Phyra- khaw mipui rethei tak tak tena ngaisang tak a anlo aûh te chuan Marcus-a lung chu a ti chhia in chûng mipui lam hawi chuan a bân dinglam chu an phar chhuak a.
Chumi an hmuh chuan mipui te chuan a aia nasa leh ring in an aû leh chiam chiam a. Hestia- erawh chuan mipui lam chu a hawi hran lo, ngaihsak awm pawh in alang lo, a hmazawn chauh chu en in, Marcus-a hma ah chuan chak fahranlo tak hian a sakawr chu a tlân tîr beuh beuh a.
Chutia hmundanga pêng kawi lova an kal zêl lai chuan Phyra khua vênghim tûra an hnutchhiah Captain Pontus-a pawh chu sakawr chak țha zet chunga chuang hian alo lang ve hlawl a.
Marcus-a te bul a rawn thlen chuan ring fahranlo tê hian,
" ka rin ai daih in inlo thleng tlai, chhûn lai vel a in rawn thlen hman kanlo beisei ania," an tih zawm nghal zat a.
Hestia chuan,
" Ni e, kanlo hmanhmawh vak lo a, General Menelaus-a ten an rawn tlawh kâwi che u em?" a ti a.
" reilo deuh chu an han chawl zawk a, mahse an awm reilo, an sipai ho te khan an khaw lam thlen vat vat an chak tawh ni ngei tur ani, General Menelaus-a phei chuan lo nghah pah che u a, zân han riah law lawk kha a duh viau na a," tiin Captain Pontus-a chuan Hestia- chu chu a chhanga.
Chutah,
" Ka puanin lamah i phei ang u," a ti zui leh nghal a.
Tichuan an sipai te lak ațang chuan chhuak in Captain Pontus-a puanin zãr lam pan chuan an pathum chuan an in zui ta daih hlawm a
Captain Pontus-a puanin kawt ah chuan an sakawr te tiding in a chhûngah chuan an in zui lût hlawm a.
Puanin chhûngah chuan thing chang chi ațanga siam thingrem lian tak tak eng emaw zat hi alo in chherchhuan deuh ûr hlawm a.
Ei siam hian Phyra khaw nula chhelo tak tak pahnih hi anlo awm mêk bawk a.
" kanlo in singsa deuh nual a, mahse zânin chu hetah kan la riak dawn ani lawm ni," Captain Pontus-a chuan an ti a.
Țhutthleng a țhut pah hian Hestia- chuan,
" Ni e, a pawilo khawp ang, engtik a chhuah nge in rêl deuh a," a ti a.
Marcus-a chuan a thir kawr chu phelh mawlh mawlh pah hian,
" Naktuk zîngkâr vel ah chhuah tum ila a țha lo maw, muang deuh hlek pawh ni ila khaw thim hma chuan Delain- kan lût hman dawn a," a ti a.
An ei siam nula ten a theirah eng eng emaw alo chhawp sak lai chuan Marcus-a pawh chu Hestia te bulah chuan a rawn țhu ve a.
Uain thlit karh karh pah hian Captain Pontus-a chuan,
" kan in peih chu ani mai e, mahse han châm khawmuan te in duh zawk lo em ni, hahdam deuh te in duh lo maw?" a ti a.
Hestia chuan,
" duh lemlo e, Marcus-a hian tih tur pawimawh ala nei a, naktûk zîng khawvâr rual in chhuak thei ilang chuan duhthusam chu ani ani maw le," tiin Pontus-a chu a chhang a.
Marcus-a pawh chuan Hestia- thusawi chu rawn tuihnih ve in,
" kei chu thil hmanhmawh thlâk ani êm êm hran lo a, kan sipai ho te zawk hi ania, an châu tawngkhawng tawh in an in lam ah te pawh chawlh hahdam an duh ve tawh ang chu," a tia.
Țwng tum a Pontus-an a ka a ân zuai lai chuan Marcus-a vêk chuan,
" sipai te pawh hian chawlh an mamawh khawp in ka hria, kan hma hun hre lo mah ila tunah rih chuan kan ralmuang chu ani rih mai a, chuvangin chawlh hun te pawh hi pek a țha lo maw," an tih zawm leh a.
Hestia chuan Apple keih mawlh mawlh pah hian,
" ni e, General Klent- pawh bia ila, la sawi ho leh tur ani," a ti a.
Marcus-a vêk chuan,
" Delain leh Albina te chu Hubin- ram bial chhûng vek ani lawm ni," a ti a.
" aw ni e, mahse an khua hi a ralmuang a, Albina- ah phei chuan sipai kan in dah meuh lo," tiin Hestia chuan a chhâng a.
Marcus-a chuan,
" Ni e, hrehawm tak in, thî eh thau pawlh in ram tan an feh chhuak a, an nunna an thâp tak meuh meuh ani a, tin, chulo ah he kan indona thuahhnih phei hi chu ram leh ram, mihring leh mihring inbeihna mai ani lo lehnghal a, dik tak chuan kan sipai te hi an chhuanawm rual rual in an khawngaihthlak ani, chuvangin an in lama chawlh han hman pawh hi an phû hliah hliah in ka hria,
rei tak thleng chu a theih ka ring chuanglo a, enge kan tawh dawn a, enge lo thleng dawn tih kan sawi thei silo." a ti leh a.
Chutia a sawi lai chuan Phyra nula, Captain Pontus-a rawngbawl sak tu te chuan ei tur rimtui leh tuihnai tak tak, vawksa kan ro te, bawngsa ti hmem hmin leh bawngsa thin rep te, kel hnute te leh eitur tuihnai tak tak an lo chhawp ve mêk a.
Captain Pontus-ana an eisiam tute an fak deuh luam lai chuan chûng nula te chu an zah hmel hle a, tleirawl tê an la ni a, tlângram Nymph (lasi kan tih ang chi ani ber ang chu. CR) ang mai a hmelțha leh duhawm an ani.
" Zanriah ei ila, zânin chu mut zai in rel vat dawn nia, in chau tawh awm si a," tiin Hestia melh chung chuan Pontus-a chuan a ti a.
Chûng tleirawl te chuan zahna chibai bûk a an kun zauh hnu chuan anin saseng lehnghal vat a.
Hestia chu thil țhial nuau nuau chung a Pontus-a melh chung hian a nui ralh ralh a,
" a sâng zâwk nen a inin melh dân kha ka hmuh țhelh hauh lo ania aw, Eastland a kan va thang chhûng khan eng emaw thil thleng chu a awm chiang mai," an ti a.
Pontus-a chu a laih hmel ang reng hle a, a chê te chu a lâi țut in a hriat, chutah dangâwk deuh reuh tak hian,
" engmah ani lo, i ngâi kâwi mai mai aniang," a ti a.
Chutah Marcus-a pawh chuan,
" i sawi tâkah chuan kei pawn an in mitmei dan kha ka hmu alawm, eng emaw chu a awm ani chiang mai," alo ti ve vat a.
" in va han sual dun tak e aw, tak taka in Phyra khaw hmâr lam deuh a awm te saw an nia, Doris-i ania, a țhiannu kha chu Luna-i ania, ralvêng ho tlawh leh thil pawimawh a khaw puipa te hmu a ka veivah châng hian an ni țhian dun kha ka hmu țhin a, chutia in hmu zing ta na na na chu kan lo in be tlangnel a, min pui tur in ka sâwm ta chawt mai anih kha," tiin pha deuh reuh si hian Pontus-a chuan thil awmzia chu an hrilh a.
" i nula mi sa lo viau emaw ka lo ti țhin a, i lo zei ru phian anih hi maw le, engtin nge kan tih tâk ang, kan haw hun tur kan sawn hla leh deuh dawn nge kan hruai haw ve nghal mai dawn," nuih deuh ralh ralh pah chuan mei nei deuh hian Hestia chuan an ti a.
Pontus-a chuan,
" chutiang lam pawh ka lo la ngaihtuah lo," a ti a.
" zah tur a awm hleinem, i thlang thiam khawp alawm le, Mount Ida- vêla chêng țhin Nymph ( nymph hi lasi kan ti ang chi, tlângram leh tuiah te an chêng bawk țhin, tuia awm chi hi chu Naiad Nymph/Mermaid/Siren an ti leh a. Pathian chi hnuaihnung deuh leh Nature Pathian an tih ang chi hi an ni. CR)
ang mai a hmelțha leh duhawm anih kha le," Marcus-a chuan alo ti leh a.
Hestia bawk chuan,
" zânin ah Marcus-a nen kan va kal sak ang che," alo ti leh a.
" tun ang hun ah rih chuan a rem theih chiah pawh ka ring lo a, la nghâk deuh mah ila a pawi dawn em ni te ka lo ti rilru mai mai a," ring fahran lo leh inthlahrung hmel deuh hian Pontus-a chuan an ti a.
Marcus-a chuan pangngai deuh tak hian,
" chutiang ngaihtuah mahta che, nang ang tlangval fel leh hmelțha, sipai za hotu lehnghal chu a nu leh pa te chuan suangtuah pawh an suangtuah pha ngailo ang tih chu hriatsa ani, an lo hnar lo tawp ang che, a rem nghal theih mai ka ring asin," a ti a.
Uain in pah hian Pontus-a chuan,
" Pu Marcus, i mi fakna rî chu a ropui in ka thinlung tak in ka lawm ani tih Pathian chungnung ber Zeus-a khabe hmul chhâl in ka sawi a, mahse kan in hriatna hi ala reilo êm a, chhungkaw pangngai tak leh a pa pawh an khaw puipa te zîng a mi ani si a," an leh a.
Hestia chuan,
" Marcus-a sawi kha a dik chiah, nang ang makpa atana an nei tur hi an tan chuan hawisânna tham ani asin, sipai leh hotu satliah ini lova, Pasalțha ropui ini tih hi in hre ta che, he kan indona hnuhnung pahnih hi ngaihtuah la, kum sâng tam tak ral hnu pawh a țhangthar ten a an la sawi zui tur indona ropui anih hi, chutah chuan hnehtu ini asin," an ti a, Uain chu tlêm lem leh te te in an sawi zawm leh a.
