lai chuan Marcus-a leh a sipai te pawh chuan Phyra- khaw dai lawk a ngaw hmun leh lung lian pui pui awmna Prinalia- hmun chu an lut ve chiah a, helai hmun hi Phyra- khua aia a sân zawk avang leh Mount Bosini chuan hnuai maia awm anih avangin remchang ah la in riahbuk an sual a, an han awmkhawm meuh chuan chung Greek sipai te chu khawinghal bu kotlang ang maiin an phu mur mur a, puanin an kaih kûl fen fun a, chhâwl bûk an zar hliah thluah mai bawk a. Khawpui indin țantir ang mai hian an inkulh a.
Marcus-a te chu rûntu te ni mah se, Phyra- khaw awp tu Goth- ho te chuan engtin nge maw ni an lo hriat lawk ni, khawvar hma deuh hian an va țhâwng hmasa thut mai a, chuti ang renga in beihna nasa chu a vang khawp ang le.
Marcus-a ho te hi Wizard War- hnu khan chawlh hahdam la nei manglo, buaina in a chîm reng an ni a, an chau tawngkhawng tawh em bawk a, mahse an hruaitu Marcus-a fuihna avang leh huaisen em avangin tha tho na leh phurna an nei thei chauh tih theih ani. Khawvar hma ațanga in bei an ni a, Ni alo chhuak a, thi leh hliam an tlu sai kalh niai nuai a. Khawvelah hian eng hnam pawh nise, pasalțha te hi chu pasalțha anlo ni nge nge a, tlawm an ngaiin an tuar a chhel a, thih aiin hmingchhiat an hlau zawk a, hnehna chu an tan ropuina ani a, thih chu hnehna ah an ngai a, chuvangin engmah hlauh an nei ngailo. Heng rawn țhãwng thut tu Goth- ho hi an tlem a, Marcus-a sipai zahve vel lek an nia, chuvangin a tir ah kha chuan buai phili deuh mahse țanhmun an han rem țhat meuh chuan Marcus-a sipai te chu a chan țha zawk ah an țang tial tial a. Fehrehsan hun vel ah chuan Goth- ho chu in hloh țeuh chungin an in thiarfihlim ta hram a.
An han hawi vel a, an țhiante thi leh hliam an han hmuh chuan an thinrim a zual a, umzui nghal mai an tum a, Mahse sipai in thunun thei tak leh hotu te zah thiam tak an nih avangin Hestia leh Marcus-a te thu chu an su tlang ngam ta biklo, tichuan țhenkhat in an țhiante leh hmelma ruang te chu hmun khat ah an dahkhawm a, a then in hliam te chu anlo bawihsawm bawk a. Chutiang ang reng reng chuan ni chu an hmang zo va, khua alo thim chuan hmelma ho ruang chu hmun khat ah dahkhawm in an hal a, chutah an țhiante ruang chu a mal mal hian dawhsan ang deuh a thing chherchhuan ah hian an zalh a, chutah an hal a, an vap chu la in an phum leh ta a.
Greek pasaltha leh an lalte an thih chuan a vûina ah infiamna hun an hmang țhin a, hemi zan pawh hian intihsiakna chi hrang hrang an buatsaih a, sakawr in tlansiak leh hmanraw tellova in mal beih te, in chem vai leh intihsiakna chi hrang hrang an nei a. Mahse Marcus-a leh Hestia- chu an tel ve lova, puanin ah Uain in pah in an in kawm daih a. Chutia anin kawm lai chuan puanin pawn atang chuan Hestia- chu an rawn au a, Hestia chuan lut tur a atih hnu chuan sipai pahnih hian rawlthar pahnih thawmhnaw tet hrep hrup ha hi an lo chhawm lut a. Chutah an hruaitu sipai pakhat zawk chuan, " Hemi te hi kan sipai ralveng ten an hmu a, Phyra- khua ațanga tlanbo ni awm in an in sawi a," ati a, chutia a sawi zawh chuan sipai pakhat zawk nen chuan an chhuak leh ta nghal a.
Chung rawlthar te chu an tit hmel hle a, an mitmeng atang chuan hlauh nei tih hi a hriat ngawih ngawih. Hestia chuan thu tur a a han tih chuan an bul ah chuan an rawn thu ve nghal sawk sawk a, an eitur chhawp sa te pawh chu Hestia chuan pe in, an tawng thlamuan vel chiam a. Chutia riltam tak mai a an thil ei lai chu Marcus-a chuan chik tak mai hian a lo en ngar ngar a, chutah a rawn tawng chhuak ta nge nge a, zaidam tak hian, " Phyra- khua a awm in ni tak tak amaw? Engtin nge in lo chhuah thei a?" a kut a a apple eilai la hum reng pah chuan pakhat zawk chuan, " aw ni e ka pu, Phyra-khua a awm kan ni alawm, sakawlh ei tur in Veil- kaw bulah Sipai ho in min hnutchhiah a, mahse ka thianpa nen hian kan lo tlanchhuak ta ani," an ti a. Chutia a sawi zawh veleh chuan Hestia chu lo tawng ve nghal in, " sipai an tam em? Engang mi te nge an ni, dawithiam te in hmu khiah lo maw?" an ti a. Chutah pakhat zawk chuan, " aw ka pu, Veil- in hawng atanga sakawlh lo chhuak thin chu an thuhnuai ah an awm vek a, an duh duhna ah an kal tir thin, chutiang ti thin chu putar pui pui mai an ni a, pali vel lai an ni in ka hria, chuan sipai lian leh rapthlak pui pui pawh an awm," zaizir titih pah deuh hian uar mangkheng hian an ti a. Chutah Marcus-a chuan, " anih leh sipai chu engzah vel nge ni ang, keimahni aiin an tam ang em?" tiin an zawt leh a, a chhangtu ngai bawk chuan chhang leh in, " nangmahni ho ai chuan an tam ang, ka pa chuan Eastland leh Khorbi khua ah sipai tam zawk chu an awm a ti a," chutiang a thu eng eng emaw an zawh kual vak hnu chuan puanthuah an pe a, an puanin chhung ah chuan an riahtir ve a, chumi te mut hnu pawh chuan an pahnih chuan anla sawi zui zel a, zan rei tak thleng an in kawm a.
Khawvar dawn hnaih lam ah chuan an mu ve thei ta țawk a, Marcus-a a harh chuan Ni pawh alo tlangsang hman viau tawh mai, Hestia chu a lo awm lova, Muangchang a tho in an in tifai sawk sawk a, a thir kawr chu a in bel leh ta mial mial a, chutia a in hak lai chuan Hestia- chu a rawn lut a, Marcus-a hnen ah chuan, " Vawiin lam chu kan hahchawl dawn emaw ni le? Zanin ah inbuatsaih ila, ral run tur in zanlai ah chhuak ila, tunah rih chuan kan sipai te hi an la chau tawngkhawng ani, enge i ngaihdan?" an ti a, Marcus-a pawh chuan, " ni e, dik tak a sawi chuan chawlh hahdam chu kan mamawh tlang takzet ani," tiin Hestia thusawi chu a lo pawmpui a. Marcus-a chu nileng in puanin ah chuan a tawm char char a, vawikhatmah a chhuak lo. Hestia erawh chu sipai ho fuih leh ralrel in nileng in a buai thung a, khawthim hnu fe alo kîr in Marcus-a nen chuan zanriah an kil dun a, chumi hnu in sipai ho bul ah bawk chuan a kir leh daih a. Marcus-a chu thing țhutthleng hniam ah hian a țhu a, engemaw ngaihtuah ni awm tak in a maimitchhing veng veng a, Penelope-i a ngaihtuah anih loh pawh in Vivienne-i a ngaihtuah ani ngei ang. A hmel leh a hawiher ațang chuan Vivienne-i a ngaihtuah zawk ani mai thei, an in hmuh hmasak ber țum a pûk chhung a an in kawm lai te, a kalsan dawna a lunglen zia te leh a thutiam te kha, Ni e, Vivienne-in a kan in hmuh leh chuan i ta ka ni kumkhua tawh ang atih avangin thu atiam a, ka rawn zawng chhuak leh ngei ngei ang che ati anih kha. Kha an in hmuh chhung hun tawite ah khan a thinlung zawng zawng chu kha nula khawhar hnenah khan a hlan vek a, a hmangaih ang bawk in ani pawh khan a hmangaih let ve tih a hria, chuvangin kumkhua a an chen dun theih nan tunah hian a Lal ram ropui leh zau tak te, anu leh pa hmangaih tu te chu engtik ah nge a hmuh leh ang tih pawh hriatloh in a kalsan ta kha ani a. Chutiang a hun liamta leh thinlung khawhar kawm leh ngaihtuah ni awm tak a hun enge maw chen a țhut hnu chuan muangchang hian a tho va. Chutih lai mek chuan pawnlam ah chuan Hestia chuan sipai ho te chu enge maw ahrih ni ngei tur ani, a aû ri lûng lûng a, chutah a khat tawk hian sipai ho te chuan an fei te chu an khawng ri tluar tluar a, a changin an aú ri leh dual dual bawk a. A mutna bula thing chang chi a siam leh uluk tak a siam tih hriat tak