Ngaiteh, Naiad Nymph Calypso-i te ang mai a tuipui zau lam a Marcus-a te ka thlirve vung vung lai chuan tuipui hmar lam hla tak ah chuan chhûm dum hlawm lian pui pui hi țhawngaleivir ang mai hian van chung sang tak ah hian rapthlak tak mai hian a vir tup tup mai a, kâwlphe lah chu chu chhûm dum bul vel ah chuan a phe chuaih chuaih in țek a tla ri rum rum bawk a, ka awmna ațang a mel tam tak a hla ani na chung in chu țek tla rapthlak tak ri chu a ring in, a hnuai zawn vel ah phei chuan a ring in a rapthlak ngawt ang le.
Chu thil rapthlak tak lam a ka rilru zawng zawng ka pek lai chuan vawilehkhat ah ka hma zawn a tui chu nasa mangkheng hian a rawn fawn hlup hlup a, chu tuifawn chu lemchan dawhsan atanga lo per chhuak in kei pawh min rawn per hial anih chu.
Mak ti tak in ka thawmhnaw hak lai te kan en a, mumang leh mitthla mai zawng ani lo, ka thawmhnaw hak lai te chu tui a in theh ang mai hian zu han huh tak tak a maw le.
Ka thawmhnaw huh ka buaipui mawlh mawlh lai chuan chu lemchan dawhsan chung ah chuan thawm dang alo chhuak leh a,
rang tak a dawhsan lam kan hawi leh meuh chuan tuipui reng reng alo lang tawh lo,
Marcus-a chuan a hnunga Penelope-i phur chung hian chak deuh mai hian sakawr alo khalh dawr dawr a, reilo te ah an hma lawk a khaw tereuh te ah chuan an tlan lut ta a.
Khawchhung an luh rual chuan sakawr tlan pawh ti muang in muangchang hian kal pangngai in a kal tir a, a hnunga chuang Penelope-i chuan hawi kual rak rak pah hian,
" he khua hi Calypso-i sawi Albina- khua ngei chu ani ang, Marcus- enteh, mipui ho hi, an van ngui hlawm em em ve, an hmel te hi en chiang teh "
zawite hian Marcus-a chuan,
" ni e, hrî enge maw chu an kai ani ngei ang "
He khua hi Khaw tereuh te ni mah se a hmun hma a rem in, Marcus-a te kalna Klámata- tuipui bul hnai lawk a awm ani a, mahse Marcus-a te an kal lai hi chuan mipui ho chuan an taksa ah pân nasa tak tak an lo nei hlawm in an lo ngui ruai hlawm a, na tuar in kawtlai ah te chuan ngui tak mai hian an lo țhu kûr lup hlawm a.
Maktih hmel tak a hawikual ruai ruai chung hian an kal zel a, kawng sir in bathlar a putar thawmhnaw pawh in bel mumal lo leh cher tak mai, lu kun lap a lo țhu nuaih mai bul ah chuan sakawr chu ti ding in,
" ka pu, engti zia a mipui te hi nguai em em nge ni a, engthil nge lo thleng min hrilh thei em ?"
Marcus-an a biak pawh chuan chhan pawh a tum chuang lo, hre lo ang mai hian alu chu a kun tlat a, hawi pawh a rawn hawi chhuak eih lo.
Reife chutia chu putar chhan nghak a an din reng hnu chuan, beidawn hmel deuh hian Marcus-a chuan a sakawr chu a kal tir leh ta a.
kalsawn tum a a sakawr a tih kal rual chiah chuan chu putar chu rawn hawi chhuak in,
" hri chhia a leng ani "
chauh hmel tak hian a rawn ti chhuak hlawl a.
Sakawr tih din leh rual in Marcus-a chuan,
" Hrî a ?, engtik ațang in, enge a chhan ?"
chu putar chu muangchang hian an țhu țha te te a, chutah Marcus-a lam hawi chung hian,
" Ni sarih vel lai ani tawh, hri mai bak ah pân chhia a leng bawk a, mi sang tam tak an thi tawh, kan mang țep tawh anih hi "
Marcus-a leh Penelope-i te chu mak tih hmel tak hian an in en rual țhawt a, Penelope-i chuan Marcus-a chu kuah pah in an țhut hnaih belh sauh a.
Chu putar bawk chuan,
" Dawithiam ropui leh sual Siraka-i leh a thurualpui ten Mount Hepnos-a Druid- ho khua tihboral tum in chet an la a, Mahse, Hepnos- tlâng chuan hnuai ngaw a cheng Milian Cyclop- ho ten lo do in, Druid- ho an lo chhan a, Cyclop- ho hi tam lo mahse Dâwi an lo thiam in hmanrua chher thiam tak mai anlo ni a, dâwi lak ațanga in venna hmanrua te an lo siam in, nasa tak in an in bei a, Siraka-i te pawl hian an luhchhuak thei ta lo a ni. Chuan chu Cyclop ho leh Druid- ho te chunga a thinrimna avang chuan a bul vel khaw hrang hrang chung ah a țuan a, a dawi thilthihtheihna hmang in hripui a len tir chiam a, mi tamtak chu hri avang chuan thiin, kawtlai ah te phumtu awm lovin an tlu pheng phung mai asin.
Chu pawh chu ala duh tawk lo a, hri ina a tih hlum bâng te chung ah chuan pân chhia rapthlak tak tak a len tir leh mek anih hi "
chutia a sawi zawh chuan lungngaih hmel tak hian a in hnit hlawp hlawp a, a lu chu a kun leh daih a.
" ka pu, in khaw chunga rorel tu hming min hrilh thei em, a chenna in nen "
dah pawh rawn dak chhuak tawh chuanglo in zawi te hian,
" Paulin-a, in hma zawn piah deuh a, in lian deuh saw "
" kan lawm lutuk e, ka pu "
chu putar lungngai tak chu kalsan in an hma zawn a in lian tak a bathlar a mi lo awm tuau tuau na lam pan chuan hmanhmawh deuh in a sakawr chu a khalh leh ta a.
An hma zawn a in lian tak mai pan an an kal lai chuan chu in bathlar vel a lo awm te chuan mak ti awm tak hian an lo en deuh țhup a.
Chutiang a miin a an lo thlir pawh chu engah mah ngai lo ni awm tak hian Marcus-a chuan sakawr chu ti ding in an zuangthla thauh a, Penelope-i pawh chu hlang thla ve nghal in an bul lawk a mipa naupang pakhat bal hnek hnek te chu a kut in an hui zauh a, chu veleh naupang chu phur hmel deuh a lo phei in a lam ah chuan coins (pawisa thir) pahnih hi Marcus-a chuan an theh phei a, naupang chuan lo dawng chat in lawm hmel deuh hian a nui ver ver a. Marcus-ana a sakawr a kawk zeuh chu hrethiam niawm tak in naupang chuan sakawr chu a rawn kai sawn vat a.
Bathlar a mi lo awm tuau tuau leh anmahni en zeuh zeuh chung a inbe ru sep sep pawh chu engahmah ngai lovin, Marcus-a chuan Penelope-i bân ah an kai vut a, inchhung lam ah chuan an in zui lut ta daih a.
Inchhung chu a pawn lam lan dan aichuan alo te daih a, enge maw sawikhawm ni awm tak hian mi enge maw zah hi thupui fun fe hian anlo țhu țhup a.
Sipai thuam famkim a inthuam leh nula tleirawl, Nymph- ni mai awm a hmelțha lo in zui lut chu maktih hmel tak hian an thusawi lai te chu chawl in anlo en țhup a.
Chutah Marcus-a chuan ring deuh hian,
" He khaw roreltu Paulin-a hmuh kan duh e "
chung thukhawm ho zing atang chuan Pa upa lam deuh zaidam hmel tak hi alo ding chhuak a,
" Keimah hi ka ni e, enge in duh tak le "
" Baculla Lal Alpheus-a fapa Marcus- Valerious- ka ni e "
Chu a thusawi an hriat chuan inchhunga mipui ho chu an thûm deuh mur mur a.
a hnunga zah hmel deuh a lo ding zum zû Penelope-i lam hawi pah chuan,
" hei hi Penelope-i ani e "
Paulin-a lam hawi chuan,
" thil thlen dan min hrilh thei em "
" Lal ropui Alpheus-a fapa maw, lo țhu hahdam phawt teh u, inlo kalna a hla awm si a "
chutia tih pah chuan an bul lawk a hmeichhia lo ding reng pakhat hnen ah chuan țhutna kawh hmuh tur in an mitmei zauh a.
Chu nu chuan țhutna tur kawhmuh vat in intur leh eitur engemaw ni hi alo chhawp sak vat vat bawk a.
An țhut fel hnu chuan an zing ațang chuan sipai thuam a inthuam palian deuh hi alo ding chhuak a, chung ho hnenah chuan,
" tunah pawh hian kan khaw țhenawm Delain-ram ah Sakawlh rapthlak tak mai an chhuah leh tawh a ni a, mipui nun a ti ralți khawp mai, zan ah phei chuan pawn chhuak ngam pawh an awm lo, sipai enge maw zat in nunna an chân phah tawh "
beidawn hmel deuh hian chupa chu an en țhap a, an zing a pakhat chuan chu sipai chu en pah in,
" inkhua kha Hubin- ani ti raw ?"
chu sipai chuan aw tih nan lu an bu nghauh a,
chupa vek chuan,
" enge tunah in khaw dinhmun ?"
sipai chuan rum nghut pah hian,
" kan khua ah chuan hri chhia kha a leng nasa em em lo a, a țantirh lai vel tih loh kha chu a reh tawh ani mai, chu chauh chu kan tawrh chu ani a, kan vanneih phah in khawdang pawh kan țanpui theih phah ani "
Paulin-a chuan beidawn hmel tak hian,
" kan khua hi a tuar nasa ber kan ni mai thei ani, nitin in kan la thih belh zel chu ania, kan Druid- damdawi thiam rawn te lah hian anti dam thei silo "
chutia beidawn hmel tak a an tawrhna vel an sawi mek lai chuan, Marcus-a chuan Paulin- a en pah hian,
" khaw mi te natna chu ka țhiannu hian a enkawl thei maithei, a țanpui tu tur an awm thei angem "
Maktih hmel tak hian Marcus-a te pahnih lam chu an rawn hawi țhawt a, Paulin-a chuan,
" Ni e, kan damdawi thiam rawn ve te hian anti dam thei silo a, min țanpui theih chuan kan lawm khawp ang, i țhiannu pui tur chuan tupawh hi kan in huam vek ania "
chutah Marcus- chu lo dingchhuak in an hnenah chuan,
" Nitin a mi an thih belh zel chuan hmanhmawh a ngai anih chu, "
nichin a sipai Hubin-khua ami lam hawi pah chuan,
" Delain- khua chu heta țanga engtia hla nge ?"
Lal fapa ani tih a hriat tawh avang chuan zah hmel tak a a lu kun zauh in,
" ka pu, Zing ah chhuak ila chhunlai vel ah chuan kan thleng hman ang "
" Sipai engzah nge ineih "
" Hri chhia in a a man nual avangin leh khaw dang țanpui a an chhuah nual avangin, tunah chuan Delain- sipai nen sakawlh châng leh khua veng zathum bawr vel an ni "
" chutiang anih chuan zing khawvar rual in kan chhuak ang a, chu Sakawlh chu kan bei dawn nia, chumi chhung chuan i sipai tlem azawng chu he khua veng tur hian i hnutchhiah angai ang "
chutianga Marcus-an a rem an ruatpui zung zung hnu chuan an hmel beidawng tak tak te chu alo hlim hmel in, harh ta vuk hian an hriat.
