chu phul hmun chu a zau vak lo a, khaw dai lwk ami hi alo ni a, nichin a meikhu chhuak a hmuhna kha khua alo nih avang in, a ring dik ngei ani ang, a hlim hmel in a mitmeng te pawh a harh hmel tawh khawp mai,
phulah chuan naupang enge maw zah hi anlo in fiam laih laih a, chung naupang ho lam pan a a sakawr a khalh kal lai mek chuan naupang ho chuan ramhnuai atanga lo chhuak, sipai thuam a in thuam an hmuh chuan an infiam lai pawh chu chawl in, mak tih hmel tak hian an ngawi reng hian anlo thlir țhap a,
an bul hnai ava thlen chuan chung naupang maktih hmel tak a en țhap tu te hnen ah chuan,
" hei hi khawi lai nge, saw khaw hming saw min hrilh thei em ? "
an ngawi thap a, an in melh zeuh zeuh a, chhan nachang pawh an hre lo,
minute sawm emaw vel lai chhang lo a an ngawih reng hnu chuan an zing a alian deuh ber chuan ring deuh hian,
" Enith- " arawn ti lauh a,
" ka lawm lutuk e "
biak chhunzawm pawh tum chuanglo chuan khaw lam pan chuan a tlan zui ta daih a, naupang ho chuan hrilhhai hmel tak a thlir zui in an in be ru sar sar hlawm a.
Reilo te an chu Enith- khua chu a thleng nghal mai a, khaw chhung an lut chu, mi ho chuan mak tih hmel tak hian anlo en hu hu hlawm a, a mah en reng chung a an in be sar sar te chu engah mah ngailo ni awm tak hian a hmalam chauh chu en in muangchang hian a sakawr chu a khalh kal det det a,
Tumah pawh ngaihsak lo va hmalam pan a a kal lai chuan pa pakhat, pachang deuh hmel pu hian a sakawr chu lo vuan ding in,
" khawilam pan tur nge inih a, harsatna i nei em "
" Delphi- khua a kal tur ka nia, Delphi zawlnei hmu tur in, he khua atang hian engtia hla nge ala nih ang "
" kan khaw piah lawk ah sawn Haran- khua a awm a, chu mi khua atang chuan hnai te ani tawh, khawi atangin nge "...
chauh hmel tak leh tawng peihloh hmel tak hian,
" Isle "
chupa chuan khawngaih hmel tak a en ha chung hian,
" inlo kalna a hla hle mai, pawi itih loh chuan zan in chu ka lo mikhual ang che u, damlo i hruai anih hmel bawk si a "
" kan lawm khawp ang "
" anih chuan minlo zui ula, sawlai deuh ah sawn ania "
Țawng pah chuan an piah lawk a in te fel ren rawn chu an kawk zauh a.
Muangchanga chu khawchhung pa chu zui in Marcus-a chuan sakawr chu a khalh kal beuh beuh a,
chu pa ina a kawhna lai in kawt an thlen chuan chu pa chu, 'Eros'- ti in an au vak a, chutia a auh hnu lawk chuan an hma zawn a in ațang chuan mipa naupang kum sawm mi vel tur hi a rawn chhuak nawlh a, mak tih hmel tak a Marcus-a te en reng chung chuan kawngkhar ah chuan a ding reng a, chu tah Marcus-a te hruaitu pa chuan a kut a an hui tak ah chuan an lam ah chuan a rawn phei a,
chutih lai chuan Marcus-a pawh chu sakawr chung atang chuan alo chhuk ve mek bawk a,
Penelope-i chu muhil ang maia a la mutthilh reng avang chuan dim tak hian a hlang thla a, chupa chuan lo pui vat in, naupang hnen ah chuan,
" sakawr in ah lo va dah ang che "
chutia tih pah chuan sakawr hrui chu a kut ah an hmehbel nghal a,
Marcus-an a Penelope-i a pawm tak ah chuan hmanhmawh tak in chu naupang lo chhuahna in lam pan chuan a kal vat a, a kut a Marcus-a chu hui in,
" helam ah "- an ti a, Marcus-a pawh chuan i he lova zuiin, chu in chhung ah chuan an in zui lut ta daih a.
