Chutia Goth sipai ho an man zawh hnu chuan Eastland khaw lam pawh pan tawh chuanglo chuan an in beihna hmun piah lawk a ngaw chhung deuh reuh ah chuan chau deuh hian an in thiarfihlim zui a.
Helai a an kalna, riahbuk an sualna lai hi Underworld Veil-in hawnna bul lawk ani a, mahse mual pawng sâng fahranlo hi an inkâr ah a tlak zeh avangin leh Goth sipai te riahbuk aia a hmun a sân deuh zawk avangin a remchang hle a.
Marcus-a hma a Eastland lam pan a lo va kal hmasa te ho khan helai hmun ah hian riahbuk anlo sual sa tawh reng a, mahse an tam tham deuh avangin hmun thum lai ah hian anlo in țhendarh a, Goth sipai ho awmna hnaih deuh, Clenith khaw panna hnaih deuh ah hian, Nothland, Spart leh Phthia sipai ten riahbuk an sual a, Eastland chhim lam pang ah Gulisan, Eurodia leh Pisa sipai te an awm ve thung a.
Chuan Eastland panna pangngai, Goth sipai te awmna zawn ep chiah mual pawng hnuai ah Aliras leh General Hestia sipai, Verna sipai ho ten riahbuk an sual ve bawk a.
General Hestia puanin ah chuan an pahnih chuan an in zui lut a, Hestia bakah sipai ho dang hrim hrim puanin chu a te hlawm hle a, a țhen chuan puanin pawh an zar chuang lo, meipui an chhep hluah a, a bulah an riak ve mai bawk a.
An chau bawk aniang, biak pawh an in be mang lo, an thir kawr leh ralthuam te an dah fel a, Uain tlem lem dun leh in, Hestia chuan Marcus-a chu puan thuah lum hmel tak mai hi a pe a.
Marcus-a chuan phûr fahran lo a pharh surh surh in tlu zâl nghal thurh a.
Hestia erawh chu uain no dawm in ala țhu reng thung a.
" i țhiannu chu enge alo an a?" tiin Hestia chuan a zawt a.
Zangthal chunga mu hian, men pawh meng chuang lo hian Marcus-a chuan,
" sawi thiam a har khawp mai, rul in a chuk ani awm a?" a ti a.
Hestia chuan mak tih hmel deuh hian,
" rul in a? A ngaihtuahawm em? Eng rul nge ni a?" an ti deuh hluai a.
Marcus-a chuan ring fahran lo hian,
" kan misual Zeddicus-a hnathawh ani ngei ang, anu sawi dan in 'dark magic fídi' an tih ang, te reuhte avar deuh ang chi kha ani a," a ti sep a.
Hestia chuan,
" anih chuan engtia tih chi nge ni dawn, Wizard Neira- i hmuh ngei ngei angai anih chu, mihring kanin chan lo ang tih a hlauhawm alawm le?" a ti a.
Zawi fahran hian,
" ni e, engpawh ni se, underworld veil hi engtia han tih zui zel chi nge ni ang ? Mi pakhat ai chuan mi tam zawk nunna hi a hlu zawk alawm?" Marcus-a chuan a ti leh a.
Hestia chu an ding hluai a, eng emaw ngaihtuah pah ni awm tak hian chhuat lai ah chuan muang fahran hian a vei thauh thauh a.
Eng emaw chen hnu ah chuan,
" i țhiannu chu i ngai pawimawh ber tur ani, helai hmun hi chu ngaihtuah lutuk duh suh, sipai an tam a, chu bak ah Goth sipai ho te pawh rawnin punkhawm leh mahse an tam tawh vak kher chuan ka ring lo, tunah pawh General Adratus-a leh a sipai ten an thuhnuaiah Tyndar- khua an dah der tawh a, General Menelaus-a leh Captain Aeson-a te pawh in Clenith khua an la daih tawh asin, Pathian ten min țanpui a hmun tin ah hnehna kan chang chho zel anih hi, Khorbi, Urdin leh Celticus te pawh kan la zo tep tawh ang chu, chuvangin Delain- ah chuan kir leh la, i țhiannu chu i chhan ngei ngei tur ani," a ti a.
" Ni thar te rawn chhuak phawt se la?"
Marcus-a chu a muhil nghal daih a, Hestia erawh thir kawr pawh ha tawh chuanglo in a ngunhnampai chungin puanin pawn lam ah chhuak in a sipai ho te chu a va kilkawi daih a.
Zing ni chhuah hma deuh, Marcus-a a thawh hnu pawh in Hestia chu a rawn la let chuang lova, Marcus-an a tûkțhuan a ei lai mek chuan Athens sipai General Pelias-a leh Thebes sipai General Tydeus-a te nen an rawn in zui lut a.
Marcus-a an rawn hmuh chuan Pelias leh Tydeus-a chuan chibai an han buk zauh a.
Marcus-a țhutna bulah chuan an rawn țhu a.
" kan sipai ten hnehna an chang zel hian Pathian ten min awmpui tih a ti chiang ngawt in ka hria," tiin General Pelias-a chuan dawhkan a Apple ban pah chuan an ti a.
Hestia- chuan,
" General Ajax-a mi tirh te an lo kal a, eng emaw sawikhawm tur a awm ati ani awm e, Eastland lamah kan kal angai ania," alo ti ve a.
Tichuan tûkțhuan chu an ei chhunzawm ve ta nghal dial hlawm a.
An ei zawh chuan Marcus-a leh Hestia pawh chuan an thir kawr te ha in, ralthuam famkim an in bel sawk sawk a.
Țhu khaw muang tawh lo vin an in zui chhuak ta dial hlawm a.
Pegasus pawh chu puanin kawt ah chuan alo awm reng tawh a, Marcus-a a hmuh chuan alo hram ruai ruai a, a thla alo ti pharh duai duai bawk a.
A chungah chuan lawnkai in, General dang te nen chuan chak tak in Eastland khawlam pan chuan an tlân ta dial hlawm a.
Hmanhmawh a tlân an ni lemlo bawk a a tlâb chak vak hlawm hran lo.
Eastland khaw chhung an luh chuan Ni pawh a vanlai zawl hial tawh a.
Eastland khua hi a hmun a rem mai piah lam ah a mi chengte pawh an changkang ang reng hle a, a khua alian in in sang pui pui a ding thluah hlawm a, Indona in chiahpiah nasa hle mahse a boruak erawh a rih vak hmel loh.
Sipai ho riahbuk hmunpui deuh lai, khaw tawn tirh ah chuan puanzar anlo zar phe hlap hlap hlawm a, puanzar ah chuan mupui lem, Pathian ropui ber Zeus-a chhinchhiahna mupui thlâ ngei mai chu mawi tak hian a in nem kai hlawm bawk a.
Râl veng sipai te chuan an General puanin lam ah chuan Marcus-a te ho chu anlo hruai vat a, a hma ang bawk in Marcus-a chu anlo en duh hlawm ngei mai, a bik in Pegasus chu an hmu duh leh zual.
Puanin a an han inzui luh chuan General Ajax-a pawh alo awm a, General dang ho pawh anlo awm kim hlawm hle.
Urdin khaw lam a kalta Iocus khaw sipai General Caeus-a te, Celticus khua a kal Argos leh Boscan sipai General Polybus leh Oedipus-a te bak ah Tyndar khua a kal Boevia sipai General Adratus-a te pawh anlo thu țhu hlawm a.
An rin loh tak a an han inhmukhawm leh chu an hlim hlawm ngei mai, chibai an in bûk sap sap hlawm a.
Tichuan țhuthmun te rem a an han țhut fel zawh hnu chuan General Ajax-a chu alo ding chhuak a.
" Vawiin ni a dam tak a kan in hmu khawm leh thei hi a lawmawm in Pathian ten min țanpui reng tih alang chiang hle ani, tunah hian kan ral beih te hi kan hneh tluk ani tawh a, hmun tam zawk ah chuan kan nek chhuak tawh a, General Adratus-a te pawh hian Tyndar khua ațangin Goth sipai ho an umchhuak tawh a, Clenith khua pawh General Menelaus-a leh Captain Aeson-a ten an thuhnuai ah an dah tawh a, tin a tam zawk awmna leh an hmunpui ber, Eastland khaw dai ațang pawh in kan nekchhuak ta ani a, chuvangin a tawp lam kan hnai tawh in ka hria a, kan indo nasa a, kan chau tawh tih pawh ka hria, mahse hei aia kan țan rual a, tha thar kan thawh leh chuan reilo te chhungin indona hi kan titawp thei ani," a ti a.
A sawi zawh rual chiah chuan General Pelias, Athens khaw sipai chu alo ding chhuak ve nghal a,
" Ni e, General Ajax-a sawi ang khan kan sipai te hi an chau tawh hlawm hle a, chawlh hahdam pawh an mamawh tawh khawp mai, mahse kan hriat tur chu Ral do kan ni a, indona hmunah kan awm a, chuvangin kan beih țâng țang angai ani. Tunah pawh hmun tlemte chauh kan thuhnuaiah kan la dahlo ani a, chuvangin sipai pawh kan in puih tawn a, kan in sem rual deuh angai ani, in ngaihdan te han sawi ve ula, kei chu in tihna hmun hmun ah ka kal thei reng," tiin alo sawi zawm ve a.
Thebes sipai General Tydeus-a chu alo ding chhuak ve leh a,
" in remruat dan chu a ța ka ti khawp mai, Clenith khua chu General Menelaus-a ten a an lâk tawh Captain Aeson-a leh sipai țhenkhat ten lo țhutchilh rih mai sela, General Menelaus-a chu General Caeus-a te awmna Urdin-khua ah kal ve mai se, keipawh in ka sipai te hruaiin ka va țawiawm ve ang," a ti a.
General Hestia chuan,
" Eastland ah hian Sparta leh Aliras- sipai ten General Ajax-a te hi lo awmpui sela, chuan Khorbi lamah General Phocus-a te țanpui tur in Crete, Gulisan leh Pisa sipai te kal ve bawk se la, Celticus khua ah General Polydeidos-a leh Nothland, Phthia sipai te kal bawk sela, chuan kei pawh Clenith- khua ah ka kal ve ang e," a ti a.