Rem an ruat fel zung zung lai chuan mipa sãng deuh leh nula thau deuh lampang hi inchhung ah chuan an rawn lut ve a,
Paulin-a chuan țhutna lo kawhhmuh sawk sawk in, Marcus-a te lam chu a rawn hawi a,
" heng mi te hi an nia, kan damdawi thiam Elia leh Luna-i te chu "
Penelope-i chu rawn dingchhuak in chung mi a Druid-hnampui te hnen ah chuan,
" kei pawh hi inchipui tho ka ni alawm, Isle- khua a cheng ka ni a "
maktih hmel tak hian chung Druid- mi pahnih te chuan Penelope-i chu an en hu a,
enge maw sawi tum ni awm tak a hmeichhia zawk Luna-i a an zuau lai chuan, Penelope-i chuan thil a sawi chhunzawm leh nghal daih a,
" Engtin nge in enkawl țhin mipui te chu, enkawl dam in nei tawh em ?"
a mi pa zawk Elia chuan beidawn hmel tak hian,
" kan damdawi hriat ang ang te chu kan hmang zo thawkhat tawh chu ani, engmah kan la ang thei chuang lo "
" Helai ram velah hian Kítrina Fýlla (greek tawng ani a, 'hnah eng' tihna)- hnim leh Glykós (greek tawng tho ania, 'thlum' tihna) par a awm ngai em ?"
hriat hmel loh tak hian chumi te pahnih chu an in en ha a, chutah Penelope-i chuan,
" Kítrina Fýlla- chu a hming ang mai hi ani a, hnah eng, kutphah tiat vel a hlai, bial lam deuh, tawite buk deuh, a bawr a awm chi ani a, Glykós- chu hnah sin sei tak, a kung chu khup thleng vel a sang, a par chu Ball ang mai a mum, a var ani a, chutiang chu helai ram ah hian a awm miahlo maw ?"
Druid- pa chuan,
" i sawi ang chu ka hria e, mahse helai ram ah chuan ka la hmu lo reng reng "
chutih lai chuan Nichin a țhutna lo kawhhmuh tu leh eitur lo pe tu hmeichhia kha Penelope-i bul ah chuan alo phei vat a, Penelope-i chu zah hmel tak a en chung hian,
" ka pi, i hnim sawi ang chi chu ka hmu tawh alawm "
Penelope-i chuan hlim hmel deuh hian,
" i hmu chiah maw, khawilai vel ah nge ?"
" aw, i sawi ang ngei chu niin ka hria, kan khaw dâi a luite bul ah sawn ka hmu ani "
" anih ngei chu, lui kam leh tui hnaih lam ah an awm țhin alawm "
chutah ring deuh hian Penelope-i chuan,
" chung hnim te chu kan lak vat angai ang, damlo enkawlna tur damdawi anih chu "
in chhung a awm ho te chu lawmin an thûm mur mur a,
chutah Marcus- alam hawi pah chuan zawite hian Penelope-i chuan,
" ka theih ang tawk a enkawl kan tum ange, nang pawn min țanpui ngei angai dawn nia "
hlim deuh hian Marcus-a chuan an nui suk a, chutah Penelope-i bengbul ah hian zawite in,
" Aw Lalber, i thu vek ani e "
Penelope-i chuan ner nûng nûng chung hian Marcus-a chu an melh vak a.
Chutah Marcus-a chuan inchhung a țhukhawm ho lam hawi chuan,
" chu hnim la tur chuan kan chhuah vat angai ani, lo kal ve thei in awm em "
Hubin khaw sipai kha a țhutna ațang hian alo dingchhuak a,
" Ka pu, Ka sipai thenkhat te nen kanlo zui ang che "
chutia a sawi lai chuan Paulin-a pawh chu alo ding chhuak a, Marcus-a lam hawiin,
" hmeichhia thenkhat te pawh hian zui ve che u rawh se "
Nichin a Penelope-i hnim sawi hmu tawh inti nu lam hawi hian,
" Leda- i thiante sawm vat la, va kal thuai rawh u khai, khua in a thim hnan palh hlauh ang che u "
Leda-i chu a țhiante sawm tur chuan rang tak hian in ațang chuan a tlanchhuak nghal a,
Hubin sipai leh a ho te pawh chuan muangchanga zui chhuak ve in Druid- mi pahnih te pawh chu an chhuak ve a.
Pu Paulin-a chuan Marcus-a te lam hawi pah chuan,
" Mi ropui Lal Alpheus-a chuan kum tamtak kal ta ah khan Goth- hnam kawlhsen ho lak ațangin kan khua hi a chhanchhuak tawh a, tunah a fapa Marcus-an "
a zu no chu ken kan pah in,
" tunah hian kan khual zahawm, Baculla Lal fapa Marcus-a leh Nula Penelope-i hming in zu no i dawm tlang ang u "
an zu no chu an hma lam ah an keng chhuak far hlawm a, hlim tak a in khak rîk tir in an lem rual ta dial hlawm a.
Him tak a zu no an dawm lai chuan Pawnlam ah chuan Sakawr tlan ri dut dut thawm alo ri a, chu veleh Marcus-a chu tho vat in, Paulin-a hnen ah chuan,
" Pu Paulin- i mi chawimawi na avangin kan lawm tak zet ani, anih chuan kan va kal phawt ange, "
Paulin-a chuan,
" aw le, tluang deuh in va kal ang che u "
Penelope-i nen chuan pawnlam ah an in zui chhuak ta a.
Pawn anva chhuah chuan Hubin Sipai hotu leh a ho te tlemte bak ah Nula hnim awmna hre tu Leda-i leh arualpui awm vel hmeichhia sawmhnih bawr vel hi sakawr chung ah hian kal inpeih tak hian an lo ding țhap hlawm tawh a,
chutichuan Marcus-a te pawh chu an sakawr a in phur leh in chung lo nghak tute nen chuan Ram lam pan in hmanhmawh tak in an tlan liam ta a.
Ram lam pan a an kal liam ta chu mipui ho chuan mak an tiin an sawi zui sep sep hlawm a. mahse chutiang an sawi te mai mai ngaithla hman an ni lo.
Reilo te an tui ti chip chep hmun hi an thleng ta dêr a, nula Leda-i chuan an piah lawk tui chu kawk in,
" saw, saw ti lai ah pawh sawn a awm anih saw ?"
Penelope-i en ha chung hian,
" ka pi, i sawi ang chu ani em "
aw tih nan alu an bu zauh a, chutah Leda i vek chuan,
" kan dinglam kawi chiah ah sawn kawr te ka sawi chu a awm a, hetiang hi a tam khawp asin "
Marcus-a chuan Leda-i hnenah chuan,
" heti lai ami hi intheih ang tawk a tam i țhiante nen khan lo la ula, keinin i sawi lam ami chu kanlo va la ange "
Hubin Sipai hotu chuan Leda-i te chu savun ip lian deuh țhahnem fê mai pek pah in,
" he ip ah hian inlo dahkhawm dawn nia "
Marcus-a chuan a sakawr chu her in Leda-i hmun sawi lam ah chuan chak tak hian a sakawr chu a tlan tir nghal a, sipai ho te pawh chuan hmanhmawh tak in an zui ve nghal ta sap sap hlawm bawk a.
Marcus-a te chhuah hnu chuan khuah ah mitthi paruk lai an lo awm lehnghal anih chu.
Khaw roreltu Paulin- leh a țhuihruai te chuan remruat in, hri chhia ina a man te leh an taksa a pân nei te chu hmun pakhat ah hian an dahkhawm a, mahse in kai theih ang chi anih lemloh avangin chutin an hlau em em hran lo.
Ni pawh kawl ah aliam in, khua pawh a thim titih chu ani ta mai a, chutih lai chuan Marcus-a te ho pawh chuan khaw chhung anlo thleng ve chiah hlawm bawk a.
Penelope-i sawi ang zel chuan chûng hnim an lakkhawm te chu hmun pakhat ah an dahkhawm ta vek a.
Paulin-a chuan Marcus-a leh Penelope-i te chu inchhung ah hruai lut in an tan zanriah tui tak alo buatsaih sak a.
Chutia zanriah an kil ho lai chuan Paulin-a chuan,
" Engti tur a helai hmun a lo kal nge in nih reng reng a "
" dik tak chuan Klamata- tuipui a cheng Nymph Calypso-in min kawhhmuh ang a helai hmun rawn pan hi kan ni a, zinkawng thui tak kan zawh hnu ah kan chawlh hahdam nan ati pawh ani ang, khaw nuam tak Albina- tiin min hrilh asin "
" ni e, kan khua hi khaw lian chu anilo na a, a hmun hi a rem in a fel fai a, khualzin tamtak pawn chawlh hahdam nan an rawn pan fo țhin asin "
chutah Penelope-i lam hawi chuan,
" in hmuh tum loh ang a in rawn hmuh avang hian pawi kan ti tak tak ani, in chawlh hahdamna hun ah buaina in hmachhawn ani si a "
Penelope-i chuan nuih sen sen pah hian,
" nilo ve, mi kan țanpui hian kan chawl hahdam tihna ani alawm, țanpui thei che u a kan awm hi kan lawm zawk asin "
chutih lai chuan Nula Leda-i chu a rawn kal a, Pu Paulin-a a rawn hrilh ruk se se hnu chuan a bulah a ding reng a,
chutah Pu Paulin-a chuan Marcus-a te lam rawn hawiiin,
" in hah in in chau tawh awm si a, mut hahdam te pawh in duh tawh ang, hei, Leda-i te hian in mutna tur anlo buatsaih sak che u a, in duh chuan lo mu hahdam ta che u, Leda-i hi in zui ang a, a nin a lo hruai mai ang che u "
enge maw sawi leh zu no te an dawm khaw muan hnu chuan Leda-i chu zuiin in chung lam ah mutur in an chho dun ta a.
Room pakhat, lian vak lo, khum zau tak pakhat awmna ah hian an in zui lut a, chutah Leda-i hnenah chuan lawmthu te an hrilh luam a, reilo te an in kawm hnu chuan Leda-i chuan a chhuahsan ta a.
A thir kawr phelh nuah nuah pah chuan Marcus-a chuan,
" Naktuk zing ah Delain- khaw lam ah ka chhuahsan dawn che a, lo in enkawl țha ang che aw "
Khum a mut pah hian Penelope-i chuan,
" khum ka hmuh loh na hi a rei tawh khawp mai "
Penelope-i bula rawn mut pah hian Marcus-a chuan,
" mahse zantin ka bul ah i mu ziah tho a lawm "
Penelope-i chuan Marcus-a âwm ah chuan a lu rawn nghah pah hian,
" ni e, i bula awm reng hi ka duh ani "
Penelope-i sam chul heuh heuh pah hian,
" naktuk zing ah kan chhuak ang a, kan rei em chuan ka ring lo a, ilo in enkawl țha hle dawn nia, Hri chhia te hi i lo kai ve palh hlauh ange "
chutah hlauthawng hmel deuh hian Penelope-i chuan,
" sakawlh ani ti raw in beih tur kha, i va vanduai palh hlauh ang e, fimkhur hle ang che".