thingrem tê chu la in dawhkan chung ah chuan a hung a, muangchang a hawng in, a piantirh a an khaw puithiam, Pathian chungnung ber Zeus-a fanu, finna Pathiannu leh Athens- khawpui dintu, Athena- i puithiam ina Marcus-a hman tur bik liau liau a a pek tangkaraw no pakhat hi ala chhuak a. He no hi Marcus-a chauh lo chuan uain in nan an hmang ve thianglo ani. Marcus-a chuan a no serh chu a hrufai phawt a, chutah, fai takin tuiin a tleuh leh a. Chumi hnu ah chuan a khatin uain a thli a, tlem leihbua in Hmangaihna Pathiannu hmelțha Aphrodite-i pasal leh Indona Pathian chak leh huaisen Ares-a hnenah a țawngțai ta a, " Aw Ares, i hnenah inthawina ka rawn hlan e, zanin ah hian ral bei tur in kan chhuak dawn ani a, kan sipai te hi an tlemin an chau tawh tak zet ani, chuvangin kan hma hruai la, kan sipai te thinlung tikhauhin chakna leh ropuina khumtir la, an zahawmna leh ropuina hlawhchhuak tur in chakna pe ang che," ati a. Chutianga a tih zawh hnu chuan muangchang a tho in puanin pawn lam ah chuan a chhuak ve ta a. Pawn ah chuan sipai ho te chu sakawr chunga chuang chung hian an lo ding țhap hlawm a, Hestia chuan eng eng emaw ni hi alo sawi mek a. Marcus-a hmel an han hmuh chuan an phur hmel sawt in tha tho na an nei thar ani ngei ang, an lo au rual țhap țhap hlawm a. engmah pawh sawi chuanglo chuan a sakawr chungah chuan Marcus-a chu a zuangkai thauh a, Hestia chuan hma hruaiin chu an inkulhna leh riahbuk chu an chhuahsan ta a. An vaiin an kal vek tih theih deuhthaw ani, an riahbuk lo nghak tur chuan sipai tlemte zahnih zathum bawr vel chauh an awm a, a bak zawng chu ral bei tur in an kal vek ani. Helai a hmun lo nghak tute pawh chuan hmun hrang hrang ah ralveng an in dah thluah a, chubak ah ralthuam famkim nen, hmelma pawh lo kal thut mahsela, chet lak ve nghal mai theih nan an in thuam vek a, chulo ah țhâwn thut tawk tawh an nih avangin an fimkhur in an in ring reng tih theih an ni. Marcus-a te chhuah hun hi zanlai vel ani a, fimkhur leh thawm dîm tak a kal an ni a, an kal chak em em hran lo, chubak ah meichher pawh tumah in an chhi lo, thla Arkaiden zan ani a, chu van sang tak a thla êng chu ring in an chhuak a. Khawvar chian hma in Marcus-a leh a ho te chuan Phyra- khaw dai chu an thleng kim vek tawh. Fimkhur thu hla ah sipai pariat hi, pahnih zel a inkawp in, enthla tur leh hmelma te awmdan leh in kulh dan chian turin a kal tir leh phawt a. Reilo te an Marcus-a mi tirh te chu an lo let leh a, Lei ah hian Phyra- khaw awmdan leh hmelhmang te chu an ziak a, Goth- sipai ralven dan te, Phyra- mipui an khungkhawmna in te leh an hmun pawimawh an hmuh theih ang ang lem chu an ziak a, chutah Marcus-a chuan Hestia hnenah chuan, " an in kulh dan kan hriattheih chin ang hian hma kan lak phawt angai ani, chuan keiin khawpui luhka lam hi thal kap mi leh sipai tam zawk hruaiin ka bei hmasa ang a,chuan nangin Eastland- lam hnaih ațanga rawn beiin, țanpui tu an koh theihloh nan ruang chaihcheh kan thlak khum dawn nia, minlo ngaichang ula, van lam hawi a thal mu alh in kap chhuak in hmuh hun ah in rawn che ve thung dawn nia," ati a, tichuan ho hran ve ve neiin Phyra- khaw lam pan chuan an chhuak ta a. Thing kulh pawh Goth- ho chuan anlo siam lem lo, mahse an awmna bul lawk ah hmelma an awm tih an hriat tawh avangin ralveng pawh anlo indah uluk hle a, khaw tawntirh lam ah chuan a bawr hian an bawrkhawm tuau tuau ani ber mai. Mahse chu chu Marcus-a te tan chuan an vanneihna bul ințanna ani atih theih ang. A chhan chu sipai tlemte ralveng lo awm selang chuan an au leh țe thawm ah an lo in ralring hman vek dawn si a. Marcus-a te chuan Goth- sipai hnaihchilh deuh leh an thal kap mi te'n an duh thâl a an kah theih tawk tur vel ah hian țanhmun an siam a, chuan sipai ho te chu hmun hnih ah ințhenin sipai tam zawk chu an hnung a thal kâp mi te nena ințanpui tawn thei tur velah hian țanhmun siam in inring tak in an awm bawk a. Marcus-a chuan zaizir hian thu a han pe a, chuveleh Goth- sipai ho awmna lam ah chuan an thal kap mi te chuan ruah ang mai hian thal mu an han sûr tir ta chum chum a. In ring tak a ralveng nimahse thawklehkhat a chutiang thil alo thlen thut avang chuan Goth- sipai ho chu an talbuai a, an phawklek zo ta vek a. Chutia an belebut lai tak chuan hmalam a in ring tak a lo awm sipai tam zawk te chuan rang tak in an bawh phei ve nghal a. Inbeihna rapthlak tak chu alo thleng ta, Fei leh ngunhnam inkhak ri chuan hmun tinreng aluah a, thi leh hliam an tlu rem rum a, Marcus-a sipai te hian remruatna fel tak nei sa a an beih avangin an dang chêp hneh hle a, khaw chhung a sipai tam zawk ina an rawn țanpui hma chuan an that chimit hman țep ani, chutia an in beih vanglai tak chuan thal kap mi te chu rawn che chhuak ve in, hmelma ho chu an rawn nawr ve leh ta a. Khaw tawntirh ralveng sipai ho an thah zawh hnu chuan hmun hnih ah an in țhen leh a, pawl khat chuan sipai ho in a khaw mipui an dahkhawmna hmun lam chu an pan nghal a. Khawchhung a sipai ho te pawh chu an țhiante chhan tur chuan a rual rual hian hmun tinreng ațang chuan an rawn chhuak ve ta hum hum a, an in tawhchilh tak tak hma deuh chuan sipai pakhat chuan vanlam hawiin thal mu alh hluah hluah chu an kap chhuak a. Marcus-a sipai te hi Wizard War- lai a amah ngeiin a alo hruai tawh te an nih hlawm avangin ral rel an thiam em em a, an huaisen bawk a, chubak ah an hruaitu Marcus-a huaisen zia leh hriamhrei chelek thiam zia an hriat tawh avangin an phûr a, hnehna chang tur ah an in dah tlat bawk. Chutia van lam hawi a thal mu alh in kap chhuak an hmuh veleh chuan Hestia leh a sipai te pawh chuan rang tak in Eastland- khaw kal kawng, khaw hnunglam ațang chuan beihpui an rawn thlak ve ta a. Mahse Goth- ho chu sipai pangngai ringawt an lo ni bik lo, an lo sawi ang ngei chuan milian kan tih ang chi sipai rual rapthlak tak tak an lo tam ngei mai, chung ho ngei chu a hmatawng ah an la țang zui lehnghal. Ruang chaicheh chu thlak kher lo se chuan Marcus-a sipai te hi an tlawm ngei ang, mahse ruahmanna fel tak neiin an che hlauh a, chuti chung pawh chuan hma an sawn thei lutuk bik lo, Goth- sipai ho te hi Phyra- khua tak ah hi chuan an lo tam lo hlauh a, chuvangin an chetchhiat phah atih thei ang. Marcus-a sipai te hian an tam hneh hrim hrim bak ah indo an thiam a, dawithiam Sirak-i siam chawp sipai thi theilo an tih rapthlak pui pui anlo beih tawh bawk avangin heng milian ho pawh hi beih dan an thiam a, chubak ah Goth-ho te țanpui tu dawithiam te kha anlo awmlo hlauh a, tin Underworld Veil- ațanga lo chhuak ramsa te pawh kha an tam vak loh avangin tlem tlem chuan hma an sawn ve ta deuh deuh a. Chutianga nasa tak a an in beih hnu chuan chawhnu her Behliang mun hun vel ah chuan Eastland leh Khorbi- khua ațanga țanpuitu sipai an kal theihloh avangin Goth-sipai thi bang tlemte chu an in pe a, țhenkhat ramhnuai lamah an tlan chhe nual bawk a. Khawthlang lama ni a her liam dawn mek lai chuan Marcus-a te pawh chuan hnehna pumhlum chu an chang ve thei ta țawk a, huaisen leh chhel tak a an beihna avang liau liau in Phyra- khaw pum chu an thuhnuai ah an dah a, Goth- ho lak ațang chuan an la fel thei ta.