Chutiang chuan an remruat dan hrang hrang te chu an han sawi khawm leh a.
An ruahman dan ang ang chu an sawi zo hma khawp mai, mahse an in hmuhkhawm khât deuh avangin an ti ti tui hle a, General Ajax-a puanin ah chuan zanriah an kil zui ta dial hlawm a.
Mahse Zanriah an kil zawh hnu lawk chuan General Hestia leh Marcus-a te chuan an thawhsan a,
General Pelias-a te erawh chu khua ala tlai chhe em em lo bawk a, an la țhu fual rih a.
An sakawr ah chuan an lâwn a, muang fahran a tlân tir beuh beuh in eng emaw sawi hian an titi dun melh melh a.
Thui vaklo an tlân hnu chuan an mahni tâwk zawng hian putar pakhat, kawrfual hlui tawh lam pang ha, tiang hrawl pui mai hawl hi alo phei chhut chhut a.
Marcus-a te hma zawn tak ah chuan a lo ding chat a.
An pahnih chuan an in en a, chu putar chu mak an tih dun hmel hle a,
chu putar chu zawi te te a phun sep sep chung hian Marcus-a kal hual chuan a kal chhut chhut a, chutah Excalibur, Marcus-a pai lai an hmuh chuan a meng zau kâwk a, an en chiang zual leh sauh a.
" Excalibur, dawi chemte, underworld veil khâna tur chu," zawi fahran hian a ti a.
Marcus-a te chuan chu pa chêt dan chu mak an tih hmel hle a, ngawi reng hian an thlîr dun ringawt a,
Hestia chuan,
" ka pu tunge inih a, eng maw i sawi a?" an ti a.
Hestia pawh chu a en chuanglo, Excalibur la melh reng chung chuan,
"Underworld veil chu hei chauh hian a ti phui thei ani," a ti leh a.
Chutah a hma aia ring leh hret hian chu putar vêk chuan,
" Underworld Veil hi he chem Excalibur chauh hian a ti phui thei ani," a ti leh a.
Marcus-a chuan,
" ka pu, i sawi chu ani tak tak meuh maw? Engtin nge Veil in hawng chu ka tih phui ang?" hrilhhai hmel deuh hian a ti a.
Chu putar chuan Marcus-a chu rei fe ngawi reng hian, mit la lek lo hian an melh vang vang a.
muang ban chat hian,
" tlangval, he i dawi chemte hi 'temple of the wind' ah i dah angai ani, chuti chuan underworld veil- hi a in khâr thei ang," a ti a, reilo te an chawl det a.
" Calydon- khua ah a ikal angai ang, chutah chuan thli Pathian(god of wind) Aeolus- a temple a awm a, chumi temple ah chuan Excalibur- hi i dah dawn nia, tichuan underworld veil- hi a phui leh ang," a ti a.
Chutia a sawi zawh hnu chuan muang fahran hian khaw chhung lam pan hian a kal beuh beuh a, ama hriat tawk lek hian ala phun sep sep zui lehnghal.
Mak ti tak a chu putar en zui chung chuan anni pawh chu kal leh ta a.
An en lai reng chuan chu putar chu mipui awmlohna lam deuh ah hian a kal pêng a, sava dum lian tak ah hian a chang thut a, rang tak in a thlawk bo zui ta nghal daih a.
Marcus-a chuan hamhaih deuh hian,
" Hestia, ilo hmu em? Kha putar kha sava ah a chang daih anih kha," a ti ruai a.
Hestia pawh chuan alo hmu chiang ve khawp ani ang, mak a tih hmel ve hle a,
" a thusawi kha a dik ngei ang, Pathian tu emaw ber chu ani ngei bawk ang, hmânah Thessaly khaw pan a pasalțha Jason-a a kal laiin amah tâwk zawng in țanpui ngai ang tak in Pathian ropui ber Zeus-a nupui, hmelțhatna leh inneihna Pathiannu Hera-i chu pitar zâng kûl tak ang in alo in siam tawh bawk anih kha, chuvangin Pathian tu emaw ber chu ani ngei ang tih ka sawi ngam sak ani," a ti a.
" engpawh nise underworld veil chu kan buaipui hmasak phawt angai dawn ani, chumi zawh ah chuan Delain- lam kan pan aniang chu, Pathiante thil ruahman dan ang anih chuan Penelope-i pawh an la venghim ngei ang," Marcus-a chuan a ti a.
Mahse Hestia chuan a chhâng lo, Marcus-a vêk chuan,
" tunah hian ka kal nghal mai dawn em ni? Duh leh zanin chu Eastland ah hian riak ve rih la ani mai alawm," a ti a.
Hestia chuan,
" Ni e, Pathiante chuan i țhiannu nen chuan an vêng zel ang che u, kan riahbuk lam a ka kir leh vat loh zawngin thil a buaithlak ang e, sipai kan in sem darh dan tur te pawh la rel fel angai si a," a ti a.
TichuanPegasus chu van boruak lam ah chuan a thlawk chhuak ta nghal a.
" anih leh phawt le, lo kir leh vat ka tum dawn nia," Marcus-a chuan a ti a, tichuan van sang lam a thlawk chho zel in Calydon khaw lam pan chuan an thlawk liam ta a.
Calydon ram ah hian Lal hmingthang tak mai Lal Oeneus-an hmanlaiin ro a rel țhin a, Zu Pathian Dionysus-a chuan zu siam nana țha deuh Grep chî chu Lal Oeneus-a hi a pe a. Lal Oeneus-a chuan grep chu a chîng a, a thar hlawk hle mai a. Pathian zawng zawng hnenah lawmthu sawi nan inthawina a hlan a. Amaherawh chu, ramsa pêltu zawng zawng leh ramsa te Pathian, Artemis-i hnenah inthawina a hlan theihnghilh hlauh mai a. Artemis-i thinrim chuan Calydon ramah chuan nghalchang lian leh kawlh lutuk mai a chhuah ta a.
Chu nghalchang chuan an thlai te a ti chhia a, an huan leh thlai chînna zawng zawng te chu a suasam sak vak a. Chutah ran leh mihring te pawh a hmuh apiang a bei buan bian zel mai bawk a. Calydon mipui te chu an mangang em em a, mahse tumah in an tihlum thei silo, tihhlum a hnêk in an hlau em em a.
Chutah an Lal Oeneus-a chuan Argonauts rammutna a kal, Pasalțha te chu anmahni țanpui turin a sawm a. "Tupawh sanghal that thei apiang chuan lawmman ah a vun an nei ang," a ti a.
He nghalchang beihna ah hian Pasalțha hmingthang leh huaisen Achilles-a pa, myrmidon Lal Peleus-a pawh a tel ve a ni.
Calydon rama nghalchang bei tura kalte hi 'Calydonian Hunters' an ti a, Greek ram khawpui hmuntinah an hmingthangin an zah em em a.
Pasalțhate chuan nghalchang chu anlo châng a, hmeichhe huaisen Atalanta-i'n a thal a thlah hmasa ber a, Argos Lal Amphiaraus-a'n a dawt a, a mit ah a kâp a, Meleagar-a'n a feiin a nãk ah chhunin a chhun hlum a.
A vun chu a chhun hlumtu Meleagar-a an pe a, mahse ani chuan thal thlah hmasa ber tu Atalanta-i a pe chhawng leh a.
Thestius-a fate chuan chutia mipa tam tak zînga hmeichhia in lawmman a dawng chu an ngaithiamlo hle a. Anmahni zîng ah chuan buaina a chhuah phah hial a, mahse Meleagar-a chuan Atalanta-i chu a ngaihzawn avangin Thestius-a fate chu a that ta ani.
Zankhua in Marcus-a te chu vân chung sângah chuan an thlâwk a, hmanhmawh viau mahsela an chau tawngkhawng tawh in, chutiang em em chuan an thlâwk chak thei lo.
Khawchhak lam a Nî alo chhuah țan lai vel chuan châwl tur in lei lam an pan a, an thlawh san em avangin lei a țum tur pawh in an thlawh hniam ve fe angai tho mai.
An hnuailam a ngaw dur khup mai lam pan chuan muangchang hian an thlâwk hniam ruai ruai a, chutia an thlawh hniam lai mek chuan Marcus-a chu an hawi kual vel a, an hnuai zawn ram ngaw dur pui zau tak mai piah lawk ah chuan khaw len hmel deuh mai hi alo lang a, mahse chhûm in a bawh nasat avangin chiang tak chuan alang thei chuanglo.
Thil ngaihtuah vung vung pah chuan a thlir reng a.
Lei a an țum hnu pawh chuan a hmel chu mak ti hmel hi ala pu deuh reng. Pegasus erawh chuan hlim hmel deuh a a thla zah phur phur pah hian hnim a pet mawlh mawlh a.
" Delphi kan thawh khum tawh ang maw? Kan van thlâwk chak ve le? Chuti anih chuan saw khua saw Naupactus khua ani ngei ang," tiin a phun sep sep a.
Chutah thingkung lian deuh ngheng chung hian a uain pai na, savun ip chu a hawng a, muang fahran hian a uain chu a lem sêk sêk a.
Eng emaw zah a in hnu chuan mut chhuah hmel tak hian a hâm bui bui a, ngûnhnâm chu phawrh in a hûm rân a, tichuan a muhil zui ta a.
A chau tawh bawk a, a muhil rei ang reng hle mai, a harh leh meuh chuan Nî chu alo tlangsâng tawh hle a, a vanlai zawl thuak tawh nghe nghe.
Tichuan phûr loh hmel tak hian a tho chhuak a, a piah lawk a nun chan zir niawm tak a tlan kual ruai Pegasus chu kovin a chungah chuan a lawnkai leh thauh a. Vânchung sâng lam ah chuan an thlâwk chhuak leh ta a.
Pegasus pawh chu a chawl hahdam ta bawk a, a hma ai chuan tlemin an thlawk chak ta deuh.
