Engemaw chen khaw thlîr a a din vang vang hnu chuan khaw lam pan chuan Pegasus chu chak tak mai hian a tlan tir ta a. Kulh pawn ah chuan min anlo tam ve hle a, sakawr tawlailir hian țhenkhat chuan thing lian tak tak hi anlo phur a, thei leh thlai engemaw phur te, buhpâwl phur te leh eng eng emaw ti hian mipui ho chu anlo phe suau suau a. Sakawr thla nei anla hmuh ngailoh vang ani ngei ang, Marcus-a kal chu anlo hmu duh hle a, țhenkhat chuan an thiltih lai chawl meuh in anlo en hial anih chu. Kulh kawngkhar, thir phan lianpui chu alo in hawng ruau a. Chutah kulh kawngkhar bul a thlen chuan sipai lo awm te chuan anlo tiding a. Chung kulh vengtu sipai te pawh chuan mak an tih hmel hle mai, sakawr dum thla nei leh a chunga chuang, tlangval hmelțha tak mai, sipai thir kawr mawi leh tle sût mai ha chu mak tih hmel deuh hian an lo en vung vung hlawm a.
Marcus-a chuan chung sipai kawr hma a chhinchhiahna Dragon lem a hmuh takah chuan Camelot- sipai ngei annih a ring ta a. " tunge inih? Khawi ațanga lo kal nge inih?" tiin an hotu pa ber niawm tak chuan mak tih hmel tak a chhoh en ha chung hian anti fiak țhak a. Chutah Marcus-a chuan zawi fahran hian, " Greek- ram a5anga lo kal ka ni e, Baculla Lal Alpheus-a fapa Marcus Valerious- ka ni e," tiin a chhang a. Chutah sipai ho chu an enkual dan dan a, " Hemi khua hi Camelot- ani em? King Arthur Pendragon hmu tur in ka lo kal a," amah vek chuan an tih zawm lehnghal a. Sipai pakhat chuan ngaihsan hmel tak hian, " Pasalțha ini ngei ang maw? Ni e, Camelot khua anih hi, Lal ropui Uther Pendragon a fapa Arthur Pendragon-a lal ram chu," tiin alo chhang a. Chutia a sawi lai mek chuan an hotu pa ber niawm tak bawk chuan, " Lal Arthur- i hmuh duh chuan minlo zui rawh," a lo ti a. Sakawr ah hian a lawn zui nghal a.
Marcus-a pawh chuan zui ve zel in Lalin lam pan chuan khawchhung lamah chuan an tlan ta a. Arthur-a Lalin chu khaw chhung lun lai tak ah hian alo awm a, mual pawng deuh ah hian ropui tak mai hian alo ding luah mai a. Lalin vengtu sipai chu an tam ngei mai, a kawtzawl pawh chu uluk tak a ker ni mai awm hian lung lian tak tak hian bang ang maiin in alo in hung chhuak vek a. Chu mi luhna Gate lianpui mai, thing chang chi chhah tak mai ah chuan lut in Lalin kawtkai chu an thleng ta. An sakawr ațanga an chhuk chiah tih chuan sipai pakhat hian a rawn pan a, zahna chibai buka a kun zeuh hnu chuan, " in sakawr kha ka lo hruai ang e," a ti a. mahsela Pegasus- hrui a vuan chiah tih chuan Pegasus chu sakawr hel ang mai hian tal ta chiam a, a thla chu a zap ri hluau hluau bawk a, sipai pa chuan a hlau ngei mai, rang fahran hian hrui chu a thlah a, a per sawn nghal dawrh a. Chu veleh Marcus-a chuan hrui chu a man lehnghal vat a, engemaw hrilh ni awm tak hian Pegasus- beng bulah chuan zawite hian a phun sep sep a. Marcus-an a a man veleh chuan a thla zâp te chu a tawp nghal a, thuawih tak hian a awm leh ta daih a. An bul vel a sipai ho pawh chuan mak an tih hmel hle mai, phâwk hra hian anlo thlir țhup a. Chutah Marcus-a chuan sakawr enkawltu pa hnenah chuan, " a hlauhawm tawh loh ve," tiin Pegasus thlunna hrui chu a pe leh ta a. Mahse chu sipai chuan ala hlauh hmel tho mai, hrui chu Marcus-a chuan a kut chu chu sipai kut ah chuan a hmehbel chawt a. Tichuan ahruaitu pa sipai nen chuan Lalin chhung lam pan chuan an kal ta daih a.
