An hmel leh thirkawr la hak dan ah chuan an tlaivar tih a chiang khawp mai,
A awmhmun kawrfual ha chung hian an bulah chuan ava țhu phei ve a,
General Thot-a chuan Marcus-a melh pah hian,
" zanin tlai ah Eastland- lamah kan chhuak dawn emaw ni kan lo ti deuh a," a lo ti var a, Hestia- chuan lo tuihnih in,
" Ni e, General Thot-a leh sipai țhenkhat hi lova kal hmasa se tiin kanlo rel deuh a, a chhan chu Eastland-ah sipai an tlem si a, enge maw pawh lo tawk thut se, saw ti ringawt chuan an buai viau ang," a lo ti ve a.
Uain thlit ve pah chuan Marcus-a chuan,
" ni e, in remruat dan ang ang kha ani mai, rem dang han ruat dan vak tur pawh awm in ka hre lo," a ti a.
Chutianga an ti ti lai chuan putar pakhat, kawr fual rawng thim lam ha hi chu puanin ah chuan alo lut nawlh a, a lo lut kan ti takna a, alo lang hlawl ti ila, a dik zawk mai thei.
Puan in kawngkhar bulah chuan a ding reng a, chutia khawilam mi nge tih pawh hriatloh rawn lang thut ta chu mak tih hmel tak hian anlo en deuh țhup a.
Engmah sawina chang pawh an hre lo.
Chutah chu putar chuan a mal te te hian in chhunga awm ho chu an melh diat diat a.Marcus-a chu a melh ta reng a.
Marcus-a la melh reng pah chuan chu putar chu alo phei zel a, General ho te chuan mak an tih hmel in a chet dan chu ngawi reng hian an lo en ringawt a, khap emaw biak emaw pawh an tum hran lo.
Marcus-a bul alo thlen chuan uar fahran a chibai buk in a lu chung ah chuan kut an nghat a,
" He khua ațanga hnaite, Lycian- khua a awm ka ni a, chu chu Puithiam ho awmna leh Pathian ropui ber Zeus-a Temple awmna, serh leh sang khawihna ani.
Delphi zawlneiina alo hrilhlawk thu hrilh tur che in ka lo kal ani, Delphi zawlnei chuan, he indona hi nangmah chauh in iti tawp thei ani tih apuang a, chuan underworld veil ațanga Dragon lu sawm nei lo chhuak tihhlum nan chuan Excalibur chemte i hman ngei ngei a ngai bawk, chumi hmanglo chuan i that thei ngailo vang,"
Chutah mak tih hmel tak hian Marcus-a chuan,
" ka pu, chumi chu khawi hmun a awm nge anih? khawngaih min min hrilh thei em?" a ti a.
Chu putar vek chuan,
" Greek- ram ațanga hnai te ah a awm a, i kal ang a, Lal ropui leh thiltithei, Camelot khaw Lal Arthur Pendragon-i hmu dawn nia, chu chuan a awmna alo hrilh thei ang che," a ti a, chutia a sawi zawh chuan chhuah leh nghal tum in a in her vut a, Marcus-a chu a țhutna ațang chuan rang tak a thovin, chu putar hnenah ah chuan thil sawi tum ni awm tak in an ang zuau a, mahse a sawi hma chuan chu putar chu a ding leh thut a, rawn hawi let tawh chuang lo hian,
" Ram hla tak anih avangin i kal vat angai ang, helai hmun hi a rang thei ang berin chhuahsan la, Athens- khua ah kal la, chutah chuan Finna Pathiannu Athena-i biakna hmun 'Temple Of Parthenon' a awm a, chu mi temple ah chuan i riak dawn nia, chuan i thil tih tur leh i kal dan tur chu Pathiannu zahawm chuan alo hrilh ngei ang che," a ti a, chutia a sawi zawh chuan rang tak in a kal a, kawngkhar bul a thlen chuan boruak ah chuan a thamral ta daih a.
Chutiang thu mak tak chuan a țhawng hlawm hle a, an in en hrek hrek hlawm a,
chutah Marcus-a chuan,
" eng thu nge ni ta ngai le? Ka van hrethiam lo tak em?"
ama hriat tawk lek hian zawi sep hian a ti a.
