He boundary hi kulh ang mai hian khaw hual hian bang ang maiin a ding lurh a. Kan hriat thiam dan tur chuan khaw chhung hmuh theih deuh reuh si, darthlalang tui a kan tih huh avanga thil kan hmuh fiahlo ruai ang deuh hi ani a, khaw chhung leh khaw pawn ațang pawh in a in hmuh fiah theihloh ve ve ani.
Marcus-a ten chulai hmun an thlen ve meuh chuan makti in an hawi nasa ngei mai,
Isle khaw bul Sýnoro- bang bul vel ah chuan Puithiam kawrfual ha tamtak an lo awm țhup tawh a, an chung zawn van boruak ah te chuan nungchan zir ni awm tak hian Dragon lian tak tak hi sawmli emaw sawmnga vel lai tur hi an lo thlawk kual sup sup mai lehnghal,
chutih lai chuan Sýnoro- hungna chu a țek leh zuai țhin a, a chângin hmun khat lai te hi a rawn alh leh hluah hluah bawk a, mahse a hnu lawk ah a ngaite in alo awm leh zel mai anih chu.
Chung thil ropui nge rapthlak tak zawk chu enge maw chen an thlir vauh vauh hnu chuan chuti lam pan chuan an tlan ve nghal a.
Kalu- chuan Darthlalang ang deuh bur chhung ațang chuan Nightwisp- chu a thlawhchhuah tir a, tichuan chu Nightwisp- chu chunglam ah thlawk chho vang vang in, reife hnu ah alo thlawk chhuk leh a, boruak ah hian chesawn lo hian a awm ta reng a, a êng chu alo nasa deuh a, a var a êng chu a pawl deuh rawng hian a rawn in thlak a, zawi muang hian a eng ah a rawn inthlak leh ta tial tial a.
Neira, Kalu,Therion leh an hak ang chi Puithiam kawrfual ang ha ve mi pasarih te chuan boruak a ding êng reng Nightwisp- chu a hnuai zawn ațang hian an rawn din hual a,
chunglam a an ban pahnih phar chhovin dawi hla enge maw ni hi ring fahran lo hian an chham rual dual dual a, enge maw chen an chham hnu chuan an kut ațang chuan thawk leh khat ah țek ang ber in ka hria,
thil țek zuai zuai hi alo awm a, chuan chu thil țek eng pup chu kal chho zel in Nightwisp- eng pup chu a han chhun hlawm a,
chutia reife an kut a thil țek eng zung ina nightwisp a chhun hnu chuan nightwisp eng pawh chu alo lian telh telh a, chu eng chu zawi zawi a lo danglam in meialh hlawm ang mai hian a alh hlup hlup a,
mahse meialh chu ani bawk si lo,
tichuan chu nightwisp meialh ang mai a eng alh pup pup ball ang mai a mum chu thawklehkhat ah rang deuh a thlawk thut in a bul lawk a Sýnoro- kulh ang maia kual pup chu a su chawrh a, a puak darh zui nghal a,
chutia a puahdarh hnu chuan a den na lai chu a țek chuaih chuaih a, hmun hrang hrang ah hian a rawn puak dur dur a, a țek chuaih chuaih reng bawk a,
chutih lai chuan ngai teh, van chung sang tak a chhum var thianghlim tak te chu an bo zo va, khaw thiang tak te chu reilo te ah a rawn thim in chhum dum lian pui pui avang in an bo zo ta.
Ruahthimpui a rawn thleng ngei dawn anih hi tih tur khawp in mitkhap kar an khua chu a rawn dur nghal khup khup a, thli lah chu a tleh țan ani nghal mai bawk a.
Chu Sýnoro- kulh bang sang tak chu reilo te an țek leh chuaih chuaih in, a rawn alh hlup hlup a, a rawn khu rum rum a, tichuan ral riai riai ang mai hian chunglam ațang chuan arawn ral thla telh telh a, chu veleh Sýnoro- chhûng lam Isle- lam ațang chuan Dragon rapthlak pui pui hi an rawn thlawk chhuak sup sup a, a țhen te phei chuan lu pahnih lai an neih anih chu.
Chunglam van boruak ah chuan Neira- te ho Dragon nen chuan an in bei a, an ka ațang a meialh rapthlak tak tak tichhuak in ring tak tak in an hram ruai ruai a,
van boruak a an in beihna avang chuan Ni pawh alang theilo va, chhum dum in chulai phaizawl chu a tuam but but reng a,
Van boruak a in beihna rapthlak tak ka thlir dauh dauh lai chuan thawklehkhat ah thawm dang a rawn chhuak leh ta.
Isle- khaw chhung lam ațang bawk chuan Dargon tho, a hma ami te aia te deuh Bawng chal tiat tiat tur hi tam tak an rawn thlawk chhuak leh sup sup a, mahse tuna mi te hi chu Van chung sang lam ah nilo vin, leilam pan in an rawn thlawk chhuk ve thung a, chuan an lo hnai zel a, Druid- ho awmna leh Marcus-a te awmna lam chu rawn pan ding zel in, an ka ațang chuan meialh rapthlak tak tak an rawn tichhuak a, mihring ho chu an rawn bei nghal a, Neira- leh a ho te pawh chuan an lo dawh mai mai bik lo, a țhen boruak ah an thlawk chhuak ve ta a, an wizard fire leh dawi hrang hrang hmang chuan chu Dragon kawlh tak tak te chu an lo bei let ve a,
chutihlai chuan ngai teh, Isle khaw lam ațang bawk chuan thawm dang alo chhuak leh ta,
Marcus-a ten a an thah tak, ramsa kawlh rapthlak tak lu pahnih nei, sakeibaknei ang mai leh dragon vun ang mai nei chu sang tam tak hi an lo lang leh ta, an ka ațang chuan meialh nasa tak hi an rawn phuh chhuak tuarh tuarh a, Druid- ho awmna lam ah chuan chak tak mai hian an rawn tlan dawr dawr hlawm a.
Chuan chung ramsa ho hnung ah chuan lei sipai, Siraka ina a dawi hmanga asiam, Athánatos- hmel rapthlak tak tak pu mi leh feet sawm leh paruk vel lai a sang tur hi za rual vel zet thir kawr ha a, chemsei rapthlak pui pui keng hian an lo kal rual țhup țhup a.
Chutih lai chuan Isle- khaw chung zawn leh an in beihna chung zawn boruak ah chuan rapthlak tak a nui uarh uarh thawm hi a lo chhuak a.
Chet lak ngaihna pawh hre lovin sipai ho te chuan chu in beihna rapthlak tak mai chu an thlir țhup ringawt a,
indona mual ațang chuan Neira- chu hmanhmawh tak hian chung sipai ho te awmna lam ah chuan alo phei a, Marcus-a hnenah chuan,
" i sipai ho te hian khua hi an lut tur ani, sawng sipai Athánatos- ho te saw su tlang ang che u, Therion-a leh a ho te hnung saw zui zel ula, in kawng anlo tih kuak sak zel ang che u, chuan Mipui nunau ho kha tân in ah Siraka in a dah hlawm maithei bawk a, chung ho chu hruaichhuak ula, Siraka i chu kan kut ah dah ang che u, kan theih anga chak in kan rawn zui ang che u, tunah "
chutia a sawi zawh chuan Neira- chu boruak ah thlawk kang in indo na hmun lamah chuan a chak deuh mai hian a thlawk phei leh nghal a.
Chumi lai chuan Marcus-a te hnunglam ațang chuan Dragon lian tak tak mai hi za têl teh meuh mai an rawn thlawk phei a, chung Dragon ho chung ah chuan Druid dawithiam ho an chuang far mai bawk a.
Rang tak hian Marcus-a pawh chuan a ngunhnam phawiin a Sipai ho te lam chu an hawi a, chutah ring tak mai hian,
" sipai huaisen te u, in ropuina tur chu thawk chhuak rawh u, in hma ah sawn chawimawina chuan alo nghak reng che u, in chakna chu hmang ula, mipa in nihna chu lan tir rawh u, vawiin ni hian kan hmelma te hi kan nuai chimit vek tur ani, tumah kan hma ah dingchhuak an awm lovang, nunau te zawng chhuak ula, hmun him ah hruai ang che u."
