An thlawh chak hrim hrim bâk ah an thlawh sân êm avangin khawthlang lam a Ni a tlâk dâwn meuh chuan an ram, Greek an thleng teuh tawh hle a, mahse Marcus-a chuan Pegasus- chu a khawngaih deuh avangin ramhnuai a riak tur in leh khaw ên lai a an ram thlen a duh avangin a chawlh pui a. Hnuailam ah thlawk hniam in, ngaw pik tak chhungah chuan an zu țum leh a, Marcus-a chuan thing țang tlem zawng zawng khawm in meipui a chhep leh hluah a, chutah a savun ip a a uain tlem te la awm chu lem leh sak in abul ah chuan puan a phah a, a mu zui nghal vat a.
Pegasus- pawh chu Marcus-a bul te ah chuan a bawk ve a. Buaina em em an tawk lo, Marcus-a phei chu a chau tawngkhawng tawh bawk a, a duh aiin a mutui aniang, a han harh leh meuh chuan khua alo vâr vek tawh a, Ni pawh alo chhuak sâng tawh hle a, Pegasus chuan a piah lawk ah chuan hnim hi alo pet mawlh mawlh a.
Peih loh hmel zet hian an tho țuah țuah a, chutah zi mar te te in Excalibur- chu an vai kual vel a, reife chutianga a chem thar hman a zir hnu chuan uain tlem a in a, Pegasus chu ko in a chungah chuan a lâwnkai leh a, tichuan chak tak mai hian an thlawk chhuak leh ta vawn vawn a. Chutia an thlawk chhuak ta chu chawhnu her velah chuan an ram Greek chung boruak ah an lêng dêr dêr tawh a. Reilo te an Phyra- khua pawh chu an thleng zui ve nghal vat a, Prgasus chu thlawh hniam tir in sipai ho riahbuk lam hnaih ah chuan an țum ta a.
Boruak a an thlawk lai kha mak ti tak in khaw mipui ho chuan an lo thlir huai huai hlawm a, mahse sipai riahbuk lam a an țum daih avangin an rawn um zui lem lo. Sipai ho pawh chuan vân chung sanga an awm lai khan hmelma emaw anlo ti ni ngei tur ani, thal kâp mi te chuan țan hmun anlo siam in, hriamhrei nen sipaiho pawh chu anlo in ring hlawm hle a, Mahse Marcus-a an han hmuh chuan hlim in an aû dur dur a, an fei leh awmphaw te chu an khâwng ri tluar tluar a. Pawn lam a sipai thâwm ri huk huk avang chuan General Hestia te, General Menelaus leh Captain Pontus-a te chu rang tak mai hian an puanin ațang chuan an rawn tlân chhuak ve nghal vat a.
An han inhmukhawm leh chu an hlim ngei mai, a bîk in General Hestia leh Marcus-a te chu an in ngâi zual bik deuh in a hriat, an in kuah chuk chuk hlawm a. General Hestia- chuan Pegasus kawh pah chuan, " Pegasus maw? Pathiannu Athena-i chuan a venghim che ani phawt mai, dam tak a ilo kir leh thei chu alawmawm hle a ni." a ti a.
" Excalibur pawh " tiin nui vur vur chung hian General Menelaus-a chuan Marcus-a dâwi chem pai chu an melh zauh a, chutih lai chuan Hestia chuan, " Inchhung lamah ilut phawt ang u," a ti a. Captain Pontus-a lam hawi pah chuan, " Captain, Pegasus- hi i lo va dah lawk dawn em ni? Mi dang chuan an kâi thei hauh lo ang," an tih zawm zat a, Mahse Marcus-a chuan rang tak in, " a kawlh lutuk, khawih ngam a ni lo, tikhan a thlawk chhuak leh mai ang, buaipui hah duhlo mai rawh u," a ti a.
Tichuan puanin chhung lamah chuan an in zui lut ta dial hlawm a. Inchhungah chuan hmeichhe tleirawl hmelțha deuh deuh pathum hi anlo awm a, eitur eng emaw hi anlo siam sap sap hlawm a. " khaw chhung a mi te an nih hi, an fel in an hmel te hi a țha hlawm ania, ani lawm ni Pontus?" nui rulh rulh chung hian Captain Pontus-a melh pah chuan General Menelaus-a chuan a ti a. Inchhûnga Thing dawhkan kil li nei sei ve angreng tak chu an kîl țaih hlawm a. An țhu fel chiah maw tih ah, chûng nula te chuan eitur tuihnai tak tak leh uain an rawn chhawp sak a.
Uain thlit karh karh pah chuan General Hestia chuan, " dam tak a ilo kir leh thei chu a lawmawm hle mai, harsatna i va tawk lemlo maw?" a ti a. Marcus-a chuan, " tawk lo ani mai ang chu, Camelot Lal Ropui tak Arthur Pendragon- in minlo mikhual a....," chutia a sawi lai chuan mak tih hmel deuh hian Captain Pontus-a chuan, " Lal Arthur-a maw?" a rawnti phâwk hrû a.
" aw ni e, enge ni ta? " tiin Marcus-a chuan an zawt let a. Captain Pontus-a vêk chuan, " a chanchin chu ka hre țhin tawh ngei alawm, Lal ropui tak leh thiltithei tak ani a, sipai țha bîk zahnih leh sawmnga(250) anei an tih țhin kha, chubakah Chung a sipai Pasalțha te nen a ro an rêlna bîk dawhkan bial 'round table' pawh anei an tih bawk kha, chuan dawithiam ropui tak Merlin-a thlazâr hnuai ah a awm bawk a, hneh rual ani lo anlo ti țhin asin," a ti a.
Marcus-a chuan, " Ni e, Lal ropui tak chu ani alawm, dawhkan bial pawh chu ka hmu ve ngei alawm, chubak ah a pasalțha te nen pawh kan in hmelhriat tak asin," a ti a. Chu a thusawi chu an pathum chuan mak an tih hmel hlawm hle a. Marcus-a vek chuan, " Lal Arthur-a chuan Pasalțha bîk chawimawina, 'Sir' nihna min pe tak asin, a pasalțha bîk te ang ah min lawm lut a, chubak ah Excalibur- neitu Dawithiam Merlin-a awmna min hrilh bawk a, chuan Merlin-a awmna ah kal in Excalibur kawltu hnenah Merlin chuan min hruai leh ta zel ani," a ti a.
Chutia a sawi pah chuan Excalibur- chu a rawn phawrh chhuak a, an pathum chuan an han in ken chhâwk diat diat a, nalh an tih hlawm hmel ngei mai, Excalibur lah chu a êng deuh phût mai lehnghal a.. Pasalțha țhiau ni hlawm mahse an khawsak dan chu a naupang chhia ang reng kher mai. Chutih lai chuan General Thot- hi puanin chhungah chuan hmanhmawh hmel fe hian a rawn lut a, Marcus-a a han hmuh chuan a hlim hmel ngei mai, chibai te an han in bûk tawn zuk zuk hnu chuan țhuthmun a rawn rem ve nghal a.
