BRISEChutia pawnlam a an han chhuah chuan, pawn ah chuan Captain Aetes-a leh sipai enge maw zat hi an lo awm a,
Marcus-a a hmuh chuan Aetes- chuan rawn pan hnai in zahna entirnan alu an kun zauh a,
" ka pu, khawilam nge ?"
sakawr a Penelope-i hlân pah chuan,
" Nunau ho awmna ah kan va kal ang e, enge chanchin, hrehawm an tih hmel em ?"
" tilo ve ka pu, puanin kan zâr sak a, khaw mipui ten an mamawh tur ang ang te an lo lakkhawm sak a, engkim a kal tluang ani mai,"
sakawr ah chuan an zuang kai ve thauh a,
" a lawmawm anih chu, kan va tlawh ve lawk ang e,"
Aetes-ana a chhan leh hma chuan sakawr chu a khêng kal a, an tlan ta daih a,
Ngaiteh, chutih lai chuan Khawpui a lo ri dur dur a, zawi muang hian van ah chuan chhum chhah tak tak hi an rawn lang pheuh pheuh a, reilo te an chu khaw thiang tak mai chu a reh in, ruahthimpui thawk tur ang hrim hian van chung chu chhum dum hian a rawn luah thim khup ta mai a.
Chutia ka en reng lai chuan thawk lehkhat ah ramhnuai pilril hmel deuh mai hi alo lang thut a, hmun fianrial leh reh tak, ngaw chhung ni si, mahse uluk tak a enkawl ni mai awm tak a feet sawm leh pahnih vel bial hnim țo lohna fai han mai ah hian dawithiam Zeddicus- a kha kâwng chen vel a sâng lungrem maicham bul ah hian alo ding reng a, chu maicham chungah chuan lehkhabu chhah tak mai hi a in keu sa in alo awm bawk a, Zeddicus-a chuan dawi hla enge maw hi ring fahran lo hian a chham bul bul a, a chângin lehkhabu ami chu chhiar ni awm tak hian lehkhabu en chung chuan dawihla ang chi tho hi a chham zawm leh zel bawk a,
a bul vel ah chuan dawithiam kawrfual ang ha hi mi sawm leh pahnih an ding kual a, an kut chu in kai kual in Zeddicus-a chu abial hian an hual a, mahse chung ho hmel chu a hmuh theih loh, an kawr lukhum in zawm chu Zeddicus-a ang lo tak a an khum a vangin.
A châng chângin Zeddicus-a thil chham chu an lo zawm ve leh zeuh zeuh țhin a.
Chutia ka en reng lai chuan chu an awmna zawn chung lam ah chuan chhûm dum chhah deuh deuh hi circle ang mai a kual hian van boruak ah chuan an rawn kual tup tup a, Zeddicus-a te dawi hla chham pawh chu a ring tawh in thinrim țûn ang mai hian an âwka chhuak te chu a vin in a rapthlak telh telh a, chutah thawklehkhat ah Zeddicus-a hma maicham ațang chuan thil êng, meialh ang mai hi a rawn chhuak thut a, mak tak mai hian chu thil êng chu zawi muang a vir in a in hlûm a, reilo te an meialh hlawm ang maiin lu ang tiat vel tur hian a in hlawm mum a,
Boruak ah chak tak a thlawk chho in, chhûm kual vir tup tup lai vel ah chuan a han puak darh ta chuaih a, chutih lai tak chuan khawpui ri rapthlak tak mai hi alo ri ve nghalin a sawhkhawk chuan lei hi a nghawr nghing dur dur a, lirnghing nasa tak mai hian a zui nghal zat bawk a,
chu lirnghing avang chuan Zeddicus-a țhuihruai te chu an tlu in nikhaw hrelo vin an let reng a, Zeddicus-a pawh chu a tlu ve tho, mahse chu lirnghing reh hnu chuan muangchang hian maicham rinchhan chuan a rawn tho țial țial a, vanlam hawi chung hian rapthlak tak in a nui uarh uarh a.
Chu lirnghin lai vel chuan Marcus-a te chuan Raltlan ho awmna hmun ah an thleng tawh a, General Hestia- nen a an in biak lai mek in lir chu a lo nghing a, mahse a nasa em em hran lo, Penelope-i chuan Marcus-a chu a kuah rawk rawk a,
" Hestia, eng thil nge ni ta,"
ka van hrethiam mai biklo ve, Siraka-i chu a chhuak leh chu ani em lovang chu maw ?"
" chhuak lovang, chuti mai chuan a chhuah chu ka ring lo, lirnghing satliah ani mai thei bawk "
Marcus-a chuan Penelope-i chu hnêm in,
" hlau suh, engmah ani love, a reh leh tawh alawm,"
Hestia- lam chu hawiin,
" Hestia, Zeddicus-a sawisak nu kha khawilai velah nge in awm tir tak, nula pahnih in a an enkawl kha,"
Hestia- chuan an raltlan ho riahbuk an siamsak tâwp lam kawh pah chuan,
" a piah deuh, luite hnaih ber a puanin ah sawn an awm in ka hria, va kal in tum deuh ami,"
chutih lai chuan sipai sakawr chungchuang pasarih vel hi an awmna lam pan chuan an lo kal a, General Hestia- chu an rawn be mawlh mawlh a,
Marcus-a te pawh chu sakawr a chuang tawh chuang lovin, Penelope-i nen a in kai rial chung in Hestia- kawhna lampang puanin pan chuan an kal ta a,
chutia an kal ta chu Hestia- chuan rawn au zui leh in,
" Marcus, kha dawithiam bo ta Zeddicus-a thiltih te kha ani thei mai lo maw ?"
hawi pawh hawi let tawh chuan lo hian Marcus-a chuan,
" tunhnai lawk chuan a la rawn lang ngam tawp lovang, mahse ala rawn lang leh ngei ang,"
Hestia-pawh chu sakawr ah a chuang kai ve nghal a,
" Engpawh nise, kan han thlithlai reng reng ange, thuthar a awm leh kan in hrilh leh dawn nia, anih leh phawt u,"
chutia sawi pah chuan a rawn be tu sakawr chungchuang ho te nen chuan an tlan liam ta a.