Sipai ho te chu Marcus-a thusawi avang chuan phur tak mai hian an au dur dur a, an ngunhnam te chu vanlam hawiin an lek chhuak a,
Marcus-a chuan a ngunhnam a Isle- lam tin pah chuan ring tak mai hian,
" tunah.. "
ati vak a, tichuan Sipai Athánatos- te leh ramsa rapthlak pui pui te lam pan chuan chak tak mai hian an sakawr chuan an tlan phei ta hum hum a.
An in tawhchilh a, an in sat a, an in vit a, an in veng pah bawk a, chutianga inbeihna rapthlak reng reng chu leilung piantirh ata vawikhat te mah ka la hmu ngai lo a, a awm leh tawh ngai hek lovang.
Marcus-a sipai te pawh chuan huaisen tak in an bei ve zel a,
thitheilo Pathian ten an thinlung ah huaisenna an tuh anih loh pawh in huaisenna thlarau vak vel chuan a chenchilh ani tal ang.
Marcus-a ang reng reng a insual thiam leh hriamhrei chelek thiam reng an awm lo, a huaisen in hlauh na reng reng anei lova, hnehsawh tak leh mahni in ring tawk tak in hmelma bitna lai a tawn tlang a, a sipai ho te chuan an rawn zui nghal vat zel bawk a.
Tin, Therion-a leh a țhuihruai dawithiam țhenkhat ten hma an hruai sak a, nasa tak in hmelma rapthlak tak te chu an bei zel a, chung ho puihna avang leh an hruaitu Marcus-a huaisenna avang chuan Sipai ho te pawh chuan hma an sawn chak hle a, reilo te chhung in khaw chhung an lut der mai anih chu,
khaw tawn tirh leh khaw dai vel lei leh van boruak ah te chuan nasa tak in Neira- te leh Dragon rapthlak tak tak te chu an la in bei reng a, mahse a rei telh telh a Siraka-i thiltihtheihna leh chûng a țhuihruai ho te chuan Druid- ho chakna chu an chelh lo telh telh a.
Chung dawithiam ho indona rapthlak tak thâwm chuan Isle- phaizawl chu a nghawr nghing dur dur a, an fei leh phaw inchhun ri leh au thawm te chu van chung sang boruak ah te chuan khawpui ri ang mai a thangkhawk in a ri hum hum a, van chung sanga Dragon ho inbeihna te chuan lei ah mei leh kat a sur tir hum hum reng bawk a. Chuti ang reng reng a inbeihna rapthlak leh nasa chu a la awm ngailo.
Marcus-a te chuan rin aiin hma an sawn chak hle mai a, mahse hmelma te hi an tam mai piah lam ah an lian in an chak em em a, sipai pathum vel in a mi pakhat an beih zel angaih avangin duh anga chet lak mai mai a theih bikloh.
Nileng deuh thaw in an in bei a, a tawp a Druid- dawithiam ho thinrim tak tak ten a an thiltihtheihna ropui leh mak tak tak an han hman meuh chuan Siraka-i sipai siam chawp, thi theilo antih mai mai te chu an lo thi thei chiang khawp mai, chumai ala nilo, Siraka-i tawmkuk leh lung a sak a in mum pul maite pawh chu an hual ta a.
Chutih lai chuan General Hestia- leh a ho te chuan Leihnuai tan in rapthlak tak mai chu an lo luhchilh ve mek a, mahse an rinloh ang tak maiin chu tâin chu an lo veng rip hle mai, sipai țha țha ni mai awm hian a lo khat lûk a, tawh an khirh in an kawlh hlawm bawk si a, mahse Marcus-a hrilh angin Hestia-leh a sipai te hian beih dan an thiam kher mai,
sipaite chu tlar hnih ah an in tlar a, an thir lukhum in si țhap khawp in an in si țhap a, an awmphaw chu chîp tak in an keng bawk a, chutah hmelma lama phei rual zel in, tlar hnih na ami te chuan an feiin chung sipai milian te chu an chhun rawn chiam a, an talbuai lai tak in thlar hma ami te chu an che chhuak leh țhin ani.
Siraka-i hian Isle- khaw mipui te chu leihnuai tânin rapthlak tak ah hian alo khung khawm vek a, a dawi enchhin nan leh inthawi nan a lo hmang țhin anih chu, chungte avang chu ani ngei ang, mi tlemte bak tânin ah hian an lo awm lo,Chutianga an in beih mek lai chuan Marcus-a leh a țhuihruai te pawn chu leihnuai tânin chu an rawn lut ve mek a, sipai te chuan tânin a tang an hmuh ang ang te chu hruaichhuak in, an awmphaw leh ngunhnam a veng chung zel in khaw dai lam hmun him deuh chinah an va dah zel a, an va dahna chu a țhenin anlo veng bawk a, sipaite in pekna hi a ropuiin an chhuanawm takzet zet ani. Hmelma sipai te chu an that mang titih tawh a, thi thei lo ang deuhthaw a siam ni hlawm mahse Marcus-a chuan a beih dan tur alo hre kher mai, sipai pali vel in pakhat zel bei mahse Marcus-a hrilh ang in an lû an tan sak hmasa ber a, chutah an ban bul ret ah tan leh in an khup achin an tansak leh țhin a, chutiang chuan che theilo vin an siam țhin, mahse chutiang kher lo pawh in huaisen tak in Marcus-a sipai te chuan an bei a, hneh tawh sa ang ah ngaiin an chakna tha tawp ber thleng in an sual țang țang zel a. Nunau ho hmun him a hruai a an kal avang leh an va dah na hmun a lo veng pawl te an awm bawk avangin chu leihnuai tânin ah chuan General Hestia leh sipai tlem a zawng nen bak chuan an awm tawh lo. An hmuh theih tânin zawng zawng chu a ruak huai tawh a, an awm tawh lo anih ring in chhuah mai an tum a, mahse chutih lai chuan chu leihnuai tânin chhungril lam ațang chuan hmeichhe na tuar țe ri hi alo ri chhuak țhawt a. Chutah ramsa rapthlak tak a hram ri ruah ruah leh zawi fahran a dawi hla chham thum bul bul ri hian a rawn zui nghal a. Marcus-a te chu rang tak hian an hawi let a, an ngunhnam leh awmphaw chu in ring tak hian an lek kâng nghal vat bawk a, chuan thawm dim leh in ring tak a hawikual chung in chu aw lo chhuahna Tânin chhungril lam pan chuan an phei ta țhem țhem a, Tân in chhung bang a an meichher chhit ên te pawh chu a thih nual tawh avang in a thim hle a, an lut thuk telh telh a, a thim tial tial ani ta mai, thawm dim tak a an in zui dam dam lai chuan an hma lawk ațang chuan hmeichhe na tuar țe thawm hi a rawn ri chhuak leh țhawt a, " Marcus, kan hma zawn hi ni ngeiin ka hria " zawi fahran hian Hestia- chuan an ti se se a, an hma zawn a lung bang kawngkhar ni awm tak chu en vung vung pah hian Marcus-a chuan, " ni e, ani ngeiin ka hria, mahse a khawilai ah hian nge a luhna hi a awm ang " sipai ho te pawh chuan chu thawmlo chhuahna bang lam chu an en hruk hruk hlawm a, enge maw chen chutia tihngaihna tak hre lova an awm hnu chuan Marcus-a chuan sipai ho te chu an en a, mahse an hmel ah chuan tihngaihna vak an hre chuang lo tih an hmuh chuan an hma a lung bang chu na deuh mai hian an tlawh chawrh chawrh a, kawngkhar ngei chu ani ang, a tlawh che hrut hrut a, a tlawh zawng chuan a rawn khu rum rum mai lehnghal, chutah ramsa thinrim in hrosa ri ni awm tak hi bang lehlam ațang ngei chuan arawn ri leh a, Hestia- chuan rawn tlawh puiin an pahnih chuan theihpatawp tawp hian an tlawh ta nghek nghek a. Tichuan thawk lehkhat ah chu bang emaw antih chu rawn in hawng thut in, Hestia leh Marcus- chu an tlu lut ta rawih a. Chu in chhung chu tân in pindan satliah mai alo ni awzawng lo mai, feet sawmthum bial vel laia zau hi ani a, dawi thil an sawngbawlna bik ani ngei ang, dawhkan hniam deuh sei ut mai ah hian mihring luruh ro leh kut ni awm tak tak te alo awm ruih a, chubak ah darthlalang bûr chhung ah hian mihring lu bung leh kut te, mihring kawchhung ni awm tak tak te alo in hung rum mai bawk a. Chu pindan chu a êng sût a, mahse meichher reng reng hmuh tur a awm silo. Bang kil leh in chung a thil bial darthlalang ang deuh awm far chuan ati êng in, chûng êng in kap kual vel chuan inchhung chu a ti êng ani maithei. Chu pindan lai vel ah chuan step pathum vel a lawn san ngai hmun sang, maicham pan na ang deuh hi a awm a, chutah chuan an