Reife a hmazâwn a ramngaw chhah tak Brocéliande a thlir vung vung hnu chuan Marcus-a chuan Pegasus chu a thlawh chhuah tîr ta a.
Van chung sang tak a an thlawh chhoh vung vung hnu chuan hnuailam ah a bir thla leh vang vang a, an hma lam pan chuan chak tak in a thlawk zui leh ta a.
A thlawh chak em a vangin reilo te an chu Brocéliande ngaw chhah tak chu an thleng ta dêr a. A chungzâwn boruak a vawi eng emaw zat a thlawh kual pup pup hnu chuan ngaw chhung ah chuan thlâwk lût in lei ah chuan muangchang hian an țum ta a.
Chu ngaw chhung chu a phui țha mup mup kher mai, thingkung te chu an sâng in an buk hlawm hle a, ni pawh in a chhun tlang thei meuh lo, chuvang chuan a thim deuh khup a, mahse ni zung ina a rawn chhun tlangna lai chu a êng in a mawi danglam hle a, chu loh ah chu ngaw chhung boruak chu a nuam in a hahdam thlak ngawih ngawih a, boruak ah chuan thil rimtui tak, eng emaw sawifiah theih siloh hi a lêng vêl ni maiin a hriat.
Chuti chuan Pegasus chu muangchang hian a kal tir a, amah chu a hawi kual vêl ruai mai bawk a.
Nilêng in chu ram ngaw chhungah chuan a vâk a, Dawithiam Merlin- awmna leh chênna tur âwm ang chu a zawng char char a, mahse a hmu zo chuang lo.
Chu ngawpui chu a zau em em lo na a, a mak ani ringawt.
Hmalam pana a kal char char pawh chuan a chhuahna ngai bawk ah hian a thleng leh hlawl țhin a, chutianga vawi engemaw zat a chhuahna ngai hlir a a chhuah hnu chuan Marcus-a pawh chu a mangang țan hle tih chu hai rual ani tawh lo.
Ni lah chu khawthlang lamah a her liam dawn ruai tawh mai si a, ngaw chhung phei chu a thim tawh ang reng fu mai lehnghal.
Chutianga beidawng tawh tak chunga a kal zel lai chuan a sir lawk a hnimbuk vel chu a lo ri sun sun a, a che leh laih țhin a, chu thâwm a hriat veleh chuan Pegasus chu a din tir nghal vat a, thâwm lo chhuahna lampang chu ngawi reng hian a en kar a, hnim chu hmalam pan hian a ri phei zel a, Marcus-a pawh chuan zawi muanga Pegasus chu kal tir in fimkhur tak hian a zui ve zel a,
chutiang a thui fe a zui hnu chuan a chu hnim kar ațang chuan Sazuk lian deuh mai hi alo chhuak hlawl a.
Chu sazuk chu a var hlang hlak ani a, A ki hreû te chu a ropuiin a mawi hle a, a ki leh ki inkâr ah chuan chhimbal ang deuh hi a zâm paw chiai mai lehnghal.
A chungah chuan nula tleirawl tê ang mai, vûr ang mai a vâr leh thianghlim tak mai hi a țhu a, chu nula chuan a rawn la nuih sen sen mai lehnghal a.
Kawr fual nalh tak, rawng paw dal lam deuh leh thianghlim tak mai hi a ha a, a lû ah chuan Lukhum ang deuh hian pangpar nalh tak mai, pâr kual hi a khim a, a sam chu a dum tle siau mai lehnghal.
Marcus-a a hmuh chuan a nuih sen sen a, muangchang hian hnim kâr ah chuan an kalbo leh ta a.
A thil hmuh chu mak a tih hmel ngei mai, a mit pawh laksawn nachang a hre lo, chechang lo hian a thlir reng a, hnim kar a an kal liam thleng chuan a thlir zui vawng vawng a.
Chutianga reife an kal liam na lam a thlir vung vung hnu chuan harh chhuak ta thut ang mai hian a phu zuk a, a in thing nawk nawk a, chak tak mai hian nula i leh a phurtu sazuk kal na lam ah chuan Pegasus chu a khalh phei hnuhnawh ta vut vut a.
Thuife a umzui hnu pawh chuan an hnuhma reng reng a hmu zo lo.
A hmuh țanna ah te chuan an tlân lêt leh țhin a, mahse awmzia a awm chuang lo.
A mitthla anih loh pawh in chulai hmun zîmte ah chuan an thâmral ta ani ngei ang.
Ni a tlâkna pawh dâr chanve emaw lai ani tawh, Marcus-a pawh chu a beidawng thawkhat tawh aniang, sakawr ațang chuan a chhuk a, thing kung lian tak mai hnuai ah hian chauh hmel deuh mai hian a țhu hnawk a.
Eng emaw ngaihtuah rûn rûn chung a reife a țhut hnu chuan a tho lawk a, a bul hnai vel a thingțang chu a fawmkhawm chung chung a, chutah meipui lian tak hi a chhêm hluah a, a sahrang pai lian tak chu meiah chuan rawh in a khel nuau nuau a,
chutianga meipui bula reife a țhut hnu chuan a puan lianvaklo pai chu thing bul hnuaiah chuan phah in a mu zui ta nghal a.
Pegasus pawh chu meipui bulah chuan a bawk ve ta hle hle a.