Puan in kawngkhar chu keu in Marcus-a chu a lut hmasa a,
chu puanin chhung chu pawnlama en ang aiin a chhung chu a lian zek mai, thil a in rem fel thlap vang pawh chu ani mai thei,
kawngkhar ep chiah ah chuan thing chang chi a siam dawhkan kil li nei lian vaklo hi a awm, a chungah chuan dâ thleng kum hlai tak ah hian theirah chi hrang hrang leh hlum bêl tung it et, uain dahna pahnih hi alo awm bawk a, chung thil te chu lo ti fel in nula pakhat hian sa hrang lian tak pakhat hi chemte hian alo zai mek a,
Marcus-a a hmuh chuan chu nu chu a phu zawk a, sawi mai tur hre lo hian hrilhhai hmel tak hian lai chuih in a ding a,
" Nula, keimah ka ni e, in awmna chu enge ang i tih a, harsatna in nei em ? in pi damlo kha enge a an tawh a? "
chutia Marcus-an a a sawi lai mek chuan Penelope-i pawh chu a rawn lut ve a,
chu nula in a Penelope-i a hmu veleh chuan a țe thawt a, ring tak mai hian,
" Penelope, Penelope," ati tak vak a, Penelope-i chu a kuah nghal chûk chûk a.
Penelope-i pawh chuan mak tih hmel tak hian a lo kuah let ve in, " Katie, Katie," a ti mawlh mawlh bawk a, an țe chêl chûl a, an hlim avangin an mittui a tla a, an in țah khum bawrh bawrh a.
Marcus-a chu a hrilhhai ngei mai, chumi te pahnih chu maktih hmel tak a thlir in an bulah chuan alo ding zum zu a.
Nula Katie-i chuan ring deuh mai hian,
" Mina, lo kal vat teh, lo kal teh," ati tuarh tuar a.
Chutah rang deuh mai hian puan in zar hliah pindan dang ațang chuan nula pakhat hi alo chhuak a,
" enge ni ta vak vak a, Katie, khatia i au chel chul ?"
Katie-i chuan Penelope-i kuah chung hian,
" Mina, en teh, hei hi tunge ila hria em ?"
chutah Mina-i pawh chu rawn tlan phei nghal in,
" Penelope, ani thei lo, ini em, Penelope-i kha ini tak tak maw ?"
Penelope-i chu a kuah a, a hmai te chu a chûl a, maktih hmel deuh si leh lawm hmel tak hian a en vel a,
" Mina, ka țhian duh tak, keimah ngei kha ka la ni asin, Katie, in țhiannu Penelope-i ngei kha ka ni e,"
an pathum chuan an in kuah a, an hlim avangin an chiai a, an țap pûr hlawm bawk a,
Katie-i chuan Marcus-a lo ding zum reng chu inthiamloh hmel tak a en in,
" ka pu, minlo hrethiam hram rawh, kan țhiannu hi a thi tawh tur ah kan ngai daih tawh asin, khawngaih in lo țhu ta che,"
chutia sawi pah chuan thing țhutthleng hi a lak sak nghal a,
Marcus-a pawh chu ihe lo vin a țhu ve nghal a,
" nilo ve, nula, ka lawmpui khawp mai che u,"
Penelope-i pawh chuan thing țhuthleng la in Marcus-a bul te ah chuan țhuthmun a rem ve a,
an bulah chuan Mina i pawh chu țhu ve in, Katie-i erawh chuan a sa chan lêp leh uain chu Marcus-a te ei tur in an chhawp sak phawt a,
chutih pah chuan Katie-i chuan,
" Penelope, i thi daih tawh tur ah kan ngai asin, engtin nge khami zan khan i awm tak, sipai ho te khan an rawn man leh che em, engtin nge in in chhar a..?"
chutia sawi pah chuan Marcus-a chu an melh zauh a,
Mina-i chu hlim tih hriat tak hian a nui ver ver reng a, Penelope-i chu ngaih hmel deuh a thlir veng veng pah hian Marcus-a nen chuan a entawn leh zauh țhin a.
chutah Penelope-i chuan,
" ni e, Katie, thil tam tak sawi tur a awm,"
Marcus-a chu an melh a, chutih pah chuan,
" Marcus, Katie leh Mina-i, ka țhian tha ber te, kan inhmuh hmasak ber zan a Tanin ațanga min hruaichhuak tu te an nih hi,"
Marcus-a chu a bu nghauh nghauh a, uain bur ami chu no ah thli chhuak in tlem an lem sak a.
Chutah Penelope-i chuan Katie leh Mina-i en chung chuan,
" ni e, khami zan khan sipai ho in min rawn nangching a, mahse min khawih hma in Marcus-a hian min rawn chhan hman alawm,"
" chuan Englo kha, enge i an tawh a, i la nei țhin em ?" in thlahrung deuh leh Marcus-a hriat hlau ni awm tak hian zawi fahran in Mina-i chuan alo ti a.
" Mina, engkim a tha vek tawh, Marcus-a hian khang dawi chhia te kha min lakbo sak ve tawh a lawm,"
a thusawi chu mak an tih hmel hle a, maktih hmel deuh hian Marcus-a chu an en ha a,
Katie-i chuan,
" eng lo, Marcus-a hian dawi chu a sût maw ? Dawithiam ani itihna emni ?"
" nilo ve, Kha Siraka-in a ka chunga dawi alek kha a sut leh tur in Marcus-a hian min țanpui alawm, a buaithlak asin, mahse dawithiam min țanpui thei tu Marcus-a hian a hre hlauh a, kha kan in hmuh tawp ber zan ațang khan chawl lovin minpui thei tur kan zawng a, Marcus-a hian chûng ah zawng zawng chuan min pui a, tunah hian kan hahdam ve thei chauh ani, mahse ani chu Isle- ah khan alo kal lehnghal si a, chawlhna hun ala nei miahlo asin, kan in hmuh hmasak ber ațangin tun thleng hian min buaipui reng reng in a hun a hmang a, a hnenah hian lawmthu sawisen loh ka ba ani "
Katie-i chuan Marcus-a chu ngaihsan hmel tak hian an thlir veng veng a,
" Ka pu, kan țhiannu i puih avang hian kan lawm tak tak ani, chuan a nu nunna pawh ila chhanhim sak leh ta zel ania, Pathiante chuan veng zel che rawh se,"
Penelope-i chu kuah in a en vang vang a,
" Ka tih tur ve reng alawm, ka pui lo ang tih hi ka hlau asin,"
Penelope-i chuan hlim deuh si, ngeiawm deuh a nuih pah hian Marcus-a chu an melh a,
" ni e, min pui tur in an ram ațangin alo kal vang vang anih hi, tlangval fel tak ani,"
Mina leh Katie chu an in en a, an nui ru tat tat a, chutah Katie-i chuan,
" ni e, taka, Pu Marcus, Isle- ah daih daih ilo kal ani awm si a, engti tur a lo kal nge inih hrim hrim a, chuan khawi ram ah nge i awm ve le ? Henglai hnai tho ah hian em ni?"