Phyra- khaw mipui Goth- sipai tena an khungkhawm ho chu sipai te chuan an rawn hruai khawm a. Wizard War- leh ramsa kawlh a thah te avang khan Marcus-a hi a hmingthang tawh hle a, Greek ram mai nilo, ram pawn hmun hrang hrang ah pawh a chanchin chu an sawi luai luai a, chutiang khawp a hmingthang leh huaisen chu mipui ho chuan an han hmuh chuan thi theilo Pathian ang mai hian an en țhup hlawm a, an ngaihsan hmel hlawm em em mai lehnghal. Chung mipui ho chuan lawmthu an hrilh sup sup hlawm a, Hestia hnenah chuan, " mipui ho hi engtin nge an awm dawn? An in lam ah haw tir ala theih awm siloh va," zawite hian a ti a. Hestia chuan, " khawlaili deuh a an punkhawmna țhin in lian deuh ah sawn zanin chuan awm hlawm rih mai se, engmah ala tih tak tak theih siloh va, ruang hlawm tur leh hliam enkawl ngai kan ngah bawk si a, chulo bak ah ala belebut lutuk reng reng," tiin a chhang a. Chutah Hestia chuan a sipai Captain chu an ko a, " Captain Aeson, heng mipui ho hi zanin atan chuan hmun khat ah awmkhawm tir hrih mai rawh, chuan an eitur leh mamawh tur ang chi zualpui chauh pe ang che u, khua han var se ro kan rel țha leh dawn nia," a ti a, chutah sawi zawm leh nghal in, " engtin nge riahbuk lam te in buatsaih dawn?"an ti leh a, Captain Aeson-a chuan, " General, i thupek ang chuan kan ti nghal ang e, khaw tawntirh ah sawn puanin chu kan kaih tawh e, Eastland khaw lam panna lampang ah hian sipai enge maw zat chu ralvengin kan in dah dawn a, khaw vêl in ralveng chu kan dah dawn bawk a, chuan Underworld Veil- hnaih ah sawn kan in dah bawk ang," tiin an ruahmanna chu phûr hmel tak hian an sawi luam a. Chutah Hestia chuan, " kan riahbuk nghak tu te kha in hruai tawh em?" tiin a zawt a, Captain chuan, " hruai tawh e General, nichin deuh lawk khan an lo thleng tawh e," tiin a chhang zui lehnghal a. Marcus-a melh pah hian Hestia chuan, " anih chuan riahbuk lamah chuan in phei phawt ang hmiang," a ti a, Tichuan mipui ho leh Captain Aeson-a te chu kalsan in khaw luhna bul lawk a, sipai ten a puanin te an kaih lampan chuan an in zui phei ta hnak hnak a. Sipai ten a puanin te an kaihsak ah chuan chau tak hian an han lut nghal rawih a, inchhungah erawh chuan engvak mah a awm chuanglo, an thirkawr pawh hlip chuanglo chuan inchhunga dawhkan te kil chuan inbe miahlo hian an han thu dun ang ren rawn a, mahsela Indona hmun pawh mah nise, lal leh miliante chu an khawsa sangin an in tuituah hle tho va, Marcus-a leh Hestia-te pawh chu an ho te chuan zanriah an buatsaih tuihnai hle a, dawhkan ah chuan an zanriah tur vawksa kan leh kel hnute te, grep rah hring leh thlai chi hrang hrang hi anlo chhawp lawk sak vek a. Tin chung an dahna thleng te chu tangkarua leh rangkachaka siam ani hlawm a. Marcus-a chuan a zanriah ei mial mial pah chuan, " i ril a țam em? Ka chau viau nangin kei chu ka ril ațam khawp mai," ati a. Hestia- chuan chhan pawh a chhang nghal lo, tangkarua a siam uain dahna bur chu muangchang hian a ban a, no chanve vel lek hian uain chu thli in tlem an lem sek a. Chutah inngaihtuah muk awm tak hian a chal ati chuar a, thawk a han la a, " engmah pawh ka chak hran lo, Eastland leh Khorbi- a an țhiante hi engtik ah nge an rawn thawh chhuah ang aw?"ati a. Chutah thil la thial nuau nuau pah hian Marcus-a chuan, " zanin leh naktuk lamah chuan an rawnla thawh chhuah ka ring chiah lo, thenkhat ramhnuai lam a tlanbo te kha chu khawvar hma loh chuan thilthleng hrilh tur in an kal nghal ka ring chiah lo a," a ti a, ngaihsam hmel tak hian thil chu a ei chhunzawm leh ta mial mial a. Chutah Hestia chu a tho nulh a, a thirkawr chu muangchang hian an phelh mawlh mawlh a, a in phelh zawh chuan a inti fai a, a mutbu lam chu pan in, a mutbu ah chuan chauh hmel tak hian an bawk thlawp a. " ka mutsan mai ang che, indona mual mah ni se, kan ralmuan theih hunlai ber niin ka hria," Marcus-a pawh chuan a thil eilai chu thawhsan in a thirkawr chu an phelh ve sawk sawk a, " ni e, i sipai huaisen tak tak te avangin thlamuang takin kan mu thei dawn anih hi, kei pawh mut chawlh ve mai ka duh ani," hmanhmawh takin a intifai ve zung zung a, a mut bu lam pan in mut zai a rel ve ta vat a. A chau bawk ani ang, Hestia chu a muhil nghal bawrh bawrh a, Marcus-a erawh zanlai vel ah pawh chuan ala in let thak thak a, enge maw in a rilru aluah ni mai awm hian mutthilh zai reng arel thei lo. Chutah thaw dim tak in an tho leh a, uain chu no khat pawm a thli in puanin pawnlam ah chuan an chhuak leh rih a, pawnlamah chuan thawm ala tam hle mai, sipai ralveng te chuan hmun hrang hrang ah meipui an chhep hluah a, an ti ti khawm lai laih a. Van chung sang tak ah chuan thla a eng kulh a, chu thla vel chuan chhum var thianghlim em em mai hi a kual ruih bawk a, Marcus-a rilru ah chuan enge maw lo thleng thut tur awm ni awm tak a awm a ang hle mai, a awm dan leh hawi her ah chuan. Sipai ho te erawh chuan eng thil dang mah chu ngaihtuah leh hre hmel awm pawh in an lang lo. Ngaihțhatloh hmel tak hian Marcus-a chuan chu thla eêng kulh chu a thlir vawng vawng a, chutih lai chuan khaw dai lawk ah hian chinghnia a la u ruah ruah zui lehnghal. Dar chanve emaw vel lai chutianga pawn a a din reng hnu chuan puanin ah chuan a lut leh ta a. Eng enge maw ngaituah chung a mu in, khawvar dawn hnaih lam ah chuan reilo te a chhing ve ta sek a. A harh leh meuh chuan khua alo var vek tawh a, Hestia pawh chu alo tho tawh in, alo kalchhuak daih tawh a. Muangchanga tho vin a thirkawr pawh ha chuanglo chuan dawhkan bula thing țhutthleng ah chuan an țhu leh rih a, chutah uain dahna dar bur chu ban in no khat pum hian an thli chhuak a. Chutih lai mek chuan Hestia chu a ralthuam famkim a inthuam chung hian alo lut a, Captain Aeson-a leh Sipai pathum hian an rawn zui lut bawk a. Marcus-a bul țutthleng ruak ah chuan an rawn țhu ve nghal a, chutah Hestia chuan, " Tukin zing khan Bersin leh Verna sipai te hi anlo thleng a," a bul chiah a thu Verna khaw sipai General zanriah an kilpui tawh pa kha en chung hian, " ila hria ang a, hei hi Verna sipai General Ajax-a kha ania, chuan hei hi chu General Thot- kha ania, pakhat leh hi Bersin sipai General Menelaus-a anih hi," an ti a, chutia a sawi lai chuan chung sipai pathum te chu an lo bu nghut a. Marcus-a chuan, " inlo kal thei chu a lawmawm hle mai, hei kan tum dan anglo tak in thil a kal dawn a ang riau mai in ka hria," a ti a. Chutah rang zet hian General Ajax-a chuan, " Hestia hian thil thlendan chu minlo hrilh nual tawh a," alo ti vat a. Uain chu tlem an lem sek a, chutah Marcus-a chuan, " ni e, kan rin aiin sipai anlo in chhekkhawm tlem hlauh a, chuvangin kan vannei phah ta ani ber, mahse Eastland leh Khorbi-a an țhiante an rawn thawhchhuah leh hun chuan beih an sak țalh tawh ang," a ti a, chutah General Thot-a chu rawn țawng chhuak ve in, " Ni e, Goth- ho hi chu an kawlhsen in indo pawh an thiam a, chuvangin ruahmanna fel tak neilo chuan beih an harsa ang," a rawn ti a. " Goth- sipai ho in a Eastland an lak tawh avangin General Ajax-a hi alo tlang nghal a, chuan Clenith leh Urdin- khua pawh hi thuthang ațangin an awp bet tawh ni awm tak ani a, chuvang chuan Delain ah thu zawt chiang tur in an kal a, chuan General Klent- an rem lo ruat puiin General Thot leh Menelaus te hi Phyra- ah alo kaltlang tir a, chuan General Ajax-a te hian an rawn umzui ve ta ani," tiin chung General leh an thuihruai sipai ho an rawn kal nachhan chu Hestia chuan an sawi fiah a. Clenith leh Urdin- khua Goth sipai ten an la tawh tih an hriat chuan Marcus-a chu a beidawn hmel hle a, rilru hah hmel tak hian an rum kawk a. Chutah zawi sap hian, " Gogonia- khua chu anla beilo tur ah ngai ila, enge chanchin hriat in nei em? " a ti a. " Gogonia lam chu anla kallo ani mai thei ani, mahse kallo pawh nisela an khaw dai lawk ah underworld veil-a in hawng si a, buaina chu an tawh tho ka ring, sipai in an awm chilh bawk silo," tiin Hestia chuan a rawn sawi a, chutah Marcus-a chuan Hestia en chung hian, " anih chuan kan pun belh ta bawk a, Captain Aeson-hian sipai thenkhat hruaiin alo va kal mai dawn em ni?" an ti a. Rang tak hian Hestia- chuan, " ni e, tam lutuk pawh hruai angaih ka ring lo, a chhan chu Eastland leh Khorbi- awp tu Goth sipai te hian Phyra- hi an rawn beih hmasak ber a rinawm tlat, Urdin leh Clenith- khua ami te pawh hian," tiin a rawn tui hnih leh nghal a. Chutah Marcus-a vek chuan, " engpawh ni se Captain Aeson-a te chu lova kal phawt mai se, duhdan tak ah phei chuan tukțhuan eikham velah hian chhuak nghal mai se a tha lo maw, khawthim hma vel in an thleng hman thei ang a, an ni leh Gogonia- mipui te tan pawn a awlsam zawk thei ang," a ti a. A sawi zawh rual chuan Hestia chu a țhuthmun ațang chuan tho vin, puanin pawnlam ah chuan a chhuak zui nghal ta daih a, chutah Bersin sipai General Menelaus- a lam chu hawiin Marcus-a chuan, " in lo kal thei chu kan lawm tak meuh meuh ani, in Lal Ixion-a pawh a hmai zahawm khawp mai, in khaw tan tlang in Underworld Veil- a in hawng ani awm a, enge harsatna te in tawk nasa em," an ti a. Chutah General Menelaus-a chuan ngaihsan hmel tak a Marcus-a en ran chung hian, " țanpui thei che u a kan awm hi kan lawm zawk asin, abik in nang phei chu i chanchin hrang hrang te kanlo hre tawh a, tunah hmaichhan ah ngei ka hmu thei che leh ral kan do ho tur hi kei mai nilo, kan khaw mipui leh ka sipai te ngei pawh hian an chak tawh in, an lawm hle a sin," a ti a.
