Mahsela reilo te an chu chhûm ninawm tak chu an ral leh ta riai riai vat tho a, mahse Marcus-a te reng ka hmu tawh lo.
Ngaw piah lam hla tak ah hian Lal in hlui hmel deuh hi alo lang a, hmuh tawhna nei tlat in ka in hria, kan in ngaihtuah vang vang a, hmuh chu ka hmu tawh ngei ani, mahse, mahse engtik ah nge tih ka hrechhuak zo tawh lo.
Chutia ka ngaihtuahna ka vah kual tir mek lai chuan chu Lalin emaw ni chu a rawn lang hnai telh telh a,
tunah chuan chiang deuh in alo lang ta, chu In chung zawl deuh emaw ni bathlar,
a in chung ber chu ani lo, bathlar nge a in chei mawi nan a an tih zawk, tukverh pawn lam si ah hian bathlar ang reng hi a awm a, mahse chu bathlar chu Bâk ang deuh, mihring thla nei pahnih hmel hlauhawm tak lim lian deuh, chhim leh hmar hawi zawng ve ve a țhu lem hi ani a, bathlar kan ti ngawt takna a, chu in cheina chu anih ka ring zawk mah.
Chu mihring emaw ni thla nei lim chung ah chuan nula pakhat kawrfual var ha, vûr ang maia taksa var nge a dâng hrim hrim zawk.
Khawhar hmel tak hian a hma zâwn ramngaw zau tak lam hawi hian a lo țhu vauh vauh a,
a mit ațang a mittui lo luang chhuak chu a kawr ah chuan a far zauh zauh a, chutia ka en reng lai chuan zawi te te hian a phun sep sep reng a.
Eng thil tak chu sawi ang maw ti a ka beng kan tun hra hnu chuan a thusawi chu ka hrethei vuai vuai..
" Ka hmangaih Marcus, ka hnen lam pan chuan ilo kal ngei ang tih ka hria a lawm, engtik ah nge ilo lan dawn, naktuk ah em ni ?"
chutah thinlung na tih hriat tak hian a rûm vawng vawng a,
" ni e, i lo kal ang, ilo kal dawn tih ka hria, Marcus- ka lo nghak reng che ania, chatuan thleng pawh in ni sel a, ka vun te hi vaivut ah te lo chang in, ka ruh te pawh lung ah lo chang mahse la, i tan ka awm reng ang, ka hmangaih che a, ka hmangaih reng bawk ang che "
chu a thusawi khawharthlak tak chuan min ti chau râwih in ka hria, ka lung ati leng thar in ka khua ati har vawng vawng a,
chunglam van chung sang tak a Arsi sang tam tak lungrual hmel tak a phe tuarh te chu thlir in a lunglen hmel tak hian a rûm vawng vawng a..
Chu nula khawhar tak mai chuan ka thinlung a hneh in, kei mah ah kan in chan a,
Vanchung sang tak a in ngaih hmel tak a Arsi sang tam tak in pho uar mai te leh chu zan boruak khawhar thlak tak mai chuan ka nun hlui te min hriat chhuah tir in, ka lung anti leng vawng vawng mai,
Ni e, ka lo la theihnghilh lo reng reng ani tih ka hre chhuak ta.
Kum sawm lai liam ta a ka hmangaih chu ka mitthla ah a rawn lang a, khatia an ni ang mi chung a lêng leh kei rethei berh ve tak kan lo in tawng kha thil mak tâwpkhâwp a tling ta hial ve ang(!)
ka hmangaih em avang in a thinlung ata ka kalbo kha ani a, dik chiah chuan lo in nei ta teh reng pawh ni ila, ka in ve, a room tiat vel lek ah khan hlim tak in a cheng kumkhua thei dawn silo.
Khatia a hriatloh a ka in luah ka chhuahsan a, hmun dang daih a nun bul ka tan thar leh pawh khan ka la theihnghilh thei lo in, nitin ka hmangaih zual deuh deuh a, ka ngai em em țhin a nih kha.
Chutia ka nunhlui ngai a ka kur vel chiam lai chuan, ka suangtuahna na khawvel chu Marcus-a aw ri chuan arawn chhem bo chiang kher mai.
Chu lemchan dawhsan ah chuan nula khawhar i kha hmuh tur reng a lo awm tawh lo.
Nî chu a chawhnu ruih tawh a, chutih lai chuan Marcus-a te chuan Lung hmun hnim tawi te te țo fur na hi an lo lut ve mek a.
Marcus-a chuan sakawr khalh phah hian a hnung a chuang, nghet atak a a kawnga kuah tu Penelope-i hnen ah chuan,
" kan hma lawk a, mihring luruh ang deuh lung lianpui saw i hmu em ?"
Marcus-a koki a a khabe rawn nghat in Penelope-i chuan,
" aw hmu e, chu chu tinge ?"
" saw lung bul vel lawk ah sawn kan hmuh tur 'Grey Sister' (pitar dawithiam pathum an ni a, mit pakhat chauh an in tawm a, chu mit chu an zinga pakhat in a keng țhin. CR) - te chenna puk chu a awm a, ka la kal ngailo na in mifing leh upa te sawi atang in ka hre tawh a, an sawi dik maithei bawk "
chutia an in biak mawlh mawlh lai chuan Tlang ang mai a lian chu lung lian tak bul chu an thleng tawh a, Marcus-a chu sakawr ațanga chhuk vat in, Penelope-i chu an hlangthla zui ve nghal a, chu lung bul lawk a hnim buk tereuh te a sakawr thlung mawlh mawlh chung chuan,
" lo kal rawh, helam hi a nih duh hmel "
Penelope-i ban a kaiin chu lung sir a lung te reuh te te in tlar thla diat lam ah chuan an in zui thla ta det det a.