In chhung an luh rual chuan chu pa chuan ring deuh hian,
" Helen " an ti lawng lawng a, chu veleh inchhung a pindan pakhat atang chuan hmeichhia, kum sawm thum bawr vel tur hmelchhe lo tak hi lo chhuak in,
" Dan, eng thil nge nge ni ta " tiin Marcus-a te in pawm tun chu angaihna hriat loh hmel tak hian an thlek vang vang a, chutah Dan-a(marcus-a te hruaitu pa) chuan,
" damlo kan nei a, a mutna tur lo buaipui vat rawh, khawnge Metis-i leh Selen-i hi " an tih zawm nghal zat a,
Dan-an a a biakna chu hre lo ang maiin chu nu chuan Marcus-a lam hawi pah chuan, 'he lam ah' tih leh pindan pakhat a luh a rual nghal a, Dan-a erawh chu a in her vut a, pawn lam ah hmanhmawh hmel tak hian a chhuak daih a,.
Pindan a chu nu lut chu zui ve nghal vat in khum hniamte lo awm ah chuan Penelope-i chu dimte hian an mut a, a sam hnawk niaih te chu siam țhat sak in, a tuamna puan chu an sin tir lehnghal a.
Khum sir a țhut pah chuan Marcus-a chuan a bul a ngawi reng a ding, khawngaih leh mak tih hmel tak a Penelope-i lo thlir reng nu hnen ah chuan,
" ka pi, in mi puihna avangin kan lawm tak meuh meuh ani, Delphi- zawlnei hmu tur in Isle- khua atangin kan lo kal vang vang ani " chauh hmel deuh hian a ti thâwp sat a.
Chu nu, abula ding reng Helen-i emaw ni chu Khum lu lam ah hian muangchang in a thu riai riai riai a, Penelope-i sam ah chuan duat tak mai a chul heuh heuh leh thlir reng chung chuan,
" inlo kalna a hla hle mai, nang pawh i chau tawh tih i hmel leh mit meng ah alang vek tawh anih kha, lo inti fai la, lo in ei puar rawh, heti hian kan lo awmpui rih ange "
chutia a sawi lai chuan an awmna lo lam pindan atang chuan hmeichhia hlim deuh a nui uar uar leh zai rat rat thwm hi alo ri chhuak a, an awmna pindan lam pan in an rawn kal chiang ani.
An zai leh nui ri chu a hnai telh telh a,
an awmna pindan kawngkhar a rawn in hawn rual chuan chu țawng leh nui ri chu a tawp nghal chat a.
Chutia an in chhung a Sipai thuam famkim a in thuam, tlangval hmeltha tak an han hmu thut chu, hmeichhe tleirawl pahnih te chu an in be mawlh mawlh lai tawp in, mak tih hmel tak hian pindan kawngkhat bulah chuan an ding ngawi ta reng a.
Chutah nu Helen-i chuan muangchanga an lam hawi pah hian,
" Metis, Selen, hei mikhual kan nei a, a intih faina tur te lo buatsaih sak rawh u, zan riah kha buatsaih nghal bawk ula, Eros-a leh i pa te pawh kha khawiah nge alo chhuah leh hman tak ni ".
Chutia an nu in atih hnu chuan chu tleirawl pahnih te chu Marcus-a melh zuk zuk pah chuan zah hmel tak hian rang deuh in an in zui chhuak leh nghal vat a.
Pi Helen-i chuan Marcus-a hnen ah chuan,
" ka fa te an nih kha, nang pawh va in ti fai ve vat la, harh pawh i harh deuh ang "
chutah ring deuh hian,
'Selen'- anti vak a, reivak lo hnu ah chuan pindan kawngkhar chu lo in hawng in, nichin a tleirawl pahnih te zing a pakhat zawk kha kawngkhar ah chuan a rawn dak dek dek a,
Pi Heleni- chuan,
" bowl ah khan tuilum lo la lawk rwh, puan nem lo keng bawk la "
'Aw le'- tih pah a pil leh nghal daih in reivak lo ah chuan Thing thlêng kum a tuilum rawn chawi chung hian a ran lut leh a, khum zir dawhkan te a a hun hnu chuan tui hmel deuh a khum a mu nula hmeltha tak Penelope-i chu mak tih hmel deuh hian an thlir vang vang a,
a nu chuan,
" Selen, kan tlangval a hi hruai la, a in tihfai na tur lo buatsaih sak rawh u ".
Marcus-a alam hawi pah chuan,
" i pa thawmhnaw chu a ha tawk ve tho vang, lo laksak ula, a thawmhnaw te pawh hi inlo tihfai sak nghal dawn nia..
Chutia a sawi zawh hnu chuan Marcus-a chuan nu nula chu a zuichhuak ve ta nghal a.
Marcus-a te in zuichhuah hnu chuan Pi Helen-i chuan Bowl a tuilum ah chuan Puan them hi chiah in Penelope-i chal leh hmai vel ah chu duat hmel deuh hian dim deuh hian a hruk sak hliau hliau a.