Chu amah ngaihsanna leh fakna ri chu a bengkhawn tehchiam lo, General Thot-a lam hawi in, " min rawn beih hma ngeia kan beih hmasak angai ang, chuti lo chuan khaw mipui ten an tuar leh hlauh dah ange," tiin thu dang a sawi kai daih a. General Thot- pawh chu Marcus-a thusawi chu a pawmpui tih lantir nan a bu zauh a, " Phyra- ațang hian Eastland- hi a hnai ber a, chuvangin Khorbi, Urdin leh Clenith khua ami te pawh chu lo chhuak mahsela Eastland- ah tho an in nghahkhawm hmel a, chuvangin kan va beih hmasak hi a fuh zawk maithei ani," tiin a sawi zawm leh a. General Thot-a chuan, " Chutiang anih chuan Hestia- leh in sipai ho te hi Phyra- ah hian lo awmse, General Menelaus leh kan sipai ho te nen hian kan va kal hmasa mai dawn em ni? In sipai te pawh hi an chau tawh in chawlh hahdam na hun pek an ngai ve tawh ani," tiin rem an ruat a, Bersin sipai General Menelaus-a chuan lo tuihnih ve in, " Ni e, ka sipai te hi in sipai let lai an ni a, Verna- sipai te lah chuti bawk, chuvangin nangni chu alo bei hmasa tu leh kut lo thawh hmasa tawh tu in ni a, in hahdam chhung kan lo chhawk che u ani ve mai a," a lo ti ve bawk a. Marcus-a chuan, " ni e, kan sipai te hi an chau tawh khawp mai, engpawh ni se kan thawhchhuah vat chu angai ang," tiin an remruat dan chu țha a tih thu a rawn sawi ve a. Chutianga an in biak lai chuan Hestia chu a rawn lut leh a, an bula rawn phei pah chuan, " Captain Aeson-a te chu chhuah an in peih tawh e," a rawn ti lung lung a, chutah General Thot-a chuan, " khawnge kan thlahliam ang e, bak ah keini pawh vawiin lam a chhuah kan tum dawn chuan, ka sipai te pawh hrilh an ngai dawn sia, ka kalsan phawt mai ang che u," tih leh chhuah a rual nghal ta daih a. An bula la ding reng chung chuan Hestia chuan an ni ho chu mak tih hmel tak a en ho chung hian, " eng thu nge inlo rel a, khawilam ah maw kan chhuah ve dawn?" a ti a. General Ajax-a chuan a țhutna ațanga thawh pah hian, " engmah thutluk na pawh kan la siam chuang lo a, Marcus-a nen hian lo sawi țha leh ula, in ruahman dan ang ang kha ani mai, kei pawh riahbuk lam ah ka va phei ve phawt ang e," a ti a, chutia a sawi zawh chuan a chhuak ta nghal a, General Menelaus-a pawh chuan a zuichhuak ve ta nghal daih a. Chutia an chhuah hnu chuan Hestia- pawh chu Marcus-a ep chiah ah hian a rawn țhu ve nghal a, engtin nge ni dawn ti in awm fahran hian Marcus-a chu an melh a. Marcus-a chuan a rilru hria ni awm tak in," An pathum khan Eastland lam ah chhuah an tum a, kan sipai te an chau tawh hlawm bawk sia, chuvangin lo chawl rih ula, muangchangin minlo zui zawk dawn nia an ti a, chuan an mahni ho tur in min ti bawk a, nang chu Phyra-ah hian i lo awm rih dawn anih chu," a ti a. Enge maw chen Marcus-a thusawi ngaihtuah ni awm tak a a ngawih veng veng hnu chuan Hestia chuan," ni lo ve, helai ah hian lo awm zawk rawh, ka chau anih chuan nang chu ka let tam tak in i chau zawk ang, keiman ka va ho zawk ang e," a rawn ti chhuak a. Chutah, " kan chhuah vat chu angai ang, zanin tlai khawthim rual in chhuak ila, vațtian ah Eastland- chu kan thleng hman ngei ang, enge maw chanchin chu a in hrilh leh theih tho va, Phyra- ah hian ilo awm zawk tur ani," tiin a sawi chhunzawm leh a, Marcus-a chuan zawi fahran hian, " ni e, lo awm pawh ka pawi ti em em chuang lo, dik tak a sawi chuan chawlh hahdam chu ka duh khawp mai, mahse..." Hestia chuan a thusawi chu alo pawt chat vat a, " enge mahse? Marcus, diktak chuan i chau tawngkhawng tawh anih hi, hei hi kan buaina ani a, i lo in rawlh tam lutuk tawh ani, ngaihloh lamah lo ngai lo la, nang chuan kalna tur zinkawng thui tak zawh tur ila nei a, enge maw tawhsual i tawh hlauh chuan a pawi dawn em asin, chuvangin keimah ka kal zawk ang e," a ti a. Chutia a sawi zawh chuan a tho thurh a, pawn lam a chhuah pah hian, " General te ho chu ka va hmu ang e, Zanin tlai a chhuak hman tur in lo in peih hlawm sela a țha ang," a ti a. Marcus-ana a chhân leh hma chuan puanin chu a chhuahsan ta daih a, chumi nileng chuan Hestia- chu puanin ah chuan alo kir leh tawh lo. Marcus-a pawh chuan puanin chu a chhuahsan bik lo a, muangchanga Savun penga uain in pah hian a melh ngai a melh leh vung vung țhin a. A rilru ah chuan enge maw ni vei chu anei ani chiang mai, a changin a maimitchhing leh diar diar a, a rawn rûm chhuak leh hawk țhin bawk a, chutianga reife che sawn lova a țhut reng hnu chuan a tho nulh a, puan in chhung ah chuan muangchang hian, enge maw sawi ni awm tak a phun melh melh chung hian a vei tawn sek a. Khaw thim dawn țep ah hian Hestia- chu puanin ah chuan a lo kir chauh a, chutih lai chuan Marcus-a chu amah chauh a zanriah ei hian alo țhu a, Puanin chhung rawn luh pah chuan Hestia- chuan, " kan in peih ani mai e, General Menelaus-an Bersin- ațangin sakawr chungchuang sipai bakah sakawr tawlailir alo keng nual bawk a, a tihzia khawp mai," ring fahran hian a rawn ti lut a, chutah Marcus-a bulah chuan rawn țhu in zanriah chu a ei ve nghal bawrh bawrh a. Marcus-a chuan zawi sap hian, " Hestia, fimkhur tak in in che dawn nia, remruatna fel tak nen lo chuan che chhuak lo ang che, tin, dawithiam Zeddicus-a khan a țanpui mai thei a, amah awmlo mahsela thurualpui dawithiam tamtak in Goth- sipai ho chu an pui ngei ang, chuvangin inveng fimkhur hle ang che," a ti a. Thil țhial nuau nuau chung hian Hestia chuan, " ka lawm e, Marcus, Hnehna nen kan lo kir leh ngei ang, Pathian ten min țanpui ngei ka ring tlat," tiin achhang a. Marcus-a chuan, " dam a hmuh leh ngei che hi ka duh ani, indona ah chak lo dawn a in in hriat chuan thuchah kengtu lo tir vat ang che," a ti leh a. Savun uain peng ațanga uain thlit kerh kerh pah hian Hestia- chuan, " aw le, chanchin chu ka rawn hrilh vat dawn che nia, anih leh ka kal phawt mai ang e, kan in hmu leh dawn nia," a ti a, a uain chu a tlak pawp a, muangchanga tho in puan in chu a chhuahsan leh ta a. Marcus-a chu thil vei nei reng ang hian a awm a, a rilru chu a pik hmel in amah pawh chu a bawrchhawr riau in a hriat. Hestia- chhuak lai chu mit la lek lo hian ngun tak mai hian a thlir vawng vawng a, thlahliam pawh a tum hran chuanglo, a țhutna ngai ah chuan ala țhu reng tho va. Reife chutianga a țhut hnu chuan pawnlam ah chuan thawm alo awm a, sakawr phit ri dut dut leh General Menelaus-a, ring tak a a țawng ri lûng lûng te leh sipai ho thupe niawm tak a Hestia-au ri lauh lauh thawm te chu. Muangchang hian a țhutna ațang chuan a tho va, a kawr fual hak lai nen chuan puanin pawn lam ah hian muangchang hian a chhuak a. An puanin piah deuh ah hian sipai sang tam tak hi sakawr chung chuang chung hian anlo ding tlim hmur a, khua a thim deuh tawh avangin a țhen chuan meichher an keng fur bawk a. Chung sipai hma zawn ah chuan Bersin sipai General chu sakawr tawlailir a chuangin alo ding a, ring tak mai a au in thu alo sawi vel mek a, General dang te erawh chu hmuh tur an awm lo, a puanin kawt atang chuan ngawi reng hian chung thil thlir chuan a ding vung vung a. Enge maw chen chutianga a din reng hnu chuan khaw chhung lam ațang hian General Thot-a leh Hestia- hi chak tak a sakawr khalh chung hian an lo tlan a, chutia Marcus-a ding reng an hmuh chuan abul ah an lo tlan phei a, General Thot-a chuan, " Marcus, kan kal dawn tawh e, hnehna nen kanlo kir leh ngei ang," a ti a, chutia tih pah chuan zahna entir nan a kut chu Marcus-a lama lek chhuak in a awm ah an nghat leh a. Hestia- pawh chuan zawi fahran hian, " Pathian ten min veng anga, dam in kan in hmuh leh ngei ka beisei," a ti ve bawk a. Marcus-a chuan a chhâng hran lo, a hmel chu a hlim hmel ve deuh a, zawi muang hian a lu chu anbu nghat a. Chutianga anin biak lai chuan General Menelaus-a chuan Hestia- chu a rawn au a, chu veleh a awmna lam ah chuan an pahnih chuan an tlan phei ta nghal a. General Menelaus-an a Marcus-a a rawn hmuh chuan ban a rawn vai lauh lauh a, Marcus-a pawh chuan phur fahran lo hian an vai let ve a. Tichuan chung sipai ho chu Eastland- khaw lam pan chuan an chhuak ta a. An tam bawk a, khua ațanga an chhuah chhung pawh chu a rei ngang mai. An kal liam thleng in Marcus-a chuan a thlir a, an liam hnu pawh chuan pawnah chuan ala ding reng a, an hawi kual vel a, mahse thawm hriat tur em em a awm lo, ralveng sipai te chu hlim tak hian an in kawm a, mahse kawt lai ah chuan mi chhuak vak an awm mang lo, an rum kâwk a, puanin chhung lam ah chuan muangchang hian a lut leh ta a. A mutbu ah chuan a let tawp a, a muhil nghal burh burh a, mahse chutianga enge maw chen tui taka a muthilh lai chuan hmeichhia mangang tak a țe ri hian a ti harh zawk a, a meng kawk a, a harh chiang ngei mai, thawh phan pawh awmlo hian rang tak in a thova, a mutna bula a chem sei chu a la lawk a, a hak lai awmhmun kawrfual nen chuan hmanhmawh tak in pawn lam ah chuan a tlan chhuak ta nghal a. Pawn a thlen chuan thawmlo chhuahna lam chu zawngin an hawi vel ruai a, chutah a puanin piah deuh, sipai ralvenna sir lawk, underworld veil- in hawnna bul lam ațang chuan hmeichhe țe ri chu a rawn chhuak leh a, a chauh hmel tawh khawp mai, a au ri ațang chuan, sipai sawmhnih bawr vel hian enge maw ni hi anlo bawr laih laih a, chumi lam pan a a kal dawn chiah chuan khawchhung lama țang chuan thawm dang alo ri chhuak leh nghal a.