A chauh tawngkhawng em avangin reilo te ah a muhil nghal vat a, mahse khawfing chah hma deuh hian,
"Marcus, Marcus" ti a amah koh na ri chuan a ti harh zawk a.
Rang tak in a tho vat a, thâwmlo chhuahna lam zâwng chuan a hawi kual vel ruai a.
Mahse chutia a thawh veleh chuan aw chu a reh leh nghal daih a.
Thâwm ngaithla kar chunga a bul vel a hnim pik tak tak te a melh kual dan dan lai chuan hmeichhe aw nalh tak hian a hming chuan a rawn ko leh a.
A awmna chunglam chu niin a hria a, mahse a zawn vak hnu pawh chuan a mah tak a hmu theilo, a chângin a bul vel hnimkâr ațnga rawn ri chhuak ni mai âwm te hian a hriat a, a chângin hmeichhe hlim tak a nui ri har har mai te chu alo ri a.
Chutih lai mek chuan chu lai hmun boruak chu a rimtui veng veng a, boruak ah chuan rimtui chu a zâm vel chiai chiai ni ber in a hriat.
Chu aw lo chhuahna lai tak chu a hre theilo, zan thlifim vel ina a chhêm darh ang mai hian boruak ah chuan chu aw chu a thâm vel a, mahse reilo te an a ri zâwi telh telh a, a hla telh telh a, boruak a thâmral ang mai hian a reh ta riai riai a.
A ngaih ațha thei chuang lova, a meichhêm thi țhap tawh chu nasa tak mai hian a chhêm alh leh a, chutah rilru nawmloh hmel zet hian a mu leh ta a.
Mahse rei pawh a mu hman em em lo, a muthilh dawn vel lai mêk chuan a bul lawk a Pegasus chu a rawn rûmchhuak thut a, a thla ala zâp ri vak vak zui lehnghal.
Rang tak hian Marcus-a chu a tho vat a, a meituah pawh chu alo la thi lo mai nilovin, alo la alh țha hle a, Pegasus lam an hawi chuan, an piah lawk ah hian Putar hmuihmul leh khabe hmul vâr vek tawh mai leh sei tak, dawithiam kawrfual ang chi rawng thim lam pang ha, a kut lehlam a uluk tak leh abîk tak a siam niawm tak, thing chang chi tiang sei tak keng hi a lo ding rûn a, Pegasus chu uluk fahran mai hian alo thlir vung vung a.
Chutia Marcus-a arawn thawh chhuah tâkah chuan a in her vut a, muangchang hian a kal ta a.
Marcus-a chuan a ma hriat tawk lek hian,
"Emrys" a ti sep a.
Chutia a sawi rual chiah chuan chu putar chu a ding chawt a.
Muangchang hian a rawn inher a,
Marcus-a chu chiang em em mai hian a rawn melh a.
Chu putar mitmeng fiah kâk mai ina a rawn melh chuan Marcus-a chu a zâm chhe titih der mai a,
chu putar hmuihmul leh khabe hmul țuak vâr vek tawh chu a lan dan ang ngawt chu anih loh hmel hle mai.
A mitmeng fiah leh zahawm tak chuan a rilru leh ngaihtuahna zawng zawng chu rawn hmu tlang vek ni hial in a hria.
Chu putar chuan zawi fahran hian,
" min ko a maw? Tunge inih?" a ti a.
A hamhai em avang chuan chhân lawkna chang pawh a hre lo,
eng emaw boruak chhah tak hian a bawh ni mai hian a in hria a.
" ka pu, Emrys-ini ti raw?" aw khûr deuh dar dar hian a ti chhuak thei țâwk a,
chu putar vek chuan,
" ka hming hi khawi ațanga hria nge inih? Engti tur in nge helai hmunah hian ilo kal?" vin aw lek lek hian a ti leh a.
Chutia a sawi pah chuan muangchang hian a rawn pan chhut chhut a.
" ka pu, Camelot Lal Arthur Pendragon-an min rawn tir a ni, Excalibur chemte la tur in ram hla tak ațangin ka lo kal a, Dawithiam ropui Emrys-chauh in Excalibur awmna a hria a ti a," tiin Marcus-a chuan a chhang leh a.
Chutia a sawi lai te pawh chuan chianglo ruai in a awm a, a mitmeng te chu a dulin mumang ang ruai in engkim mai chu a hria ni awm tak ani.
Chu putar chuan a bul alo thlen chuan Marcus-a chu a hma ah chuan zawi tak mai hian a țhingțhi hnawk a, a lû chu zawi tak mai hian a kun nghiai a.
" Dawithiam ropui ber leh Dragon Lalpa chu nangmah ngei hi ini tih ka hria e," fiahlo ruai hian a ti a.
Chu putar chuan Marcus-a lu chung ah chuan kut a nghat a.
" ka hria che, i pian hma khan ka hre tawh che asin," zaidam tak mai hian a ti a. Muangchang hian Marcus-a chu a kaitho a.
" Baculla Lal Alpheus-a fapa ini," an tih zawm a.
Chutih lai chuan Marcus-a pawh chu a harh tawh in, a pangngai hmel leh ta deuh a.
" engkim ihria tih ka thinlung hian min hrilh ani, helai hmun a ka lo awmna chhan pawh," tiin Marcus-a chuan a chhang a.
Chu putar chu a in her vut a, zawi fahran mai hian,
" min zui rawh," a ti a.