Chutianga Dar chanve vel lai duat tak a a enkawl mek lai chuan Marcus-a pawh chu fai veng vawng hian arawn lut ve ta a.
Khum ah chuan rawn țhu ve in, Penelope i hmai chu a chul sak heuh heuh a,
chutiang a thlamuang leh hahdam tak a chu lemchan dawhsan lam ka thlir vauh vauh lai chuan ka awmna in chu a rawn nghing dur dur a, a la nasa telh telh lehnghal, ka hma leh hung chauh ni lo, ka vel a țhutthleng awm te pawh chu an in sawi hlawk hlawk hlawm a, lemchan dawhsan lam ah chuan enge thleng a, engtin nge an awm tak tih pawh ka ngaihtuah hman lo, ka thinlung chu hlauhna hlir in a rawn khat nghal a, lir a nghing ani chiang mai ti a, tlanchhiat tum a ka țhut na atanga ka tho chiah tih chuan thawk leh khat ah lirnghing emaw ni chu a rawn tawp thut a, chu ka awmna in zau pui mai chu a rawn thim leh ta thut mai anih chu.
Chet lak ngaihna pawh a awm lo, chu thil thleng mak tak mai chuan ka thau ah min man a, ka chhungril ah ka khur zawih zawih ani ber mai.
Chu thim chhah rapthlak tak mai chuan ka thaw ati chham a, ka lu hi vir muai muai ni hian ka hria, ka chianglo ruai a, ka meng nge ka mai mitchhing tih pawh ka hre thei lo hial a.
Chutianga mu leh mal pawh neilova ka awm mek lai chuan kawr thuk tak mai a tla thla vawn vawn ang mai hian ka in hria a, ka thaw chu a zawi telh telh a, ka lungphu te chu engtik lai khan nge an chawlh tak tih pawh ka ngaihtuah chhuak zo ta lo.
Dar engzah nge chutiang a mu leh mal nei lova ka awm tih reng ka hriatna thahrui te hian an ngaihtuah chhuak zo lo.
Ka han harhchhuah leh meuh chuan lemchanna in ah reng ka lo awm tawh lo, ka room a tukverh bulah chuan ka lo ding reng mai anih chu,
kha ka thil hmuh kha ka mumang ang mai niin ka hria a, ka khum kan en thin a, mahse ka mu silo, kan ngaihtuah leh ngial pawh in engti zia a chutia tukverh bul a ding chu nge ka nih tih reng ka hrechhuak zo tawh lo.
Hun enge maw ti chu chutia ka lo ding reng anih chuan khang ka thil hmuh te kha ka mumang nilovin, inlarna ka hmu te hi ani hial zawk lo maw le(??)
chutia ka in ngaihtuah buai lai pawh chuan ka lu chu a rit luk a, harh chiang viau chuan ka in hre na a, enge maw chianloh deuhna riau nei hian keimah leh keimah pawh chu ka in hria a.
Intih harh tum a pawn lam thlir a tukverh a kan dah chhuah chuan ngaiteh, ka room pawn lam ah chuan thawm dim ang reng tak a ke hnuk ti tih a pen ri kauh kauh ri hi ka hria a, mahse ngaihthat lohna engmah ka nei chuang lo, ka Pu zan mu thei lo in thingpui a lum leh dawn anih chiah chu tiin kan in hnem a, a chhan chu ka Pu leh Pi te room hi ka room piah chiah ah ani a, choka lam hnaih zawk ah ka room a awm avang in ka pu tar chak tawh lo tak chu, a tiang a chhuat hawlh zauh zauh chung leh a torchlight ka kum rualpui deuhthaw khawp a upa a chhuat en zauh zauh chung in a rawn kal leh chhut chhut ani tih ka hre nghal, enge light on na chang a hre ngai miau silo alawm.
Chutia ngaihthat lohna chang pawh hre lo a intih harh tum a pawn lam boruak hip chung leh thlifim ka in chhem tir siau siau lai chuan ka room kawngka zawn ah chiah chuan chu ke pen thawm chu a reh ta hmak mai a, kawngkhar a rawn sawi mai ka rin laiin a reh ta vung vung mai a.
Chutah ka hnunglam ah chuan thawm a rawn ri leh ta.
Ka ngaih ațha lo ang reng tawh khawp mai a, thawm chu kan ngaithla zel a, a rawn hnai telh telh hian kan hriat tlat mai pek chu.
