Zan a tlân an ni bawk a, chutiang in an tlan rei em em lo, khua an va thlen chuan Verna- khaw sipai te chu an khaw hual a thing hmawr zum fir fer phun tum hian an lo buai lai laih a.
Chung ho bul anva thlen chuan Hestia chuan sipai pakhat hi bia in
" eng chen nge in siam tawh a? Hung vek in tum em ni khua hi ?" an ti a. Chu sipai pa chuan,
" helam Veil- in hawn na lampang hi kan buaipui hmasa a, khaw chhak lampang nen hian zanin chuan pin kan tum a," alo ti sawk sawk a. Chutah Hestia bawk chuan,
"anih tak chu, In Lal Hinarul-hmuh kan ngai a, kan lo kir leh ang, anih phawt mai u," an ti a, chutia a sawi pah chuan a sakawr chu a vaw tlan lehnghal a, Marcus-a leh an sipai tlemte te pawh chuan zui ve nghal in khaw chhung lam ah, Lal in lam pan chuan an tlan leh ta a
Lalin chhung an va luh chuan Lalpa Hinarul- leh a sipai hotu niawm tak pahnih leh a khawnbawl upa mi panga vel hi thu pawimawh hmel tak sawi hian anlo țhukhawm a,
Marcus-a ten in chhung an rawn luh chuan Lal Hinarul-a chuan țhutna te alo kawh hmuh sawk sawk a,
sipai ho te chu thupek nghak niawm tak hian kawngkhar bul ah chuan an ding tlar nghal țhap a,
muangchanga țhut pah hian Hestia chuan,
" Lalber, buaina nasa zawk kan hmachhawn angai mai thei ani," an ti a.
Lalpa chuan hlauhthawn hmel tak si leh angaihna hriatloh hmel tak hian,
" enge thil awmzia chu, khawngaihin han sawi chiang deuh te General," a lo ti ha a.
Inchhunga awm ho te mit chu Hestia chungah a fu nghal țhup a, țawng zai pawh rello hian hrilhhai hmel tak in an en țhup a. Chutah Hestia bawk chuan muang fan reih rawih hian an sawi zawm leh a,
" Lalber, Kókkinos hmun a Veil- in hawng hi a nasa in, hmun dang ami zawng aiin a zau bik a, lirnghing kha he veil- in hawng tur in a a tih nghin ani e, mipui ten a ramsa mak tak an hmuh pawh kha he veil- atanga rawn chhuak hi ani a, kha chu a hmahruai chauh ala ni, Kókkinos hmun kan va thlen khan khatiang ramsa rapthlak tak ang kha enge maw zat an lo vak chhuak lai kan hmu bawk a, mahse ngaw chhung lam ah an vah luh daih avangin kan han umzui pawh in kan hmu zo ta lo ani."
maktih hmel tak hian Hestia thusawi chu ka hau hian an ngaithla hlawm a, chutah Lalpa chuan,
" engtia hmalak zui tur nge ni ang, nangnin rem min ruatpui loh te chuan hmalak dan tur pawh kan va hrethiam lo ve?" ati a,
chutia sawi pah chuan a upa te leh a sipai ho tu te chu an melh kual a,
mahse sawi tur an hre bik lo, an mit meng atang chuan an chiai tih hi a hriat vek mai,
chutia sawi tur hre lo a an ngawih țhap lai chuan Marcus-a chu a rawn țawng chhuak ve ta a, Lalpa lam hawi chuan,
" Lalber, chutianga chiai vak na tur pawh a awm chuang lo a, tunah chuan engmah ala chiang tak tak thei chuang lo a,
Chuvangin heti hian General Hestia- nen hian kan lo sawi dun tawh a, Underworld Veil- hi eng chen a sei in nge tih leh khawilai atangin nge a in hawn tan a, khawilai thleng nge a in hawn tih chu kan la hre thei mai rih lo va, engpawh chu ni sela, hmarlam ah chuan Bersin khua a tan tlang a, chuan Nothland- khaw dai ah a tlang chho ta zel ani, chhim lam pang chu kan la en lo va, mahse he Veil hi a nasa lo in hmun khat ah chauh hian kan la hmu rih a, chuvangin Nothland leh Bersin hi chu kulh nei khua an nih avangin chutianga buaipui an ngailo ang a, khaw te deuh leh thingtlang khua ho hi kan buaipui angai dawn ani, Eastland, Clenith, Urdin, Phyra, leh Gogonia te hi Veil in hawn na hnaih khua leh Ethnosým (greek țawng ani a, ethnosýmvoulou lam tawi, lal in a thut loh khua a khaw enkawl tu ang hi, councellor tihna.CR) enkawlna hnuai a awm an ni a, sipai hranpa an nei hlawm bawk silo va, chuvangin kan theitawp a kan țanpui an ngai ani," an ti a,
chutah Dawhkan a uain chu tlem an thli a, muangchanga in pah hian a thutpui te ho chu an melh kual dan dan hlawm a,
a thusawi ngaihtuah zui ni awm tak hian an melh ngai melh in che changlo hian an lo thu ngut ngut hlawm a,
chutah Lalpa chuan,
" anih chuan engtiang a hmalak zui chu nge kan tum ber ang?" alo ti var a.
Marcus chuan ring leng lawng tak hian,
" Lalber, thil awmdan chu i hre tawh a, in khua hi chu hetia Thing in hung kual hi chuan chu bak chu tih vak angai lovang, a khaw hmun a rem a, ngaw chhung atanga heng ramsa ho pawh hi lo kal dawn pawh nise la, lo hmuh lawk vek theih ani a, chuvang chuan in tan chuan a hlauhawm hran em em lo, chuvangin i sipai țhenkhat te hi heng khaw tê zawk te țanpui tur hian min hman tir tur in kan ngen duh che ani, chuan Bersin Lal Ixion- hi min biaksak tur in kan ngen duh bawk che a, an ni chu kulh nei khua an nih bak ah sipai leh ralthuam pawh an ngah a, nang in min biaksak loh chuan thil ruahman dan dang kan hre tawh meuhlo ani," an tia.