A mah chu a kal nghal a, Marcus-a pawh chuan a puan phah te dahțha sawk sawk in, Pegasus- chu a kâi a, hmanhmawh tak hian chu putar chu a ûm ta dawt dawt a.
Hetih lai hian khua a vâr țan vel mek a, leilung pawh a lang fiah țan tawh a.
Chutia an in zui chhûng chuan vawikhatmah an in be lova, ding lah an ding khawmuang hek lo, chak fahranlo hian an kal char char ani ber mai.
Zing ni chhuak in a ngaw chhung a rawn ên țan lai vel chuan thingkung lian em em mai, a zâr ațanga a zung uai fur mai leh lei a in phun lût fur mai, hnah nei manglo bulah hian an pahnih chuan an ding vang vanga.
Chutah chu putar chuan chu thingkung chu ava hnaih chilh a, engemaw ni tawi te, dawihla ang chi hi a chham a, chutia tihmêk lai chuan mak tak maiin chu thing lian tak kûng chu kawngkhar ang mai hian alo in hawng anih chu.
Marcus-a chuan mak tih hmel tak hian a en hau a, chutah a bul vel chu an en kual a, mak a tih hmel leh zual hian a hriat.
Ni e, chulai hmun ah chuan a hma ni lawk khan a kal a, vawikhat mai pawh ni lo, vawi sâwm dawn lai a kal anih kha.
Chulai hmun ah ngei chuan Sazuk vâr mak deuh mai, nula phur tu kha a hmu ani si a.
Mahse tuna thing lian tak hi a hmu reng reng silo.
Chutiang a a hawikual vel lai chuan chu thing chhungah chuan putar chu alo lûtdaih tawh a.
Hmanhmawh tak in Pegasus pawh ngaihtuah tawh lo chuan putar luhna ah chuan a lut ve ta a.
A chhûng alut chu mak a ti ngei mai, a ka hau ringawt a, pawn lam ațanga a en ang ngawt chu alo nilo nasa mai.
Chu thing chhûng chu a mum pul mai a, rin ai daih in alo lian a, putar chauh awmna anglo tak hian a fel fai thlup a, mahse bungrua em em chu a awm hran lo, dawhkan leh țhutthleng te, leh inchhung bungrua hrim hrim chu thing ațang vek a siam ani a, chu putar chuan kil khat ah hian dawhkan te chung ah hian lehkhabu hlai deuh mai leh chhah pui mai ah hian thil alo ziak mawlh mawlh a, Marcus-a lo lût pawh chu alo ngaihsak hran lo.
Chutah chu putar ep chiah thing țhutthleng ah chuan țhuthmun a rem ve a,
" Arthur Pendragon chu i va hmu a maw? Eng ang mi nge anih?" tiin a thil ziah lai chawl chuanglo chuan Putar Merlin-a chuan a zâwt a.
Marcus-a chuan rang fahran hian,
" Lal Ropui tak ani," alo ti vat a.
Merlin vek chuan,
" Ni e, Lal ropui tak ani, Pasalțha huaisen tak pawh ani bawk," a ti leh a.
" Pasalțha?"
" ni e, Pasaltha huaisen leh chak tak ani asin,
a lo pian tirh hian anu Lady Igraine-i chu a boral a, chuan Arthur-a chu ka la a, lo neitu leh Pasalțha ni bawk Sir Ector-a hnenah hnutchhiah in, Sir Ector-a hian fa ang maiin a enkawl seilian a, kum tam tak hnu ah Lal Uther Pendragon- chu a boral a, mahse a khaw mipui ten fapa a nei tih an hriatloh avangin leh Arthur-a ka lâk avangin Camelot chuan hun enge maw chen chu Lal an nei lova, mahse he i chem rawn zawn, Excalibur- hi lungpui lian tak ah ka vit phun a, tichuan khaw mipui te hnenah chuan, he lungpui ațanga chem hi phawi chhuak thei chu Lal fapa ani anga, Camelot- lal ah a țhu ang tiin ka sawi a, chuan mi tam tak, pasalțha hmingthang leh chak tak tak te chuan phawi an tum a, mahse Arthur-a chauh hian a phawi chhuak thei a, tichuan Camelot Lal ah a țhu ta ani," a ti a, reilo te an chawlh det hnu chuan, " Pasalțha leh Lal fapa inih avangin, Lal Arthur-a chuan khualțha angin a lo thleng ngei ang che a, a rorelna pindan ah pawh i lût ngei ang ti raw?" a tih zawm leh a, Rang fe hian Marcus-a chu alo bu zauh a, Merlin- vêk chuan, " Chuti anih chuan thing dawhkan bial, ('round table') pawh i hmu ngei ang, kha dawhkan bial kha in tluktlanna dawhkan anih kha," ati a. ( hmanlai chuan Lal rorelna leh chaw eina dawhkan te hi a dung sei tak ani țhin a, a kil tâwp ah hian Lal ber chu a țhu țhin a, midang tan țhut ve a thianglo, Lal chauh a țhu thiang țhin. CR) ." Arthur- lo pian hma in kha dawhkan bial kha ka lo siam lawk tawh a, tuna thil thleng tur hi ka lo hmu lawk vek tawh asin" a ti a. Dawithiam ropui Merlin hi, 'Princess of Dyfed' fapa ani a, a nu, Lal fanu hian ramhuai tlangval ngâiin, Merlin-a hi alo piang a, a nausen lai ațang tawh in dâwi ropui tak tak alo ti tawh țhin ani, tin, dawithiam bâkah zâwlnei ani bawk a, hrilhlawkna tam tak a puang țhin bawk. Tun hma kum tam tak kal ta a Arthur-a pian hma leh Arthur-a pa Lal Uther Pendragon-a rorel lai khan Ireland