Reilo te an a hma lawk a an khaw hmuh chung zawn boruak ah chuan an awm der tawh a.
Chu an hnuai zâwn a Naupactus- khua chu a lian ang reng hle a, mahse chuti em em a ropui chu anih hmel hran loh.
Naupactus- khaw piah, hmar lam hla ang reng tak ah chuan Amphissa khua, khaw lian tak mai pawh chu alang uarh a.
Chawhnu her velah chuan tlâng sâng tak tak thlawh khum in Calydon- khua pawh an thleng hnai a, Calydon- khaw bul lawk a luang, lui hmingthang leh lian tak mai, 'river Achelous leh river Evenus(euenos)' te pawh chu an hmuh theih tawh a.
Calydon khaw bul a lui luang pakhat zawk Achelous- hi, Lui Pathian ropui Oceanus-a leh Lei Pathiannu ropui, Pathian te zawng zawng thlah tu Gaia(ghea)-i te fapa ani a, tin, Achelous- hi a hming ani a, a hming chawiin he lui hming hi an phuah a, Achelous lui Pathian hming hi a hming tihna anih chu.
Chuan lui pakhat zawk Evenus- hi chu indona Pathian Ares-a leh Siruk kan tih thin, 'Pleiades' unau te zîng a pakhat Sterope-i te fapa ani ve thung a, chuan He lui Pathian Evenus-a hian nupui ah Acippe-i anei ani.
He Evenus, Euenos- antih bawk hi a lâr hle a.
Hmanlaiin Pasalțha Jason-an Iocus khawpui a kal dawn in he Evenus- lui hi a daikai tawh a, daikai satliah mai anilo.
Pathian ropui ber Zeus-a nupui Hera-i chu he luikam ah hian Jason-a hmuh ngei tur in pitar zâng kûl tak ang in alo insiam a, tichuan Jason-a hnenah chuan he lui hi dai kai duh anga insawiin, Jason-a hian a pua a, awlsam tak in lui chu a dai kaipui ta anih kha.
He lui a dai kaipui avang hian Pathiannu Hera-i hian mal a sawm a, Thessaly rama Iocus- khawpui a Lal anih theih nan a țanpui ta anih kha.
Chuan he lui ah tho hian a kâwnga chin hnuailam sakawr, chunglam mihring (centaur)- pakhat Nessos-a a awm țhin a, lui dai kai duh te chu a chungah chuan tir in a lo dai kai pui țhin.
Centaur Nessos-a hi Thessaly ram a Lal sual deuh pakhat, indona Pathian Ares-a fapa, Lal Ixion-a fapa ani a.
Lal Ixion-a hian a puzawn a that a, a tlanbo a, mahse Pathian ropui Zeus-a chuan a ngaidam a, Olympus tlângah hruaiin Pathiante ruaițhehna ah chawhlui a kîl tir ve a. Ixion-a chuan Zeus-a nupui Hera-i chu hmelțha ati in, rilru țhalo tak a pu ta a. Zeus-a chuan Ixion-a'n a nupui a melh dan a hmuhin a ringhlel a, tichuan hlum in a nupui ang tak hmeichhia a siam a, chu chu Nephele- ani.
Chuan Nephele-i chu Ixion-a chuan a pawngsual a, Nephele-i chu a rai a, Ixion-a nena an chi thlah ațang chuan hetiang, a kawnga chin hnuailam sakawr, Centaur-an tih ang chi hi alo piang ta ani.
Tin, Pasalțha Hercules-a nupui Deianira-i chu he Centaur Nessos- hian Evenus lui hi a dai kai pui bawk a. A chungah chuan tir in a dai kai a, mahse Centaur Nessos-a hian Deianira-i hi tlanbopui a tum a, mahse Deianira-i mangang aû ri chu Hercules chuan lo hria in thal mu hmawr a tûr tah in Nessos-a thinhnun ah tak hian a kâp a, chuan Centaur Nessos-a hi a thi ta ani.
Hercules-a leh Deianira-i te hi kum thum chhung lai an innei a, mahse Hercules- hian hmeichhe dang a neihsan leh daih ani.
Hercules-a hi Amphitryon-a nupui, hmeichhe hmelțha tak Alcmene-i leh Pathian chungnung ber Zeus-a te fapa ani a, mahse Pathian Zeus-a nupui, Pathiannu Hera-i chuan a pasal thiltih chu a duhlo in Alcmene-i chu a thîk hle a, chuvang chuan Hercules-a chu a nausên laiin thah a tum a, a mutna ah rûl pahnih a tir a, mahse Hercules-a hian chûng rû te chu alo rêk hlum ta zawk daih anih kha.
Tichuan Hercules-a chu lo puitling in nupui hmelțha tak mai Megara-i a nei a, fa pahnih lai an nei hman ani.
Mahse Pathiannu Hera-i chuan Hercules-a a huatna chu ala reh theilo a, tichuan zankhat chu tui tak a Hercules-a muhil lai chu a mumang a tihbuai sak vak mai a, chumi avang chuan Hercules-a chuan a nupui leh a fate chu a that ta vek a.
Zinga a han thawh chuan a nupui leh a fa hmangaih tak tak te a tihlum ani tih a hre chhuak a, tichuan rilru na tak chung leh mahni inthiamlo tak chungin Rimawi pathian Apollo-a temple ah a kal ta a, Mahse Pathian Apollo-a chuan Pathiannu Hera-i remruat dan angin ngaihdam theih anih loh thu leh, ramhuai thlarau ina a chenchilh anih thu alo hrilh a, hremna ala tawh ngei dawn thu alo hrilh bawk a.
Tichuan beidawng takin Delphi khua ah, Delphi zawlnei hmu tur in a kal leh a, Delphi zawlnei pawh chuan, a thisen bawlhhlawh (tual that anih tawh avangin misual, mi bawlhhlawh ani tawh ani. CR)
chu a thianghlim leh theih nan tih tur, hna hahthlak tak tak sâwm leh pahnih atih zawh phawt angaih thu alo hrilh leh a.
Chuan Tiryns- khua ah kal in Lal Eurysthes-a hnenah akal leh ta a.
Pathiannu Hera-i remruat angin Tiryns Lal Eurysthes-a chuan hna hahthlak tak tak sâwm leh pahnih a lo hrilh a.
He a phurrit leh hna hahthlak hi Hercules-a chanchin ngaihnawm em em mai, ' Hercules & The Twelve Labour' kan tih tâk hi ani.
He a hna thawh tur hi a râpthlak in a hautak hlawm hle a, mahse a sual tlenfaina leh thlarau ngaihdamna anih miau si avangin tilo thei ani silo.
Chutiang hna hahthlak tak tak a thawh zawh hnu pawh chuan hlimna ala nei thei chuang lova, tichuan Mount Oeta-ah kal in, thing a chhep hluah a, chu a thing chheh chhûngah chuan lût in inhâlhlum a tum a.
Mahse apa Pathian ropui Zeus-a chuan a fanu Indona leh finna Pathiannu Athena-i chu tîr in chu mei kâng hluah hluah zîng ata chu sakawr tawlailir in a hruai tîr ta daih a. Tichuan Pathiante chenna Olympus tlâng ah chuan hlim takin a chêng ve thei ta ani..
Calydon khua hi Aetolia ram bial chhûng a awm ani a, tin heng a țhenawm khua, Naupactus, Amphissa, Pleurah leh Mifing Odyeseus a lalna khua Ithaca te pawh hi Aetolia- ram bial chhûng ami tho hi ani bawk.
Tichuan Pegasus chu thlawh hniam tir in Calydon khaw dâi lawk ah chuan an țum ta a. Hmanhmawh viau mahsela chu khaw dâi ah chuan khua te nghak thim in zân an riak te te a, chuan a tuk khawvar rual chuan muangchangin khaw chhûng chu an lût ta chauh a.
Ala hma deuh vang emaw ni kawtthlêr velah pawh chuan mi vei vak anla tamlo khawp mai, mahse a mi tawh ho te chuan mak tih hmel tak in an en hu hu zel a, an melh dan ah chuan Thitheilo Pathian hmu ang mai an ni.
Reivak lo a kal hnu chuan nutling tak pakhat a mah tâwk zâwnga lo kal, mak tih hmel deuh a lo en tu chu a bia a.
" Ka pi, khawngaih in a ka lo tibuai lawk che,"
Pegasus- leh amah melh tawn zawk zawk chung hian chu nu chuan,
" enge ni ta? Buaina i tâwk em ni tlangval?"
" Nilo ve, thil zawh lawk duh che ka nei a? Khawngaihin min hrilh thei angem?"
chutiang țawngkam chu chu nu chuan mikhual pa lak ațang chuan a dawn a beiseiloh hmel kher mai,
chutah,
" enge ni ta a? Sawi ta che?" anti deuh hû a.
" Pathian ropui Aeolus-a temple awmna hmun min hrilh thei em?"
chu nu chuan a hnunglam hawiin an piah deuh a kawtthler pêng awmna lam chu a thlîrvang vang a.
" saw lai kawthlêr, a veilam pang zawk saw zawh la, khaw chhûng deuh ah sawn i hmu mai ang, hai rual ani lo, Pathiannu Hera-i leh Aphrodite-i te temple inkar ah a awm kha," a ti a.
Tichuan chu nu chu lawmthu te a hrilh luam a.
Chu temple lam pan chuan chak fahran hian an tlân leh ta a.
Chu nu sawi ang ngei chuan reilo te an temple awmna hmun chu a thleng ta a.
Mahse a rin ang chu alo ni lo, a sîr lawk ah chuan Pathiannu Hera-i leh Aphrodite-i te biakna temple chu lian leh ropui tak mai hi alo awm ngei bawk a.
Mahse Pathian Aeolus-a temple chu a tê bïk hle mai, mahse a ropuiin an chei nasa a, a mawi hle tho.
Mi thenkhat inthawina hlan zo ni awm tak tak te chu anlo chhuak pheuh pheuh a.
Pegasus chung ațang chuan muang fahrana chhuk in chu temple lamah chuan a chho ve ta bek bek a.
