Ngaiteh, chutia a awmzia hriat tum a zan khaw tairek thleng a ka ngaihtuahna ka sen hnu chuan, mutchhuak hian min zam leh chiai chiai a, intih harh tum in tukverh ka hawng sauh sauh a, thlasik thlifim ka in chhem tir ta siai siai a, mahsela harh chu khawilam ah hian ani ringawt, thlifim te chuan min zem chiai chiai ni berin ka hria, chunglam kan thlir a, Van lai zawl tak a Thla êng bial kulh mai te chuan ka lung ati leng em em a, ka lung ati chhe tlat mai pek anih chu(!)
Chutianga ka awm deuh chiai chiai lai chuan keimah leh keimah chu,
'Harh rawh, Harh rawh' tiin kan in bia a, mahse ka chiang lo ruai tawh tho mai.
..finna leh indona Pathiannu zahawm, mitmeng de riai Athena-in ka mit ah a damdawi hman thiam mutthilhna hlo a phul nge ni a, hmangaihna Pathiannu Aphrophite hmeltha i zunzámin min zem zawk ni ang,
O.. chungte chu thithei lo Pathian leh kei mihring laktlak loh leh thithei inkar ah chuan tihtheih rual ani awm si lo.
Chutianga mu leh mal pawh nei lova ka awm nuaih lai chuan harh zawk ni hian ka in hria a, mahse ka room ah reng ka lo awm tawh lo, kan hawi vela, ahma a ka awmna Lemchanna pindan hlui tak ah khan ka lo awm leh reng tawh a, kan hawi kuala, bang velah chuan meichher hi a lo in chhi thluah bawk a, mahse tumah reng hmuh tur an awm lo, chu pindan zau leh ruak huai ah chuan keimah chauh in ka awm tih ka in hriat chuan ka tîm sung sung a, chutih lai akar ah ka hma zawn ah chuan hmeichhe thlabâr mangang in a ring mangkheng a,
" min tanpui ru, khawngaih in min tanpui ru " a tih ri kan hriat thut chuan hlau leh thlabar tak in rang lutuk in ka hma lam chu kan en phei a, chu Lemchanna dawhsan chung nge ahnung lam bang emaw ni ah chuan hmeichhia, mut kawrfual tet hnik hnek ha, la naupan hmel tak, pheikhawk pawh bun lo hi ramhnuai ngaw pik tak hnuai ah hian hnunglam en zeuh zeuh chung leh thaw hlawp hlawp hian mangang takin a lo tlân mek hi ani a.
chutiang zan thim karah leh ngaw pik hnuaiah chuan engtak chuan um ang maw ti a ka ngaihtuah lai chuan chu nu hnung lawk feet sawmli emaw sawm nga emaw vel a hla ah chuan sakawr rual nen mi sawm vel hi meichher keng in an lo tlan hlawk hlawk mai bawk a.
Chutia hlau leh thlabar taka eng emaw chen a tlan a, hnunglam a hawi leh thin avang chuan thing zung bâwk ah hian a in chhuih a, hmalam a per nawlh in lungpui lian takah chuan alu chu a sawh dawt a, a zi tual tual a, thei leh theilo hian thawh leh chu a tum ngial nâ in, mahse atlai zo ta, luhai tak chung chuan an hawi kual a, a ûmtu te chuan an hual vek tawh tih chu a hai lo,
A umtu te zinga pakhat chu sakawr atanga lo chhuk in a chem sei tak chu a phawrh a, hmeichhe lam apan mek lai chuan, an zinga pakhat chu a țe tuarh a, sakawr
atang chuan a tla thum țawk a, tho leh tur reng a awm lo, ni e tho leh thei chi ani tawh tlat lo, fei sei leh hmawr zum tak chuan a thin hnun ah tak a fuh a, a fuh mai pawh ani lo, atlang chiang em atin ni.
'' Hmeichhia kha khawih suh u ''
aw lo chhuahna lam chu an hawi rual thawt a, chu zan thim leh ngaw chhah tak chuan hual khup mahse, thla bial zan anih avangin, an hma ah chuan tlangval sang thlerh thlawrh, in thazo hmel tak leh in ring taka akut a chemsei tle zek zek hum ran ading tih chu an hmuh hmaih lo,
'' tlangval thil awmzia ihre lo ani, i zinkawng chu zawh zel rawh, i lo tel ve na tur a awm lo ''
thinrim leh thu pe aw tak hian an hotu ber ni awm hian an chhang let a.