ram ah lung lian leh mak tak mai a awm a, chu chu 'Chorea Gigantum' tiin a hming an vuah a, 'The Giant Ring' tiin an sawi bawk țhin. Chu lung chu Lal Uther Pendragon chuan England ramah dawithiam Merlin-a chu a sawn tir a. Chuan boruak ah a dawi hmangin a thlawh chhuah tir a, England ramah dah in, tun thleng hian ala awm ta char char a, 'Stonehenge' tiin kanlo hre lar ta zawk ani. Chutia sawi pah chuan a lehkhabu hlâi tak chu a khup thawk a, A țhutna ațang chuan thovin thing thlêng dar pakhat, theirah eng eng emaw awmna hi a la a, Marcus-a hma ah chuan a chhawp a, savun uain ip lianvak lo chu la leh in no khat pum hian Marcus-a chu a thlit sak leh a. " ka fapa, In ei puar la, chuan kan kal chhuak dawn nia, i ram in a mamawh che ani," a ti a, pawn lamah a chhuak ta daih a. Rilțam hmêl tak hian Marcus-a chuan a ei bawrh bawrh a. A ei zawh hnu chuan uain thlit sa chu a tlâk pawp a, in chhunga tui ah chuan a in sil thuak thuak a. Chutih lai chuan dawithiam Merlin chu alo lút a, dragon te tak te, avâr hlang hlak hi alo pawm lut a, duat hmel deuh hian a chûl hluau hluau reng a, Marcus-a chuan dragon chu mak a tih hmel hle a, che chang lo hian a en vung vung a, chutah dawithiam Merlin-chuan, " he dragon hi a hming chu Aithusa ani a,' Tomb of Ashkahar' a mi ka lak, a tui ka keu tir anih hi," a ti a, chutia sawi pah chuan chu dragon vâr tereuhte chu lei ah dah thla in a che vel hmuhnawm tih hmel deuh a thlir dauh dauh pah leh Marcus-a pawh en chuang lo chuan, " I hman tawh chuan kan kal chhuak dawn em ni? He Excalibur- kawltu hnenah hian kan kal vat angai ani, Brocéliande- ngaw chhûng ah tho hian ania a awm, a hla em em lo," a ti a, chutia a sawi zawh chuan a in her vut a, pawnlam ah chuan a chhuak leh nghal daih a. Dragon en vung vung chung chuan muangchang hian Marcus-a pawh chuan zui chhuak ve a. Pegasus bulah chuan Dawithiam Merlin- chu alo ding rûn a, uluk tak hian Pegasus chu a thlir vung vung a, mak ala tih hmel hle tho mai. An lam pana Marcus-a alo phei chuan Merlin chuan, " hetah hian chuang ila, kan thleng hma deuh ang," alo ti a. Marcus-a chuan, " aw le" a ti a, Pegasus lû ah chuan an chul thuak thuak a, a chungah chuan lâwnkai in, an thlâwk chhuak ta nghal a. Van boruak sang lam pan chuan an thlawk chhuak a, Brocéliande - ngaw chhah pui leh mawi tak chu thlawh khum in boruak ah chuan an lêng ta delh delh a. Ni chu a tlangsang viau tawh a, fehreh san hun bawr vel ani tawh ang. Dawithiam Merlin-a sawina lampang zel a thlâwk in, Dar chanve emaw vel lai an thlawh hnu chuan thlawk hniam telh telh in, ngaw chhung lam ah an thlawk lut leh ta a. Leia an țum hnu chuan Pegasus chu Marcus-a chuan a kai a, Dawithiam Merlin-a chu an zui dûn det det a. Reivak lo chutiang a ngaw chhunga an kal hnu chuan phûl hmun zau vaklo awmna ah hian an chhuak hlawl a. Chu phul hmun piah lawk ah chuan lui zau deuh mai hi alo awm a, a tui chu a thianghlim in a fîm kâk a, sangha chi hrang hrang, mawi tak tak hi tui chhung ah chuan lungkham neilo lek hian hlim tak in an lo leng suau suau hlawm a. Ngawi renga chu tui kam an din reng hnu chuan Dawithiam Merlin- chuan zawi sap hian, " He lui hi Barenton chu ani e, helai hmun ah hian Excalibur- chu a awm ani," a ti a. Marcus-a chuan angaihna hriat loh hmel deuh hian, " tui ah hian maw? Engtin nge ka lâk theih ang?" a ti he haw a. Marcus-a lam chu hawiin, " Sir Marcus Valerious, Ni e, he tui chhung ah hian i thil duh chu a awm ani, he lui enkawltu nymph, Nimue-i, 'lady of the lake' in a kawl ani, i lâk ngei ngei angai a, mahse chu chu i finna hmang in," a ti a. Marcus-a chuan, " engtin nge? Engtia tih tur nge? Khawngaihin?" a ti hu a, a ngên ni mai zawk hian a hriat. Merlin-chuan, " ka lo in rawlh ve a thiang tawh lo, mahse helai hmun ah hian zan i riah ngei chu a ngai ani, chuti lo chuan i la thei lovang," chutia a sawi zawh chuan lui lam chu a thlir leh vung vung a, reilo te hnu ah chuan, " Nimue-i chuan a pe ngei ang che tih ka ring tlat, mahse a mah chu i hmu kher lo mai thei bawk, eng pawh ni se, ka kalsan phawt che hi angai ani." a tih zawm a. Hrilhhai tak a Marcus-a ding chu muangchang hian a kalsan a, reilo te an ramhnuai ngaw chhûngah chuan a lût bo ta a. (Dâwithiam Merlin- hi mihring chanvo rêltu hrillawktu thlarau țha