Ramsa thinrim hrâm ri leh nasa tak a in hrosa thawm a hriat chuan khawchhung lam chu a hawi phei a, mahse khua a thim em avangin a hmu chiang thei em em lo, sipai sawmthum rual vel hian ramsa lian tak, sakei ang deuh mai hi an lo bawr laih laih a, in bang kil pakhat ah hian an lo hual bet a, hlau deuh chung si hian an fei sei tak chuan an chhun leh zauh zauh țhin bawk a.
Mahse chuti lam a kal ta lo chuan hmeichhe țe ri lo chhuahna lampang ah chuan hmanhmawh takin a kal ta zawk a.
A thil hmuh chu mak ati ngei mai, a va thlen chuan, underworld veil kaw bul lawk ah hian ramsa mak tak, sakei leh sava, bâk lampang in thlahpawlh ang mai, a lu chu bâk lu ang deuh, ngho sei tak nei, bâk thla ang nei, mahse a taksa chu sakei ang deuh, awle vun ang mai a châr tlut mai, a ke chu savawm ke ang deuh mai pu hian hmeichhe pakhat thisen ina a kawr hak lai abual nuau tawh hi a lo țhutchilh run a, rapthlak taka in hrosa in alo hram vak vak a.
Sipai ho te chuan chu hmeichhe hliam chu laksak tum in an fei te chuan anlo chhun a, lungin an tawng chiam chiam bawk a.
Sipai pakhat chuan Marcus-a lo kal a hmuh chuan,
" ka pu, chhan tlak ala awm, ala thi lo," tiin hah tak a thaw hluam hluam chung hian alo hrilh mawlh mawlh a,
chutah Marcus-a chuan, "khawi ațanga lo kal nge? Engzah nge an nih? " tiin a zawt let a.
Chu sipai chuan an piah lawk a underworld veil kawh pah chuan,
" Veil- ațang sawn anlo chhuak a, panga lai an ni," tiin a chhang a.
Chutah Marcus-a chuan in ring tak in a ngunhnam chu a lek chhuak a, a bula sipai pakhat fei ken lai chu a laksak zui nghal a.
Chutah ring deuh hian,
" Veil- ah hian kan luh tir tur ani lo, kan tihhlum ngei ngei angai, Veil- lamah sawn lo va tlan khalh ru, a țhen in a hma lamah hian lo chhaih buai ula, hmeichhia pawh saw kan chhan tur ani," a ti lung lung a.
A sawi lai mek chuan sipai sawm vel hian Veil- lamah chuan an tlankhalh nghal a, a luh theih lohna tur in a kotlang ah chuan hriamhrei nen an ding țhup a,
hmalam a sipai țhenkhat in an chhaihbuai lai chuan nikhawhrelova let reng hmeichhia chu sipai țhenkhat chuan an la sawn thei ta hram a, chutah an au dur dur a, an fei sei tak tak chuan an chhun ruih ruih bawk a, thal mu te lah chu a taksa ah chuan a bur fer fur a, Marcus-a chuan hnunglam ațanga veh phei in a ke hnunglam pakhat zawk chu a theih patawp hian a sat vak a, chutah rang tak in a zak dawh ah tak mai chuan a vit tlum leh ta hmawk mai a, mahse a phawi leh mai thei lo, phawi tum a a pawh lai tak chuan chu ramsa chu a rawn in her thut a, a ke hma lehlam chuan Marcus-a chu a rawn beng leng lawp a, hlauhawm taka hram ruai ruai in a awp ta ruai ruai a.
chu veleh sipai ho chuan an rawn bawr nghal a, ațhen in an feiin an chhun a, țhenkhat in an chem leh hrei ken te chuan an sat chawrh chawrh bawk a.
Khatia ramsa in a a ben len lawp hnu khan enge maw chen chu nikhaw hrelovin lei châr ah chuan a let reng a,
a harh chhuah leh meuh chuan a puanin ah a lo awm reng tawh a, a lu leh a malpui vel chu a lo intuam bur a, nula hmelțha tak hian a hliam țhenkhat te chu alo silfai sak mek bawk a.
theileh theilo hian a rawn țawng chhuak a,
" engtin nge nula kha, ramsa kha engtin nge an tih tak,"
nula i chuan khawngaih thla la deuh a melh chung hian,
" i sipai ten an tihlum vek tawh e, nula pawh kha an chhanchhuak a, enkawl mek ani,"
chu thu a hriat chuan a rum nghut a, a hmel chu a hlim hmel deuh,
nula i hnenah chuan,
" khawngaih in minlo tung tho mai teh," ati a.
Nula i pawh chuan thuawih tak hian dîm deuh hian muangchang hian tung tho a.
Chutih lai chuan nula dang pakhat hi lo kal in Marcus-a bulah chuan thing dawhkan hniamte hi a rawn hung a, Vawksa hem hmin leh thlai leh thei rah chi hrang hrang hi alo chhawp nghal bawk a,
chutia a chhawp zawh chuan Marcus-a hma zawn ah chuan a ding reng a.
a hliam enkawltu nula, a bula țhu chuan,
" ei rawh, ni hnih lai engmah i ei lo ania, i ei loh chuan i chau lutuk ang," a ti a.
" ni hnih a? Engtin maw i sawi? Enge ka chungah lo thleng a?" tiin mak tih hmel tak a chu nula en chung chuan Marcus-a chuan an ti ang he haw a.
Chutah nula chuan zawi sap hian,
" ni e, ni hnih pumhlum lai nikhaw hrelovin i awm alawm, chuvangin thil ei i mamawh ania," a ti a.
Chutih lai chuan sipai pakhat hi puan in chhungah chuan a rawn lut a.
Chuveleh nula i te chu an in thiarfihlim nghal vat a.
Chu sipai pa chuan zahna chibai a buk hnu chuan,
" i lo țha chhuak leh thei chu a lawmawm hle mai, hman zan bakah nizan khan ramsa dang Underworld ațang khan a rawn chhuak leh a, mahse hei zanin chuan kan la cháng chhuak leh rih lo anih hi," a rawn ti nghal bawrh bawrh a.
Marcus-a chuan uain in pah hian țhu tur in a kut chuan a zâp a.
" a pawi hle mai, ka lo che chhuak theilo chu, nula i kha a dam chhuah a beiseiawm em?" tiin an zawi zui lehnghal a.
Chu sipai chuan țhut pah hian,
" pawi ti reng reng suh, kan ti thei alawm, General Hestia- in engkim min hrilh tawh asin, chuvangin i theih phawt chuan awm hahdam rih la a țha ani,"
uain dahna dâr bur tung sei tak ațang chuan uain a thli chhuak leh karh karh a, chutah sawizawm leh in,
" kha nula kha a țha tawh khawp mai, a bân leh a dâr ah hliam nasa ang reng anei a, mahse ngaihtuahawm em em chu ani lo,"
A uain thlit chu vawikhat a tlak pawp in a sawizawm leh nghal a,
" ni e, hmanzan khan Underworld ațang khan ramsa panga lai anlo chhuak a, mahse pahnih chu anlo chhuah rual in kan lo bei a, Veil- chhungah kan nawr liam lehnghal a, chung kan buaipui lai chuan khawchhung ah a țhen anlo lut hman a, mahse i ho vin pakhat chu kan tihlum thei ta anih kha, khatia nikhaw hrelo a i awm hnu lawk khan pakhat chu kan tihlum leh a, pakhat chu khaw chhungah midangin anlo tihlum leh a," tiin an sawi zung zung a,
chutah Marcus-a chuan,
" in tihlum theih chu alawmawm khawp mai, kei lah hei ka che chhuak thei rih silova, engkim in chungah a awm vek ani mai a, chuvangin engtik lai pawn fimkhur tak in awm reng ang che u, hmelma chin lah kan hre silo," zawi fahran hian a ti a.
Chu sipai pa chu a tho thurh a,
" anih chuan ka kalsan rih phawt mai ang che, chanchin chu kan in hrilh leh zel mai dawn nia, rilru hahdam tak in lo awm rawh," a ti a, puanin chu a chhuahsan ta a.
Marcus-a chu a che hleithei lo a, mahse a rilru chu a harhfim kar reng tho.
Nula pahnih te chuan an vil chawt a, Marcus-a pawh chu puanin ah chuan a tawm char char a, puanin hung chhung bak apel ngai lo,
chutiang chuan kâr hnih vel lai chu puanin chhung ah chuan a tawm char char a, a hma a rawn tlawh tu sipai khan an ralven dan leh khawchhung chanchin te hrilh a arawn tlawh zauh zauh tih loh a puanin chhung a tlawh tu pawh a nei lo.