dawi an enchhinna atana an tih ni ngei tur hi ani, thir ban pahnih hi a awm a, chu thir ban ah chuan nu upa lam deuh tawh, thawmhnaw țet hnik hnek ha hi alo in phuar hlawm a, a taksa ah chuan thir zum feet khat vel lai a sei tur hi alo bûr fur a, Marcus-a ten in chhung an rawn luh khan putar pakhat dawithiam kawrfual ang ha hian chu an mi țawnbeh nu chu alo nghaisa in, a taksa ah chuan thil zum dang hi lo vih luh alo tum leh mek a. Chutia Marcus-a leh Hestia- ten kawngkhar tichhia a pindan chhung a thawklehkhat a an rawn tluk luh rual chuan chu Putar chuan a thiltih lai chu tawp san in Marcus-a te lam chu thinrim hmel tak hian arawn hawi a. Rang tak in Marcus-a te chu an tho vat a, in ring tak in an hriamhrei te chu an chelek nghal a, chutih rual chuan an sipai te pawh chu pindan chhung ah chuan rawn lut ve nghal in in ring tak in an ngunhnam te chu an lek chhuak nghal a. Chu putar chuan Marcus-a a hmuh chuan a hmel chu a dâng sawp sawp a, chutin Marcus-a pawh chu a bang bik chuang lo. Thinrim hmel tak hian an pahnih chuan an in melh rûn rûn a. " Nang bawk ini maw, ka hma ah vawikhatmah i hmel rawn lan tawh suh ka ti che ani lawm ni " chu putar chuan nuihsawh leh thinrim hmel tak hian, " Marcus Valerious, i boralna hmun chu ilo thleng ta anih hi, i nausen lai khan Dragonlord ina a ven avang che in ka tihlum theilo che a, mahse tunah chuan a awm tawh lo, veng tu tur che leh chhan tur che an awm tawh lo, i thih a hun ta e " in chhung ah chuan chu putar bak ah Ramsa kawlh lu pahnih nei rapthlak tak pakhat leh dawithiam ang a in thuam tho mipa pakhat leh dawi sipai siamchawp Athánatos- pahnih hi an lo awm a. Chutah chu putar chuan a kut a ti che zeuh a, chu veleh abul lawk a sipai pahnih Athánatos- te chuan an ngunhnam lian leh rapthlak tak hum chung chuan Marcus-a te chu an pan chhur chhur a, Ramsa kawlh pawh chu rapthlak tak a in hrosa in a vei kual thuak thuak ve reng bawk a. An țanhmun siam in sipai ho te pawh chuan an awmpaw a in dang chung in an ngunhnam te chu an vei thuak thuak a. Chu ramsa chu thawklehkhat ah a rawn zuang thut a, Marcus-a te leh sipai ho te inkar ah chuan a rawn ding in a hram ruai ruai a. Marcus-a leh Hestia te chu chu ramsa chuan pan ding in a rûm hum hum reng bawk a. Sipai ho te pawh chuan chung Athánatos- pahnih te chu beih rawn in, muangchang in piandan pawn lam ah chuan an hnungtawlh hret hret zel a, Thawklehkhat ah chu ramsa kawlh chuan Hestia- chu a zuan thlu tawp a, a chungah dingin Hestia- lo in dan na a ban vel chu a seh in a thing nawk nawk a, a lu lehlam chuan Marcus-a lam hawiin a hram vel hum hum reng a, Hestia- na ti au leh chu ramsa in hrosa ri chuan chulai pindan chu a luah hneh kher mai, Hestia-ngunhnam ken na lampang kut a seh tlat avangin Hestia- chuan a chem chu a thlauh a, mahse a che buai duh em em bik lo, a thir kawr hak leh a ban bun thir chuan a chhan avangin duh ang chuan a sawisa thei bik lo, Marcus-a chuan chhanchhuah tum in bei mahse a lu pakhat zawk ka ațang chuan meialh a rawn phuh chhuak reng a, chubak ah chu ramsa chu a in veng in, Marcus-a awmna lam lam ah chuan a awm sawn ve zel a, Hestia- ban a ala seh tlat avangin a awm sawn apiangin Hestia- chu a hnuk ve zel bawk si a, Marcus-a tan pawh eng han tih theih ani vak lo. Mahse a lo chhaih buai hrim hrim pawh kha hlu tak ani ringawt tun hun ah hi chuan. Hestia- pawh chuan thei leh thei lovin a kawng a a chemte kutphah chen vel a sei chu a phawr chhuak a, in veng mawlh mawlh chungin a kut lehlam chuan chu sakawlh lu chu a vit nghek nghek a. Hmeichhia an phuar beh chu na tuar in a țe tuarh tuarh a, chu putar dawithiam pa chuan a thir zum ken chu muangchang hian chu nu taksa ah chuan a vit lut mek a, Marcus-a chuan a hmu, mahse chhan hman ani bawk si lo. Chutih lai chuan thawklehkhat ah thil eng tak hi a rawn chhuak thut a, Hestia- seh mek tu ramsa chu leng lawp in hmeichhe sawisa mek tu putar chu a deng per lawp a. Marcus-a te an han hawi chhuah chuan chu pindan kawngkhar ah chuan Neira- hi a kutphah a meialh hlawm, alh zuai zuai keng chung hian alo ding reng a. Ramsa kawlh kha Neira- chuan wizard fire in a kap alo ni a, tho leh tur a awm tawh lo, a ût ruam a, ala khu vung vung zui lehnghal. Chu dawitham putar chu chauh hmel tak hian a rawn tho țiah țiah a, Neira chu thinrim hmel tak a melh chung hian, " i la hre khawp ang, tun hi chu a bulțanna tur chauh ani " " Zeddicus, phatsantu tenawm, i hnam leh i chipuite nuai chimih i tum a maw, engang ropuina nge Siraka-i chuan a tiam che a, khawvel Lal ah asiam dawn che em ni ? Thiltihtheihna tam lehzual a tiam che em ni ? Lo ngaithla teh, phatsantu tenawm, Siraka-i chu man ani tawh, chatuan atan hrenbeh in a awm tawh ang, mahse nang chuan dam hi i phu hlawl lo ani, i thiltih rah chu i seng ang, i tan he khawvel ah hian hmun a awm tawh lo " chutia a țawng lai chuan a kut a meialh hlawm ken kha alo lian in alo alh nasa deuh deuh a. " ka chungah hian kut ithlak thei hleinem, Neira putar, hei hi i tan leh ka tan a bulțanna ani, ka lo let leh ngei ang " chutia a sawi zawh chuan chu putar Zeddicus-a chu boruak ah a tham ral ta riai riai a, chu pindan a lo awm ve dawithiam kawrfual ha, Zeddicus-a țhuihruai pa chuan Neira chu thinrim taka melh chung hian, " kei chu ka tlanbo ve lo vang, nangmah that tur hian helai hmun ah hian ka awm ani, i thih a hun ve ta Neira Putar " chutia sawi pah chuan a tiang kenlai chu alek chhuak a, thawk lehkhat ah atiang ațang chuan thil țek êng zuai hi rawn chhuak in Neira- chu a kap a, mahse Neira chuan nalh tak a lo bum in a wizard fire chuan a kap let ve a, a fuh chiang ngei mai, bang deng dawt khawp in a leng dawrh a, a taksa chu a alh zuai zuai a, Neira- chuan ala duh tawk lo cheu, muangchang a pan hnai zel in, a wizard fire chuan a kap mawlh mawlh a, chu putar dawithiam pawh chu a in veng seng bik ta lo, a kang nasa telh telh a, au ruai ruai chung hian a râwp ral ta riai riai a. Neira- chuan hmanhmawh tak in nikhawhrelo a awm reng, an hmeichhe phuar chu a phelh sawk sawk a, chutih lai chuan Marcus-a sipai pali panga vel, a hma lawk a Athánatos - sipai bei tute pawh chu pindan ah chuan an rawn lut ve chiah a, bang kil a ramsa kawlh thi khu rum rum leh, mihring kâng râwp rapthlak tak mai te chu makti tak in an en he hu hlawm a, Wizard Neira chuan a hmeichhe pawm lai chu chung sipai ho kut ah chuan hlân in, hmanhmawh tak a hmun him pan pui tur leh an theih ang ang a enkawl vat vat tur in a chah mawlh mawlh a, tichuan chung sipai ho te pawh chuan rangtak a pawm in hmanhmawh tak in an tlanchhuah pui ta a. Hestia- chu zawimuang hian Marcus-a chuan an tung tho va, chutah bang ngheng a țhut rem tir in amah pawh chu chau tak hian a bulah chuan a țhu hle hle a. Chau tak a rawn țawng chhuak in thei leh theilo hian Marcus-a chu a rawn nuih a, " infiamna hahthlak tak chu ani, min eizo hman țep anih kha " " mi huaisen tak ini Hestia, a khawihna viau che em " ramsa kawlh ina a sehna, a bân chu an khawihsak a, a thir kawr hnuai a a kawr a kawr hãk chu pawtthler in an tuam sak mawlh mawlh a. Mahse a bân bun thir avang chuan chu ramsa chuan a sehna em em lo a, mahse a hmuamhma chu rapthlak tak ani tho mai.