Ni e, ka ring sual lo, thawm chu alo hnai zel ani,
chutah rang tawk hian kan lehhawi vut a, mahse engmah ka hmu chuang lo, chik tak in ka room kawngkhar te chu kan thlek a, mahse chhunglam ah ka kalh ang ang in alo la in kalh țha țhap si.
Enge maw chu a awm chiang mai ti a ngaihtuah rauh rauh chung chuan ka room vel chu kan thlek kual a, mahse an awm ngai ang țhap in ka thil te chu anlo la awm vek tlat.
Ho emai, ti a ngaihsam tak a tukverh lam kan hawi leh chiah chu ka phu nasa kher mai, ka room tukverh ah chuan hmanlai dawithiam kawrfual ang chi kawrfual dum ha hi alo țhu kur a, a hmel rapthlak tak leh nge hmel pawh neilo zawk emaw ni chuan min lo nuih vur vur anih chu, chu veleh ka țe tuarh a, kawngkhar lam ah chuan țe tuarh tuar chung in, a biling a balang in ka tlan phei ruai ruai a..
Mu leh mal pawh neilo va țe tuarh tuarh chung chuan kawngkhar chu ka hawng rawk rawk a, ka room pawn a ka tlan chhuah chiah chuan lemchanna in lianpui chhung ah chuan ka lo awm leh reng tawh a, ka țe ri te pawh chu chu inchhung zau tak mai ah chuan khawk rum rum in, inchhung chu a luah hneh khawp mai, ka mumang ah ka kir leh ta nge ka mumang ațang in ka harhchhuak ta tih pawh ka hrethiam tawh lo, kan hawi vel a, a hma a ka awmna in chiah chiah kha ani.
Nichin lawk pawh ala ni hman lo, tun mitkhap kar te lek chhung a thil thleng chu ka hrethiam thei lo, mahse chu thil in thlak thleng mak tak chu a thleng miau si.
Chutia ka hun tawng sawifiah hleihtheih loh khawp a mak hriatfiah tum a ka in ngaihtuah lai chuan ka hma zawng a lemchan dawhsan ah chuan sakawr tlan ri tlauh tlauh ri hi alo chhuak thut a,
chu veleh rang tak in chu thawm lo chhuahna dawhsan lam chu phawk hra hian kan hawi nghal nghal a.
Chu lemchan dawhsan chung nge a hnung bangah zawk chuan a hma a ka hmuh tawh te, Marcus- a leh Penelope-i te chu Sakawr lian tha tak chung a chuang chung hian hlim hmel tak hian an in be malh malh a,
Marcus-a chuan,
" tun ațanga reilo te ah chuan i dam var tawh dawn lawm "
" engtia hla nge la ni ang, chu khua chu ?"
" saw kan hma lawk ah sawn Haran- khua a awm a, chu khua ami te chu kan zawt dawn nia, a hming chu alar viau na in a awmna lai tak hi ka hre chiang lo, naupangte ka nih laiin ka pa in min hruai tawh a, chu bak chu ka la kal leh miah lo "
" engtin nge Neira- kha a awm tak zel ang le, thing a min tawn beh hnu kha chuan engkim kha mumang ang ruai hian ka hria a, kan ngaihtuah leh chang pawh hian thil thleng in dawt dan kha engmah ka hrechiang tawh lo "
" Neira- khan a dawi hmang khan Siraka-i dawi kha a sût hman țep a, mahse kha nangmah dawi tu che kha alo lang thut a, engkim a rawn ti buai ta vek ani "
" chuan engtin nge ni zel ?"