" Hmangaihna hi chu thil mak tak ania, in hmuh zin leh zinloh pawh hi alo ni lo, vawikhat in hmuhna ațang pawh hian hmangaihna chu a piang chhuak thei alawm, ngaihtuah la tuna ka nupui pawh saw Athens- khua ami ania, hmanah sipai ka zawm tirh hian hel na chhe te tidâi tûrin Crete- ah kan kal a, chumi kan beng dâi zo kan haw lam chu Athens- Lal Laertes-an minlo mikhual a, Hubin sipai rammu haw te tâna zanriah min buatsaih sakna ah chuan tuna ka nupui saw lo kal ve in Athens ah chuan ni hnih leh zan hnih ang vel chauh kan châm ani a, chumi chhûng chuan ka chhai thlu hman der anih chu," a ti a.
Chutia a sawi pah chuan muangchang hian a țhuthmun chu thawh sanin a sipai thawmhnaw, a thir kawr leh a bân hrên te, a ngal kâwr te chu a phelh mawlh mawlh a.
" in chungah ka lawm hle mai, mahse chutia han hruai tel ve ringawt chu kan sipai te pawh an zahawm a lawm le, chuvangin muangchangin tha thar in la buaipui țha leh zawk ila ka ti deuh maw le," tiin Pontus-a chuan inthlahrun hmel deuh hian a ti a.
Hestia chuan,
" chu pawh lo ni ta ang sela, zânin ah chuan kan va kal hrim hrim chu a ngai tho ang," a lo ti leh a.
Chutih lai mêk chuan an sawi mek tleirawl pahnih te chu puanin chhûngah chuan anlo lût leh a, chutia anlo luh veleh a an ngawih tâk țhup si ah chuan an țhian dun chuan an lâi in an zak deuh tih Hestia chuan a hrethiam a, hmel hlim deuh hian alo nuih a, chutah a țhiannu zâwk Luna-i chu an mitmei zauh a, chutah Hestia- awmna lam ah chuan alo phei zui a, Doris-i erawh chuan rang tak hian an zanriah eina hnawk te chu a tifai nghal sawk sawk a.
Luna-i chu Hestia chuan zawite hian a beng bulah hian a hrilhru sê sê a, a sawi zawh hnu chuan a lu chu bu zauh zauh in hlim hmel deuh hian Hestia- pawh chu hrilh ru ve in a țhiannu Doris-i thil tifel mêk chu tih pui tur in a kal sawn leh ta a.
Captain Pontus erawh chu alo lâi chhe kher mai, thawh nachang pawh a hre lo va, râwlthar ngaihzawng nei ngailo ina a nei thar ve ta thut, zei lo lutuk hi a ang ber in ka hria.
Chutianga thil an tifel zawh hnu chuan in kuah rial hian eng emaw sawi sep sep chung hian an chhuak lehnghal ta daih a.
Chutia an chhuah hnu lawk chuan Pontus-a pawh chuan a țhutna chu a thawhsan ve ta a, a thir kawr te chu hlîp in a in silfai sawk sawk a.
Hestia chuan awmhmun kawrfual puan chhah ang reng tak hi a ha a, Pontus-a awmna lamah chuan a phei a.
Puanin chhûnga insilna leh inbualna awm hi mak inti maithei bawk a, hetianga an puanin kaih hi kan hmuh ang țhin puanin ang hi ani lova, sipai puanin ang deuh hian kil li nei, in ang deuh va cheibâawl ani a, chulo ah an Lal leh ho tu deuh te bâkah an rorelna puanin te hi chu alian leh zual țhin tlângpui bawk.
Tin, puanin chhûng kil khawi emaw laiah bual thlêng, tui kuang ang hi an hûng a, chu chu alan tlang theih loh nan bang ang deuh hi an zâr hliah țhin, tin an mutna hi chu puanin chhûng kil lamah an dah deuh ber a, a tam zawk chuan puanthuah têl tawp, an mut dawn a kawih pharh leh chawp tawp ngai țhin hi an hmang deuh ber, leiah an phah deuh tawp țhin bawk.
Chuan indona hmun pawh ni se an Lal leh hotu te hi chuan in lam ang thovin eitur tui țha țha an nei reng tho țhin tih hi kan hriat tel angai bawk.
An bang zâr hliahna chu kal pel in Pontus-a tui kuanga a inchiahna bulah chuan a phei a.
Marcus-a chu an thlêk leh hram a, Marcus-a erawh chu a țhut ngaiin alo la țh reng a, a melh ngai ringawt melh in a uain no chu a lek káng deuh vû a, tlem tlem in a lem leh zauh zauh țhin a.
Ring vak lo hian Hestia chuan,
" engpawh nise kan pahnih in kan va kal mai dawn emni, Marcus-a saw chu lo châwl rih mai se ka ti deuh a," tiin Hestia chuan Pontus-a inbual lai hnenah chuan a sawi a.
Pontus-a chuan,
" pawilo e, in remruat dan ang ang kha a țha ber chu ani alawm, General i chungah ka lawm tak meuh meuh ani," a ti a.
Chutah Hestia chuan,
" I tan te chuan engpawh tih kan huam ang chu, mitthi khaw Lalnu hmelțha Persephone-i hmu tur a min tîe anih pawh in," an ti leh a.
(Persephone-i hi Sik leh sa chung a thu neitu leh enkawl tu Pathiannu Demeter-i leh Pathian ropui ber Zeus-a te fanu ani a, Demeter-i hi Zeus-a unau nu tho, Titan Cronos-a leh Rhea-i te fa Olympians- an tih te zîng ami ani.
Persephone-i hi nula hmelțha tak ani a, Hremhmun leh mitthi khaw chunga roreltu Hades-a chuan a rûkin a ngaizâwng êm êm a, ramhnuaia amah chauh a Persephone-i lêng lai chu a ru bo a, a lalna ram mitthi khua ah akal pui daih a.
A nu Demeter-i hian a fanu chu a zawng nasa êm êm a, khawvel hmuntin ah kal in a zawng kual a, he a fanu a zawnna avang hian khawvel hun leh ni, sik leh sa pawh a enkawl lo a, chuvangin mihring tam tak an thi anih kha.)
Lâwm hmel deuh hian Pontus-a chuan,
" chutiang em em te chu ka phu lo ve, ni e, kan pahnih chuan kan kal mai dawn nia," a ti a.
Chutia a sawi pah chuan a inbual thlêng ațang chuan tho vin puanin a in hru nghal sawk sawk a.
Hestia erawh Marcus-a bul lam ah chuan a phei lehnghal daih a.
" Zánin chu i duh leh lo mu hma la, naktûk zîngkâr a kan chhuah angai dawn sia, chawlhna hun ineilo bawk si, Pontus-a chu keiman ka va kal pui ang e, mahse minlo nghâk duh kher suh, kan awm chin tur a hriat bawk siloh," a ti a.
Marcus-a chuan zawi fahran hian,
" ni e, a khawngaih thlak ve alawm, va kalpui rawh, zânin chu ka nuamsam lo deuh riau in ka hria," a ti a.
Pontus-a chuan kawrfual nalh angreng tak hi a ha a, akâwngah chuan ngûnhnâm nalh tak hi a pai rân bawk a, Hestia te awmna lamah chuan lo pheiin,
" Ka hman tawh e, kan chhuak nghal mai dawn emni," phûr hmel fahran hian an ti a.
Hestia chu a bu nghauh a, thawh pah hian Marcus-a hnenah chuan,
" a thim zawng hlîr in engmah ngaihtuah lo la, lo mu vat zawk ang che aw," tiin an chah ve bawk a.
Marcus-a erawh chuan a chhâng hran lo, a lu chu a bu zauh ringawt a.
Captain Pontus-a chu a phûr hmel sûrh sûrh hle a, tichuan Hestia nen chuan in zui chhuak in Doris-i te in lam pan chuan an kal ta a.
Chu zân chu a reh hle mai, Pawn a Hestia te chhuak ta chuan sakawr an hmang ani ngei ang, sakawr thaw ri sûk sûk leh Hestia te in be thâwm chu a reh a, sakawr tlân ri chu a hlat tial tial hnu phei chuan thâwm dang bengchheng a awm meuh lo.
Zân rei tak thleng Marcus-a chu a meng na in, a țhutna chu a thawhsan meuh lo, Hestia te kal hnu lawk khan pawn boruak dawng turin a chhuak zawk na a, a awm rei hran lo.
Eng emaw ngaihtuah in a țhu reng a, Hestia te chu a nghâk deuh ani ngei ang, mahse a nghâk chhuak ta lo anih kha.
Rûi deuh phû khawp a uain a lem hnu in phûr fahran lo tak hian a mutbu chu a pan a, beram hmul ațanga siam a mutbu lum hmel tak chungah chuan bawk thlawp in, a muhil zui ta nghal daih a.
Țâwng ri nawk nawk thâwm ah chuan Marcus-a chu a harh hlawl a, a lu dawm vawng vawng chung hian muangchang hian a tho țuah țuah a. Hestia chu sipai pakhat nen hian lo inbe mawlh mawlh a, chhuah alo in peih tawh at tawh, a thirkawr leh ngûnhnâm nen lam chuan alo in bel vek tawh a. Chutia Marcus-a rawn thawh chhuah hnu chuan chu sipai chu hmanhmawh hmel deuh hian a chhuak daih a. " i van tho hma awm ve, nizan khan ka lo mutsan ta mai che u anih kha, khawnge Pontus-a hi?" tiin Marcus-a chuan a zâwt a. Hestia chuan lehkha eng emaw hi zial țhat malh malh pah hian, " Pontus-a chu khaw chhûngah a kal lawk anih kha, khaw puipa te ava hmu lawk dawn a, i mu țha thei maw?" a lo ti a. A kawrfual hlîp a inbualna kuanga luh pah hian, " mu țha thei chu ani mai e, chhuah in in peih tawh em ni? Sipai ho te?" Marcus-a chuan an ti a.
" Peih chu ani mai e, sipai ho ka va hmu lawk ang e, lo insiam la," ti a sawiin Hestia chu a chhuak ve leh a. Rei vak lo inbualna kuanga a inbual hnu chuan kawr fual pan deuh hi a in bel a, a sipai thawmhnaw leh thir kawr te chu a inbel zui ta nghal a. Chutia a in thuam zawh chuan a mutbu chu a têl țha a, lehkha leh thawmhnaw hakthlâk niawm tak tak tam vak lo hi savun ip lian vaklo a thun sawk sawk in, thing thingrem intiang ûr bulah chuan a dah a. A ngûnhnâm chu paiin a thir lukhum chu a keng a, dawhkan a uain chu tlem lem in sahrang lian deuh tak chu a lek chhuak zui a, puanin chu a chhuahsan ve leh ta a.