" khawihna lo ve, min hliam hlek chauh anih hi " tiin Hestia chuan a chhâng a, chutih lai chuan Wizard Neira- chu an bul ah chuan a rawn kal hnai a, Marcus-an a Hestia- kut a tuam mawlh mawlh lai chu laksak in a tuamna chu a phelh sak leh daih a, Hestia- chu puan chhia hi seh tir in, a hliam lai chung ah chuan a kut an nghat a,
chutah a kut ațang chuan meialh a rawn chhuak a, Hestia- na ti chu a tal vak vak a, mahse Marcus-a chuan chelh bet in alo țawng thlamuan a,
Neira- ina a kut alak sawn leh chuan Hestia- ban hliam lai chu a hil huk a, Marcus-a chu Neira chuan a tuam tir leh ta a.
" kha ramsa kha dawi a siam anih avangin a seh kha a hlauhawm a, a tir in na lo mahse alo rei ang a, kâng ang maiin a rawn awm ang a, tichuan i tui ahal huam huam ang a, ithi ani mai, chuvangin dawi kha ka sut anih kha "
Mak tih hmel deuh hian Marcus-a chuan Hestia- hliam chu a en vung vung a.
Reife chutia ngawi reng a an țhut hnu chuan Marcus-a chuan,
" Neira, hnehna kan chang ta, Siraka-i chu engtin nge, in man thei maw ? "
aw tih nan a lu a bu nghauh a, chutah Hestia- chuan phawk tak mai hian,
" Marcus, Marcus, nichin a dawithiam pa khan i hming a sawiin ka hria, in in hre tawh țhin em ni ? "
Marcus-a chuan Neira- chu an melh a, Neira- pawh chuan Hestia- zawhna bawk chu zawt ni awm tak in, engtin nge ti ni awm fahran hian a lo en ha a.
Chutah Marcus-a chuan,
" Ni e, kan in hmu tawh alawm vawikhat chu, Aesirod- khua ka kal tlang laiin khaw mipui te fuihpawrh in minlo dan a tum a, mahse min dang thei lo a "
Neira- chu a bu nghauh nghauh a,
" Zeddicus de La'mir- anih kha, hun enge maw chen i pa hnuai ah a in barh luh hnu in ilo pian hnu lawk khan Aesirod- khua ah a kal a, chutah chuan a cheng ta reng alawm, phatsan tu mi tenawm anih kha, alo lang leh maithei ani "
angaihna hriat loh hmel tak hian Marcus-a chuan Neira- chu a en hu a,
" Neira- engkim thil inthup zawng zawng chu min hrilh ve thei em ? Ka hriat tur chi ang te chu, chu lo pawh ?"
" ni e Marcus, ilo pian dawn khan zawlnei ten i chungchang thu anlo puang lawk a, miropui tak leh Druid- hnam i la chhanhim tur thu, chu chu tunah hian i hlenchhuak ta in ka hria,
chuan kha mi tenawm Zeddicus-a kha Palace Of Prophet-a awm ve țhin ani a, mahse Dark Magic- hmang țhin te nen inthurual in Siraka-i nen an in tiamrual a, khâ i țhiannu Penelope-i kan buaipui zan, thlabial zan kha dark magic hmang țhin ho tan a hun lawmawm, thiltih theihna ropui tak leh rapthlak tak mai an neihna hun tur ani a, chuan kha hun lo thleng tur kha hmu lawk in dawithiam ropui ber nih a tum a, chu a tum a tih hlawhtlin theih nan chuan nang dawithiam ho chi Druid- ho hnam chhanchhuak tu tur chu ilo pian tirh khan tihboral che a tum a, mahse Dawithiam te Pa, Dragonlord- chuan a rawn venhim che avangin i chungah kut a lek leh ngam lo ani, chuan Aesirod- ah tlanbo in dawi thiltihtheihna rapthlak tak tak nen Siraka-i thuhnuai ah hotu chan a chang a, chuan kum tam tak hnu ah hmu leh che in lo dan che a tum leh anih kha, mahse thitheilo Pathiante rorel na chu tihdanglam rual ani lova, an remruat ang ngeiin engkim alo thleng ta anih hi "
han sawi belh tur an vân hle a, makti tak in Hestia- nen chuan an in en he haw a,
reife chutianga an ngawih țhap hnu chuan Neira- bawk chuan,
" helai hmun hi i chhuahsan tawh teh ang u, thil tam tak tih tur kan la nei si "
Hestia- chu Marcus- chuan kaihkuah in zawi muangin an kal bek bek a, Neira- pawh chu an hma ah zawi muangin a kal ve zel a.
Chutia kal pah chuan Neira- chuan,
" Siraka-i chu a țhuihruai dawithiam nen kan man vek asin, engtik ah mah a dawi hi a hmang leh tawh ngailo vang "
" a buaithlak viau lo maw, engtin nge a tlanbo loh theih zawk a ? "
" a dawi hmang a a hung a in kha Nightwisp- te puihna in kan tichhe thei a, a in chhung ah chuan țan alo khawh nasa in thang alo kam nasa si a, mahse huaisen tak a kan beih avangin kan man thei ta ani.
Mahse Therion- a vang liau liau in, Therion- a chuan a nunna a hlân ta ani "
an ngawi det a, chutah Marcus-a chuan,
" Terion-a maw? A boral itihna nge...?"