" nilo deuh, Baculla a awm ka nia, mi hmuh tur pawimawh tak mai ka nei a, chu mi hmu tur chuan in ka lo kal a, mahse hei a aia pawimawh zawk tihtur ka nei leh si anih hi,"
Penelope-i chuan za lo deuh a nuih pah hian, ngeiawm deuh in an melh a,
" Katie, Marcus-a hi Baculla Lal fapa anih hi, Mi huaisen Marcus Valerious-a," an ti a.
Chutia Penelope-in a an sawi tak ah chuan mak tih hmel deuh hian an pahnih chuan an in en he haw a, Marcus-a chu an ngaihsan hmel hmel hle a.
Chutih lai chuan puanzar lehlam pindan ațang chuan hmeichhe aw chauh hmel deuh hian Mina-i chu a rawn ko a,
chutah Mina-i chuan,
" Penelope, i nu anih chu, nangmah va kal ta che, a hmu chak tawh khawp ang che," alo ti vat a.
Penelope-i pawh chu rang tak a tho vin pindan lehlam ah chuan a va kal ta nghal a.
Chutia a kal hnu chuan eng eng emaw sawiin an pathum chuan an la titi a, chutah Marcus-a chuan,
" anih chuan ka țîn san tawh phawt mai ang che u, Penelope-i chu hetah hian awm ve nghal mai se, Siraka-ina hripui a lên tir lai khan hripui ina a man Albina- khua ami te enkawl tur in a awm hnufual a, Delain- ah hian ramsa hlauhawm bei tur a min rawn koh tak si ah khan ka kalsan a, chutah Isle- a kan rawn kal dawn in ka va hruai a, Delain-ah hian ka hnutchhiah leh a, an khaw roreltu Castor-a te in ah a lo awm a, tunah nangni a chi leh kuang te inlo awm hnaih tak ah chuan awm ve nghal law law mai se, hmelhriat ngai mangloh in a awm reng zawng, a khawngaihthlak lutuk deuh ani,"
ngaihsan hmel tak a Marcus-a en chung chuan Katie-i chuan,
" ni e, Pu Marcus, i thiltihsak te avang hian an nufa hming in chibai ka buk sak in lawmthu ka sawi sak e, kan nunna min chhanhim sak avang pawh hian,"
Marcus-a chu muangchang hian a tho va,
" in lo in enkawl tha dawn nia, helai hmun a in awm chhung chuan harsatna in tawh loh ka beisei, Isle-pawh muangchangin an din țha ang a, in kir leh thei thuai ang,"
chutia a sawi hnu chuan puan in chu a chhuahsan ta a,
Pawn ah chuan an hawi kual a, mi ho chu an la zi nak nak hlawm a, khua chu ala thim fel chiahlo na in van ah chuan arsi an lang pheuh pheuh tawh a, enge maw ngaihtuah ni awm tak a enge maw chen a din vang vang hnu chuan sakawr chungah chuan a zuangkai thauh va, an riah buk lam pan chuan chak tak hian a in khalh liam ta a.
An riahbuk puanin a thlen chuan alo reh țhiap a, pawn ah chuan a sakawr chu thlung mawlh mawlh in puanin chhung ah chuan phur lo fahran hian alut a,
inchhung ah chuan General Klent-a chiah chu lo awm in Dawhkan kil in enge maw hi alo ei malh malh a. Chutia Marcus-a lo lut a hmuh chuan lo chhawn nghal in,
" Marcus, In mi zawn chu in hmu thei ta em ? Enge chanchin ?" alo ti sawk sawk a.
In phih fai mawlh mawlh pah hian Marcus-a chuan,
" Hmu chu ani mai e, Penelope-i nu kha ania, Dawithiam Zeddicus-an a alo sawisak nu kha,"
chutah rang zet hian Klent- chuan,
" chuti maw, i van sawi silo ve a hma te khan, kan hnen ah awm se a nuamsa deuh tur ania, a hliam te kha ana viau lo maw ?"
chhan pawh chhang lo chuan a in thlak mawlh mawlh a, chauh hmel deuh hian a mutna lam chu a pan nghal a,
" an chi leh kuang te bul ah nuam anti zawk ang, Hestia hi khawilam ah nge a chhuah a,"
" Khaw thim hma deuh a lirnghing khan a ngaih ati țha lo deuh ani ang, Captain Aetes- te ho nen Verna- khaw lam pan in an liam ta anih kha, an lo kir leh țep tawh maithei ani,"
Marcus-chu a puanthuah ah chuan chauh hmel deuh hian a mu hnawk a, zawi fahran hian,
" ngaihthatlohna tur a awm vak pawn ka hre lo, ka chau deuh a, mangțha phawt mai aw, Klent, ka lo nghak chhuak lo mai ang,"
chutia sawi pah chuan a mu țha nghal sawt sawt a,
General Klent-an a a koh leh chuan a lo muhil hman der tawh.
....Țawng ri lûng lûng thawm chuan Marcus-a mutui lai chu a ti harh zawk a,
muangchang a thovin a in ha sawk sawk a, a mutna bul dawhkan a dar ațanga siam bûr ami chu uain no khat an thli chhuak a, chutah tlak nghal pawp in no khat dang an thli chhuak leh a, chu no keng chung chuan puanin pindan pawn zawk ah chuan a va chhuak phei a.
General Klent-a chu a thirkawr nen alo in thuam ap tawh a, thing țhutthleng a țhu âwn dui chung hian lekha zial chi hlai tak hi uluk hmel tak hian alo bih ngur ngur a, a bulah chuan sipai pakhat hi thupek nghak ni awm tak hian khawng tak mai hian alo ding reng bawk a.
Marcus-a lo tho a hmuh chuan General Klent- chuan rang tak mai hian,
" i lo tho thei a maw, hei General Hestia-in lehkha minlo thawn a, engtia han tih zui chi nge ni dawn ni ?"