Mahse a hmuh tum ni theiin a hre lo, a pawn lam ang chiah in a chhûng pawh chu alo te hle a, pindan rûk pawh a awm hmel loh.
Reife chu temple chhûngah chuan hrilhhai hmel tak hian a ding reng a.
Chutia maicham hma a a din reng lai chuan chu temple sîr lam khawngkhar ațang chuan hmeichhe hmelțha tak mai, hmai leh mit vel chei nasa ang reng tak, puan nêm vâr langtlang thei deuh ri riai ha hi alo lût a, pheikhawk emaw pawh a bun lo, a ke no leh thianghlim tak chu Marcus-a chuan uluk hmel fahran hian alo thlir vawng vawng a, Marcus-a hma ah chuan ding in hmuhnawm tih hmel tak hian a thlêk vung vung a, engemaw chen chutia a din reng hnu chuan zawi fahran hian, " tlangval, thitheilo Pathian hnenah inthâwina ihlan dawn em ni?" a ti a. A ngaihna hriatloh hmel tak hian Marcus-a chuan, " Nilo ve, thil dang zawk ani a, khawngaihin he temple Puithiam awmna hi min hrilh thei em?" a ti a. Chu nu chu za vak lo hian an nui hlek a, chutah Marcus-a chu muangchang a kal hual in, " He temple Puithiam hi maw? I hma a ding hi ka ni alawm, ka hming chu Astydamia- ani e," a ti a. A mit meng ațang chuan Marcus-a chuan a awih vak loh hmel hle mai, hmeichhia lehnghal, chulo ah a incheina ațang reng reng chuan Puithiam âwm pawh in alang lo. Mahse Greek ram ah chuan Hmeichhia pawh hi sakhaw puithiam ah hian an țang ve fo va, Amazon hmeichhia Penthesilea-i nu Otrera-i pawh hi Indona Pathian Ares-a puithiam leh nupui tho ani a,(Amazon Lalfanu Wonder Woman pawh kha anu chu Artemis-i leh a unaupa Ares-a puithiam tho ani) chuan Medusa-i, Perseus-ana a thah tâk pawh kha, a hma chuan nula hmelțha tak, Greek ram pawh a lâr tak țhin ani a, indona leh Finna Pathiannu Athena-i puithiam ah ațang tawh bawk. Chu bâkah rimawi lam Pathian Apollo-a puithiam Cassandra-i, Troy Lal Priam-a fanu leh Hector-a unaunu, Troy indo zawh hnu a Greek Lal zîng ami Mycenae Lal Agamemnon-ana a hawn tâk te bak ah Agamemnon-a fanu Iphigenia-i, ramsa leh sa peltu te Pathian, Pathiannu Artemis-i puithiam te hi alar zual deuh te an ni a. Tin, hmeichhe hmelțha deuh te chu Pathiante hian an Puithiam ni tur in an hnenah an hruai țhin bawk. Chutah chu nû vêk chuan zahna chibai an buk zauh a, " Pasalțha tu emaw chu ini ngei ang, anih loh pawh in Pathian tu emaw fa emaw, thlah emaw ini ngei ang?'' a ti a. (Greek ho Pathian te hian mihring hi nupui pasal ah an nei fo va, tin tuipui leh ram ngaw a awm țhin Nymph- an tih, Lasi leh Sangha nula kan tih ang chi, Pathiante zîngah pawh a hnuaihnung deuh te chuan Pasalțha leh Lal ropui tak tak te Pasal ah an nei fo bawk țhin. Tuipui Pathian Nereus-a leh Doris-i te fanu Thetis-i ngei pawh hian Myrmidon Lal leh Pasalțha Peleus-a anei a, an fapa chu Greek ram zawng zawnga mi huaisen ber leh pasalțha lâr leh hmingthang ber Achilles-a anih kha. Chûng ho zîngah chuan Pathian ropui ber Zeus-a leh Argos Lal Acrisius a fanu Danaë i te fapa, sakawlh Medusa-i that tu mi huaisen Perseus-a te, mi chak Hercules-a, Pathian Zeus-a leh Amphitryon-a nupui Alcmene-i te fapa te, Sparta Lal Tyndareus-a nupui Leda-i leh Pathian Zeus-a fanu khawvela hmeichhe hmelțha ber Helen-i, 'helen of sparta antih, a hnu a helen of troy' an tih tâk te, Lui Pathian Axios-a tupa, Pasalțha huaisen, Trojan indona a Achilles-an a a thah tak Asteropaios-a te, Pasalțha Aeneas-a, hmangaihna Pathiannu Aphrodite-i fapa te, indona Pathian Ares-a leh Amazon Lalnu Otrera-i te fanu, Trojan indona a Achilles-ana a tihhlum tak Penthesilea-i te hi a lâr zual deuh te an ni a, Pasalțha leh mi hmingthang tak tak te an ni hlawm. Marcus-a pawh hi a hmel leh a inthuam dan te, a hawi her ah te hian he puithiam hian Pathian tu emaw fa anih a ring ani. CR) hawi kual ruau ruau pah hian Marcus-a chuan, " Baculla Lal Alpheus-a fapa ka ni e, Marcus Valerious," ring fahran lo hian an ti a. Chutah chu nu chuan ngaihsan hmel tak hian an melh a, " Marcus..Marcus maw? dawithiam Siraka-i hneh tu leh sakawlh Chimera that tu kha," ring deuh tak hian a ti hluai a. Marcus-a chuan ngaihsak loh hmel deuh hian, " anih chuan, he temple ni lo hi hmundangah Pathian Aeolus-a temple a awm em?" a ti a. Chu nu chuan, " awm e, mahse kan hluihlawn tawh ani a, khaw dai lawk ah sawn a awm," a ti a. "engtia hla nge ni a?" tiin an zawt leh a. " rei kal ani lo ang, khaw dâi hmar lam ah hian kal zel la, lung hmun i va pawh anga, chutah chuan iva hmu mai ang," tiin chu nu chuan a hrilh a. Chutia a sawi zawh rual chuan Marcus-a chu a in her vut a, pawn lam pan chuan a kal nghal a. Chu nu chuan zawi fahran hian, " i thil tih tum chu ka hria e, mahse fimkhur rawh Minataur- kawlh tak tak an awm ania, Pathiante venhim na hnuai ah pawh kal la, fimkhur tak a i awm reng angai ani," a ti a. (Minataur hi mihring ang deuh tho, mahse a lu chu bawng lu ang ani a, bawng angin ki a nei bawk a, mihring sa an ei țhin avangin an kawlh em em ani. CR) Hawi lêt leh tawh chuanglo a chu nu thusawi ngaithla a a din hnu chuan temple chu a chhuahsan zui ta a. Temple pawn a lo nghak reng tu Pegasus chungah chuan a lawn kâi a, tichuan chu puithiam nu sawina, thli Pathian ropui Aeolus-a temple lam pan chuan chak tak in an thlâwk leh ta a.. Rei vaklo an thlawh hnu chuan lung hmun zau ang reng tak hi an thleng ta der a, Calydon khaw dâi lawk chu a ni na a, Khawpui hlui emaw lo awm țhin tawhna niawm tak a ni, lung țhenkhat chu lian tak tak an ni hlawm a, a țhen te chu uluk tak a ker leh eng emaw a tân a hman tawh niawm tak a awmze nei tak a in rem țhat te an ni hlawm a. Hnim leh thing pawh hmuh tur a awmlo tih theih ani, thlalêr hnim buk deuh deuh tlem azawng tih loh chu hnim dang pawh a awm lo. Pegasus chung ațang chuan hawi kual ruau ruau pah hian muangchang hian a chhuk a, a Excalibur chu phawiin in ring tak mai hian a hûm a. Puithiam nu ina a sawi ang in Minataur- kawlh in a rawn phîn thut a hlau deuh ani mai thei ani. Muangchang hian hma lam ah chuan a phei zel a, reilo te hnu ah chuan tlem a lung dawhsân zau ang reng tak mai, in lian tak awm țhin tawhna niawm tak mai hi ava pawh a, chu lungrem dawhsân ah chuan muangchang hian a chho va. Temple lo awmna țhin ngei chu anih duh hmel hle mai, mahse a ban te chu a tlu nuaih tawh a. Mahse ala chhe sawp vek lem lo. Thâwm dîm tak in a kal hnai zel a, chu temple hlui la țha chin, a bang tla bâng ah chuan a lût ta a, mahse rin ai daih in a chhûng chu alo lian zêk lehnghal. Bang a hawrawp mak tak tak leh milem mak deuh deuh inziak chu hmuhnawm tih hmel deuh hian a thlîr vung vung a, Chutih lai chuan a dinna lung chu a che hrut a, thawklehkhat ah leiah chuan a pil thut a, chu lei chhûng ah chuan a tla thla ta daih a. Mahse a sâng em em hran lo, zuan phâk loh tawk vel a thûk, leihnuai pindan ah hian atla lût hlawl a. A tlâkna lai hi pindan inkalpawhna țhin hlui ni ngei tur ani, hmalam leh hnung lamah chuan inkalpawhna thui tak mai hi a kaw rul a, meichher a keng lo na a chuti em em chuan a thim hran lo, a tlâkna âwng ațang chuan Ni zung chu a rawn lût a, chulo ah chu leihnuai pindan chung lungrem âwng ațang chuan Ni zung a rawn luh ve thluah hlawm avangin eng tak chu nilo mah se thim chhah mup chu ani chuang lo. Rang takin a tho vat a, a ngûnhnâm chu chhar leh nghal vat in a hawi kual ruk ruk a. Chutah a hmalam inkalpawhna lamah chuan muangchang hian fimkhur takin a phei ta chhut chhut a. Reivaklo chu inkalpawhna a akal hnu chuan pindan zau angreng tak mai, sailungvar leh eng lung țha chi emaw a siam milim lianpui pui tam tak awmna hmunah hian a lût hlawl a. Mahse pindan chhûng chu a thim deuh ruai avangin pindan awmdan leh pianhmang chu a hmuh theih tak tak chuang loh. Inring leh fimkhur tak chunga a kal țhêm țhêm lai chuan a hnunglam ah chuan tháwm alo awm a. Ramsa thaw ri sûk sûk ri chu a hnunglam hla vaklo ațang chuan a rawn chhuak a. Muangchang hian a in her riai riai a, chutah a hnunglam an hawi chuan mak tih hmel deuh hian a meng zau kâwk hial a(!) a hnunglam hla vaklo ah hian mihring chu ani si, mahse bawng ang mai a ki pahnih nei, hmel rapthlak tak mai hian thinrim hmel deuh hian alo thlîr reng chu niin. A hnâr kaw zau tak ațang chuan meikhu ang mai hi a khu chhuak chuai chuai a, chutah thinrim engphiar tak mai hian pindan khawk rum rum khawp in ala hram vak vak lehnghal.