Pawnah chuan sipai ho chu chhuah an lo in peih hlawm hmel tawh khawp mai, an sakawr chungah chuan an lo chuang deuh fur hlawm a, sakawr mai bâkah sakawr tawlailir tlem azawng pawh alo awm a. Khua chu ala vár chiang em em lo na in meichher erawh chhit kher angai tawh hran lo. Puanin kawt a a din vung vung lai chuan Captain Pontus-a leh sipai pahnih hi alam pan hian sakawr chunga chuang in anlo phei a. A bul an rawn thlen chuan Pontus-a chuan a rawn kalpui te hnenah chuan, " puanin chhûngah hian bungraw tlem azawng chu a awm a, tawlailir ah dah ula, puanin pawh hi in țhiat nghal mai dawn nia," a ti a.
Chutia a sawi zawh rual chuan sipai te chu sakawr ațang chuan chhuk in an bulhnai a awm sipai țhenkhat te nen chuan Pontus-a puanin chhûngah chuan an in zui lût a. Marcus-a lam rawn hawi pah hian Pontus-a chuan, " nizân i mu tui meuh maw?" an ti a. " mutui ani mai e, enge in va kalna chanchin chu," ti a Marcus-an zawh chuan nui deuh var var chung hian, " a țha ani mai e, in lamah han haw phawt ila, kan la kal nawn leh ang chu," a ti a. Chutih lai chuan Hestia- chu sakawr chunga chuang chung hian a rawn lang hlawl a, sakawr pakhat hi a rawn kai bawk a. Sipai ho te pawh chuan Pontus-a thing thingrem leh bungraw țhenkhat chu an rawn thiar chhuak a, sakawr tawlailir kovin chutah chuan an hlâng zui mawlh mawlh a.
Puanin pawh chu reilo te an an țhiat zo thuai a. Marcus-a pawh chu Hestia- sakawr rawn kaih ah chuan a zuang lâwn a, tichuan chhuak turin an peih chu ani ta mai, Pontus-a chu sipai ho awmna lam ah chuan a tlân a, chhuah a hun tawh thu an hrilh kual zung zung a. Hestia-te pahnih pawh chu hmahruai tûrin a hmalam pan in chak fahran lo hian an tlâ zui ve nghal a. Chutia Captain Pontus-an a sipai ho a hrilh zawh hnu chuan Marcus-a te awmna lam pan chuan a lo tlân kir leh a, hmanhmawh fahran lo hian chu Phyra- khua chu an chhuahsan zui ta a..
Chutia sipai ho chhuak ta nguah nguah chu khaw mipui ho chuan anlo en huang huang hlawm a, khaw hmáwr lamah chuan lo kal in an rawn aû a, bân an rawn vai lawp lawp reng bawk a. Sipai ho te pawh chuan bân an vai lêt nasa ve hle mai, an lo in hrawn rei tawh bawk a, a tu lam ve ve pawh chu an lunglen hmel khawp mai. Chutiang chuan Phyra- khua chu an chhuahsan ta a.
Sipai ho chu an tam em em hran lo, Hubin sipai ho, wizard war lai a Marcus-a leh Hestia tena an hruai te kha an ni deuh mai a, mahse an rál lak te avang chuan an bâwr ve angreng khawp mai, sakawr tawlailir tlem azawng an nei bawk a. Chutia an chhuak ta chu rin ai daih in an kal sâwt angreng hle mai, Ngâw leh lunghmun Prinalia- an kal lai chuan Nî pawh a rawn chhuak deuh suar suar tawh a. Phyra- ai chuan helai hmun hi a sâng deuh zâwk a, Mount Bosini chuan hnuai leh bulțhut mai anih avangin Nî pawh in a rawn chhun ve țan ta.
Chuti chuan an kal zêl a, an hmanhmawh em em lo na in kawng laka an chawlh khawmuan loh avangin rin aiin an kal sâwt khawp mai, chawhnu lam, Nî ina vanlaizâwl a pelh hnu deuh lawk chuan Delain khaw dâi an thleng dêr tawh. Khaw dâi lawk ah chuan râlvêng sipai tlem azawng an lo awm a, chutia Marcus-a te an han hmuh chuan an hlim hmel hlawm kher mai. An hotu deuh ber niawm tak chuan zahna chibai bûk pah hian, " nimin lam khan inlo thlen kan ring zawk a, General Menelaus-a te khan min rawn zui an ti mai si a," alo ti a.
Hestia chuan, " Ni e, Phyra ah kan châwl khawmuang leh a," tiin chhanga. sipai pa bawk chuan, " General Klent-an lo hmuak tur che u in min rawn tîr a," an ti leh a, sipai pakhat chu eng emaw hi zawite hian a hrilh a, chutia a sawi zawh hnu chuan chu sipai chu Delain lam pan chuan sakawr in chak fahran hian a tlân lêt ta nghal a. Captain Pontus- chuan, " anih chuan i kal tawh ang u hmiang," a rawn ti a.
Chûng sipai ho pawh chuan rawn zui ve in Delain khaw chhûnglam pan chuan an inzui lêt leh ta hlawm a. Khaw tawntirh ah chuan sipai ho hi awmze nei tak hian alai a kalna tûr zuah kaw si hian an lo in tlar țhap a. General Klent-a pawh chu an hma ah chuan alo ding ve a, Marcus-a leh Hestia te an hmuh chuan General Klent-a chu a hlim hmel kher mai, abul an rawn thlen chuan zahna chibai a lo bûk a. A sipai intlar ho te pawh chuan rual mangkheng hian an âwm zawn ah an kut dinglam hi an lek chho va, chutah an țhingțhi rual leh țhap a.
Hestia- chuan, " Sipai leh kan bungrua te hi khawilam ah nge kan nghah dawn," tiin General Klent-a chu an zawt a. Rang fahran hian Klent-a chuan, " tuna kan riahbuk hmâr lam deuh ah sawn ani mai dawn lawm ni, inlo thlen ve vat kan ring a, chuvangin kanlo in singsa ve deuh e kan ti a, General Menelaus-a te pawh nimin chhûn lai vel khan Bersin- lam panin an chhuak leh ta anih kha, zankhat kanlo mikhual a," tiin alo chhang a. Hestia- chuan Captain Pontus-a hnenah chuan, " Captain, sipai ho te hi iva dah fel pui mai dawn em ni," a ti a. Captain Pontus-a pawh chuan, " awl e, General," a ti a, tichuan sipai ho te chu an au a, an in dahna hmun tur lam chu hrilh in a pên pui ta hlawm a. Hestia leh Marcus-a erawh chu General Klent-a puanin lam ah chuan an in zui phei ta nghal daih a.
Puanin kawt an thlen chuan Marcus-a chuan, " Penelope-i ka va hmu lawk ange, ka lo kîr leh vat dawn nia," a ti a. A sakawr chu a kuai her a. General Klent-a chuan, " tak a, Hman ni deuh lawk khan Wizard Neira- te anlo kal tak asin, i țhiannu Penelope-i a hmu ani âwm a, in kalna ka lo hrilh a, hmanhmawh deuh in anlo kal ta nghal anih kha, hmuh che aduh khawp asin, in in hmu ta em?" alo ti a. " Hmu hman lo deuh a, a pawi khawp mai, Hestia-hian minlo hrilh tawh a, engpawh nise ka va kal hmasa phawt ange," tiin Marcus-a chuan a chhânga, tichuan Penelope-i te riahbuk lam pan chuan chak fahran hian a sakawr chu a khalh liam ta a.
Zâwi sap hian Hestia chuan Marcus-a tlân chu thlir zui pah hian, " tlangval khawngaihthlak tak chu ava ni em, Pathiante hian țanpui mawlh teh se," a ti a. General Klent-a pawh chuan, " buaina dang chu tâwk tawh lo hram se ka va ti em, Mahse Neira- khan hmanhmawh deuh a hmuh a duh thu kha a sawi si a, eng emaw chu a lo thlen ngei ka ring tlat ani," tiin alo tuihnih ve bawk a.
Hestia chuan, " Ni e, Calydon khua a akal hlân khan Neira- te kha anlo kal a, mahse an in hmu leh ta silo," a ti a. Tichuan ngui angreng deuh hian General Klent-a puanin chhûngah chuan an in zui lût ta a. Chutia Marcus-a kal ta chu reilo te an Isle- khaw mipui râltlân ho awmna ah chuan a thleng a. Sakawr ațang chuan zuangthla vat in, Penelope-i te puanin ah chuan a lût zui ta nghal a. Chutia puanin a alût chu inchhûngah chuan Penelope-i nu bâk ah Katie-i leh Mina-i te chu khûnkhân deuh a thil sawi niawm tak hian anlo țhu bial laih hlawm a. Puanin chhûnga Marcus-a rawn lût an hmuh chuan mak tih hmel deuh hian an rawn en a, an hrilhhai hmel in an ding rual țhawt hlawm a.
Penelope-i nu chuan, " Marcus, i ni ti raw, engtia helai hmun a lo kal nge... Eastland ah i awm ani lawmni?" alo ti deuh hluai a. Marcus-a chu a hrilhhai hmel angreng kher mai, țawng tum a a an deuh zuau zuau lai chuan Penelope-i țhiannu Katie-i chuan alo țawng khalh a. "Pu Marcus, i lo kîr leh thei chu alawmawm hle mai, khawngaih in lo țhu ve ta che," alo ti a. Chutia Katie-ina a lo biak hnu chuan a ngampat hmel leh sawt a, an bul lawk ah chuan țhuthmun a rem zui ve ta a. Mina-i chu rang deuh hian a thova, uain leh theirah eitur eng emaw hi ava la a, Marcus-a hma ah chuan a rawn chhawp vat a. Uain chu no khat an tlak pawp a.
Chutah a bula țhu te chu an melh kual a, a thusawi tûr châng niawm fahran a an lo ngawih țhap avang chuan, " Ni e, chanchin inlo hre tawh maithei a, Eastland ah kan awm char char a, mahse Pathiante min țanpuina avangin hmelma te chu kan tukzal thei ta hram a, tichuan chawl pawh chawl khawmuang lovin kanlo kîr lehnghal ani, enge inlo an a, Penelope-i pawh chu enge chanchin zel?" a ti a.