Tawite an chhuk hnu chuan lung lian tak khawvel awm tan tirh ata tawh, la khawih chet ngai miahloh hmel pu hi alo awm a, a bul lawk a lei chu hêk hlawk ang mai hian alo kaw rul mai a,
Marcus-a chuan a chem sei tak chu phawi tlet zauh pah hian,
" i hmu em, saw ngei saw anih dawn saw, kan vanneihna a kal tluang hle mai "
chutia sawi pah chuan chu Lei hêk kaw rul lam ah chuan muangchang leh thâwm dim tak in an inzui phei a,
in ring tak leh thâwm dim tak hian chu lei puk, kaw rul ko tlang ah chuan ding in a chhung lam chu Marcus-a chuan an bih dek dek a, chutah enge maw chen thâwm ngaithla ni awm fahran hian beng dawh dau hian an ngaithla leh te te a, a tum ang thawm leh riva a hre lo ani ang.
A chhung ah chuan an zuang thla thurh a, Penelope-i chu chawi thla leh in chu lei puk chhungril lam ah chuan muangchang hian an lut dun ta a.
Chu lei puk chhung chu a mak khawp mai, ban khur ang mai hian feet nga emaw vel lai a bial hian a kua in, feet nga emaw vel a thuk ani a, chuan step chhuk kal nuam vel tur ang hian a sir chu chhuk zawng in a kaw thla leh rul mai ani. chutah chuan ani nichin lawk pawh khan Marcus-a kha a zuan thlak ni.
Tawite lei verh ang mai chhung a an chhuk thlak bek bek hnu chuan, khâm kotlang a dakchhuak ang mai hian, an hma zawn lei chu a lo hek huam a, kawng chu a tawp fel der ani ringawt mai.
Chu an hma a lei hêk nge, pûk chhung ah chuan lengkir sang tak mai alo awm zawk.
Eng chen a thuk tak ni ang maw, a thim thla mup a, rapthlak tak ani.
Penelope-i phei chu a țe tuarh a, Marcus-a ãwm ah chuan a bei nghal zawt a.
Chu lei chhung lengkir thuk hmel tak chung, Marcus-a te hmazawn ah chuan feet hnih bawr vel a zau hian kalna tur in kawng, lengkir a tla bang ni awm tak hi feet sawmhnih bawr vel a thui hian a ngil phei êt a.
Chutah Marcus-a chuan,
" hetah hian lo awm la, keimah in ka va kal ange, an awmna a hlat vak ka ring tawh lo, ka rei lo ang "
hlauh hmel tak a rawn hawi chhuak hian Penelope-i chuan,
" Engtin nge keimah chauh in ka lo awm ang, engtia rei nge i awm dawn tih lah hriat ni suh "
" kan chesual palh hlauh ang tih a hlauhawm ani, i zawh thei meuh dawn em ni "
chutia sawi pah chuan Penelope-i chu an kuah a.
" keimah avang a in nunna i hlauh hi ka duh lo, chubak ah ka tan a chhuak kan ni a, engtin nge ka thlahthlam theih ang che.
Marcus-a chuan,
" anih chuan fimkhur tak in aw "
a chem pawh chu an pai țha leh te te a, tichuan muangchang in chu lei te reuhte chu an zawh ta bek bek a.
Rin aiin an kal thei fu mai, buai em em lovin an zawh kai ve mai a.
Chutah an hma zawn lung bang chu te reuh te, sang deuh hian, saisir zawng chauh a luh theihna tur awm vel hian alo kua a,
muangchang hian tawt chung chung hian chu lung keh kar ah chuan lut phei zel in, reilo te ah puk chhung zau lian tak ah hian an chhuak hlawl mai a, chu puk pindan zauh tak ah chuan lung lian tak tak hi awmze nei ni awm fahran hian an lo awm țeuh a.
Chutih lai chuan Pitar aw ni awm tak hian vin fe hian,
" kan hmu che u, kan hmu che u, biru suh u, kan hmu che u "
a rawn ti lawng lawng a,
Peneope-i phei chu hlau in a îp zawk zawk a, Marcus-a ban chu an pawm chawt a.
Chu âw lo chhuahna lampang ni ngei a an rin ah chuan muangchang hian hawi zauh zauh chung hian an in zui phei det det a.
An hma zawn ah chuan lung lian pui pui mum pul mai hi a kual hian alo in tlar thup a. Muangchang a phei zel in chu lung in hung tlar kual chhung ah chuan mit len ruai chung hian an ding țo a.
Chutia an din ren rawn hnu chuan, an hmazawn lung in rem kual pakhat sir atang chuan hmel rapthlak tak tak, pitar hmel ang deuh deuh pu hi mi pathum hi sir zawng ti tih hian an rawn phei țhem țhem a,
an kawr te chu a țet nasa in an mahni hrim hrim pawh chu kâng bang ang mai an ni.
Pakhat, a hmasa ber a rawn kal chuan a kut lehlam hi hmalam ah a rawn phar phei duai a, a kut ah chuan enge maw ni mum te reuh te hi a keng leh nghal.
Eng eng emaw hriat theih siloh sawi hian an rawn phun phei nuah nuah a, a thim ruih avang in an lang chiang thei em em lova, chuti chung pawh chuan an hmel mai bak ah an pianzia leh aw te chu a rapthlak in hmuh hi a nuam hlawl lo.
Chhûn êngah phei chuan Penelope-i chuan hmu phei se chuan a thi dang thei hial maithei ani, tunah pawh Marcus-a phen ațang in a thlir ngam chang chang chauh ani sia.