Lalpa chu a ngawi vung vung a, a in ngaithuah buai hmel hle a, a sipai General pahnih te chu an en vung vung a,
rei fe hnu ah chuan Marcus-a leh Hestia- te en tawn zak zak chung hian,
" Ni e, in remruat dan ang ang chuan kan kal zel mai aniang chu, sipai chu ka ngah a, mahse ralthuam lam hi zawng chutia han chhuahpui tur em em chu kan nei lovang a, Bersin Lal pawh chu kan bia ang e, lehkha kan ziak ang a, tunah la la hian keng nghal se ațha ang,"
chutia a sawi lai mek chuan a upa te lam chu an hawi a,
" Uria, lehkha chhiarna pindan ah i kal lawk avan ngai ve," an tih zawm zat a, chu veleh khawnbawl te zinga pakhat chu a tho nalh a, Lalpa chu zahna chibai bukin an kun zauh a, tichuan Lal lehkha chhiarna pindan lam pan chuan rang tak hian a kal ta nghal a, reilo te ah chu pa chu thing chang chi a siam thingrem te, a tlâng vel rangkachak leh lungmawi a cheimawi keng chung hian alo chhuak leh a, chutah Lalpa chu rawn pan ding nghal in dawhkan chungah chuan a thil ken lai chu an dah a, chuan chu thingrem nalh tak chu hawng in, lehkha phek hlai tak leh sava hmul ang chi, arpa chang ang mai a sei leh lian deuh, thil ziahna atana an hman thin leh thing uk atanga siam bûr tê, lehkha ziahna tui awmna hi an phawrh chhuak nghal vat a, Lalpa chuan lehkha ah chuan thil an ziak zung zung a, a ziah zawh chuan a zungbun bun lai mit lian tak, a hming nemna zungbun thla chu a chu lehkha a thilziahhna hnuai lampang ah chuan an nem kai a, chutia atih zawh chuan keng kâng in a chhiar nawn leh vek bawk a, a chhiar zawh hnu chuan uluk tak a zial in, thingremtê chhung a rangkachak rawng hrui nalh deuh chuan a țawn leh a. " Captain Onesin, i sipai pahnih hruai la, Bersin khaw Lal Ixion-a hnenah he ka lehkha hi in va pe dawn nia," a sipai hotu pahnih te lam hawi chuan Lal chuan a ti a, chutah sipai hotu pakhat zawk chu ațhutna ațang chuan alo ding chhuak nghal vat a, " Aw le, Lalber," a rawn ti zui nghal zat a. Chutah Lal chuan sawi zawm leh in, " he lehkha hi in pe ang a, thu dang a zawh belh che chuan tuna kan thu rel zawng zawng leh thil thlen dan te hi in hrilhfiah leh dawn nia, tunah in kal nghal mai angai ang, kan hun tawn in a zir silo a, chuvangin in hmanhmawh angai viau anih chu," a țhutna ațanga lo kal chhuakin Lalpa chu zah tak a chibai buk in a hma ah chuan a han kun a, lehkhazial chu la in hmanhmawh tak in an kal chhuak ta nghal a. Chutia Bersin khaw lam pan a Captain Onesin-a te an chhuah hnu chuan Marcus-a te pawh chuan kal chhuah ve nghal mai hi an tum a, mahse Lal Hinarul-a chuan zanriah ei phawt tur in a sawm țalh a, an han țang ve viau na a, mahse Lalnu chu lo kal in, sawm tak te a a sawm tâk ah chuan an chelh thei hram a, tichuan an titi lai pawh chu chawl in țhutkhawmna pindan chu zanriah ei tur chuan an chhuahsan ta nghal a. Chu an țhutkhawmna pindan bul lawk ah chuan zanriah eina pindan chu a awm a, a zau em em lo na a, a fel fai thlarh a, tichuan thing a siam dawhkan sei deuh mai hi an kil țaih hlawm a, an thu fel chauh tih chuan chhiahhlawh nula hmeltha tak tak ten ei tur chi hrang hrang leh rimtui tak tak te, uain chi hrang hrang te an rawn chhawp nghal sawk sawk a, chutiang a hlim tak a an ei mek lai chuan Lalpa chu a rawn țawng chhuak a, " Marcus, Hestia- in chungah hian lawm thu kan sawi mawlh mawlh ani, keini chang ni lo, kan chheh vel ram te tan pawh hian malsawmna in ni ringawt alawm le," chutia a țawng lai mek chuan Lalnu chuan an rawn tui hnih ve a, Marcus-a melh ralh pah hian, " Marcus, in ram Baculla- chu helai ațang hian a hla hle si a, engtizia a henglai daih daih a lo kal nge i nih reng reng le, i hriat ngailoh ram ah lehnghal, mipui țanpui tur a i pharkual nasa lutuk hi ka hrethiam thei lo," a rawn ti a. Chutah Marcus-an a chhan a tum lai mek chuan rang tak mai hian Hestia- chuan alo chhan khalh a, " Lalnu zahawm, hei hi a lawm thitheilo Pathian mihring zinga lo chang chu, vawikhat tê pawh ala hmuh ngailoh leh hriat pawh ala hriat chhin eih ngailo tan hian a nun hi a hlan tawp ani a, keini țanpui ngai zawk leh harsatna tawk mek te tan phei hi chuan a țhatna leh felna hi a tlâwm thlak kan ti asin," Marcus-a fakna chungchang nuamti tak a a sawi lai chuan Marcus-a chuan a rawn pawt chat a, " Verna Lalnu zahawm, dik tak chuan Narbeth khua ah tih tur pawimawh deuh mai ka nei a," Lalnu chu maktiin a dang sawp sawp a, Lalpa Hinarul- pawh a bâng bik chuang lo. chutah Lalnu chuan zawi fahran hian, " Narbeth, Narbeth maw itih ? Castle of narbeth em ni zawk?" a ti sap a. Marcus-a chuan aw tih nan a lu an bu nghauh a. Chutah Lalpa chuan, " Marcus, kum tam tak kalta khan Narbeth khua chu Persian ho vin an rûn a, mipa zawng zawng that in hmeichhia leh nunau te chu sal ah an hruai vek tawh alawm, tunah chuan khaw ram mai ani tawh, i hriat sual te ani lo maw," chutia Lalpa ina a han sawi tak ah chuan thil hrechhuak thut ni awm tak hian Marcus-a chu a phu zuk a, chutah thil dang a rawn sawi