Excalibur a hmuh chuan lawm tih hriat tak a bu nghut nghut in anui deuh vur vur a. Marcus-an a Excalibur a dah fel leh lai chuan General Thot-a chuan, " Dam tak a ilo thleng leh thei chu alawmawm hle mai, i lo kir leh ta bawk a, thil sawi tur leh rorel tur tam tak a awm ania," a ti a. General Hestia chuan, " engpawhnise underworld veil hi a rang thei ang ber a kan tih phui vat angai dawn ani," a ti a. Marcus-a chuan, " Zeddicus-a te an rawn che nasa viau em?" tiin alo pawtchat a.
" che nasa vak lo, mahse General Ajax-a te chu Goth ho in an tibuai nasa deuh hlek a, sipai pawh kan in tirh belh nual, mahse Eastland chu kanla hum thei e, mahse Goth ho hi an khaw awp chin ah hian an pung telh telh in a hriat a, tin Underworld ațang lah hian Sakawlh anlo chhuak nasa telh telh bawk si a, buaina nasa zawk chu kan hmachhawn vat dawn anih hi," tiin Hestia chuan a sawi chhunzawm leh a. General Thot chuan, " chuvangin anlo thawhchhuah hma ngei a kan beih hmasak hi angai ani, ani têl in Goth sipai ho lah hi an pung tulh tulh mai si a, heti ringawt chuan kan che thei lovang, sipai pawh kan in chah belh angai ngei ngei ang," a ti a.
General Hestia vêk chuan lo sawi chhunzawm in, " Ni e, sipai chu a rang thei ang ber a kan in chah belh angai dawn ani, chubak ah Khaw dang Lal ho te pawh hi bia ila, min țanpui thei ngei ang, bâk ah kan ram chhanchhuahna tur ania, a phût pawh in kan phût chhuak ngam ang," a ti a. Chu a thusawi chu an pawm tlang hle a, " Nothland leh Dionara- chu kan lal Ixion-a kaltlang in a biak theih ang, sipai pawh an ngah a, anlo chhuah theih ngei chu ka ring," tiin Bersin sipai General Menelaus-a chuan a rawn ti a.
Captain Pontus-a pawh chuan, " Khaw lian leh sipai ngah deuh te kan sawm anga, hnehna chu kan chang ngei ang," a ti a. Tichuan chu an thutlukna chu hmahmawh tak in an kalpui a, an hmanhmawh em avangin hmun hla deuh ami chu sawm lovin, an bulhnai deuh a khaw lian leh sipai ngah deuh hlek te chu an sawm a.
An hlawhtling ang reng hle mai, Phyra- khaw dai thleng chuan riahbuk an sual a, Nitin mai deuhthaw hian khaw hran hrang ațang hian sipai engemaw zat hi anlo lut hum hum reng a. Ni sawm leh pahnih aliam leh meuh chuan an sâwm ho te chu anlo thleng kim thawkhat ta viau mai. Khaw hrang hrang Thebes, Nothland, Sparta, Athens, Crete, Argos, Iocus, Corinth, Phthia, Aliras, Gulisan, Boscan, Eurodia, Boevia leh Pisa khaw sipai te chu Phyra- khaw dai leh chhehvel ah chuan fanghmir ang mai hian an phu mur mur a.
Marcus-a te puanin chu Râl rêlna berah an neih avangin tlemin an ti lian ta deuh a, Nitin zan tin mai hian sipai lut chhuak hi an awm reng a, khaw hrang hrang sipai hotu te chu rorel in an țhukhawm deuh reng mai bawk a. Eastland khaw bul lawk a in kulh Dawithiam Zeddicus-a leh a țhuihruai te bâk ah, Goth sipai ho in a an awp, Urdin, Clenith, Khorbi, Celticus leh Tyndar khua te bei nawn leh tur chuan ro an rel mup mup reng a.
He an beihpui hming ah hian 'Epigoni' an vuah a,(hei hi Greek țawng ani a, 'A hnuhnung zawk' tihna emaw, 'A sawhkhawk' tihna emaw ani. CR) An phûr hlawm hle a, mahse chutia râl do tur a an in puahchah mup mup lai chuan mihring te chanvo rêltu Pathiannu te bâk ah Delphi zawlnei te chuan hrilhlawkna an lo puang ve mek bawk a. " He indona vang hian Underworld Veil hi a phui phah lovang a, indona lah a tawp hek lovang, indona chuan zinkawng a zawh zel ang a, thlipui ang maiin a kalna chin apiang ah thihna a thlen ang, khaw dur chu a zual zel ang a, ruah nasa tak ala sur ang," tiin.
Zâwlnei ten a an thupuan lâwk chuan a ti lunghnur deuh hlawm a, Marcus-a ngei pawh chuan mak a ti in a hnual rawih phah nghe nghe a.
Mahse General Hestia leh General Thot-a te chuan nasa taka fuih in an thlêm chiam a, tichuan phur lo tak chungin râl rêl tur chuan anin buatsaih leh ta sauh sauh a.
Nileng in Marcus-a te puanin ah chuan khaw hrang hrang a an mi sawm sipai ho tu te chuan beihpui neih dan tur an rel a, mahse an thu a inrual tak tak thei chuanglo, tlai thim dawn ah an tin darh a, tichuan khaw thim deuh, zanriah eikham bawr velah chuan angai te bawk in an țhukhawm leh a.
" engpawh nise, zawlnei ten thu an lo puan tawh chu an puan tawh ani a, tih danglam theih ani lo, chuvangin Underworld Veil hi ti phui lo mah ila kan ram ațang hian Goth sipai ho hi kan ûmchhuak hrim hrim tur ani," tiin Athens- khaw Pasalțha General Pelias-a chuan a ti a.
Kulh kawngkhar Pasarih nei Thebes khaw Sipai General Tydeus-a chuan rawn tuihnih ve nghal in,
" Ni e, Goth sipai ho in kan ram chhungah an duhthu in lal an hrawt a, kan ram hausakna an rawk hi ka hrethiam theilo, chuvangin a rang thei ang ber in kan che chhuak vat tur ani," a rawn ti ve bawk a.
General Hestia chuan,
" tunah hian Captain Aeson-a leh sipai țhenkhat te Gogonia ah an awm mek a, mahse Gogonia hi a râlțit vak loh chuan Clenith khua ah kal se la, chuan General Menelaus-a te pawh in Clenith khua chu pan ve nghal mai se,
chuan Khorbi hi khaw lian vak anih loh avangin Goth sipai ho pawh an tam vak lo mai thei a chuvangin General Phocus-a leh a sipai te kal bawk se la.
General Phocus-a hi Corinth sipai General ani.
General Polybus-a leh General Oedipus-a ten Celticus khua pan bawk se.
General Polybus a hi Argos sipai ani a, General Oedipus-a hi Boscan sipai ani bawk.
Urdin khua ah General Caeus- leh a sipai te kal bawk se la.
General Caeus hi Iocus sipai hotu ani.
Chuan Tyndar lam ah General Adratus-a leh a sipai te.