Marcus-a chu a bul țhutthleng ah chuan muangchang hian a rawn țhu ve a, Klent-a chuan lehkha zial chu an entir ve a,
a kut lehlam a uain no keng chung chuan uluk hmel tak hian lehkha chu an bih ngur ngur a, rei tawk fan a bih hnu chuan a rûm nghut a, a uain chu an tlak pawp a, abula sipai ding chu zaizir a țutna kawh hmuh pah hian,
" engtik velah nge General Hestia- te chu an chhuah," an ti a.
chu sipai chuan inthlahrun hmel deuh hian,
" tukin zing leilung lan theih țantirh vel lai khan,"
General Klent-a lam chu an hawi leh a,
" lehkhathawn a alo ziah dan ang anih chuan buaina dang kan hmachhawn leh dawn a ang khawp mai, engtia hma han lak tur nge ni dawn ni, Neira- te hi hmuh dan han awm thei sela aw," ati vawng vawng a.
Marcus-a thusawi chu hriatthiam loh hmel tak hian General Klent- chuan,
" enge isawi awmzia chu, ka van hrethiam chiah lo ve," a ti hu a.
Chutah Marcus-a chu rilru hah hmel tak hian a rum nghut a, reife ngawi reng a a uain no dawhkan chunga a dah a thlir vung vung hnu chuan muang fan raih hian a rawn țawng chhuak a,
" ni e, General Klent, dawithiam Zeddicus-a hi a rawn lang leh tawh ngei ani ang, Hestia- sawi dan chuan nizan a lirnghin chhan kha chu Underworld Veil( leihnuai khawvel, hremhmun tihna ania,CR) in hawn vang ani mai thei ani, Veil- a in hawng anih chuan kan misual Zeddicus-a thiltih vek ani ngei ang,"
chutah mak tih hmel deuh hian General Klent- chuan Marcus-a chu an en a,
" Veil a? Enge lo thleng ang ?"
" ka hre mai rih lo, Lehkha a alo ziah ang khan, Verna- khaw mipui te chuan nizan tlai a lirnghin hnu lawk ațang khan an khaw dai vel ah ramsa mak deuh an hmuh thu an sawi a rawn tia a, Underworld Veil- a in hawng anih chuan chuta țanga rawn chhuak pawh chu ani mai thei bawk,"
chutia a sawi zawh chuan a tho thurh a, uain chu thlit belh leh in no khat chu an tlak leh pawp a, a thusawi chu a sawi zawm leh a,
" Veil a in hawng anih chuan ramsa pakhat lek zawng a lo chhuak tawp lovang, a hmahruai lek pawh buaina tham chu anni dwn hrim hrim,"
chutah General Klent chuan,
" Verna- ah chuan sipai an tam a lawm, Lal rorelna hnuai a awm an ni a, Sipai chak tak tak an nei ngei ang chu,"
" I thusawi chu a dik khawp mai, mahse he Veil hi a in hawng anih vaih chuan, kan tan pawn a hlauhawm thei ang, chuvangin Hestia- te chu ka va um vat a ngai ani,"
" Marcus, hahdam i mamawh asin, i hah rim tawng lutuk mah mah ani,"
" General Klent, i sawi dik khawp mai, zep loh ah chuan ka chau khawp mai, mahse mipui te hi kan kut a awm an ni a, kan venhim na hnuai a khawsa anni tih hi hriat reng tur ania, Sipai kan ni a, sipai kan nih chhan chu mipui te venhim hi ani, chu chu kan ropuina ani bawk,"
chutia sawi pah chuan a thirkawr chu a in bel mawlh mawlh a,
General Klent- chu a inthiamlo deuh ani ang, in thlahrung deuh tak hian,
" sipai engzah nge kan hruai ang, thupek ka va chhuah nghal ang e," chutia sawi pah chuan a tho nghal uaih a.
Chutah Marcus-a chuan rang tak mai hian,
" nilo ve, General Klent, thuchiang engmah ala awm lova, chuvangin Sipai ho te chu tihbuai hrih loh an tha zawk ang, keimah in Verna- khua ah chuan ka va kal ang a, chanchin dang a awm leh ka lo hrilh leh vat dawn che nia,"
" nangmah chauh chuan i kal thei lovang, keimah tal hian ka lo zui ang che, remti hram rawh,"
" nilo ve, General Klent, ilo kal ve chuan helai ah sipai enkawl tu an awm nang, ka kal phawt ange, chanchin kan in hrilh leh zawk dawn nia,"
chutia sawi pah chuan Puanin pawn lam ah chuan a chhuak zui nghal a, sipai pakhat leh Klent te chuan rawn zui chhuak ve in, Marcus-a sakawr chunga a zuang lawn leh chak taka Verna- khaw lam pan a Delain khua a tlanchhuah san lai chu chu ngawi reng hian an thlir vawng vawng a, kawnglai leh an riahbuk kawt a sipai ho lo awm te pawh chuan mak tih hmel tak hian Marcus-a chu an en zui vawng vawng hlawm a.
Marcus-a chu chak tak hian a tlan vang vang a, hmanhmawh bakleng a tlan a ni bawk a, chawhnu her vel ah chuan Verna-khua chu a lut der tawh a,
Delain leh Albina- ai chuan a khawpuiin ami chengte pawh an changkan hmel zawk a, an thawmhnaw inbel ațang pawh chuan khawpui ani tih hi a hriat ngawih ngawih.
An in leh kawtthler vel te pawh chu a felfaiin a zau țha hlawm hle a, mipui pawh an tam in kawtlai velah te chuan enge maw tih khawm nei ni awm hrim hian an zi deuh hut hut a.
Muangchanga a sakawr chu kaltir in hmuhnawm tih hmel deuh hian a hawi vel ruai a,
thir kawr inbel, sakawr lian tak chunga chuang tlangval hmelțha tak chu mipui ho pawh chuan anlo hmu duh hle a, țhenkhat phei chuan an thlir zui vawng vawng leh ta nghal a.
Mahse chung mipui ho chuan a mit an la fahran lo, a melh hek lo a, ngaihsak awm pawh in a awm lo, an in ropui tak tak te leh an kawtthler mawi leh zau tak tak te chu thlir kual in a sakawr chu muangchangin a tlan tir a.
Chutia kawtthler a akal mek lai chuan a mah tawk zawng hian sipai rual khat hi sakawr chung a chuang chung hian an lo tlan a,
mipui ho chuan kawng anlo kian sap sap a, an en dan ațang chuan an zah hle tih hi a hriat theih.