Chutia Marcus-a ding reng chu hrilhhai hmel tak hian an en ho hlawm a, chutah Hestia chuan muang ban chap hian,
" eng thil nge ni? Excalibur- chemte maw?" a ti niah niah a.
Engemaw ngaihtuah run chung hian muangchang hian Marcus-a chu a țhu leh ruai ruai a.
" a chanchin chu ka hre tawh țhin, thil awm tak tak thei tur ah ka lo ngai ngailova," tiin General Menelaus-a chuan zawi fahran hian alo ti ve bawk a.
Hestia- chuan Menelaus-a thusawi chu hriat chian chak hmel zet hian,
" i hre tawh țhin a maw? Han sawi chiang deuh teh?" a lo ti var a.
Chutah Menelaus-a chuan,
" ni e, kei chuan atak tak a awm thei tur ah ka lo ngai ngailo va, Excalibur chemte chu dawithiam tak ina asiam ani a, Dragon- thawk khum leh dawi chak tak a thuam niin, thiltihtheihna mak tak anei bawk anti a, chuan Camelot Lal Arthur Pendragon-a ta niin an sawi bawk a, chanchin engemaw chu a nei nual a, mahse chiang tak a han sawi mai tur zawng ka hre hauh lo mai," a ti a.
Chu a thusawi chu Hestia chuan ngaihnawm a tih hmel hle a, mak atih hmel hle bawk tih a mit meng ațang chuan a hriat hle bawk.
" ka hre ve deuh tawh țhin a, mahse sawi tur chu ka hre ve chuang lo, thil mak tak zawng ani," tiin Hestia chuan a chhang a.
" engpawh nise Athens- ah chuan ikal phawt mai ava țha em, Camelot chu ram hla tak ani sia, ni engemaw zah kal ani ngei dawn a, chuvangin zanin tlaiah emaw naktuk zing lamah emaw i chhuah mai angai dawn ani," tiin General Thot-a chuan Marcus-a chu a lo ti a.
Chutah Marcus-a chuan in ngaihtuah run run chung hian,
" ni e, zanin tlaiah chhuak mai ila a that ka ring," a ti zawi sap a.
Hestia chuan,
" engpawh ni se, Eastland ah pawh chuan kan chhuah ngei chu angai dawn bawk a," an tih chuan,
" naktuk zing khawvar rualin sipai țhenkhat hruaiin ka lo va kal hmasa ang a, chanchin chu kan in hrilh leh zel mai dawn nia," tiin General Thot-a chuan Hestia- thusawi chu a rawn sawi chhunzawm a, a țhutna ațang chuan thovin,
" kan in hmu leh dawn nia," an tih zawm leh zat a, puanin chu a chhuahsan zui ta daih a.
Chutia General Thot- ana a chhuahsan hnu chuan General Menelaus-a chuan,
" Eastland lama General Thot-a chhuah dawn chuan sipai ho pawh kan rem fel viau angai dawn ani, underworld veil mawlh mai hi, kan in ven țhat viau angai ang," a ti a.
Hestia chuan,
" ni e, tlemte han hruai tir chi ngawt lah ani silo va, Verna- sipai ho zawng hi hruai mai se a țha ang, General Ajax- a khan sipai a ngahlo em mai a," tiin alo sawi zawm a.
Muangchang hian no khat pum hian Uain chu a thli chhuak a, Hestia leh Menelaus-a te titi ngaihthlak pah chuan tlemte te hian a lem sek sek a.
Hestia- lam hawi in,
" zanin tlai ah Athens- lam pan chuan ka chhuak phawt ang a, rei loh hram ka tum dawn nia, Zeddicus-a te rawn thawhchhuah hma ngeiin lo thlen leh hman ka lo tum ang," a ti a.
Marcus-a thusawi pawm niawm tak chuan General Menelaus-a chu a bu nghauh nghauh a.
" Ni e, hmanhmawh tluk chu a awm chuang lova, mahse duhai chuan i thang rei mai thei ani, hmun hla tak ani si a," alo tih chhunzawm a.
Hestia- pawh chuan,
" i lo kir leh hman em ang chu, a hrim hrim in Zeddicus-a te an rawn thawhchhuah hma hian sipai pawh kan in chah belh angai maithei ani," alo ti ve bawk a.