General Adratus-a hi Boevia sipai hotu ani.
Chuan Phyra hi Captain Pontus-a leh sipai tțenkhat ten lo veng bawk sela.
Chuan a bak zawng in Eastland lam kan pan ang a, beihpui thlak dan tur chu kan in siam rem leh mai dawn nia, chuan harsatna kan tawk anih chuan a rang thei ang ber in kan in hrilh vat anga, kan in țanpui vat theih nan," tiin a remruat dan chu a sawi a.
Eastland khaw lam pan tur hian,
Nothland, Sparta, Crete, Phthia, Aliras, Gulisan, Eurodia leh Pisa khaw sipai General te chu an sipai te inbuatsaih tur in a hrilh nghal bawk a.
General Phocus, Corinth sipai ho tu chuan,
" Engtik hun ah nge kan chhuah ang?" tiin General Hestia chu a rawn zawt a.
General Thot-a chuan lo chhâng in,
" a hmanhmawh thlak avangin naktuk zing ni chhuah rualin chhuak thei ula a țha khawp mai, keini pawh hi Eastland hi hnai viau mah se Ni tlak hma ngei a kan chhuah hman angai ang," a lo ti var a.
General Hestia leh General Thot- te remruat dan chu tha anti hlawm hle a, c hlim tak in Uain an dawm hlawm a.
Chutia hlim taka an rik laih laih lai chuan Puanin kawngka chu lo in hawng thut in sipai pakhat hi hmanhmawh tak in alo lut a, zahna chibai a buk zawh hnu chuan General Hestia- lam an hawi a,
" Eastland ațangin General Ajax-an sipai a rawn tir a," a ti a.
General Hestia chuan,
" rawn luh tir rawh," tiin alo chhang a.
Chu sipai chu pawn ah chhuak leh in sipai pahnih hi a rawn hruai lut a, pawn ah a chhuak leh nghal ta daih a.
General ho chuan ngawi reng hian chung sipai pahnih te chu an lo en țhup a.
Sipai te chu an hrilhhai hmel hle a, mahse General Thot-a chuan an țhutna tur alo kawhhmuh zung zung a, chutah țhuthmun te an rem fel a, an chhâwlhâl te Uain hmanga an han tih reh hnu chuan General Hestia chuan,
" Eng thu chah nge in General chuan alo kentir che u a, buaina lampang anih loh hram ka beisei.." a ti a. Chutia a sawi zawh rual chuan Sipai pakhat zawk chuan,
" vanduai thlak tak in harsatna kan tawk țan mek a ni General," a ti a.
General dang ho chu an eng emaw sawiin an han ri deuh lai laih hlawm a.
General Menelaus-a chuan,
" Han sawi chiang deuh teh u," tiin ngaihthlak chak hmel deuh hian alo ti var a.
Sipai pakhat zawk chuan,
" Tukin zing khawvar hma deuh khan Goth sipai ho in min rawn țhawng thut a, mahse an tam em em loh avangin zing Ni chhuah lai bawr vel khan an in saseng leh ta a, pawi liantham leh harsatna em em chu an rawn thlen lo na in, kan Captain ho in sipai tlemte nen kan umzui a, kan rin ang ngeiin khaw dai lawk ah chuan atam a tam Goth sipai ho anlo in chhekkhawm reng mai a, engtik hun pawh a min rawn bei thei reng an nih avangin sipai kan tam silo a, chuvangin kan General in min rawn tir a ni." tiin an harsatna tawh leh anlo kal chhan te chu a sawi a.
" engpawhnise, Eastland chu a ralmuanglo hle tihna ani a, zanin ah pawh Goth- ho chu che chhuak thut thei anni a, chuvangin naktuk zing khawvar rual in kanlo va kal hmasa ang e," tiin Athens sipai General Pelias-a chuan ding chung meuh hian a rawn ti a.
General Polyeidos-a, Eurodia sipai pawh chuan,
" Ni e, keini pawh General Pelias-a te rualin kanlo va kal hmasa ang e," a rawn ti ve bawk a.
General dang te pawh chuan lo va kal hmasak tîr chu pawi an ti lova, tichuan an rorel țhutkhawm pawh chu hlim tak in an țîn ta hlawm a.
Eastland ațanga zualko sipai lo kal te pawh chu Captain Pontus-a chuan a puanin lamah a hruai a, Mahse midang zawng zawng an chhuah vek hnu pawh chuan General Thot, Hestia leh Marcus-a te chu an la țhu ta reng a, an pathum hian an in hrawn rei tawh a, midang ho aiin in nel pawh an in nel hlawm a, engkim an hrechiang a, an thu pawh a in rual deuh ber. He an hmâ lawk a indona an hmachhawn tur pawh hi an huphurh em em hran lo, sipai an neih tam mai bak ah an huaisen in Verna leh Hubin sipai, General Hestia te leh Marcus-a ten a an kaihhruai ber te phei chu an țha lawr lak a, sipai pangngai sâwm in Hubin sipai pakhat hen zel ang an ni.
Pawnlam ah, General dangte mithmuh ah chuan hlim tak angin lang mahse an chhungril ah chuan an hlim tak tak lo in ahriat. A chhan chu he buaina hi zawlnei ten a anlo sawi lawk ang in ala tawp mai an ring lo a, abulțnna ang chauh ah an ngai ani. Chuvangin an pathum a an țhutkhawm phei chuan an ngui chuai reng hlawm a.
General Thot-a chuan Uain thlit karh karh pah hian,
" indona chu a awm ngei dawn a, tunah chuan hnehna chu kan chang ngei ang, mahse a hnu leh hi engtin tak hmachhawn ang i maw," a ti a.
Chutah a tho chhuak a, a uain no chu thinrim tak in leiah an paih a,
" Pathiante remruat tih puitlin sak mai mai tur in kanlo piang a, an mi uan khum mai mai tur in kan nun kan thâp anih hi le?" tiin thinrim tak in a âng chiam a.
General Hestia chuan zaidam tak hian,
" General Thot, uain i lem hnem deuh anih kha, lo țhu teh khai, chutin Pathian te hi kan dem ngawt tur ani hleinem, eng ang pawn remruat se, kan tan a țha tur vek ani asin, engkim hi ngaihtuah hmasak a țha ngai, tun hi Pathiante țanpui kan ngaih lai tak ani a, kan chungah Pathiante an lungawilo hlauh ange," a ti a.
chutianga Hestia- ina a rawn khap hnu chuan muangchang hian General Thot-a pawh chu a rawn țhu țha ve leh mai a, dawhkan ah a kiu nghat in, a kut pahnih chuan a lu a dawm vang vang a, a hmel ah chuan thinrimna leh beidawnna hmel alang thei.