Hestia- te rammu an lo haw leh lai thleng chuan.
Kâr thum emaw vel lai hnu ah chuan Hestia- te chu an lo kir leh a, pawn lam ah chuan an thawm chu a ri deuh hluai a, mahse angaihsak em em hran chuang lo, amah enkawl tu nula pakhat zawk chu hmanhmawh deuh in a rawn lut a, sipai ho- rammu anlo thlen thu phur fahran hian an hrilh a, Marcus-a bulah chuan a rawn țhu ve a.
Hestia- ina puanin a rawn luh lai chuan Marcus-a leh amah enkawltu nula pahnih te chuan tukțhuan alo ei mek a.
Hlim hmel taka Marcus-a te rawn pan pah chuan Hestia- chuan,
" Kan lo thleng deuh chiah e, Captain Iolus- an chanchin minlo hrilh a, enge i an tawh a," a rawn ti sawk sawk a, An bul a rawn țhut ve pah chuan nula te chu an melh zauh zauh a,
Marcus-a chuan Hestia- rilru chu hria niawm tak hian,
" ni e, heng nula fel tak tak te hian min lo enkawl char char a, an fel khawp mai," a lo ti vat a.
Chutah nula pakhat zawk chu tho vat in Hestia- eitur in bawngsa ti kan ro leh grep rah rêp hi a rawn la vat a.
Chutiang chuan tukțhuan chu hlim tak in an ei ho a, an ei zawh chuan nula te chuan an chhuahsan a, Hestia- pawh chuan a thirkawr te phelh in awmhmun kawrfual a in bel a, a in ti fai sawk sawk a, Marcus-a chu a chhuahsan leh ta a.
Khaw thim dawn țep ah alo kir leh chauh a, Marcus-a nen chauh chuan zanriah an kil dun a,
" Enge inva kalna chanchin chu? Goth- ho chu in nawr kir thei ta maw?" tiin Marcus-a chuan an zawt a.
" tunah chuan kan dang kir thei chu ani a, mahse hei ai chuan Underworld Veil- hian ka rilru a luah zawk ani, an remruatsa ah kanva in tulut ni berin ka hria, engkim hi a buai zo vek ani," Hestia chuan a ti a.Marcus-a chuan,
" Lei hnuai leh Van chhal in ka zawt a che, enge in va kalna chanchin chu?Zeddicus-a te in hmu lo maw?" a han ti a.
Hestia- chuan,
" khatia Eastland lam pan a kan chhuah khan, kan kal chak em em lova, kawng a țhat em em loh bakah sakawr tawlailir te ho avangin kan muang ang reng a, zan hnih ram palailenga kan thang hnu in, varțian ah Eastland- khaw dai kan thleng a, enthla tu te kan intirh hnu in fehrehsan bawr vel ah kan chhuak țan a, General Thot- leh General Menelaus-a ten chhim leh hmar lam ațangin sipai enge maw zat nen an țhawng thut a, chuan General Ajax-a leh a ho ten Clenith khaw lam panna lamah in saseng tur leh țanpui tu lo kal tur an awm tak in tiin an lo chang bawk a, chuan keiin khaw luhna lam ațangin sipai pangngai bak ah thal kap mi tam zawk nen kan luhchilh ve thung a, mahse rin aiin an lo tam em em lo, keini ai chuan an tam zawk tho na in General Menelaus-an a alo hruai Sakawr tawlailir te kha an țangkai hlauh a, milian pui pui te pawh kha sâng dawn lai an lo awm a, mahse sakawr tawlilir khalh tu te khan beih an lo thiam khawp a, an kut ah kan dah ani ringawt.
Khaw thim dawn thlengin kan in bei a, mahse enge maw zat chu Clenith- khaw lam pan in an tlan chhuak hman tho a, chung ho erawh chu an lo la thawk chhuak leh lo, chumi zan chuan buaina dang em em chu kan nei tawh lo a, sipai enge maw zah chu an rawn inpe a, in pe duhlo ho, khua thlanchhuah san chuang silo ho chu rawlral in an che leh a, mahse an che na lutuk hran lo, chung ho ai chuan Underworld -ațanga sakawlh lo chhuak te khan minti buai zawk ber ani, chung ho lak ah chuan sipai pawh kan in hloh nasa.
Chuan a ni khatna ah chuan hnehna kan chang ani ber a, mahse a tûk zan, zanlai vel ațangin ramhnuai a tlanbo ho te kha an ni ang, an tam em em lo na in an che rawva a, beih pawh an harsa, Underworld ațanga sakawlh lo chhuak lo ven angai bawk si a, khawvar dawn ruai ah ram lamah bawk an in saseng leh a, a buaithlak na ber chu keimahni sipai nilova nunau pawisawilo an rawn bei hi ani, an mahni tak man hleihtheih siloh in an rawn che zeuh zeuh reng a, in rukbo leh ruang chhar nawlh nawlh tur lah a awm deuh reng a, chutiang chuan karkhat bawr vel lai kan buai a, mahse General Thot-a hovin sipai leh thal kap mi țhenkhat ten khaw dai vel ramngaw an han tuam a, an tawmkuk ah luhchilh in tamtak an tihlum a, tlem a zawng chu an tlanchhuak a, chung ho erawh an rawn inlar leh ta rih lo, Clenith emaw Urdin- emaw ah an tlan anih loh chuan Khorbi- lamah an kal ani ngei ang.
An la rawn che chhuak leh vat in a rinawm a, mahse engtik ah nge khawilai ațangin nge tih chu rinthu mai lo chuan sawi theih pawh ani lo, mahse rei chu ani lo ang," tiin tui tak mai hian a sawi a, chutah Marcus-a chuan,
" Ni e, an rawn thawk chhuak leh ngei ang, chutah chuan Zeddicus-a pawh a inrawlh tawh ngei ang," tiin a rawn tui hnih a.
Hestia chuan,
" ni e, an sulhnu leh chet dan ah hian Goth- ho ringawt chu an ni theilo ani, mipui awka atang leh sipai kan man țhenkhat sawi hmang ah pawh dawithiam țhenkhat chu an in rawlh ngei ani, tin khaw dai lawk ah pawh General Thot-a leh a ho ten Ritual (inthawina. CR) atan a an hmun serh țhenkhat leh an bungraw hman țhin ni awm tak tak an hmuchhuak bawk a, chuvangin Zeddicus-a leh a țhuihruai ho chu an inrawlh ve ngei ani. Tunah pawh khan kan bei dawn ani tih an hre lawk ani ngei ang, hmuh tur an awm lo na in Underworld ațanga sakawlh lo chhuak kha an țhahnem in an kawlh hlawm em mai a," tiin a sawi zawm leh a.
Ngaihnawm tih hmel tak a lo ngaihthlak kar pah hian Marcus-a chuan,
" chuan inlo kir san leh vek mai tihna em ni?" tiin an zawt zui lehnghal zat a.
Hestia chuan phur tak a sawi zawm leh in,
" khatia khaw chhung lo awp tu ho kan han tukdawl hnu kha chuan an reh ta vang vang rih a, khua pawh a ralmuang in Underworld ațanga sakawlh lo chhuak zeuh zeuh tihloh chu buaina hranpa em em a awm tawhlo bawk a General Ajax-a leh sipai thenkhat kan hnutchhiah ta rih anih kha, mahse kan kal leh vat chu angaih ka ring," a ti a.
Chutia a sawi zawh chuan a tho nulh a, a intifai sawk sawk a, a mu nghal ta daih a. Marcus-a erawh chu eng enge maw ngaihtuah niawm tak in ala țhu reng a, zanlai vel thleng deuhthaw awmhmun pawh sawn lova a țhut reng hnu chuan muangchang hian a thova, reilo te pawn a a chhuah hnu in châkloh hmel tak hian a mu ve ta a.
Chutiang chuan buaina hranpa em em pawh neilovin kar thum vel emaw lai chu pangngai tak in hun an hmang liam a, zan rei lam deuh a Veil-ațanga sakawlh lo chhuak leh zauh zauh țhin tihloh chu buaina an nei meuh lo. An mahni sipai ho an tam bak ah a beih dan an thiam hrim hrim a chuvangin sakawlh lo chhuak țhin te pawh chuan khaw mipui te lak ah harsatna an siam meuh lo.
Mahse ni a liam a, hun aliam ve zel a, chutiang ang reng chuan an awm reng thei bik ta lo.
A tir ti ila, Hestia- te rammu anlo kir tirh vel lai kha chuan zan li zan nga dan ah te sakawlh pahnih te, pathum te lek lek anlo chhuak țhin kha ani a, mahse hun alo rei a, zan tin mai nilo, chhun en lai te pawn an lo chhuak ta zeuh zeuh a, chubak ah vawikhat ah sawm rual te anlo chhuak in, an tam telh telh a, an kawlh hlawm em em mai bawk a.
Engmah dang pawh an ngaihtuah thei ta lo, mipui nun chu a ralti in zanah phei chuan kawtlai a chhuak hmuh tur pawh an awm meuh tawh lo.
Marcus-a leh General dang te pawh chu an in hmukhawm zing in, thurel in an țhukhawm ta deuh reng a, an ngaih chu a țha bik chiah lo, enge maw buaina in mûng a awm ni ngei in an ring țheuh hlawm a.
Nih pawh ani mahna le(!)
engtiklai mai pawh chuan ruahthimpui lo thleng tur ang hrim in vanah chuan chhum dum chhah pui pui hi an in buk thuah tup tup reng a, thli lah chu na deuh deuh hian a tleh reng mai bawk a.
Ni e, van chung sang tak a thlipui tleh ri hum hum reng mai te chuan ngaih hi a ti țha thlawt lo.
Chubak ah zan rei lam leh zing khaw en hma deuh a dai bul vel a chinghnia û ruah ruah reng mai te chuan mipui bak ah sipai ho te thleng chuan an awm ati nuam chiah tawh lo.