An bul hnai an rawn thlen chuan, a mak lutuk, hmel chu an nei ve ngei a, an ka te chu uțawk ka ang maia zau hi ania, ha lah chu pakhat lian deuh mai chauh hi an nei a, chutah mit reng reng an la neilo zui lehnghal anih chu, an hnar lian tal chung ah chuan an chal hlai tak chu a awm a, an mit awmna lai chu vun in a ping vek zuk nia.
pakhat a rawn kal hmasa ber chuan a kut rawn phar phei zuau zuau ah chuan thil mum emaw ka tih kha mit alo ni a, a rawn hum run anih chu. Chu ami mu lian tak chuan Penelope-i chu a melh kur a, Penelope-i rap lutuk chu a țe tuarh a, khur hlawk hlawk in Marcus-a chu a kuah rawk rawk a.
Heng Grey Sister- te hi Tuipui Pathian Phorcys leh Ceto-i te fa an ni a, 'Graeae' emaw 'Graiai' emaw - an ti bawk, Greek tawng ani a, 'Old'(upa) tihna ani, Deino, Enyo leh Pemphredo te an ni a, mit an nei lova, mit pakhat hi an vaiin an in țawm ani.
An hlauhawm hmel hle na in rin aiin an lo fel ang reng phian a, an zing a pakhat chuan,
" mamawhna min nei tih chu in mit meng ațang khan a hriat vek "
a sawi zawh rual chuan pakhat chuan vin deuh hian,
" Zeus-a leh Danae- i te fapa Perseus-a ang in kan mit neichhun min laksak in min vau in tum ringawt ange, in tisual chiang khawp ang hre rawh u "
a rawn ti tan tan a.
( Pathian Zeus- a leh Danae- i te fapa mi huaisen Perseus-a hian, sakawlh rapthlak Medusa-i a thah dawn in, a awmna a hre lova, heng Grey Sister te hi a zawt a, an hrilh duhloh avangin an mit neihchhun hi a lak sak a, chutah vau in grey sister te hian Medusa-i chenna anlo hrilh ta ani. CR)
chutia a sawi lai chuan pakhat chuan a nghawk chawrh a,
" kha thil kha sawi chhuak tawh suh, heng mi te hi chuan khatiang khan anti ve lovang "
chutah Marcus-a te lam ah chuan a mit mu rawn ken phar pah chuan,
" tlangval, i nula rawn hruai khawngaih thlak tak kha chhan i duh em ni."
an âwka hi ngaihno a beilo hranpa ve hrim hrim a.
Marcus-a chuan a lu an bu nghauh a. Chutah chu pitar bawk chuan,
" thil tam tak kan hria, hun kal tawh leh lo la thleng tur te pawh "
a kawr kar ațang chuan Glass bur tereuh te, a chhung a thil tui paw riai awm hi a rawn phawrh a, Marcus-a te lam a lek pah chuan,
" tlangval, he bur chhung ami hi i nula hruai damna tur chu anih hi, mahse tunah ni lo, a in nghal tur ani lo, helai hmun atang hian chhuak ula, khaw thlang lam ah kal zel in, Monókeros - ram ngaw hmun in zu pawh anga, hai theih ani lo, he lung hmun 'Vounó Kranío'-(greek tawng ani a, luruh tlang tihna. CR)- tawp ah hian chu ngaw chu alo awm nghal mai ang, hai theih ani lo, chu 'Monókeros Dásos' (monókeros tih chu greek tawng ani a, unicorn, sakawr ki nei tihna, chuan, Dásos tih chu forest tihna ania, sakawr ki nei awmna hmun ram ngaw tihna ani ber ang chu. CR)- ah chuan a hming put chhan Unicorn(sakawr ki nei) tam tak an awm a.
Chu Unicorn- hmul pakhat chu la in Klámata(greek țawng ani a mittui tihna, lungngaihna tuipui tihna ang vel ani mai thei. CR)- tuipui ah in keng ang a, mahse Unicorn hmul chu a nung lai hmul ngei ani tur ani.
chu tuipui lai tak ah chuan lung pui lian tak tak alo awm ang a, tlai ni tlak dawn in chu lungpui ah chuan kaiin Naiad Nymph(sangha nula, tuipui lasi. CR) pakhat a hming Calypso-i hnen ah he bur nen hian i pe dawn nia, ani chuan in tih tur dang alo hrilh leh ang che u, he ka thusawi hi vawng tlat la, theihnghilh ngai suh ang che "
chutia a sawi mawlh mawlh hnu chuan chu bur chu Marcus-a lam ah chuan a rawn theh phei a, Marcus-a chuan lo dawng chat in uluk tak a a thlek vang vang hnu chuan a ak țha ta daih a.
Marcus-a chuan lawmthu a hrilh luam a, tichuan an chu lai puk chu hlim tak in an chhuahsan ta a.
An kal lam ang bawk a buaina em em neilo chuan chu lei puk țihbaiawm tak chu an chhuahsan ta a, an sakawr thlun chu phelh in a chung ah chuan a hma ang bawk a in phur leh in chu lung hmun chu an tlansan leh ta a.
rei pawh an tlan hman lo tih chuan chu lung hmun tawp ah chuan ramngaw mawi fahran mai hi uluk tak a enkawl lai ni mai awm hian a lo in hung fel thlup a.