" Ni e, eng ang nge ani tih lah chu ka la hmu silo a "
" a hliam palh hlauh che anih chuan Hnim kan lak ang kha zawng vat ang che, chuan i dêng dip ang a, i hliam ah chuan i bel dawn nia, khatiang hnim khan dawi thiltih tam tak chu a ti dam thei "
chutia zawi te te a in be ser ser reng chung chuan reilo te ah tui deuh hian an muhil ta a.
Penelope-i a han harh chuan Marcus-a chuan a thir kawr, Sipai thawmhnaw chu alo in bel mek a, chutah khum sir a tukverh lam chu hawi pah in,
" Marcus, eng hun nge ni tawh a, khua pawh ala var si lo a"
insiam mawlh mawlh pah chuan Marcus-a chuan,
" reilo te an khua a var tawh mai ang, i mu tlem si, reilo te chu mu leh ta che "
muangchang a tukverh lam chu pan phei pah in Marcus-a vek chuan,
" Vawiin ațangin hna tam tak thawh tur ineih kha, chuvangin chawlh hahdam i mamawh ania, hun awl i nei tawh meuh lo ang "
" aw le"
thuawih hmel tak a puan sin țha in mutthilh leh tum ni awm fahran hian an maimitchhing leh diar diar a.
Tukverh ațang a pawnlam hawichhuak in Van chung sang tak a thla eng kulh te leh an awmna piah lam ramngaw te chu lunglen hmel deuh hian Marcus-a chuan ngawi reng hian a thlir dauh dauh a.
Ni e, enge maw ngaihtuah muk tak hmel chu a pu chiang mai, chutah rilru hah hmel deuh a thâwk la in an rûm kâwk kâwk a.
Zawi te hian enge maw sawi ni awm tak hian amah chuan a phun melh melh a, a chângin ngaihtuah ding hmel tak in a maimitchhing leh țhin a, ring fahran lo hian,
" Vivienne, minlo nghak reng tih chu ka hria alawm, i thutiam te kha ka la hre reng asin, nangmah hruai tur che in ka lo kal mek e, ka thutiam chu ka vawng reng ang, ka ta ni kumkhua tur in ka rawn hruai ngei ngei ang che "
chu thu a sawi zawh rual chuan a maimitchhing leh diar diar a, reilo te an rawn meng leh in chung lam van chung sang tak a Arsi sang tam tak de neuh neuh te leh thuneih hmel tak a van zawl a thla êng lam chu mit la lek lo hian a thlir leh ngawih ngawih a.
" Thla leh arsi zawng zawng te'n an enna an hloh va, khawmual hi tuipui zauva an pil bo hun ah pawh ka hmangaih reng ang che "
chutia a phun sep sep lai chuan, Penelope-i chuan mak tih hmel deuh a rawn en ha chung hian,
" Marcus, engnge ni ta "
muangchangin Penelope-i chu pan in, khum ah chuan an țhu a, Penelope-i biang chul pah hian,
" engmah ani love, muhil leh tawh ta che "
chutah amah vek chuan,
" ka kal chhuah a hun ta e, lo in enkawl țha ang che, ka lo kir leh vat ang "
kun hniam in Penelope-i chal ah chuan an fawh sak zeuh a, a puan a sin țhat tir hnu chuan a chhuahsan ta a.
In hnuai lama a zu chhuk thlak chuan Hubin Sipai ho tu leh Paulin-a te, nula Leda-i leh khaw chhung mi pawimawh ho ni awm tak tak te chu dawhkan lian deuh kil hian anlo țhu țhup a, chutia Marcus-a lo chhuk thla an hmuh veleh chuan Hubin Sipai hotu chuan,
" ka pu, chhuah kan in peih tawh e, pawn ah sawn sipai ho ten min nghak reng tawh "
Pu Paulin-an a țhutna alo kawhhmuh ah chuan țhuthmun an rem te te a, chu veleh nula tleirawl pakhat hian Marcus-a tan eitur eng engemaw leh uain alo laksak nghal vat a.
Chu nu thil rawn chhawp ei mawlh mawlh chung chuan Hubin Sipai ho tu hnen ah,
" kan chhuah hma chuan kan tum aiin kan thleng hma ang a, a lawmawm khawp ang, enge chanchin hriattheih te in nei em ?"
" nizan khan Sakawlh chuan sipai pahnih a tihlum leh tawh anih chu, sakawlh hi pakhat chauh chu anih loh hmel khawp mai, sipai ralveng a beih hunlai vel hian khaw chhung ah an hmuh thu an sawi tlat mai "
a țhutna ațang a thawh pah chuan uain chu tlem an lem zuai a,
" kan hmanhmawh a ngai anih chu "
chutia sawi pah chuan Paulin-a lam an hawi a,
" nunna dang alak leh hma ngeiin kan dang tur ani, kan kal phawt ang e "
thu dang pawh sawi zui tawh chuang lo in pawn lam pan chuan a chhuak nghal a, chu veleh Hubin Sipai hotu pawh chuan rang tak in a umchhuak ve nghal vat a.
Khua a var țan in leilung pawh a hmuh theih ruai ruai tawh.
Kawtlai ah chuan Sipai enge maw zat hi thuam famkim nen chhuah in peih at hian sakawr chung ah hian an lo chuang far tawh a.
In chhung lam ațanga Marcus-a leh sipai hotu lo chhuak an hmuh chuan zahna entir nan an thir lukhum chu lo thla in, an kut dinglam hi an awm zawn ah hian an lo nghat far hlawm a. Enge maw sawi in vawi thum vel hi an au rual țhat țhat bawk a.
Chutia an tih zawh chuan Marcus-a pawh chu a sakawr ah zuangkai vat in sipai ho lam hawi chuan a bân dinglam an phar chhuak leh te te a, chutah sipai ho pawh chu ring tak mai a haw haw dur dur in Marcus-a zui chuan chak tak maiin ramhnuai lam pan chuan an tlan chhuak ta hum hum a.
Enge maw chen an tlan hnu chuan khawchhak lam ațang hian Ni pawh Pathian ropui Helios-an a mei tawlailir a alo hnuk chhuak ni mai awm hian phur fahran loh hmel tak hian zawi muang in alo chhuak leh ta ruai ruai a.
Chutianga hmanhmawh tak a an tlan hnu chuan chawhnu her vel ah chuan Delain- khua chu an thleng ta a.
He khua pawh hi khaw lian vak chu ani lo a, Lal pawh a hranpa a nei lemlo in khaw roreltu, an mahni in a'Ypourgós' (greek țawng ania, minister tihna ang deuh. CR) ti a an vuah ina a enkawl ani a.
Chutia sipai rual tam tak in a khua an rawn lut thut chu mipui ho chuan mak anti in hmelma emaw anlo ti a, anlo phawklek nasa hman viau a, mahse Hubin Sipai hotu an han hmuh tel ve tak ah chuan anmahni țanpui turte an ni tih hria in an lo lawm leh ta zawk a.
Chulai khua a an sipai hotu deuh ber chuan Tlangval hmeltha tak, ria lam leh dar pharh hlai deuh tak, sipai thuam famkim a inthuam an hmuh tel ve chuan mak a tih hmel hle a, amah chang pawh anilo, mipui ho leh chulai hmun nghak sipai te pawh chuan Marcus-a en zauh zauh chung hian enge maw hi an in hrilh sep sep a.
Marcus-a hi la naupan hmel viau mahse Lal fapa anihna ang in Lal thisen kai tih hi a hriat ve hrim hrim a, chubak ah a ralthuam leh Sipai thirkawr hak te chu a danglam bik a, a sakawr lah chu alian fal nalh bik hrim hrim bawk avangin an en duh hlawm em em a.
Chutia an han thleng ta chu Hubin Sipai hotu khan hma hruaiin lo awmsa sipai te hnenah chuan Marcus-a chu an hmelhriat tir phawt a,
" Marcus Valerious-a, Baculla- Lal Alpheus-a fapa ani a, min pui tur in a lo kal ani "
chutia a sawi tak ah chuan sipai ho zawng zawng chu zahna entir nan an țhingțhi rual țhup a,
chutah lo ding chhuak leh in lo awmsa sipai hotu chuan, Marcus-a chu rawn pan hnaiin a âwm ah akut an nghat zauh a,
" Hubin- khaw sipai General Klent- ka ni e, min pui thei tur a ilo kal chu kan lawm tak meuh meuh ani "
chutia a sawi lai chuan Hubin sipai hotu chuan,
" enge chanchin dang a awm belh em ?"
" tukin zing khan khaw dai mai ah sawn nula tleirawl ruang kan chhar leh tawh, chu chuan mipui te ati ralti leh zo vek tawh a, keini ho pawh hi min ring zo tawh lo ani "
thudang eng enge maw sawi pah chuan Puan in lian deuh pakhat ah hian an pathum chuan an in zui lut a. Chu puanin chu a lian vaklo na a sipai awmna tih tak ah, a felfaiin engkim mai chu a awmna tur diktak ah a awm țhap ni maiin a hriat.
Puanin chhung a dawhkan bial lianvak lo, a chung savun lehkha a ram lem emaw ni inziak rang ruai bula thutna awm ah chuan țhuthmun an han rem a.
Chutah Marcus-a rual a lo kalve Hubin sipai hotu khan,
" ka hming pawh ka lo la sawi miah lo a, Hubin khua tho a awm ka ni a "
a bul a țhu General Klent-a en pah chuan,
" General Klent-a hi ka tha chang dawltu ani a, ka hming chu Hestia- ani e "
General Klent- chuan dawhkan a Ram lem chu kawh kual zut zut pah in an hmalakna leh an duty dan te engkim mai chu an sawi zung zung a.
Chutah Marcus-a chuan,
" Sakawlh hi engang nge ni reng reng, pahnih ni awm in ka lo hria a "
General Klent chuan,
" Ni e, vanduai thlak tak in hmanni lawk khan pakhat hi alo chhuah belh leh a, pakhat pawh hi kan veng zolo chu ani a, he sakawlh hi dawithiam Siraka-i leh a țhuihruai ho ten a dawi hmanga an siam ani a, Mount Hepnos a Cyclops- ho nen a an in beihna ah khan a hmang nasa em em a, tlâng chung a Druid ho khua beih a tum ber lai a tlâng chuan hnuai zawk a awm Cyclops- ho pawh an luhchhuah theihloh avangin a thinrim hrikthlak nan khaw hrang hrang ah a rawn chhuah vak mai ani, Bawng chal ai pawh alian an ni a, an pianhmang chu Sakei ang an ni a, an vun hi a chhah in Fei pawn a chhun tlang zo lo ani ber e "
Zawi sap hian Marcus-a chuan,"Chimera,"a ti sap a. Chutah thudang sawiin,
" an awmna lai vel in hre thei tawh em ?"
" khaw dai lawk a lung hmun saw tawmkuk ah an hmang in ka hria "
chutia an titi lai chuan mipui mangang au thawm hi an piah lawk mai atang chuan alo ri chhuak a, chu veleh hmanhmawh tak in an tlanchhuak nghal vat a,
pawn atang chuan thawm lo chhuahna lam an han thlir chuan, Sakei ang tak dum tle zun mai, lian leh rapthlak em em mai hi sipai rual khat hian fei sei tak nen hlauh hmel tak hian an lo hual khup a, chu ramsa chu alo in hrosa nasa in rapthlak tak hian a hram ruai ruai a, kawt lai chu areh in mipui ho chu thlabar in an mahni in lam ah țheuh anlo tlan bo zo tawh a.