zawm daih a, zawi fahran hian, " Isle- khaw mi hmeichhe pakhat khawngaihthlak tak hian buaina a tawk a, Delphi zawlnei hmu tur in ka hruai a, kan haw kawng ah Albina leh Delain khua rawn tlawh kawiin, hripui leh ramsa rapthlak tak maiin ina a tihbuai avangin kan châm ta reng a, hei tun thlengin buaina dang kan la tawh belh zel anih hi," a ti a. Lalnu chuan mak tih hmel tak leh ngaihsan hmel tak hian Marcus-a chu a en vawng vawng a, ring deuh mai hian, " ni e, dawithiam Siraka-i leh a țhuihruai te lak ata Isle- khua i chhanchhuah kha chu ka hre tak asin, chu lo pawh ramsa rapthlak tak awlsam tak a i tihhlum pawh kha, khaw hrang hrang mai nilovin, ram dang ah te pawh an sawi nasa asin, i hming hi chu ka hre tawh hle asin, nangmah ka hmuh hma hauh che hian," a ti bawrh bawrh a. Hestia- chu rawn țawngchhuak leh in, " ni e, Lalnu zahawm, indona ah chuan vawi tamtak ka tel tawh țhin a, mahse ani aia râl rêl thiam leh mi huaisen hi ka la hmu lo reng reng asin," tiin an rawn belh leh hlak a. Chutianga a chanchin an sawi vel pawh chu ngaihsak awm pawh in a lang lo, a hma zawn dawhkan a an zanriah eitur rawn chhawp te chu tui tih hmel tak hian a ei bawrh bawrh a, dâr bûr uain dahna ațang chuan no khat pum hian uain a thli chhuak a, muangchang hian tlem tlem in a lem sek sek a, chutah Lalpa lam hawiin, " Lalber, Bersin Lal Ixion-a chuan a sipai țhenkhat a rawn thawh chhuah tir chuan," a ep chiah a zanriah kil ve mek, Verna khaw sipai General lam chu an hawi a, " i General hian a zahve vel ho sela, Eastland- khua țanpui tur in han thawk chhuak sela, chuan tunah Bersin khua a kalta Captain Onesin-an ho khat hruaiin Clenith- lam pan bawk sela ti in ka lo ngaihtuah a, mahse remruatna dang in lo neih tawh chuan ka ti tlang chuang lo a," an ti a. Chutih lai chuan Lal in kawngkhar chu alo in hawng ri rawk a, sipai pakhat hi hmanhmawh fahran hian alo lut a, zanriah eikhawmna pindan ah chuan lo lut tlang in Lalpa chu zahna chibai an buk zauh a, chutah thukhawm ho chu en kual diat diat in inthiamloh hmel tak hian, " Lalber, ka rawn tibuai che u a pawi ka ti khawp mai, mahse kan Captain in thu hmanhmawh thlak hrilh tur che in min rawn tir a," a ti a. Chutah zaidam tak hian Lalpa chuan lo chhang in, " eng thu nge ni a, han sawi ta che," " Lalber, tun ah lawk khan Ramsa nge thlawk thei lam ni zawk enge maw zat khaw lam pan in ramngaw lam ațang sawn an lo kal a, khua an rawn bei ngei dawn a kan rin avangin nangmah hrilh tur che in kan captain in min rawn tir ani," chutia a sawi lai mek chuan zanriah eive Verna khaw sipai General- chu rang tak hian ațhutna ațang a rawn tho chhuak nghal vat in, Lalpa chu zahna chibai a bûk zauh a, " Lalber, ka kal nghal mai ange,"a ti zui a, chutah Marcus leh Hestia te lam chu hawi in, " ka lo va kal hmasa ang e, muangchangin in lo kal dawn nia," chutia asawi zawh chuan zualko sipai pa nen chuan hmanhmawh takin anin zui chhuak ta nghal a. Chutia an in zui chhuah hnu chuan enge maw chen chu tumah pawh chu țawngzai pawh rello hian an ngawi țhap a, chu sipaiin a a thil rawn sawi khan a țhawng in, an ngaihtuah zui hlawm ani ngei ang. Enge maw chen chutia an ngawih reng hnu chuan Marcus-a chu a rawn țawng chhuak a, Lalpa lam chu hawiin, " Lalber, keini pawh hi kan kalchhuah ve nghal mai angai ani, eng thil dang nge lo thleng leh ang tih kan hre silo," an ti a. Chutah Lalpa chuan, " a buaipui tur in sipai te an awm alawm, chawlh hahdam in mamawh asin," Lalnu chu lo in rawlh ve in, " ni e, helai hmun in rawn thlen ațangin inla buai char char a, hahchawlhna hun reng in la nei bawk silo," a rawn ti ve vat a. Hestia- chu a rawn țawngchhuak ve a, " ni e, in mi duhsakna ah chuan kan lawm khawp mai, mahse eng e chanchin tihte kan va en thli thlai ve phawt ang a, a remchan dan azir in riak tur in kan lo kir leh zawk dawn nia," chutia sawi pah chuan a țhutna ațang chuan a tho nghal a, Marcus-a pawh chu tho ve nghal in, hmanhmawh tak in Lalin chu an chhuahsan ta a. An sipai tlemte te pawh chuan an zui ve nghal a, tichuan sakawr chunga chuang in sipai ho te ral venna khaw dai lam pan chuan an tlan chhuak ta a, khaw dai thing an hung na bul ah chuan sipai enge maw zat hi meichher keng chung hian anlo phu sup sup a, a țhen in thal an keng a, țhenkhat in ngunhnam an keng țhup bawk a, Marcus-a te chu sakawr ațang chuan chhuk vat in, an punkhawmna lam deuh ah chuan an tlan phei nghal vat a, chutia an phei lai chuan sipai hliam tuar pali pang vel hi hlang ah hian an rawn zawn a, hrilhhai hmel tak hian chung sipai hliam te chu an en reng a, reife chutiang a an ding vung vung lai chuan sipai kar ațang chuan nichina Lalin a lo kal sipai Sela- kha a rawn chhuak hlawl a, chutia Marcus-a te ding vung vung chu a rawn hmu a, rang tak a rawn pan pheiin a rawn be sawk sawk a, " Pu Marcus, in lo kal thei a maw, hei hliam tuar enge maw zat kan nei a, mahse ngaihtuah awm lutuk chu an ni lo ve," a ti a. Chutah Marcus-a