Katie-i chuan, " General Klent-a puihna azârah Hubin-Khua a finna Pathiannu ropui Athena-i temple ah sakawr tawlailir hmangin kan hruai țhin a, Athena-i puithiam in a lo enkawl țhin a, hei vawi riat vellai chu kan kal tawh na in engvak a an phah pawn kan hre lo, a beidawn thlâk khawp mai," a tih zawm a. Marcus-a chuan, " engtin nge alo enkawl a, Neira- in a lo tlawh che u em ni, putar sâng deuh, hmuihmul leh khabehmul vâr vek kha," tiin an zawt a. Penelope-i nu chuan rang fahran hian, " aw lo kal e, in in hmu em ni, hmuh tum che in alo chhuak anih kha, ka hmuh vat angai anih hi a ti ringawt a," alo ti vat a. Katie-i pawh chuan, " Neira- chuan awmzia a awm phah lo ang ati a, kal tawhlo turin min ti a, nimin kha kal leh hun tûr a tih chu ania, mahse hei, kanla kal lehlo chu anih hi," a ti a.
Chutihlai mêk chuan puanin pawnlamah chuan thâwm alo awm a, en thli thlai tura Mina-i a va kal chuan, puanin kawngkhar a hawn hma hret hian pawnlam ațangin a rawn in hawng a, putar Neira- chu alo lang hlawl mai. Marcus-an a hmuh rual chuan mak tih hmel deuh hian a ding zawt a, nuih deuh sak pah hian Neira- chuan, " Inlo dam maw, Marcus, ka hmu che chu ka lawm hle mai," a ti a.
Penelope-i nu chuan Neira lamah chuan a lu an kûn zauh a, " kan dam e, lo țhu ve teh khai, i chau awm si a, khawi lam ațangin nge?" tiin alo be sawt sawt a. " a lawmawm e inlo dam chu, Mount Hepnos- ațangin, hmuh i har hle mai, Marcus," tih pah in an bulah chuan alo țhu vea. Chutihlai chuan Mina-i chuan theirah tui hmel deuh deuh hi dâr thlêng kum lian deuh ah hian alo châwi a, Neira- te chu a rawn chhawp sak a. " Neira, min hmuh tum in ilo kal nasa hle mai, Eastland- ah lah khan ka rawn kir leh hma lawk in inlo chhuak leh hman si a, enge thil pawimawh a awm em ni?" Marcus-a chuan an tih chhunzawm a.
Neira- chuan, " Ni e, kan in sûlpêl nasa hle mai, tunah chuan hei, kan in hmu ta alawm," a ti a. Dawhkan chung a Grep rah bâwr khat chu la in a hmawm zauh zauh a. Ring fahran lo a sawi zawm leh in, " englo ania, I țhiannu Penelope-i hi nangman a i chhanloh chuan mihringah kan in chhuah theilo ang, engpawh nise, thil hmanhmawh thlak anih avangin ka rawn zawng vat vat che ani a, tunah chuan hun tam kan nei tawh lo ani." a ti chuai raih a. Katie-i leh Penelope-i nu chuan hlauthawn hmel deuh hian Neira-chu an en rual țhawt a, an piah lawk a lo ding ve reng Mina-i pawh chuan mak a tih hmel khawp mai, ala naupang deuh bawk a, a hlauhthawn hmel in a ngaihna a hriatloh hmel hle a. " engtin maw itih, engtia hmanhmawh thlak maw, han sawi chiang deuh teh?" Marcus-a pawh chuan a ti bah deuh nuaih a.
" Ni e, thil hmanhmawh thlak ani a, i țhiannu Penelope-i chuktu rûl kha rûl satliah ani lova, 'dark magic' ațanga siam chawp rûl zawk ani, chuvangin a chukna kha chutianga enkawl dam mai mai theih ani lo, tunah hian thlâ pawh a ral lam ani tawh a, ral lam mai pawh nilovin a ral țep tawh ani, chuvangin hun kan nei tam tawh lo, thlâ a ral ang a, a dêt leh a i țhiannu hetianga ala awm reng chuan mihringah kan in chhuah thei tawh lovang," Neira- chuan a ti leh a. Marcus-a chuan Neira- thusawi chu mak atih hmel in, a hriatthiam loh hmel ngei mai. " Enge ka tih ang,? enge a tihdamna chu?" bah nuaih hian an tih zawm leh a.
Neira- bawk chuan, " Colchis- ah ikal vat angai ani, he i țhiannu hi dâwi chak tak mai, Dragon mittui, lunghlu tlang ang maia khal leh langtlang fîm ral mai chauh hmanga tihdam theih ani, mahse a awmna hmun tak chu ka sawi mai thei lo tlat mai," a ti a. " engtin nge ni ang, Colchis- te chu a hla viau ani lawm ni, tunah lah thlâ a mang țêp chu ani si a," Marcus-a chuan beidawn hmel ang reng deuh hian a ti a. Neira- bawk chuan, " Pegasus-i kawl ani lawm ni," a lo ti vat a. " aw kawl chu ani mai a, mahse.." " enge mahse chu? Engpawh nise i kal ngei chu angai a ni, Colchis khaw páwn lam deuh, khawpui chhak lam deuh ah khân indona Pathian ropui Ares-a temple a awm a, chutah chuan puithiam Psamathe-i a awm țhin a, chu nu chuan alo hrilh thei ngei ang che, an sawi dan chuan Colchis- khaw bul lawk ah hmanlaiin Dragon lianpui a awm țhin a, pûk lian tak chhungah awm in, chu a chênna țhin pûk chhûngah chuan he a mittui lunghlu ang maia fîm, lung ang maia sakhat hi a awm ani âwm e," tiin Neira- chuan a sawi a.
Chutah Penelope-i nu chuan lo tuihnih ve in, " Ni e, kei pawn an sawi chu ka hre țhin tawh alawm, hmanlaiin thawnthu ang deuh in anlo sawi țhin a. Hmanlaiin Colchis- khaw dâi lawk ah hian Dragon lian tak mai hi a awm a, khaw mi te ho chuan an hlau thei em em a, chutia an khaw dâi lawk a Dragon a rawn awm hnu lawk chuan chulai a khaw mi țhenkhat chu ruang hmuh tûr awm silo hian an bo leh zauh zauh țhin a, chutia zanlam a khaw chhûng mi țhenkhat, naupang leh upa deuh zawk te an bo tâk zauh zauh hnu chuan khaw roreltu te chu in hmukhawm in, an khaw nula te zîngah Dragon ngai an awm ani ang an ti a, tichuan an khaw daifêm a hmeithai rethei tak mai fanu Electra-i chu ringhlelin an man a, Dragon chu zânah tlangval ah changin Electra-i chu a rîm țhin a, chutia khaw chhûnga akal pah chuan a dawi hmangin khaw chhûng mi thenkhat te chu tihlum in a rubo țhin tiin dawt in an hêk a, tichuan Electra-i chu man in an khawdâi ah chuan an hruai a, Chutah phuar hlawmin Dragon pûk luhna bul ah chuan an hnutchhiah ta a, mahse zán a Dragon lo haw chuan chu nula chu a hmuh in a khawngaih em em a, an phuarna te chu phelh in a hliamte a enkawl sak a, tichuan hun rei tak chhûng dragon chuan châwm in, pûk chhûngah chuan an chêng dun ta a. Electra-i pawh chuan anu chu ngai țhin hle mahse atan an khua a kîr leh chu ngam rual ani silo. Chuvang chuan Dragon pûk ah chuan a chêng zui ve ta reng a.
Chutia hun rei tak Dragon nen a an chêndun tâk ah chuan anlo in nêl in an in kâwm hlim țhin a, Dragon pawh chuan a chungah te chuan tirin vân boruak sâng tak tak ah te a thlawhpui duai duai țhin. Mahse vanduai thlak tak in vawikhat chu chutia Dragon nena an in chhaih lai leh anin fiamlai chu an khaw pasalțha rammu țhenkhat ten anlo hmu fuh hlauh mai a, chu nula khawngaihthlak tak chu Dragon awmloh lai chuh in, pûk chhûngah chuan an luhchilh in an tihlum ta mai a. Chuan tlâia Dragon lo hâw leh chuan chutia a țhiannu thisen nen a lo baw nuaih a hmuh chuan a nunna chhan tum in a dawi chi hrang hrang a hmang a, chutianga a dawi chak tak tak a hman avang chuan amah pawh chu a chau hle a, mahse a nunna erawh a chhan thei ta chuang silo, a beidawng leh rilru na lutuk chu a mittui a tla ta hial anih chu.
Chu a mittui chu vúr ang maiin a khang a, lunghlu țha mi mâwi tak ang mai hian a êng sût mai bawk a. Chutah a dawi a hman nasat em avangin chêt pawh a chesawn thei tawh lo, chau tak in chu nula bulah chuan a bawk reng a, a beidawng tawpkhâwk chuan a ka ațang chuan meialh rapthlak tak mai hi phuhchhuak in nula-i ruang chu a phuh vak a, nula-i ruang pawh chu chawp leh chilh in a kángral zui ta nghal a, amah pawh chuan chakna reng a nei tawh lo, chau tak in a maimitchhing a, a thi zui ve ta a.
A taksa chu muangchang in vaivut ah a chang riai riai a, reilo te an thliin a chhem bo ta ani." a ti a. A thusawi chu Katie-i leh Mina-i chuan ngaihnawm an tih hmel kher mai, an khawngaih avangin Mina-i phei chu a mittui alo tla hman hial anih chu. Marcus-a chuan, " engpawh ni se tunah ka kal nghal mai loh chuan," a ti a, a țhutna ațang chuan a tho zui ta nghal mai a. Neira- chuan, " Pegasus- chu," alo ti hluai a. Marcus-a chu hrilhhai hmel deuh hian a țh leh hnu hnu a, chutih lai chuan Neira- bawk chuan, " Mi dik inih avangin Pathiante pawh in an vêng che a, tin, Pathiannu Athena-in a țanpui bawk che anih kha, chuvangin i kal dawn anih chuan Pathiante hnenah i thlen hmasa phawt tur ani lovem ni," a ti chuar chuar a.