Chutih lai mek chuan chu ramsa an hualna piah deuh lawk ah chuan chutiang ang hmelpu bawk ramsa hi alo chhuak ve leh chiah a, kawt thler a sakawr tawlailir te chu a ke hmalam a bêng in a vawikhat ben ah a bêng lêng lawp lawp mai a, chu sakawlh pawh chu kiltin ațang hian thal in an kah rawn sup sup a, a taksa ah te chuan thal mu bur fur mahse engah mah angai lo ni hian a hriat.
Marcus-a chuan an lam hnaih zawk a sipai ho ten a an hual beh mek Sakawlh lam chu kawk in,
" a hma lam ah sawn lo chhaih buai ula, hnunglam ațang in ka rawn bei ang e, sawti ringawt saw chuan engmah kan ang thei lo vang " tiin sipai ho chu a au hlawm a.
rang tak in a sakawr ah chuan a zuangkai vat a, hmanhmawh takin sakawlh awmna lam ah chuan a lim phei zui ta nghal a.
Chutih rual chuan General Klent leh Hestia te pawh chu sipai țhenkhat nen hmanhmawh takin an tlan liam ve nghal vat a.
Sipai ho ten a fei nen țangkawp a an hual khup avang in chu sakawlh pawh chuan chêt lak ngaihna a hre em em bik lo, rapthlak tak tak in a hram ruai ruai a, a in hrosa thawm chuan lei hi a nghawr dur dur thei hial ani.
He sakawlh hi sakeibaknei leh bãwng thlahpawlh niawm tak ani a, sakeibaknei ang lu pahnih rapthlak tak tak anei a, a mei chu rûl ang mai niin tur hlauhawm tak mai a pai bawk a, sakawlh rapthlak Chimera antih a chu(!)
A tu lam ve ve pawh chu in hlau ni awm tak in an in pawh ngam bik lo a, sipai țhenkhat ten a fei sei tak a an va chhun leh zauh țhin tihloh chu tihngaihna vak an hre bik lo.
Enge maw chen an in vehkual hnu chuan General Klent leh Hestia- te pawh chu anlo thleng ve ta a, chu veleh sipai ho te pawh chu an phûr thar leh ta sawt in hmalam ah chuan nasa tak in anlo chhaih buai char char a.
Hmalam a sipai ten an tihbuai lai chuan hnunglam ațang in Marcus-a chu sakawr chak tak a khalh chung hian alo tlan a, Chu sakawlh nak ah chuan fei in a chhun a, chutah a chung ah zuangkaiin a chem sei tak chuan alu rapthlak tak tak pahnih te chu a sat bung ta a.
Sakawlh chu vir muai muai in reilo te ah chuan a zal ta der a, chu veleh sipai ho te chu lawm in an au dur dur a,
Sakawlh pakhat zawk an tihhlum tak ah chuan Pakhat zawk pawh chu nasa tak a hram ruai ruai chung in muangchang in a in singsa ve ta a, khaw dâi thleng in sipai țhenkhat te chuan an va umzui in tihhlum ve ngei chu an tum na a, mahse engteh ual an ang chuang lo, beidawng in an lo kir leh tho tho.
Sakawlh rapthlak tak mai awlsam te a Marcus-an a han tihlum thei mai chu mak anti in thitheilo Pathian ang maiin sipai ho te chuan an thlir a, an au rual dual dual a.
Chutia sipai ho hlim thawm ah chuan khaw mipui ho pawh an in leh an tawmkûk ațang chuan thil awmzia hriat tum in ți dâk hian anlo chhuak hlawm a.
An khaw tibuaitu leh an nun ti ralți tu Sakawlh rapthlak tak lu bung an kawtlai a lo let reng leh a bul lawk a sipai thuam famkim a in thuam tlangval hmelțha tak Marcus-a an han hmuh chuan mak tiin an rawn bial tuau tuau a, ngaihsan hmel tak hian Marcus-a chu an en hlawm a.
Marcus-a chuan a kut chu chemsei keng chung in vanlam hawiin an phar chhuak a, chutah mipui ho chu hlim in an au dur dur a, sipai ho pawh chu an bang bik chuang lo.
Chutah sakawr a zuangkai thauh vin mipui lam pan chuan a khalh phei a, General Klent leh Hestia- te pawh chuan rawn zui nghal vat in mipui ho te chuan ngaihsan hmel tak a lo thlir chung hian kawng an lo kian zel a.
A hma a an awmna puan in ah khan an pathum chuan an in zui lut leh ta a, An lut fel rei pawh an la țhu hmanlo tih chuan sipai pakhat hi lo lut in a hnung ah chuan mipa tleirawl pahnih hian an lo zui lut ve nghal a.
Chu sipai pa chuan zahna entir nan alu a kun zauh hnu chuan a chhuahsan leh vat a.
General Klent- chuan chung rawlthar pahnih hlauh nei ni awm tak a meng phawk hrâ te chu en reng chung hian,
" khawi ațanga lo kal nge in nih "
chung rawlthar pahnih te chuan hlauh hmel tak a en chung hian,
" ka pu, hmar lam Celticus- khua ațang a lo kal kan ni e "
" engti tur a lo kal nge in nih "
" ka pu, kan khua Celticus-chu dawithiam Siraka i țhuihruai Sipai rapthlak pui pui ten tun ah hian an rawn bei țan mek a, kan khaw thlang lawk a kulh nei khaw ropui tak Tyndar- khua pawh ni reilo chhung in an la a, chuan Tyndar- khua hi țhuthmun ah hmang in tunah hian kan khua beih tum in an in puahchah mek ani, chuvangin kan khaw hotu ten nangmahni va pun tur in min rawn tir ani "
beidawn hmel deuh hian General Klent- chu a bul țhutthleng ah chuan a țhu hnawk a,
chutah General Hestia chuan chung tlangval khawngaihthlak tak te chu țhutna tur kawhhmuh in tirchhiah naupang a ko zui nghal a, chung tlangval te chu ei tur rawn laksak nghal tur in a ti a.
Marcus-a lam hawi pah hian,
" engtia hmalak zel chi nge ni ang "
chung tlangval pahnih te chuan an hma dawhkan a eitur an lo lak te chu rilțam hmel deuh hian an ei nghal bawrh bawrh a.
Hestia-zawhna pawh chhang lo chuan chung tlangval te chu ngawi reng hian Marcus-a chuan an thlek vang vang a, chutah muang ban chat hian,
" tlangval te u, eng sipai mak maw in tih a, mihring pangngai nge ni a ? "
chutah thil la ei tuam tuam chung chuan pakhat zawk chuan,
" ka pu, mihring chu an ni lo, mi tam zawk chuan dawithiam Siraka-ina a dawi thiltihtheihna hmanga a siam ani e an ti a, nih pawh an ni mai thei, tihhlum thei pawh an ni lo an ti a, lian pui pui leh hmel rapthlak pui pui an ni "
Marcus-a chuan General Hestia-chu en in,
" General Hestia, kan țanpuina an mamawh tak zet ani, mahse helai a sakawlh hi heti ringawt chuan kan kalsan thei lo ang "
chal ti chuar nung nung hian Hestia- chuan,
" ni e, kan țanpui ngei chu an ngai ani, engtin nge he ramsa sual hi kan tih dawn ni, General Klent, engtia hma han lak zel chi nge ni dawn ? "
reife a in ngaihtuah vung vung hnu chuan General Klent- chuan,
" Khaw thim tak tak hma in he ramsa hi a tawmkûk niawm a kan rin khaw dâi lawk a lung hmun ah sawn kan va luhchhuah mai angai dawn ani, chutiang lo deuh ngaihdan te in nei em ? "
Marcus-a chuan,
" ni e, he sakawlh hi kan tihhlum hmasak phawt loh chuan kan kalsan thei lo ang "
chutah General Klent-a lam hawi chuan,
" General Klent- i remruatna chu a țha alawm, kan hmanhmawh erawh angai dawn ani "
chutah a tho hluai a,
" sipai țhenkhat te nen kan lo zu kal hmasa ang e, muangchang in inlo kal dawn nia "
chutia a sawi zawh chuan puanin ațang chuan a chhuak nghal a.
Kan sawi zauh deuh lawk anga, he khua Albina- hi khaw tereuh te, thingtlang khua ang deuh hi ani a, kulh pawh neilo ngaw hnuai a khaw din tawp ang hi ani. An in pawh hi lung in hniam te te, a chung chu di ang deuh hi ani hlawm a, a țhen chu lung vek te ani hlawm, chuan an khaw hual gian sipai ho an in kulh a, puanin an zâr thluah hlawm a, hmunpui atan an hmang deuh ber.
Puanin pawn a sipai ho lo awmte hnenah chuan Marcus-a chuan,
" ramsa kawlh chu khawilam ah nge a tawm "
sipai zinga pakhat chuan khaw dâi a lung hmun lam chu kawk in,
" ka pu, saw lai lunghmun ah sawn a hnu a tawp zel țhin a, sawlai saw kan rin deuh chu ani "
A sakawr ah chuan a zuang kai thauh a, chung sipai te hnenah chuan thupe aw deuh hian,
" he ramsa hi kan tihhlum vat angai ani, Celticus- khua țanpui tur a kan chhuah vat angai dawn a, minlo zui thei in awm em ?"
chung sipai ho chuan phur tak hian bân an phar sup sup a, chutah sakawr ah rang tak in an zuangkai a, Marcus-a chu zuiin chu ramsa kawlh awmna ni ngeia an rin khaw dâi lunghmun lam pan chuan an tlan liam ta a.
Reilo te an chu lunghmun chu an zu thleng a, chutah sakawr ațanga chhuk in in ring leh thawm dim tak in an veh țan ta a,
chutia thawm dim tak a an kal țhem țhem lai chuan an hma lawk a lungpui lian tak piah lam ațang chuan ramsa thinrim leh in hrosa thawm hi alo ri chhuaka, thawklehkhat a thawm lo ri chhuak thut chu mak an tih hmel in an in en he hu hlawm a.
Thawmlo chhuahna lam pan nghal mailo a an ngaihchan mek lai chuan thawm dang alo chhuah belh leh ta.
Chu thawm erawh ramsa thawm ani ta lo, thinrim hmel tak adawi hla enge maw ring vak lo a chham zuah zuah hi alo ri chhuak a, chutah ramsa na tuar țe ri hi alo ri chhunzawm lehnghal a,
chutih lai mek chuan thil puak ri dawp dawp thawm leh thil tla thum ri dawt dawt te alo ri chhuak ve mek bawk a.
Thawm dim tak a thawm lo chhuahna lam a an va phei țhem țhem lai chuan an bul lawk lung lian tak chung ah hian putar khabe hmul leh hmuihmui sei tak nei, kawrfual rawng thim lam ha hi alo lang thut a, chutah rang tak mai hian lung dang chung ah a zuang nge, a thlawk sawn leh nghal vat a.
Chutia lungpui dang chung a a thlawh sawn rual chuan ramsa lian leh rapthlak tak mai, bawng chal tiat lai vel tur dum tle hlurh mai leh meng sen rûm mai, lu pahnih nei, sakei ang mai hi chu putar awmna hmasa lungpui chung ah chuan a rawn zuangkai zawk a, thinrim tak mai a hram ruai ruai chung hian a lu pahnih te chu zawn nei ni awm tak hian an hawi kual ruau ruau a.