Chutianga ngaihțhalo deuh chung chuan an han khawsa ve zel ta rih a.
Tlai lam beliang mun hun vel lai chuan Marcus-a leh General ho chu Marcus-a te puanin ah chuan a ngaite a thu rel in an țhukhawm leh țhap tawh a.
Ding chung meuh a General Menelaus-an a khaw awmdan in a angaih a tih țhatloh thu leh zanlam a a mang rapthlak tak te a sawi lai mek chuan chu puanin kawngkhar puan zar chu alo in hlim a, sipai pahnih hi an lo in zui lut nghal zat a.
An țhutkhawmna bul an rawn thlen chuan General Thot- chuan țhutna alo kawhhmuh nghal a, sipai pakhat zawk chuan Marcus-a en chung a zahna chibai a buk zauh hnu chuan,
" ka pu, Eastland- lam ațangin General Ajax-an thu a rawn thawn a," ati a, a bula sipai chu a melh zauh a, rang fahran hian a chhuak lehnghal a.
General Thot-a chuan zaidam tak hian chu sipai an hma a ding khawng reng en chung hian,
" khawngaihin lo țhu ve ta che, eng thu nge General chuan alo thawn che a," alo ti vat a.
Chutah sipai pa pawh chuan Hestia leh Menelaus-a inkar ah chuan țhuthmun an rem ve nghal sawk sawk a.
A thusawi tur châng chuan chu sipai pa chu ngawi reng hian nghakhlel deuh chung leh hlauhthawn hmel deuh chung hian an ngaichang țhap a.
Hestia- in a uain a thlitsak an tlak pawp hnu chuan chu sipai chuan a sawi țan nghal a.
" khatia in kal tak hnu khan buaina dang em em chu kan tawk lo a tih theih mai a, ka lo chhuahsan thleng kha chuan,
Underworld ațanga sakawlh lo chhuak țhin tih loh chu buaina dang kan nei lo, heng sakawlh te pawh hi ni li dan ah te zan rei hnu ah pahnih khat te anlo chhuak a, buaina em em chu an rawn siam thei bik lo, mahse tun hnai ni tlemte kalta ațang khan chhun leh zan ah sawm rual vel hi anlo chhuak ziah titih mai a, an huangtau sawt in an tam telh telh a, tunah phei chuan chhun khaw en lai takngial pawh in kawtthler te chu areh ruih a, mi chhuak vak pawh hmuh tur an awm mang lo," a ti a. General Menelaus-a chuan lo pawt chat in,
" ni e, Veil-ațanga sakawlh lo chhuak hi keini pawh in kan buaipui ber chu ani alawm, hmun dang Veil-in hawnna ah chuan keini ang bawk hian an buai ve vek tho maithei ani, chuvangin thil enge maw lo thleng tur chu a awm ngei ani, enge maw tak zawng kan la tawk ngei ang," tiin ring fahran lo te hian a rawn sawi a.
Chutah chu thuchah kengtu sipai chuan mak tih hmel tak a General Menelaus-a en ho chung hian a sawi zawm leh a,
" ka pu i hre lâwk ani maw, alo thleng mek tawh zawk alawm, a bulțanna chu," a ti a.
Chu a thusawi chu mak an tih hmel hlawm hle a, amah chu an en țhup hlawm a,
General Hestia- chuan,
" eng maw i sawi a? Engkim han sawi vek teh?" vin aw lek lek hian a ti a.
Chutah chu sipai chuan,
" ni e, ka lo chhuah hma ni lawk khan kan General thupek angin kan Captain-hruaina hnuai ah khaw dai vel endik tur leh hmelma te chinchang chhui turin sipai tlem azawng nen kan chhuak a. Chutah chuan ani he thil hi kan hmuh chhuah tak ni,
kan chhuak ta chu Underworld Veil- in hawnna hrul zel ah kan kal a, Eastland khaw dai lawk Clenith-khaw panna lam a ruam pakhat, lung hmun deuh ah hian nasa tak mai hian underworld veil- a lo in hawng anih chu, ti ti ah chuan chulai hmun chu kum tam tak liam ta ah kha chuan ngaw țha tak, ramsa chi hrang hrang leh chungleng sava tinreng awmna leh tualchaina hmun ber, tui thianghlim kang ngailo awmna leh nungcha ten a an rin ber ani țhin a, ramsa leh ramhnuai enkawltu Pathian Artemis-i ram leh a hring ahran pawh a a lênna țhin ani, mahse indona hmingthang ber Trojan leh Greek ho- indo lai khan indona Pathian Ares-a, rimawi leh ni pathian Apollo leh Artemis-i te hian Trojan- ho an țanpui a, Greek ho erawh Inneihna Pathiannu Hera bak ah tuipui Pathian Poseidon leh finna leh indona Pathiannu Athena-i ten an tanpui ve thung a.
He indona rapthlak leh hmingthang tak avang hian Pathiannu pahnih Artemis-i leh Athena-i te chu an in hmuthiam thei ta lova, nasa tak tak a an in beih hnu in Athena-i hian helai Artemis-i hmun serh leh bik hi anchhia lawh in thlaler, ah alo chang zo ta a, lui tui te pawh a kang zo ta ani tiin an sawi țhin,
ani lo lamah kan peng ta daih a,
Ni e, chulai ruam chhak lawk ațang chuan chulai hmun chu kan enthla a, tun theng pawh hian ka mitthla ah hian khang kan thil hmuh rapthlak tak tak te kha ka hmu a, min râp takzet zet ani,
Chulai ruam a Veil- inhawng chu a zau hle mai a, a chhung chu a sen huam mai a, meikhu dum tak mai hi a rawn khu chhuak luai luai a, a piah deuh ah chuan mual tluan tih theih deuhthaw hian puanin sang tam tak a in kaih thuah tup a, sipai ho lah chu an han tam em em mai khawp a, fanghmir ang mai hian an phu mur mur a,
chutianga kan en reng lai chuan chulai Veil- in hawnna bul hnaite ah chuan kawrfual dum ha hi mi sawmnga vel tur lai hi awmze nei tak hian an ding țhup hlawm a, a hmasa deuh hlek ah hian pakhat hi lehkhabu hlai tak keng chung hian a ding bawk a."
Underworld Veil hnaih ber a awm pa chuan lehkhabu chu hnai deuh a bih hian ring tak mai hian a chhiar a, a châng châng in chûng a hnung a puithiam kawrfual ha te chuan anlo zawm ve zauh zauh a, an thusawi awmzia pawh ka hre lo, dawi hlâni mai awm hi ani, chutiang a reife an chham dual dual hnu chuan an hmazawn a Veil- ațang chuan a hma aia nasa zawk hian meialh alo chhuak a, nasa tak mai hian meikhu dum hi alo chhuak nguah nguah reng bawk a, chuan chutia kan en reng lai chuan chu Veil- ațang chuan thawm rapthlak tak mai lo chhuak in ramsa nge ka tih dawn pawh ka hrethiam lo, rul ang deuh, lu sawm vel lai anei in ka hria, lian leh rapthlak tak. Dragon ang deuh hian a taksa chu a awm a, ke pali laiking ke ang deuh hi anei bawk a. A.. ka sawithiam dan ber chuan Dragon rul lu ang sawm lai nei hi ani ber mai, a hnung ah chuan bâk thla ang deuh thla te reuh te hi anei bawk a, rapthlak tak a hram ruah ruah chungin alo chhuak anih chu. Chutih lai chuan vanah chuan chhum dum chhah tak tak hi a let but but a, thlipui tleh tur ang mai hian van boruak ah chuan vaivut hi a leng sung sung a. Chutah kan ngaih ațha lova, hmanhmawh tak in kan kir leh vat a, mahse khua kan thlen hma deuh in thlipui nasa tak mai in min nuai hman a, vanneih asiam in hliam kan awm lo hlauh a, harsa tak in khua kan thleng thei hram ani. Chumi ni la la chuan inralrinna dâr kan vaw ri nghal a, khaw enkawl tu leh khaw puipa te kohkhawm nghal in, mipuite fimkhur tur in kan in chah a, tin ralveng te pawh kan in dah thuah nasa in, fimkhur thu hla ah khaw dâi vel pawh sipai ten an fang reng bawk a. Engtik lai pawh a lo thawkchhuak thut thei an nih avangin kan General in chanchin hrilh tur che u in min rawn tir nghal chuk chuk ani, sipai kan tam em em silo va." tiin a lo kal chhan leh an thil tawn te chu a sawi vek a. An melh ngai an melh tlawk tlawk a, țawng nachang pawh an hre lo nge sawi tur an nei lo zawk ni(!) Chu sipai thusawi chuan a tu pawh mai chu a țhawng em em vek mai tih chu an mit meng leh an hawi her ah chuan a lang chiang hle mai. Chutiang a reife rilru hah hmel tak a an ngawih țhap hnu chuan General Thot-a chu a rawn țawng chhuak hlawl mai a, zawi fahran mai hian, " Engtia hmalak nge tha ang?" a ti chuai raih a, General Hestia- chuan, " Misual Zeddicus-a hnathawh anih ngei chu, tun hnai a Veil-ațanga sakawlh lo chhuak nasa lutuk pawh hi he thil lo thlen dawn vang hi ani ngei ang," chutah General Menelaus-a chuan, " a enga pawh chu ni se, Eastland-ah chuan kan kal vat a ngai ani," a rawn ti a, a țhutna ațang chuan a tho a, thinrim in sehruh țeuh chung hian, " eng ang pawn rawn thawk chhuak rawh se, hnehna an chang ngai chuang lovang," ati tawn tawn a. " Rem kan ruat vat chu angai ani, mahse helai hmun hi chhuahsan vek chu a chi siloh," tiin Hestia chuan a rawn tuihnih a. Chutih lai chuan pawnlam ah chuan thawm dang alo chhuak thut a. In ralrinna dar chu a rawn ri bawl bawl a, chutah ramsa rapthlak tak a hram hum hum ri leh mipui thlabar ri