Neira chuan ring fahranlo hian,
" ni e, khatia Siraka-i kan hual lai khan Siraka-i mangang chuan dawi hlauhawm tak mai hman a tum a, hmang hman hlauh se chuan khawvel hi Vaivut ah a chang ta hial ve ang, anih loh pawn keini hi kan dam tawh kher lo ang.
mahse chutih lai chuan Therion- a chuan a ritual neih lai chu a dawi hmanga tibuai in a in pawmchilh a, chutah thil puak ri dur in a zui a, a khu rum rum a, a khu a reh fel leh meuh chuan Siraka-i chu nikhaw hre lovin a lo let reng a, mahse Therion- a chu hmuh ve tur a awm tawh lo, an dawi insu puak leh in pawlh vel avang khan a kâng ral ta ani ngei ang "
pawi tih hmel tak hian Marcus-a chu a kun ngawih a, a kal lai chu ding chawt in,
" pasaltha huaisen tak anih chu, a hming hi kan hre reng tawh ang, min hnehsak ta si a "
Hestia- pawh chuan dik tih hmel tak hian,
" Chawimawina leh ropuina chu a hlawhchhuak ta ani, mi ropui a chuan "
tichuan zawimuang a kal in leihnuai tânin chu an chhuahsan ta a.
Chu leihnuai tân in ațanga an han chhuak chu boruak an han hip vang vang rih hlawm phawt a, chutah an han hawi kual vel a,
chu Isle- khua chu mihring chenna țhin tih pawh a ang tawh lo, engkim mai chu a chhe vel vek ani ber e, Siraka-i dragon rapthlak tak tak te kha țëk hrui ni maiin ka hria, nge dawi ațanga siam hrui țëk chuaih chuaih hian che thei lovin an lo thlung fur a, kawtthler ah te chuan Athánatos- leh ramsa kâng ût nuau la khu vung vung te an tlu kat nuaih hlawm a,
Druid- mi țhenkhat ho chuan chung ruang let reng ho te chu hmun khat ah an lo hnuk khawm ve mek bawk a,
chutia ngawi reng a chung thil vel an thlir dauh dauh lai chuan hnunglam ațang hian kut hian Marcus-a dar ah chuan a rawn beng thak thak a.
A phu zuk a, mahse hnunglam an en chuan, dawithiam Kalu-a chu nui vur vur chung hian a lo ding reng a.
" Hnehna kan chang tak, nangmah avangin Marcus Valerious "
" keichu engmah ka ni hleinem, min țanpuina avang chauh ani e "
" Marcus Valerious, he hun lo thleng tur hi Thi theilo Pathiante chuan an lo hmu lawk tawh a, chuvang in he indona lo thleng tur atan hian Pathian te chuan anlo hual lawk tawh che asin, hnehna kan chan theih nan "
chutia a sawi zawh chuan Neira- lam chu hawiin,
" Neira, kan kal a hun tawh e "
Neira-chuan alu a bu nghauh a, tichuan in thlah nan a an in kuah thuak hnu chuan Kalu- chu a kalsawn ta a.
Kalu- chu Dragon-an phuar ho bul lam ah chuan kal in Druid- ho țhenkhat nen chuan chung Dragon an phuar chung ah chuan pakhat țeuh hian an chuang hlawm a.
Dragon chung a a chuan hnu chuan Neira- te lam chu rawn hawiin ban a rawn vei a, chutah khawchhak lam pan in an thlawk chhuak ta a, chung dragon an man ho te chung ah chuan dawithiam ho chu pakhat țheuh a chuangin an khalh hlawm a, an hnung ah chuan an mahni dragon ho te chuan an rawn zui ve zel bawk a.
Khawchhak kawlkil tawp a an thlawh liam thleng in Marcus-a te chuan an thlir zui vawng vawng a,
" Neira- khawilam nge an pan pui dawn a ? "
" Tanin ah "
" Tanin a ? khang dragon ho khan tanin an nei a maw ? Tinge in tihhlum nghal mai loh a?
Angaihna hriatloh hmel tak hian Neira- en ha chung hian Marcus- chuan an zawt a.
" Thil an tisual a, Siraka-i an țanpui avangin hremna an hmachhawn angai ani, kan tihhlum mai chuan an tan zalenna kawng kan hawnsak ani dawn asin, chuvangin ' Neith ' ah an kalpui anga, chutah chuan hrem in an awm ang, Neith- chu dragon leh dawithiam ho hrenna hmun ani a "
chu Neira- thusawi chu ngaihtuah zui ni awm fahran hian an ngawi dun vang vang a, reife chutia an din reng hnu chuan Hestia- chu sipai pakhat hian alo ko hrang a, Marcus leh Neira- pawh chu kalsawn ve in nunau an chhanchhuah te awmna Isle- khaw dai lam ah chuan muangchang hian an in zui phei det det a.
Mahse thui pawh an kal hman lo tih chuan khawchhung lam ațang chuan sakawr tawlailir alo kal a, sipai pahnih hian an lo khalh a,
Marcus-a te bul an thlen chuan tlan zawi deuh in Marcus-a te chu an rawn au a, chuang ve tur a an sawm angin an lawnkai ve vat a, chutah sipai pakhat chuan hnunglam rawn hawi in zah hmel tak hian Neira chu an melh a,
" ka pu, in mi țanpuina avangin hnehna kan chang thei a, kan lawm hle ani "
" ni love, nangni pasaltha huaisen avang chauh hian ani kan hneh ni "
Marcus-a melh zuk pah hian Neira- chuan an sawi zawm leh a,
" in hotu Marcus- avang hian hnehna no chu kan dawm theih phah ani, a bula hmelmate do thei a kan awm hi chawimawina sang ber ani " an tih zawm zat a.
Chutah ngaihsan hmel tak a Marcus-a en pah hian chu sipai chuan,
" ni e, ka pu, Mi huaisen leh ropui Achilles-a hnung zui ah kan in ngai hial asin "
muangchanga rawn hawichhuah pah hian Marcus-a chuan zawi fahran hian,
" nangni aia sipai huaisen leh raldo thiam ka la hmu lo asin, sipai nuaihkhat ai pawh in in bula raldo hi ka thlang zawk a. Hmasang ata mi huaisente chu he ramah hian fak an ni țhin a. Nangni ang erawh chu ka la hre ngai lo, " a han ti a.
Marcus-a fakna a hriat chuan a lawm hle a, tawlailir khalhtu zawk pawh chu rawn hawilet in ngaihsan hmel tak hian Marcus-a chu a rawn en a,
" kan damchhungin i rawng kan bawl ang " a rawn ti a.
" ka tan hian mi pawimawh ber in ni reng asin "
" i sawi ang chu ni thei tak tak ila kan va ti em ! "
" in ni reng a lawm, in huaisenna avang chauh in hmelma kan hneh asin, sipai huaisen chu ni reng ang che u, ka kalsan hun che u ala thleng ang a, in hruaitu General Hestia- pawh in ala kalsan ang che u, mahse chumi avang chuan in huaisenna te, in remhriatna leh in chakna te kha hloh suh ang che u, chak tak leh huai tak in ding ula, chuti chuan in hming chu kum tam tak thleng a thangkhawk ang a, chumi hun ah chuan nangni sipai huaisente hming chu kumkhua a theihnghilh tawh loh turin khawvel in a chhinchhiah dawn ani ".
Chutia Marcus-an a afakna an hriat chuan an awm hle hle thei lova, an mahni hriattham lek a eng eng emaw sawi hian an in bia a, an nui leh vur vur țhin a.
Chutih lai chuan khaw dai nunau ho an dahna hmun chu an lo thleng ta der a, sipai sawm li, sawmnga bawr vel hian an lo veng in an lo enkawl a, helai a nunau ho an dahna hi khaw dai hnai te, lung lian pui pui awmna tawp leh ram ngaw tawntirh te hi ani a, mipa an tam vak lo a, hmeichhia leh naupang deuh hlir hi an ni mai a, an hliam te chu sipaite chuan an lo enkawl sak in eitur an hmuh ang ang te anlo lakkhawm sak a.
Marcus-a leh Neira- hmel an han hmuh chuan sipai ho te chuan zahna entir nan an thir lukhum te chu la thla in an hma ah chuan an lo kûn hlawm a.