chuan, " chibai le, kan rawn thleng deuh chiah anih hi, enge chanchin? Hei engtizia nge?" a ti a, chutah chupa vek chuan, " ni e, Veil-ațang khan ramsa mak tak mai an rawn chhuak a, kan chân loh khân ațanga rawn chhuak in min rawn bei thut mai a, mahse kan tihlum thei ta hram ani, pali lai an ni lehnghal, an mak dangdai khawp mai, sawlai piah deuh ah sawn an ruang chu an la dah in ka hria, Puithiam Felix-a khan hal vek tur in min ti a," tiin thil thlen dan chu a sawi sawk sawk a. A thusawi pawh ngaithla zui em em lo chuan ramsa ruang an dahna lam pang ah chuan hmanhmawh tak in an inzui phei nghal sawk sawk a. An pianzia chu a mak ngei mai, lei ah hian an lo dah khawm a, an lu chu ui ang deuh hi an ni a, ngho sei tak an nei theuh a, bâk lian deuh hi an ang ber, hmul pawh an nei lo, an thla hmawr ah chuan kut nge kê zawk emaw ni hi an nei a, an kê chu mupui kê ang deuh hian a awm bawk a, chuan mei sei tak neiin, rul lu ang deuh hi an mei hmawr ah chuan a awm bawk a, an bul hnai a kal ringawt pawh chuan an rim a chhia in mei rim leh thâng deuh nghur hi an nei a, chuvangin an hnaih lutuk duh lo va. Chutia an en lai chuan Lalin a zanriah an kilpui Verna khaw sipai General kha an an bulah a rawn kal hnai a, " sakawlh ang mai an ni, pakhat ringawt pawh ralthuam famkim nen sipai sawmthum laiin an beih rawn a, chutah pawh vanneih thil tak meuh meuh in ani kan tihhlum theih ni," zawi fahran hian a rawn ti se se a. Chutah Hestia- chuan, " a dang hmuh belh in la nei em, zanin ah?" " hmu lo ani mai thei ani, engpawh chu ni se zanin chuan ngawrh deuh hlek in chân tum ila, eng thil nge lo thleng leh dawn kan hre silo," tiin chu General chuan an sawi zawm lehnghal a, Marcus-a chu rawn țawng ve in chu General lam hawi chuan, " ralveng engtin nge in dah ?" " khaw hual hian thing hi kan phun vek a, in kar hlat lo te te a ralven buk siam in sipai sawmnga zel in kan in țhendarh a, mahse underworld veil inhawnna lam ber ah hian kan țhahnem deuh hlek ani e, khaw chhûng hmun hrang hrang ah pawh kan kal kual reng bawk a," " anih tak chu, in remruat dan chu a țha khawp mai," chutah General Hestia- chu an melh zauh a, " keini pawh hi kan in țhendarh nghal mai a tha lo maw, hmar lam ralvenna ah ka han kal ang e, Hestia, rem itih dan in sipai ho te hi lo sem darh mai ta che," an ti a, a sakawr awmna lampang ah chuan a kalsawn ta nghal daih a. Hestia- pawh chuan a sipai ho te pawh chu hmun hrang hranga ralvenna lamah chuan a semdarh nghal chûk chûk a, amah ber chu chulai khaw tawntirh ralvenna ah chuan a awm a, zankhua in chung ramsa an tihhlum tak ang chu chan chhuah leh ngei tum in an cháng țhap a, mahse an cháng chhuak lem lo, khawvar țantirh, leilung pawh a lang thei ta tih vel ah chuan an awmna lam pan hian sakawr pathum hi an rawn tlan dawr dawr a, tu tak ni ang maw ti ni awm fahran hian an lo thlir țawk țawk hlawm a. An lo hnai telh telh a, an awmna an rawn thlen chuan chung sakawr chungchuang te chu Bersin Lal Ixion-a be tur a kal Onesin-a leh sipai pahnih te kha an lo ni a, ding chunga lo thlir reng tu Hestia bul an rawn thlen chuan an sakawr te chu an han tiding te te a, chutah Onesin-a zawk chuan hlim hmel tak a Hestia melh chung hian an rawn bia a, " General, kan hlawhtling e, Lal Ixion-a chuan a sipai leh sakawr tawlailir enge maw zat a rawn chhuahtir dawn anih chu," a rawn ti sawk sawk a. Chutia a sawi tak ah chuan Hestia pawh chu a lawm hmel hle a, " a lawmawm anih chu, tunah chuan rilru pawh a nuam ta huai a lawm, Marcus-a pawh kan hrilh ve nghal vat ang e," chutah Onesin-a chu rawn țawng lehnghal vat in, " anih chuan Kan Lal hnen ah kan va kal phawt ange, kan in hmu leh dawn nia General," an ti zui nghal zat a, tichuan an sakawr chu chak tak khalh in khawchhung lam ah chuan an tlan leh ta nghal vat a. An tlan liam fel chiah tih chuan muangchanga sakawr kal tir beuh beuh in Hestia te ralvenna lam ah chuan Marcus-a chu a rawn lang hlawl a. Chutah sakawr chunga chuan tum mek Hestia- chu rawn au in, " Hestia, enge nizan lam ah te thuthar a awm em, keini lamah chuan an thawm riva reng reng pawh hriat tur a awm lo,"a rawn ti a. Phûr hmel tak a Hestia chu rawn hawiin Marcus-a chu a rawn pan ding nghal chat a. " Keini pawh areh khawp mai, hun ala duh rei hmel sia a, sipai ho te an khawngaihthlak dawn khawp mai," chutih lai chuan Verna khaw sipai General- kha chauh hmel tak hian alo phei chhut chhut a, Hestia chu rawn bia in, " General, Onesin-a te an lo thleng tawh ani maw?" a rawn ti a. rang deuh hian Hestia chuan, " thleng deuh chiah, Lalpa hmu tur in an liam lehnghal anih kha, ti rawh u, i va hmu teh ang u khai, chanchin lawmawm an lo hawn thu pawh asawi tak asin," a ti nghal bawrh bawrh a. Chutia a sawilai mek chuan sipai pakhat hian sakawr liantha tak hi a rawn kai a, General chuan sakawr chu lo man vat in a chungah chuan a chuang a. Hestia- pawh chu a sakawr a lawn ve nghal vat in, an pathum chuan