Hestia vêk chuan an sawi zawm leh a,
" Hmânah Pathiante zinga ropui leh chungnung ber, lei leh van rorel tu leh țêk chunga thuneihna nei tu Zeus-an Lui Pathian Asopus-a leh Naiad Nymph Metope-i te fanu Aegina-i a ngaizawng a, chuan mupui ah changin Aegina-i chu a rubo a, Attica tuipui bula Oenopia thliarkar ah a dah a, Aegina-i pa Asopus-a chuan a fanu chu Zeus-an a rubo tih a hriat chuan zawng tur in a chhuak a, Corinth khua ava thlen chuan Corinth Lal Sisyphus-a chuan, van sang taka mupuiin nula a thlawhpui duai duai thu leh, an bul lawk a thliarkarah a thlawh luhpui tih alo hrilh a.
Chu thu chuan Zeus-a chu a ti thinrim hle a, Asopus-a hnena a awmna hrilhtu Corinth Lal Sisyphus-a chu tihlum in mitthi khua ah kumkhua a lunglum tur in a hrem anih kha, Sisyphus-a chuan tlang pang awihah lung lian pui, tawlailir ke ang mai a mum hi a lum chho va, tlang chhîp a thlen dawn ah lungpui chuan Sisyphus-a chu tlang bulțhutah a lum thlâk pui leh țhin a, chutiang chuan chawl miah lovin lung chu a lum chho leh ngat ngat mai țhin anih kha, chuvangin Pathinte dem zawng chuan thu isawi tawh lovang u," a ti a.
Marcus-a pawh chuan zawi fahran hian, muang ban chat in,
" Pathiante chuan an duhzawng tihsak turin mi țhenkhat an ruat a, keini pawh hi chung zing a pakhat chu kan ni ve maithei, Nimahsela kan lak a uang thei an nih na aiin, Pathiante laka inchhuang thei kan nih na hi Pathiante aia kan chungnunna ani, Thihna hi kei chuan ka hlau lova, ka hreh hek lo, thihna hi Pathiante aia kan ropuina leh chungnunna ani," a lo ti ve a.
Chutah Hestia vek chuan,
" engpawh chu nisela, mut hahchawlh kan mamawh ani, chuvangin mut zai irel phawt mai teh ang," a ti a.
Tichuan Phur fahran lo hian an tho sang sang a, an thir kawr te phelh in an in silfai a, in be leh tawh chuanglo chuan an mutbu lam chu an pan ta dial hlawm a.
Marcus-a chuan a mutbu chhah tak ah chuan lukham khamin a țhu mu a, a in ngaihtuah mûk em avangin puanin chhungah midang an awm ve tih hre hre awm pawhin alang lo.
General Thot leh Hestia-te an hnâr sûk sûk hnu pawh chuan ala meng ta reng a, rei tak thleng a in ngaihtuah a, khaw var dawn lam a dai bul vel lawk a chinghnia an û ruai ruai hnu chuan a muhil ve thei ta țawk a.
Țawng ri bawrh bawrh chuan Marcus-a chu a ti harh a, Ni chu ala chhuak lo na in khua chu a êng deuh riai riai tawh tho.
Puanin chhungah chuan General Thot leh Hestia bakah General Menelaus-a te, Corinth khaw sipai General Phocus-a te chu an lo awm a,
Marcus-a rawn tho a hmuh chuan General Menelaus-a chuan,
" Kan chhuak mai dawn e, Eastland lamah pawh General Polyeidos leh General Pelias-a te an chhuak tawh a," a lo ti var a.
Marcus-a pawh chuan,
" tluang takin inva kal dawn nia, keini pawh kan lo kal vat ang e," a ti let ve a.
Eng eng emaw sawi a Hestia te nen a an titi luam hnu chuan General Menelaus-a te pawh chu an chhuak ta a.
Sipai te an khâwm a, an pan tur lam țheuh ah chuan an chhuak ta sang sang hlawm a.
Puanin pawn ațang chuan Uain no dawm chung hian Hestia, Thot leh Marcus-a te chuan chung Pasalțha ho te chu an thlir liam a.
Nilengin Hestia leh Thot-a te chu an vir buai a, Marcus-a erawh puanin ah a tawm char char thung.
General Hestia in a puanin a rawn luh chuan Marcus-a chuan uain no dawm chung hian Excalibur chu alo vai kual vêk mek a, a thir lukhum chu dawhkan chunga nghat in thing țhutthleng ah chuan chauh hmel deuh hian a țhu hnawk a.
Muangchanga uain thlit kerh kerh pah chuan,
" Delain- ațangin General Klent-an thu alo chah a," tiin uain chu a in chhunzawm a.
Marcus-a chuan Hestia thusawi chu ngaihsak awm pawh in alang lo, Excalibur- chu ngun tak hian a thlek vawng vawng ringawt a.
Chutah Hestia vek chuan,
" i țhiannu Penelope-i a țha vak lo anih chu," zawi fahran hian an ti leh a.
chuveleh a chem vai lai chu châwl in,
Muangchang hian Hestia bulah chuan alo phei a, rûm nghut pah hian thing țhutthleng ah chuan a țhu hnawk a.
" a van zialo ve aw? Engtia na nge?" zawi fahran hian an tih zawm a.
Hestia chuan,
" General Klent-an thu a rawn chah a, mahse an kîr lehnghal anih kha, Delain-khua ah hri a lêng ani awm e."
rei fe chu Hestia thusawi ngaihtuah zui niawm tak hian a ngawi vung vung a,
" Underworld Veil ațanga rawn thawk ani lo maw," zawi te hian an tih zawm a.
" Maithei, chu chu General Klent-a ngaihdan pawh ani a, mahse nunna chân em chu anla awmlo ani awm e, "
" Hmun dangah pawh a thleng thuai ang,"
Hestia chuan,
" Delain-ah chuan lo va kal la, keini Eastland- kanlo va kal hmasa thung ang a, min rawn ûm leh zawk mai dawn nia, Pegasus i kawl tho alawm," a ti a.
Marcus-a chuan,
" A țûl kher dawn em ni, anu bak ah a țhian tha ber ber ten an awmpui a, chubak ah General Klent-a te thlazâr hnuai ah an awm ani a,"
" Nilo ve, i va kal ngei a țja ani, enge kan tawh dawn tih kan hre lawk silo, a chhe ber thlenga ngaihtuah tel angai asin tun kan hun tawn ang ah hi chuan," tiin Hestia chuan kal ngei tur in ati a.
A țhutna ațanga thawh thurh pah hian Marcus-a chuan,
"Ni e, khaw awmdan hi han ngaichang phawt ila," a ti a.
A thir kawr chu a phelh a, a in sil thuak thuak a, puanin pawn lam ah chuan a chhuak ta daih a.
Ni chu a tla dawn suar suar tawh a, khua chu athiang in ngaih a ti țhalo hial zawk ani.
Hmar lam Mount Hepnos- ațanga thlifim lo thaw chuan tlai boruak chu a vawng daiin boruak ati nuam hle a.
A piah deuh ah chuan sipai ho chuan hlim deuh mai hian nunchan an lo zir lai laih hlawm a, a țhen in sakawr te anlo sawizawi vêl thul, Uain in chung hian anlo ti ti laih laih hlawm bawk a.
Râl ram ah an awm a, engtik ah nge hmelma ten an tihhlum dawn, dam in an kir leh angem?