ten he Tuipui Lasi Nimue- i zâi ngaithla lo turin anti a, a chhan chu Nimue-i aw mawi tak hian a âwi mu ang a, chatuan atana tho tawhlo tura a mut hlen dawn vâng ani, chu chu Merlin- pawh hian a gre reng a, mahse a țhian țha ber zîng ami anih vang hian invêng zo lo in a tâwpah chuan Nimue-i hian a aw mawi tak hian a âwi mu ta nge nge anih kha. Tuipui Lasi Nimue-i hi Siren- antih ho te zînga mi kha ania, Siren ho hian aw mai tak annei a, an zâi rî hriat chuan mihring rilru a buai vek a, anmahni leh an mahni pawh an in theihnghilh a, an zâi mawi tak mai chu ngaihthlak lehzel an duh a, tichuan an aw mawi tak chuan an lo âwi hlum țhin. CR) Chutia Dawithiam Merlin-an a a kalsan hnu pawh chuan reife chu chesawn lo hian a dinna ngai ah a ding reng a, Merlin-a kal liamna hnu chu a thlîr zui vawng vawng a, chutah a hmazawn a lui zau tak mai chu an thlir leh vawng vawng a. Rilru hah hmel deuh hian a thaw ri hrâwk a, chutah ngaw tawntirh lamah chuan pheiin thing bul lian tak nghêng hian a țhu hnawk a. Rilru hah leh chauh hmel deuh hian lui lam chu a thlîr zui leh vawng vawng a. Chutia a țhu chu reilo te an a alo muhil a, Pegasus pawh chu a bul lawk ah chuan a bawk ve hle hle a. A chau tawngkhwng tawh bawk aniang, khawthlang lam a ni a her liam dawn ruai vel ah a harh ve chauh a, a rawn meng ruai ruai a, mahse a che sawn chuang lo, a hma zawn lui piah a tlâng sâng tak, ni tla tur ina a chhîp leh apang vel a chhun êng phût mai te chu hmuhnawm tih hmel tak hian a thlir dauh dauh a. A pian leh mûrna Greek ram a Thitheilo Pathiante chenna, lirnghing pawh ina a tih chêt theih loh leh engtiklai pawh a chhûm ina a chhîp a bawh chuai reng mai Olympus tlâng nen a tehkhin nimai awm hian alang. Chubâk ah Ni tla tur ina a hma zawn a Barenton- tuipui zau leh thianghlim tak a chhun tle sep sep mai te pawh chu a mawiin a awmna hmun nen chuan a in hmeh hliah hliah a, lung hi a ti leng vawng vawng thei hial ani. Chutianga reife a țhut veng veng hnu chuan a rilru hah hmel deuh hian a rûm ri hráwk a, muangchang a tho in a zi mar a, a ngûmhnam nalh tak chu phawiin a hnung ngaw chhûng lamah chuan a kal ta daih a. Reilo te ah chu ngaw chhung ațang chuan thing bung tam deuh hi a rawn pawm chhuak țûn a, a hma a ațhutna bulah khan anghat a, hmanhmawh tak a tuah in meipui a chhep hluah a. A bula ngaihngam tak a mu Pegasus chung a a thil pai te chu a phawrh sawt sawt a, sahrang lian tak mai leh savun uain ip lian vaklo hi a rawn phawrh a, chu sahrang chu meipui ah chuan hem in, uain pawh chu tlem tlem in a in sek sek a. Khua pawh a thim chiang in Zanlam rorel tu Chhawrthlapui pawh van chung sâng tak ah chuan a rawn tawlh chhuak ruau ruau a. Arsi te pawh an rawn lang țan ta mek bawk a. Chu arkaiden zan chuan a awmna vel leh a hma zawn a Barenton- tuipui te chu a ropuina chuan a chhun paw riai a. A chung zawn a Thla eng bial kulh mai thlir reng pah chuan a bân dinglam chu chunglam ah muangchang hian a phar chhuak a, chutah uain chu tlem leihbua in zawite hian a phun sep sep a, Thla Pathiannu Selene-i hnen ah a țawngțai ani ngei ang. chutia a tih zawh chuan a puan lum hmel vak loh chu phah in mumang khawvel a cheng tur in a mu ta a. (Greek ho chuan Thla khi Selene-i, Thla Pathiannu in a Sakawr tawlailir a khawthim rual a rawn hnuk chhuak țhin ah an ngai a, Tin, Thla Pathiannu(goddess of moon) Selene-i hi Pathian chungnung ber Zeus-a pa Titan Cronos-a unau Titan Hyperion leh a unaunu Theia- te fa ani a, Chuan Selene i hian unaupa anei a, chu chu Ni Pathian Helios-a ani a, Troy khawpui do na a tel leh Troy khawpui tlûkchhiat na, Sakawr lim lianpui mai Greek ho ten a an siam ngaihtuah chhuak tu Ithaca Lal Odysseus-a leh a hote haw lam in Helios-a bawng rual tam tak an tihhlum avangin Helios-a hian Odysseus-a te hi a hrem a, tuipui ah a vahvaih tir hrep anih kha. Tin Selene-i hian unaunu anei bawk a, chu chu Eos-i ani a, Vârțian Pathiannu ani. Eos-i hian Pasal ah Trojan Lal Laomedon-a leh tuipui Lasi Strymo-i te fapa Tithonus-a anei a, Chuan fapa huaisen tak Troy indona a Greek pasalțha huaisen leh hmingthang ber Myrmidon Lal Peleus-a leh tuipui Lasi Thetis-i te fapa Achilles-ana a thah tâk milian Ethopian Lal Memnon-a kha an nei ani. CR) Chutia Marcus-a mu ta chu reilo te an a muhil nghal a.