" Minataur "
a ti sep a.
Chutah chu ramsa nge mihring emaw ni chuan chak mangkheng hian a rawn phîn phei thut a.
Țanhmun pawh alo la siam hman lo. Alo bum hman na a, mahse thawk lehkhat a thleng thut anih avangin a sîr lam ah chuan alêng dawrh a, leichâr ah chuan khu rum rum khawp in a tlu niaih a.
Rang fahran a Excalibur chu chhar leh vat in, in ring tak in a hum lehnghal chat a.
Chutih lai mek chuan Minataur- pawh chuan Marcus-a lam chu chak tak a panin, a rawn tlân phei leh buan buan a.
Pindan chhûng chu a thim deuh ruai avang leh engmah tak tak a hmuh chian hleihtheih loh avang chuan a chesual palh ang tih a hlau ni ngei tur ani. Marcus-a chu a tlanchhe ta chiam a, chu pindan lianvak lo chhûngah chuan an in umkawiin an in veh kual vel ta chiam a.
Minataur- ina a rawn phîn phei hian a tlân tlang a, a thim lai chuh in pindan kil khawilai emaw ni ah hian a pil bo lehnghal daih mai țhin a, reife an in chhaih kual hnu pawh chuan Marcus-a pawh chuan tihngaihna tak a hre bîk lo.
Khawi khawi lai emaw ațanga a rawn chhuah thut thut avang chuan Tihhlum tum pawh nisela, mahni in ven nen, chet lak a har hmel hle mai.
Fimkhur taka Minataur- a veh kual vel lai chuan hawi kual ruai ruai chungin hnunglam ah chuan a tawlh hrat hrat a, eng emaw ni, Dâr bêl inchherchhuan ni awm tak hi a tauh tla ri rum rum a, chutah a thil tauh chet ațang chuan êng zung hi rang tak a rawn in kâp chhuakin, a hma zawn ah chuan êng zung chu a rawn kal phei a, chutah rang fe fe hian chu a awmna pindan kil tin a darthlang emaw ni, thil bial, awmze nei tak a rem tin ah chuan a êng zung chu a in kâp êng tawn chuai chuai a,
mitkhap kâr an chu pindan hlui tak chu chhûn ang mai hian a rawn êng nghal pup a.
Pindan chhûng a ên thut tak si ah chuan Minataur- pawh chu a bihrukna lai alang chiangin pindan kil khat a lungbang lian tak phênah chuan alo biru reng a.
Pindan chhûng êng avang chuan a meng ngamlo ni ngei tur ani, a mit hup in a hram ruai ruai a, a kut lehlam a vawn chhan tur dap in, a vir muai muai reng a.
Chu pindan lo êng thut chuan Marcus-a pawh chu a țhâwng ve tho mai, eng emaw chen chu hrilhhai hmel deuh hian a ding ve vung vung a.
Chutah Minataur- hrâm ruai ruai chu muangchang leh fimkhur tak hian a pan phei chhut chhut a,
Minataur chêt buailai chuh a, awlsam tak a tihhlum mai a tum chu a inring sual hle mai, a pum a vawikhat an vih tlang pawlh tawh hnu pawh chuan thih reng reng alo la tum lo, pindan êng avang chuan a che thei meuh lo chu ani a, mahse a chak khawp mai, țan a lo khawh ve chiam a, chutia reife an in beih hnu chuan Marcus-a chu a man lawk a, leiah chuan a paih chawrh a, Pindan chhûng a lung milim lian angreng tak chu a la lawk a, den hlum ngei tum niawm tak hian, maimitchhing duar duar leh pai chawn chawn chungin Marcus-a chu a pan țuah țuah a, rapthlak tak mai hian a hram ruah ruah reng bawk a.
Chutia lung milim lianpui chawi lu lu chunga a rawn pan a hmuh chuan Marcus-a chu rang tak hian a tho vat a, Excalibur chu chhar in a piah lawk a pindan lung ban mûmpul mai, lian tak lamah chuan atlân phei vat a, chu ban phênah chuan a biru vat a.
Marcus-a awmna arawn thlen chuan Marcus-a chu a awmlo tih a hmuh chuan thinrim tak mai hian a hrâm ruai ruai a.
Ban phên ațang chuan rang tak mai a Marcus-a chu rawn tlân chhuak in Minataur hnunglam ațang chuan a rawn zuang vak a, alu rapthlak tak chu Excalibur chuan a tan ta hmawk a.
Pindan chhuat ah chuan Minataur- lu chu a lum ri bawl bawl a, chutah a taksa pawh chu a thil chawi lai, lung milim chuan a delh bet ta a.
Hah hmel tak a thaw huam huam chung hian eng emaw chen chu chu Sakawlh Minataur Lu bung chu a thlîr reng a.
A rin loh ang deuh ani ngei ang, chu pindan chu temple hlui ngei chu ani na a, mahse hmanlai Lal ropui tak thlân ni mai awm zawk ani.
Tin, a hlui tawh viau na a, ala ropui em em tho anih chu, pindan bang ah chuan milem mak sak deuh deuh leh eng lem lem emaw ni hi a in ziak ràng ruai hlawm a,, pindan chhûnga ban lian pui pui awm ah lah chuan chuti tho.
Pindan chhuat chu sailungvar vek ani a, mahse a balh em avang leh lei nawi atam em avangin a lang hlui tawh hle,
lung ațanga ker leh sailungvar ațanga ker milim a tam hle a, a țhente chu an keh darh niaih tawh hlawm bawk a.
Tin, a hma zawn piah deuh ah chuan tlem a lawnkai ngai deuh, step pali hmanga dawhsân hi a awm a, chu dawhsân lai vel ah chuan awmze nei tak a rem leh ker, lung maicham sâng ang reng tak mai hi a ding luah mai bawk a.
A pang velah chuan eng lem emaw ni hi in ker râng nuk in, hawrawp mak tak tak mai hi a in ker thluah bawk a.
Muangchang hian chu Lung maicham lam pan chuan Marcus-a chu a phei chhut chhut a.
Maicham chu a bulțhut ațang chuan nasa vak lo hian a arh chho hlek a, chutah a maicham kil li tin chu tlem te a pâwng bial hlek hlawm in lunghlu dum chi hi a in phûm vek bawk a.
Reife chu maicham hma a a din reng hnu chuan muangchang hian a Excalibur ken lai chu a lek chhuak a, chu maicham chung zâwl ah chuan a dah ta riai riai a.
Chutia a dah hnu lawk chuan maicham chung zâwl kil li a lunghlu in phum țhat te chu rawng pâwl lam deuh hian anlo êng a, an êng nasa telh telh a, chutah an êng zung chu kâp chhuak in, an êng zung chuan an in kâp zawm kual ta vek a, chutah Excalibur- chu an êng zung chuan an kah rawn leh ta a.
Excalibur pawh chu rawng paw dal lam leh senno deuh rauh hian a éng ve ta phût a.
Chu thil mak tih hmel tak a a en reng lai chuan khawilai ațang emaw hian thli na tak mai hi alo thaw chhuak phut a, a la rûm ri vung vung zui lehnghal.
Thlî chu a nasa telh telh a, chutah Excalibur leh lunghlu te pawh chu an éng nasa ve telh telh bawk a.
Reilo te an chu maicham chung zâwn sãng vak lo, Excalibur chung zâwn ah chuan țhawngaleivir ang deuh hian vaivut nawi hi a vir pup pup a.
Marcus-a chuan mak atih hmel hle mai, chu a chhap ah chu țhawngaleivir tereuh te chu a lian telh telh mai lehnghal.
Pindan chhûng leh khawi khawi emaw ațanga lo lût thli na tak mai chu chu țhawngaleivir ah chuan an rawn lût tel ni ber in ka hria,
Dâr chanve emaw lai hnu ah phei chuan lian tak hi ani tawh.
Reilo te an chu pindan chhûng chu a nghing deuh dur dur reng a, Marcus-a chuan eng emaw fello a awm dawn anih hi ati rilru ni ngei tur ani, pindan tlân chhuahsan tum chuan a in saseng ta nghal a.
Mahse a kalsawn mai thei bîk lo, thlî chu a thâwt nasat êm avang leh chhuat a leinawi a lên nasat êm avangin men pawh a meng țha ngam lova, chulovah pindan chhûnga sailungvar milim te chu an tlu pheng phung bawk si.
Thei leh thei lovin pindan in kalpawhna, a luhna lo lam pangah chuan a tlân chiam a, chutih lai mek chuan pindan chhûng chu thli na tak mai tleh ri hum hum ang mai hian a ri hum hum a, chubak ah lirnghing ințan tur ang mai hian pindan chhûng chu a in sâwi hlawk hlawk in a bang lung inrem leh a chung a lung inrem te chu a rawn tla phuk phuk mai bawk a.
Mahse vanneih a siam in a tlânna lam, pindan inkalpawhna chu pâwn lam chhuahna lam alo ni hlauh a, rei vaklo a tlân hnu chuan kailawn sei vak lo hi alo in dawh zaih a, hmanhmawh takin a tlân lawn a, tichuan pãwn ah chuan a zuangin a zuang chhuak ani ber.