Nghakhlel tak in an nupui fanau ten an lo kir leh hun anlo nghak mek chu ani si a.
An nunna thâp tak meuh meuh a fehchhuak te chu a khawngaih hmel hle a, an che vel chu a reife a thlir dauh dauh a.
Engemaw chen hnu ah chuan puanin chhung ah bawk chuan a lut leh a, Hestia erawh a țhutna ngaiah chuan uain no dawm hian alo la țhu reng a.
Hmanhmawh deuh tak hian a awmhmun kawrfual chu a phelh a, a aia kawr pan te mai hi a in bel a, chutah a thir kawr a ha leh a,
" in chhuah hma in ka lo chhuak mai ang e, Eastland- lamah chuan lo kal vat ka tum dawn nia," tiin Hestia pawh en chuanglo chuan a ti a.
A bân bun savun, rangkachaka chei chu a bun mawlh mawl a, chutah a ngalkâwr savun chu a vuah leh a.
Excalibur chu an vai thuak thuak hnu chuan a pai leh a, a thir lukhum leh awmphaw chu keng in a chhuak zui nghal a.
Hestia- pawh in a rawn zui chhuak ve nghal bawk a.
Chutia puanin an chhuahsan hnu lawk chuan Pegasus pawh chu khawi lam ațang in nge maw ni? A rawn thlâwk chhuak ve hlawl a.
Marcus-a chuan alu chûl sak thuak thuak in achungah chuan a lawnkai nghal vat a.
" Hmanhmawh duh vak suh, sipai kan tam alawm, i țhiannu leh General Klent- te chu minlo biak dawn nia," Hestia chuan a ti a.
Sipai ho te pawh chuan Pegasus leh Marcus-a chu anlo en hu hu hlawm a, mak an tih hmel hlawm ngei mai.
A thir lukhum khum pah chuan,
" awl e, lo kir leh vat ka lo tum ang," a ti a.
Pegasus chuan a thla an zâ hluai a, van sang lam a thlawk chho in Delain- lam pan chuan an thlawk liam ta vung vung a.
Marcus-a chhuah hnu lawk chuan General Hestia te pawh chu General dang ho te nen chuan an puanin ah bawk chuan thu rel in reife an țhukhawm leh a.
Khawthlang lam a Ni a her liam hnu lawk, khua a thim fel chian vel bawr chuan Eastland lam pan chuan an chhuak ta nguah nguah a.
Marcus-a te pawh chu zankhua in vanchung boruak ah chuan an thlawk duai duai a, an chawl lemlo na in an thlawk chak fahran chuang lo.
Khaw chhak lam a Ni Pathian Ropui Helios-an, a mei sakawr tawlailir a a rawn hnûk chhuak leh ta niawm tak hian phur loh hmel zet hian Ni pawh chu a rawn tawlh chhuak leh ta ruau ruau a.
Delain khua an thlen chuan Ni chu ala tlâng sâng lutuk hran lo.
Khaw chung zawn boruak a an thlawh kual lai chuan mipui ho chuan an lo hlauh hmel hlawm hle a, in chhung lam ah tlan lut in, an tukverh ațang te chuan an lo thlir dûk dûk hlawm a.
Sipai ho pawh chu an bâng bik lo, an ral khel hle a, an in au khawm sung sung a, chutah hmanhmawh deuh a țanhmun te siam in anlo in ring hlawm hle a.
Pegasus chu alo thlawk hniam zel a, thal kap mi ho pawh an lo in ring khawp mai.
Mahse General Klent-a chuan Marcus-a rangkachak awmphaw leh thir lukhum an hmuh chuan a banvaiin, sipai te chu a au thuai a.
Pegasus pawh chu alo thleng chawpchilh ve nghal.
Sipai ho chu an darh hak a, Pegasus thla zâp vel chu an hlauh hmel hlawm kher mai,
chutah an thûm deuh huk a, mak tih hmel deuh hian zawite te a in bia in, "Pegasus," an ti sep sep hlawm a.
General Klent-a pawh chuan a hnaih ngam mai bik lo.
Marcus-a chu a rawn zuangthla thurh a, General Klent-a chu an nuih vur vur a.
Pegasus chuan a thla a zâp ri hlup hlup a, hram ruai ruai chungin a thlawk chhuak lehnghal ta daih a.
General Klent- chuan zah hmel tak a chibai lo buk in hlim tak hian alo be surh surh a.
" in hmuh a khât hle mai, in tluang zel maw?" alo ti a.
" Kan dam ani mai e, buaina hi chu ngaiah kan nei tawh anih ber hi," an ti leh a.
Chutah puanin lam pan chuan an pahnih chuan an in zui phei ta nghal a.
Sipai ho chuan kawng anlo kian sap sap hlawm a, Marcus-a chu an en duh hlawm in an ngaihsan hmel hlawm hle a.
Puanin chhungah chuan nula pahnih hian eitur eng eng emaw hi anlo siam mek a.
Marcus-a an hmuh chuan an ngaihsan hmel hle a, thil tih pah chuan an rawn melh ralh ralh a, a khât tawk hian zawite te a inbia in an in nuih leh deuh ver ver reng a.
Thing dawhkan kîl chuan General Klent-a te pahnih chu an tlțhu dun a,
Klent chuan,
" eng emaw rinhlelh deuh hlek ka nei a, chuvangin mi ka lo tir tawp anih kha, nangmah ngei ilo kal thei hi a lawmawm hle mai," a ti a, chutia a sawi lai mek chuan nula te chuan vawksa kan ro te, grep rah bawr lian tak tak te leh theihmu te, sa kawchhung rêp te leh uain te an lo chhawp sak a.
Uain chu thlit pah hian Marcus-a chuan,
" Hestia- sawi chauh kha ka hria ani mai a, mahse hri chhia ang anih chuan Pathiante chu an ni tawp lovang, kan misual Zeddicus-a anih ka ring tlat," zawi te hian a ti a, rilțam hmel deuh hian vawksa kan ro chu a keih thla hlawk hlawk a.
" Zeddicus-a maw? Kei pawh in anih ka lo ring deuh a?" hrilhhai hmel ang reng tak General Klent- chuan a ti a.
Marcus-a vêk chuan,
" Ani ngei ang, ani lo ti tur dang an awm lo, engpawh chu ni se nunna chân em chu an la awmlo in ka hria a, hri chuan engzah vel nge a man tawh hlawm a, engtin nge an nat tlangpui?" a ti a.
A rilru a chhiar niawm fahran a ngaihtuah pah hian,
" mi sawmthum bawr vel chu an ni ngei ang, an taksa pum hi a sa hut hut a, an thlan a tla nasa in an chilthli a tla duah duah țhin, rei tak chu ani lova, mahse an nâ a chhuah loh lai chuan an vâi ruai a, uain rui ang mai hian an awm țhin," a ti a.
" A van vanduai thlak tak em ve aw, Penelope-i chu dam se chuan a enkawl dan a thiam ngei dawn si a," ngui raih hian an ti a.