Lal in lampan chuan an in zui ta nghal a. Lalin chhung anva luh chuan, Lalpa te nupa leh Onesin-a leh a kalpui sipai te, Lal upa sawm rual vel hi anlo awm a, enge maw sawi hian anlo ti ti mek a. Marcus-a te pawh chu țhutthleng ruak ah chuan țhu ve nghal in, Hestia chu a rawn țawng chhuak nghal a, " Lalber, engtia hma lak zel tur nge ni ang?" Lalpa chuan a kut a lehkha zial hlai tak bih ngur ngur pah hian, " General Hestia, in ruahman dan ang in thil a kal dawn anih hmel, Lal Ixion- an a lehkha alo hawn tir ah chuan, sipai leh ralthuam, sakawr tawlailir enge maw zat chu a rawn tir dawn a ang khawp mai, tukin zing hian an lo chhuak hman tur ah ngai ila, tlai lam pang ah chuan an lo thleng hman mai thei ani." a ti a. Chutah Marcus-a chu rawn țawngchhuak ve in, " Lalber, engpawh ni sela, Bersin- khaw sipai te chu an rawn thawkchhuak dawn tih a chian tho chuan rem lo ruat fel mai hi a țha ani, kan hun hi a tep têr tawh ropui si a, tunah Veil- a in hawng tawh a, chumai ani lo, Veil-ațanga sa hlauhawm lo chhuak pawh in min bei tawh anih kha, vawiin lamah engzah nge lo chhuak leh ang tih tuman kan hre silo, tin, Veil- hnaih a khaw hrang hrang te pawh tunah hian mangang in anlo buai tawh mai thei bawk a, chuvangin kan hmanhmawh hi a ngai tak meuh meuh ani," a rawn ti a, chutia a sawi zawh hnu lawk chuan Verna khaw sipai General pakhat kha a țhuthmun ațangin a rawn ding chhuak a, Marcus-a en pah hian, " Ni e, i remruat dan ang chuan rel fel vat ila, buaina kan pumpelh ani mai, kan hma hun lah sawilawk theih kan nei bawk silo, keichuan in ruahman ang ang kha kha pawm mai e," a sawi zawh chuan Lalpa chu an melh zauh a, a țhu leh ta a, chutah Lalpa chu lo țawngchhuak in, " Pasaltha te u, in ruahman dan ang ang in kan kal thei alawm, ralrel thiam in ni a, in rel ang ang chu ka pawm thlap e," a rawn ti a. Chu veleh Hestia chu ațhutna ațang chuan a rawn ding chhuak a, an vai a melh kual diat diat pah chuan tih hian a rawn rel a, " Lalber, kan ruahman dan chu hei hi ani e, Verna sipai General lam chu an hawi a, " Kan General hian Bersin sipai thenkhat leh Verna sipai thenkhat hi hruaiin Eastland khaw lam chang sela, chuan Captain Onesin hi kalchhuak tur a kanlo ruahman tawh na chungin helaiah hian a hmun lo nghak zawk mai sela, chuan General Thöt (verna khaw sipai general tho) khan Verna sipai thenkhat ho in Clenith khua chang bawk sela, chuan Bersin- sipai la bang zawng chu Urdin khaw lamah kal bawk se, Keiin Delain sipai ka hruai ang a Gogonia- lamah ka kal ve thung ang, chuan Marcus- pawn Delain a sipai thenkhat hruaiin Phyra- khawpui pan bawk se, tiin rem kan ruat chhin a, enge in ngaidan ni ve reng reng," tiin a ruahmanna chu an sawi zung zung a, chutia ala din reng lai chuan Verna sipai General kha lo țawngchhuak leh in, " chutiang bak a ruahmanna țha a awm thei dawn chuang em ni? Mahse Delain leh Albina- khua hi, venhimna pek an ngai tho dawn lawm ni, " a rawn ti a. Chutah Hestia vek chuan, " ni e, General, Albina ah chuan sipai kan in dah tawh alawm, Captain Aetes-a leh Pontus-a kaihhruaiin engemaw zat chu an awm sa a, mahse Delain ah sipai chu kan in dah tam zawk, ngaihtuah em em chu angaih loh ka ring, General Klent- in Delain chu a țhutchilh tawh sa reng a," a rawn ti leh a, chutah Lalpa lam hawiin a bu zauh a, a țhutna ah chuan a țhu leh ta a, engemaw chen an ngawih țhap hnu chuan Lalpa chu a rawn țawngchhuak ve ta a, ngaihsan hmel tak a Hestia en chung hian, " General Hestia, i ruahmanna chu a țha khawp mai," a rawn ti a, Marucs-a chu " enge i ngaihdan ve?" ti ni awm tak hian an melh a, Marcus-a pawh chuan remti tih nan alu alo bu ve nghauh a, chutah muangchang hian a rawn ding chhuak a, Verna sipai General lam hawi in zawi fahran hian, " engpawh ni se, chutia ruahmanna kan siam tawh rau rau anih chuan, Bersin- sipai te chu kan nghah ve kher a țul dawn ami? Keichu Delain lam a kir vat mai ka duh asin, bakah Phyra- pawh Delain ațang chuan a hnai zawk reng reng a," tiin a rawn sawi ve a, chutia a sawi hnu chuan Hestia pawh chuan rawn tuihnih ve in, Lalpa lam chu an hawi a, " Ni e, Lalber, Marcus-a sawi ang chuan keini chu kir leh mai ila a pawi dawn em ni? Helai a lo awm khawtlai ringawt pawh kha awmzia a awm vak chuang lo a," chutah Lalpa chuan, " in thu ang chu ni rawh se, ni e, helai hmun a lo nghah ringawt pawh kha hun khawh ralna mai mai ania, chanchin chu kan in hrilh leh thei tho a," chutia a sawi zawh hnu chuan Marcus-a leh Hestia- chu tho chhuak in Lalpa chu chibai an buk a, tichuan Lalin chu an chhuahsan ta a, Lalin kawt ah chuan Delain sipai, Hestia hnungzui tute pahnih hi anlo awm a, Hestia in a eng eng emaw a hrilh hnu chuan hmanhmawh deuh a sakawr a chuangin sipai ralvenna lam ah chuan an tlân ta dawr dawr a. Muangchang hian an pahnih chuan Lalin chuanhnuai zawk kawt zawl zau lam chu an pan thla hnek hnek a, zawite te a in be chung hian Lal sakawr dahna in ah chuan an in zui lut