An hma lawk a Marcus-a leh sipai ho te chu rawn hmu fuh in zuan tum hian an awp hniam ruai ruai a, chu veleh an biah lawk lungpui chung a ding putar khan a kut ațanga meialh hlawm hi rawn ti chhuak zuai in chu ramsa rapthlak chu a rawn vawm țek chuaih chuaih a.
Chutih lai mek chuan putar kawrfual hak ang chi tho ha mi pahnih hi chu ramsa hnunglam a lungpui chung ah chuan an kut a meialh hlawm keng chung hian an rawn lang ve a, chu an meialh hlawm ken chuan rawn vawm ve in dawi hla enge maw ni hi an chham zuah zuah reng bawk a.
Chu ramsa na ti nge thinrim emaw ni chu a ke hmalam khai a mihring ang mai a a ke hnunglam a ding chung hian chulai hmun khawk rum rum khawp chuan rapthlak tak mai hian a hram ruai ruai a.
Marcus-a te pawh chuan chet lak ngaihna an hre tawh lo nge an hrilhhai lutuk zawk ni, chutia mi pathum dawithiam emaw ni ina chu ramsa kawlh an beih rawn lai chu ka ho hian an thlir reng ringawt a.
Mak leh hmuhnawm tih hmel taka an en lai chuan chung dawithiam pathum te chuan an kut pahnih hi van lam hawi in an phar chho vek a, dawi hla chham in zawi fahran hian an phun nuah nuah bawk a,
Chutia kut an phar lai chuan an kut ațang chuan meialh nge, êng zung ni awm tak hi alo chhuak a, a rual hian chu ramsa kawlh chu an meialh hlawm ken 'wizard fire' (dawithiam ho in a an kut atanga mei alh an tihchhuah țhin hi.CR) chuan an vawm rawn a, chu ramsa taksa chu a kâng zuai zuai a, chutah ring tak hian ala hram tuarh tuarh lehnghal.
Vawikhat mai pawh an duh tawk lo, 'Wizard Fire'- chuan vawi li vawi nga vel lai arual hian an han vawm rawn leh a.
Chutia nasa tak mai a 'Wizard Fire' hmanga an han vawm rawn tâk ah chuan chu ramsa chu nasa tak in a alh zuai zuai a, reilo te ah țe ruai ruai chung in boruak ah a thamral ta daih a.
An thil hmuh chuan chung sipai ho te chu a țhâwng hle ani ang, chutia ramsa kawlh a kan ral hnu pawh chuan mak tih hmel tak hian chechang lo hian an awmna ngai ah an la awm reng a.
Chet lak pawh tum lova an awm reng lai chuan chung dawithiam pathum te chu an bulah hian anlo kal hnai a, Marcus-a hma ah chuan zahna entir nan an han kun zauh hlawm a, chutah an zinga a putar ber chuan,
" Marcus Valerious, Baculla- Lalfapa, in zinkawng hahthlak tak in zawh zo thei leh in thil tum in hlawhtling thei chu ka lawmpui khawp mai che u "
chutah Marcus-a chuan angaihna hriat loh hmel tak a putar en chung hian,
" kei hi min hria a maw, in hmuh tawhna kan nei em ni "
" Marcus Valerious, min theihnghilh ta mai elaw, min han en vang vang la, hmuh tawhna chu min neih ngei ka ring tlat ani "
chutah Marcus-a chuan ngaihtuah muk hmel tak hian chu putar chu an thlek vang vang a, chutah hrechhuak thut ni awm tak hian,
" Neira, Neira- kha ini ti raw ? "
putar chu a nui vur vur a,
" ni e, Marcus, min theihnghilh hma khawp mai, kei chuan ka hre reng țhin che u asin, khawiah nge i țhiannu Penelope-i chu a awm a "
" Albina- khua ah Dawithiam Siraka- in hrichhia rapthlak tak mai a len tir a, chung hri chhia ina a man mipui te enkawl tur chuan a awm rih a, kan kalsan tak hnu che khan engtin nge i awm tak zel ang tiin ka ngaihtuah khawp che asin "
a bula dawithiam pahnih te melh zuk pah chuan Wizard Neira- chuan,
" ni e, heng ka unau te hian min rawn pui hlauh a, chuan engtin nge in awm zel dawn, Penelope-i pawh chu "
" kan chhuah theih veleh an khua Isle- ah ka hruai ang chu ka lo ti a, nangni zawk ? Henglai daih daih ah ka hmuh che u a ? "
" Marcus- in kal tak hnu khan thil tamtak a thleng alawm, mahse tunah chuan hun kan nei lo, kan hmanhmawh angai a, chuan ka chah duh che chu, Isle- khua ah chuan in kal thei lovang, dawithiam Siraka-i khan a awp bet a, awp bet satliah mai pawh a nilo, kal theih ani lo, a sipai rapthlak pui pui ten khua an veng tlat a, in luh chuan in chhuak thei tawh ngai lovang, chuvangin Penelope-i chu Skyros thliarkar ah hruai ang che, chu chauh chu atan hmun him a awm ani "
(Skyros- thliarkar hi hmun reh leh fal tak, kham sen veng vung leh far ngawpuiin a tuam, hmun nuam leh mawi tak ani a. Greek pasaltha Achilles a nu Tuipui Lasi Thetis-i nu leh pa leh a unau Neireid(tuipui lasi, mermaid ang hi)- te awmna Aegean- tuipui bul lawk a awm ani.
Thetis-i hian a fapa Achilles-a chu Troy khawpui do na ah kal atum dawn tih a hriat avangin tuipui kam ah hruaiin a dawi mu a, zawngdulinu(dolphin. CR) chung ah chuan pui in he Skyros- thliarkar ah hian a tlanbo pui a, Skyros Lal Lycomedes- a hnenah hian chenpui char char in Lycomedes-a fanu Deidamia-i nen fapa Neoptolemus-a an nei anih kha. CR)
Chutah Marcus-a chuan,
" Penelope-i nu pawh Isle ah chuan a awm asin "
" Marcus, chu chu kan hria alawm, mahse tunah hian a thi tawh nge a dam tih pawh in hre lo ani a, chuvangin Penelope-i chu a rang thei ang ber in Skyros- ah chuan hruai phawt mai rawh, hun kan nei lo, kan kal phawt angai ani, Marcus, engkim thil thleng chu ila hrethiam ve zel mai ang, kan kal phawt ang e "
chutah a țhiante lam ah chuan a phei a,
" Anih leh Marcus, kan in hmu leh dawn nia "
Marcus-a chuan," tunah khawilam nge in pan dawn" tiin a au a.
Nui vur vur chung hian zawi sup in, "Isle" tiin a chhang a, tichuan an ding tlar a, muangchang hian boruak ah chuan an thamral ta riai riai a.
Chutia boruaka an thâmral ta mai chu sipai ho chuan mak an tih hmel hle a, che châng lova Marcus-a ding reng chu rawn sawi nawk nawk in,
" ka pu, khâng mi te kha i hriat zawng mi ani alaw, eng ang mi nge an nih a, ka pu, ka pu " anti mawlh mawlh a.
Chutah Marcus-a chu harhchhuak thut niawm tak hian a rawn phu zuk a, sipai ho makti leh hrilhhai tak an hmuh chuan, zaidam tak hian,
" engkim a țha vek e, khâng mi te kha Mount Hepnos- a cheng Druid hnam te zing a mi an nih kha, A putar ber leh min be tu kha Wizard ropui ber an tih thi Neira- a ni a, tunah hian Misual Siraka-i leh a țhuihruaite tukdawl tur in an kal dawn ani maithei "
chutia sawi pah chuan an hma lawk nichin a thawmlo chhuahna lam ah khan muangchang hian a phei a, sipai ho te pawh chuan in en hrek hrek chung hian an zui ve dat dat a.
Chutia lungpui sir lam a an va phei chuan Sakawlh rapthlak tak mai pakhat lo thi ngut hi an va hmu a, a kan nasat vang ani ngei ang, a ke leh a mei te chu a kawm vûn hlawm in ala khu rum rum lehnghal.
Chutia lei a let reng sakawlh kang hlum mak tih hmel taka an thlir mek lai chuan sipai pakhat hian,
"'wizard fire'- in khâng dawithiam te khan an hal ani ngei mai, "
chutia a sawi lai chuan sipai dang pakhat hian an hma a sakawlh kâng ût huam kawh pah hian,
" ni e, khang dawithiam te kha rawn lang lo se chuan he sakawlh leh nichin a an halral tak te khan nasa tak in minti buai leh dawn ani a, a hun takah an lo lang thei a a lawmawm khawp mai, keini chuan harsa tak a kan tihhlum angai ngei dawn si a "
chu sakawlh chungchang leh eng emaw vel sawi a sipai ho an ti ti tuam tuam lai chuan Marcus-a chuan,
" aw le, kan tum ber chu kan hmuh ang hian kan ti hlawhtling ang chu ani mai a, mahse buaina dang tawh tur kan la nei ani, zing lam ah khan Celticus- khua ațangin zualko anlo kal a, misual Siraka-i sipai siam chawp 'Athánatos' (greek țawng ania immortal tihna. CR) tam tak ten an khua beih tum in tunah hian an in puahchah mek a, he khua chhan tur leh heng Athánatos- ho bei tur hian hmanhmawh taka kan kal vat angai dawn ani "
chutah amah vek chuan, an sakawr awmna lam pan pah hian,
" Celticus-khua hi Siraka-i ten an la anih chuan Delain- khua pawh hi an rawn bei vat ang, chuvang in khua ah kan kir vat hi angai ani "
sipai ho te pawh chuan an rawn zui ve nghal vat a, chuan sakawr ah chuang vat vat in, chak tak in khaw lam pan in an tlan ta dawr dawr a.
Khawchhung an thlen dawn țep chuan General Hestia leh General Klent-te chu sipai rualkhat nen a an mahni tãwk zawng hian hmanhmawh tak in sakawr hian an lo tlan hlawk hlawk a, mahse Marcus-a te lo kir leh lam an hmuh chuan an ding chawt a, maktih hmel deuh hian an lo en he haw hlawm a.
An bul hnai an rawn thlen chuan General Hestia- chuan,
" engti zia a lo kir leh ta nge in nih a, hmanhmawh tak in sipai kan khawm rawk rawk a, kan lo um zui nghal che u ania "
Marcus-chuan,
" ni e, ramsa kawlh te chu tihhlum an ni tawh, khaw chhung lam ah i kir leh vat zawk ang u "
" enge thil awmzia hi, in zuk tihlum thei a maw ?"
kawnglai a sipai ho chu Marcus-a chuan tawn tlang in khaw lam pan chuan muangchangin a sakawr chu a kal tir a, sipai ho te pawh chuan kawng an lo kian sap sap a, General Hestia leh Klent- te pawh chuan an sakawr kai her in Marcus-a chu an zui kir leh a.