Chutia pâwn a a chhuah rual chiah chuan leihnuai pindan chhûngah chuan ring mak kheng hian eng thil emawni hi a puak ri dur a, chutah pâwnlam a temple hlui tawh tak mai leh chhe rum tawh chu a chim khu zui ta rum rum a, leihnuai pindan luhna pawh chu a chim ve nghal a.
Hun eng emaw chen chu nikhaw hre lovin lei châr ah chuan alet reng a, Pegasus ina tih harh tuma alu bul vel a a ke a per nghek nghek hnu chuan rûm țuah țuah chung hian alo meng diar diar a.
Chutah chauh hmel tak hian a rawn țhu chhuak a, a hma zawn a temple hlui ding kha hmuh tur reng alo awm tawh lo.
Leihnuai pindan chhûnga thil puak ri dur avang khan a chim ta vek ani ngei ang.
Mit chhing siar siar chung hian temple hlui awmna lampang chu a thlîr vawng vawng a.
Chutah zawi sap hian,
" ka hlen ta, underworld veil- chu a phui tawh ngei dawn anih hi, " a ti a.
Chutah lei char ah chuan a mu zangthal lehnghal daih a, hahdam hmel deuh hian a rûm ham ham a.
A chauh em vang ani ngei ang, reilo te an a muhil zui leh ta nghal daih a.
Marcus-a muthilh lai bawr vel chuan Vân chung sâng êntu leh rorel tu Nî pawh chu Ni Pathian ropui Helios-ana a mei sakawr tawlailir a a hnuk liam ta ang mai hian khawthlang lam ah chuan a her liam zui ve ta nghal a.
Pegasus pawh chu zankhua in Marcus-a bulah chuan a bawk ve reng a, Marcus-a erawh zankhua in a harh leh tawh lo.
Indona a a chau tawngkhawng leh sakawlh Minataur nen a an inbeihna vang khan a chau deuh pawh ani ang.
Zîng Ni chhuah hmâ leh Leilung alan chian theih hma deuh hian a harh hlawl a, a rawn țhu chhuak a, eng emaw chen a lu dawm a a țhut vang vang hnu chuan hmanhmawh lo fe hian a tho chhuak țuih țuih a, thing țang ro fawm khawm in meipui a chhep hluah a, mahse chulai a awmna hmunah chuan thing nawi fawm khawm tur chu a vâng kher mai.
Kêl vun emawni ațanga siam a iptê chu a dap ruk ruk a, savun țhuipum lian vak lo, uain paina ip chu phawrh chhuak in tlem a in a, chutah sahrang lian tak mai, mei a rêp fîp fê tawh niawm tak hi a phawrh zui lehnghal a.
Chu sahrang chu meipui ah chuan reife a hem a, a uain pai nen chuan a hmeh a.
Chutianga hun eng emaw chen uain in chunga a țhut reng hnu chuan khawchhak lam ațang chuan phûr loh hmel fahran hian Nî pawh alo chhuak ve leh ta ruau ruau a.
Muangchang hian a tho va, temple hlui awmna lam pan chuan a phei leh ta hnek hnek a.
Temple hlui chhuat dawhsan lungrem țhenkhat te kha chu ala awm na a, mahse leihnuai pindan chung anih avangin lei hnuai lamah chuan a tla lût nual a, chulovah chûng temple chhuat dawhsan lungrem mai bak ah a bulhnai lei te pawh chu zau ang reng tak hian a khi rem rum hlawm a.
Lei chunga temple pindan, a luhna te pawh kha hmuh tûr a awm tawh lo, leiin a chhilh bo zo in a ban lung lian pui pui te chu a tlu chhe vek a.
Mak tih hmel deuh a chutiang temple hlui chhe nuaih chu reife a thlir vung vung hnu chuan thâwk an la vang vang a, chutah a awmna piah hla vak lo va Calydon khawpui ropui tak mai chu mit chhîng suar suar chung hian a thlîr leh dauh dauh va.
Zîng Ni chhuak ina Calydon khawpui leh khawpui hmar lampang deuh va hmangaihna Pathiannu hmelțha Aphrodite-i temple chhîp a chhun tlêt sar sar te chu alang chiang in a mawi danglam hle a, râl ațang phei chuan Calydon khawpui chu a ti ropui sawt ni maiin a hriat.
Hmangaihna Pathiannu Aphrodite-i hi Indona Pathian Ares-a nupui ani a, an fapa chu hmangaihna Pathian tho Eros-a ani.
Kan hriat dan tur chuan Roman hovin Greek ho an hneh hnu khan Greek ho Pathiante hi be ve in anmahni țawngin an hming an phuah ve a, Aphrodite-i chu Venus-i an ti a, chuan a fapa Eros-a chu Cupid- an ti leh a. Cupid-a hi St.Valentine-a hriatreng nana hmangaihna ni an hman țhin Valentines day vel laia lâr êm êm naupangte thla nei, hmangaihna thal keng țhin, Valentine card vel a awm țhin hi ani.
Chuan Cupid-a vêk hian Sparta Lalnu hmelțha Helen-in Trojan Lal fapa Paris-a ahmangaih ve theih nan he a hmangaihna thal hian kâp in, Trojan khawpui ah Paris-a leh Helen-i chu an tlân bova, indona rapthlak tak a chhuak tawh anih kha.
Reife khawhar hmel tak a a hawi veng veng hnu chuan muangchang hian Pegasus awmna lamah chuan alêt phei leh a, Pegasus chungah chuan chuangin vân boruak sâng tak ah chuan an invawrh chhuak leh ta a,
Eastland khaw lam pan in chak tak mai hian an thlawk liam ta a.
Chutia Eastland khaw lam pana an thlâwk chhuak ta chu rin aiin an thlâwk chak ang reng hle a, mahse chuti em em chuan an hmanhmawh hmel em em hran lo, khaw thlanglam a Nî a her liam dawn meuh chuan an thleng thui tawh hle a, Delphi khawpui te phei chu Ni in a vanlaizâwl a thlen hun lai vel khan an thlawh khum tawh ani. Marcus-a chuan an hma lawk a tlângsâng leh ropui tak mai Mount Oriona- chu hmuhnawm tih hmel tak hian a thlir vawng vawng a. Chu Tlâng chu an thlawh khum a, mahse thui vak lo an han pelh hnu chuan Pegasus- chu thlawh kual let tir in, Mount Oriona- tlâng bulțhut ngaw chhung ah chuan muangchang hian an thlâwk lut leh ta a.
Chu tlâng chuan hnuai ngaw chu rin ang em em chuan pik leh chhengchhe tak alo ni lem lo, thingkung awm te chu lian pui pui leh a zung pawh lei ațanga lo chawr chhuak thur mai ang chi deuh hlir hi ani a, mahse an awm bit em em lo. Marcus-a chuan hmanhmawh ang reng tak mai hian thing bung tuah tur a zawng khawm nghal vat vat a, Meipui a chhep leh ta nghal hluai a.
Chutih lai vel chuan Nî chu khawthlang lam ah alo her liam vel mek bawk a, mahse an awmna hi hmun sâng leh tlâng bulthût mai ni mahse thing lianpui pui ina a hual vel anih avang in a thim deuh khup tawh tho mai. Marcus-a chuan a uain pâina savun ip lian vak lo chu phawrh chhuak in tlem a in a, meipui bul lawk a thing zung, lei ațanga lo pawrh chhuak lianpui chu nghen pah in uain chu tlem a lem leh sak a, reife chutianga a țhut vung vung hnu chuan a meipui chheh chu a aia nasa zawk a tuah belh in meipui bul lawk a leichâr ah chuan a thir kawr pawh phelh chuanglo chuan a tlu zâl ta a, a piah lawk ah chuan Pegasus pawh chu hahdam hmel tak hian a bawk ve rûn mai bawk a.
Chulai hmun ah chuan riak in zân hun chu an hmang liam a, a tuk zîng khawvar țantirh, leilung alang thei ta maw tih vel ah chuan tho vin Eastland khaw lam pan bawk chuan an thlawk chhuak zui leh ta a. Chutia an chhuak ta chu an thlâwk chak ang reng khawp mai, Nî chu sa viau mahsela an thlâwk sâng hrim hrim a, Vân chung sâng boruak ah chuan thlifim a thâwt reng bawk avangin chutiang em em chuan a hrehawm hmel hran loh. Khawthlang lam a Nî a her țan vel lai chuan Eastland khaw chung boruak an thleng der tawh. Khaw tawntirh sipai riahbuk lam pan chuan an thlawk hniam zel a.
Leia an lo țum lai chuan chulai hmun a sipai sâng tam tak awm te chuan an ralthuam te khâwng ri in hlim tak hian anlo au dur dur a. Pegasus chung ațanga a chhuk thlak lai chuan a bulah chuan General Hestia leh General Ajax-a te chu an lo kal a, hlim hmel deuh hian an lo nuih var var a. " dam taka alo hruai kir leh avang che avang hian Pathian chungnung ber Zeus-a leh a fapa Khualzin te venghim tu Pathian Hermes-a chu fak in awm rawh se," General Ajax-a chuan alo ti deuh hluai a. General Hestia chuan, " engkim a kal tluang e," alo ti ve var a. General Ajax- chuan, " Puanin lamah i phei ang u hmiang," a lo ti a.
Tichuan General Ajax-a puanin lam pan chuan an pathum chuan anin zui phei leh ta țhêm țhêm a. Puanin chhûng ah chuan Boevia sipai General Adratus-a, Argos sipai General Polybus-a leh Bersin sipai General Menelaus-a bâk ah Captain Aeson-a te an lo awm a. Chung General ho chuan Marcus-a an hmu chuan an hlim hmel hlawm hle a, puanin chhûnga an luh rual chuan an vai chuan alo ding vek a, zahna chibai an lo bûk diat diat hlawm a. Chutah General Menelaus-a chuan, " dam tak a i lo kir leh thei chu a lawmawm hle mai, helamah pawh engkim tluang tak in a kal e," alo ti vat a.