Lal inchhung chu a ropui ngei mai, inchhung lam bang ah chuan sidar thing vek hi an hmang a, tukverh sâng tak tak ațang a Ni zung rawn in kâp lut chuan inchhung chu a ti ropui leh zual ngei mai, pindan pawn ta ber chu Office ang mai hian a awm a, miropui leh sipai lal hmel tak te hi anlo awm nuaih a, in chung lah chu an sang em em mai khawp a, inchhung a lo awm ho te chu an buai hmel hlawm hle a, a țhen in lehkha pawimawh niawm tak tak hi anlo ziak a, lehkhabu leh eng eng emaw hi boruak ah te chuan a thlawk nul nul reng bawk a. Marcus-a chuan mak ati ngei mai, hmuhnawm tih hmel tak hian a en vung vung hlawm a, chutah a hruaitu sipai chuan, " chunglam ah," a han ti a. Tichuan inchung lam panna kailawn zau tak mai ah chuan an inzui chho leh ta a. corridor thui zet mai ah hian an phei leh ta vang vang a. Chutia an phei lai te chuan Kawr mak pui pui leh ze mak tak tak ha hi an tawk sup sup reng a. Marcus-a chuan mak tiin a thlir zui vawng vawng zel a, chung ho pawh chuan an en let ve vung vung tho. A țhen chu putar pui pui khabe hmul sei tak leh hmuihmul sei tak nei te an ni a, a țhenkhat erawh chu an hmel pawh a hmuh theih loh, nge taksa an neilo hrim hrim zawk ni, kawrfual sei tak lukhum nena in zawm hi an ha a, an ke pawh a lang thei chuang lo, sailungvar chhuat ah chuan an kawr fual tak chu an hnûk dûl dûl a, an kal pawh in a hriat loh, an tleng ni mai hian a hriat, ațhen chu boruak ah ah hian an thlawk nul nul mai bawk a. chuta mak leh em em chu banga an milem tar leh thlalak in tar te chuan an rawn nuih anih chu. Chu mai pawh ala nilo cheu, chibai te an rawn buk a, a țhen chu banga thlalak intar dang ah te chuan an va kal vel anih chu. Chutah kalna sîr a tarmawi niawm tak, sipai thir thawmhnaw te chu ring tak tak hian an zai leh bul bul hlawm bawk a. Chutiang thil mak pui pui an kal pelh hnu chuan dinglam ah hian an peng leh a, a tawpah kailawn nalh em em mai hi alo awm leh a, chu kailawn ah chuan Lal puan ropui niawm tak, puansen leh hmul thup mai hi alo in phah zar mai a. Chutah chuan muangchang hian an han chho leh a. Chu kailawn an chhuak chho chiah tih chuan, an hma lawk ah hian pindan ropui leh mawi em em mai hi alo awm a, chu pindan zau pui mai chu a bial ani a. A chung chu a sâng hle a, a hmuh theihloh ani ber mai, a dum kûk a, arsi tam tak hi an phe sup sup reng bawk a. Mahse chu chu inchung tak tak pawh ani lo ang, dawi hmang a inchhung nen inrem tur a an siam niawm tak ani. Chu pindan chhung ah chuan milim lian tak tak, lung mawi leh rangkachak a siam te alo awm fur bawk a, mupui rangkachak rawng lian tak tak engemaw zat hi an thlawk kual vel reng mai bawk a. Chutianga reife pindan chhung a thlêk kual hnu chuan hmalam chu an en phei a, chutah thing chang chi a siam dawhkan uk deuh mai, lian tak leh bial pup mai hi sipai thirkawr mawi leh ropui tak tak ha hian anlo kil bial laih a. Chutia Marcus-a leh sipai pakhat lo kal an hmuh chuan chung sipai ho chu anlo hawi țhup hlawm a. Dâr chanve emaw lai chutianga ngawi renga an din reng hnu chuan chung dawhkhan kiltu ho zing a pakhat, rangkhachak leh lunghlu țha mi ațanga siam tih hriat ngawih ngawih Lal lukhum ropui leh mawi tak khum, thir kawr mawi tak mai leh a hma a rangkachak a luan Dragon lem in ziak, puan senduk bât, Thitheilo Pathian te ang mai a hmelțha leh zahawm hi alo ding chhuak a, a hmuihmul leh a khabe hmul tlemte awm chuan a ti zahawm hmel lehzual ngei mai. Chu pa chu muangchang hian an lam pan chuan alo phei chhut chhut a. Amah hruaitu sipai chuan Marcus-a chu kalsan in chu pa lo phei lam chu a pan san ta daih a. Chutah Lal emaw ni hma ah chuan a țhingțhi a, a lu chu a kun reng a. Aw khur dar dar hian, " Aw, Lal ropui leh engkim tithei, dam reng ang che," a ti a. Chutah reilo te a ngawi dat a. " Ram hla tak ațangin ka Lal leh engkim tithei, Arthur Ropui-a hmu tur in Lal fapa alo kal e," an tih zawm a. Chutia a sawi lai pawh chuan a hawi chhuak lo, ala kûn char char zuk nia(!) Lal chuan