Penelope-i nu chu lo inrawlh ve vat in, " Mina, Uain bur kha han lâk belh leh ta che," alo ti ve vat a. Mina-i pawh chu Penelope-i nu in asawi zawh rual chuan a tho nghal a, dâr țha mi ațanga siam, bûr tung bial sei fahran mai, a mawnglam kiar deuh leh a hmâwrlam zuih deuh, beng sîn deuh pahnih nei hi a rawn chawi a. Neira- chuan lo laksak in, an uain no ah chuan tam fahran lo hian a thlit sak den den hlawm a. Chutah an no țheuh chu lek kângin tlemte leiah an han ti baw zeuh a, zawi fahran a phun sep sep hlawm in, an Pathiante hnenah an thu an thlen a.
Chutia inhlanna antih zawh chuan Marcus-a chu a țhutna ațang chuan thovin Penelope-i mutna lam pindan ah chuan a lut zui lehnghal a. Penelope-i chu tui hmel tak hian alo muhil a, zawite te hian a thaw ri sêk sêk reng bawk a. A khawngaihthlak reuh ngei mai, thil a ei loh avangin a chêr tawh in, a mitkhur te chu a khuar kâk tawh a, a biang no tak te pawh chu thisen neihloh avangin a dâng bêm a, a heh te pawh chuti tho chu.
" Penelope, khawngaihthlak te," zawi te hian an ti sep a, chutah muangchanga kûn hniam riai riai in a chal ah chuan dîm tak hian a fawp zauh a, duat hmel tak hian a hmai chu an chûl sak leh a. " i dam dawn alawm, chán che hi ka duh lo, Penelope, i damtheih nan chuan engpawh ka ti ang, minlo nghak char char ang che aw, ka lo kîr leh thuai ang," tiin a phun leh sep sep a, tichuan a chhuahsan ta a.
Neira- chu a țhutna ațang chuan lo thovin Marcus-a chuan alo kuah a, " dam takin i lo kîr leh dawn nia, rawn hlawhtling ngei ang che," Marcus-a beng bulah chuan zawite hian a ti a. Penelope-i nu leh Katie, Mina-i te pawh chu an țhutna ațang chuan lo thovin Marcus-a chu zahna chibai bûk in an kûn zauh hlawm a. Tichuan Marcus-a chuan Puanin chu chhuahsan in, puanin kawt a a sakawr chungah chuan a zuangkai thauh va, an sipai riahbuk lamah chuan hmanhmawh deuh hian atlân kîr leh ta a. Pawn a Marcus- a chhuah chuan Nî chu alo tla daih tawh in, khua pawh alo thim daih tawh mai, thla mang lam anih avangin thlâ pawh chu alo la chhuak lo. sipai riahbuk a thlen chuan meichher pawh a lo in chhi far hlawm a.
Sipai ho chu an puanin pawn ah chuan meipui lian fahran mai chhep hian an lo țhukhawm dil mai a, râldo zo leh hnehna chang hlim an ni bawk a, an hlim hlawm ngei mai, a țhen chu anlo in buan fiam a, țhenkhat lah chem sei nen anlo in hmachhawn bawk. Eng emaw chen chu a thim lai deuh atang chuan a an chezia chu a thlir deuh reng a, mahse a hmel chu a hlim hmel êm êm vak hran lo, thil dang daih ngaihtuah ni mai awm hmel hi zu pu daih a. Sakawr ațang chuan chhuk in ke in General Klent-a puanin lam pan chuan a kal a.
Puanin chhûng ah chuan General Klent-a leh Captain Pontus-a chiah anlo awm a, uain no hi anlo dawm dun a, an mit meng ațang chuan an lem tam hmel tawh khawp mai lehnghal. " enge alo an tawh a, i țhiannu chu," Captain Pontus-a chuan alo ti nghal var a. An țhutna lam pan a phei pah hian Marcus-a chuan, " a pangngai reng ani mai, hma ala sawn thei meuh lo," a ti a. " General hian chanchin tlem azawng chu minlo hrilh a, ka tawrhpui khawp mai che, engtia han tih chi nge maw ni dawn le?" Captain Pontus-a bawk chuan an tih zawm lehnghal zat a. An bul a thing țhutthlenga țhut ve pah hian Marcus-a chuan, " Ni e, thil buaithlak tak mai tih ka hmabak anih hi, Colchis-ah ka kal nghal vat angai dawn a," a ti a. "Colchis-a," maktih hmel fahran hian an ti rual țhawt a.
Marcus-a chuan, " Ni e, Penelope-i chuk tu rûl kha dâwi hmanga siam chawp ani a, a tih dam nan Colchis ram a Dragon mittui angai a," a ti leh a. General Kent-a chuan thinrim hmel deuh a dawhkan chum rîk bur pah hian, " A va han buaithlak lehzel ve aw, Misual Zeddicus-a thil tih bawk a ni leh pek ang chu, hepa hi chu a nung chung in ka la man dawn khawp mai," a ti deuh tûn tûn a. Captain Pontus-a pawh chuan, " engati nge buaina hlir mai hian a hmuah che le aw," pawi tih hmel deuh hian a ti a. Dawhkân a uain chu no khat pum hian a thli chhuak a, an tlâk pap a, " engpawh nise, thla dêt hma ngei a ka lo kir leh angai sia, tunah lah thlâ a mang țêp ani mai si, ka kal phawt mai ange, lo kir leh vat ka tum dawn nia," Marcus-a chuan a ti a. A țhutna ațang chuan tho in puanin chu a chhuahsan a. anni pahnih pawh chuan Marcus-a chu puanin pawn lamah chuan an rawn zui chhuak a.
Mak tak mai hian pawn a Marcus-a a chhuah lai chuan Pegasus chu puanin kawt ah chuan alo awm leh dêr tawh anih chu. Nichin lawk a Penelope-i te puanin a an awmlai a Wizard Neira- te ho nen a Inhlanna Uain an dawm lai a an inhlan khan Pegasus- hmantîr tu finna Pathiannu Athena-i hnenah a țawngțai ani ngei ang. " Pegasus," mak tih hmel deuh hian Marcus-a chuan a ti a, chutah Marcus-a a rawn hmuh chuan Pegasus- chuan hlim hmel deuh hian a thlâ chu an zâp ri phurh phurh a, a hrâm ruai ruai bawk a. Pegasus- chungah chuan a lawnkai a, " ka kal mai ange, Hestia chu chanchin inlo hrilh mai dawn nia," a ti a, tichuan an thlâwkchhuak zui ta nghal a.
Zankhua in Marcus-a te chu an thlâwk a, tuipui zau tak mai Aegean Sea- chungah chuan zankhua deuh thaw in an thlâwk a. He tuipui Aegean Sea hi a zau hle mai a, Pathian ropui ber Zeus-an lui Pathian Asopus-a leh Sea nymph Metope-i te fanu Aegina-i hming chawi a a phuah hi ani a, Aegina-i hi a nu ang bawk a Naiad Nymph, lui leh tui vela chêng țhin ani. Aegina- i hi Zeus-a hian a ngaizawng a, mupui ah inti changin a rubo daih a, Oenopia thliarkar ah a tawmpui daih a, chuan he Oenopia thliarkar pawh hi a hming thlak in, Aegina-i chawimawi nan Zeus-a chuan Aegina thliarkar tiin a vuah a. Chu chu a pu hlen ta zêl ani. Tin, he thliarkar hi Aegean tuipui bul lawk ah a awm bawk. Aegina-i hi a pawimawh hle a, a chhan chu miropui tak tak thlah tu ani. Zeus-a nen hian fapa Aeacus-a an nei a.
Mahse Zeus-a nupui, Pathiannu ropui Hera-i'n a pasal thiltih a hriat chuan a thinrim hle mai a. Aegina-i chu a thîk bâkah, a hming chawimawi nana tuipui leh thliarkar hming a phuah kher chu a ngai haw zual a. " ka hriat lohvin ka pasal chuan a hmei thliarkarah a tawmpui țhin a. He thliarkara mi chêngte hi ka thungrul ang a, tumah ka zuah tawp lovang," a ti a. Phuba lak dan tur a ngaihtuah a, thliarkarah chuan hripui a lên tîr ta chiam a.
Chu hripui avang chuan ran leh ramsate chu reilo te ah an thi zo thuai a. Chutah, hripui chuan mihring a khawih chhunzawm leh ta nghal. An pûl phuk phuk a, mi țhenkhat phei chu hripui rapthlâk tak chu hlauvin anmahni an in tihlum bawk a. Reilo te an chulai thliarkar a mihring te pawh chu an thi mang zo leh ta vek a. Aegina-i fapa Aeacus-a chauh chu dam khawchhuak a ni ta. . Mitthi ruangte chu phûmtu tur pawh an awmlo va, khawlai ah te chuan an tlu sai kalh niai nuai a. Aeacus-a chu khawhar tak leh mal takin sasaw thing hnuaiah a țhu a, sasaw thinga fanghmir lo inzui diah diah a hmuh chuan apa Zeus-a hnenah a țawngțai ta a.
" Aw, Pathiante zînga ropui ber chu ka pa ini a. Han en teh, he thliarkara mihringte chu an thi zo tawh a. Hei hi ka nu thliarkar ani a, ani chu i hmangaih a; khawngaih takin he hmun ruak luahkhat tur mihring min pe leh hrâm rawh," a ti a. Chutichuan Aeacus-a chuan a mumangah fanghmirte chu mihring tak tak ah lo changin a hmu a. Chuan a tûk zîng a thawh a, a han hawi vel chuan a manga a hmuh angin fanghmirte chu mihringah anlo chang tak tak a. Aeacus-a chu an Lal ah alo țang zui ta bawk a. Chutichuan, chu thliarkara mi te chu Myrmidon(fanghmir) tiin an ko ta ani an ti. Mi țhenkhat erawh chuan fanghmirte chu mihring ah an chang tak tak lova, Zeus-a chuan mitthi te chu a tinung leh zawk ani tiin an sawi a. Mi țhenkhat leh chuan hripui nilovin Aegina thliarkarah chuan țâm a tla a, eitur an nei lo va, an ram lah chu thlai chin nan ram chhe tak, lung hmun hlîr mai hi a ni a, thlai chînna tûrin lei chhûng ațangin lei țha an lai chhuak a. Fanghmir ang maia in an sak avangin Myrmidon tiin an ko ta ani tiin an sawi bawk.