Marcus-a chu rawn pan ding nghal in a bul an rawn thlen chuan an hotu ber ni awm tak Palian deuh, hmuihmul leh khabe hmul tlem a zawng nei chuan a thir lukhum chu an phelh a, chutah inchibai leh zahna entirnan Marcus-a lamah chuan a ban dinglam phar pheiin, a awm ah an nghat zui leh nghal a. Sipai dang ho pawh chuan an hotu pa tih dan ang chuan an awm ah an kut an nghat ve theuh bawk a. Chu pa chuan ngaihsan hmel tak a Marcus-a en pah hian,
" Chibai, Baculla Lal fapa leh mi huaisen Marcus Valerious, Verna- khua ah hian kan lo lawm a che, General Thot-ka ni e,"
mit chhin suar suar pah hian Marcus-a chuan muang fahran hian,
" Chibai le, in khua chu a ropuiin a nawm hmel hle mai,"
chu pa General Thot-a chu thawk lak pah hian an hawi kual vel a, nelawm fahran hian,
" nuam tak ani asin, Pu Marcus, i lo kal thei hlauh chu kan lawm tak meuh meuh ani, Kan Lalpa pawn a hmu chak khawp mai che,"
" anih chuan in Lal hmu tur chuan kan kal dawn em ni?"
" aw le, kal ila,"
chutia an in biak zawh chuan sipai ho te chu tlar hnih ah insiam in, Marcus-a leh General Thot-a te kalna tur in kawng an lo sial a, Marcus-a te pahnih chu chung sipai in tlar ho lai ah chuan kal in chak fahranlo hian an sakawr chu an tlan tir a, sipai in tlar ho te pawh chuan an zui ve zel a,
kawtthler thui deuh mai pathum emaw vel lai an kal hnu chuan an hma zawn ah hian tlang ang deuh reuh hi alo awm a,
a vel chuan kawng zau tha tak mai hi a kual chho ruih a,
General Thot- chuan hma hruaiin, chu tlang lam pan chuan an tlan chho leh ta a,
enge maw chen an kal hnu chuan, tlang chhip chu an chhuak ta hlawl mai a,
chu tlang chhip chu zawl duai mai hi alo ni a, chu tlang bâwk hmel hmang leilung pianken chuan Lal in ropui deuh mai hi alo ding luah mai a, tlang chhip ti ila, a chuan hnuai zawk chu zawl zau pui mai, far thing leh thingkung lian pui pui, zung lang tuarh ( hmawng emaw bung kan tih ang chi, a zung uai thla fur ang chi hi.CR) chi tam tak hian a hual khup a, chung chu a chei nan a an phun chawp ani mai thei bawk.
Chuan tlang chhip chuanchung zawk a Lalin awmna pan chhohna chu step zau leh hlai pui pui in dawh chho zui mai chuan a han pawh leh chiah a,
chu step chhoh na bul ah chuan in lian leh ropui tak tak a ding thluah bawk a.
Enge maw chen chulai hmun leh Lalin vel chu a thlir dauh dauh hnu chuan Marcus-a chu a sakawr atang chuan muangchang hian an chhuk a, chutah an hma lawk a awm Lalin chu uluk hmel tak hian an thlir leh vawng vawng a.
General Thot-a leh a țhuihruai sipai ho te pawh chu an sakawr atang chuan an chhuk ve ta sap sap hlawm a, chutia an chhuk fel ta maw tih chuan chhiahhlawh mipa tlangval pahnih hi hi rang deuh mai a lo kal in, an sakawr te chu an rawn kaih sak a, an piah lawk a lung a sak in lianpui ah chuan an luhpui ta nghal daih a.
Chutah General Thot-a chuan enge maw ngaihtuah ni awm tak a ngawi reng a ding vung vung Marcus-a dar ah chuan khawih zeuh in,
" Pu Marcus, kan kal chho mai dawn em ni ?" an ti a. Marcus-a pawh chuan harhchhuak thut ni mai awm tak hian phûr sûrh hian,
" aw le, General Thot, I kal ang u hmiang, mahse Sakawr te kha ?"
a sakawr an luhpuina in lam chu thlir pah hian an zawt ang hu a.
Genetal Thot-a chuan kal pah hian ngaihsam hmel deuh in,
" khang chhiahhlawh te kha sakawr enkawl tu te an ni a, sawlai an luhpuina in saw Lal sakawr in chu anih saw, a ropui khawp asin,"
Lal in pan chhohna step ah chuan an in zui chho dat dat hlawm a,
eng eng emaw sawi a an titi kual duah hnu chuan Lalin kawt kai an lo thleng ta der a.
Pawn lam ah chuan Sipai thir kawr ha tam tak hi duty ni awm tak hian anlo awm țeuh a, chung sipai ho te chuan Marcus-a an hmuh chuan ngaihsan hmel deuh hian an lo thlir deuh țhup a,
mahse chutiang be kual leh in hmelhriat na hun chu an nei lo, General Thot-a chu in chhunglam pan chuan a in her vut a, a kal ta daih a, Marcus-a pawh chuan zui ve nghal vat in sipai ho, anmahni zuitu leh General Thot-a țhuihruai ho te kha chu an lo kal ve tawh lo, sipai lo awmsa ho te nen chuan engemaw sawi in pawnlam ah chuan an phûr hlut a, a chang leh ring tak tak hian an nui khek leh tuarh tuarh țhin a.
Lalin kawngkharpui bulah chuan sipai thirkawr ha hi pali lai hi anlo awm a,
chung sipai te chuan Marcus-a chu ngaihsan hmel tak hian kawngkhar lianpui chu an lo hawn sak a,
Chutah General Thot-a leh Marcus-a chu, Lalin chhung lam ah chuan an in zui lut ta zel a.