Chutia tuitak a a muhil ta chu zanlai bawr vel ah hian eng in emaw a rawn ti harh zawk a, a han men chuan a piah lawk ah hian sakawr vâr thianghlim em em mai hi alo ding reng a.
A bul a bawk Pegasus chu an thlek a, mahse a chhawr rim bawk aniang, tui hmel tak hian alo la muhil bawrh bawrh a.
Pegasus pawh a harh loh avang chuan mak a tih hmel kher mai.
Chu a hma lawk a sakawr vâr chungah chuan nula tleirawltê hmel pu, kawr fual var thianghlim deuh mai, pangpar chi hrang hranga chei ha hi a chuang a, hlim hmel deuh hian Marcus-a chu a rawn nuih sen sen a.
A mah chu a êng deuh phût in a hriat.
Muangchang hian Marcus-a chu a tho ruai ruai a, chu nu pawh chuan a sakawr chu Marcus-a lamah chuan a rawn kal tîr bek bek a. Marcus-a bul a rawn thlen chuan,
" Sir Marcus Valerious, helai Brocéliande ngaw chhûng a chêng hi ka nia, ka hming chu Phoebi- ani e,Dawithiam ropui Emrys-a țhian, min hlau suh, nangmah țanpui tur che a lo kal ka ni e," a ti a.
Marcus-a chuan hrilhhai hmel deuh hian,
" Forest Nymph, Brocéliande Nymph maw?" a ti hu a.
Chu nu chuan nuih sen sen pah hian,
" aw ni e, Sir Marcus Valerious," a ti a, an piah lawk a Barenton- tuipui mawi tak mai lam chu a hawi zui a, zawi te hian,
" Wizard Emrys-a dâwi chem Excalibur- la tûrin ilo kal tih ka hria alawm, mahse engtin nge i hmuh ang a, engtin nge i lâk ang tih ihre lo ani ti raw?" a ti a,
chutia a sawi lai chuan chu nu bulah chuan Marcus-a chu kal hnai in, an pahnih chuan Barenton- tuipui mawi tak chu an thlîr dun vawng vawng a.
" aw, Dawithiam Merlin chuan he tuipui chhûngah hian a awm tih min hrilh a ni." tiin zawi sap hian Marcus-a chuan a chhâng a.
Chutah chu Lasi nula Phoebi- chuan,
" Sir Marcus Valerious, He tuipui chhûngah hian a awm ngei alawm, he tuipui a chêng Nimue- in a kawl a, chu chu ilak angai ani, Sir Marcus Valerious, ngun tak in lo ngaithla teh, a hmasa ber ah chuan thing lawng emaw, he tuipui chunga i chuan theihna tur khawp enge maw i siam tur ani, chuan Vân chung sâng taka Thla dinglam deuh a Arsi lian bik pathum te khi a in zâwn a an awm hun ah tuipui lai velah sawn Excalibur chu alo lang ang a, mahse rang takin ila vat tur ani, achhan chu Arsi te khi a inzâwn in an awm rei dawn lova, a in zâwn a an awm lai chhung chauh tuipui chungah chuan alo lang ang, chuvangin tuipui i kâina tur chu siam vat vat rawh, i vannei hle ani, naktuk khawvar hma in khi arsi te khi an in zâwn dawn." a ti a.
Marcus-a chuan chhan pawh a chhâng lawk lo, ngun tak in tuipui chu a thlîr vung vung a, reife hnu ah chuan " i chungah ka lawm hle ani," tih leh abula nymph Phoebi- lam chu hawi a rual a.
Mahse alo awm tawh reng reng lo, a phu zawk a, an hawikual vel a, mahse a hnuhma reng reng hmuh tur a awm lo, a kalsawn lai pawh a hre silo a, chutia a bo thut chu mak a ti in ngaw chhunglam ah te chuan a zawng kual a, mahse hmuh tur reng reng a awm tawh lo.
Rei fe chhûng ngaw hnuai ah chuan akal kual a, mahse chu Nymph tleirâwl te emaw, a sakawr hnuhma emaw pawh a hmuh zawh ngang tâk loh avang chuan tuipui kam lamah chuan beidawn hmel deuh hian a rawn lêt leh hnû hnû a.