zaidam tak hian, " i thusawi chu ka hria e," a ti a. Chu veleh rang tak hian chu sipai chu a tho vat a, Lal hmel pawh en chuanglo chuan kun deuh chung hian a in her vut a, pindan ațang chuan a chhuak ta daih a. Chu Lal chuan muangchang hian Marcus-a chu a rawn pan chhut chhut a, Marcus-a ngei pawh chu a hmel ah chuan a zam tihloh rual ani lo. Mahse a in thunun hram hram a. Chutah chu Lal chuan abul alo thlen chuan Zahna chibai lo buk in alo kun zauh a. Lal fapa anih ve avangin a hma a sipai ang em em a Lal pakhat ve mai, eng ang pawh a ropui ni mahse chibai han buk chu a a tum bik lo niin a hriat. A mawi tawk leh Lal leh Lal te, mi zahawm te chibai inbuk dan in a âwm tawk lek a mawi hian chibai buk in a kun zauh a. Chutah chu Lal pawh chuan khualțha leh Lalte chibai in buk ang in an buk lêt ve zauh a, lawm hmel tak hian ala nuih vur vur mai lehnghal. Lalpa chuan zaidam tak hian, " chibai, kei hi ka ni e i mi hmuh duh Arthur Pendragon chu, Camelot khua ah hian ka lo lawm a che" a ti a. Chutah Marcus-a chuan zâm aw lai lek lek hian, " Baculla Lal Alpheus-a fapa Marcus Valerious- ka ni e," ati let ve a. " engpawh ni se, zanin chu ka Lal in ah hian ka lo mikhual ang che, i eiin i in ang a, nuam tak a i awm theih ngei ka beisei," tiin zaidam tak hian Lal Arthur-a chuan a ti a, chutah Marcus-a dâr ah chuan a kut an nghat a, " i pa Lal Alpheus-a chu ka hre thin alawm, ka pa nen pawh an in țhian țha khawp asin," anti zui leh zat a. Chutah sipai ho ina an kil laih thing dawhkan bial lian tak lam ah chuan an in zui phei chhet chhet a. Lal Arthur-a chuan, " Camelot pasalțha leh sipai ho hi kan hmel hriattir ang che," a ti a.
Chung sipai ho pawh chuan Marcus-a chu hmel hlim tak hian anlo en hlawm a, sipai pangngai satliah zawng anni lo tawp mai tih chu an hmel ațang chuan a hriat hle hlawm a. Ni e, Lal Arthur-a pasalțha bik, 'Knight of Camelot' an tih leh 'Knight of Round Table' an tih bawk, sipai zahnih leh sawmnga (250) te hi sipai naran mai mai zawng anni lo, Pasalțha ah pawh mi hmingthang tak tak te leh Lal fapa te anni hlawm a. Chutah mak deuh mai chu, chung pasalțha ho chuan an hming an sawi hma chuan, an țhutna hma zawn țheuh dawhkan chung ah chuan an hming hi thawklehkhat ah alo lang thut a. Meialh ang mai hian alo inziak a, Sir Agravain, Sir Bagdemagus, Sir Bedivere, Sir Breunor, Sir Calogrenant, Sir Caradoc, Sir Dagonet, Sir Dinadan, Sir Ector, Sir Elyan, Sir Erec, Sir Gaheris, Sir Galahad, Sir Gareth, Sir Geraint, Sir Griflet, Sir Hector, Sir Hoel, Sir Kay, Sir Lamorak, Sir Leodegrance, Sir Lionel, Sir Lucan, Sir Maleagant, Sir Marhaus, Sir Palamedes, Sir Pelleas, Sir Pellinore, Sir Safir, Sir Sagramore, Sir Segwarides, Sir Tor, Sir Uriens, Sir Ywain, Sir Lancelot, Sir Percival, Sir Mordred, Sir Brennis, Sir Cador, Sir Bertrand, Sir Montague, Sir Owain, Sir Alynor, Sir Ostric, Sir Oldof, Sir Robert, Sir Radnor, Sir Ranolf, Sir Gwaine, Sir Aglovale, Sir Bors, Sir Cador. Sir Caludin, Sir Constantine, Sir Daniel Von Blumenthal, Sir Esclabor, Sir Feirefiz, Sir Galehaut, Sir Gingalain, Sir Gornemant, Sir Bercilak, Sir Lanval, Sir Morholt, Sir Morien, Sir Toma' Lincoln, Sir Tristan, Sir Colgrevance, Sir Ector de Maris, Sir Galeshin.. Tih ten alo in ziak a, a bâk chu dawhkhan a len em avangin a hmu kim theilo va, chuan Lal Arthur- a țhutna hmazawn dawhkan ah pawh chuan Arthur Pendragon- tih hi alo lang ve bawk a, chutah an dinna bul lam hnaih ah chuan thutthleng âwl pakhat a awm a, chumi hma zawn dawhkan ah chuan ' Emrys'- tih hi alo in ziak kalh mai bawk a. Mahse reilo te ah chung an hming in ziak ho chu a reh leh vek mai anih chu. Chumi hnu chuan Lal Arthur-a chuan a kut anti che zeuh a, chu veleh chhiahhlawh ni ngei tur, nula hmelțha deuh mai, kawrfual rawng pâwl lam deuh ha hi pindan ah chuan alo lut vat a, Lal Arthur-a hma ah chuan zahna chibai buk in a kun zauh a, Chutah Lal Arthur-a chuan, " Lal fapa hi pindan nuam ber ah khan lo thlen tir ang che," a ti a. A sawi