Chu ngaw chhung a an tlan luh rual chuan Marcus-a chuan,
" he lai ngei hi anih dawn hi Monókeros ram chu, Pathian te chenna hial ni awm a mawi leh ropui anih hi "
Penelope-i chuan,
" engtin nge Unicorn- hmul chu kan lak tak ang, a damlai hmul ngei an ti bawk si a "
a ti chuai raih a,
Marcus-a chuan sakawr tih din pah chuan,
" helai ah hian reilo te i chawl phawt teh ang, eitur kan neih ang ang te eiin inti puar phawt ila, Pathian ten min awmpui reng a, kan hlawhchham lo tawp ang "
sakawr atang chuan chhukthla in, Penelope-i pawh chu an hlangthla ve nghal a.
Penelope-i chu a puan sin tir in thingkung ngheng hian an țhut tir te te a, hmanhmawh tak a an bul hnai a thing nawi chu lakhawm in, Penelope-i hma zawn ah tak chuan meipui an chhep hluah a, chutah sakawr a an thil phurh ip chu zen rak rak in sa hrang lian deuh deuh pahnih leh tangkarua bûr tung uluk taka chhin khap hi a rawn phawrh nawlh a,
chu sa hrang chu a mei chhem lai a hem vat vat in, Penelope-i bulah, Penelope-i si chet chuan țhuthmun an rem ve nghal a.
Chu tangkaraw bûr chu Uain- bûr alo ni a, Marcus-a chuan hawng rak rak in, tlem an in zeuh a, Penelope-i chu pe ve in, Penelope- in a in tum a ken kan mek lai chuan, an piah lawk hnim chu a rawn ri rak rak a.
Chu veleh thawm rawn chhuahna lam chu an hawi rual nghal țhawt a, mahse thawm chu reilo te an a reh leh nghal mai a, an ni pawh chuan theihnghilh zui ni awm tak hian Marcus-a chuan duat deuh a kuah in an in pawm chial a,
chutih lai chuan a hma a thawm rawn chhuahna atang bawk chuan thawm dang alo awm leh ta,
Marcus-a chuan zaizir a bengchheng lo tur a Penelope-i chu hrilh in, a chem sei tak chu thawm dim tak hian an phawi zal zal a.
Chutih lai chuan an bul lawk a an sakawr thlun chu hlauh nei ni awm tak hian a rawn țe chhuak thut a, an phuchiang kher mai, Penelope-i chuan hlauh hmel tak hian Marcus-a chu a chelh ran a,
sakawr lah chu a vir sek in, hmuh nei ni awm tak hian a phit leh dut dut țhin a, Penelope-i chu ţhut țhat tir in muangchang hian inring taka a chem hum ran chung chuan Marcus-a chu an tho riai riai a.
A ding fel chauh tih chuan an hma zawn Meipui in a a en phak chin hnim zing atang chuan Centaur( a kawng a chin hnuailam sakawr, chunglam mihring. CR) lian zet zet pathum hi an lo chhuak thut a. Marcus-a pawh chuan mak ati hle mai, chechang lo hian alo thlir vung vung a. Penelope-i pawh chu rang tak a tho vin Marcus-a hnung ah chuan Marcus-a si chat hian a rawn ding ve nghal awt a.
Muangchang hian chung Centaur- lian deuh deuh te chuan an rawn pan chhut chhut a, chutah an zinga pakhat chuan,
" tu te nge in nih, helai ah hian engti tur a lo kal nge in nih "
Marcus-a chuan in ring tak a a chem la hum reng chung chuan, pangngai tak hian,
" Grey Sister- ten a min kawhhmuh ang a lo kal kan ni e "
chutah maktih hmel tak hian chu pa bawk chuan,
" Pathian thithei lo Phorcys- a fa te maw, eng ti tur in nge an tih che u ?"
" Unicorn- nung lai hmul la tur in leh chu hmul chu Klámata- tuipui a keng tur in "
" mihring thi thei tan chuan Unicorn- te chu man theih rual an ni hleinem "
" chuti chu bum in kan awm tihna ani maw "
" nilo, nilo, Pathian Phorcys- a fa te chuan dawt an hrilh hauh lo ang che u "
a thian te pahnih chu en pah in,
" He mi te hian kan puihna an mamawh ani "
a țhiante pahnih pawh chuan rem an ti tih entir nan anlu anlo bu nghauh nghauh a.
Chutah chu pa bawk chuan hawihhawm tak hian,
" Daria ka ni a, hei hi ka thiante, Ealous leh Medan- an nih hi "
" Marcus Valerious- ka ni a, hei hi ka țhiannu Penelope- anih hi, helai ram a cheng hi em ni in nih "
" nilove, kan ramchhuak anih hi, Pelion- tlang a cheng kan nia, kan thlahtu mifing Chiron-a damlai ațang tawh in " an ti deuh duah a.
Penelope-i en ran pah chuan Marcus-a chuan,
" min pui thei anih chuan kan lawm khawp ang, kan hman hmawh tawh khawp mai a, thla bial hma ngei a Klámata- tuipui a kan ken ngei ngei angai a "
" Aw le, helai ah hian lo awm reng ula, kan rei lo ang, helai ram hi an an chenna hmun ani a, chuvang in a hming ah pawh 'Monókeros forest' an ti alawm, kan kal nghal ange "
an in en a, hlim tak hian an in nuih a, an in kuah vawng vawng a,
zan pawh mu hman lova zan tam an awm tawh avang in an sa rawh te chu ei sawk sawk in, in kuah chial hian mut mu an tuah ta a.