Lalin chhung chu a ropui ngei mai, Lalpa leh Lalnu pawh chu inngaih hmel tak hian anlo țhu dun a, Dawhkan bial hlai pui mai chu sipai leh Lal upa leh khawnbawl, mi challang hmel tak tak te hian an lo kil mek a, an hmel ah chuan an thu tak in, enge maw buaina deuh chu an nei ni awm tak ani,
Lal in chhung a General Thot-a leh Marcus-a rawn lut chu ka hau hian an lo thlir a, an thusawi lai pawh chu an reh zui nghal a,
Marcus-a a hmuh chuan Lalpa chu rang tak hian a thutna atang chuan an rawn tho chhuak a, a uain no ken pawh chu chung dawhkan a kilpui ho te lam ah chuan an rawn lek chhuak a,
" Baculla Lal fapa, Mi huaisen Marcus Valerious- a hming in " an tih zawm nghal zat a. Chutah chung ho pawh chuan an uain no chu an rawn lek chhuak ve far hlawm a, a rual in tlem an han in hlawm țheuh a,
" Marcus Valerious, Verna khawpui ah hian kanlo lawm a che, kei hi Verna khaw enkawltu leh rorel tu Hinarul-a ka ni e,"
an Lalpa hi hmel zahawm tak, pa lian leh sipai hmel tak mai ani a, kum sawmli leh panga bawr vel ani ngei ang,
chutah Lalpa chuan A kut anti che zauh a, chu veleh khawi atanga lo chhuak nge tih pawh hriat loh hian chhiahhlawh nula pali panga vel lai tur hi anlo chhuak zawt a,
Marcus-a te pahnih chu țhutna tur an rawn kawh hmuh a,
chutah muangchang a phei in chu dawhkan bial chu an kil ve ta a,
an Lalpa chuan a bula Lalnu hmelțha tak chu enge maw hrilh in zawite hian an be sep sep a,
Marcus-a en zauh zauh pah hian hlim hmel deuh hian an han in nuih a, chutah Lalpa chu rawn hawi chhuak in a sir ep chiah a rawn thu Marcus-a hnenah chuan,
" Baculla Lal fapa, General Hestia- ina a sawi ang ngeiin kan khua chu ilo thleng ta ngei si chu ani a, thil pawimawh tak mai hrilh tur che ka nei asin, Hestia- min hrilh kha ania,"
chutah Marcus-a chuan muang ban deuh hian,
" eng thu nge ni ta le Lalber ?"
" ni e, nimin tlai lirghin hnu lawk khan khan khaw dai vel ah hian Ramsa mak tak emaw ni, nge dragon lam zawk ni awm tak hi mipui ho ten an hmuh thu an sawi nasa em em a, nun ati ralti khawp mai, chuan Hestia kha alo kal hlauh a, underworld veil- a in hawng anih a rin thu te, he sa hlauhawm an hmuh pawh hi atak ngei anih a rin thu te leh a dang pawh an la awm a rin thu te a sawi a, chung thu vel chu sawiin hei ka upa te tan zanriah kan buatsaih sak a, hmalak dan tur kan lo rel mek anih hi,"
" Lalber, chung chu thil ni thei leh awm thei chu ani alawm, tun ah Hestia- te chu khawilam panin nge an chhuah ? Engti tur berin nge an chhuah le?"
Marcus-a thusawi chu maktih hmel tak mai hian chung thu khawm ho chuan ngawi reng hian anlo ngaithla țhup a,
chutah Lalpa bawk chuan,
" underworld veil- a in hawn ngei a rin thu a sawi a, mipui ho ten a khaw dai lawk mai a he sa hlauhawm hi an hmuh avang hian Veil- pawh chu kan khua atanga hnaite ah a in hawn a rin thu te a sawi a,"
" Lalber, Veil in hawng tur chuan ram ngaw lei țhatna ah ni lovin thlaler emaw, lei țhat lohna hmun deuh te emaw ah angai țhin a, in khua ka lo luh tirh khan kan hawi vel a, ram ngaw chhah tha tak tak in a hual vel che u ni maiin ka hria a, chuvang chuan veil- chu a in hawng lo pawh ani thei tho ani,"
" ni lo ve, helai kan khaw chhim lam dai a ramngaw piah lawk ah sawn Kókkinos ( greek țawng ania a sen, red, tihna. CR) hmun zau tak a awm a, he a hming put chhan ang ngei hian thlaler, a leilung chu thisen ang maia sen a ani a, chu thlaler hmun ah chuan engmah pawh a țo lo, chutahchuan he thil hi a thleng thei ngei ang, chu mi hmun en thlithlai tur chuan ania Hestia- te chu an chhuah ni"
" a hmun an thleng tawh angem,? Engtik lai hun vel khan nge Verna khua hi an chhuahsan?"
" tukin zing khan an chhuak a, rei kal ani lo va, an thleng tawh ngei ang,"
chutih lai chuan chhiahhlawh nula hmelțha tak tak enge maw zah hian theirah leh eng eng emaw eitur an rawn chawi lut a,
Chung chhiahhlawh nula ho in a an eitur leh in tur rawn chhawp te chu muangchang hian Marcus-a chuan tui tih loh hmel fahran hian a ei mawlh mawlh a.
Chutah uain chu thli in an tlak lehnghal pawp a, Lalpa pawh en chuanglo leh enge maw ngaihtuah niawm tak hian, zawi fahran hian,
" Lalber, chu lai hmun chu hmuh ve ngei ka van duh em ?"
" Lal fapa Marcus, i lo kal na a hla in i chau awm si a, chuti tut tut tur em ni ni dawn ? Chawlh hahdam phawt te a țha rih zawk lo maw ?"
" Lalber, ani khawp mai, mahse ka hmanhmawh tak meuh meuh ani ?"
" In ti hahdam rih teh khai, General Hestia- te'n engkim an rawn tichiang vek mai dawn alawm, lo nghak ila a hahdam thlak ber zawk asin,"
chutih lai chuan Lal in chhung ah chuan sipai pakhat hi hmanhmawh hmel deuh hian arawn lut hlawl a,
inchhung a awm ho te chuan mak tih hmel zet hian anlo thlir thup a, mahse chung chu engahmah ngailo ni awm tak hian, en pawh en let lo hian a rawn lut tlang zel a, Lal Hinarul-a hma zawn dawhkan bul ah chuan rawn pheiin Lalber chu zahna chibai buk in a kûn hniam zauh phawt a,
Lal chuan, " sawi rawh le " an lo ti a,
" Aw Lalber, General Hestia-thuchah ka rawn keng a, kan General chuan Kókkinos- hmun a Underworld Veil a in hawn thu hrilh tur che in min chah a, he Veil- hi ala nasa em em lo a, mahse kan țhenawm ram Nothland- khaw dâi vel leh Bersin- khua tan tlang in he Veil hi a in hawng a, mahse tlemte chauh in ala ni, kan khaw dâi Kókkinos- hmun ah hian a nasa ber mai thei a, a zau lai ber chu feet sawmhnih vel lai ani ang, mei alh nasa tak tak alo alh chhuak reng a, a bul hnaih ah pawh a kal ngam loh ani, chuan Lalber chuan a sipai te a rang thei ang ber in a khua chu a theih ang angin venhim hna thawh tir nghal rawh se ati a, chuan kei chu Delain- khua ah Lal fapa Marcus-a hmu tur in ka kal lehnghal dawn ani,"
chu a thusawi chuan inchhung a awm ho te chu a barakhaih in a ti chiai hlawm hle a, Lalnu pawh chu a mangang hle ani tih hai rual ani lo.