Zam hmel pu lo leh ring fiah fai tak hian chu mikhual tlangval chuan,
'' sipai sawm rual in nula pakhat kha ti vak a in um na chhan kha ka hriat ve atul ani "
" tlangval, ilo inrawlhna tur a awm lo, he nula hi mi hlauhawm leh anchhe dawng anih hi, en la a mitmeng te saw, mihring nilovin ramhuai mitmeng anih saw, mi tamtak thihna ah amah hian mawh a phur a, tin, amah pawh a in puang tawh bawk, thudik anih chu, chuan i kal thei tawh e "
Chutia sawi pah chuan nula lam chu apan a, a chem sei chu phawrh zal zal pah chuan, nula hnenah chuan,
" anchhedawng nu i thih hun athleng ve ta "
A hnung lam atang chuan,
" thudik chu hei hi ani, nula ni lovin nangmah khan thih chu i phu zawk "
" tlangval, i tawngkam avangin mitthi khua i luh angai dawn ta ani, i thisen mawh chu nangman phur ang che, he anchhedawng nu thisen nen hian " tih pah hian a rawn inher thut a, a chem sei chuan a hnunga lo ding reng tlangval ban bul chu an vei thawi thuak a, inring renga ding ni mahse thawklehkhat a a rawn chet thut avang chuan alo tawlhsawn muang deuh ani, mahse tawlhsawn lo se chuan chu sipai chuan bung hnih ah a chhuah ngei ang.
Tichuan an in sual tan chu ani ta reng mai, midang ho pawh chuan chet an rawn thawh nghal a,
chutia an in sual buai lai chuan thawklehkhat ah an bul lawk ah chuan chinghnia hi ring em em hian a û ruah ruah a, mak an tih hmel hlwm kher mai, an in sual lai chawl meuh vin phawk tak chunga thawm lo chhuahna lam an han en nak chuan, a hma a nula khan mihring hmel reng hi alo pu tawh lo, a thawmnaw te chu apawt thler a, atin te chu ramsa tin ang mai in alo sei a.
0..a van mak ngai em, atak pawh va ni suh, ka mit kan nuai a, awi ka rei, eng thil nge ni ta ngai le;
Ka rap em avang chuan en pawh en ngam lovin, ka hmai ka hup ta ringawt a.
ka hlauh leh rap em avang chuan ka hawi chhuak lawk ngam lova, mihring na tuar leh ramsa thinrim hram ri chuan ka kawchhung a fan a, ka beng in ahria pawh ani lo, ka beng kawrawng chhung ah hian an rûm ri chu a thangkhawk ri hum hum ni berin ka hria.
Dar chanve emaw lai an in beih hnu chuan thawm a reh ta dak a, ramsa na tuar nghik feih feih ri chauh a awm hnu chuan kan hawi chhuak a, a va han rapthlak tak em, rantalhna in ang ber in ka hria, a hma lawk a hmeichhia umtu sipai te kha lei ah chuan an lo thal phung a, an ril te chu a chhuak nasa in hnim leh thing zar ah te chuan a in zam darh nuaih a, an taksa lah chu thisen in a bual nasa bawk si.
An sir lawk ah chuan chinghnia lian em em mai hi chauh hmel deuh hian a bawk run a, a pum leh a bawp a chem a sahna hnu hma atang chuan adam zawh ka ring lo, thisen nen a in chiahpiah nuaih bawk si, piah lawk lungpui nghenchhan chuan mikhual tlangval chu a malpui hliam tuam in chau tak in a rum tiah tiah a,
a in tuam zawh chuan chinghne awmna lam pan chuan a bai phei chhet chhet a, abul athlen chuan țhingțhi in a zu kûn hniam a, a beng bula engemaw asawi pah chuan duat hmel tak in chinghne lu chu a chul hliau hliau a.
Tichuan Xanthus- tiin a au a, chu veleh Sakawr dum lian leh intha zo hmel tak chu hnim kar atang chuan rang mangkheng hian a rawn pût chhuak zawk a, a pu bul athlen chuan thuawih tak hian a ding hle hle a, tlangval a chuan a sakawr a atui um chu la thla in chinghne chau tak chu an tulh mawlh mawlh a.
Awi, avan mak ngai ve le, thil phiangsen nge maw ka hmuh tak chu ni le(!)
chutia tui a tulh mek lai chuan chinghne zia chu alo dang telh telh a, a mitmeng sen rum te chu a bo zo a, a kut tin hriam hmel tak te pawh chu hmuh tur a awm ta lo, tichuan chinghne lian tak chu a hma a nula ah khan alo chang leh ta reng mai.
Ka mit vai emaw tiin ka mit kan nuai a, mahse mitvai aw zawng ani si lo, a hrim hrim in eng thlarau emaw chuan min chenchilh ani, ka uap deuh churh mai, thil diklo enge maw chu a awm ani ti a, inti rilru fim takin intih harh tum chuan ka lu kan thing nawk nawk a, engmah a ang thei chuang lo, tichuan ka hmalam dawhsan lam chu kan hawi phei leh a, chu nula chauh hmel tak chu tlangval chuan a hliam te alo tuamsak diam tawh a, a sakawr chungah chuan dim deuh hian alo hlâng mek a, a chuan tir zawh chuan amah pawh chu chuang ve nghal in chu ngaw dur khup hnuai ah chuan an tlan liam nghal a.