" kha dawi kha a sut zo hman lo a, second li nga vel chu hun la nei se chuan tunah chuan i nu bulah thlamuang tak in i awm tawh tur ania, mahse a... Thil thleng tur chu a thleng vek tawh tho a, Siraka-i nen khan rapthlak tak maiin an dawi hmangin an in do a, chu an in do na rapthlak tak avang chuan lei hi a nghing dur dur a, ngaw chhung leh van boruak te khi a eng chuaih chuaih mai asin, chu thil rapthlak tak avang chuan nikhaw hre lovin leiah ka let reng a, mahse ka harhchhuah leh hnu chuan Neira- chu leiah hian nikhaw hrelovin alo let ve reng a, Siraka-i chu ka hmu lo, alo bo daih tawh, chuan Neira- chuan ti hian min hrilh a, a dawi kha a sut kim hman loh bak ah, kha mi zan khan 'dark magician' ho in dawithiamna hun pawimawh 'Sabbath'- an lo nei a, kha zan boruak rapthlak tak avang khan Neira- thiltihtheihna pawh a buai nasa em em a, chuvang in Thla a bial leh hmasak ber zan a i thih tur thu min hrilh ani "
chutia a sawi hnu chuan Penelope-i hlim hmel chu a ngui rawih a, a hmalam chauh chu en in a ngawi ta reng a, Marcus-a pawh a bang bik chuanglo, tichuan tumah mah chuan zawng zai pawh an rel tawh lo, an ngawi dun ta tlawk tlawk a,
reife chutia a ngawih reng hnu chuan Penelope-i chuan beidawn hmel tak hian,
" engtin nge ni zel ang "
" Neira- chuan Delphi- zawlnei hnen ah kal ula, ani chuan tih dan tur alo hrilh ang che u, tluang tak a in kal theih chuan chhan theih ani ngei ang tiin min tiam alawm "
an ngawi hlek a, chutah sawi zawm leh in,
" chhan chhuah che hi a duh a, chuan dam tak a hmuh leh ngei che hi a beisei bawk, kei pawn i dam leh theihna tur anih dawn phawt chuan engmah tih hreh ka nei lo "
chutia an ti ti malh malh lai chuan khaw luhna kawngpui hi an lo thleng ta der a, hmanhmawh tak a tlan zel in reilo te an Haran- khawchhung chu an lut ta der mai.
Khaw te reuh te alo ni a, a mi chengte pawh berh fe fe hlir ni maiin a hriat,
Marcus-a chu a hawi kual reng a, chutah an hma lawk a in lianpui kawt ah chuan patling deuh deuh hmel pu hi khûnkhan hmel deuh hian an lo ti ti malh malh a.
Chumi te lam pan chuan a sakawr chu kuai her in, an hma zawn ah chuan an ding chawt a, an mahni en zoh zoh chunga in be sar sar chung patling ho te hnenah chuan,
" min lo hrethiam lawk teh u, khawilai nge Delphi- panna kawng hi a pen le aw" tiin a zawt a.
an zinga pakhat chu a țhut hmun atang a a rawn tho vin, an piah lawk a kawng pengțhuam chu an kawk a, nelawm tak hian,
" Sawlai a kawng peng ding lam zawk saw zawh in, in ding țhiang lian vak lo hi in pawh ang a, chu mi bul ah chuan kawng alo peng leh ang a, a ding lam zawk, kawng zau zawk ah khan in kal dawn nia "
" engtia hla nge la ni ang "
" in kal chak viau chuan Ni tlak hma in inla thleng hman ang "
" aw le kan lawm lutuk e "
An zing a pakhat chuan,
" khawi ațangin nge "
" Isle "
" inlo kalna a hla hle mai, tluang deuh in in kal dawn nia "
" aw le, anih leh phawt mai u "
chu mi tena kawng an kawh hmuh lam ah chuan hmanhmawh tak hian a sakawr chuan an tlan phei ta dawr dawr a,
rin aiin kawng chu a lo țha in khaw in kar kawng pangngai ang vek hi alo ni a, kawng kal te tan a an phun ni mai awm tak hian kawng sir ah chuan thing lian tak tak, buk deuh deuh hi an ding țhut hlawm a, an hlim avang chuan kawng kal pawh anuam in a hahdam thlak hmel kher mai,
chutiang a thui fe an tlan hnu chuan Ni pawh alo inher buih tawh a, chak leh zual a tlan in, khaw thim hma ngei a khua luh hman an tum ruh hle a.
Chutiang a an tlan zel lai chuan lung hmun ah hian an lut hlawl a, thing pawh chutiang a tam a awm lo, kawng sir hmun tin deuh thaw ah hian lung lian pui pui hi a in hung run hlawm a, a țhen te phei chu bang ang mai hian a ding ur hlawm a, mahse kawng erawh chu a pangngaiin kal a harsa em em hran lo.
Chutiang lung lian leh mak pui pui pawh chu a thlir hman lo, a hma lam chu uluk tak a melh ran in, sakawr chu chak tak hian a khalh dawr dawr a.
Rei vak lo an tlan hnu chuan khaw lam pan a hlum atanga siam bel tung ut enge maw zah phur sakawr pahnih ina a hnuh tawlailir hi an um pha a, chu sakawr tawlailir chu hmeichhia tleirawl te te pathum hian lo khalh in, Marcus-a te chu hmuhnawm tih hmel tak hian an lo en ha hlawm a,
Marcus-a chuan chung hmeichhia te hnen ah chuan,
" khawi lam a kal tur nge in nih "
zak leh sen awp awp chung hian an zing a a te ber chuan, 'Delphi'- ti ringawt in alo chhang a.