Tlangval hmelțha tak, thi theilo Pathian ang mai a hmelțha, sipai ralthuam famkim nen a in thuam leh Putar sâng tak, sam var vu mai, hmuihmul leh khabe hmul țuak var vek tawh dawithiam kawrfual ha an han hmuh chuan chung nunau ho te chuan an thiltih lai țhulh meuhvin maktih hmel tak hian an lo thlir deuh țhup a,
Chung sipai ho te chu kal pel zel in nunau ho awmna lamah chuan an in zui phei dat dat a, Marcus-a chu chung hliam che theilo leh naupang ho bulah te chuan kal in an chanchin te a zawt hlawm a, a țawng thlamuan zel bawk a,
chutianga an hliamte tuam sak leh tiharh a a țhut reng lai chuan an hawikual a, mipui awmna tawp lam a lungpui bulah chuan biru deuh leh fianrial deuh tak ah hian nula pahnih hian hmeichhe pakhat hi an lo țhutchilh a, chu nu chu a mu a, chung nula te chuan a hliam te tihfai sak in an lo tuamsak vel mek a.
Chutah muangchang a chu mi te awmna lam chu pan in an bulah chuan ava țhu ve a.
Chung nula ten a an lo enkawl nu chu a hma lawk a leihnuai tânin a Dawithiam Zeddicus-an a alo nghaisak mek an va chhanchhuah kha ani tih an hriat chuan, lainat hmel tak hian a thlir vawng vawng a, chu nu, nutling ah pawh upa lam lek lek tawh, hmai sawl lam lek lek chu a meng lova, mahse nikhaw hrelo chuan a awm lo, an sawisakna leh hliamte avang chuan chau tak in a mu a, a meng peih lo ni zawk hian alang,
a changin chau tak hian rawn rûm țiah țiah țhin a, fiahlo deuh deuh hian a rawn țawngvai deuh reng bawk a.
lainat hmel tak a a thlir vung vung lai chuan a bula chu nu enkawl tu nula pakhat zawk chuan zah hmel deuh chung si hian zawite hian,
" i hmelhriat ani emni ka pu ? "
chu nu la en reng chung si chuan,
" ni lo ve, leihnuai tanin kan kal lai khan dawithiam pakhat in a lo nghaisa lai kan chhanchhuak a, enge a an zel a ? "
" a hliamte hi chu a na em em lo va, mahse a rilru hah avang hian a chau zawk ani ber mai, nu khawngaihthlak tak ani "
" engtia rilru hah maw, a rilru a buai țhin tihna maw ? "
" nilo ve, kha misual Siraka-i khan a pasal leh a fanu neihchhun a thah sak tawh a, chutațang chuan hlimni reng reng a nei thei tawh lo a, he ka țhiannu nen hian kan enkawl chawt a, nu ang maiin kan en țhin asin " tiin a chhang a.
chutia a sawi lai pawh chuan a hnuk a ulh a, a mittui alo tla nghal țiam țiam a, chutih lai chuan chu nu khawngaihthlak tak chu a rawn che hret hret a, fiahlo ruai hian a rawn meng a,
rang tak hian a enkawltu nula pakhat zawk chuan a lu chu dawm kân sak vat in tlem te te hian tui a tulh melh melh a.
Chu nu khawngaihthlak tak mit meng an hmuh chuan Marcus-a chu a phu zawk a, enge maw ngaihtuah ni awm tak hian leilam a bih ngar ngar a.
A dar ah chuan Neira chuan rawn khawih in, kal a hun tawh thu a rawn hrilh a, chutah chu nu lam chu hawiin, lainat hmel tak hian,
" ka pi, lo in enkawl tha ang che aw, Pathian ten an awmpui zel ang che anga, i țha chhuak leh vat mai ang, " ati a, a sawi zawh chuan a tho a, sakawr tawlailir awmna lamah chuan enge maw ngaihtuah ni awm tak hian muangchang hian a phei chhut chhut a.
Neira- pawh chu chu nu khawngaihthlak tak bulah chuan enge maw sawi hian an țhu ang ren rawn a, mahse reilo te an Marcus-a kal hnak hnak chu a um phei leh ta a.
Mahse Marcus-a chuan Neira- chu a be lo, ngawi rengin sakawr tawlailir lo ding pakhat ah chuan a lawn a, Neir- pawh chu rawn lawn ve nghal in, reilo te an Isle lam pan chuan an chhuak ta a.
Reife in be lo va an awm reng hnu chuan, Neira- chu a rawn țawngchhuak ta a,
" Marcus, enge maw i ngaihtuah ngut ngut le, vei nei i van ang ve, thil pawimawh deuh hrilh tur che ka nei asin "
muangchanga Neira- lam hawi pah hian Marcus-a chuan,
" ni e, nichin a nula pahnih tena anlo enkawl nu kha maw le, a mit meng ka hmuh khan tu emaw ka hrechhuak zawk in ka hria, nge amah kha hmuh tawhna emaw hriat tawhna ka nei ni zawk ? "
" ni e, kha nu chungchang kha hrilh che ka tum a, mahse i rilru a buai hmel lutuk a, ka tibuai duhlo che anih kha "
chîk tak a Neira- melh chung hian zawi deuh leh fiah deuh si hian,
" Neira, eng chungchang maw ? Min han hrilh ve ta che ? "
" Marcus, i la hmu ngai lo vang a, mahse i hre tawh ani, kha nu khawngaihthlak tak kha Isle- i kal chhan ber chu ani a lawm," Neira- chuan dam thlap hian an ti a.
Marcus-a chu a phu zawk a, Neira- chu an hnaih leh zual a,
" engtin maw itih Neira, kha nu kha Penelope-i nu chu ani itihna em ni ? "
" aw ni e "
Marcus-a chu pawi tih hmel tak hian a chek tlak tlak a,
" Neira, engatinge nichin khan min hrilh loh ? Chutia i sawi tak ah chuan a mitmeng khan Penelope-i a ang ka ti reng ani "
" nichin khan hrilh che ka tum a, mahse i in ngaihtuah nasat hmel em a, ka hrilh leh duh lo che anih kha, "
" anih chuan engtin nge ni ang ? Penelope-i chu ka va hruai zawk mai dawn em ni ang ?"
Marcus-a dar a ben thak thak pah hian zaidam tak in,
" ni rihlo ve Marcus, tunah chuan a nu hi ala chak lo em a, a fanu a ngaih ngawih ngawih leh thi tawh a angaih tawh chu a hmuh leh thut chuan a nunna in a tuar phah ang tih a hlauhawm lutuk, chuvang in hun reilo te chu kan nghah angai ani, chubak ah tun ah chuan engmah hi sawilawk theih ala ni rih lo, Marcus, kan nghah phawt rih hi angai ani "
angaihna hriatloh hmel tak hian Neira- chu an en ha a, rilru hah hmel tak hian an rûm leh nghut a,
" enge i sawi awmzia chu Neira ? "
" Marcus, tunah chuan Isle- hi khaw ram mai ani a, khua din țha leh tur pawn hun enge maw chen chu hmun dang khawilai emaw ah an awm bosan rih hi angai ani, a chhan chu dawi chi hrang hrang leh rapthlak tak tak in he khaw chhung boruak hi a tuam mek a, hri chhia leh natna hlauhawm tak tak te pawh a leng thei a, eng pawh tawk thei an ni, fimkhur tluk a awm lo, chuvangin hun enge maw chen chu an awm bosan rih hi angai ang "
" chuti anih chuan Delain- khua ah kan hruai vek mai dawn emni ? Nge an khaw dai vel ah hian an cheng rih dawn ? "
" ngaihdan siam thiam a har khawp mai, "
chutah Neira-bawk chuan,
" Marcus, Skyros- ah chuan in kal kher pawh angailo mai thei ani, Siraka-i ber kan man tawh chuan,"
" ni e, ka hrethiam alawm Neira, chuti anih chuan Delain- khua ah kan hruai vek mai rih hi ațha ani, tunah chuan an tân in leh lo din leh engkim siamțhat chu a la harsa rih ang, Delain- khua ah chuan an tân chenna tur siam sak ila, muangchang in tha thar in Isle- hi chu din thar leh se an tan pawn a hahdam thlak zawk ang,"
chutia an ti ti mawlh mawlh chhung chuan Isle- chu an thleng leh ta der a.