Khawfing a chahna pawh darkar hnih vel lai a liam ta, Khawchhak lam ațang chuan Greek ho Ni Pathian ropui Helios an a mei sakawr tawlailir a Ni alo hnukchhuak leh ta ni awm tak hian, Ni chu phur fahran lo tak hian alo tawlh chhuak leh ta suar suar a, a ep tlang sang tak mai, thi thei lo Pathian te chenna Olympus tlang ang maia mawi leh ropui tak a ding luah te pawh chu a chhun eng țan ta, mahsela chu tlang bulthut leh a hnuai ram ngaw pik tak te chu zân ang maiin ala thim khup a, a ên theihna zawng zawng pawh hmang sela chu ram ngaw chhah tak chhung chu Ni chuan a chhun tlang thei chuang awm lo ve.
Sakawr tlan ri chu alo hnai zel a, reilo te ah chu ngaw hnuai atang chuan sakawr lian tak hi a chunga mi, chauh hmel tak pahnih phur chung hian alo chhuak hlawl mai a.
A chhak tlang atanga luangchhuak ni awm tak lui lian leh thianghlim hmel tak bul a thlen chuan sakawr chu muangchang hian a ding a, a pu chuan an mi phurh nula a pawm thlak hnu chuan, chau tak in a bawk ve ta hle hle a,
tlangvala chuan a puan lum leh hlai tak chuan nula i chu a tuam a, muangchang a tui a tulh hnu chuan chau tak in lei ah chuan a bawk thlawp a, a muhil zui ve nghal a.
An harh leh meuh chuan Ni chu alo tlangsang in chawhnu lam ruih alo ni tawh a, nula chu an melh a, mahse alo la mutthilh avang in atho a, a chem hriam tak nen chuan ram ngaw lam chu pan in a liam ta a.
Darkar thum emaw vel lai a thang hnu chuan thingtuai leh chhawl pu chung in alo chhuak leh ta, tichuan a in nghat a, bûk te ang reng deuh hi a sa ta malh malh a,
a siam zawh chuan nula i chu pawm in a chhungah chuan ahan mut a, a bulah chuan a ram thei hawn chu dah in, ala muttui hmel em avang in kaitho duh lo a, lui lam pan in hmanhmawh takin a liam thla leh ta a.
Lui a zu thlen chuan sangha chu an lo tam hle a, tui chungah chuan an rawn in perh chhuak dawrh dawrh hlawm a, tichuan mau fei siam in, rei lo te chhung chuan tamtak a chhun hlum nghal mai a, chuan a in sil sawk sawk a, hlawhtling inti tak in buk lam pan chuan a chho leh ta a.
Bûk a thlen chuan Ni chu a tla fel vel chiah a, nula i pawh chu alo harh tawh a, a thei hnutchhiah kha alo muangchang hian alo ei mial mial a, nuih suk bak chu a be lem lo, ngawi reng in thing ala khawm a, mei pui a chhep hluah a, a sangha man chu a chunga a rep tlar dul hnu chuan, nula i bul ah chuan ava thu phei ve ta chauh a.
" i hliam te chu enge a an tawh a "
" dam chu a dam har ka ring, mahse ka țha tawh khawp mai "
" engvanga khang misual rual ho khan thah tum che nge an nih a..
a kun nghiai a, a mittui atla dawn ta mai a,
"pawi ka ti khawp mai, i rilru natna tur ani ang tih ka lo ngaihtuah miah lo ani " tiin nula i sam chu a chul heuh heuh a, a sawi tur hre lo chuan, " i ril te atam tawh em "
zawi fahran hian alu abu nghat a, zawt nawn leh tawh chuanglo chuan atho va, a sangha rep tlem azawng leh tui bur kengin nula i bulah chuan ava thu phei leh a, a hma a chhawp pah chuan"
vawiin chu thi theilo Pathian ten mal min sawm tehreng emaw ni, reilo te chhungin ka man teuh a, an lian hlawm em em leh nghal "
nula i chuan a duh tawk a ei hnu chuan, tui tlem alem an lem leh sak hnu chuan, " engkim ah i chungah hian ka lawm ani, mifel tak inih avangin Tui Pathian Poseidon an mal asawm che ani ngei ang "
" Pathian te hian min thlir reng a, an duhloh ang zawng a nun hman hi chu atha lo ani "
a sawi pah chuan puan lum hmel tak chu an lak belh a, nula i chu sin tir pah chuan," muhil tawh rawh, i chau lutuk ange, tui deuhin i mu dawn nia "
A tho va buk kawngka bul lam ah chuan pheiin amutna tur an siam ve sawk sawk a, thil tam tak ngaihtuah chung chuan reilo te chhungin mumang rama chawl hahdam tur in a muhil ta siai siai a.