Marcus-a chuan,
" a la hla em khua chu "
a chhangtu ngai bawk chuan,
" mel chanve vel ala ni ang "
an zinga alian ber leh thau ber chuan chik hmel tak a rawn melh chung hian,
" Delphi- ah em ni in kal dawn a, khawi ațangin nge "
" Isle- atangin, Delphi- zawlnei hmu tur in kan lo kal a, a awmna min hrilh thei angem "
maktih hmel tak hian chung tleirawl pathum te chu an in en kual hrek hrek a, enge maw ni sawi hian an in hrilhru se se a.
Chutah alian ber bawk chuan,
" kan hma zawn a lung lianpui bulah sawn peng ula "
a kut lehlam a a thiannu chelh chung hian a thutna atang chuan a rawn tho va, kawng dinglam piah lawk a tlang lian tak chu kawh pah in,
" saw lai tlang ah sawn Delphi-zawlnei chu a cheng alawm, tikhan peng ula, tlang bulțhut ah anih kha a chen na chu, zawn vak pawh angai lo ang, in hmu vat mai ang "
Marcus-a chuan lawmthu hrilh mawlh mawlh in kawngsir a lungpui bang ang maia ding ur sir ah chuan a sakawr chu kai her in a pen san ta a.
Lungpui hmun an tlan pelh chuan kawng chu alo țha in, khawpui kawng ang mai hian alo hnum hlurh mai a, thing lian ding pawh a lo awm lo, phul hmun zau tak ah kawng tur an sat kua ni mai hian a hriat.
A theih tawp a chak a tlan ni mai awm hian Marcus-a te ai pawh a hmanhmawh ni awm fahran hian sakawr chu chu phul hmun kawng ngil sei tak ah chuan thlun phelh ang mai hian a tlan dawk phei zur zur a.
Dar chanve emaw lai an tlan hnu chuan tlang bulțhut chu an thleng titih ta mai a, tunah chuan Ni pawh Pathian ropui Helios-an a mei sakawr tawlailir in khawthlang lam ah a hnuk liam ta ni mai awm hian kawl ah a pil țan mek a, a tla tur in chu tlang chhip a chhun êng phut mai te chu a tlang mawi zia leh ropui zia ti lang chiang tu mai ani.
An mi tawh ten a an sawi ang ngei chuan tlang tawn tirh a puk lian tak chu kawng hian a lo chhun tlang a. Mahse a pan chhoh na kawng erawh duhthusam in a chhia anih loh pawh in țhatna reng reng neilo chu ani chiang khawp mai.
Lung khawk rawk leh vaivut khu rum rum lam pan chuan an tlan chho ve bek bek a,
puk an han thlen chhoh dawn lai chuan, chu puk chhung atang chuan Minataur (a kawng achin hnuailam bawng, a chunglam mihring, mahse bawng ki ang hi alu ah chuan a in vuah ve tho. CR)- lian zet zet pahnih hi thinrim hmel tak hian anlo chhuak a, Marcus-a te an hmuh veleh an hram ruai ruai a, chak fe a rawn tlan chhuk in an rawn pan ding nghal chat a.
Marcus-a pawh chuan chung Minataur-a hmuh rual chuan a mah kuah chung a muhil Penelope-i chu kai tho vat in, a in kuah ngheh tir sauh sauh a.
Penelope-i hnen ah chuan hawi chhuak lo tur in a hrilh a. A chem sei tak chu rang deuh a phawrh in, a in siam rem nghal zung zung a, a sakawr pawh chu a hma aia chak a tlan tir in alam pan a lo tlan chhuk mek Sa hlauhawm pahnih te lam ah chuan ding tak hian in a khalh chho ve ta nghal a.
Chutia an lam pan a Minataur- pahnih an lo tlan thlak mek lai chuan, phaiphuleng emaw ni nge mau hamrik ang chi ham ri ruai ruai hian an chhak puk bul lung chung a țhu chung hian Nula kawrfual paw dal thianglim tak ha, sam sen sei tak nei hian a rawn thlir reng a, a sam ah chuan pangpar par mawi tak kual hi a khim a, a hmel leh chezia atang chuan chung lai tlang vela awm Nymph(lasi)- ani ngei ang.
chu thil tum rik an hriat veleh chuan chung Minataur- pahnih te chu an ding chawt a, inher in puk lam ah chuan zawi muang hian an let chho leh ta daih a, puk kawngkhar bulah chuan mutchhuak ang maia an zik mar vak vak hnu chuan tui hmel deuh hian an muhil nghal bawrh bawrh a.