Chuan Myrmidon Lal Aeacus-a chuan Pelion tlâng rama Nymph(lasi) Endeis-i nupui ah neiin, fapa pahnih Telemon-a leh Peleus-a an nei a. Telemon-a chuan Salamis Lal Cychreus-a fanu Periboea-i nupuiah neiin fapa Ajax-a an nei a, Ajax-a hi Troy Lal fapa Hector-a nen khan an insual hrep tawh bawk anih kha. Chuan Peleus-a chuan tuipui Pathian Nereus-a leh Doris-i te fanu sawmnga(50) te zînga hmelțha ber Thetis-i anei ve thung a, chuan fapa Achilles-a, Greek pasalțha zînga chak leh huaisen ber, hmingthang ber chu an nei leh ta ani. Chuan Achilles-a hian Skyros Lal Lycomedes-a fanu pasarih(7) te zîng ami Deidamia nen fapa Neoptolemus-a an nei leh ta anih kha.
Zankhua a chu Aegean tuipui chung boruak sâng taka an thlawh hnu chuan khawvar dawn hnaih lamah chuan khawmual an thleng thei ve ta țawk a. Chutichuan an thlâwk zêl a, an hnuai zawn a ram hring dup hmun zau tak piah deuh a bang ang maia ding luah mai Mount Sipylus- lam pan chuan tlêm in an han thlâwk hniam deuh a. Chulai ngaw pik tak ațanga lo țo chhuak tlâng dung sei tak piah deuh, hmar lampang a lui lian leh mawi tak pahnih in zawm Hermos leh Pactolus lui chu Marcus-a chuan mawi tih hmel fahran hian a thlîr deuh vung vung a.
Tin, chulai hmun ațanga hla tak mai, Mount Sipylus chhim chhak lam pang ah chuan Pergamus- khua chu alang de riai riai bawk a. Pegasus- chu muang fahran hian hnuailam pan in a thlâwk ruai ruai a, tichuan Mount Sipylus- pang ruam lai deuh ah hian a țum ta a.
An țumna lai hi tlâng pang, lungpui tohlâwt lai ani a, a bul vel ah pawh hian thing leh hnim a awm vak lo, thing buk deuh deuh, te reuh te te tihloh chu. Muangchang hian Marcus-a chu a chhuk a, mutthilh chhuah hmel deuh hian a hâm bûi bûi a, Pegasus pawh chu zankhua a thlâwk anih avangin a chauh hmel ve tho mai, tlâng pang a hnim buk te reuh te te chu a țhial nuau nuau a. Marcus-a erawh chu tlêm a pûk deuh, lungpui inthuah tup hnuai ah chuan ltû in a muhil zui ta daih a. Mahse a mu rei em em lo, a harh leh chuan Nî chu a lo vanlaizâwl țêp tawh a, Pegasus pawh chu a piah deuh ah chuan alo la bawk rûn mai. A mutna ațang chuan tho chhuak in an awmna lungpui tohlawt hmâwr lamah chuan a phei a, chu lungpui hmâwr ah tak chuan ding in tlâng pang hnuai khâm sâng tak ațanga thlifim lo thaw heuh heuh chu maimitchhing diar diar chung hian reife a in chhêm tîr heuh heuh a.
Dâr chanve emaw lai chutianga a din reng hnu chuan in her in Pegasus chu an ko a. Pegasus pawh chuan rang tak a tho chhuak in, a thlâ te chu an zâp pharh pharh a, chutah insawizawm niawm fahran hian a ke hma te chu a khai kâng a, a phit deuh dut dut reng bawk a. A savun uain paina chu hawngin tlêm an lem leh sak a, Tichuan Pegasus- chu pan in a chungah chuan a lawnkai a, khawchhak lam pan in Colchis pan tur chuan an thlâwk chhuak leh ta a.
Nilêngin vân chung sâng boruak ah chuan an thlâwk a, eng khua khua emaw ni hi pa li, panga vel lai an thlawh khum hnu chuan Nî pawh chu khaw thlang lamah a lo her liam leh ta reng mai, mahse chawl chuang lovin vân boruak ah chuan an thlâwk zui ta zel a, chumi zân chuan thlâ pawh alo chhuak har khawp mai, thla ral lam anih tawh vang nge maw ni, zanrei lam ah chauh êng fahran lo hian alo chhuak ve riai riai a, mahse a ên loh em avangin chu zân boruak chu a thim kher mai. Zankhua in an thlâwk leh a, khua alo vâr a khawchhak lam ațanga Nî alo chhuah fê hnu pawh chuan chawlh khawmuan an la tum hmel loh khawp mai.
Colchis ram bial chhung boruak a an thlawh luh mek lai chuan Nî chu khawthlang lam hawiin a her țan ve mêk a. Marcus-a chuan hnuailam an thlîr a, ramhnuai pilril leh pik tak tak te chu alang hring mawiin tlâng te reuh te te te chu an lang zâwl dûrh a, chutah in hlat lo deuh deuh a khaw tê reuhtê tê awm pût mai te pawh chu hmuhnawm a tih hmel kher mai. Colchis ram bial chu a zau hle a, a ram hmar thlang lam pang deuh ațanga kal anih avangin an khawpui deuh ber, a kalna tûr ber a an sawi pawh chu rin aiin a hnai khawp mai. A ram bial hmar lam deuh ah chuan 'Euxine Sea' an tih, Black Sea an tih bawk, tuipui zau tak mai hi a awm a, chhim lam ah Iboria ram awm in khawchhak lam ah Lybia- ram zau pui mai chu a awm bawk a.
Nî chu khawthlang lamah chuan a her liam dawn ruai tawh a, tuna an awmna ațanga hmar lam deuh ah chuan Colchis ram bial khawpui ropui deuh mai Phasis- khawpui chu tlâng sâng tak mai bulțhut tê mai ah hian a lo lang ve ut a, Ni tla tûr ina a piah tlâng sâng tak mai a chhun ên riai a vang chuan Phasis-khawpui pawh chu a lang nalh kher mai. Chu khawpui lam pan chuan an thlâwk hniam ruai ruai a, mahse Marcus-a chu a hawikual nasa ang reng hle mai, Penelope-i nu leh Neira- te sawi ang anih chuan indona Pathian ropui Ares-a temple chu a awm ngei tur ani. Mahse chutiang tur awm ang reng hmu bawk si lo. Ni lah chu a tla țêp tawh mai si a.
Phasis- khawpui chu an hnaih tawh hle na in chutiang êm êm chuan an thlâwk hniam lem lo. Tichuan a khawpui chu thlawh hual in khawpui chhak lam pan chuan Pegasus chu a thlawh kawi tir leh a. Reilo te an Phasis khaw dâi lawk ah chuan lung a sak Temple lian vak lo hi an hmu ta. Mahse an hman ngai tawhloh leh hluihlawn tawh ni mai awm hian a chul rup a, a bathlar a ban te pawh chu alo tlu nuaih tawh in a vêlah chuan hnim pawh alo țo hnawk nasa tawh hle a. Thaw dêp dêp hian Marcus-a chuan Pegasus chu thlawh hniam tirin chulai Temple hlui bul lawk ah chuan a țum tir a. Reife chu chulai hmun leh Temple thlîr chung chuan Pegasus chungah chuan a țhu reng a. Eng emaw chen hnu ah chuan chhuk in muangchang hian Temple lam pan chuan hawikual ruai ruai chung hian a phei chhut chhut a. Chu temple chu a lian em em lo na in an sak dân chu a mawi ang reng hle a, mahse a hlui deuh tawh lam chu a ni.
Temple luhkâ leh Temple vêl chuan lung rem kailawn sâng vak lo, chhawngthum hi a in rem kual țhat a. Marcus-a chuan temple chhûng an luh chuan mak a tih hmel in, a hmuh tum ang alo nih loh hmel khawp mai. Pawnlam chu hlui rup tawh mahse Temple chhûng chu a hlui hran lo, a chung chu lung maicham chung zawn ah hian a zuih chho raih a, maicham lah chu alo la khu vat vat mai lehnghal. Chutia Temple chhûnga a din reng lai chuan a sîr lam deuh ațang chuan hmeichhe aw nalh tak mai hian zawi sap hian, " Marcus Valerious, Baculla Lal fapa," a rawn ti a. Rang tak hian chu thâwm lo chhuahna lam chu a hawi nghal a. Pindan sîr kil thim lai ațang chuan hmeichhe hmelțha tak mai pakhat, thawmhnaw hlui lam deuh ha hi alo chhuak a. Chu nu chu a sâng hle a, Marcus-a pawh a chen țêp hial lehnghal. A sam dum nalh tak chu a thlah deuh hnuang a, a thawmhnaw inbel chu hlui deuh mahse a hmelțhatna chu ala pangngai reng tho in a hriat.
Chutah chu nu bawk chuan Marcus-a pan pah hian, " Marcus Valerious, ilo kal tur thu hi kum tam tak kal ta ah khan zawlnei ten anlo puang tawh asin," an tih chhunzawm a. Marcus-a chu chibai bûk a kun zauh pah hian, " Chibai le, Ka mit ngei a ka hmu che hi ka lawm hle ani," an ti leh a. Marcus-a chuan, " Puithiam Psamathe-i ini ang chu tiraw?" an ti a.
Chu nu chuan aw tih nan alu an bu zauh a. Marcus-a chu hnungchhawn in, Maicham la khut vat vat lam chu a pan a, " i lo kal chhan chu ka hria alawm, Marcus Valerious, mahse i hmanhmawh deuh chu angai ang, hun inei tlem tawh lutuk." an ti zui lehnghal a. " Anih chuan Dragon mittui awmna chu i hria tihna em ni? Ala awm ang em?" tiin Marcus-a chuan muangchanga chu nu pan pah chuan an ti leh a. " la awm maw? " Marcus-a lam chu a rawn hawi let a, a la nui sak zui lehnghal.
" Tuman an la la thei ngai hleinem, a awmna lai tak hria pawh awm lo, keimah tih loh chuan." zawi deuh leh thâm deuh țhîak hian an tih zawm a. " Pathiante rorel dân hi ava ropui em, Pathian ropui ber Zeus-a rorelna hi a va dik em, Zeus, Zeus." tiin chunglam a hawi a, a bân pahnih chu chunglamah ala phar chhuak zui. Chumi hnu chuan Marcus-a lam chu rawn hawi leh in, " He dragon mittui hi itan Thitheilo Pathiante chuan an lo ruat lawk tawh asin. I tan anih chu, Marcus Valerious, mahse a awmna ila hre silo." a ti a. Chutah Marcus-a chuan, " i hriat chuan nangin min hrilh thei ang chu," a ti a.