Chutia tui tak a an mut lai chuan enge maw thawm hian Marcus-a chu a ti harh hlawl mai a,
an men chuan khua chu alo var uarh tawh a, an bul lawk ah chuan nui ver ver hian a hma zan a a mi hmuh Centaur- te kha anlo ding țhap a,
" Marcus Valerious- in mu tui bawk maw "
muangchang a thawh pah hian,
" Mutui khawp mai, enge chanchin "
a țawng duh ber Daria- chuan nui var var chunga hmul var sei tak rawn lek va chuang hian,
" kan tan chuan a harsa hleinem, mahse an awmna hmun anlo sawn a, kan zawng buai ve viau ania "
Marcus-a chuan, rang tak a Penelope-i mutui lai chu sawi nawk nawk in
" Penelope, penelope- harh teh, kan hlawhtling ta "
Penelope-i pawh chu a rawn harh a, Centaur- ten a Unicorn- hmul an keng va mai an hmuh chuan Marcus-a chu hlim tak hian a kuah nawk nawk a, chuan Marcus-a chuan an lam pan in,
Daria- in chungah kan lawm tak meuh meuh ani, tunah chuan kan thil tih tur chu kan ti thei dawn ta e "
"ni love, kan țanpui thei che u hi kan lawm zawk asin, ti rawh u, Klámata- tuipui pawh chu a awmna in hria em ni, kan lo hruai ang che u "
" kan lawm tak meuh meuh ani e "
Marcus-a chuan chu Unicorn hmul Daria- ken lai chu la in a ak țha vat vat a, chuan hmanhmawh tak in Penelope-i chu sakawr chung a hlang in, a zuangkai ve nghal a, tichuan Centaur- te chu zuiin hmanhmawh tak in chu ram ngaw chhung lam ah chuan an tlan liam ta a.
Chu ngaw chu thlawhtheihna ațanga en chhuk ang mai hian alo lang kal zut zut a, chutah chu ram ngaw chu tawp thut in a bul lawk ah chuan tuipui zau deuh mai hi alo cham put mai a.
Reilo te a maw ka tih lai in Ni chu kawl ah chuan alo liam țep tawh a, chutih lai chuan thing pûm siam zawh hlim bul a ding chung hian Marcus-a te pahnih leh Centaur- pathum te chu tuipui lam thlir chuan an lo in be mawlh mawlh a,
Centaur Daria- chuan,
" Helai hi anih hi Klámata - tuipui chu, tluang tak in inva kal dawn nia, Nymph Calypso-i chu hai rual ani lo, amah chauh chu a mit meng alo pawl râm mai ang, chuan a sam kha a sen ani tih theihnghilh lo ula "
" kan lawm tak meuh meuh ani, lawmthu sawi ngaihna pawh kan hre lo "
" in lawm chuan ațha anih chu, nangni kan puih theih avang che u hian keini pawh kan lawm asin, min thlah tu Pathian Chiron-a chuan, midang tana malsawmna thlen tu nih hi mi fing te tan ani, tiin a sawi thin a, chu chu kan keini Centaur- ho in kaihhruaina ber ani asin "
chu tah Penelope-i lam ah chuan pheiin, alu chung ah a kut pahnih chu nghat in,
" Ka fanu, tluang tak in kal ula, Pathiante chuan an veng zel ang che u, saw tuipui atang sawn nun dam tak in ilo kir leh ngei tur ani, Klámata - tih chu mittui tihna ani a, chuvang in i lungngaihna leh hrehawmna, anchhia i phurhna te chu sûn in he Klámata- tuipui ah hian i mittui chu va far tir ang che "
chutia a sawi zawh chuan Penelope-i chu a kuah vawng vawng a, chutah Marcus-a chu kuah leh in,
" nang tlangval tumruh leh huaisen, Perseus- a ang mai leh Hlauh neilo mihring, greek pasaltha zawng zawng zing a hmingthang ber Achilles- a ang mai Marcus Valerious-a, i tum chu ti hlawhtling la, huaisen tak in bei zel ang che " a ti zawm leh a.
chutia a sawi zawh chuan thing pûm ah chuan Marcus-a te pathum chu an lawn kai a, tichuan tuipui chungah chuan an leng ta delh delh a.
Chutia an thing lawng a Klámata- tuipui chung a phur leh tha tho tak chung a enge maw chen an kal hnu chuan, an piah lawk tuipui lai ah chuan thliarkar ang deuh lung lianpui pui pui tui atanga lo chawr chhuak ni awm tak hian alo in hung rûn a.
Hlim taka Marcus-a kuah a chu lung thliarkar kawh pah chuan Penelope-i chuan,
" saw ngei saw anih saw, Marcus- Pathian ten min țanpui anih hi "
Penelope-i kawh na lampang thlir dauh dauh pah chuan Marcus- chu hlim in a nui suk a, Penelope-i chal ah chuan fawp zauh in, duat tak in a kuah vawng vawng a.
Chutia ka ren reng lai chuan chu lung thliarkar chu zawi zawi a hnaih phei zel in, reilo te an an thleng chu a ni ta nghal mai a,
Penelope-i chuan sakawr chu kaiin lung pakhat chung ah chuan an zuangkai a, chu lung lianpui a thut hmun rem pah chuan Marcus-an a an thing lawng lung pher chung a a hnuh chhoh lai chu hmuhnawm tih hmel deuh hian a lo thlir vang vang a, chutah phawk tak hian,
" Saw, Marcus " rawn tih thut pah hian Marcus- a piah deuh a lungpui pakhat chu rang tak hian a kawk a, chutah Marcus- a lam ah chuan zuang phei chu a kawh na lam chu hlauh hmel tak hian a thlir duk duk a.
" enge ni ta, enge i hmuh a ?"
" enteh, saw lai lungpui phen ah sawn enge maw ni a awm chiang a ni, tunah lawk khan a rawn lang zauh a alwm "
Penelope-i kuah reng chung chuan a kawhna lam chu an hawi phei ve vat a,
" i hmuh sual ani ang, engmah anilo ang ?"