Chutia a sawi zawh hnu chuan Lalpa chuan zaidam tak hian,
" sipai huaisen, Delain- khua ah chuan i kal kher angailo mai thei ani,"
Marcus-a chu an melh zawk a,
" Lal fapa Marcus-a chu hetah a awm alawm,"
chu thu an hriat chuan rang tak mai hian chu sipai chu an hawi kual nghal a, a bul lawk a Marcus-a lo țhu reng an hmuh chuan a thaw kâwk a, zah tak mai hian chibai an buk a,
" ka pu, Marcus, General Hestia lehkha kha i hmuh tawh ngei ka ring a,"
Marcus-a chuan hmu tih nan alu chu an lo bu nghauh nghauh a,
chutah chu sipai pa chuan sawi zawm leh in,
" General Hestia- chuan ilo kal hun a la nghak reng a, tuna ka sawi tak ang khan misual Zeddicus-a ngei anih a ring a, "
Marcus-a chuan abul a țhutna ruak chu an kawhhmuh a,
" Alo la lan leh kha chu ka ring sa hrim hrim a, engpawh nise General Hestia- chu ka va hmuh vat angai dawn ani,"
chu sipai chu Marcus-a bulah chuan an țhu ve vat a, Marcus-a chuan uain thlit sak pah hian,
" i chhawlhal tih reh nan han lem phawt ta che,"
chu sipai chuan alo ban vat a, vawikhat ah an tlak pawp a,
" Pu Marcus, General chuan nangmah hmu a lo hruai nghal tur in min hrilh tak asin,"
chutia a sawi lai chuan angaihna hriat loh hmel tak hian Lalpa chuan Marcus-a leh chu zualko sipai inbe lai chu alo melh tawn zak zak a.
" Marcus, eng thu nge maw in sawi le, tunge Zeddicus-a chu anih a ?"
Marcus-a chuan, " Lalber, Mageía Polémou (greek tawng ani a, dawi indona, dawi hmanga indona tihna ani ber ang, Siraka-i te leh druid ho indona kha.CR) - lai a Druid ho in man an tum ber kha ania, mahse alo tlanbo hman a, tunah hian rawn lang leh in, Palace of Prophet- a thurûk lehkhabu ru chhuak in he Underworld Veil- hi a rawn hawng leh ta chiah anih chu,"
Lalber chuan mak atih hmel hle a, ngaihsan hmel deuh a Marcus-a en chung hian,
" Lal fapa Marcus, ka hrethiam e, kha Wizards War- rapthlak tak a hnehna in chan avang khan in hnenah hian khawvel mipui te hian lawmthu kan sawi mawlh mawlh ani e, khawvel chu in chhanchhuak ta si a,"
" nilo ve, Lalber, sipai kan ni a, ram leh mipui te venhim chu kan tih tur ani alawm, engpawh ni se Hestia- hmu tur chuan Kókkinos lam ah chuan ka kalchhuah vat angai ani,"
abula sipai hnen ah chuan,
" in General hnenah chuan min hruai thei ang chu tiraw?" an ti a.
" thei tehreng mai, Lalfapa zahawm,"
chutia a sawi zawh chuan Marcus-a chu ațhutna ațang chuan an ding hluai a,
" Lalber, kan kal phawt ang e, kan lo kir leh vat ang,"
Lalpa chuan dan chi ani lo tih hria ni awm tak hian hlim hmel tak hian,
" in tih țalh si chuan va kal mawlh teh u, chanchin kanlo ngaichang reng dawn nia,"
A thusawi pawh ngaithla ta chuanglo chuan Marcus-a chuan hmanhmawh tak hian Lalin chu a chhuahsan ta daih a, thuchah kengtu sipai pawh khan rang deuh in a zui chhuak ve nghal a,
Lalin kawt a step hlaipui awm ah chuan inbe lo hian an chhuk thla sawk sawk a, kawt zawl zau deuh kha an zu thleng a, chutih lai chuan Marcus-a sakawr chu sakawr enkawltu pakhat hian chaw pek pah hian alo be vel mawlh mawlh a,
a sakawr lam pan chuan hmanhmawh tak a pheiin a in dap ruk ruk a, pawisa thir, puan ip tereuh te a fûn chu la chhuak in chu sakawr enkawl tu pa kutah chuan an hmehbel pawp a, chu pa chu alawm hmel kher mai, nui sâng chung hian Marcus-a chu a en vung vung a,
" minlo venhim sak avangin ka lawm hle mai,"
chutia sawi pah chuan a sakawr ah chuan in thazo tak mai hian an zuang lawn zawt a, thuchah kengtu sipai pawh kha sakawr chunga chuang chung hian a rawn phei a, an hma zawn a ramngaw chhahpui lam chu kawk in,
" Lal fapa Marcus, sawlai khaw dâi a ngaw piah ah sawn ania Kókkinos- thlaler chu a awm ni,"
chu sipai kawhna lam chu an thlir ve vung vung a,
" kan kal mai dawn em ni, hei ni pawh a tla lek lek chu ani tawh sia, khaw thim hma ngei a kan thlen hman hram ka beisei,"
" Lal fapa, Marcus, kan thleng hman ang, a kawng hi a țha a, General- chuan alo nghakhlel tawh khawp ang che,"
chutia sawi pah chuan a sakawr chu an vaw tlan nghal a,
Marcus-a pawh chuan zui ve nghal in, chak tak mai hian an sakawr chu an khalh dun a,
khaw chhung chu rei an tlan lo, chutichuan an sakawr chu hmanhmawh tak a tlan tir in reilo te an khaw dãi ngaw hmun pik tak chu an thleng ta der a.