a, rei vaklo hnu ah chuan an sakawr ve ve chu an rawn kai chhuak a, Marcus-a chu a lawn hman tawh, chutih lai chuan hmanhmawh tak hian Delain sipai thuam inbel sipai pakhat hian chak tak a sakawr rawn khalh in, an lam pan hian a rawn tlan hlawk hlawk a. Ding chung hian chu sakawr chungchuang pa chu an lo thlir a, alo hnai zel a, an bul a rawn thlen chuan sakawr atang chuan a rawn tum thla hnawk a, chutah zahna entirnan alu an bu zauh a, Hestia chuan, " Delain ațangin em ni? Enge ni ta?" chu sipai chuan a lehkhazial kenlai chu Marcus-a pek pah hian, " General Klent-a thuchah ka rawn keng a," a ti a. Marcus-a chuan rang deuh hian lehkha zial chu an pawt pharh zung zung a, enge maw chen a bih ngur ngur hnu chuan, Hestia chu a pe a, Hestia pawh chuan rang tak a lo ban vat in, an chhiar ve sawk sawk a, chutih lai chuan Marcus-a chuan sipai hnenah chuan, " Engtia hria eng in nih a, sipai engzah vel nge an nih?" tiin an zawt a, chutah sipai chuan, " ka pu, thuthang a kanlo hriat danin Phyra- khaw bul lawk ah underworld veil- a in hawn thu kan lo hria a, chuvangin General Klent- a chuan Albina atangin Captain Pontus-a leh sipai enge maw zat a chah a, chuan Captain ho chuan chu thuthang chu hriatchian tumin Phyra- lam pan chuan kan chhuak a, mahse Krinitha- ramhnuai kan thlen in nunau enge maw zat chauh hmel tak tak te kan tawk hlauh a, chumi te chu Phyra- khua ami te an lo ni a, chuan an sawi dan in an khua chu Goth- hnam kawlhsen hovin an rawn rûn thut thu leh, an awp tak thu te an sawi a, chuan Goth- hnam ringawt nilovin Dawi lam thiam tam tak leh mihring lian leh rapthlak pui pui te pawh an tel thu te pawh an sawi a, chuan underworld veil chu an zinga dawithiam thenkhat ten thunun in, an tih zauh belh zel a, chu veil ațang chuan ramsa rapthlak tak tak lo chhuak in, khaw mipui te chu an chaw ah chung ho chuan an pe țhin ani awm e, sipai ringawt pawh sing li vel lai an ni ang," a ti a. Chutia a sawi lai chuan Hestia- lehkha bih ngur ngur pawh chu a rawn hawi chhuak ve a, sipai hnenah chuan, " Phyra- lo khaw dang beih an nei em," " Ka pu, Eastland- leh Khorbi pawh Phyra- an beih hma chuan an lo la tawh tih an sawi bawk," chutah Marcus-a chu sakawr ațang chuan a rawn chhuk a, Hestia hnenah chuan, " Lal Hinarul- kan hrilh angai dawn anih chu, thil a buaithlak dawn hle mai," a tia a, chutah Hestia chuan, " keimah in ka han kir leh mai ang e, kan sipai te i lova hruai khawm zawk dawn emni?" " awle, mahse kan hmanhmawh deuh chu a ngai dawn ani, min lo nghakhlel tawh khawp ang," chutia țawng pah chuan a sakawr chungah chuan a chuang leh nghal a, sipai pawh chu sakawr a lawn ve in, ralvenna lam pan chuan Hestia chu an tlansan ta a. Khaw tawntirh sipai hmun anva thlen chuan Hestia ina a hruai Delain sipai ho te chu a kokhawm sawk sawk a, thil thlen dan chu zualko sipai nen chuan an hrilh sawk sawk a, chutianga thil thlen dan vel an sawi lai mek chuan Hestia pawh chu a rawn thleng chawpchilh nghal a, Marcus-a hnenah chuan, " Lal Hinarul- pawh in sipai rawn tirh a tum a, Bersin- khaw sipai enge maw zat chu min pui tur in an lo chhuah in beisei phawt mai teh ang," " a lawmawm anih chu, engpawh chu ni se, lo nghak hman kan ni tawh silo a, chuvangin anlo thlen hun ah min lo zui ve mai se ani mai lawmni," tiin Marcus-a chuan an chhang a, Hestia pawh chuan,. " Ni e, kalchhuak nghal mai ila a tha lo maw? Chawhnu lamah lo chuan an rawn thleng hman dawn chuang silova, " an tih chhunzawm a, an sakawr ah chuan chung sipai ho chu an chuang sap sap a, tichuan Verna khua chu hmanhmawh tak a tlanchhuah san in Delain- lam pan bawk chuan an tlan kir leh ta a. Hmanhmawh a tlan an ni bawk a, kawnglak a hah chawl lovin an tlan char char a, khaw thim dawn ruai ah chuan Delain khaw dâi an thleng thei ve tawk a, ralveng pawh anlo in dah țha tawh khawp mai, Delain khaw dâi ah chuan Puanin an lo kaih belh thluah a, chutah chuan sipai engemaw zat hi ralvengin an lo awm a. A zawt nge a hrilh zawk emaw ni, Hestia chuan chung sipai ho chu engemaw ni hi a sawipui leh țhin a, khaw chhung lampan in an tlan zui ta zel a, an puanin awmna, sipai awmna lam ah chuan kal tlang nghal in, Hestia leh Marcus-a chu an puanin ah chuan an in zui lut ta nghal a, puanin chhung ah chuan chhiahhlawh mipa naupang kum sawm leh panga bawr vel tur hi mi pahnih an lo awm a, chu mi te lo chu inchhungah chuan an lo awm lo, General Klent- pawh alo awm lova, an thirkawr te chu an phelh sawk sawk a, an han in silfai leh te te a, chutih lai chuan chung mipa naupang pahnih te chuan dawhkan ah chuan an eitur in Zanriah tuihnai tak hi anlo buatsaih sak a, an in tihfai zawh chuan dawhkan chu kil dun nghal in riltam hmel tak hian an ei nghal bawrh bawrh a. Chumi pah chuan enge maw ni hi sawi in an in be sep sep a, chutianga an awm lai chuan General Klent- pawh chu chauh hmel deuh leh a thirkawr nen a la inbel chung hian puanin ah chuan a rawn lut ve ta hlawl mai a.