Darkar hnih vel chauh a muhil hman tih chuan, na tuar rûm ri hian ati harh zawk a, ngaihtha lo tak hian hmanhmawh deuh a tho in nula i bulah chuan ava phei a,
" i muhil miah na nge "
chau aw tak hian " la muhil lo, min ngaihtuah suh, ka tha leh mai ang "
chauh hmel tak in a rûm țiah țiah a, mahse reilo te ah nula i chuan khawngaihin ka bul ah hian lo mu ve mai ta che, a vawt lutuk a, ka khawng mai dawn in ka in hria ati leh a,
chutah hreh deuh, chak deuh bawk si chuan an in thawlh ve rawk rawk a,
A âwm a nula in alu rawn nghah pah chuan, " nichin khan i zawhna kha ka chhang lo va, min ngaidam dawn nia, ka ngaihtuah zawng ringawt pawh hian ka rilru ana a, ka thin pawh hi ala rim reng asin "
" min chhan kher angai hleinem, inthiamlo duh suh, muhil la, i rilru natna te pawh a zia mai ang "
" Ni e, dik tak chuan ka hming chu Penelope-i ania, Isle- khua ah kan awm thin a, chuan, Eastland- leh Gallatican- khaw inkar a awm ani, tin, ka pa hi Druid ani a, ka nu hi Healer (mi in ngaitlawm, ralin an beih lai pawh a kutthawh ngailo. Druid chi pêng tho. CR) chi zing ami ani bawk a, mi zah kai leh chung en kan ni ve thin a "
a in sut leh rih a, an ngawi deuh vang vang a,
" ni e, chhungkaw hlim tak leh mite zah kai kan ni ve thin alawm, mahse, ka pa chu ka pian hnu lawk chuan kan khua a roreltu ber leh Witch Of Isle, an tih bawk chuan dawt a puh in a khaihlum a, chu pawh a îtsik vang ania,
chuan kum sawm vel kal ta khan kan khua chu Goth- hnam kawlhsen hovin min rawn rûn a, kei chu ka nu chuan ramhnuaiah min thukru a, hetih lai hian kum riat lek ka la ni a, chuan ka bihrukna atang chuan râlin a kan khua an hal lai leh mipui te an sawisa leh an that lai te chu mittui tla zawih zawih in ka thlir reng a, chutia ka en reng lai chuan ka hnunglam a hnahthel ro chu dim taka rap ri rek rek thawm hi ka hria a, chuan muangchang in ka hma a lungtum chu ka chhar a, muangchangin hnunglam chu kan hawilet a, ka hnung lawk ah chuan Sipai thir kawr ha, palian deuh mai hi alo ding reng tawh a, tlanchhiat tum a ka tho chiah chu akut lianpui chuan ka chhipsam ah rawn man in, akut lehlam chuan a chem sei pui, a kawnga apai chu phawrh tumin an dap rak rak a, chuveleh ka lungtum ken chuan ka theih pa tawpa na in a chal ah tak ka chhu pawp a, a dak awrh a, ana ti chu a țe ruai ruai a,
chuan na deuh hian min paih leng lawp a, chu tah chuan lung zum ah ka chal ka tauh thler duaih a, ka hmai ah hian thisen hi a rawn luang nghal zawih zawih a, ka lu a rawn hai nghal muai muai a,
muangchang in hlauhthawnna nen thawh leh mai ka tum a, mahse ka tho thei lo, tha reng reng ka nei lo a, ka taksa hi a zawi vek a, chuan lungpui ngheng chuan ka thu ta hle hle a, hma lam kan en phei a, chu misual pa chu akut lehlam a a chal dawm chung hian ka lam pan hian arawn phei chhut chhut a, chutih laia ka mangan zia chu,
0..khatih lai khan ka pa ka van ngai tak em "
an ngawi leh deuh vang vang a, chu tah,
" ka hlau lutuk chu ka maimitchhing a, ka tawngtai ta ringawt a, khatih lai khan ka thih loh hi ka ring tawh reng reng lo.
Mahse chutih lai chuan thawklehkhat ah thli hi rawn thaw vuk hian ka hria a, kan meng leh chu, kawrfual var ha hmeichhia, hmeltha leh zahawm hmel tak, lal chhungkaw zinga mi ni maiin ka hria a, mahse ani lo, thithei lo Pathian ni mai zawk hian ka hria, hian chu misual pa nghawng ah chuan alo rek a, an chak zia chu a kut lehlam in lei si lo hian alo rek kang nawl nawl mai anih chu, a rek na bawk aniang, chu pa chu a tal awrh awrh a, a khur der der a, leia a thlak rual chuan athi nghal ni maiin ka hria..
chuan chu misualpa a sawisak zawh hnu chuan ka lam pan in alo phei a, an hmelthat dan chu, Sparta Lalnu hmeltha, Trojan Lal fapa Paris-a thinlung pawh tibuai vek tu leh a rûk a haw tak, Greek pasaltha tamtak in lak let an tum na lam a an thih phah na Helen hmelțha i, Hmangaihna Pathiannu hmeltha Aphrophite-i pawn a îtsik hial pawh khan a tluk zo hian ka hre lo.