Rang zet hian General Klent-a chuan,
" i țhiannu Penelope-i chuan a kai ve hleinem," a ti deuh hlut a.
" a kai ve lo a? anih chuan..
..?" Marcus-a chuan alo ti var a.
General Klent-a chuan rawn țhut hnaih sûrh pah hian zawi fahran in,
" vanduaithlak tak in rûl in a chuk alawm le," a ti a.
Marcus-a chuan a chhang lo, beidawn hmel deuh hian a rûm nghut a.
General Klent- vêk chuan sawi zawm leh in,
" nimin piah mai khan khaw dâi a an thing la chu rul in a chuk ani awm a, mahse a chuk tu chu an tihlum hmanlo ani awm e," a tih zawm leh a.
Marcus-a chuan muang fahran hian,
" rul maw? Eng rul nge ni a?" a ti a.
" a hmu tu te sawi dan chuan kut zungpui tiat vel lek, hlam khat vel a sei, a vâr vek niin an sawi a,"
Marcus-a chu a tho thurh a,
" engpawh ni se Penelope-i chu ka va tlawh ve phawt ange, ka lo kir leh thuai ang," a ti a.
Puanin chu a chhuahsan zui nghal a.
General Klent-a chuan rilru hah hmel deuh hian Marcus-a chu a thlir zui vawng vawng a.
Ama hriat tham lek hian zawi fahran hian,
" buaina in i hun i hmang zo anih tâk ber hi, engtikah tak chawl hahdam ve ang che maw," a ti zui sep a.
Chutia puanin ațanga a chhuak ta chu pawn ah chuan Pegasus chuan alo nghak reng tawh a.
Sipai ho chuan hmuhnawm ti tak in anlo bial luih luih a, mahse tumah hnaih chilh ngam an awm chuang lo, Pegasus ina a thla an tih pharh veleh chuan naupang chhia ang maiin an tlân darh leh hak țhin a.
Marcus-a chuan a rawn pan ding nal nal a, a chungah lawn kaiin Penelope-i te awmna lampang pan chuan an tlân zui nghal a,
chung Sipai ho te chuan aliam thleng an thlir zui vawng vawng a.
Khaw chhunga a tlân lût chu mipui ho chuan anlo hmu duh nasa mai, a țhen chuan tlanchhiat pah hian an thlir zui țawk țawk bawk a.
Mahse chutiang mipui ho chu a ngaihsak hman lo, a hmalam chauh a en a, Pegasus chu chak tak in a tlântir reng bawk a.
Rei vaklo hnu ah chuan Isle- ațanga râltlân ho awmna hmun chu a thleng ta a, Penelope-i te puanin kawtah chuan Pegasus chu dintîr in rang fahran hian a zuangthla a, puanin chhûng ah chuan a lût zui ta nghal a.
Penelope-i țhiannu pakhat zawk Mina-i leh Penelope-i nu chuan thing dawhkan hi anlo kîl dun a, thil anlo ei mek a.
Puanin chhunga Marcus-a a rawn luh chuan, Mina-i chu rang deuh a a țhutna ațanga rawn tho vin a alo be sawk sawk a.
" nangmah ini elaw, pu Marcus, lo țhu rawh," tiin țhutna âwl alo kawhhmuh nghal zung zung a.
Marcus-a pawh chu Penelope-i nu ep chiah chuan a țhu ve nghal a, Mina-i chuan Thing thlêng kum a eng emaw chhum kawi la sat hmel deuh, la khu vat vat rawn chawi pah chuan,
" hei hi Penelope-i nu kha anih hi, pu Marcus," a ti a.
Chutah Marcus-a chuan chu nu chu melh zauh in an kûn zauh a.
" tlangval, min țanpui avang khan ka lawm tak tak ani, Pathian ten veng zel che rawh se," Penelope-i nu chuan a ti a.
" țanpui thei che a ka awm hi Pathiante min țanpui vang chauh ani, enge i an tawh a, i dam zel ka beisei," Marcus-a chuan a ti ve a.
" ka dam tawh e, ka fanu Penelope-i..." a tih lai mêk chuan Mina-i chu an bulah chuan alo țhu ve a, a thusawilai chu lo pawt chat in,
" Pu Marcus, Penelope-i chuan alam alam țhin che asin, engtin nge a chanchin i hriat a? Nge ila hre lo?" a ti a.
Marcus-a chuan,
" A damlo tih chu ka hria a, General Klent- in tlem azawng chu min hrilh a, mahse thuchiang engmah ka hre lo," alo ti vat a.
Mina-i vêk chuan,
" Ni e, Hmanni kan ram kalna ah rulin a chuk a," a ti a.
Penelope-i nu chuan,
" Kha rul kha rul pangngai ani lo, siam chawp anih kha," alo ti var a.
Rang fe hian Marcus-a chuan,
" siam chawp a? Han sawi chiang teh," a ti vat a.
Penelope-i nu vêk chuan,
" khatiang rul kha Siraka-i khan a siam tawh tlat ani, 'dark magic' hmanga a siam ani a, tuna ka fanu chuk tu pawh hi khatiang ang chi tho kha ani, dawithiam tu emaw chuan a siam ngei ani," a ti a.
Marcus-a chu enge maw ngaihtuah ni awm tak hian a melh ngai melh hian a hawi vung vung a.
Chutih lai chuan pindan lehlam ațang chuan hmeichhe aw hian,
" Mina- lo tlân vat teh," a ti tuarh a.
Chu veleh an pathum chuan pindan lamah chuan rang deuh hian an tlanphei nghal vat a.
A țhiannu pakhat zawk Katie-i chuan a lo awmpui a, Mut bu ah chuan Penelope-i chu alo mu bêm a, a maimitchhing a, a lo rûm vak vak a.
A thlan chu a tla nasa in Katie-i chuan a chal chu puan huh hian alo hrûk sak mek a.
Marcus-a an hmu thut chu Katie-i chuan mak a tih hmel hle a.
Penelope-i bul hnai ah chuan țhuthmun a rem nghal a, lainat hmel tak hian a thlir vawng vawng a,
a hmai dâng lap mai chu duat tak mai hian a chûl sak a.
Chutah a nu chuan Penelope-i kawr bân chu dîm tak a hlîm sak in Marcus-a hnenah chuan,
" Helai hi ania a chukna lai chu," tiin Penelope-i bân puam, rul chukna hmuamhma chu a entîr a.
Rul chukna lai leh a bul vel chu a duk kual ruih a, a vûng deuh bûr mai bawk a.
A chângin a hmuamhma lai ațang chuan thil phuan neuh neuh hi tlem te te in alo chhuak leh țhin a, chu chu Katie-i chuan puannem hian alo hru nghal zel a.
A chângin Penelope-i chu vawt tih hmel deuh hian a rawn khur leh chiam a, mahse a rei hran lo, reilo te ah a thlan a tla leh phung a, chutah a taksa pum mai chu a rawn sa leh huam huam a, a thisen zâm te chu puak keh tur ang mai hian a rawn bawl a, a rawn lian leh vak leh zel bawk țhin nen, chulai akar ah a rawn rûm leh vawng vawng țhin a.