zawh rual chiah chuan nula chuan aw khur dar dar hian, " Aw le, Lalber," a ti nghal vat a. Marcus-a en pah hian Lal chuan, " Nula kha zui la, i pindan tur ah a hruai ang che," alo tih zawm nghal zat a. Zahna entirnan Marcus-a chuan a lu chu a kun zauh a, tichuan chhiahhlawh nula nen chuan an in zui chhuak ta a. A hma a ankalna kailawn ah bawk chuan an chhuk thla leh a, mahse kailawn țantir bul lawk a corridor ah chuan an kal ta daih a, thuilo te an kal hnu chuan, dinglam ah an peng leh a, chu chuan Lal in chhunga pangpar huan, verandah ang deuh a pangpar chitin reng an khawina hmun hi a pawh a, mahse chumi pangpar huan thlenhma deuh dinglam ah chuan tlem a nam pûk deuh hi lo awm in, thing kawngkhar nalh deuh mai alo awm a, chu kawngkhar sir ve ve ah chuan sipai pahnih hi milim ang mai hian ralthuam famkim nena in thuamin anlo ding a. Nula i chuan chu chu nam hawngin a chhungah chuan an in zui lut ta a. " helai ah hian i awm dawn nia, nakin ah nangmah pui tur che anlo kal ang," nula i chuan a ti a, zahna chibai bûk a kun hniam in Marcus-a chu anuih sak a, tichuan rang takin a chhuahsan ta a. Chu Pindan chu a ropui ngei mai, a dinna ngaia ding reng chung chuan pindan chhung chu an thlek kual vel a, lian lutuk nilo mahse engkim chu a in dah fel vel vek a, pindan kil khat a khum lian tak thing chang chi a siam leh a tlâng rangkachaka luan chu a thlir vawng vawng a. Tukverh lam pan chuan muang fahran hian a pen chhut chhut a.Tukverh dârthlalang chhah tak mai chu hawng in, pawn lam ațanga thlifim lo thaw lut heuh heuh chu a in chhêm tîr diai diai a. Tukverh ațang chuan Camelot khaw ropui tak chu alang chiangin a hmuhnawm hle a. Khaw thlanglam a nî a tlâkna chu la reilo mahse khua chu a thim ruai tawh a, Vân chung sâng tak ah chuan arsi pawh an lo lang ve pheuh pheuh țan ta. Chutianga a hmalam ram a thlir vawng vawng lai chuan a lunglen hmêl hle a, a chângin an rûm leh kâwk țhin a. A ngaihtuahna leh suangtuahna te chuan a thinlung chu boruak ah a lên kual tir vel ni mai hian alang. Ni e, a mitmeng leh hmel ațang chuan a tleirawl chhanchhuah rilru thianghlim tak mai Penelope-i anih loh pawh in a Lal ram ropui tak chhuahsan a zinkawng thui tak a zawhna chhan ber leh a hmangaih Vivienne-i a ngaihtuah ani ngei ang. Hun engemaw chen chutianga lungleng taka pâwnlam thlîr a tukverh bula a din vung vung lai chuan a pindan kawngkhar chu alo ri rak rak a. Muangchanga an lehhawi chuan a pindan kawngkhâr bulah chuan Nula leh tlangval pakhat, chhiahhlawh ni ngei tur hi inthlahrun hmel tak hian anlo ding a. Hmeichhia zâwk chuan Rangkachak Thlêng kum hlâi tak mai, theirah tuihnai tak tak mai a khat lûk hi alo keng a. Chuan mipa zawk pawh chuan Rangkachak bûr tung sei tak mai hi alo pawm rûn mai bawk a. Marcus-a chu zah takin chibai an bûk a, ani pawh chuan a bûk lêt ve bawk a, Chutah a mi pa zawk chuan, " ka pu, nangmah pui tur che in leh helai a i awm chhûnga i rawng bawlsak tur che a tih kan ni e, ka hming chu Kay- ani a, hei hi Anna-i ani e, ," in thlahrun hmel tak hian a ti a. Chutia a sawi lai chuan nula zâwk chuan thing dawhkan kili nei mawi tak, uluk taka siam niawm tak ah chuan a rangkachak thlêng kum chu a dah a. Mipa zawk pawh chu kalsawn in, dawhkan ah chuan a rangkachak bûr tung sei tak chu a hûng ve nghal a.. Marcus-a chuan an chezia chu ngawi reng hian a thlir ringawt a. A mipa zâwk Kay-inti chuan kawngkhâr chhûng dinglam bang hrûl a inhûng Almirah- ang deuh, Oak thing ațanga siam mawi tak hi ava hawng a, awmhmun kawrfual vâr thianghlim tak mai hi a rawn phawrh a, chutah Rangkachak vawthlep lunghlu mûr nena chei hi a rawn phawrh bawk a. Marcus-a lam chu a rawn hawi a, " ka pu i thîrkawr te kha phelh la, châwl hahdam ta che, in bual la, heng kawr te hian i in thuam dawn nia," a ti a. Chutih lai mek chuan, Nula Anna-i chuan pindan sir kil deuh a in hûng, Sailungvâr ațanga siam inbualna tâikuang, tuilum a khat luau mai ah hian hlo rimtui leh rose emaw ni Pangpar pâr