Ka hmai vela thisen luang arawn hmuh veleh, a țe deuh thawt a, hnunglam ah a tawlh dawrh a,
" min hlau suh "...
a sawi rual chuan puan nem hlai deuh hi a rawn theh phei a,
" i thisen kha hrufai rawh, chuan i tuam dawn nia ".
Ka piah a lungpui chung ah chuan thu in minlo nghak a,
ka in tihfel zawh hnu chuan, ka bulah lo pheiin, duat tak in ka samah a chûl heuh heuh a,
ka beng bulah hian zawite hian,
" ka bulah i awm tawh alawm, hlauh tur engmah a awm tawh lo, ka hnenah ka hruai che anga, i țha leh mai ang ".
Chutia phun dep sep pah chuan a nui sen sen reng a,
O... Ava han ngilnei tak em, a mitmeng ah te chuan khawngaihna a khat tlat ni ber in ka hria.
Chuan zawite hian min pawm kâng a, min thlawh pui nge min tlan pui zawk tih reng ka hre chhuak zo tawh lo, ka lu a hai em avangin chiang lo ruai in engkim chu ka hre vek tawh a.
Ka harh chhuah leh meuh chuan khum lian leh dûp nuam deuh mai ah hian ka lo mu reng a, ka mit kan len kual a, bangah chuan awmze nei tak hian meichher a in chhi thluah a, chu chuan inchhung chu chhûn ang maiin a ên êng sut niin ka hria, Lal in chhungah ka awm ni ta ah ka in ngai hial a, khum bul dawhkan chungah hian rangkachak plate hlaipui mai hi a in hung a, a chhungah chuan thei chi hrang hrang hi alo awm teuh a, ei tum a ka ban lai tak chuan room kawngkhar chu zawi muang a lo in hawng in, nichin a min tanpui tu nula hmeltha leh thianghlim kha alo lut a, khum chunga lo thut kai pah chuan
" i muhil thei em, i lu te kha ala na em, hei uain hi tlem in la, i harh deuh sawt mai ang ".
Chutia tih pah chuan no tung it et ah hian min thlit sak nghal a,
" Isle khua a chêng emni inih? "
" aw ni e "
" chhûngte ila nei em "
" ka nu nen chauh kan awm a, mahse hnam kawlhsen hovin min rawn rûn khan, ka nu in min bihruk tir a, mahse engmah a chanchin ka hre zui tawh lo, athi nge a dam tih pawh "
" ava pawi ve aw, ala dam mial maithei asin, chuan i pa chu "
" ka pa chuan ka pian hnu lawk in min boral san a, kan khua a roreltu Siraka-in a tihlum a "
" i pa chu Druids ani em "
"aw ni e "
" Nicholas den adel tihna ani maw "
"aw ni e, ka pa nen chuan in inhria a law maw "
"aw hre thin e, mifel tak ani asin "
ka pa chanchin chuan a lung ati leng hle aniang, tukverh lam hawiin, amit chuan ram hla tak thlir ni awm tak hian che chang lo hian, pawnlam chu a melh ngawr ngawr a.
Harh chhuak thut ni awm tak hian a phu zawk a, ka chal a rawn fawh zauh pah chuan
" min hrethiam dawn nia, i duh chuan in hi in fang dawn nia, a nuam i tih ngei ka beisei, nakin ah Emilia ka lo tir ang, a nin a fan kual pui dawn che nia "
zaidam leh nem tak hian ati a,
tichuan min chhuahsan ta a,
Min chhuahsan hnu lawk chuan ka tho va, ka sam te khuih in ka in ti fai a, chutih lai chuan kawngkhar hi dîm te hian alo in hawng riai riai a, ka rualpui awm vel hmeichhe naupang fai ving veng tê hi a rawn lut a, a kawr tlang vuan a kun hniam zauh in,
" Hi.. Emilia ka nia, ka pi in kawm hlim tur che in leh in hi fan kualpui tur che in min rawn tir a "
" Penelope ka nia, lo kal rawh "
ka bulah lo pheiin ka sam chu min khuih sak a,
" khawi atanga lo kal nge inih "
" Isle khua atang in "
" engtin nge ka pi nen hian in in hmuh a "
" misual in min sawisak laiin alo kal a, min tanpui a, he tah hian min hruai tawp "
ka sam a khuih zawh hnu chuan room fang kual tur chuan kan in zui chhuak a.