Kawng awmdan te chu sipai chuan hrilh mawlh mawlh a,
chu ngaw a chin chu Marcus-a chuan hma hruaiin an tlan lut ta a,
mahse chutiang em em a pik chu alo ni lo, kal tlang fo na ani tih hriat tak hian kawng ang reng deuh hi alo awm sa a, chu chu zawh zel in hun enge maw chen an tlan leh hnu chuan Thlaler lei sen deuh mai ah hian an tlan chhuak ta hlawl mai a, chutah sipai chuan,
" ka pu Marcus, helai hmun hi alawm Kókkinos- hmun an tih chu, sawlai piah deuh ngaw awmna tantirh ah sawn General te chu an awm ngei ang," an ti a
Sipai pa bawk chuan,
" ka pu Marcus, General te chu ka va ko ang e," ti chung chuan hmanhmawh tak mai hian a tlan liam leh nghal a,
Marcus-a chuan a hma zawn leilung sen huam mai yards sawmsarih bawr vel laia êng leh pup pup țhin mai pan chuan a sakawr chu a lim phei tir zuai zuai a.
Chu lei khi bul hnai luttuk ah chuan tumah an kal ngam lo a, Marcus-a pawh chu a sakawr ațang chuan chhuk in hmuhnawm tih hmel deuh hian chu leikhi chat leh lei khi zau tak atanga lo chhuak meialh leh meikhu dum nguau nguau chu a thlir dauh dauh a,
chutia a thlir mek lai chuan a hnung lamah chuan thawm dang alo chhuak leh a,
sakawr rual tlan ri hi a hnunglam atan chuan a rawn ri chhuak a, muangchang a Marcus chu hawi chhuak in hnunglam chu an hawi a,
General Hestia, thuchah kengtu sipai leh sipai dang sawm rual vel hi sakawr chung a chuang chung hian alam pan chuan an rawn tlan mek a, an lo hnai tel telh a.
Marcus-a awmna bul an rawn thlen chuan General Hestia- chu sakawr ațang chuan an rawn zuang thla chhak a, hlim hmel tak hian Marcus-a chu an nuih a,
" Marcus, ka lehkha kha ilo hmu maw, ka rin ai daih in inlo thleng hma daih mai,"
Hestia- te chu hnungchhawn in, lei khi rapthlak tak mai chu an thlir leh vung vung a,, muang chang hian,
" I lehkha ka lo hmuh veleh ka lo chhuak nghal ani a, Verna khua ah ka awm reng tawh zawk alawm,"
" i va rang leh si ve, enge an Lalpa chuan a buaipui tak a, ka thu chah te kha rintlak ah a pawm thei meuh maw?"
" sipai chu a khawm dawn in ka hria,"
" Marcus, he thil hi Zeddicus-a tih ngei ani tih hi pawm tur in ka duh che ani, ka ring sual lo, chuvangin buaina ah kan in hnuk lut leh dawn a, chhiatna nasa tak chu a thleng leh ngei ang,"
" ni e, Hestia, i rin dan ang tho hi kei pawh in a ka rin dan chu ani alawm, Veil ațanga rawn chhuak sakawlh emaw thil dang hmuhchhuah dang in nei tawh reng reng em?"
" kan thlen hma deuh, ngaw kan chhuah lai vel khan ramsa nge zawng lampang chi zawk, hmelchhe deuh leh rapthlak zet mai, Ghoul (mitthi ruang ei thintu ramhuai chikhat. CR) niin ka hria a, te reuh te te panga bawr vel chu an rawn chhuak lai kan hmu a, mahse kan thlen hma in ngaw chhung, hmar lam ah sawn chak tak mai hian an vak lut ta anih kha, kan umzui na a mahse kan hmu zo chuang lo, chunglo chu adang hmuh belh kan la nei lo,"
" anih tak chu, in lo hah tawh awm si a, engtia han tih zui hi nge chi ang?"
" Bersin- khua chu kulh nei an ni a, sipai leh ralthuam pawh an ngah a, ngaihtuah awm lutuk ah dah lo ila, mahse Nothland- khua te hi chu kan buaipui tel ve angai dawn ani,"
" Hestia, i remruatna ang ang in kan kal mai dawn nia, han ngaihtuah dan tur pawh ka thiam meuh lo ani,"
" chuti em ni ni dawn, a va zahthlak in a va lawmawm ngai ve,"
" General ini a, i ho te chu i thupek nghak in an awm mek ani, Nothland bak ah Eastland te tan pawn a hlauhawm thei viau chuan ka ring a,"
" ni e, chu chu ka lo ngaihtuah mek a, Verna- khua hi chuan kulh neilo mahse sipai an ngah a, chuvangin khaw te zawk te țanpui tur in kan ngen angai ang, tuna Veil- in hawng hi hmun dang ah a in hawn belh lo hram tur ah ngai ila, tun ami hi kawng bik nei ang maiin ngil tak in a kal mek chu ani a, hetiang anih reng dawn chuan kan tan a awlsam phah dawn a,"
" General Hestia, i remruatna chu a țha hle mai, anih chuan Albina leh Delain- chu General Klent keh Captain Aetes-a te kut ah dah ila, chuan Lal Hinarul-a hi a sipai țhenkhat te min pui tur in ngen ila, chuan Bersin pawh Kulh nei khua tho an ni a, an Lal kan biak a sipai leh ralthuam tlem azawng min pui tur a kan ngen tel ve chuan tunah rih chuan kan in deih thei mai rih ang,"
" a țha khawp ang chu, Mahse Bersin Lal Ixion-a hi biak a har deuh mai thei a, chuvangin Lal Hinarul- hi biak tir ila a fuh ka ring zawk mah asin, hman deuh ațng khan sumdawn na lamah an in tițha viau mai a,"
" ni e, i thu ang chuan ni rawh se, keini pawh hi kan hmanhmawh chu angai tawh ani, hei khua pawh a thim ani mai a, helai ațang ringawt chuan engmah kan ti thei dawn chuang silo,"
chutia an titi lai chuan khawthlang lamah ni pawh chu a lo liam ve mek a, khua pawh a thim deuh thet thet tawh a, mahse an bul lawk a Veil- in hawng ațanga mei lo alh chhuak hlup hlup avang chuan an awmna erawh chu a êng deuh uarh a.
Chutah Marcus vek chuan,
" Hestia, khaw lam ah chuan i kir leh phawt mai teh ang u, Lal Hinarul-a sipai te pawh kan buaipui angai mai thei ani," a ti a.
Chutichuan an sakawr ah chuan an lawn ta sap sap a, chak tak a khalh in anlo kalna Verna-khaw lam pan chuan an tlan kir leh ta a....
..(end chapter 10)..
Comments
Post a Comment