sennawi hi alo theh vêl mek a. ( kan hriatthiam theih dan tur chuan inbualna taikuang hi Bathtube ang deuh, inbualna kuang kan tih ang chi hi. CR) Chutia hlo rimtui a phul zawh chuan nula zawk Anna-i chuan Marcus-a lam chu alo hawi a, " ka pu, i inbual a hun ta e, ka bual ang che a, hriak rimtui ka chulh dawn che nia," a ti a. Marcus-a chuan, " mahni in ka inbual thei alawm," a ti a, chumi te pahnih chuan mak ti tak mai hian an en a, " chhiahhlawh ka ngai ve love, mahni a awm ka duh, khawngaihin min chhuahsan rawh u," a tih zawm leh a. A ngaihna hrelo chuan chumite chu an chhuak dûn ta a. Chutia an chhuah hnu lawk chuan Marcus-a tihtur hre lo chu țhutthleng tîng thei-ah chuan a han țhu a, engemaw rilru kam tlat tu nei ang mai hian a in ngaihtuah rûn rûn reng a. Chutah dawhkan a chhiahhlawh tena an dah grep rah bâwr khat chu a ban ruai ruai a, a khât tâwk hian a hmawm zauh zauh a, rangkachak bûr tung ît êt ațang chuan uain chu rangkachak ațanga siam tho no mâwi tak ah chuan thli chhuak in muangchang hian a in a. Chutianga a duhtâwk a ei a a in hnu chuan a thova, a thîrkawr te chu a phelh sawk sawk a, inbualna tâikuang, tuilum a chhûnkhah leh hlo rimtui tak phul ah chuan a in chiah leh ta veng veng a. Reife chutianga a in chiah hnu chuan a tho va, chhiahhlawh Kay-an a a lakchhuah kawrfual vár thianghlim tak chu a inbel leh a, tichuan khum dûp hmel tak, puannem chi leh sahmul puan lum hmel tak inphah, Rimtui tak ah chuan a in thawlh ta a. Chutia a mut hnu reilo te ah chuan a pindan pawn ațang chuan rimawi nalh em em mai hi alo ri chhuak a, a pindan chhûng ah chuan meikhu anga lo khu lut in, reilo te ah a pindan chhûng zawng zawng chu a luahkhat ni mai hian a hriat. Chu rimawi chuan mutthilhna thlarau a keng tel ani ngei ang, mitkhap kâr an chu rimawi ngaithla chung chuan mumang khawvela châwl hahdam tur in a muhil ta siai siai a. A mutui bawk ani ang, a han harh leh meuh chuan tukverh ațang chuan ni zung chu alo in káp lût in a pindan chu a rawn chhun êng uarh tawh a. Rang tak a thovin a in bual vat vat a, kawrfual chu hlîp in a thîrkawr chu a in bel leh ta sawk sawk a. Chutih lai chuan a pindan kawngkhâr chu alo in hawng a, a hmâ zána lo kal chhiahhlawh nula Anna-i bawk chuan thlêng kum lian tak hian, vawksa thin hemro leh sangha kan ro rimtui tak tak bâk ah eitur eng eng emaw hi a rawn chawi lût a.
Chu nula chuan chibai buk zauh in dawhkan ah chuan a thil rawn chawiluh chu a dah a. " ka pu, nizan lamte i mutui thei a maw? Tûkțhuan chu i pindan ah hian ei la nuam itih zawk ka ring," a ti zui nghal zat a. Țhutthleng a țhut pah chuan Marcus-a chuan, " ka mutui khawp mai, ka lawm e," a ti a. Chutianga lawmthu a hrilh chu chhiahhlawh nula chuan mak a tih hmel hle a, a ngaihsan phah sawt in a hriat, Marcus-a chu a nuih deuh suk a. A thil rawn chawi luh Marcus-an a a ei lai chuan a sir ah hian alo ding reng a. Chutih lai chuan pindan kawngkhar chu alo in hawng a, a hmâ ni a Lal in a hruaitu sipai kha sipai thuam famkim nen a in thuam ap chung hian alo lut a, Marcus-a hma zawn ah chuan lo pheiin chibai bukin a kun zauh a. " ka pu, Lal rorelna pindan a hruai tur che in ka lo kal a," a ti a. Marcus-a chuan a lu a bu zauh a, a țhutna ațang chuan tho vin a in tifai sawk sawk a, chu sipai nen chuan an in zui chhuak ta daih a. Pindan ațanga an chhuak ta chu pindan bul lawk a bathlâr pangpar huan bul lam ah chuan an phei a, dinglam ah pêng in pindan inkal pawhna zau tak mai, kalna lai chhuat a puan senduk hmul thap mai inphah ah hian an phei a, reivaklo an kal hnu chuan sailungvar ațanga siam kailawn zau tak, a vawnbân pawh sailungvar vek, mawi leh mak danglam taka ker leh chei, a chhuat a puansen duk hmul thup mai leh chhah tak in phah ah hian an chho leh a, chu kailawn tâwp han chhuahchhohna chiah chu a zâwl duai a, dinglam leh veilam ah hian inkalpawhna dang alo awm bawk a, tin, a hma zawnah chuan pindan dang zau tak mai hi alo awm a, kawngkhar hranpa pawh a awm lo, a luhna