" Lalin ropui tak anih hi maw le "
" nia, a mi tamtak in ral atangin an thlir a, kal an chak thei lutuk, mahse kal an la awm ngai miah lo, a ropui zia leh mawi zia chu hman atangin thawnthu ang in an sawi thin alawm "
" ka hre tawh than in ka hria, chutiang thawnthu chu "
" i hre tawh ang, a hming chu Castle of Narberth ania "
" aw hria e, Lasi Lal in an tih thin kha anih chu, kan khua atang pawn a chhhip zum khi a hmuh theih alawm, zân ah achhung ah emaw ni êng a awm țhin "
" mihring engzah nge cheng reng reng a "
" ka pi nen chauh hian kan cheng, mahse a chang chang hian mi pakhat hausak hmel deuh mai hi alo kal țhin "
" ava khawhar thlak duh awm ve "
" khawhar thlak vak loh, ka pi hi chhunah chuan room ah a awm char char thin a, zanah chauh kan in hmu thin, room ah alo kal a, ka khumah lo thu in, zaiin min min awi mu thin, ka bulah chuan ahlim thei lutuk, hmel hlim tak in min be reng a, zinga ka thawh te hian ka khum bul ah hian pangpar rimtui deuh hi alo dah ziah thin, mahse..."
" tinge a "..
" zankhat chu zanlai velah hian, phun sep sep leh lungchhe taka țap ri hian min ti harh a, chuan thawm dim tak in ka tho va..
thawm lo chhuahna bul lam hnaih tukverh chu dim te a hawng in kan hawi vel a, ka mutna room bul chiah room chung bathlar kotlang ah hian ka pi chu amah chauh hian alo țhu a, zawi te te a phun sep sep in, a changin a in sût leh faih faih țhin bawk a, chutiang chuan zantin a țhu ziah țhin "
" a pasal in athihsan tawh aniang a, a van khawngaihthlak em em "
" nilo vang, pasal aneih awm ka hre lo reng reng, thlalak intar ho te lah hi a hlui hmel tawh hlawm si, mi pakhat lo kal zauh zauh țhin chu Wallachia- khua a awm ania, ka unaupa ati a, Vlad..tiin a ko thin, hetiang Lalin ang ah tho hian a cheng ve atia, sumdawng mi hausa tak, Count Vladislaus tiin mi chuan an hria "
tichuan thil tamtak Emilia chuan min hrilh a, țawng duh tak ani a, chhûn ah huan ah kan in fiam a, zân ah chuan lehkhabu kan chhiar țhin, zantin api chu min kawm hlim tur in alo kal țhin a, mahse chhûnah chuan a mu nge ni, kan hmu ngailo reng reng.
Chu in ah chuan kum sawm lai ka awm a, zankhat chu kan pi chuan naute hmeltha deuh hi alo hawn a,
Emilia nen chuan kan hlim pui em em a, nitin huanah kan infiam na ah kan pawm chhuak a, kan lenpui țhin,
ka mutui lai chu enge maw ni hian minti harh zawk a, ka mut dawn a tha tak a ka kalh, ka khum bul tukverh chu alo in hawng reng tih ka hmuh chuan mak ti tak chungin khâr tum in ka tho va, ka khar fel chiah tih chuan,
" i muhil thei nange "
aw lo chhuahna lampang chu rang deuhin ka hawi let zawk a, kan pi chu ka khum sirah chuan alo ding reng a, nuih sen sen pah chuan,
" i va phu nasa a, lo kal teh thil hrilh tur che ka nei a nia "
Khum ah chuan kan țhu dun a,
ka sam a chul hliau hliau pah chuan,
" hman zan a ka naute lo hawn kha in khaw bul lawk Eastland khua ami ania, mahse an ramchhuahna ah enge maw vangin apa a boral thut a, an nu in chu thu an hriat chuan atuar thiam lo lutuk chu a ât phah ta a, chuvangin naute khan enkawl tu a nei si lo a, ka khawngaih a, ka lo hawn daih anih kha, chuan in khua Isle pawh tunah chuan a ralmuang tawh lutuk, a changkang tawh bawk a, thingtlang pawh an ti phal tawh lo, i nu pawh kha ala dam a, a hriselna atha vak tawh lo a, bakah, ralin in khua an rawn run khan inu khan hliam a tuar nasa deuh a, thi chhawnga alet reng kha hmelma ten thi tawh ah ngaiin an kalsan hlauh a, chuvangin adam khawchhuak hlauh ani, ahliam te avangin ataksa a chaklo tawh em em a, a upa tawh bawk sia, i pa leh nangmah ngaiin ațap reng mai sia, enkawl tu pawh anei silo, chuvangin inu hnenah chuan chen i duh chuan i duh hun hun ah ikal thei ania "