Ring fahran hian chu puithiam nu chu an nui khêk tuarh tuarh a, " Marcus Valerious, helaiah ka awm tih hi engtia hria nge inih, keimah chauhin Dragon mittui awmna ka hria tih hi ihre tawh ani ti raw?" a ti leh a. " Pathian chungnung ber Zeus-an min hrilh ani, chuan a awmna min hrilh tur a thupek ini a, chuvangin min hrilh chu i tihtur ani," zâwi ang reng deuh, thupe aw deuh tak hian Marcus-a chuan a ti a. Chutah chu Puithiam Psamathe-i chuan Zeus-a hming te a lam tel tâk avang chuan a hlau deuh ani ngei ang, Marcus-a chu muangchang hian a pan hnai a, " Ni e, Pathiante chuan tih tur min pe a lawm, ka hrilh mawlh ang che," a ti ta a. " tunah hian sawi nghal rawh, hun ka neih tlem zia chu i hria a lawm, mintih khawtlai chuan Pathiante chuan i chungah kut an lek ngei ang," Marcus-a chuan vîn aw lek lek hian a ti leh a.
Puithiam Psamathe-i chuan Marcus-a chu kal pelin Temple pawn lam ah chuan a chhuak ta daih a. Marcus-a pawh chuan a zui chhuak ve nghal vat a. Puithiam Psamathe-i chuan an piah deuh, khaw chhak lampang a tlâng dung sei ang reng tak mai leh pian mak tak chu a kâwk a, " saw tlâng sawi i hmu em, Marcus Valerious, Pétrina Dákrya- tlâng anih saw, sawlai saw i kalna tur chu ani e, i mamawh awmna chu," a ti a. ( pétrina dákrya tih hi, greek țawng ani a, pétra tih chu lungpui tihna ani a, dákrya tih hi mittui tihna ani a, chuan he thu pahnih hi lakawp in pétrina dákrya an ti a, chumi awmzia chu, mittui lung, lunga chang mittui, stone of tears tihna ani ber ang chu. Chuan Mount Pétrina Dákrya tih chu mittui tlang tihna pawh ani thei tho ang chu, helai khua Colchis ram bial a Phasis khaw bul lawk a awm ani a, hmasanga thawnthu anlo in hrilh țhin Dragon Tears hming chawiin anlo phuah ani ngei ang. CR)
Ner deuh nûng nûng chung hian Marcus-a chuan, " Saw lai tlâng lianpui ah sâwn pûk te reuhte chu ka va zawng anga maw?" an ti a. Puithiam Psamathe-i chuan, " Chiang deuh in en la, tlang dung táwp, ah sawn tlâng inchherchhuan ala awm leh a, mahse tunah chuan khua a thim tawh avangin alang theilo va, chu tlâng inchherchhuan hnuai zawk ah chuan i pûk kal duhna chu a awm," a ti leh a. Chutia han in hrilh kual vel chu Marcus-a chuan anin hmel hle a, chulovah Nî lah chu a tlâ ani chawpchilh nghal tawh mai si a.
A rûm nghut a, chu Puithiamnu bânah chuan a kai lawp a, Pegasus - awmna lampan chuan a kalpui ta dâwr dâwr a. " Min thlah vat rawh Marcus Valerious," " Ngawi mai teh, a awmna min hrilh chhûng hian hun aliam zel anih hi, min tihkhawtlai i tum tih hriat reng reng," " Min thlah vat la anih chu," Pegasus-awmna laiah chuan an thleng phei dêr tawh a. Chutah Marcus-a chuan Psamathe-i chu a pawm nawlh a Pegasus- chungah chuan an nghat thâwr a. " nangmah ngei hian a hmunah min va kawhhmuh mai ani ang chu," " i thiltih hi i hria em, Thitheilo Pathian ropui Ares-a Puithiam ka nih hi," Psamathe-i chuan an ti ve bawk a, mahse Marcus-a chuan a ngaithla hran lo. " Phuar hlawm kher ingai dawn anih chuan sawi mai rawh," a ti vîn deuh țhak a, Psamathe-i kut pahnih ah chuan a vuan tlat a.
Marcus-an a a vawnna lak ata chu a talchhuak thei chuang silova. A tâwp ah chuan lungawiloh hmel fahran hian, " Phuar ka ngailo," a ti vin ve deuh ta hmuk a. Chutia a sawi veleh chuan Marcus-a pawh chu Pegasus- chungah chuan rang fahran hian a lawn zui ve nghal vat a. Tichuan Pegasus chu thlawh chhuah tirin Pétrina Dákrya tlâng lam pan chuan chak fahran mai hian an thlâwk chhuak ta a. A hla em em lo na in chulai tlâng in chherchhuan chuan hnuai zawk a an țum lai chuan dâr chanve emaw vel lai chu alo liam leh hman tawh ang. Marcus-a chu Pegasus chung ațang chuan chhuk in Puithiam nu Psamathe-i pawh chu an hlangthla ve nghal a.
Mahse chulai an awmna chu a lo hnim em em hran lo, thing lianpui pui chu a awm nual na in lung hmun ang deuh hi alo ni a. Nî chu khawthlang lama a liam tawh avangin a thim mup tawh mai, chuvang chuan Marcus-a chuan meichher an siam leh te te a. " i kal ang le, khawilai velah tak nge a awm?" an ti zui leh a. A meichher siam pakhat zawk chu chhi kaiin a pe ve a. "Helamah " tih pah in Puithiam Psamathe-i chuan lêngkîr sâng deuh awmna lampang chu a pan a. Chu lêngkîr sâng tak sîrah zei zei chuan hlam sâwm emaw vel tur a sei hian kalna tur kawng siam chawp hi alo kaw deuh huau a. Kalna lah chu a tê angreng khawp lehnghal. Tichuan chu lêngkîr sîr pangah chuan fimkhur tak mai hian an inzui phei ta a. Psamathe-i chu a kal hmasa khanglang a, a hlauh avangin kal țha ngam hek lo, an kal rei zêk lehnghal. Chutah chu lêngkîr sîr a kawng an zawh zo chiah tih chuan an hma lawk ah chuan rem fahran mai hian puk lian fahran mai hi alo kaw huau mai a.
" Hei hi anih hi," " kal rawh ilut ang," " nangmah a i luh angai ang," " Nilo ve, ka zawng rei lutuk ang keimah chauh chuan, ilo kal ve angai." han hnial vak ngaihna hre hek lo, tichuan hreh tak chung chuan pûk chhûngah chuan an in zui lût leh ta a. Pûk chhûng chu a zau hle mai a, a chung pawh chhûn khaw enlai in kal mah se an hmu thei angem aw? Tih vel lai ani. Pûk luh țanna lai vel ah chuan kailawn ang deuh hi thui fahran lo hi a in rem chhuk ve deuh țhat a.
chu kailawn ang deuh ah chuan thuilo te hi chhuk angai a, chumi hnu chuan a zâwl vek tih theih deuh thaw ani, lung lian pui pui chu a awm țeuh na in pûk chhûng chu a zauh em avangin a thâwl angreng tho mai. Pûk chung sâng leh zau lutuk chuan a ti thâwl in a ti zau deuh in a hriat. Chu kailawn ah chuan muangchang hian an in zui thla det det a. Kailawn tâwp zâwl ah chuan hawi kual zak zak chung hian an inzui leh ta zêl a.
Pûk bang vêl a an meichher êng ken a vanga an thla lian pui pui lo lang te chu a râpawm in Psamathe-i phei chuan a râp tih hi a hriat ngawih ngawih, Marcus-a chu a si deuh chaih chaih reng a. Chutia an kal zel lai chuan ' L' ang deuh hian alo kâwi a, chuta an han kawi leh chiah chu an hma zawn hla angreng tak mai ah hian thil êng tak mai, êng no nalh tak mai hi alo awm a. " saw, i hmu em Marcus Valerious," tiin phûr hmel deuh hian Psamathe-i chuan Marcus-a chu a hrilh a. " hmu e, kan thil duh chu ani chiah angem tih chu ka la hrethei chuang lo," tiin Marcus-a chuan alo chhang let a. Psamathe-i chu kal hmasa in chu thil êng lam pan chuan hmanhmawh angreng deuh hian an inzui phei leh ta a.
Reife an kal hnu chuan chu thil êng awmna lai chu an thleng ve ta țâwk a. Mahse an hmuh tum ang alo nih hmel loh khawp mai. Chu thil chu pûk kil tawp lai ah hian ani a. Hlam sawmthum(30) bâwr vel bial hian chulai hmun ah chuan darthlalang ang deuh deuh hi lung bangah chuan alo in phun fur hlawm a. A țhen chu vûr ram pûk chhûnga vûr tlang hlawm in phun zum vîn vên ang deuh hian leiah chuan lian pui pui hi alo in phun tuarh bawk a.
Darthlalang hlâwm chiah ni pawh in alang lo, an langthlang thei in an rawng chu a paw dal lam pang deuh, sen deuh riai hi a ni ber mai, an vai mai chuan an lo êng phût hlawm a. Chulaia êng chu ani a hma khan anlo hmuh zawk chu ni. " khawiah hian nge a awm tak ang, helai hmun ah hi chuan a awm duh hmel ber bawk si a," hawikual vel ruai chung hian beidawn hmel deuh hian Marcus-a chuan a ti a. Psamathe-i chuan tlem a chûng darthlalang ang deuh deuh êng phût mai hlawm lian tak tak a lawnkai pah chuan, " Lo kal rawh, a awm ngei tih chu ka chiang alawm," a ti a. Chutia a sawi rual chuan hlim hmel deuh hian a au zui nghal a.
" Marcus, Valerious, heta hi le, i thil mamawh chu," a ti ta chûl a. Marcus-a pawh chu rang zet hian chung darthlalang keh hlâwm chung ah chuan lawnkaiin Psamathe-i bul ah chuan a han chho ve vat a.