Tawlailir ațang pawh a chhuk tum chuang lova, an la țhut vung vung lai chuan sipai pakhat hi hmanhmawh tak in alo tlan a, Marcus-a te bul alo thlen chuan zahna chibai an buk phawt a, Marcus-a hnen ah chuan,
" ka pu, kan General- in a hmuh duh che, tunah,"
muangchang hian Neira- chu Marcus-a chuan an melh a,
" anih leh Neira, ka kal phawt mai ang e, kan in hmu leh dawn nia,"
phur fahran lo hian tawlailir ațang chuan an chhuk a, sipai hnenah chuan,
" Hestia-i tihna em ni ? Khawilai ah nge ? "
" aw ni e ka pu, kan piah deuh lawk a in ah sawn ania,"
muangchang a chu sipai pa chu zui ve zel in in pakhat a bang lungrem tla bal nuau tawh ah hian an lut dun a,
thing a siam dawhkan bial lian vak lo hi, Hestia leh Druid mi pakhat bak ah Isle khaw mi patling pahnih hian an lo kil țaih a, chutia Marcus-a te an va luh lai chuan Isle-khua ami pakhat zawk chuan,
" kan tan a tha ber tur chu in hre zawk ang, engkim hi in kut a awm vek ani alawm," tih thu hi alo sawi mek a,
Marcus-a lo lut a hmuh in Hestia- chuan,
" kan duh dan ang diak diak a tih che u hi kan tum lo va, nangmah ni in a in duhthlanna hi kan ngaih pawihmawh ber ani,
Marcus- lo thu rawh, khaw mipui te awm zel dan tur hi kan lo rel mek a, enge han ruahman lawk deuh te inei tawh em ? "
muangchang hian Hestia- bul a thing țhuthleng awl ah chuan an țhu te te a,
" helai hmun a awm leh tur leh in leh lo din a, siam țhat hma chu Delain-khua ah lo awm rih mai se, chu lo ah tunah chuan Isle- khaw boruak te hi ala țhalo in natna leh hri pui te pawh a leng ang tih a hlauhawm a, Delain- khua pawh khaw lian vak ani lo a, an pun belh dawn phei chuan an lawm ngawt ang chu, ei leh in te chu thil harsa ani lo a, rilru hahdam tak in, muangchangin Isle- chu ala din țhat leh theih a lawm,"
chutia a sawi zawh chuan an ngawi țhap a, Marcus-a chuan an melh kual dan dan a, a thusawi ngaihtuah zui ni awm tak hian an melh ngai an melh ngawr ngawr hlawm a, reife chutianga an awm hnu chuan Marcus-a bawk chuan,
" General Hestia- hian a sipai te tir sela, nunau leh bungrua phur tur in Delain- khua ațangin Sakawr tawlailir tam tham deuh hlek an rawn tirh theih chuan a lawmawm khawp ang, tin khaw mi te leh sipai te pawh lo in hrilh se, nunau awmna tur hmun leh an mamawh tur ang te lo dap khawm sak se la a lawmawm khawp ang "
Hestia- chuan rang tak mai hian,
" ni e, chutiang chuan ni rawh se, sipai te kan tir nghal ang e,"
chutia sawi pah chuan nichina Marcus-a ko tu sipai abul lawk a ding reng chu sipai dang ko tur in a tir zawm leh nghal zat a,
Marcus-a vêk chuan,
" engpawh chu nise, zanin chuan kan chhuak hman dawn lo va, chuvangin a remchan dan ang ang a nunau ho vengin zan kan riah mai angai dawn ani,"
Hestia chuan, " ni e, sipai te pawh kan kokhawm ang a, mipui te hi khua ah hi chuan an luh ala rem dawn loh avangin tuna kan dahna sawn lo awm rih mai se, an mamawh tur ang ang chu a theih ang ang in kan ngaihtuah sak rih mai angai dawn ani "
chutia a sawi lai mek chuan a mi tirh pa kha alo thleng leh tawh a, sipai pahnih hian an rawn zui bawk a, chung sipai te hnenah chuan Hestia- bawk chuan,
" Mynes, Polybus, sipai tlem azawng hruai ula, Delain- khua ah a rang thei ang ber in va kal ang che u, Isle- khaw mipui te hi Delain- ah kan hruai vek dawn a, chuvangin heng nunau te chuanna tur hian Sakawr tawlailir a tam thei ang ber rawn tir tur in General Klent-hnenah chuan in sawi dawn nia, chuan khaw roreltu Castor-a pawh General Klent chuan hrilh se la, khaw mipuite hnenah lo sawi bawk rawh se,"
chutia a sawi zawh chuan sipai pahnih te chuan zahna entir nan chibai an buk zauh a, tichuan an chhuak leh ta a,
chutianga hmuhnawm ti tak a ka thlir dauh dauh lai chuan ngaiteh, chu lemchanna dawhsan chung ah chuan rapthlak tak mai hian khawpui alo ri dur dur a, a ri a rin em avangin lei hi a nghing dur dur a, chu lemchanna dawhsan mai nilo, ka awmna in lian tak mai pawh chu a nghing dur dur a, chutah thawklehkhat ah chu ka awmna in lian tak chu rawn thim mup a, engmah reng ka hmu thei lo.
Chu ka awmna in tih ênna chu ka sir bang tawn tawn a khât deuh tak a meichher lian pui pui in chi thluah chu ani tih ka hre chiang a, mahse engtin nge a rual a an thim rual țhup theih zawk, thawklehkhat ah engtin nge an thim țhap theih le?
A thim em avang chuan maimitchhin leh chhin loh pawh in kawngro a su vak lo, engtin pawn awm ila a thim em em vek mai.
Dar chanve emaw lai chutiang thim hnuai a ka țhut reng hnu chuan ka hma lemchan dawhsan lam ah chuan ring fahran lo hian thawm alo chhuak a.
Sava chiar noh noh leh sakawr ke pen ri te, tawlailir kal ri tuar tuar thawm te alo chhuak a,
mahse a thim em avangin kan thlêk ngial pawh in engmah ka hmu thei lo,
mahse reilo te an chu ka awmna in lianpui chu a rawn eng leh telh telh a, ka awmna sir tawn tawn bang a meichher in chhi chu in hnunglam ațang chuan pakhat te te hian a rawn in chhi phei leh kauh kauh.
Chutia thawmlo chhuahna lemchan dawhsan lam ka thlir reng lai chuan thawm chu a rawn ri ring telh telh a, a lo ri hnai telh telh bawk a, mihring chiar nawk nawk thawm te pawh a hriat theih ta.
Zawi muang hian chu lemchan dawhsan pawh chu alo êng ve telh telh a, reilo te an lo êng chiang in, engkim mai chu fiah tak in a lo lang leh ta.
Ram pilril hmel tak ah hian Sakawr tawlailir enge maw zah hi an lo in zui duah duah a, chung tawlailir sir tawn tawn ah chuan sipai, thir lukhum leh thir kawr in bel hi sakawr chunga chuang in an kal ve mek bawk a,
ni e, ka rin ang chiah ani, chung tawlailir leh sakawr in zui duah duah hma ah chuan fal deuh hlek hian Marcus-a leh General Hestia- hi sakawr chunga chuang chung hian enge maw sawiin an lo in be mawlh mawlh a.
Chutih lai chuan an hma lam ațang chuan sipai thuam a in thuam mi sawmthum bawr vel tur hi chak tak a sakawr khalh in anmahni tawk zawng hian an lo tlan ve mek a,
reilo te an Marcus-a te bul chu an rawn thleng nghal mai a, an zing a pakhat chuan,
" General Hesti, Lalfapa Marcus, chibai ule, Captain Aetes- a ka ni e, General Klent- thupek angin Delain khua ațangin nangmahni hmuak tur che u in kan lo kal ani e,"
ngaihsam hmel tak hian Marcus-a chuan,
" mipui awmna hmun tur chu buatsaih ani tawh ang chu maw "
chu sipai Captain Aetes-a bawk chuan,
" peihfel ani tawh e, khaw chhim lam pang lui lian vaklo awmna hmun ah khan an awmna tur chu kan lo buatsaih a, hmun rem leh nuam tak ani "
chutiang chuan enge maw sawiin kal pah chuan an titi zui zel a,
chawhnu her vel ah chuan Delain- khua chu an lut ta a,
khaw mipui ho chu anlo pung khawm luih luih a, Isle- khaw mipui, mikhual tam tak rawn kal mah se, mipui mit fukna ber chu Marcus-a ani tlat si.