General Polybus-a pawh chuan thawven hmel angreng tak hian, " indona chu a tawp ta," alo ti ve var a. Tichuan an pathum chuan țhuthmun te an han rem ve a, uain te in in hlim tak in an in kawm ho a. Hlim tak a an ei a an in hnu chuan General Hestia- chu a țhuthmun țtang chuan alo ding chhuak a, ring ang reng tak hian, " Pathian te kan lamah an țang a, hnehna pawh kan chang chho zel in, tunah phei chuan kan hmelma te chu kan lo tuk dâi ta a ni a, chuvangin lawmthu sawi nan Pathian ropui ber Zeus-a hmingin no i han dawm tlâng hmasa phawt ang u," a ti a.
Tichuan an uain no țheuh chu lek chhuak in tlem an leihbaw țheuh a, chutia an leihbuak zawh hnu chuan eng thu emaw ni, țawngțaina ang deuh hi an chham rual leh a. " Marcus-a chuan ala hre lo maithei a, Goth- sipai hovin a an awpbeh hêng, Clenith, Urdin, Khorbi, Celticus, Gogonia,Tyndar, Phyra khua te hi kan sipai ten an la tawh a, tin, Marcus-a vangin kan buaina lian ber underworld veil pawh a phui ta a ni, tunah chuan indona hahthlak leh rapthlak tak kha a zo tawh a, remna leh muanna in a khat ta," a ti a. Chutia asawi zawh chuan Marcus-a bâk ah General dang te chuan hlim tak hian kut an lo bêng dar dar a, hnehtu an ni bawk a, an hlim in an thâwm pawh a țha kher mai. Chutih lai chuan Verna Sipai General Thot-a pawh chu alo lut ve chiah a, Marcus-a arawn hmuh chuan hlim hmel tak in zahna chibai an bûk zauh a, an zing ah chuan țhuthmun arem zui ve ta nghal a.
General Menelaus-a chu alo ding chhuak a, " General Thot-a alo thleng ve ta chiah bawk a," an ti a, Marcus-a lam chu hawi zui in, " General Thot-a hian lo nghah chhuah hrim hrim che a duh avangin an khaw lam ah ala haw lo chu ania, kan indona hi a hahthlak in a hrehawm bawk a, chuvangin Nothland, Crete, Phthia, Gulisan, Pisa, Aliras sipai te chu a zan la la khan an khaw lam pan in an haw ta nghal a, Tûkin zîng khawvâr rual khan Corinth sipai te pawh General Phocus a hovin an liam a,
Tin, Athens General Pelias-a te, Eurodia General Polyeidos-a te, Iocus General Caeus-a te pawh, Thebes General Tydeus-a te leh Boscan General Oedipus-a te erawh ilo thlen hma deuh khan an kal ve ta anih kha, lo nghah chhuah che chu an tum viau na in, an sipai te an khawngaih ve deuh tawh bawk si a. Mahse an demawm chuang loh ve, indona hmachhawn tur in an lo kal a, indona ber a zawh tawh si chuan an tan chuan an khaw lam a haw tluk a thlakhlelh tur a awm bik chuang lo. Keini pawh hi la awm duh viau mah ila, kan sipai te kan ngaihtuah a ngai ve tho si a," a ti a. Chutah Boevia Sipai General Adratus-a chu alo ding chhuak ve leh a, " Ni e, General Menelaus-a sawi ang khan hetia kan han kal darh leh mai tur hi lung chu a lêng dawn hle mai a, mahse helai ah kan tihtur ber kan zawh tawh si chuan haw mai lo chu hmabak dang kan nei chuang bawk silo, mahse engtik ni ah emaw chuan kanla in hmukhawm leh ngei ang chu," tiin lungchhiat hmel ang reng tak hian a rawn tuihnih ve leh a.
" kan thawhho na azarah hnehna chu kan chang thei a ni a, Marcus-a pawh dam taka ilo let leh theih avangin kan lawmpui khawp mai che, engpawhnise la zânin chauh tal chu kan inhmuh hnuhnun ber țum anih tawh hmel si a, inthlah nan kan ti ani ang chu, ka puanin ah hian zanriah hnuhnung kan kil ho ani ang chu," a țhuthmun ațanga tho chuanglo chuan General Ajax-a chuan a rawn ti ve a. An pawm tlân hmel hlawm khawp mai, tichuan Vawk leh Beram te chu sipai ho chu talh chawp tir in Eastland khaw nula hmelțha tak tak te chu eiin an siam tir hlawm a, kal darh tawh chuang lovin General Ajax-a puanin ah chuan zanriah tuihnai tak, an zanriah hnuhnung ber tur chu hlim tak in an kil ho ta a.
Zanrei tak thleng an in kawm zui lehnghal a, an in țhendarh tur chu an lung alen hmel hlawm ngei mai. Khawfing chah dawn ruai ah chuan anmahni Riahbûk lam pan in an haw ta chauh hlawm a. General Hestia leh Marcus-a pawh chu Hestia- puanin lam ah chuan mu tur in an phei a. Mahse an mu rei hman hlawm meuh lo, an mutui țan dawn ta maw tih ah khua arawn vâr leh nghal mai si a..
Marcus-a arawn thawh ve meuh chuan Hestia erawh hmuh tur alo awm tawh lo. Mutthilh la chhuah hmel deuh hian a puanthuah chu muang fahran hian an thawhsan a, dawhkan a savun uain ip chu la in tlem an lem a, awmhmun kawrfual ha chung chuan puanin pawn lamah a chhuak a. Nî chu alo chhuak uarh tawh a, sipai in singsa lai vel te chu puanin kawt ațang chuan ngawi reng hian a thlîr dauh dauh a.
Reife chutia adin reng hnu chuan sipai ho kâr ațang chuan General Menelaus-a leh General Thot-a hi sakawr chunga chuang chung hian anlo chhuak hlawl a, Chutia puanin pawn a Marcus-a ding reng an rawn hmuh chuan chak fahran lo hian an rawn pan a, a bul an rawn thlen chuan sakawr ațanga chhuk tawh chuanglo chuan General Menelaus-a chuan, " General Adratus-a leh General Polybus-a te pawh an chhuak deuh chiah anih kha, keini pawh kan lo va kal hmasa ve mai ang e," hlim loh hmel fahran hian a ti chuai raih a.
General Thot-a pawh chuan, " General Menelaus-a te rual hian keini pawh kanlo va kal hmasa ve mai ang e, General Ajax-a te erawh Hestia nen a puanin ah anla awm kha," alo ti ve bawk a. " keini pawh kanlo chhuak vat ang, mahse Phyra-ah kan la kawi leh dawn a, Captain Pontus-a ten minlo la nghak ngei awm si a." Marcus-a chuan a ti a. An pahnih chuan Marcus-a chu chibai an han bûk leh te te a, tichuan an sipai te nen Eastland khawpui chu phûrlo fahran hian an chhuahsan ta a. An liam thleng chuan a thlir zui vawng vawng a, kha leh chen ral anlo bei ho tawh a, engtikni ah nge anin hmuh leh ang tih pawh hriat loh in tunah an in țhendarh mêk chu a ni si a.
Khawhar hmel tak a General Thot-a te kalchhuak a thlir vawng vawng hnu chuan muangchang hian puanin chhûng ah chuan a lût leh ta hnak hnak a. General Hestia- ina puanin a rawn luh chuan Marcus-a chu a thirkawr nen chhuah inpeih at hian alo awm tawh a. Dawhkan bula ding chung hian rangkachak no tung hian muangchang in uain a lo in mek a. " an chhuak zo hlawm ta maw? A khawhar thlak in an ngaihawm dawn hle mai," Hestia chuan a rawn ti lût a. Ani pawh chu thirkawr nen alo in thuam sa vek tawh tho mai.
En pawh en chuanglo chuan Marcus-a chuan zawi fahran hian, " General Menelaus-a leh General Thot-a te pawh an chhuak deuh chiah anih kha, General Adratus-a leh General Polybus-a te erawh ka nang hman lo," a ti a. Marcus-a bul thing țhutthleng ah chuan Hestia- chuan țhuthmun an rem te te a, Uain chu thli in no hnih ngawt mai chu an tlak pap pap a, " General keini pawh hi kan chhuah ve vat loh chuan, Phyra-a kanla kal kawi angai dawn si a, Captain Aeson-a kha sipai ho chhuak tur a insiam tur in ka hrilh a," Hestia chuan a ti a, la ding reng chung chuan Marcus-a chuan, "General Ajax-a te le? Engtik a chhuah nge an tum ve? alo ti a.
" Nichin khan a puanin ah kanin kawm a, an hmanhmawh vak lo ani ang, zânin tlaia an chhuah loh chuan naktuk zîng lam ah ani ang, hnung kan rawn dâwl ang e an ti anih kha," tiin Hestia chuan a chhang a. Marcus-a chuan zawi fahran hian, " he thil ah hian misual Zeddicus-a te an in rawlh miahlo hi a mak ka ti ngawt mai," a ti a. Hestia chuan, " In rawlh ang chu, Wizard Neira-ten min rawn pui lo phei se chuan kan in hloh țhen nual maithei ani," a ti a. Neira- hming a sawi chuan Marcus-a chu a phu zawk mai, a uain no ken lai chu a thlauh țêp hial a. Hestia hma zawn dawhkan bula thing țhutthleng a țhut pah hian, " engtin a i sawi? Neira- te anlo kal amaw?" mak ti a mitko ti sâng hluai hian an ti a.