Tihngaihna tak an hriat loh hmel hle a, an beidawngin an hrilhhai tih chu an hmel ah alang chhuak hial.
Marcus-a chuan zawi fahran hian,
" Hnim damdawi emaw, eng emaw rulchuk damdawi ang chi te in hre lo em ni? Engtin nge in enkawl tawh?" a ti a.
Chutah Mina-i chuan,
" Rul chuk damdawi ang chi chu chi hrang hrang kan hmang tawh a, mahse a ti zual zawk ni maiin ka hria," a ti a.
" Rul pangngai ni se chuan kan enkawl dam tawh ang, mahse dawi ațanga siam ani si a, enkawl ngaihna kan hre lo ani," alo ti ve vat a.
An sawmna angin Marcus-a chu an puanin ah chuan chumi zan chuan a riak ve a, mahse a mu manglo tih theih ani, zankhua in Penelope-i chu a țhutpui char char a.
Khawvar dawn lam hnaih chuan Marcus-a chu Penelope-i bulah chuan a chhîng ve sek a, a muhil dawn chauh tih chuan Mina-i chuan a dâr ah dîm deuh hian a rawn sâwi a.
An men chuan abulah chuan thing thlêng kum a bawngsa tui la khu vat vat keng chung hian Mina-i chu alo ding a, alo la nuih sêih zui lehnghal.
A thlêng kum Marcus-a pek pah chuan,
" I chau awm sia, in rawh, adang pawh ala awm ania," a ti zui zat a.
" Ka lawm lutuk e, khua avar tawh em ni? I van tho hma ve a?" Marcus-a chuan a ti let a.
" Ni chhuahna chu ala rei vak lo," zah hmel deuh hian a ti a.
Penelope-i chal leh hmai vel te chu puan nêm hian duat deuh hian a hrûk sak a, a puan sin lai te pawh chu a sin țhat tir bawk a, chutah a mah vêk chuan,
" heti hian rei vak lo chu tui deuh a muhil ang in a awm a, mahse ana a rawn chhuak leh țep tawh ang, Penelope- khawngaihthlak i hi," an tih zawm leh a.
Marcus-a chuan,
" engtin emaw chuan tihdam dan chu a awm ngei ang," tiin alo sawi zawm a.
Chutih lai chuan Penelope-i nu chu pindan ah chuan alo lut a, Tûkțhuan ei tur in a rawn ko va.
Tûkțhuan an ei zawh hnu lawk chuan Marcus-a chu sipai riahbuk lamah chuan a kir leh a, General Klent-a nen chuan eng eng emaw sawiin an nileng deuh thaw a, chutah an pahnih chuan zanriah tuihnai tak kîl dun in, khawthim rual chuan Penelope-i te awmna lamah chuan a kir lehnghal a.
Chutiang chuan Ni sarih vel lai Delain- khua ah chuan a châm a, sipai riahbuk a General Klent-a nen a thu eng eng emaw sawi a a kal zauh zauh tih loh chu Penelope-i te puanin ah chuan a awm char char a, he a châm chhung hian zantin a tlaivar ziah tih theih deuh thaw ani, Penelope-i chu a țhutchilh deuh reng a, mahse eng a ang thei chuang silo, harh pawh a harh chhuah ngailoh avang chuan an beidawng tlang tawh hle a, Marcus-a ngei pawh chu a beidawng tih loh rual ani lo, mahse han awmpui char char theih lah ani bik silo, lehlamah Hestia te angaihtuah tho bawk si a.
Zîng khaw var hma deuh, leilung alang thei țan tih velah chuan Marcus-a chuan phur fahranlo tak mai hian a ralthuam, a thirkawr te chu a in bel leh ta a.
Chutihlai mek chuan Penelope-i nu chu abulah lo kal in,
" Engpawhni se, va kal phawt mai rawh, i țhiante pawn an ngaihtuah tawh ang che, I țhiannu chu lo ngaihtuah duh suh, eng em chu ati lovang, i lo kir leh hun chuan dam tak in i eitur alo buatsaih sak thei tawh ngei ang che," a ti a.
A biakna chu chhan pawh a chhang lo, hria ang pawh in alang lo, thil mûk tak ngaihtuah pah ni awm fahran hian a ngawi ngul a, a bân hrên chu a hreng mawlh mawlh a.
Chutah Penelope-i nu vêk chuan,
" Pathian ten an veng zel ang che, Hnehna chang ngei chunga ilo kir leh ngei ka beisei, dam tak in le," an tih zawm leh a.
Marcus-a chu arawn in her a, Penelope-i nu kut chu an vawn sak a,
" Ni e, i fanu chu adam leh ngei ang," an ti let ve a, a awmphaw leh thir lukhum chu ala a, puanin chu a chhuahsan ta nghal a.
Reivak lo pawn a a din vang vang hnu chuan Pegasus- pawh chu khawilai ațang emaw in alo lang ve hlawl a, Marcus-a a hmuh chuan hlim hmel deuh a rawn pan hnaiin, a thla chu a zâp vel ruai a.
Chutihlai chuan Penelope-i nu leh Katie leh Mina-i te pawh chu puanin pawnah chuan anlo chhuak a, Pegasus an han hmuh chuan mak an tih hmel hlawm hle a.
Chutah Pegasus chungah chuan Marcus-a chu a lawnkai vat a, a thir lukhum nalh tak chu a khum zui nghal a.
Mina-i te pathum chuan an hmu duh ngei mai, Marcus-a chu an ngaihsan hmel hlawm hle a, Marcus-a chuan an lam rawn hawiin alu an bu zauh a, anni pawh chuan an bân an rawn vai let ve a.
Tichuan Pegasus chuan a thla a zâp vak a, van boruak sang lam pan chuan a thlawk chhuak zui ta nghal a.
An thlawh liam thleng chu an thlir zui vawng vawng a, reife an la ding zui reng lehnghal.
Pegasus- chu chak tak in a thlawk a, khaw chhak lam ațanga Ni alo chhuah lai vel chuan an thleng hla tawh hle a, ferhehsan anih meuh chuan Phyra- khaw chung boruak ah an awm hman der tawh.
Tichuan van boruak sang tak ah chuan in vawrh chho leh in an thlawk ta zel a, an hma zawn hla tak a chhum dum in let tup tup mai te leh van sang lam hawi a meikhu dum khu chho ngut ngut mai te pawh chu an hnaih telh telh a.
Niin a khawthlang lam a hnaih tawh lamah chuan Eastland khaw dai lawk van boruak ah chuan an awm tawh a.
Marcus-a chuan hnuai lam an hawi thla a.
Lei chungah chuan sipai sang tam tak hi an lo in bei nasa hle a, a tam a an han tam zia mai chu, fanghmir bu tawn darh ang mai ani.
Chutianga an hnuailam a in beihna nasa tak thlir reng pah chuan an thlawk hniam ve zel a.
Chutih lai mek chuan thawk lehkhat ah an hma zawn boruak ah chuan thal mu hi a sur hian a rawn sûr hum hum a.