Ka nu ala dam tih ka hriat chuan ka lawm lutuk chu ka mittui atla zawih zawih a, a awm ah chuan zah pawh dawn lovin ka bei thlawp a, ani pawh chuan duat tak in min lo kuah let a, ka sam ah a chul heuh heuh a,
" haw i duh anih chuan, naktuk zân ah ka va thlah dawn che nia, mahse ka khua ahar dawn lutuk a, Emilia pawh in angai ngawt ang che "
" haw chu ka chak a, mahse i bula awm hi ka la duh asin "
Ani pawh chu a mittui atla hial in ka hria, mahse mak ka tih em em chu, khatia a awm a ka va bei khan, lungphu reng reng anei lo, bakah pangti lum pawh anei miah lo nia, a kut te kha a vawt vek asin, chuan Emilia khan, kan pi hi darthlalangah alang thei miah lo, hlimthla pawh anei lo ati a, mahse kei chuan chung chu engmah ka hre ve lo na a, a sawi dik mai thei bawk ani,
engtik lai in nge ka lo mutthilh tih reng ka hre lo, ka han harh chuan Ni alo chhuak uarh tawh a, chhuatah chuan naute leh Emilia chu an lo infiam a, an bulah thu in nizan lama kan pi min hrilh engkim chu ka hrilh vek a, ani pawh chuan min lawmpui rualin a khawhar tur zia leh, lunglen dan tur te asawi sep sep a, engtik ni ah emaw chuan kan la in hmu leh dawn nia tiin ngai em em in kan in kuah vawng a, chuan min hriat reng nan tiin, țhi nalh deuh mai, a locket lunghlu dum fim nalh deuh mai hi min pe a, kei pawn ka țhi roh deuh ka pe ve a.
Nilengin ka hawn tur thei leh thlai te la in ka hun ka hmang zo va.
Zan ah chuan ka thawmhnaw te ka remfel hnu lawk in, ka pi chuan Emilia chu rawn tir in,
Gate bulah chuan sakawr lian deuh deuh pahnih hi an lo ding a, ka pi chuan pakhat ah chuan ka bungraw hawn tur te dah in, pakhat chungah chuan min chuantir a, ka hnung ah chuan a rawn chuangkai ve nghal a.
Tichuan Emilia te chu mangtha in kan khaw lam pan chuan kan tlan chhuak ta a,
Arkaiden zãn anih avangin kawng chu athim em em lo, kan sakawrte an chak tha bawk a, zankhua in kan tlan a, khawfing a chah dawn meuh chuan kan khaw dai lawk ah chawl in kan thei paite kan ei in, mei te kan chhem a, khawvar dawn hnaih, leilung alang tan tih chuan, ka pi chuan,
" khua pawh avar dawn ta, ka kalsan tawh mai ang che, i tello chuan ka khua ahar dawn hle mai, engtik ni ah emaw chuan kanla in hmu leh em ang chu "
min kuah vawng vawng pah chuan a zungbun pakhat a phawi a, min hriatreng nan tiin min bun tir a,
Tichuan ramlam ah chuan min kirsan leh ta a.
Chutia min kalsan tak hnu chuan kei pawh kan khaw lam pan chuan hlim tak leh huphurh deuh chung si chuan ka in khalh chhuak ve ta hnak hnak a, khua ka han lut chu alo danglam hle tawh a, ka pi in a min hrilh tawh ang khan, alo ropui in alo lian tawh hle a, mi te chuan zîng kar kar a khaw pawn lam atanga nula mahni chauh a lo kal ta chu min lo hmu duh hle a, kan hawi vel a, ka hmelhriat țhin te chu ka hmu ngei mai, mahse min hria ang pawh in an lang lo.
Tichuan kan in lam chu ka pan ding nghal nal nal a, kan in chu alo la danglam lo hle a, enkawl loh leh siamthat anih loh avangin tlem chuan a rawp deuh tawh chu ani, ka nu chu bathlar ah hian alo thu a, a hmel chu a vuai ve tawh hle a, ataksa te chu a cher in, a hrisel lo tih hi a hriat ngawih ngawih mai, min rawn melh zawk a, mahse lehlam ahawi leh daih a, min hria awm pawh in alang lo.
In sûm ka tum ve hle na a, ka in sum thei thlawt lo ani, kum sawm lai ka hmuh tawh loh, kan khua leh kan in te, khawvel ah hmuh leh ka in beisei tawh loh ka nu kan hmu leh te chuan ka thinlung hi a ti kehsawm ni ber in ka hria.
Sakawr atanga chhuk in ka va tlan phei a, a hma a țhingțhi in,
" ka nu, min la hria em, ka nu, i fanu kha ka nih hi, Penelope-i kha "
Țawng pawh ka țawng țha thei lo, ka mittui hi atla zawih zawih a,
ka nu pawh chuan min han en vang vang a, rei fe hnu ah chuan min hrechhuak ve ta.