Hestia chuan a uain no dawm lai melh vung vung chung hian, " Kal ang chu, i chhuah hnu lawk khan a țhuihruai mi sáwm vel nen anlo kal alawm, i țhiannu Penelope-i damlo a tlawh niawm tak ani, thu hmanhmawh thlak deuh hrilh tur aneih thu che pawh asawi a," a ti a. A Uain no ken lai chu thli khat leh te te in, tlem an lem leh a. Marcus-a erawh chuan thil ngaihtuah muk hmel fahran hian a en ngai a en tlawk tlawk a. Hestia vêk chuan sawi zawm leh in,
" Wizard Neira-te chu anlo kal hun a fuh khawp asin, khatia an awpbeh khua chhuhsak a, Goth- sipai ho kan tukdawl mêk lai khan, Eastland khaw dâi lawk, a hma a sakawlh rapthlak tak i tihhlumna bul vel ah khan misual Zeddicus-a leh a țhuihruai mi za rual vel zet tur hi an lo kal a, chawplehchilh in hri mak pui pui an lên tîr chiam chiam a, General Aliras-a sipai te phei chu an mangang hman hle a, Eastland-ah min rawn pun tur in sipai an rawn intîr vat a, tichuan Wizard Neira- te ho nen kan chhuak ve ta nghal a, a hmun kan zu thleng chu underworld veil- in khâr hma kha ala ni si a, Veil ațang chuan sakawlh rapthlak tak tak leh lian tak tak bâkah bâk ang chi deuh, dum ren run lian pui pui hi an lo chhuak țeuh bawk chu niin.
An sawi dân chuan chutia underworld Veil inhawnna bul lawk a Aliras- sipai te ralvêng sipai țhenkhat chuan dawithiam hak ang chi kawrfual dum ha, mi za rual vel zet mai Veil inhawnna lai a eng emaw ti a lo awmkhawm chu tu te nge annih a, eng tih tum nge an nih tih va chian an tum chu chûng dawithiam ho chuan eng emaw dawihla chham pual in thil mei khu ang deuh, rim na tak mai hi an lo ti chhuak chiam a, sipai te chu na tuar in an tlu phawk phawk a, an thâwm hria an țhiante chhan tum a lo kal te pawh chu Veil ațanga sakawlh lo chhuak te chuan lo ti buaiin anlo that mang țep bawk a, tichuan a rang thei ang ber in chanchin min rawn hrilh tur in an rawn intîr ta nghal ani awm e," a ti a. Chutah reilo te châwl in an sawi zawm leh a,
" chutia Neira- te ho nen a kan kal min hmuh chuan wizard fire-in min rawn bei chiam a, Underworld ațanga sakawlh rapthlak tak tak lo chhuak te khân a bawh in min rawn bawh ani ber, mahse Zeddicus-an a Neira- an hmuh khan a hneh dawn lo tih a hria ni ngei tur a ni, amah leh a țhuihruai mi pali panga vêl chu rang tak in an in thiarfihlim nghal daih a, a țhuihruai țhenkhat mawl deuh deuh ho chuan Neira-te chu an theih patawp in an rawn bei ve chiam chiam a, mahse an hneh ngang lo ani, Veil-ațanga sakawlh lo chhuak te khân nasa tak in an pui bawk a ni a, mahse Neira- te zawng, râlpui beih ah tak tak chuan dawithiam satliah ho chuan an lo la khân lo hle mai, an tihlum zo țep a, mahse tlem azawng chu Neira- te khan an man ta hram anih kha, mahni sahimna zawng a tlanbo te pawh tlem chu an awm nâ a, mahse hei tun thleng hian an rawn la inlâr leh tawh lo chu anih hi. Chutia Neira- tena an man hnu chuan an kut chu dawi ațnga siam niawm tak ip ang deuh, kut kawr ni mai âwm hi an bun tîr țheuh hlawm a, meialh hrui ni maiin ka hria, an dâwi hrui ani ang, chutiang chuan panga te te in an thlun zawm a, zankhua in an mahni chuan an vêng a.
A tûk zîng khawvâr rualin Neira- te tâ, Dragon lianpui pui sâwm rual zet hi Eastland khaw dâi ah chuan an lo chhuak a, chûng an mi man ho te nen chuan min kalsan leh ta nghal ani. Neira- sawi dân chuan an dawi an hman theihloh nan dawithiam ho an tân tîrna hmun ah an dah dawn niawm tak ani a, an mahni erawh chuan Mount Hepnos- lam kan pan ang an ti anih kha," a ti a.
Chutih lai chuan sipai pakhat hi puanin ah chuan alo lût a, zahna chibai bûk a a kûn zauh hnu chuan Hestia- lam chu hawiin, " General, kan chhuak thei chu ani mai e, puanin hi kan țhiah nghal mai loh chuan," a ti a. " aw le, kan han in siam ange," tiin a țhutna ațang chuan Hestia chu a tho zui nghal a, sipai pa pawh chu pawnlam ah a chhuak zui ve leh mai bawk a.
Rei lo te atan chauh a riahbuk sual an ni bawk a, thil pawimawh ang em em chu an nei vak lem lo, thing chang chi ațanga siam thingrem lian vak lo ah hian a ma thil pawimawm bîk leh ram lem thlalak te, lehkhazial chi la hman loh leh lehkhabu chhah pui pui tlemte hi Hestia chuan a thun mawlh mawlh a. A bul a ngawi renga lo ding Marcus-a hnenah chuan, " duhaiin ka in keng tam zawk iti em?" an ti a. Marcus-a chuan zawi sap hian, " tilo ve, kan awmchin hriat theih ani bawk si lo a, keipawh Phyra- ah eng eng emaw chu ka dah nual ang," alo ti ve bawk a. Chutia Hestia a in khung zawh chuan puanin chu an pahnih chuan an chhuahsan ta a. Puanin pawn a sipai panga lo awm te chu lût in Hestia-te bungrua te chu an lo la chhuak a, puanin te pawh chu awlsam tak hian an țhiat ta nghal zung zung a.
Marcus-a te erawh an sipai ho, chhuah in peih ran a lo awm tawh te lamah chuan an in zui phei ta nghal daih a, Pegasus chu alo kal loh avangin leh sipai rual a kal a duh avangin sipai ho te chuan sakawr dum lian țha tak mai hi Marcus-a tan an rawn laksak a. An chhuak tur chu an bâwr ang reng khawp mai, sakawr chung chuang mai bâk ah sakawr tawlailir țhahnem ang reng tak hi an bungrua leh ei leh in tur phurh nan sipai ho te chuan anlo siam a.
An chhuah dawn vel lai tak chuan General Ajax-a leh a sipai pahnih hi hmanhmawh tak hian Marcus-a te lam pan chuan sakawr hian an rawn tlân a, an bul an rawn thlen chuan General Ajax-a chuan, " in ngaihawm dawn hle mai, engtik ah emaw chuan râl kan la bei ho leh ngei ang chu," a ti a. Hestia pawh chuan, " Ni e, Pathianten min awmpui zel anga, kan la in hmu leh ngei ang chu," tiin alo chhang a. " engtik hunah nge chhuah in tum ve tâk?" tiin Marcus-a chuan a lo zawt a.
Ajax-a chuan, " Zânin tlâi anih loh chuan naktûk zîng khawvâr rual vel in aniang, vawikhat a han chhuahsan nghal diak mai chu khaw mipui te tan hian a khawhar thlak dawn em a," a ti a. Hestia chuan, " engpawh nise, kan la in hmu leh dawn nia, kan chhuak phawt mai ang e," alo ti a. Tichuan Marcus-a nen chuan sipai ho hmalam ah chuan an tlân dûn a, hma hruaiin Eastland khua chu an sipai ho te nen chuan muangchang hian an chhuahsan ta a.
Chutia an chhuak ta chu Eastland khaw mipui te pawh chuan an khaw kawtchhuah ațangin an lo en huang huang a, in thlah nan bân anlo vai nuai nuai mai bawk a. General Ajax-a chuan an liam thleng in a thlîr reng a, rilru hah hmel deuh hian a rûm hrâwk a, a puanin lam ah chuan muangchang hian a lêt leh ta hnek hnek a. General Ajax-a hi Verna sipai tho ani a, General Thot-a nen khan Lal Hinarul-a sipai ve ve ani a, an mi sâwm te ho khan an khaw lam haw an nghahhlelh hlawm em avangin haw duh ve viau mah sela vawikhat a Eastland- khaw chhuahsan diak kha dik theiin a hre lova, General Thot-a rual a haw tum kha ani a, mahse tlawmngaiin a awm hnufual leh ta zawk ani, mahse sipai leh an bungrua, an râl lâk thil tam zawk te chu General Thot-a khan a haw pui a, a mah tak hi chuan sipai zali emaw zanga vêl bâk a kawl tawh chuang lo.
Marcus-a te chuan an chhuah tlai deuh avangin khaw thim hnu a khaw luh ai chuan tiin an sipai te hah leh chau tawngkhawng tawh tak te chu an khawngaih ve tho bawk avangin ram palaileng ah zân an riak leh te te a, mahni khaw lam a haw tur leh indona ber a tawp tawh bawk si avang chuan an hmanhmawh em em hran chuang lova, a tûk ah pawh Ni chhuah fe tawh hnu, fehrehsan bawr vel ah an chhuak leh țan chauh va.
Tichuan nileng a kal in tlai khawthim hma deuh, Khawthlang lama Nî a her liam dawn lai vel in Phyra- khaw chhûng chu an lût ve thei ta hrâm a. Chutia khawchhûng an lût chu khaw mipui te chuan mak tih hmel deuh hian anlo en huang huang hlawm a, sipai ho kâr a Marcus-a leh Hestia- an hmuh chuan bân anlo vai a, an lo au dur dur hlawm a. An mahni avangin indona chu alo tawp a, Goth- sipai sual tak tak mai an tukdawl a, underworld veil pawh an ti phui tih te chu anlo hre vek tawh si a.
Sipai ho riahbuk hi khaw tawntirh a awm ani a, a hma kha chuan khaw hual in inhnai te te ah ralvênna a awm thluah a, sipai pawh an in semrual deuh țhin ani a, mahse tunah chuan ralvên em em angai tawh lo mai pawh nilo vin, chûng an ralvênna hmun te chu an rauhsan in a tam zâwk phei chu an țhiat darh nuaih tawh a. Chuvangin khaw luh dawn khaw tawntirh ah chuah chuan sipai ho chuan riahbuk an siam tawh ani. Marcus-a leh Hestia te chu an hnathawh ropui tak avang chuan khaw mipui te chuan an ngaisangin a hnu ah phei chuan bân vai mai pawh duh tawk lovin sipai awmna lamah chuan anlo tlân phei dûl dûl ta reng a.
(end chapter 17)
Comments
Post a Comment