Makti tak a a chem la hum reng chung a an din reng lai chuan phaiphuleng ham tu nula chuan Marcus-a te chu a kut hian a rawn hui zauh zauh a,
chu a awmna lung chung atang chuan a zuangthla nge thlawk thla zawk?
muangchang hian boruak ah a kang der der a, chutah puk kawngka zawn ah chuan dim tak a țum thla in puk chhung ah chuan a lut ta daih a.
Marcus-a pawh chuan thil awmzia hrethiam ni awm tak hian a chem chu a apai na ah thun leh in, muangchang hian sakawr chu a khalh chho ta a.
Chu puk luhna kawngkhar an thlen chhoh pawh chuan Minataur- te chu an harh lo, tui tak a muhil in an la hnar suk suk zui lehnghal.
Sakawr ațanga chhuk in Penelope-i pawh chu zo leh dim tak hian a hlangthla ve nghal a, an bul lawk a Minataur- a hmu thut chu Penelope-i chu a țe tuarh a, mahse Marcus-a chuan thil awmdan chu hrilh in thawm dim tak in pûk chhung ah chuan an lut ta a.
Pûk chhunga an han lut chiah chu a boruak alo dang kher mai, thui pawh an kal hma chuan Penelope-i chu vawt tiin a khur nghal hlawk hlawk a, Marcus-a chuan duat tak a kuah in muangchang in insi rial chuan chhungril lam pan in an kal ta hnek hnek a,
thuilo te an kal hnu chuan ding lam ah puk chu a lo kawi a,
rei pawh an kal hman lo, veilam ah hian alo kawi leh a, chutih lai chuan puk chhungril lam ațang hian ramsa nge mihring zawk rapthlak tak a anui nge a țap tih pawh thliar hleihtheihloh hi alo ri chhuak in puk chhung ah chuan a khawk rum rum a,
chutiang a ding lam leh vei lam a zik zak ang a kawi vawi li vawi nga vel an kal hnu chuan, puk chhung zau tak, feet sawm ruk bial vel tur ah hian an chhuak hlawl a,
an han hawikual vel a, mahse kalna tur dang khawiah mah a kaw tawh lo, chu puk pindan zau tak ah chuan a tawp tawp a.
Enge maw zawng ni awm tak a an hawi kual ruk ruk lai chuan phun ser ser thawm hi an hmazawn chung deuh ah hian a rawn ri sar sar a,
thawm chhuahna lam chu rang tak in an hawi rual dun nghal vat a.
Mahse tumah an hmu lo.
Reilo te hnu ah chuan an hmazawn piah deuh ah hian meikhu ang deuh hi a rawn khu chhuak siau siau a, mak ti tak a an thlir reng lai chuan chu meikhu emaw ni chu mihring ah alo chang anih chu,
chu mihring alo chang chu pitar zangkul tak, kawr pawh nilo, puan hlir a sin anih loh pawh in țhuiloh kawr a ha ani tal ang.
Hmelchhe fahran hi ani a, ngawi reng a a mitmu lian leh rapthlak tak a Marcus-a te pahnih a en tawn zawk zawk hnu chuan, a tiang lianpui hawl chung chuan a rawn pan chhut chhut a.
" Marcus Valerious, Zeus-a chi peng ami, I lo kal tur thu hi i pian hma khan ka hre tawh asin, tlangval hmelțha leh huaisen, Achilles- a nun kawng thlan kha i hria em, ani chuan rei tak dam aiin, kum sangkhat ral hnu pawh a a chanchin ropui taka anla sawi tur chu a engto a, chuvangin a damlaini a reilo anih kha. Pathiante ruatlawk nimahsela, ama duhthlanna vang pawh ani tho asin.
Helai hmuna ilo kal tur thu hi ka hre tawh a, mahse lo kal lo turin ka duh che asin" ring fahranlo hian a ti a.
Chutah saw zawm leh in, "Mahse tunah chuan Pathiante remruat angin ilo kal ta anih hi, engang pawh in kir leh tum mahla i thei tawhlo."
Marcus-a chuan țawngkam khat pawhin a chhanglo a, mahsela chu nu thusawi chu ngun tak a ngaihtuah niawm tak hian a awm a, mak ati tih chu a hmelah a lang chhuak hial tho.
Chu zawlnei nu thusawi chu Penelope-i chuan nak a tih hmel zawk mahin a hriat.
Chutah Penelope-i lam chu hawiin, nula khawngaih thlak, ilo kalchhan h ka hria asin, i tawrhna zawng zawng te pawh kha."a ti ve leh a.