Penelope-i chu ațang tlat a,
" ka hmu chiang a lawm, a pil thla leh lai pawh ka hmu chiang ani, mihring anih ngai chuan, a ban leh a sam sei deuh chu ka hmu a lawm "
" anih chuan tah hian lo awm rawh, ka va en ang e "
An piah lawk feet sawm leh pahnih bawr vel a lung lian deuh awm chu Marcus-a chuan a chem sei hûm chung chuan muangchang hian a pan phei chhut chhut a,
chu lung chung a lawn kai chuan a bul vel chu zawn nei ni awm tak in an thlir kual a, chutah hmui ti ner nung nung chung a Penelope- lam hawi pah chuan,
" i hmu sual ani mai thei, engmah a awm lo "
mak tih hmel tak hian Penelope chuan,
"Tak tak maw " ala ti hram a.
" sakawr kha kai la, lo phei rawh, heti lam ațang hian kal mai ang "
hmanhmawh deuh a sakawr kai chung chuan alo phei vat a.
Chu lung thliarkar chung sang lam pan chuan an in zui chho ta dat dat a.
"nichin khan i hmusual - pawh an lo ni mai thei asin "
" tak tak maw "
" ni e, kan thawm ah khan tuipui chhung ațanga lo chhuak in min rawn thlithlai pawh ani maithei asin "
a mit sir a Marcus-a melh chung leh nuih ralh ralh pah hian,
" engmah i hmulo ani lawm ni, engmah a nilo vang "
a kal lai chu a ding chawt a, Penelope-i lam hawi hian,
" i hmu a lawm, kei pawh in ka hmu, ka ti tak tak ania ?"
Penelope-i chuan awihloh hmel deuh hian a mit ko an sân âk a,Marcus-a chuan alam a pawt hnai in a kut in an hma zawn si, an awmna hnuai lam deuh, thingbuk tawi te te in tlar țhat na lam chu an kawk a,
" en teh, saw i hmuh reng saw ?"
Penelope-i chuan awih loh hmel deuh hian Marcus-a kawhna lam chu an hawi a.
Chutia a hawi rual chuan a meng biak kawk a, sawi tur haihchham ni awm tak leh mak tih hmel deuh hian a ka a ang hau a,
" kan vanneihna a kal tluang hle mai, i vawikhat hmuhna em ni ?"
He lungpui thliarkar hi, tuipui lai a awm, thliarkar han tih dawn em chuan feet sawmruk bial vel lek a zau si hi ani a, thingkung tawi te te buk deuh deuh tihloh chu hnim tlem azawng bak a țo meuh lo, lung lian pui pui in a khat ani ber mai, a mual hi tlang ang deuh, pyramid pian ang deuh si ani.
An hma lam hnuai deuh si, tuipui chím chin leh chinlo, lung lian pui pui bul vel a 'Mermaid'(sangha nula kan tih ang hi. CR)- sawm rual vel lo in chhaih nak nak leh lungpui chung a a țhen lo mu thlawr te chu thlir dauh dauh chung hian Penelope-i chu mak tiin a la ding ngawi reng a, Marcus-a chuan an nghawk zauh tak ah chuan,
" ni e, an sawi chu ka hre țhin a, mahse atak ah chuan ka vawikhat hmuhna ani, engtin nge, engtinge kan biak ang, min hlau angem " ati bah niaih a.
" hlau lo ang ka ring, mahse thawm dim deuh in kal phawt teh ang "
Marcus-a chuan thing buk pakhat ah hian a sakawr chu a thlung mawlh mawlh a, chutah chung Mermaid- ho awmna lam ah chuan thawm dim tak hian thing buk kar a biru pah deuh hian chung zel hian an chhuk thla det det a.
Chutia thawm dim tak a an chhuk thlak det det lai chuan, Penelophe-i chu a in chhuih khut a, a hma lam ah chuan a tawlh thla ta pur pur a, Marcus-a chuan umzui vat mahse a nih tur ang ani zo tawh tho tho.
Chung Mermaid- hma zawn chhak deuh a thing buk te reuh te pakhat ah chuan in vuan tang in hmanhmawh tak in a tho zui nghal vat a, alam pan a Marcus-a lo tawlh thla mek lam ah chuan hlauh hmel deuh hian bawkvak deuh ti tih hian alet lehnghal rawk rawk a.
Chutia a tawlhthla dawt dawt ri chu hria in Mermaid- ho pawh chuan mak tih hmel deuh hian an lo thlir țhup a.
Mahse tlanchhiat pawh an tum chuang lem lo, Marcus-a te pahnih chu ngawi reng hian an en reng hlawm a.
Chutia mak tih hmel deuh a an en reng lai chuan Marcus-a te pahnih chuan muangchang hian an pan chhut chhut a, chutah Marcus-a chuan ring deuh tak hian,
" Marcus Valerious leh Penelope-i te kan ni e, hlauhawm kan ni lo, Pathian ten a min hrilh ang in Calypso- i hmu tur in ani kan lo kal ni " a ti a. Mahsela chung Mermaid- ho chu an ngawi thap a, chhan tum awm hmel pawh an awm lo.
Reife chutia ngawi reng a an in en reng hnu chuan, an zing a pakhat chuan a ban ding lam rawn phar chhuak in,
" kan lo lawm a che u, keimah hi ka ni e Calypso- chu, in lo kal tur thu hi kan lo hre tawh asin "
Penelope-i bengbulah hian zawite hian Marcus-chuan,"anih chiah saw, Centaur-te min hrilh ang ngeiin a sam a sen a, a mitmu pawh a pâwl" a ti se se a. Penelope-i pawh chuan ama hriattawk lek hian," Pathian te zinga mi niawm ani, a va han hmelțha kher em."a ti bah deuh niaih a, a makti chu ala hamhaih deuh niin alang.