Marcus-a leh Hestia- a rawn hmuh chuan a hlim hmel deuh a, rawn phei tlang nghal in dawhkan chu a rawn kil ve nghal sawk sawk a, hlim hmel deuh hian, " in lova thleng hma thei zawk ve a, in chau bawk em?" ti a zawh pah hian an pahnih chuan a melh tawn zak zak a, Hestia chuan, " chau lo ve, chanchin engmah pawh kan in hrilh leh ta silova, a zia lo khawp mai, kan buai nileng zankhua ani mai," chhiahhlawh naupang te chuan General Klent-a chu eitur an rawn chhawp sak ve a, General Klent vêk chuan, " helam ah chuan kan buai em em lo a, tak a, Underworld Veil- a in hawn thu te kha kan lo hria a, enge chanchin ni ta zel?" hriat chak hmel tak a melh chung hian Hestia- chu an zawt a. Chutah thil țhial nuau nuau chung hian Hestia chuan, " ni e, an khaw dâi lawk ah khan Veil- chu a in hawng a, nizan khan chu Veil ațanga lo chhuak ramsa mak tak mai khua a luh tum enge maw zat chu an tihlum tak asin," chutia a sawi lai mek chuan, uain in pah hian Marcus-a chuan a rawn pawt chat a, " underworld veil - chu Verna khaw piah lawk Bersin leh Nothland- khaw bul lawk ah ațangin a in hawng a, mahse khawilai thleng nge a in hawn a, eng chen nge tih chu kan la chhui hman rih lo ani, chuan khaw tê leh thingtlang khua, Ethnosým- enkawlna hnuai a awm ho, Eastland, Clenith, Urdin, Phyra, leh Gogonia- te ho khaw bul lawk ah hian a in hawng tlang a, chuvangin heng thingtlang khua ho venghim tur hian Verna leh Bersin khaw sipai te kan pun a, mahse i lehkha kha kan lo hmu si a, kan lo kir leh ta nghal vat ani, mahse an remchan dan angin min pui tur chuan an lo chhuah tho chu kan han ring ringawt a," chutah Klent- a chuan, " anih tak chu, engpawh nise lehkha a ka lo ziah tawh ang khan Phyra- khua chu Goth- ho in an rawn bei ani awm a, chuan Eastland leh Khorbi- pawh Phyra- an beih hma hian an lo la tawh bawk a, mahse Goth- ho ringawt chu anih ka ring thei chiah lo ani," tiin enge maw ngaihtuah zui ni awm tak hian a chal an ti chuar nung nung a. Chutah Hestia in a, " engthil emaw ni chu a in phum ru ah i ngai deuh tihna em ni?" ti a a rawn zawh tak ah chuan, bûk nghauh nghauh pah hian, " ni e, Captain Pontus-a ten a Phyra-khaw mi raltlan an va hmuh ten a an sawi dan ațang hian ka ringhlel deuh chu ani, a chhan chu, sipai lian leh hmel rapthlak pui pui bâk ah dawithiam pawh an tel ve tiin an sawi a, chubak ah, Underworld Veil- in hawng kha chung dawithiam ho chuan engtin tin emaw a tiin an tih zauh belh a, chuta țanga ramsa rapthlak leh mak pui pui lo chhuak te chu an duh duh a ti kawiin, khaw mi thenkhat an eitur in an pe te an la ti deuh deuh lehnghal a, chuvangin Goth hnam kawlhsen ho leh misual Zeddicus-a kha an thawk ho anih kan ring thla ngawt a," Hestia chuan, " thil ni thei chu ani tho mai, engpawh ni se naktuk zing khawvar rual in Phyra- lam pan tur a kan sipai te kan khâwm angai dawn anih chu, Aetes-a hi Albina-ah ami ala awm?" an ti zui nghal zat a, " aw ni e, mahse Pontus- a khan sipai engemaw zah chu alo hruai phei a, sipai chu a ngah vak tawh lovang," " anih chuan chah belh tawh lo mai ila, naktuk zing ah Marcus-a nen hian Phyra- lamah chuan sipai enge maw zat chu helai ami ho hi kan hruai phawt angai dawn ani, Bersin- sipai te pawh an lo thleng ve vat chuan ka ring a," Marcus-a chuan thawh nulh pah hian, " Kan buaina chu a thuahhnih kher mai, mahse eng kan ti lo tur ah ngai phawt ila, Siraka-i pawh awlsam te in kan hneh thei kha ani a, tunah chuan mihring pangngai vek an ni dawn bawk a," chutia sawi pawh chuan a chhiahhlawh naupang te'n a an siamsak mutbu lam chu zawi muang hian a pan chhut chhut a. Chutah General Klent-a chuan, " i țhiannu Penelope-i nu pawh a dam tawh khawp asin, ka va kan ve fo va, an fel nufa khawp mai," a mutbu a mut pah hian Marcus-a chuan, " a lawmawm anih chu, kan kal hma a hmuh chu ka duh viau na in, pawilo, dam hi han hauh phawt mai ila," tiin a puan beram hmul ațanga siam lum hmel leh chhah tak mai chuan a in khuh hlup a. Chutah rawn hawi chhuak leh in, " ka mutsan mai ang che u, Hestia- nang pawn hahdam i mamawh khawp ania," an rawn ti zui nghal zat a, chutah Hestia chuan, " ni e, hahchawlhna hun reng reng ka la nei lo ani, " Klent-a chuan Uain chu an thlit belh leh te te a, tichuan muangchanga in dun in eng eng emaw an la sawi chhunzawm ta zel a. Marcus-a chuan a mutthilh san ta daih a. Rei tawk fang an pahnih a uain an in dun hnu chuan mut zâi an rêl ve ta a.