sîr tuak ve ve ah chuan sailungvar ațang thova ker, Dragon thla ti pharh lai lem lian tak mai hi alo awm a, pindan chhunglam chiah ah chuan sipai thirkawr hlang hlak ha leh thir lukhum pum khum hi a sir ve ve ah hian pahnih ve ve hi milim ang mai hian anlo ding bawk a. Chutah ahruaitu Sipai chuan zawi sep hian, " ka pu, nangmah in i va luh angai, kei chu ka lo lut ve thiang lo ani," a ti sap a. Marcus-a chu a bu nghut a, an thaw ri hrâwk a, zâm hmel deuh hian pindan chhunglam ah chuan a pen lût ta a. Pindan chhung chu a zau hle a, a chung chu a sângin a zuih chho rût a, tin, pindan chhungah chuan milim mak tak tak mai, lian pui pui hi a in hung țeuh bawk a, pangpar mawi tak tak te pawh rangkachak ațanga siam bûr mawi tak tak ah hian a in khawi thluah bawk a. Hmalam pan a kal pah chuan a hawi kual vel ruai a, ropui a ti ngei mai, chu pindan bang te chu sailungvar rawng chi li(4) a siam hi ani a. Tin, a bungrua, milim leh dawhkan te, țhutthleng te chu saingho leh rangkachaka siam deuh vek hi ani a, chhuat ah chuan a hma ami ang bawk puan senduk, nêm leh hmul thap mai hi a in phah chhuak vek a, tin pindan luhna kawngka ep, a hmazawn bang tâwp ah chuan Lalpa leh Lalnu țhutna hi a awm bawk a, Lalpa leh Lalnu țhutna hi kailawn panga(5) vel a chhoh ngai hian kâng deuh ah hian a awm a. Chuan an hnunglam bang ah chuan Oak thingphel, sin te te mawi tak hi a in bel khat vek a, Lalpa țhutna hnung ah chuan Dragon lim lian tak mai, rangkachak ațanga siam hi thlazâr duai in a awm bawk a. Pindan bang dinglam leh veilam ah chuan Rangkachak hlanghlak ațanga siam țhutthleng mawi tak hi a in hûng tlar dul a, chutah chuan pasalțha leh Lal khawnbawl upa te, damdawi lam thiam ni awm tak tak te leh dawithiam ni mai awm hmelpu leh kawr fual ha tamtak hi an țhu țhup mai bawk a. Chutiang thil vel en chung leh ngaihtuah rauh rauh chung chuan Marcus-a chu a phei zêl a, Lalpa leh Lalnu țhutna hma zawn a thlen chuan zahna chibai buk in a lu chu a kûn zauh a. Chutah Lalpa chu lo ding chhuak in, abula Lalnu hmelțha tak mai lam chu an hawi a, " Ka Lalnu, Baculla- Lal ropui Alpheus-a fapa Marcus Valerious- ani e," zaidam leh hlim hmêl tak hian a ti a. Chutah Lalnu chu alo bu zauh a, Marcus-a lam ah chuan hawi phei in a nui ver ver a, chutia Lalnu hmelțha tak ina a rawn melh chuan Marcus-a chu a zâm hmel hle a, a mitmeng ah pawh alang chhuak hial a. A lâi lutuk chu a che buai țep a, Mahse zahna chibai a buk leh zauh hnu chuan tlem chuan a pangngai ve leh ta deuh. Lalnu hmelțhatna chuan Marcus-a chu a zêm ni ber in a hriat, Lalnu chuan Maimaw puan kawrfual nalh deuh mai hi a ha a, a bân fêm leh atlâng te chu rangkachak zâi hian a tle niar niar mai a, lunghlu mûr te te hi a kawr ah chuan a in phûm thluah mai bawk a, chungte chu pindan sir bang chung sang tak a tukverh ațanga nizung lo lut chuan a chhun tle sep sep a, tin tuikeplung chi hrang hrang hian a kawr chu a in chei bawk a. A rangkachak Lallukhum tle mawi tak chuan a sam rawng eng thianghlim tak chu a ti mawi lehzual in ahmel pawh ati lang țha in a ti zahawm lehzualin a hriat. Lal Arthur Pendragon a nupui Lalnu Guinevere-i hi Carmelide Lal Leodegrance-a fanu ani a, chuan Lal Leodegrance-a hi Arthur-a sipai leh Pasalțha ani bawk. Lal Arthur-a pawh hi, Uther Pendragon-a fapa ani a, Lal Uther- a hian 'Duke of Cornwall' Gorlois-a nupui Lady Igraine-i chu chhuhsak in, Lady Igraine-i nen hian Arthur-a leh Lady Morgana, Avalon Lal Urien-a nupui leh 'dark magic' hmang țhin, dawithiam rapthlak tak lo ni ta chu an nei ani. Duke Gorlois-a chu Lal Uther- a hian indo na ah a tîr a, chutia Gorlois-a indona hmuna akal lai chuan a nupui Lady Igraine-i chu Lal Uther-a hian lo mutpui in Lady Morgana-i chu an nei a, mahse indona a Gorlois-a a thih tak avangin, Lady Igraine-i chu nupui ah neiin Arthur-a hi an nei leh ta a. Mahse Gorlois-a leh Igraine-i te hian fanu Elaine-i leh Anna-i te anlo nei tawh sa a, heng a fa te hi Lal Uther-a chuan fa ah a la tel vek