" ka fanu, ka fanu, ... Ava han mak ngai em, ka fanu Penelope, ka fanu, i thih daih tawh ka ring asin, Nicholas -lo tho la, i fanu hi lo en teh, alo puitling der tawh asin "
Min rawn kuah a, a țap zui ta hawm hawm a, mi te chu kan thawm ah an lo kal khawm a, ka nu chuan thil awmzia alo hrilh zel a, min hmu apiang chuan mak min ti in, thlarau en in min en ni ber in ka hria, ka thiannu Mina-i leh Katie-i te pawh an lo la dam a, an hlim lutuk leh mak ti bawk si chu an lung a chhia a, min kuah a, an țap hawm hawm reng a.
Chutiang chuan kan khua ah chuan hlim tak in kan nufa chuan kan cheng ve zel a, ka pi in a ka bungraw kar a alo dah tel, rangkachak leh, lunghlu chi hrang hrang hmang chuan kan in tungnung ve zel a, ka pa damlai ang mai khan mitin mai chuan min en leh tawh a.
Mahse chutia hlim taka kan khawsak ve beuh beuh lai chuan, îtsik tu leh er tu te chu an lo pung ve zel a.
Chutih lai kar ah, kan khua ah chuan hri alo leng thut a, mi tam tak an thih mai bakah, chu hri pui lên hnu lawk chuan ran vulh thenkhat chu rapthlak tak tak hian an thi in an bo leh zauh zauh țhin a, ramsa pangngai sulhnu ni thei hian alang lo, an thih dan rapthlak em avang chuan.
Chu chu țanchhan ah hmangin, min er tu te chuan dawithiam ah min puh a, Emilia-i leh ka pi in a ngaih hruih nan a min pek, ka zungbun leh thi te chu ka dawi hmanrua ah an ngai a, mahse thil engkim dik takin ka hrilh a, thenkhat te chuan min tan tho mahse, min haw em em tu pakhat a awm a, ka pa pawh min thah sak tawh tu dawithiam Siraka-i chuan ka chhiatna tur ringawt alo zawng a.
Tichuan mipui in a min huat leh min tih boral theih nan Thla bial zan apianga chinghnia a chang țhin tur in a dawi chu ka chung ah alek ta a, tichuan dawt a min hek in, engkim chu keimah vangah a puh bawk a, chuan zan tin khua a sipai te chuan min châng țhin a, rei fe chu ka in thup hram hram a, thla bial zan chuan kan khaw pawn ah, tlangah te ka tlanbo daih thin a, mahse min enthlak reng avangin atawp ah chuan min man ta nge nge a, vantlang hmuh a min sawisak hrep hnu in, tanin ah min khung a, atuk a khaihlum mai tur ka ni chu ka țhian te, Mina leh Katie te chuan min khawngaih em avangin a ruk in min rawn chhan chhuak a, mahse ka thawm ah vengtu te an lo harh a, tichuan kan in hmuhna thleng khan min rawn umzui ta ani "
Chutia a chanchin a sawi lai chuan, engtik lai khan nge a mittui alo tlak tih reng a hre lo, pasaltha leh mi hrat khawkheng anih na chuan a mittui chu a dal zo lo, nula i chu a khawngaih em em a, tin, chubak ah nula in a ka Pi atih, hmeichhe maksak deuh atih kha a ngaihtuah zui a, a hmangaihi kha ani angem(!)...
alo nih tak hlauh chuan, kum tamtak chhung alo zawn tawh chu abul mai ah a lo awm reng ani thei angem,
i Pi chenna ah chuan min hruai ta che tih mai chu a duh rum rum a..
mahse nula i chu khawiah nge a kal tak ang, ramhnuai a vakvai leh a dam chhunga anchhia a phur tur chu a lainat bawk si a, atih sual ni miah lo a a damchhung mittui leh lungngaihna nen a hmang tur chu kalsan mai chu har a ti a, hetiang anchhia sût thei leh dawi lam ti țhin chu Eastland leh Noth- ramah te pawh tamtak an awm a, chu chu tuna an awmna atanga hnaite ah ani, tin henglai ramhnuai velah pawh hian mahni a awm leh tal hrang chu an awm nual a ring a, mahse nula i chunga kut lek tu kha chu dawithiam ropui tak leh chak tak anih avangin, an sut theih aring chiah bawk si lo,
thei hlauh se chuan a hmangaihi chu a hmu thei vat dawn si a,
a in ngaihtuah nasa hle a, anih loh chuan an awmna atanga mel za tam tak a hla a awm, Wizard ropui leh thiltithei lutuk, Wizard of the first order, Niera- chu an pan mai a ngai dawn a ni.
Comments
Post a Comment