Anbul an thlen chuan Marcus-a chuan a ipte ațanga darthlalang bur tereuh te leh savun ip te tak te sei zet chu rawn phawrh chhuah pah in,
" kan hmu che chu kan lawm hle mai, kan chanchin chu i hre tawh tho ang a "
aw tih nan ni awm tak hian Calypso- i chu an bu nghauh nghauh a.
" he savun chhung ah hian Unicorn hmul a awm a, chuan he darthlalang bur hi 'Grey Sister' ten a min pek ani, chuan a pahnih hian i kut a hlan tur che in min hrilh bawk a "
chu a thil ken lai chu pek pah in,
"a tih dan tur chu aman a lo hre mai ang an ti a "
chu bûr chu ngun tak a thlêk vang vang chung hian Calypso-i chuan,
" ni e, ka hria a lawm, mahse minlo nghah angai dawn ani, hun reilo te chhung chu, he bûr ah hian Styx- lui tui thun tel in chu mi hnu ah he Unicorn- hmul hi thun leh tur ani a, chuan a tui ah hian he hmul hi a inchiah ral vek tur ani, chuan chu chu i țhiannu ina a in zawh vek angai ang "
(Styx- lui hi, hmanlai Greek ho lui thianghlim ani a, mizo ten a Rihdil kan tih nen hian a in ang deuh, mitthi khua kalna kawng lui ve tho ani a, he Styx-luikam ah hian mipakhat lawngpû Charon-a a awm a, chu pa chuan mitthi thlarau te chu a lawng a phur in, he Styx lui hi a daikai pui a, mitthi khua ah a kai pui țhin, chuan Greek mi reng reng an thih hian an mit ah pawisa thir(coins) an dah țhin a, chu chu lawng chuan man ah Charon-a chu an pe țhin an ti ani.
Chuan he Styx lui hi Mei thianghlim nen a in zawm in, he lui a in bual apiang chu Pathiante ang in an thi ve theilo țhin ani.
Chu chu hria in Tuipui Lasi Thetis-i chuan afapa Achilles-a tana Pathiante ruat sa kawng zawh tur A puitlin hun a Troy indo na a a thih tur thu, Pathiante rorel sa tih danglam tumin a fapa chhan nan he lui ah hian a nausen laiin a bual a, mahse a kut a a chelhna a kerek chu a chiah pil ve lo va, chuvangin a kerek ah chauh tih fuh in a thih theih phah ta anih kha, chu a thih theihna thuruk chu Hector-a a thah dawn khan sawiin, chu a sawi chu Apollo-a chhiahhlawh in alo hre ru a, chu chuan Apollo a hrilh vat in, Rimawi leh thal kah lam Pathian Apollo- chuan Troy- lal fapa Paris-a thal kah chu tih ngil sak in, Achilles-a kerek ah tak a kap a, miropui Achilles- an athih phah ta ani. CR)....
Calypso- i chu chûng ațhian hmelțha tak tak Mermaid- ve tho pahnih te nen chuan hmanhmawh tak in tui thuk tak lam pan chuan lut in an bo pil ta daih a.
Ni pawh chu a tla fel ve chiah a, chung Mermaid- la awm ho chuan sangha lian deuh deuh leh tuikep enge maw zat hi an rawn man sak a, chung tuipui lasi te chuan kawr fual pan tak mai, tuikeplung leh tuipui pangpar a chei mawi hi an ha țheuh a.
An zing a pakhat sam dum hlap mai leh vûr ang mai a vun vûr chuan nelawm deuh hian,
" kei hi Doris-i ka nia, Calypso-i te kha chu zing lam ah chauh an rawn let leh hman ang, chuvangin heng sangha leh tuikep te hi eiin lo in ti puar ula, lo chawl hahdam rawh u " a ti a.
Marcus-a chuan,
" kan hmu thei che u hi kan lawm tak tak ani " ti a chhangin a tho nulh a, an piah lawk a thing buk tereuh te te chu lakhawm in meipui a chhep hluah a, chutih lai chuan Penelope-i chu chung Mermaid- ho chuan duat leh uluk tak a a sam te lo khuih sak in, tuikeplung țhi nalh deuh mai hi pe a, eng eng emaw sawiin an nui ho leh dar dar țhin a,
Marcus-a chu mei êng ina a chhun phâkloh deuh ah hian kalsawn in lung lian deuh pakhat nghenchhan chung hian Penelope-i leh Mermaid- ho hlim tak a an in kawm chu lunglen hnel deuh hian a thlîr reng a,
reife hnu ah chuan Penelope-i pawh muthilh chhuah hmel deuh hian a rawn phei ve ta hnak hnak a, Marcus-a si chat a rawn țhu ve in, a koki ah chuan alu an nghat a, Mermaid- ten a an pek tuikeplung ațanga siam țhi khawih niap niap pah chuan,
" An vai mai sawn Pathiannu te ang mai a hmelțha an ni, Hmangaihna leh hmelthatna Pathiannu Aphrodite-i pawh an lak ah chuan a țha fal bik kher lo maithei ani "
Marcus-a chuan a puan sin lai chu Penelope-i zawn ve in, an kuah nghet sauh a,
" reilo te tal chu i chawlh hahdam angai ani, mutthilh tum rawh "
" aw le, nang pawn mutthilh chu i mamawh ve tho ania "a ti a, reilo te ah chuan Marcus-a ngheng rial chuan Penelope-i chu a muhil ta daih a.
an hma lam tui leh tui lo chin ah chuan Mermaid rual ho chu hlim tak hian an in chhaih a, a chângin an zai leh dual dual a, chu an zai ri mawi leh khua ti har tak mai chuan Marcus-a chu a engemaw angaihtuah tir ani ngei ang, van chung sang tak maia arsi phe tuarh mai te chu che chang lo lek hian a thlir vawng vawng a. A changin rilru hah hmel deuh hian a rûm leh hak țhin a. Chu zan thianghlim tak mai ah chuan mutthilh zai reng a rel theilo ani ber e. Khawvar dawn ruaiah reilo te a chhîng ve sek tih mai loh chu.