ani. Lal Arthur-a chuan ring fahran lo hian Marcus-a hnenah chuan, " Lal fapa Marcus Valerious, Pasalțha ropui tak ini, i chanchin tam tak kan lo hre ve asin," a ti a. Chutah inchhunga Pasalțha ho leh Lal upa leh lehkhaziaktu miropui tak tak te hriat tur chuan ring tak mai hian, " Baculla Lal Alpheus-a fapa, Marcus Valerious- hi ani Dawithiam sual leh ropui Siraka-i hneh a, sakawlh hlauhawm Chimer- pawh that tu chu," an ti a, chutah inchhunga awmho chuan kut anlo bêng dur dur a, A kut chu boruak ah an zap a, kut bêng pawh chu a reh leh nghal duk a, " Lalfapa Marcus Valerious hian Pasalțha chungnung ber te zînga tel ve a phû ani, mi huaisen ber te chu"... an ti leh a. chutia a sawi pah chuan muangchang hian a kâwng a a chem sei tak mai pai chu a phawrh chhuak zal zal a. Chutih lai chuan inchhûnga mi ho chu an lo ding vek a, an âwm zawnah hian an bân dinglam chu an dah ta țheuh a, Marcus-a chu Lal Arthur a hma ah chuan zawimuang hian a țhingțhi a, chutah Lal Arthur-a chuan a ngûnhnâm chu Marcus-a lamah chuan lek kâng in, a dâr dinglam ah chuan an nghat a, chutah zawi fahran hian enge maw ni hi a sawi a, Marcus-a pawh chuan alo chhâng a, chutah a dar veilam ah chuan nghat leh in Marcus-a hriat tur awm lek hian thu tawite asawi leh sep a, chutah Marcus-a lu chungah chuan a nghat leh a. Chutih chhung zawng chuan inchhunga awm ho chuan an âwm a an bân la nghat reng chung chuan thu anlo sawi rual dual dual a. Chutah ring ang reng tak hian Lal Arthur-a chuan, " i huaisenna leh leh i finna hian Pasalțha nih a phu a ni, Lal fapa chu ropuina leh hmingthanna ani a, mahse zahawmna chu Pasalțha te chanvo ani a ti a." chutia a sawi zawh rual chuan inchhunga Pasalțha ho chuan thu anlo sawi rual leh dual a. " i huaisenna chuan zahawmna a pe a che, tunah chuan Pasalțha nihna chanvo inei ta, i hming chu Marcus Valerious nilo vin, Sir Marcus Valerious- ani tawh ang," a ti a. Marcus-a chuan zawi te hian enge maw ni hi Lal Arthur-a hnenah chuan a sawi a. Chutia a sawi rual chuan chhuata a țhingțhi pawh chu a tho nghal a. Chutah Lal Arthur-a chuan, " Sir Marcus Valerious, helai hmun a ilo kal chhan chu ka hria a sin, i hmu ngei bawk ang tih ka tiam a che, mahse kei chuan ka pe theilo che ani, mahse a nei tu dik tak leh pe thei tu leh malsawmsak thei tu che hnenah ka hruai ang che," a ti a. Marcus-a chuan zâm hmel deuh tak hian, " Lal ropui, i kutah ka in nghat e," a ti khûr deuh dar dar a. Lal Arthur-a chuan chu pindan bang dinglam hrûl a a pasalțha ' knight of round table' țhutna lam chu an hawi a, " Sir Lancelot " ring fahran hian an ti a. Chuveleh Pasalțha țhu țhup ho zîng ațang chuan thir kawr ang chi, dâr țha mi leh rangkachak ațanga siam sipai kawr ha, palian tak leh hmel zahawm deuh mai, hmuihmul tlem leh khabe hmul tlem nei hi alo pen chhuak a, chutah lo phei zel in Marcus-a bulah chuan alo ding ve a, Lal Arthur-a zahna chibai a buk zawh hnu chuan ring fahran lo hian, " Ka Lalpa, enge titur in nge min duh?" a ti a. Lal Arthur-a chuan, " Baculla Lal fapa Sir Marcus Valerious hi Brocéliande ramhnuai ah i va hruai angai ani, Wizard Merlin- a hmuh angai ani," a ti a. ( Brocéliande forest hi dawithiam ropui Merlin, Emrys- an tih bawk awmna leh chenna hmun ani. CR) Sir Lancelot-a chuan, " Ka Lalpa, i thu ang ni rawh se," tiin a chhang lêt a. Lal Arthur-a vêk chuan, " tunah i va hruai angai ang, mahse Brocéliande ramngaw chu i lût ve tur ani lo, i va dah anga ilo kir lehnghal tur ani," an tih zawm a. Marcus-a lam chu hawiin, " Dawithiam Ropui Merlin-a chu Brocéliande ramngaw ah a cheng a, mahse tumah rengin Merlin-a awmna hmun tak an hre lo a, khawvelah hian hrilh thei che pawh an awm lo ang, chuvangin nangmah ngeiin i va zawnchhuah angai ani," a ti a. Chutia a sawi zawh chuan Sir Lancelot leh Sir Marcus-a chuan Lal Arthur-a leh Lalnu hmelțha Lady Guinevere-i chu zahna chibai an buk a, tichuan chu pindan zau leh ropui tak, Lal Arthur-a rorelna pindan chu an chhuahsan zui ta nghal a.