Psamathe-i hma zawn piah deuh ah chuan mihring muttheihna tur ang vel chûng darthlalang ang deuh chi chu zawl leh rem fahran hian alo in dawh a. Chumi hnuai deuh ah chuan lunghlu ang mai a êng phût mai, kuttum tiat vel lai mai, êng paw dal lam deuh hi alo awm anih chu. " i hlawhtling ta e, Marcus Valerious," muangchang hian hlim hmel deuh hian chu lunghlu tlang ang deuh lamah chuan a phei a, chutah la kâng in, an thlêk kual vel te te a.
" Psamathe, ka lawm lutuk e, nangmah avangin ka hlawhtling chu ani ta si a." Marcus-a chuan a ti a. Chutia chu Dragon mittui khang a han lek kân veleh chuan, a hma ai khan alo êng ta deuh a, reilo te chhûngin nasa tak mai hian a êng chhuak nghal phût mai anih chu.
" Marcus Valerious, ngun tak in lo ngaithla teh, i țhiannu chu a hliam laiah he lung hi i dah dawn nia, theihnghilh hauh suh ang che, tichuan engkim chu i hrethiam tawh mai ang." zawi sap hian Psamathe-i chuan a ti a. Lawm hmel tak a la en vung vung chung chuan Marcus-a chuan, " ka lawm e, Psamathe," a ti a.
Tichuan hmanhmawh ang reng tak hian chulai hmun chu an kalsan zui ta nghal a. Marcus-a chuan a kut lawngin Dragon Tears chu a keng a. a ên êm avangin an meichher pawh chu an keng zui duh tawh lo, chulai hmunah chuan an kalsan zui ta nghal daih a. Chu thil êng chuan pûk chhûng zawng zawng deuh thaw chu a én ani ber mai. Chhûn ang mai hian zu han ên thei a maw le. Kîr leh lam anni bawk a, chulovah an thil duh an hmuh tawh vang ani pakhat bawk ang, an kal rei em em tawh lo.
Rei lo te an pûk luhna kawngka chu an thleng ani zui leh ta nghal mai a. An thil ken avang chuan lêngkîr sâng lai pawh chu harsa lutuk lovin an kal tlang a. Tichuan Psamathe-i chu Pegasus- chungah chuan hlâng leh in, amah pawh chu a zuangkai nghal ve vat a. A thil ken chu a savun ip ah chuan an ak țha leh te te a, tichuan Vân boruak sâng lamah chuan an thlâwk chhuak ta a. Chutia an thlâwk chhuak ta chu Puithiam Psamathe-i awmna Ares-a Temple lamah chuan an kir leh a.
Marcus-a chu Pegasus chung ațang chuan chhukin, Puithiam Psamathe-i chu a hlângthla thuai a. " i thil min tihsak avangin ka lawm tak meuh meuh ani, hun ka nei tlem si a, kan kal lehnghal mai ang e," a ti a. Pasamathe-i chuan ring fahranlo te hian, " ka tih tur ka hlen a, Pathiante remruat dan ang in ka ti mai chauh ani," tiin a chhang a.
Marcus-a vêk chuan, " engpawh ni se, mangțha phawt mai, Pathian chungnung ber Zeus-a chuan a awmpui zel ang che," a ti leh a. " nang pawh le, tluang takin in kal dawn nia," chutia Psamathe-ina a sawi zawh rual chuan Marcus-a chuan inthlah nan an kuah thuak a. Tichuan Pegasus- chungah chuan a lawnkai leh nghal vat a. Psamathe-i chuan lo pan hnaiin,
" Marcus Valerious, mangțha le," a ti leh a. Tichuan Pegasus chuan a thlâ a zâp vak a, vân chung sâng lamah chuan an thlâwk chhuak leh ta a.
Tichuan zankhua in vãn chung sângah chuan an thlâwk a, Colchis ram bial chu zîng khawvâr dawn hnaih lam chuan an thlawh chhuah san ta a. Chuan Colchis ram hmar thlang lam pan ding in Black Sea hrûl ah thlâwk zêl in, Clus leh Dascyllum khua te chu reilo te ah an thlawh khum vat a. Khawchhak lam a Nî alo her chhuah ve meuh chuan Cyzicus khua pawh thlawh khum in Propontis tuipui chungah an awm leh hman der tawh anih chu. Fehrehsan bawr vel laiin Propontis tuipui chhim lam pang kam ah chuan châwl tûrin an țum a. Tuipui kam a Coconut kûng zâr hlim a țhu in reilo te an châwl a, tichuan a hma ang bawk in an chhuak leh ta a.. Chutia an thlawk chhuak ta chu reilo te an Hellespont pawh an thleng ta dêr mai a.
Hellespont hi Greek ho thawnthu ah chuan chanchin ngaihnawm tak neite zîng ami ani a, lâr pawh alâr hle ani. Agean Sea a awm ani a, Hellespont tih hming a put tâkna chhan ber chu... . Hmanlaiin Boeotia khawpuiah Athamas-a a lal a, mi ropui tak ani a, a ram pawh a zau hle a. A nupui chu Pelion tlânga Chhûm Pathian Nymph Nephele-i, Pathian chungnung ber Zeus-a'n a a nupui, inneihna Pathiannu ropui Hera-i pianhmang pû a hlum hmanga a siam ani. Athamas-a leh Nephele-i te hian phîr, mipa leh hmeichhia, Phrixus-a leh Helle-i te an nei a. Nimahahse Lal Athamas-a chuan a nupui Nephele-i chu hnawtchhuak in a aiah hmeichhe sual zet mai Ino-i nupui ah anei a. Mahse Nephele-i hian a fate chu a hmangaih em avangin an bulah awmlo mah se, a fate chu a ngaihvenin râl ațangin a vil reng tho va.
An nuhrawn chuan Phrixus-a leh Helle-i te unau chu a haw em em a, zânah pawh a muhil theilo hial țhin. " engtinnge ka tihboral ang?" tiin a ngaihtuah reng zu nia. Lalnu sual tak Ino-i chu a rûk a lo neitute hnena kalin, " hlâwk lehzual a buh thar induh chuan in buh chîte kha in tuh hma in sahriakin kang ula, chutichuan a lêt in in thar tam ang," a ti a.
Lo neitu te chuan Lalnu sawi ang chuan an buh chî te chu sahriak ah kangin an han tuh a. Mahse țo thei lovin an thi ta vek a. Chutia buh thar tur an neih tâk loh avang chuan an ramah chuab țam a tlak an hlau êm êm mai a. Chutah Lalnu chuan an rama zawlnei zawng zawngte chu a rûkin a ko khâwm a, " Lo neitute buh chî a thih nachhan hi Phrixus-a leh Helle-i te unau vang ani tiin Lal hnenah in sawi vek tur ani. Tichuan lawmman ka pe ang che u anga, ka thu awihlo erawh chu ka tihlum vek ang che u," a ti a. Lalnu chu zawlnei te chuan an hlauh avangin, an rama țam tlâkna chhan chu Phrixus-a leh Helle-i te unau vang ani tiin mipuite hnenah chuan sawiin, An Lal hnenah chuan, " An unauva inthawi nana kan hlan loh chuan ram pumpuiah hei aia chhiatna nasa zawk hi alo thleng ang," an ti bawk a.
Lal Athamas-a chuan a fate inthawi nana tihhlum chu a hreh hle a, nimahsela, a khua leh tuite tawrh nasat turzia a ngaihtuahin tilo thei niin a in hre lova, a tukah a fate chu temple-a tihhlum turin thu a titlu ta a. Nephele-i chuan a fate an nuhrawnin a phiarrûk dan zawng zawng chu alo hre ve vek a. Tichuan Pathiannu ropui Hera-i hnenah a kal a. " Ka fate chu dinhmun țhalo tak ah tunah hian an awm a, nakûk ah temple-a tihhlum mai tur anlo ni ta, khawngaihin min țanpui la, an nuhrawn sual tak lak ata hi chhanhim rawh," tiin a ngen a.
Pathiannu Hera-i chuan Nephele-i chu rangkachak hmul nei beram alo pe a, " He beram hi a thlâwk thei a, i fate chu an himna tur hmunah beram hian a hruai dawn nia," a ti a. Nephele-i chu zanlaiah Lalin ah chuan a rûkin a lût a, a fapa Phrixus-a hnenah chuan, " Naktûkah ipa in in unauva tihboral che u a tum a, a chhan chu in nuhrawni'n dâwta a hêk vang che u ani a. I farnu Helle-i va ko la, hmanhmawh takin Lalin hi chhuahsan rawh u, nangmahni phurtu tûr rangkachak beram ka rawn keng a, ram hla takah in tlanbo dawn nia. Mahse Vânah inthlawh laiin i farnu hi vêng reng ang che, a chhan chu a hlau vanga, tuipuiah a tla hlauh dah ang e," tiin a hrilh a.
Tichuan Phrixus-a te unau chu beram chungah chuan chuangin Colchis-ram lam panin an chhuak ta a. Mahse vanduaithlak takin Aegean tuipui chunga an thlawh laiin Helle-i chuan a hnuailam a zuk en a, alu ahai a, tuipui ah chuan a tla ta a. Boruakah chuan in chhan hman anihloh avangin anau chu tuipui ah chuan a tla hlum ta ani. Chuan he Helle-i tlâkhlum na lai hi Hellespont an ti ta a.
Marcus-a ten tuna an thlawh khum na lai chiah hi ani. Chu chu tun thleng pawh hian a la pu zui ta zel anih hi. A unaupa Phrixus-a erawh chuan him takin Colchis-ram ava thleng a. Phrixus-a chuan Pathian chungnungber Zeus-a hnena inthawi nan Beram chu a talh a. A hmul erawh chu Colchis Lal Aetes-a ape a. Aetes-a hi a lawm hle a, Indona Pathian Ares-a tân beram hmul chu a serh hrang a. Thingah a khai a, dragon muhil ngailo a vêntir reng a.
Zâwlneite chuan beram hmul a kawl țhat chhûng chuan Lal Aetes-a Lalram chu hmelma in an tichhe thei lovang tih an sawi a, chuvang chuan Lal Aetes-a chuan a rangkachak beram hmul chu miin an ru ang tih a hlau hle țhin. He Colchis rama rangkachak beram hmul la tur hian a hnu kum tam tak hnu ah Greek Pasalțha te an rammu a, Hei hi Greek chanchin a rammutna hmingthang-'Argonauts Rammutna' antih kha a ni.
(end chapter 18)..
Comments
Post a Comment