An piah lawk ațang chuan " Marcus, Marcus " tih hian aw alo chhuak a, chu aw chuan Marcus-a chu ti harh in, a rawn meng nghal zawt a,
reilo te emaw an mutthil atih nak laiin, Ni chu sang tak ah alo chhuak leh hman der tawh a.
A bula tui tak a muhil, thlamuan hmel tak a thaw ri sek sek Penelope-i chu a thlir vung vung hnu ah hmanhmawh tak a tho vin a thawmhaw chu a ha țha sawk sawk a, Aw lo chhuahna lam ah chuan muangchang hian a phei chhut chhut a,
An piah deuh hlek lungpui chung ah hian Calypso-i leh a hma zan a a kalpui Mermaid ve tho pahnih te kha an lo țhu a,
chu lungpui chung ah chuan lawn kai ve nghal in, tuipui lam hawi chuan thut hmun an rem ve a,
hlim hmel tak hian Calypso-i chuan Marcus-a melh ralh ralh pah hian,
" in mu tui bawk maw, khua a var na a rei tawh khawp asin "
" zan pawh sawi lovin kan zinkawng kan rawn zawh char char ani a, hahdamna hun kan nei lo em atin ni, enge chanchin ni ta zel a, chhiatna lam nge, țhatna lam " tiin a zawt zui nghal a.
" Marcus- engkim chu Pathiante remruat ang zel in a thleng e "
a kut a darthlalang bûr a hum reng chu Marcus-a pek pah hian,
" a rawng hi a mak iti em, Styx- lui thianghlim nen a chawh pawlh anih kha "
chu darthlalang bûr a tui paw ram mai chu a mak in a rawng alo danglam vek tawh a, tun ah chuan a rawng paw riai chu a uk khak tawh a, mahse a thianghlim hmel in a fim em em tho bawk si,
chutihlai chuan Penelope-i pawh chu lo tho tawh in puan lum hmel tak sin hlun chung hian Marcus-a te lam ah chuan a rawn phei ve a,
Marcus-a bulah rawn țhu ve in, Marcus-a chu an ngheng nghal thawng a,
chutah Calypso-i vek chua Marcus-a darthlalang bûr en reng pah chuan Penelope-i hnen ah chuan,
" he tui hi i in tur atan a buatsaih fel vek tawh chu ani e, tun ah khan in nghal mai rawh "
Penelope-i chuan Makti taka Marcus-a bûr kenlai chu melh run run chung hian muangchang in a lak sak a,
in tum a a ka zawn a a ken lai chuan Marcus-a chuan,
" vawikhat ah in zawh nghal vek tur anih kha aw".
Penelope-i chu a tîm deuh ani ang, chu bûr lek chung chuan Calypso-i te chu an melh kual leh te te phawt a, chutah Marcus-a chu melh leh zauh in a thaw hak a, chutah a in ta a.
Marcus-a, Calypso-i leh a țhiante pahnih chuan Penelope-in a bûr a tui a in lai chu nghahhlelh leh hmuhnawm ti tak hian lo thlir dauh dauh a.
" ka ka ah chuan a thlum a, mahse ka pumchhung ah chuan a kha kher mai "
Marcus-a chuan duat tak hian an kuah a, chutah zawi sap hian,
" tunah chuan i dam ta, i anchhia chu lakbo in a awm ta, i zalen ta " ati mawlh mawlh a.
Chutah hlim hmel tak hian Calypso -i chuan,
" tun ah chuan in khaw lam pan in in let leh thei ta, khawvel a mi vannei ber chu in ni "
" nangmah vang liau liau ani, lawmthu sawi ngaihna pawh kan hre lo "
chutia a sawi lai mek chuan Penelope- i hnen ah chuan Marcus-a chuan,
" khua ala tlai hma hian helai hmun hi i chhuahsan dawn ang hmiang, khawi khua emaw chu hnaite ah a awm ngei ang "
aw tih nan Penelope-i chuan a lu chu a bu nghauh nghauh a,
tichuan hmanhmawh tak a tho vin, an lawng awmna lam chu an pan leh ta a.
Calypso-i chuan,
" chhim chhak lam hawi zawng hian lui hi zawh ula, hnai te ah Albina- khua a awm a, khaw nuam tak ani "
Marcus-a chuan an thing lawng chu lung pher chung ațang chuan hnuk thla in, Penelope-i te pawh chu an rawn lawn kai vat a, Calypso-i te pawh chu lo kal hnaiin, in thlah nan an han in kuah leh rih phawt a.
Chutah Ida- tlang ațanga thlifim lo thaw chuan an lawng chu tuipui zau lam ah chuan a lên kal ta ruai ruai a, Calypso-i te pawh chuan an lan theih chhung chu ban rawn vai lauh lauh in, reilo te an tuifawn chuan hmuh theiloh lam ah a len ta vawn vawn a..
Comments
Post a Comment