Marcus-a vêk chuan,
" ramsa kawlh kha pahnih lai anlo ni a, mahse Wizard- pathum ten an tihlum ta anih kha "
Maktih hmel tak hian Hestia- chuan Marcus-a hnaih sauh pah hian,
" engtin maw itih, sakawlh pahnih maw, engtia..khawilam Wizard te nge "
" Sakawlh tawmkûk kan thleng țep tih in Wizard- pathum te nen a an in sual lai kan hmu alawm, mahse Wizard Fire- in an hal hlum ta anih kha, Mount Hepnos- a awmte an nia, tunah hian Isle- khaw bei tur in an kal mek ta ve ang "
General Hestia leh Klent- te chu Marcus-a thusawi avang chuan mak tiin an in en he haw a,
enge maw ngaihtuah ni awm tak hian an hma lam a Delain- khua chu ngawi reng hian a thlir vawng vawng a.
Eng eng emaw sawi pah a an tlan zel lai chuan reilo te an khaw chhung chu an lut ta a, puanin ah General Hestia leh Klent- te nen chuan an in zui lut leh ta a, chauh hmel deuh hian Marcus-a chu țhuthleng ah hian a țhu hnawk a, dawhkan chung a uain bur chu thli rak rak in no khat an tlak pawp a, rilru hah hmel tak hian a rûm nghut a, a melh ngai melh ngawr ngawr in a ngawi vung vung a.
General Klent- kha chu puan in pawn lam ah a chhuak leh a,
muangchang a uaiin thli chung hian General Hestia chuan,
" Celticus- khua a kan kal hma in Albina-pan in chhuah i tum deuh em ni? "
Marcus- chuan muang raih hian,
" engtia han awm tur nge pawh ka hrethiam tawh lo khawp mai, Chimera- te kha an rawn chhuah belh tawh chu ka ringlo a, hmanhmawh a Celticus- lam a kan kal vat chu a ngai khawp mai "
an ngawi leh vang vang a, amah vêk chuan,
" General Hestia- lo țhu hnai teh "
Rang deuh hian Hestia chu Marcus-a bul ah chuan a țhu hnai a, Marcus- chuan,
" General Hestia, Penelope-i kha i hria ang a, ka țhiannu kha, Isle- khua a awm ani a, mahse Isle- khua chu tunah hian Misual Siraka- in țhuthmun ah a hmang mek ani tih nichin a Lunghmun a kan hmuh Wizard- te khan min hrilh a, chuvangin Penelope-i chu Skyros- thliarkar ah dah tur in minti a, chu chauh chu atan hmunhim ani tih min hrilh asin "
General Hestia chuan,
" chutiang anih chuan a rang lam a i chhuah vat angai anih chu "
Marcus-a chuan,
" ni e, hmanhmawh chu angai ang, mahse Isle-ah chuan Penelope-i nu ala awm a, chu chu hruai chhuah angai bawk ang, anu tello chuan Skyros- ah chuan a kal duh ka ring lo "
" Marcus, lungngai mah ta che, ka sipai te nen Penelope-i nu hruaichhuak tur chuan kan kal dawn nia, i rual a ral beih te chu an châk mai pawh nilo vin, i tan chuan an nunna pawh heng sipai te hian an huam ang chu "
Marcus-a chuan Hestia- kut chu an vuan a,
" General Hestia- ka tan a i in pekna hi a ropui lutuk, zahawm pawh ka ti, mahse Siraka-ina țhuthmun ah Isle- a hmang anih chuan an tawh a khirh viau ang, a khaw vêl in 'Sýnoro' (greek țawng ania, boundary tihna ania, bang ang mai a sâng tak magic hmanga an siam, kal tlang theih loh.CR) - pawh asiam mai thei ani "
" Marcus, Celticus- khua veng tur chuan chuan sipai kan dah anga, i țhian Druid ho pui tur chuan Isle- lamah kan kal tlang dawn nia, a țha zawk in ka hria, enga pawh chu ni se i hmelma chu ka hmelma an ni a, tin, heng sipai te tan pawh hian, chuvangin kan thih chuan ruam khat ah, kan dam pawn tlâng khat ah kan thi dawn lawm ni "
" General Hestia- ka lawm tak zet e, mahse kan kal chin tur a hriat siloh a, bak ah Penelope-i engmah hrilh lo a kal chhuah chu ka hreh deuh ani "
" lungngai suh, Albina-ah chuan ka zui ang che, chuan kan let leh hun ah Penelope-i nu hruai tur chuan kan chhuak leh dawn nia "
" i remruat ang chu ni rawh se, naktuk zing varțian ah Albina- pan chuan kan chhuak dawn nia "
chutiang a eng eng emaw sawi a an ti ti lai chuan General Klent- pawh a rawn lut a, a thir kawr phelh mawlh mawlh chung hian,
" Vawiin kan thil tawn chu a lawmawm hle mai, Marcus- i chungah khaw mipui te an lawm hle ani, chuvangin Zanriah ropui tak zanin tlai ah sipai ho te tan an buatsaih dawn a, kan tel ve chu angai ang, inti fai ula, i chhuak vat teh ang u "
General Hestia- chuan,
" thil ropui tak anih chu, Marcus, nangmah zar ah liau liau ralmuang in an awm leh thei ta anih hi, ti rawh i han inti fai ang hmiang "
chutia sawi pah chuan a tho nulh a, a thirkawr te chu zâi rût rût chung a phelh mawlh mawlh in chhiahhlawh naupang a ko a, Marcus-a intih faina tur a buatsaih tir nghal a.
Marcus- a pawh chu a țhutna ațang chuan tho in phur tak hian a in phelh sawk sawk a, a thir kawr te chu chhiahhlawh naupang a tih fai tir a.
Chutia ka en reng lai chuan chu lemchan dawhsan chung chu muangchang hian a rawn thim ruai ruai a, reilo te an engmah reng ka hmu thei ta lo, thim zing ah chuan ka țhu tlawk tlawk a,
mahse chutia ka thut renglai chuan chu lemchan dawhsan chung ah chuan naupang infiam ri leh hlim nui ri te, mipui tawng chiar nak nak te alo chhuak a, mahse an thawm mai lo chu engmah a hmuh theih chuang lo.
Reife thawm a rik reng hnu chuan chu lemchan dawhsan chung chu a rawn êng leh riai riai a, reilo te an engkim chu fiah tak in alo lang leh a.
In chhung zau deuh pakhat hi alo lang a, chu in chhung ah chuan mipui tam tak leh sipai enge maw zat hi hlim tak a lo in kawm in zanriah hi an lo ei dawn mek a, mi sawmhnih vel zel hian dawhkan sei deuh pakhat hi an lo ki zel hlawm a.
Chutih lai chuan kawngkhar atang hian Marcus-a leh General Hestia leh General Klent-te chu an rawn lut ve chiah bawk a, chutia an rawn luh veleh chuan mipui leh sipai ho zawng zawng chu an lo ding vek a.
Chutia an lo luh lai chuan chu an țhutkhawmna inchhung tho, pindan pakhat ațang hian putar deuh tawh, palian tak hi hmanhmawh tak a lo chhuak in Marcus-a te awmna lam ah chuan hmanhmawh tak in a phei nghal sawk sawk a.
Marcus-ate bul a thlen chuan, zahna entir nan alu a kun zeuh a, Marcus-a hnen ah chuan,
" ka pu, kan sawmna ngai pawimawh a inlo kal avang hian kan lawm tak zet ani, he khua a roreltu Castor-a ka nia, lo kal ula, i eiin i in ang u hmiang "
chutia sawi pah chuan mipui zing ah chuan a phei a, Marcus-a te pawh chuan chu putar chu zui ve zel in, dawhkan lian deuh pakhat an tan a anlo hauh lawk lam ah chuan țhuthmun an rem ta a.
Chu dawhkan chu Marcus-a te pathum leh chu putar Castor-a te chuan kil in, an thut veleh chuan nula chhelo tak tak te hian eitur leh in tur chi hrang hrang hi dawhkan ah chuan an rawn chhawp țeuh a, tichuan hlim tak in zanriah chu an kil ta a.
Zanriah tuihnai tak ei leh hlim tak a an in kawm hnu chuan puanin lamah mu tur in Marcus-a te chu an pathum bawk chuan an kir leh ta a.
Puan in an thlen chuan chhiahhlawh naupang te chuan an pathum a mutna tur nawm hmel tak hi an lo siam sak sa vek a.
Chhun lam a an chauh tawngkhawng tawh avang leh zanriah uain an in hnem deuh avang chuan engmah dang mah ti tawh lo chuan an mu nghal sap sap a, tichuan reilo te ah mumang ram a cheng tur in an muhil ta a.
Tui tak a an mutthilh lai chuan, hmeichhe aw fiahlo ruai hian Marcus-a chu a rawn ko a.
Marcus-a chu a harh chiang ngei mai, a muthmun ah chechang lo hian chu aw chu hriatchian lehzual tum in beng chhi kar hian an ngaichang a.
Reilo te an aw bawk chuan a rawn ko leh a, muangchang a a thawmhnaw in bel in a lu bul a a chem sei chu ala vat a, mahse aw chu a reh leh daih a,
enge maw chen a mutna a țhu chung a chu aw a ngaihchan leh mek lai chuan hmeichhe aw fiahlo ruai hian a rawn ko leh ta.
Chu veleh aw lo chhuahna lam ni ngei a ahriat puan in pawn lam ah chuan muangchang hian a chem hum chung in a chhuak ta a.
Pawn lam boruak chu a vawt ngei mai, thlifim hi a thaw heuh heuh reng a, mahse aw kha chu hriat tur a awm tawh lo,
engemaw ngaichang ni awm tak a a din vung vung lai chuan thli thaw in a a rawn chhem zawng chuan hmeichhe aw fiahlo ruai hian a rawn ko leh a, an hawi kual vak vak na a khawilam ațangin nge a rawn koh a hre thei silo.
Vawikhat a rawn ko leh a, chutah chu aw chu boruak a thâm ral riai riai ni awm tak hian a zawi tial tial a, thlifim te chuan an len bo ni mai awm hian van chung sang lam pan hian an thâm ral riai riai a.
Marcus-a chuan zawite hian,
" Vivienne, Vivienne, ka hmangaih, nangmah ngei ini tih ka hria, vawikhat tal i aw ngaihthlak leh ka van châk tak em "
lunglen hmel deuh hian Van chung sang tak a Arsi sang tamtak phe tuarh mai te chu a thlir vawng vawng a, mahse aw chu a ri leh tawh lo.
reife aw hriat leh tum a a din reng hnu chuan zawite hian a phun sep sep a,
" aw Vivienne- duhtak, ka la theihnghilh lo che asin, nang pawn minlo nghak reng tih chu ka hria a lawm, min lo nghak zel rawh, a rei tawh lovang, ni rei ani tawh lovang "
chutia reife a din reng hnu chuan khua pawh alo var ve dawn țan mek a, leilung pawh a lang thei țan ta.
" Marcus, Marcus "
ahnung lam an hawi chuan General Klent-a chu mak tih hmel tak hian puanin kawngka bulah chuan tho phang tak mai hian alo ding to a.