Vân chung sâng lam a hawi chhoh chuan Arsi lian bik pathum te kha tlêm in an awm sawn deuh tih a hmu a, chu veleh a ngûnhnam chu phawiin ngaw chhûng lamah bawk chuan a tlân lût leh thuai a, thing bân puam tiat vel tur hi pasarih vel sei deuh deuh hi a va sat sawk sawk a, rang tak a tuipui hnaih lam a hnuk pheiin a tan tawi leh a, chutah ramhrui a țawn khawm leh zung zung in, tuipui ah chuan a hnûk thla a,
tuipui chungah chuan zawi muang in a khalh lut a, chutah a chung zawn a Arsi pathum te in zawn hun nghak in muangchangin tuipui lai lam pan chuan a in khalh chhuak ta ruai ruai a.
Dar chanve emaw vel a ral meuh chuan a thleng thui tawh in, van chung lam chu a thlir dauh dauh reng a.
Chutah Arsi te chu an in zawn ta chiah mai.
Rang deuh in tuipui lam chu a hawi nghal vat a, rang tak tak a hawi kual in a zawng vêl ruai a.
Chutih lai mek chuan a awmna tuipui chu nasa vaklo hian a rawn fâwn deuh burh burh a, chutah a hmâ lawk tuipui chhûng chu a rawn êng deuh ruai ruai a,
thli lah chu a thaw deuh vuk vuk mai lehnghal.
Tuipui chhûng êng chu rawn êng chho telh telh in, a pawnlâng telh telh a, chutah Excalibur- chu a rawn lang chhuak ta.
A hma deuh lawk ah chuan chemte nalh em em mai, êng phût mai hi kut zungțang no tak mai, tuipui chhûng ațanga bân puam thleng chauh rawn lawr hian hian a rawn lek chhuak anih chu.
Chutia a hmuh veleh chuan a biling a balangin a in kar phei sawk sawk a, a bul a thlen pawh chuan lâk mai nachang a hre lo hial(!) a ên phût vang leh a mawi êm avangin a en țha ngam lo a, a thaw te chu chham dawn maiin a hria.
Chutah in thing harh in thâwk te a la te te a, kut khûr dar dar chung a ban in, chu Excalibur- dâwi chemte ngei mai chu ala ta.
A lâk veleh chuan chu chem kengtu kut bâwr pawh chu rang tak hian tuipui chhûng lamah a pilbo lehnghal a. ani lah chu vaukam lam ah a in kar phei leh thuai thuai a.
A thing lawng pawh chu a ngaihsak tawh lo, vaukam a thlen hma deuh chuan tui ah chuan a zuangthla bawrh a, a khûp thleng vel a tui chu dâiin vaukam ah chuan a kal kai a.
Chu Chem êng phût mai chu an vai vel a, mak ti tak hian a en leh vung vung țhin a, naupang chhia ang maiin a nui vur vur reng mai.
" Sir Marcus Valerious "
a hnung tuipui lam ațang chuan hmeichhe aw nalh tak mai hian a rawn ko a.
Mak tih hmel deuh a muangchang a an hawi let chuan, chu tuipui chin chiah si, vaukam hrûl ah chuan hmeichhe hmelțha em em mai, kawrfual pan tak, rawng pâwl lam lek lek thianghlim tak mai, tuikeplung leh lunghlu a chei ha, a sam a tui pangpar pâr mawi tak khim hi alo ding reng a, a mitmu hring nghalh mai leh thianglim tak chuan Marcus- chu a en kalh a.
A ên deuh phût avangin Marcus-a chuan mak a tih hmel lehzual in a hrilhhai hmel hle a,
chu nu chuan,
" Sir Marcus Valerious, Excalibur kawl tu he tuipui Barenton enkawltu Nimue-i ka ni e," a ti a.
Chu veleh Marcus-a chu rang tak hian a țhingțhi nghal a.
Nymph Nimue-i vêk chuan,
" kha chem khan chakna a pe ngei ang che, i thiltih tur chu ka hria alawm, hnehna chu i chang ngei ang, Marcus Valerious, i ram in a mamawh che," a ti a.
Marcus-a chuan chhan tum in a ka a ang zuau a, mahse a țawng chhuah hma chuan Nimue-i chu boruak ah chu muangchang hian a thamral ta riai riai a.
Enge maw chen chu hrilhhai tak in a ding vung vung a,
reife hnu ah chuan a phu zuk a, chutah hmanhmawh tak in a in siamțha sawk sawk a, a sakawr Pegasus chung ah chuan lawnkai nghal vat in, chu Brocéliande- ngaw ropui leh mawi tak mai chu an thlawh chhuahsan zui nghal ta vang vang a.
Brocéliande- ngaw pui an chhuahsan lai khan khua ala thim in khawfing pawh ala chat lo kha ani a.
Hmanhmawh tak in chawl lovin an thlâwk char char a, Niin a vanlaizawl a thlen meuh chuan an thleng hla tawh kher mai.
Lei lam ah thlawk hniam in, tuikhawthla sâng tak mai bul lawk ah hian an zu țum a, chulai hmun ah chuan sangha anlo tam hle a, tui pawn lam ah chuan an rawn in perh chhuak zut zut reng a, a bul vel chu phul hmun deuh hi ani a, a ngaw pawh a pik em em hran lo, thing sang tak tak leh mawi tak tak hi a ding thluah a.