Chutia Pasalțha Sir Lancelot nen a an chhuak ta chu a hma a an kalna kailawn ah bawk chuan an chhuk leh a, pindan in kalpawhna zau a kal leh in Lal in chu an chhuahsan ta a, Lalin tual an thlen chuan sipai pakhat hian Marcus-a sakawr Pegasus leh sakawr dum lian țha tak mai hi an lam pan chuan alo kai phei a, Sir Lancelot pawh chuan Pegasus chu a hmu duh hle a, mak a tih hmel in a thlir deuh vang vang a, sipai ina alo kaih sakawr pakhat zawk ah chuan in thazo tak hian azuangkai thauh a, Marcus-a pawh chu Pegasus chungah chuan a lawn ve nghal a. Sir Lancelot a chuan Marcus-a chu alu a bûk khum zauh a, tichuan Lal in tual chu an tlan chhuahsan ta a. Khaw chhung an tlân lai te chuan mipui ho chuan anlo hmu duh hle a, a țhen chu an in hrilh ru sap sap hlawm a. Mahse chutiang mipui en hman pawh chuan an khawsa lo, chak tak in an sakawr chu an tlân tir a, reilo te an Camelot khaw chhung chu an tlan chhuahsan ta thuai a. Engemaw chen Camelot kulh hma zawn a an tlân hnu in ding lam ah an peng a, phûl hmun zau em em mai ah hian an tlân lut a, chu phul hmun chu a zau ngang mai, an theih pa tawp in tlan mah se chawhma deuh thaw an tlân anih chu. Niin a vanlai zawl a thlen lai vel chuan lung lian pui pui awmna, hmun lian vak lo hi an thleng a, chutah tawite an tlan hnu chuan an hma zâwn a tlâng lian vak lo, hnim leh thing pawh awm manglo, sang vak lo lam pan chuan an tlân chho ta zel a, reife harsa tak a an tlân hnu chuan tlâng chung zawl chu an thleng chho ta a. Sir Lancelot-a chuan a sakawr tiding in savun ip lian vaklo, tui paina hi a rawn phawrh a, tlem a in a, a lu a tih huh hnu chuan Marcus-a lamah chuan a theh phei a, Marcus-a pawh chuan tuihal hmel tak hian a lo in ve a. Chutia a in mek lai chuan Sir Lancelot-a chuan an hma lam hnuai deuh hla tak a ngaw chhah pui lam chu an kawk a. " Sir Marcus Valerious, saw lai ngaw hmun saw ania Brocéliande Forest chu, saw ngaw chhûng khawilai ah emaw ber sawn dawithiam ropui tak, Merlin- chu a chêng a, amah chu i hmuh ngei ngei angai ani, amah chauh in ani chem te thiltithei leh dawi chemte Excalibur- awmna chu hria, Lal ropui Arthur- hian hun tam tak kal tawh ah khân alo hmang tawh a, mahse tunah chuan a awmna a hre tawh bik lo ani," ati a. Marcus-a chuan, " Sir Lancelot, i chungah ka lawm hle ani, engpawh ni se ka hmu chhuak anih ngai chuan ka lo kir leh in ka ring tawh lo va, a chhan chu, hna pawimawh tak mai thawh tur ka nei a, chuvangin Lal Arthur leh Lalnu Guinevere-i te chu chibai minlo bûk sak mai dawn nia," a ti a. Sir Lancelot-a chuan, " anih leh phawt le, helai hmun thleng hi ka lo kal ni mai rawh se, engtik ni ah emaw chuan kan in hmuh leh ngei ka beisei," a ti a. Tichuan a sakawr chu her in Camelot- khaw lam pan chuan chak tak mai hian a tlân lêt leh ta a.
..(End Chapter 14.)
Comments
Post a Comment