Eng eng emaw sawiin an titi zui luam a, Hestia chuan dâr thlengkum hian theirah chi hrang hrang hi a la a, chu chu uain nen chuan hmeh in rui hnawk khawp in an in chiam a,
chumi hnu chuan Menelaus-a leh Hestia- chuan Marcus-a chu an chhuahsan ta a.
Marcus-a pawh a in hnem bawk a, a rui ang reng khawp mai, muangchanga tho vin a in silfai a, chutah a mutbu ah chuan a let tawp a, a muhil zui ta nghal a.
Marcus-a mut hnu lawk chuan Hestia chu puanin ah chuan a rawn lut leh a, ani pawh chu a ruih hmel khawp mai, muangchang in a thirkawr chu a phelh malh malh a, a hriamhrei te chu dah țha in, a lu a ti huh thuak thuak a, dawhkan a grep rahbawr khat chu la in a chhuak leh ta nghal daih a.
Marcus-a mu pawh chu tlailam ah chuan lu nat hmel deuh hian alo tho bur bur a.
Mahse Hestia- pawh chu alo la kir leh chuang lo, puanin kawngkhar ațang chuan pawn lam chu an bih thuak thuak a, kawlah chuan ni alo liam tep tawh a, General Thot-a zui tur sipai te pawh a piah deuh ah chuan in peih at hian anlo ding khawm ruih tawh a.
Reife a en vung vung hnu chuan engemaw hrechhuak thut ni awm tak hian a phu zuk a, inchhung lam ah chuan rang deuh hian alut ta vat a..
Hmanhmawh deuh hian a in silfai sawk sawk a, a lu pawh chu ti huh in a in thing harh ang nawk nawk a.
A ralthuam dahna lamah a phei a, ngawi rengin a kawrfual chu a phelh a, kawr hnuai a ha a, a chungah chuan a awmphaw, dâr țha mi leh rangkachak a siam chu a inbel a, chutah a bân tuamna savun chu a hreng leh mawlh mawlh a, a ngal kawr pawh chu hreng leh in reife a thlek vang vang hnu chuan a ngunhnam nalh tak pawh chu a khêl ah chuan a pai leh a.
Chutah an tukțhuan eina dawhkan chu pan in savun ip a uain chu rangkachak no tle vât chanve vel hian a thli chhuak a, lemkhat vel lek lem in, chhuat ah chuan tlem a leihbaw zeuh a, vanlam hawi a maimitchhing in a phun nuah nuah a.
Hmun hla tak a a kal dawn avangin, Pathian chungnungber Zeus-a fapa leh a thuchah keng tu, Rom ho in a Mercuri- ti a a hming anlo phuah a, anlo biak ve, zin mi te leh natna tidamtu Thi theilo Pathian Hermes-a hnena hnenah a țawngțai ani ngei ang.( no a uain tlem an leihbuak țhin hi greek ho ten a an pathian an zahna leh an biakna chikhat ani. CR)
Chutia a țawngțai zawh chuan Peleus-a fapa, pasaltha huaisen Achilles-a ta a chhawm, a awmphaw leh a thir lukhum chu a la a, puanin chu a chhuahsan ta nghal a.
Pawnah chuan Hestia leh General dangte pawh chu anlo awm kim hle a, puanin kawt a sipai pakhat lo ding chu a sakawr la tur in a tir nghal a.
General Thot-a chu a sakawr chunga chuangin sipai ho hma ah chuan alo ding mek a,
Chutah Marcus-a a rawn hmuh chuan rawn pan hnaiin,
" kan kal țep e, hmanhmawh angai si a, zanin tlai hian kan chhuak mai ang, nang pawh tunah chhuah nghal itum amaw?" a ti a.
Marcus-a chuan,
" Athens-ah kal phawt angai dawn a, chuvangin ka chhuak ve nghal mai ang," tiin a chhang a, chutah a sakawr pawh chu sipai chuan alo kai phei a, Marcus-a chuan lo pan vat in, rang takin a zuang lawn a.