Rang takin Pegasus chu chunglamah a thlawk chho nghal vat a, tlem chuan muang hlauh se chuan an taksa ah chuan thal mu chu a lût tam ngawt ang le.
Chutih lai mek chuan ramsa rapthlak tak a a hram ruai ruai thâwm hi an hnuai lam ațang chuan alo chhuak thut a.
Thâwm lo chhuahna lampang an thlir nâk chuan, lei chung ah chuan ramsa rapthlak em em mai leh lian em em mai, dragon leh rul thlahpawlh ang mai, sakei ang deuh si hian a lu tam tak ațang chuan meialh rapthlak deuh mai hi a phuh chhuak chuai chuai a.
Marcus-a chu a rûm nghut a, rang fahran hian Excalibur- chu an lek chhuak zui nghal a.
Chu ramsa rapthlak tak mai lam pan chuan Pegasus chu a thlawh tir a, chak tak mai hian boruak ah chuan an leng kawi zuai zuai a.
Excalibur chu niin a a rawn chhun chuan a êng nasa hle mai, a țêk chuai ni ber hian a hriat.
Chu chu an rawn hmuh chuan sipai ho te chuan an inbeih lai chawl meuh hian an lo thlir țhup a, chutah hlim tak a aû ri leh ralthuam khâwng ri hian a zui leh nghal zat a.
Reilo te ah chuan chu sa hlauhawm chu an hnaih ta hle a,
chu ramsa chu a che sawn rang em em lo na in a lu rapthlak tak leh tam tak avang chuan a hlauhawm hle a, Marcus-a te chu meialh hian a phuh zuai zuai reng a, chutah alu țhenkhat chu ring tak leh rapthlak tak a hram in anlo in hrosa ve reng bawk a.
Chu ramsa kârah chuan rang tak tak hian an thlawk kual zuau zuau a, reife anin beih hnu pawh chuan engtin mah Marcus-a chuan a ti theilo.
Pegasus pawh chu a chauh hmel tawh hle a, meialh nasa tak tak a a phuh reng avangin boruak chu a lum in Marcus-a pawh chuan chêt har ati hle a.
Chutah a tha tâwp tak meuh meuh in an bei leh a, chu ramsa lu tam tak kâr ah chuan chak tak in an thlawk kawi leh zawr zawr a, Vanneih asiam in lu sawm zîng a pathum chu a sâ bung thei ta hram a.
Chutia Marcus-an a ramsa lu a sat bung an hmuh chuan a lam țang sipai ho te chu ring tak tak hian anlo au dur dur a, chu chu Marcus-an a an hriat chuan a phûr thar surh hian a hriat, Pgasus pawh chu hlim hmel deuh hian a hrâm ruai ruai bawk a.
Chutah tihhlum ngei tum in an bei leh a, mahse a zuam ang ngawt chu ani lo, a hma ai mah in beih a har zawk a, chulo ah a kawlh zual sauh bawk avangin Marcus-a chu a beidawng hman țep.
Mahse tihhlum ngei tum a huaisen tak a a beih avangin leh a remhriatna vang pawh ani pakhat ang.
Khawthlang lam a Ni a her liam dawn lai vel chuan chu ramsa lu zawng zawng chu a sat bung thei ta hram a.
Hetia Excalibur-a ramsa lu a sah bun hian a bun na lai tak chu mei a rawh ang mai hian a ri sur sur a, a nghâwng ațanga thisen lo chhuak a reh hnu chuan a alh zêl anih chu.
Chutia ramsa lu zawng zawng a sah bun hnu chuan chu ramsa chu alo chhuahna underworld veil- zau tak leh alh hlup hlup chhungah chuan a tla thla vawn vawn a, a alh zuai zuai reng bawk a.
Pegasus chu an pawl ho awmna lam ah chuan muang fahran hian a thlawk phei duai duai a, chauh hmel tak hian leiah chuan a țum chawrh a.
Marcus-a chu zawife hian Pegasus chung ațang chuan a rawn chhuk thla a, General Hestia chuan alo bawihsawm vat a.
" hnehna chu kan chang ta, Ramsa kawlh athih tawh chuan an ang rei thei tawhlo khawp ang," alo ti var a.
Marcus-a chuan chauh hmel deuh hian,
" Pathianten min awmpui reng tih ka hria alawm," a lo ti ve bawk a.
Chutih lai chuan Hestia chuan sipai pakhat hi a ko a, sakawr chak ber la tur in a tir nghal a.
Mahse Marcus-a chuan,
" Nilo e, General, ka țhianten ral an beih lai in ka lo inthiar fihlim bik lo tawp ang," a ti a.
" I chau ani, reilo te tal chu i chawlh angai asin, sipai kan tam a, i zârah hma kan sawn lai mek ani e," tiin Hestia chuan an ti lêt ve bawk a, mahse Marcus-a chuan inthiar fihlim chu a tum lo nasa mai, Hestia kaihkuahna lak ata chu a tal chhuak a, thei leh theilo in an in sang mar a, excalibur chu a phawrh chhuak a,
" Naktuk khawvar hma ngeiin kan nuai chimit tur ani," ring fahran hian a ti a.
Chu a aw hria sipai ho chuan anlo en țhup a,
chutah a hma aia ring zawk hian,
" Sipai huaisen te u, in zahawmna chu hlawh chhuak rawh u, ropuina chuan alo hmuak reng che u," an tih zawm a.
an kianga sakawr lo ding chungah chuan inthazo tak hian a zuang kai a, excalibur chu van lam hawi a lek chhuak in a au vak a, chumi avang chuan sipai chau tak tak te pawh chu an phûr thar leh sawt hian a hriat, an ralthuam te chu an khâwng ri a, an aû dur dur a.
Chutah Marcus-a chuan hmelma lam pan chuan chak tak hian sakawr chu a tlan tir a, sipai ho te pawh chuan au dur dur pah hian an zui ve nghal a.
Marcus-an a hma an hruai meuh chuan hmelma te chu leiah an tlu phawk phawk a, a êng duak duak hian a hriat, Sipai ho te pawh chuan Marcus-a hnung chu an zui zo ngang mai, ram dang sipai, anmahni pui tur a lo kal te pawh chuan an rawn țanpui thuai a.
Eastland khaw lam ațangin General Ajax-a leh a sipai ten an rawn bei bawk a, ruang chaicheh an thlak ani ber e.
Zanlai thleng dawn a anin beih meuh chuan Goth- sipai ho te chu an thi zo teuh tawh hle a, hmun li a țhen a hmun khat vel chu an in pe tawh in, an in pêk belh zel a, chutah mahni sahimna zawnga kawimaw lai a lo relhru an awm bawk nen.
Tichuan dawi thiltihtheihna avanga an phuba lâkna, indona rapthlak tak mai sawhkhâwk/ vawihnihna (epigoni) ah chuan Huaisen leh tumruh tak a an beihna avang in hnehna chu an chang thei ta hram a.
(end chapter 16)
Comments
Post a Comment