Hestia in a Marcus-a a rawn kaihthawh chuan khua ala var chianglo deuh a, leilung pawh ala lang chiang meuh lo. Hestia chu a thirkawr nen alo in thuam ap tawh a, sa hrang lian deuh hi a khel mial mial a, Marcus-a pawh chu a tho sawk sawk a, hmanhmawh tak a inti faiin a thirkawr chu a in bel ve nghal a, țhutthlenga țhut pah hian Hestia chuan, " sipai ho te pawh chhuak turin anin peih hlawm tawh ang, nichin khan chanchin ka hrilh tawh a," a bula rawn țhut pah hian Marcus-a chuan, " i van rang ve a, engzah vel nge kan hruai dawn tak?" a ti a, a hma dawhkan a grep rah bâwr awm chu la in a hmawm zauh zauh a, thil țhial tuau tuau pah hian Hestia chuan, " Nizan khan Klent- nen uain kan in hnem mah mah a, zingah ka hrilh ta mai anih kha, sangkhat vel hi hruai phawt ila ka ti deuh a, a chhan chu engmah han hriatchian kan la nei bawk silo ka ti deuh a," " a țha alawm, anih chuan chhuak tur in lo in peih tawh se, achhan chu chawhnu her vel ah tal kan thlen hman loh chuan zân thim hnuai ah chuan kan che buai palh hlauh ang e," chutia Marcus-an an tih tak ah chuan Hestia- pawh chu a tho țuah țuah a, " aw le, ka lo va hrilh ang e," tiin a tho chhuak a, kawngkhar sir a a thir lukhum leh ngunhnam chu la in puanin ațang chuan a chhuak ta a. Hestia chhuah hnu chuan Marcus-a pawh chuan hmanhmawh tak hian dawhkan a thei rah leh eitur engemaw chu ei sawk sawk in, uain pawh no li vel lai a tlak pawp pawp a. Chutah a țhutna ațang chuan thovin a mutna sir a a ngunhnam intung chu muangchang hian a la a, apaina ah chuan a thun ta zân a, dawhkan a a thir lukhum pawh chu la in rei ngial a thlek vang vang hnu chuan a khum leh a, chutah a awmphaw rangkachak, dâr, thir leh tangkarua thuah li a thuah, a phaw hmai a lei leh van leh tuipui te, ni leh thla leh arsi lem awm leh atlâng a tuifinriat lem lui anga luangkual lem awm chu an thlek leh vawng vawng a, He a awmphaw hi Greek pasalțha huaisen leh lâr ber, Myrmidon lal Peleus-a leh Tuipui lasi Thetis-i te fapa Achilles-an a Troy kulh a beihna a a hman kha ani a, A unaupa Patroclus-a Trojan lal fapa Hector-an amah emaw ti a a thah khan, Patroclus-a chu Achilles-a ralthuam in a in thuam a, Trojan sipai ten chu Achilles-a thawmhnaw leh ralthuam Patroclus-an a a hâk leh a ken chu an la vek a, chuvangin Achilles-a nu Thetis-i chuan afapa tan mei leh kut themthiamna Pathian Hephaestus-a chu ralthuam dang a siam tir leh a, chuan chûng ralthuam nen chuan Achilles-a khan Hector-a kha beiin a that anih kha. Heta Achilles-a hman awmphaw leh ralthuam chu Achilles-a athih khan Ithaca Lal Odysseus-a, Trojan ho bum nan a thing sakawr lem lian tak greek sipai ho ina an siam ngaihtuah chhuak tu pa khan kawl in, Achilles-a fapa Neoptolemus-a a pe leh a, chuan Neoptolemus-a chuan Marcus-a pa pa, a pu, Baculla Lal Orestes-a hnenah in ngaihhruih nan a pe leh ta ani. Chuan apa in a roh tak a a kawl chu, Marcus-a pa Alpheus-a chuan chhawm zui zel in, Marcus-a hian a lo hmang leh ta ani. Chutianga enge maw ngaihtuah niawm tak a a thlek vung vung hnu chuan, muangchang hian a ban a, chutah an rum nghut a, puanin pawn lam pan chuan muangchang hian a in her a, a chhuak ve ta a. Khua pawh a var chiang tawh a, mahse ni erawh alo la chhuak lo, Puanin pawn an chhuak chiah chiah tih chuan Hestia- chu sakawr chung a chuang in alam pan in alo tlan mek a, Marcus-a bul a rawn thlen chuan chhuk chuanglo hian a rawn bia a, " Marcus, kan in peih vek tawh e," an ti a, chutih lai chuan chhiahhlawh naupang pakhat hian Marcus-a sakawr chu a rawn kai phei mek a. " aw le, ka lo phei nghal," tih pah chuan a awmphaw leh fei chu sakawr chung ah chuan dahin, amah pawh chu a lawnkai ve nghal a. Tichuan an pahnih chuan sipai ho awmna lam pan chuan an tlan phei ta a. Sipai ho chu ralthuam famkim nen sakawr chunga chuang chung hian anlo ding thap a. An hma zawn ah chuan Marcus-a chu sakawr in an tlan kual a, chutah ring tak mai hian, " Indona rapthlak tak kan nei zo chauh a, tunah Indona bawk kan hmachhawn leh dawn ani a, hahchawlhna hun pawh kan la nei meuh lo tih ka hria, mahse Greek mi huaisen hnam kan ni a, Goth- hnam, mi hnuaihnung leh mihring pawh tling zolo mai mai tuk dawl tur chuan kan la chak tawk a, hnehna pawh kan chang ngei ang," an ti a, chutia a sawilai chuan sipai ho chu an lo au rual dual dual a. Chutah sawizawm leh in, " Anni aiin tlem mahila Pathian te chuan min awmpui reng a, Indona Pathian ropui Ares-an kan hma a hruai zel dawn ani, chuvangin zam lo vin bei ula, in zahawmna chu thawk chhuak ang che u," an ti zui leh a. Chutia a sawi zawh chuan a in her a, a sakawr chu an vaw tlan ta nghal a, a hnungah sipai te pawh chuan rawn zui nghal in Delain khua chu an tlan chhuahsan ta a.
...................................................................................................................(end chapter 11).
Comments
Post a Comment