" engthil nge ni ta, Marcus, buaina i nei em ni ? "
chutah muangchang a Delain- khaw chhung lam thlir pah hian,
" nei love, ka mu thei lo a, zing boruak kan hip vel mai mai anih hi "
General Klent-a chu a bulah alo kal hnai a,
" Hestia- pawh a tho tawh alawm, a in siam mek ang, zing ah Albina- khaw lawm pan in in chhuak dawn tih min hrilh a "
" ni e, Penelope-i hruai tur a chhuah kan tum deuh a "
chutah Klent-a lam hawi pah hian,
" General Klent, indo na hi a bul țanna chauh ani a, hun ala duh reifu mai thei ani "
" ni e, ka hria alawm, engtin nge rem i ruat deuh a ? "
muang ban chat hian Marcus-a chuan,
" He misual Siraka-i hian Druid- hnam zawng zawng nuai chimih a tum a, mahse Druid- hnam ho hi thiltithei leh dawithiam tak tak an ni a, chuti mai chuan a nuai chimit thei lovang, tin Siraka-i hian a hneh lo maithei bawk a, chuvangin Druid- hnam nuai chimih a tum anih chuan tih hreh anei dawn lova, chuvang in engpawh lo thleng se hmun him tur a an ngaih Skyros- thliarkar ah Penelope-i hi dah ka duh ani "
" ni e, țhenkhat sawi dan chuan Lal ram tam tak pawh in an pui an ti asin, a vanduai thlak khawp mai "
Marcus-a chuan,
" an țanpui chu ani lovang, chung Lal ho chu an thluak a sûk sak ani ngei ang "
" Albina-khua a in va thang hlan in Isle- khaw lam pan tur in kan lo inbuatsaih ang e "
chhan pawh chhang zui tawh chuanglo chuan Marcus-a chuan Puanin chhung lamah a luhsan ta daih a.
" i van tho hma awm ve, ka lo insiam der tawh mai asin, chhuak hma ila a țhat zawk ka ring deuh a "
Hestia-chuan a thir kawr in bel rap chung hian mei ah hian sa hrang lian deuh mai hi a lo hem khu rum rum a.
Marcus-a pawh chu insiam ve nghal in,
" ni e, hmanhmawh tluk a awm hleinem "
Hestia- chuan a sa hrang rawh chu uain nen a hmeh in a keih thla hmawk hmawk a.
" lo țhu ve phawt teh, in ei puar hmasak phawt loh chuan kawng lak ah kan buai palh ang e, kawng lak a eng pawh tawk thut thei kan nih hi, ni lawm ni "
nui huah huah hian, Marcus-a lo țhu ve chu sa hrang lian tawk mai chu a hma ah an hlui hnawk a,
tichuan puar âl leh rilru hahdam tak a an ei hnu chuan an in tifai sawk sawk a, puan in pawn lam ah chuan an chhuak dun ta a.
Sakawr chûl hauh hauh pah hian Hestia- chuan,
" General Klent, kan kal phawt ang e, naktuk lam ah chuan kan lo let leh mai ka ring a, mahse enge maw thil thleng a awm chuan min rawn hriattir vat dawn nia "
puanin kawt thing țhuthlenga a mut kawr nen a la țhu reng chung hian General Klent-chuan,
" ni e, engkim ațha vek tur ah ngai rawh, tluang deuh in in va kal dawn nia "
Marcus-a chu a sakawr chung ah chuan a zuangkai thauh a, Hestia-hnen ah chuan,
" kan kal thei ta e, khua pawh hei a var chiang ta "
General Hestia- pawh chu sakawr ah chuan zei ang reng tak hian an zuangkai ve nghal a.
Tichuan Albina- khaw lam pan chuan chak tak hian an tlan ta dawr dawr a.
A rilru tak chuan Marcus-a hi a hmanhmawh hle a, thup vek sen pawh ani lo ani ang, Hestia- nen pawh chuan an in be mang lo tih theih ani, bak ah a sakawr a chak țha bawk a alo tlansan leh daih mai țhin.
Hmanhmawh a tlan an ni bawk a, chhun lai vel ah chuan Albina- ram chin an thleng der tawh anih chu.
Tichuan khaw dai ațang chuan chak lo te te in an kal a, Hestia chuan,
" i sakawr chu a thlan chak khawp mai, ka sakawr hi tlanchak tak ani ve asin, mahse ka theih tawp a chaka ka tlantir pawn ka umpha theilo reng reng mai che "
chhuan hmel tak a a sakawr thlek pah hian Marcus-a chuan,
" Pasaltha Achilles-a pa Myrmidon Lal Peleus a leh tuipui Lasi Thetis-i te inneih lawmpui nan a Tuipui Pathian Poseidon-an a pek sakawr thitheilo pahnih Balius leh Xanthus, a hnu a Achilles-an Troy indo na a a hman leh a thihsan tak kha a fapa Neoptolemus- an a kawl ta zel a, heta sakawr pakhat zawk Balius- thlah zel hi ania, chuvangin ania a hming ah pawh Balius- ka vuah ni "
" umphak rual alo nih loh chu, ngawi teh khaw mipui te chu anva dam hmel hlawm tawh ve a " antih zawm nghal zat a.
Khaw chhung an lut țan mek a, Marcus-a pawh chuan a en duh hlawm khawp mai,
mipui te chu hri chhia khan a man hlawm tawh lo ani ngei ang, nun phung pangngai in hmel hlim sarh hian an lo awm hlawm a, chutah Marcus-a leh Hestia-an lo hmuh chuan an lo nuih var var hlawm mai lehnghal.
Marcus-a te chuan khaw roreltu Paulin-a te in lam chu an pan ding nghal chat a.
A in zawn an thlen chuan sakawr ațang chuan chhuk in inchhung lamah an in zui lut nghal a.
Inchhung an han luh chuan Pu Paulin-a leh nula Leda-i te, Penelope-i leh Druid mi pahnih, Elia leh Luna-i te bak ah khawchhung mi tlem azawng hi an lo awm in dawhkan sei ah hian thil an lo eikhawm mek a.
Chutia Marcus-a te an rawn luh veleh chuan Penelope-i chu rang tak in a țutna ațang chuan rawn tho in, Marcus-a chu hlim tak a nui chung hian a rawm pan vat a, chutah nghet tak mai hian a kuah vawng vawng a.
Pu Paulin-a chuan,
" Kan pasaltha te an lo thleng leh ta e." abul a țhu nula Leda-i lam hawi chuan,
" Leda, an țhutna tur lo buatsaih sak ta che, ei in lo in ve nghal phawt rawh se, an ril pawh ațam tawh ang "
Hestia- chu Leda-i bulah chuan țhu in, Marcus-a pawh chuan Penelope-i hnaih ber ah chuan țhuthmun a rem ve nghal a.
Muangchangin hlim tak in an ei in an in hlawm a.
Chutia dawhkan kila thil an ei lai mek chuan, Pu Paulin-a chuan ngaihsan hmel taka Marcus-a thlir vung vung pah hian,
" In chanchin țhenkhat chu kan lo hre tawh a, engtin tak nge dawi hmanga siam sakawlh rapthlak chu awlsam tak mai a i thah theih reng reng "
Marcus chuan theirah hmawm zoh zoh pah hian Hestia- chu an melh zawk a.
" keimah mai in ka bei hleinem, General Hestia- te huaisen vang chauh ani "
Hestia- chu ațhutna atanga lo ding chhuak in, a zu no chu an lek kâng a,
" mi huaisen leh ropui Marcus Valerious-a, Sakawlh Chimera- that tu, Thi theilo Indona Pathian Ares-a, mihring zing a a in lar ang mai ani, a hming in zu no i han dawm ang u hmiang "
chutah dawhkan kil ho zawng chuan an zu no theuh chu an rawn lek kâng a, tichuan Marcus-a hming chuan an in ta dial hlawm a.
Tichuan eng eng emaw sawi in an ti ti luam hlawm a, Marcus-a chuan Paulin-a lam chu hawiin,
" ni e, heng hri pui len tirtu Misual Siraka-i chuan ram leh khaw hrang hrang tunah hian a bei mek a, tin Celticus- khaw bul lawk Tyndar- pawh a ram pumpuiin a thuhnuai ah an kûn tawh a, hma an rawn lak leh zel chuan reilo te an he khua pawh hi ala rawn thleng mai thei ani, chuvangin an hnaih zawk khua Celticus- khua ațanga kan lo do va, kan lo beih let vat hi angai ani " ati a.
an ngawi țhap a, hlauhthawn hmel tak hian an in en hrek hrek hlawm a,Hestia- chuan,
" hlauh tur engmah in khaw tan hian a awm lo ania, lo lungngai lo ula, lo ralți reng reng suh u, Mi huaisen sakawlh rapthlak tak pawh awlsam taka that mai pawh ni lo, a chung a zuangkai a a lu tansak tu Marcus Valerious, kan nei a, tin Druid- dawithiam ho zawng zawng pawh in min do pui dawn bawk a, chuvang in ralmuangin lo awm rawh u, kan hneh ngei ang, nangni mipuite tan hian kan do ang "
inchhung a awm ho zawng zawng te chuan kut an beng dur dur a, hlim tak in an in bia a, Druid- mi pahnih te kha eng eng emaw an zawt in an be sek hlawm a.
Chutia an in kawm ho lai chuan Penelope-i chuan Marcus-a beng bul ah hian zawite hian,
" ka damlo enkawl te i hmu duh em " a ti se se a.
Marcus-a chuan nuih suk pah hian lu a bu zauh a.
Paulin-a lam hawi pah hian,
" Pu Paulin, in damlo enkawl lai te chu kan han tlawh ve ang e, hlim tak in lo in kawm rawh u "
Pu Paulin-a chuan remti tih nan lu an bu a, hlim hmel tak hian,
" va en ve mawlh teh, i hmel an hmuh ringawt pawh in an dam sawng sawng ang "
an țhutna ațang chuan tho vin Penelope-i nen chuan an in zui chhuak ta nghal a.
Ke in an kal a, Pu Paulin-a te in bul lawk mai hi alo ni a, mi in pangngai lian tak mai, damlo dah nan a an tih ruah chawp hi alo ni a, inchhung a an va lut chiah chu chhuat a mut nan a puan anlo phah ah chuan damlo sawm li emaw sawmnga rual vel hi anlo mu țhâm mai a, chutia Marcus-a te an hmuh rual chuan an lo tho kâng hlawm a, zahna chibai anlo lantir sap sap hlawm a, Marcus-a bana vuan reng chung hian Penelope-i chuan a kut hian damlo ho chu an kawk kual a,
" Khalam kawngkhar dinglam a mi te ho kha an taksa a pân vei ho an ni a, chuan veilam pang ami te ve thung hi chu hri pui vei ringawt an nih hi, mahse he hri kai ho hi an khuh vak vak a, an chau in engmah an ei thei lo a, an buaipui awm daih zawk "
" Marcus-a chuan Penelope-i nuih seih pah hian,
" hna i thawk ropui takzet ani, i nu chuan a chhuang ngawt ang che "
Penelope-i chu lawm in a nui var var a,
Marcus vek chuan,
" naktuk ah helai hmun ațang hian kan chhuah angai a, nangmah hruai tur che in ka lo kal ani "
" enge thil awmzia, khawilam nge kan pan dawn ?