Ni e, dawithiam rapthlak tak tak te nen indo vin, hnehna an chang a, chung an in beihna chanchin te chu Delain khua mai nilo, a bul vel khua leh khaw hrang hrang ah a darh nasa em em a, he indona a an hruai tu leh an chakna lai mu Marcus-a chu an ngaisang in mitin reng te chuan an lo lawm a, thi theilo Pathian ang maiin an lo chawimawi a,
mahse Mipui ho au ri leh an fakna ri te chu hre awm pawh in alang lo, chak fahran lo hian a sakawr chu a khalh a, mipui lam chu hawi kual in, zawn nei ni awm tak hian a mit a lênkual vel ruai a.
Chutianga a hawikual vak vak hnu chuan a mi zawn chu a hmu ta ni ngei tur ani, a nui deuh suk a,
ni e, mipui bawrkhawm tuau tuau zing ațang chuan Penelope-i chuan a bân alo vai ve lauh lauh a, a hlim hmel kher mai,
mahse sipai te chuan mipui ho te chu lo dangin, kawng tluan in kawng sir tawn tawn ah an lo intlar țhup a, chuvang chuan hlim tak a in nuih mailo chu tih theih dang an nei bik lo,
chuvang chuan sakawr tawlailir leh sipai ho te, leh mipui zi hut hut ho te chu an kalsan thuai a, riahbuk lam pan in Hestia- nen chuan an in zui phei dat dat a,
puanin kawt ah chuan General Klent leh Roreltu Castor-a te bak ah khawchhung mi pawimawh mi engemaw zah lo awm in, an va thlen chuan ban vai in hlim tak in an lo lawm a,
sakawr ațanga chhuk in an ni ho awm na lam ah chuan an phei vat a, hlim tak in a eng eng emaw sawi pah zel in puanin lamah chuan an in zui lut ta dial a,
Dawhkan bial hual a țhuthmun te an rem fel hnu lawk chuan Chhiahhlawh in Uain leh thei chi hrang hrang anlo chhawp a,
General Klent- chuan hlim hmel tak a eng emaw sawi pah hian a uain no ken lai chu an lek chhuak a,
" Hnehtu te hming in," a ti a, midang ho pawh chuan an uain no chu tlhi khat in an rawn lek chhuak ve bawk a. Tichuan hlim tak a Uain te in in an indona chungchang te, hnehna an chan dan te leh eng eng emaw alsawiin an titi luam hlawm a.
Chutianga hlim taka an nuih ho dar dar lai chuan Marcus-a chuan a bula țhu Castor-a lam chu hawiin,
" Castor, engkim inlo buatsaih tawh a maw ?"
" i thupek angin engkim a kal tluang e,"
" kan tibuai che u a, pawi kan ti khawp mai, mahse kan hun tawng in a zir miau silo a, hun enge maw chen chu heng nunau ho hi inlo enkawl angai dawn ani,"
" Pu Marcus, chutiang chu pawi ti duh suh, keini pawh hetiang tawk thei hi kan ni ve tho alawm, hlim taka an awm theih ngei ka beisei ani,"
" ni e, rei chu anih ka ring lo a, tunah rih chuan Isle- chu han chen zuina tlak ani rih silo va, enga pawh chu ni sela harsatna em em chu an siam sak loh ngei che u ka beisei ani," a ti a.
chutia a sawi zawh chuan a tho chhuak a, a Hestia nena an puanin lamah chuan a kal ta daih a.
a thir kawr te chu muangchanga phelh in a in silfai sawk sawk a,
" Marcus "
a hnunglam ațang a hmeichhe aw in a a rawn koh chuan muangchang hian an lehhawi a,
Puanin kawngka bul ah chuan Penelope-i chu hlim hmel tak hian alo ding reng a, chutah rawn tlan phei in Marcus-a chu an kuah nghal chung chung a, zawi te hian,
" Marcus, ka van lawm tak em, min kalsan tawh suh aw,"
duat tak hian a sam chu a chul sak heuh heuh a,
" i lo in enkawl țha em ? Thil hmuh tir tur che ka nei asin ?"
" aw, pu Castor-a te chu an fel khawp mai, mi țha tak an ni,"
chutih lai chuan General Klent-a chu puanin chhung ah chuan alo lut thut a, chuveleh rang tak in Marcus-a chuan Penelope-i a kuahna chu a thlah vat a, a bul a țhutthleng ah chuan a țhut tir a,
" Marcus, dam tak a Pathian ten an lo kir tir leh che u avang in a lawmawm tak meuh ani, in beihna hahthlak tak ani ngei ang, engtik ah mah he indona chanchin hian sawi tawp ni a nei tawh lovang ". ngaihsan hmel tak hian Klent- chuan an ti a,
dawhkan a uain thlit pah hian Macus-a chuan,
" ni e, hahthlak tak ani, mahse i sipai te an huaisen a, raldo an thiam in an chhuanawm tak zet ani, i sipai te avang chauh a hnehna chang thei kan ni,"
a uain ken lai chu tlem an lem zauh a,
" General Klent, inlo in buatsaihna avangin a lawmawm tak meuh meuh ani, Isle- chu han chen zuina chi zia zang ani tawh silo a, mahse sawi leh sawi hnu, muangchangin an han din țha leh ang a, chumi chhung chauh te chu a buaithlak vak ka ring chuang lo ve,"
General Klent- chuan Penelope-i chu melh zauh in,
" ni e, tikhan lo in kawm rawh u, nunau ho chu ka va thli thlai ve ang e, hliam te an awm nual bawk sia, buaipui deuh hlek chu an ngai dawn ani,"
chutia a sawi zawh chuan a chhuak leh nghal ta daih a.
Chutah Penelope-i chuan,
" Marcus, enge chanchin, ka nu te chu i va hmu thei em ? Ka țhian Mina leh Katie- te pawh kha hmuh leh ka van chak tak em ? "
a lungchhia chu a țhu kun lap a, a mittui chu alo hnam țiam țiam a, chutah Marcus-a chuan a uain no chu dah vat in, Penelope-i bulah chuan țhuthmun an rem ve sawt sawt a, duat tak a kuah in a beng bulah hian zawite hian,
" i mittui kha ti hul vat rawh, thil hrilh tur che ka nei ka tih kha, i țah leh chuan ka hrilh dawn miahlo che ania,"
Penelope-i chuan kuah nghet sauh sauh in,
" sawi rawh, ka țap tawh lovang,"
" thu lawmawm deuh hrilh tur che ka nei a, Isle- kan kal dawn a ka hrilh che kha ila hria em, i nu ka lo hruai haw ang ka tih kha "
Penelope-i chu hlim hmel deuh hian a rawn hawi chhuak a, Marcus-a chhoh en ha chung hian,
" chuan ka nu chu i va hmu em? I lo hruai haw tihna maw ?"
" aw hruai haw e, mahse a dam tha vak lo a, ngaihtuah awm ani lo, i rilru ti hah duh suh,"
chutia a sawi pah chuan Penelope-i sam chu a chul sak heuh heuh a, dim tak hian a awm ah bei tir in a kuah vawng vawng a.
Reife chutianga an awm ren rawn hnu chuan Marcus-a chuan a kuahna chu an phelh a,
" i nute awmna hmun ah chuan kan kal dawn ami ?"
aw tih nan a lu a bu nghauh nghauh a, Marcus- bawk chuan,
" hlim hmel put tum ang che, i mittui te kha ti hul la, i hmai te va phih fai rawh,"
chutia sawi pah chuan Marcus-a pawh chu a tho ve nghal a, Penelope-i intih fel lai chuan uain a lo in a, a in tih fel zawh veleh pawn lam ah hmanhmaw hmel tak in an in zui chhuak ta nghal a.
..(End Chapter 9)..
Comments
Post a Comment