te, sakawr tlan ri dut dut leh hriamhrei in khak ri țhawt țhawt thawm te alo ri nghal chuah chuah a. Chu veleh an vai chuan rang tak in an tlanchhuak nghal vek a. Thil thleng chu a mak ngei mai, khua a thim thet thet tawh avangin kawtthler hmun țhenkhat ah chuan meichher lian tak tak hian a in chhi fer fur a. Hrilhhai tak in puanin pawn ah chuan an han ding ren rawn hlawm a, Khaw tawntirh te a awm an nih avangin khaw chhung lam pan chuan sakawr a chuangin sipai țhenkhat chu chak tak tak hian an tlan zut zut reng a, chutih lai chuan sipai pakhat hian hmanhmawh tak hian a rawn pan a, an bul a rawn thlen chuan vin aw lek lek hian Hestia- chuan, " eng thil nge thleng a?" alo ti a. hah hmel tak a thaw hlawi hlawi chung hian, " General, Underworld Veil-atangin sakawlh an lo chhuak leh a, Veil- ațang bak ah khaw dai chhim lam ramhnuai atang sawn sawmli(40) rual vel zet an lo chhuak bawk a, tunah pawh anlo la chhuah belh reng a, khawchhung an bei nasa hle ani," a ti a. Chu a thusawi an hriat chuan Hestia- chu hmanhmawh tak in a sakawr chung ah chuan a zuang lawn vat a, khaw chhung lam pan chuan a tlan ta nghal a. Marcus-a leh General dang te pawh chu sakawr chungah chuan an chuang ve vat a, Hestia- zui chuan khaw chhung lam ah chuan chak tak mai hian an tlan liam ve ta a. Kawtthler hmun țhenkhat ah chuan sipai ho hian chu ramsa hlauhawm tak chu an lo hual tuau tuau hlawm a, chung ramsa thenkhat chu sipai te chuan an lo tihlum nual tawh ani ngei ang, kawtthler ah te chuan rapthlak tak tak hian anlo let ngût hlawm a. Chutiang a hmun hrang hrang a nunau mangang, țanpui ngai thawm leh ramsa in hrosa thawmte, sipai infuih ri au tuarh tuarh te a awm avang chuan hmun hrang hrang ah chuan an in țhendarh ta hlawm a. A sakawr ațangin a chhuk vat a, chutah a sakawr chu bêng in an riahbuk lam ah chuan a tlankir tir leh vat a. Chutih lai chuan a piah lawk a in pakhat chhung ațang chuan hmeichhe țe tuarh tuarh ri hi alo ri chhuak thut a, chutah bungbel nge, thil tla ri rum rum ri hian a zui lehnghal a. Hmanhmawh tak in chu in lam pan chuan a tlan nghal a, chutah thing kawngkhar chhah tak mai chu an pet hawng rawk a, in chhung ah chuan a lut zui nghal a. Chhuat ah chuan thil alo tla darh nuaih a, in bang kil khat ah hian chhungkaw khat hi ramsa rapthlak tak mai chuan alo dang bet a, an pa ber ni awm tak chuan tiang sei tak mai hi in ven nan alo keng a, mangang tak chungin a nupui fanau te chu alo uap khawm a.
Chu sakawlh chuan Marcus-a rawn lut a hmuh rual chuan a rawn zuan nghal a, mahse a lo awm sawn hman a vangin a zuan fuh lo, zuan fuh ngat selang chuan a tal chhuak tawh lo khawp ang le(!) rang tak in Marcus-a chuan țanhmun a siam rem nghal a, chu sakawlh ina a rawn zuan leh lai tak chuan dawhkan te let reng chuan alo in dang a, mahse a in dan na ber chu a seh a, nghet tak a Marcus-an a alo vawn ve tlat si avangin a thing vak vak a, Marcus-a chu a thing leng lawp a. Chutah rapthlak tak a hram ruai ruai in Marcus-a chhuat a let reng chu a pan leh ta chhur chhur a, chhuat a tlu chung chuan chuan a chem sei chu a hum nghet sauh va. Sakawlh ina a rawn zuan leh lai tak chuan, lo vei chhuak in chu sakawlh lu, a khabe hnuai ah tak chuan a lo vit tlang hrâwk a. Chutah chu sakawlh pawh chu che leh tur chuang a awm tawh lo, Marcus-a chu a bawh rawp a, a rûm chhur chhur a, reilo te hnu ah chuan a thi ta der a. Thei leh theilo hian Marcus-a chu a chu sakawlh hnuai ațang chuan a lo vak chhuak a,a ngunhnam chu sakawlh lu ațang chuan a phawichhuak vat a. Chutih lai tak chuan General Hestia leh sipai enge maw zah hi inchhung ah chuan an lo lut thut a. Chutia chhuat a Sakawlh lo let reng leh a bula Marcus-a, chem sei thisen la kai hnuang keng chung a lo ding reng an hmuh chuan kawngkhar bulah chuan an ding chawt a, enge maw chen chu mak tih hmel tak hian an en reng a, chutiang a an din reng hnu chuan Hestia- chuan Marcus-a chu nuih sak in, " kan dang kir thei ta e," a ti a. Chutah Marcus-a pawh chuan an nuih ve sak a. Sipai ho chuan chu chhungkua, hlauhna avanga la khur dar dar te chu an buaipui zui nghal a, Marcus-a erawh Hestia- nen chuan an in zui chhuak ta daih a. Pawn ah chuan thawm dang em em a awm tawh lo, khaw dai bul lam deuh a ramsa hram ri zauh zauh ri leh sipai thawm tih mai loh chu. Chutah muangchang hian an riahbuk lamah chuan an phei dun a, " an tam ang hu in an che nasa lo khawp mai, kan sipai te hian a beih dan an thiam hlauh hi a tihzia tak tak ani," muang ban chat hian Hestia- chuan an ti a,
Marcus-a chuan, " nunna chân kan nei em?" zawi fahran hian ati a. Hestia chuan, " Kan hriat theih chinah chuan neilo a ang khawp mai, khang ramsa ho kha sipai ten an tihlum deuh vek ani awm a, tlemte, an tihhlum bâng te chu hual khawm in Veil- lam ah an nawr liam ta anih kha," zawi te siin, a ruk a uar fahran hian si hian a ti a. Chutia ti ti pah a an kal mek lai chuan sipai pakhat hian sakawr pahnih hi alo kai phei a, Marcus-a te a hmuh chuan a pe a, sakawr chunga lawnkai in, an riahbuk lam ah chuan an tlan phei dun ta a. An riahbuk an va thlen chuan sipai ho chu an lo zi nuaih nuaih hlawm a, General Menelaus-a chuan eng enge maw sawi hian chung sipai ho chu a lo vin deuh țhat țhat hlawm a. Chutia an puanin kawt an thlen lai chuan General Thot-a pawh sakawr a chuang chung hian sipai tlemte nen anlo thleng ve chiah a, a sakawr ațanga a chhuk hnu chuan Marcus-a te lo ding reng chu ahmu a, hlim hmel tak a pan pheiin, " in țha maw? vanneih thlak tak in kan nawr liam leh thei hram e," a ti a. Muangchang hian Marcus-a te chu sakawr ațang chuan an chhuk a, Hestia- chuan, " kan țha e," ati a, chutah puanin ah chuan an in zui lut ta hlawm a. Țhutthleng ah chuan chauh hmel tak hian an țhu hnawk hlawm a, chutih lai chuan General Menelaus-a pawh chu alo lut ve a. Chutah Hestia- chuan, " Mipui ho hi engtin nge kan awm tir dawn?" " An ennawm chhuahna țhin in ah sawn zanin chu kan riahkhawm tir rih mai dawn emaw ni le?" chauh hmel tak hian General Thot-a chuan a ti a. Chutah General Menelaus-a chuan, " ni e, a remchang khawp ang, sipai venna hnuaiah awm sela, an hlauhna te pawh a ziaawm deuh ang," a rawn ti zui nghal zat a. Hestia- chuan, " kan dang kir leh thei hi a lawmawm rual in, kan in thlahdah ang tih a hlauhawm khawp mai, engtik lai pawh a lo thawk chhuak leh thut thei an ni si a, chuvangin sipai țhenkhat hruaiin nunau ho chu ka lo buaipui rih mai ang e, zanin ah chuan heti hian han awm phawt se la, naktuk khaw en ah kan la inching fel țha leh mai dawn nia," a ti a. Chutia a sawi zawh hnu chuan Hestia- chu a chhuak lehnghal ta daih a. Enge maw sawi a an țhut khawmuan hnu chuan General Menelaus-a leh General Thot-a te pawh chuan ralveng tur leh sipai ho kil kawi tur in Marcus-a chu an chhuahsan ve leh ta a. Marcus-a chu a chauh hmel hle a, muangchang hian dawhkan chung a savun uain ip chu an ban a, enge maw ngaihtuah pah niawm tak hian no chanve vel lek thli chhuak in tlem te te in a in a. A in zawh hnu chuan a in tifai sawk sawk a, pawn lam ah chuan a chhuak ve ta daih a. Chumi zan chuan General ho bak ah Marcus-a pawh chu a mu bik lo, zankhua in ralveng in hun an hmang a, khaw mipui te chu enge maw lo thil lo thleng thut palh ah tiin, leh an in leh bungrua ramsa ina a tihchhiat nasat avangin an ennawm chhuahna țhin in lianpui ah chuan tawt tak chungin an riah khawm tir a, Hestia- kaihhruaiin sipai țhenkhat in zankhua in an veng a. Marcus-a pawh ralvenna hmun hrang hrang tlawh kual in a sakawr chuan a tlan kawi reng a, mahse hemi zan hian ramsa kawlh an lo lang lo teh khiah a, chutah zing lam khawfing chah rual vel hian puanin lam ah Marcus-a chu chau tak chung hian a phei a, muangchang a a thir kawr phelh in, a in tifai sawk sawk a, a mutbu ah chuan a let tawp a, a muhil zui chu ani nghal mai.
(end chapter 12)..
Comments
Post a Comment