Chutia a sawi lai mek chuan muangchang a inherin an hnugchhawn zawng chuan a ding ta reng a.
Reivaklo a ngawih hnu chuan zawite hian, "dam i duh em, nula khawngaihthlak." A rawn tichhuak leh a.
Penelope-i chuan hlauh hmel tak chu zawlnei pitar lam hawi chung hian khur deuh dar dar hian "Aw, Duh e." ati zawi raih a, chutah chu Pitar bawk chuan,
" nula khawngaihthlak, damna hi dawn tur ani lo va, a thawh a thawhchhuah tur asin " tih pah hian a rawn lehhawi a.
" helai hmun ațanga khawthlang lam pan hian kal zel ta ula, khaw pakhat 'Kebrena'- khaw te reuh te in pawh ang a, chu mi atanga hla lo te ah lung hmun a awm a, chutah chuan ''Grey Sister"- te an cheng a, chumi te chu in hmuh angai ani, kal ula, in bo loh nan Pathian ropui ber Zeus-a fapa leh thuchah keng tu, Khualzinte vengtu Pathian Hermes- an a veng zel ang che u, hun tam in nei tawh lo tih hria ula, hmanhmawh ang che u, chu chu in hnena ka sawi theih zawng chu ani e "
chutia a sawi zawh hnu chuan a nui uarh uarh a, a khu chum chum a, muangchang hian meikhu ang mai in boruak ah chuan a thamral leh ta riai riai a.
Chutia an hmuh lai reng a a ral tak daih avang chuan hrilh hai leh maktih hmel tak in ngawi reng a ka hau chung hian engemaw chen chu an ding reng a.
Chutia rei fe an che chang lo a an din reng hnu chuan Marcus-a chuan Penelope-i chu a âwm a bei tir in a kuah vawng vawng a, sawi tur an van dun hmel in an hrilhhai hmel kher mai.
Chutah Marcus-a chu lo țawng chhuak in Penelope-i beng bul ah chuan zawi te hian,
" a mak kher mai, a mah khan emaw ti dam dawn che ka ti a "
Penelope-i chu a ngui rawih in a hriat, Marcus-a pawh chu chhang chuang lo vin, a lu chu Marcus-a âwm ah chuan a phum daih a, Marcus-a chu a kuah nghet zual sauh bawk a, chutah Marcus-a bawk chuan,
" lungngai suh, i thi lovang tih ka tiam a che, Pathian te pawh in min dan tum mahse la, i nunna hi ka hlauh tir thei lo ang che "
chutia a sawi zawh chuan, an in her a, in kuah rial hian muangchang in puk chu an chhuahsan ta a.
Puk kawt an thlen chuan Minataur- te kha hmuh tur an lo awm tawh lo va, puk chhung a an awm reiloh ngaihtuah in khua alo thim hman vek tawh a, zan a rei hmel tawh in chung lam van ah te chuan awmze nei a rem that ni mai awm tak hian Arsi sang tam tak an phe tuarh a, Zan lam rorel tu Thla pawh a lo chhuak tawh in, a chanve lai alo ni hman leh der tawh anih chu.
Chu lungti leng leh mawi tak van chung sang tak lam chu ngawi reng hian an thlir dun vauh vauh a.
Rei tawk fang chutia an thlir dauh dauh hnu chuan Marcus-a chuan,
" Penelope, Kebren- khua chu helai atanga hnai te ah hian ania, zankhua a kan tlan chuan khawfing chah rual vel in kan thleng hman ang, chu aia hma pawh chuan "
chutah Penelope-i a kuahna chu thlah in an bul lawk a a sakawr thlunna hrui chu a phelh mawlh mawlh a,
" khawchhung ah riahna tur zawng chuan kal lo law law mai ang, hun kan nei tlem tawh si a, kawng lak ah enge kan tawh dawn hriat lah ni suh "
Penelope-i ding ngawi reng lam chu hawiin,
" lo kal rawh le, kawng tlan chu a harsa vak lo ang, rin aiin thla chu a eng daih mai lehnghal a, lo kal rawh, i hmanhmawh deuh ang "
muangchang in Penelope-i chu alo phei a, Marcus-a chuan zo tak hian Sakawr chungah chuan an hlang leh nawlh a, a mah pawh chu lawn ve nghal in, chu puk tihbaiawm tak chu an kalsan ta vat a.
Chutia ka en reng lai chuan chhûm hi chu lemchan na dawhsan ah chuan alo zing chuai chuai a, khua a thim bawk nen, reilo te ah Marcus-a te pawh chu ka hmu thei ta lo vat a...
Comments
Post a Comment