Marcus-a chuan thing sei tak mai hi suih zum in sangha chu eng emaw zat a chhun hlum a, vaukam lawk ah chuan thing tuah in a rêp thluah a.
Pegasus pawh chuan nuam a tih hmel hle mai, tuiah chuan a cheng bawrh bawrh a, a thla te chu ti pharh in a hrâm ruai ruai a.
Chutah tui khawhthla chung lam, lengkir chung ah chuan a thlawk chho duai duai a.
Marcus-a pawh chuan a savun ip a a uain pai nen chuan sangha chu a hmeh a, a ei zawh hnu chuan tui ah chuan lût in thlamuang leh muangchang tak hian a in phih fai a.
Chutia a in sil vel lai mek chuan a hnung ngaw chhung lam ah chuan thawm alo awm a.
Hawi pawh hawi let chuanglo chuan thawm chu an ngaithla chiang a, chutah thing hnah ro rap ri rep rep leh zawite a thaw ri deuh sûk sûk hi alo awm leh a.
Muangchanga a kâwnga a chem sei pai chu ban riai riai pah in a hawi let ruai ruai a.
A piah lawk ngaw chhûng leh chhunglo ah chuan sakawr chungchuang sawmkua(90) emaw vel lai tur hi thîr kawr leh savun ațnga siam awmphaw keng chung hian anlo ding far hlawm a, an sam chu a sei hlawm in, an hmuihmul leh khabe hmul te pawh chu a buk hlawm hle bawk a.
Chutah an thir lukhum chu a mak hlawm ngei mai, an hmai pawh a khuh lo, bawng ki ang mai hian an lukhum ah chuan ki ang tak mai pahnih hi ala awm vek zui hlawm lehnghal.
An palian hlawm hle a, an hmanrua leh hriamhrei te pawh chu a lian hlawm tho mai, a tam zawk chuan hrei lian pui pui leh rapthlak tak tak mai hi an kut lehlam in an hum fur hlawm bawk a.
Chutah țawng mak tak mai a in be zut zut in an sakawr ațang chuan an lo chhuk a, Marcus-a lam pan chuan panga(5) hi anlo phei chhut chhut a, an chemsei lian tak mai leh hrei rapthlak tak mai te chu inrin hmel tak mai hian an hûm rán mai bawk a.
Chu veleh Marcus-a chu vaukam lam ah chuan rang deuh a kal chho in țan hmun an rem a, a mah rawn pan tu palian tak tak panga, lukhum ki nei khum te chu thinrim hmel deuh deuh in țawng mak tak mai hian an phun mawlh mawlh a, ngaihnep hmel deuh hian Marcus-a chu an nuih vel ham ham a, chutah Marcus-a chuan a dawi chem Excalibur- ngei mai chu phawrh chhuak in, zei fahran mai hian an vai kual vel a.
Chûng alam pan a lo kal te chuan Excalibur- an hmuh chuan an ding chawt a, mak tih hmel deuh hian an in en hu hlawm a, an hnunga sipai dang te pawh chuan mak an tih hmel hle mai.
Marcus-an a Excalibur a vai kual vel chu che changlo hian an thlîr ringawt a, Excalibur lah chu a êng phût mai lehnghal, chubak ah Marcus-an a a vai kual vel chuan a phe ruai ruai a, chem tam tak ang mai hian alang phe ruai reng a.
Chutih lai mek chuan Pegasus chu Marcus-a bul ah chuan a rawn țum thut a. Chutah a thla ti pharh in ala hrâm ruai ruai zui lehnghal.
Chung sipai rual sakawr te chuan Pegasus chu an hlau hlawm hle a, an phit dut dut a, a țhen chu an lîm vak vak a, awmze nei lovin an tlân phut phut a, ngaw chhung lam ah te chuan an tlân chhe nual bawk a.
Sakawr mai nilo, sipai ho te ngei pawh chuan mak an tiin an hlauh hmel hlawm hle a, Pegasus lah a lian in an sakawr te chuan an tiat lo hlawm hle mai si a.
Marcus-a chu hlauh en hian an en hu tawh hlawm a, a Excalibur- êng phût mai leh Pegasus, sakawr thla nei chu mak tih hmel deuh hian an en tawn zak zak hlawm a, chutah țawng mak deuh deuh hian an in be sek sek hlawm lehnghal.
Marcus-a chuan chet an la ngam lo tih a hriat veleh Pegasus chungah chuan a lawn kai vat a, chuveleh sipai, amah rawn pan tu te kha rang deuh in an tlân kîr rawk rawk a.
Pegasus chuan a thla chu ti pharh in a vai thuak thuak a, rang deuh mai hian an thlâwk chhuak zui ta nghal a.
Van boruak ațanga hnuailam a zuk hawi chuan chûng sipai rual ho te chuan hmuhnawm thlir tak meuh meuh hian an lo thlir vung vung hlawm a.
Marcus-a chu ring tak mai hian a nui huah huah a, ring tak a " Pegasus " ti a an au vak chuan Pegasus- pawh chu a hlim ve aniang, a hrâm ve ruai ruai a, tichuan chak leh zual a thlâwk in Vân boruak sang tak ah a leng kual zuai zuai a, an ram Greek lam pan chuan an thlawk liam ta a.
. ..(End Chapter 15)..
Comments
Post a Comment