Chutia sawi pah chuan a ngaihna hriat loh hmel zet hian Penelope-i chuan a en ha a,
" Dawithiam Siraka-i khan in hnam zawng zawng nuai chimih vek a tum a, chubak ah khaw hrang hrang pawh a rûn in, a dawi thiltihtheihna hmangin a awpbet zel a, tuna hri pui leng te pawh hi ama tih vek ani, chuvangin engpawh lo thleng se him tur a ngaih Skyros thliarkar ah ilo awm angai dawn ani "
Marcus-a âwmah chuan a bei thlawp a, nghet tak hian a kuah zui nghal a. lungchhiat hmel tak in zawite hian,
" Nilo, ka theilo ang, i bulah hian ka him ber alawm, khawi hmun ah mah ka kal lo ang, chubak ah ka nu kha, engtin nge ni ang, Isle-ah ala awm asin "
Marcus-a chuan duat tak hian a sam chu a chul sak heuh heuh a, lungchhe taka a âwm a bei Penelope-i khabe ah chuan dawm sak in,
" Ka bulah chuan a hlauhawm lutuk, him taka i awm hi ka duh ber ani, Skyros-ah chuan ka hruai che anga, chuan i nu hruai tur in Isle-ah chuan ka kal leh dawn nia "
lungngai tak hian Penelope i chuan zawite hian,
" Isle-ah chuan ka lo kal ve zawk ang e, chuan ka nu kan va hruai anga, kan pathum in Skyros- ah chuan kan kal dawn nia "
" nilo ve, Isle- chu a hlauhawm lutuk, Misual Siraka-i khan țhuthmun ah a hmanga, dawi hmanga a siam sipai rapthlak tak tak ten khua chu an veng vek a, i tan kalna chi ani lo "
chutia in kuah chunga an din ren rawn lai chuan, Druid- mi pahnih Elia leh Luna-i te kha inchhungah chuan an rawn lut thut a.
Chu veleh Penelope-i chuan Marcus-a a kuahna chu thlah vat in, chung mi pahnih te lam hawi chuan,
" Elia, Luna, naktuk ah ka kalchhuah san dawn che u a, heng damlo te hi inlo enkawl thei ang tiraw ? "
hmeichhia zawk Luna-i chu lo kal hnaiin Penelope-i chu a rawn kuah a, chutia kuah pah chuan,
" enkawl thei ang, mahse i tello te chuan engtin nge kan awm theih ang "
Penelope-i chuan,
" kei pawn ka ngai dawn lutuk che u, ka khua a har hle dawn ani "
Luna-i kuahna ata chu tal chhhuak in kawngkhar bula hrilhhai taka ding Elia- chu pan in a kuah ve a,
" in mi puihna a zarah ka lawm tak meuh meuh ani, ka țhian țha ber te in ni, ka hre reng ang che u "
Elia- chuan lungchhe tak hian,
" keini pawn kan ngai ngawt ang che, Penelope, i thil min zirtir avang khan ka lawm tak zet ani, tluang tak in in kal dawn nia, engtik ni ah emaw chuan kan in hmuh leh ngei ka beisei "
Marcus-a chu lo phei in Elia- hnen ah chuan,
" Nangnin engkim ah inlo țanpui a, ka lawm tak zet ani, lo in enkawl țha ula, kan la in hmu leh dawn nia "
Penelope-i ban ah chuan kaiin an in zui chhuak ta a.
Elia leh Luna-i te chuan an kal liam ta chu lunglen hmel tak hian an thlir zui vawng vawng a.
Chutia Penelope-i leh Marcus-a te in zui chhuak chu Pu Paulin-a te in ah an kal tlang nghal a, inchhung an va luh chuan Penelope- chu an mutna in chung lam ah a lut chho nghal daih a, Marcus-a erawh chu Pu Paulin-a, Thuk meilum ai pah a Uain lo dawm mek bul ah chun pheiin țhuthmun an rem ve nghal sawk sawk a.
Pu Paulin-a chuan a Uain chu no pakhat ah hian an thli chhuak a, Marcus-a pek pah in,
" han in ve chhin teh, he ka uain hi a thlum tui a asin, ka nei tam em em lo a, chuvangin ka ren thei teh ania, Athens- a ka zin țum in an Lal Theseus-a, ramsa kawlh hlauhawm zet mai Minataur (alu lam bawng, a taksa mihring, tin theseus-a hian Helen of sparta i kha tleirawl te anih laiin a Athens-ah a ru tawh a, indona a chhuah phah tawh bawk, chuan a hnu ah Trojan Lalfapa paris an ru leh in Troy indona a chhuak anih kha. CR)
that tu in a min pek ani a, Theseus-a hi Uain țhatna Pathian Dionysus- an Grep rah țha chi pe in mal a sawm a, a Lalram Athens- ah chuan an hniang hnar teh asin "
a thusawi pawh ngaithla lo ni awm tak hian Marcus-a chuan thil ngaituah muk hmel zet hian thuk a mei alh hluah hluah chu a thlir reng a.
" Marcus, Marcus "
" Marcus, Marcus "
Marcus-a chu a rawn hawi chhuak zawk a, a uain ken lai chu tlem an in zeuh a, inthiamlo tak hian Pu Paulin-a hnen ah chuan,
" a thlum tui kher mai, hetiang hi ka la in ngailo "
" naktuk a in chhuak tur chu in ngaihawm dawn hle mai, i țhiannu Penelope-i nen hian in chungah kan lawm tak meuh meuh ani "
Marcus-a chuan zawi sap hian,
" nilo ve, inkhua țanpui thei a kan awm hi kan tan vanneihna leh malsawmna ani zawk alawm, in țanpui thei a kan awm hi Thitheilo Pathian te remruat anih lo pawh in an duhdan ang tal chu ani ang "
uain chu an lem leh hlek a, muang ban chat hian,
" Pu Paulin, indona hi ala rei mai thei a, chuvangin tumah in kan hma lam thil thleng tur kan sawi lawk thei lo, chuvangin General Hestia- ka lo bia ang a, in khua veng tur in sipai ka lo dah tir dawn nia "
Pu Paulin-an a a chhan leh hma chuan a tho nulh a,
" anih kan chhuak hma duh awm sia, kan mut san phawt mai ang che, Mangțha phawt le "
chutia sawi pah chuan mu tur in inchung lamah a chho ta daih a.
Pindan kawngka chu dim tak hian a hawng riai riai a, mahse Penelope-i chu tui tak in alo muhil tawh a, muangchang hian a thir kaw chu phelh in, thawmhnaw pan te hi a in bel mawlh mawlh a.
Chutia a in thlak zawh chuan muangchang hian tukverh lam a pan chhut chhut a, tukverh chu hawng in zan thlifim chu a in chhem tir siai siai a, pawn lam hla tak a ramngaw tlim hmur mai lam chu hawiin zawite hian a phun sep sep a.
Rilru hahdam leh tui tak a a bul lawk a mu mek Penelope-i chu thlir leh in an maimitchhing leh diar diar a.
Ni e, ka rin ang ngei ani ang, Vivienne-i leh Penelope-i chu a khaikhin vel ani ta ve ang.
Penelope-i chu han en reng reng pawh a pawisawi ngailo leh rilru thianghlim tak pu, tleirawl chhuak tir te, hmel duhawm leh mawl ve tawp mai, la naupang chhia ve ang reng tak kha ani a. A hmai a sawl lek lek a, a taksa a zên zaih a, cher lutuk a han sawi chi lah ani chuang silo, a pian nalhna hek silova thau lek lek, timur no sen chek mai ani a, a mitmeng chu thianghlim tak mai hian a hring nghalh mai a.
Vivienne-i erawh chu la hmu chianglo in la hmu tamlo mahse Lalnu ni âwm renga zahawm leh hmel mi chaldelh lap mai ani thung a, Penelope-i ai chuan a sa a țha zawk in a sang zawk bawk a, tin a mit mu dum kâk mai te chuan mi a hip veng veng a, la hmu chiang em em lo mah se Marcus-a thinlung chu a hneh in a luahkhat em em si.
Muangchang hian khum lam chu a pan a, khum tlang sir a țhu chung hian tui tak a muhil leh thaw ri sek sek, Penelope-i hmai chu duat deuh hian a chul sak a, zawite hian,
" ka bul ah awm chak mah la, i awm reng thei dawn silo, kawng zawh tur ka nei a, chu chu i tan kal ve theih ani silo, keipawn kalsan che hi ka hreh tak zet asin "
kun hniam in Penelope-i chal ah chuan a fawh sak zeuh a, zawi te te a phun sep sep in,
" min theihnghilh hi i tan chuan thil țha ber ani, i thinlung thianghlim tak hi keimah avanga i tih nat hi ka duh lo "
muangchanga tukverh lam hawi in pawnlam chu a thlir leh vawng vawng a, hriatloh kar an Penelope-i chu kalsan a harsat tawh hle ani tih te, a lo hmangaih hman zawk nge tih te ngaihtuah ni awm tak hian ngawi reng hian a in ngaihtuah vung vung a.
Chutianga reife a in ngaituah ngut ngut hnu chuan mumang ram a chawl hahdam tur in a mu ve ta a.
Mahse reilo te an khua alo var a, Marcus-a a lo harh ve meuh chuan thingthlêng kum hlai tak a theirah chi hrang hrang leh uain keng in a khum tlang a țhu chung hian Penelope-i chuan a lo nuih ver ver a,
" nizan khan ka lo nghak peih ta lo che anih kha, in in kawm rei viau ami Pu Paulin-a nen khan ? "
khum sir thing dawhkan bial te a athil ken lai dah pah chuan rilru hlim hmel tak hian an ti a.
" in kawm rei lo ve, i tho hma em a tin nih hi ? "
hlim deuh si, nur nung nung chung hian Penelope-i chuan,
" a dik a lawm, tunlai chu ka tho tlai thei riau mai zawng anih hi "
Marcus-a chuan " anih chuan " tih pah a tho in Penelope-i chu a kuah thut a, chutah tilui tih hriat tak hian na deuh hian an kuah zual sauh a,
talchhuah tum em em chuang silo a tal chung hian,
" Min thlah vat rawh, Leda-i te an lo kal thut chuan a țha lo ang, thil mawi lo tak ani "
Marcus-a chuan thlah duh chuang lo in, duat leh nghet deuh hian a kuah a, Penelope-i pawh chu a tal tawh chuang lo, Marcus-a chuan,
" Skyros-ah chuan ka hruai leh rih lo ang che "
hlim hmel tak leh bangbo hmel deuh a Marcus-a en hâ chung hian,
" enga tinge, engtin nge ka awm dawn tak ? "
" Delain-ah kan kal phawt ang a, chuan Isle-a i nu hruai tur a kan thang hlan in Delain- ah chuan minlo nghak ang chu, chuan inu nen Skyros- ah ka hruai leh mai ang che u, rem iti em ?"
Marcus-a kuahna ata chu chhuak in a thawmhnaw chu a siam tha zung zung a, chutah hlim tih hriat tak a, Marcus-a melh chung leh Marcus-a hma a kun zeuh chung hian,
" aw le, Ka Lal fapa Zahawm "
ngei si, nuihza bawk si hmel pu hian,
" i va han chimawm tak em "
Penelope-i chu nuih uarh uarh pah hian Pindan ațang chuan a chhuak a, kawngka bul atang chuan rawn hawi let leh in, la nui vur vur chung hian,
" in siam vat vat la, lo chhuk vat ang che ".
A sipai thuam inbel thlap a in hnuai lama Marcus-a alo chhuk chuan General Hestia leh Penelope-i te chu kalchhuah in peih sa diam in an lo awm tawh a,
Pu Paulin-a chu in mangțha nan chibai an buk diat diat a. Tichuan Delain- khaw pan chuan chak tak in an tlan liam leh ta a...
(..End Chapter 7)..
Comments
Post a Comment