Hestia leh Menelaus-a pawh chuan Marcus-a chu rawn pan hnai in, Hestia- chuan,
" tluang tak in ikal dawn nia, chanchin chu a theih ang ang in in hrilh zel kan tum dawn nia," a ti a, General Menelaus-a pawh chuan,
" Pathian te chuan vengin awmpui zel che rawh se, dam tak a ilo kir leh theih nan Zeus-a hnenah kan lo dil ange," tiin mal a sawm ve bawk a.
Kal tum a a sakawr a kawih her lai chuan General Thot-a chuan,
" engpawh ni se, hnehna chu kan chang ngei ang tih hi ka ring tlat ani," a lo ti ve bawk a, mahse Marcus-a chuan a chhang lem lo, Hestia- lam chu a hawi daih a,
" ka lo kir leh hma a Zeddicus-a te an rawn thawh chhuah chuan hla deuh hlek mahse Mount Hepnos-ah kal in Neira-te inlo han ko mai dawn nia, lo kir leh vat ka tum dawn nia," tiin Hestia chu a hrilh a.
Thudang an sawi leh hma chuan a sakawr chu a vaw tlan a, sipai ho te chuan kawng anlo kian sap sap hlawm a, chutah chak tak a a sakawr chu khalh in Phyra khua chu a tlan chhuahsan ta a.
General ho te bak ah sipai ho te pawh chuan Marcus-a tlan chhuak ta chu ngawi reng hian an thlir țhup a, ngaw chhung a a tlan luh thleng chuan an en zui reng a.
Chutia Marcus-a tlan liam hnu lawk chuan General Thot- a leh a ho te pawh chu Eastland khaw lam pan chuan an chhuak ve leh ta a.
Marcus-an a khua a chhuahsan lai khan ni a tla țep tawh a.
Hmanhmawh a tlan ani bawk a, a tlan chak kher mai, Ni a tlak ațanga dâr chanve emaw vel ah chuan a thleng hla tawh hle a, an hawi let a, achhuahsan tak Phyra- khua chu hla tak ah hian a êng sep sep a, chutah a rum nghut a, chak tak in hmalam pan chuan a tlan leh ta vawn vawn a.
Zankhua in chawl lo vin a tlan char char a, zing khawvar dawn, leilung a lang thei ta maw tih vel ah chuan thingtlang khaw tereuh te Helosa- khua a lut der tawh a, a khua a te na in sipai an lo tam hle a, a la hma em avangin khawchhung mi hmuh tur pawh anla awm lo, ralveng sipai rualkhat hian anlo tiding a,
an zinga pakhat chuan,
" tunge inih? Khawi ațanga lo kal nge inih a, khawi lam a kal tur nge inih?" thupe aw deuh tak mai hian alo ti a.
Ani zankhua a tlan chau tawh leh hmanhmawh tawh bawk si chuan vin aw deuh lek lek hian,
" tunge ka nih min zawt a maw? Baculla Lal fapa Marcus Valerious-ka ni e, Phyra- ațanga lo kal ka ni a, Athens- khua ah ka kal dawn," a ti chhum hmuk a.
Chutah an zinga pakhat chuan maktih hmel tak hian,
" Marcus-a maw? Witch of Isle hneh tu kha ini ti raw? Ramsa kawlh Chimera (chimera hi Delain khua a athah kha ani, sakeibaknei ang deuh, lu pahnih nei kha. CR) that tu kha," a lo ti hluai a,
chhan pawh a chhang zui lo, a sakawr chu a vaw tlan lehnghal a.
Chung sipai ho te chuan mak an tih hmel kher mai, dan pawh an tum lo, Marcus-a tlan chu an thlir zui a, enge maw ni hi an sawi zui sep sep hlawm a.
Chu khua Helosa- ah chuan chawlh pawh a chawl lo, khaw chhung ah chuan lut in a tlan tlang a, Athens- lam pan chuan chak tak in a tlan leh ta a.
Chutia Helosa- khua a tlan pelh hnu chuan ram palaileng ah hian a tlan leh ta char char a, fehrehsan bawr vel ah chuan kawrte pakhat hi a thleng hlawl mai a,
hmanhmawh tak in sakawr ațang chuan a chhuk a, tui chu duh thawh tak mai hian a dâwt hrâwk hrâwk a, a duh tawk angah hnu chuan a in sil dai a, a sakawr pawh chu in tir ve in, sakawr chunga a dah a savun ip chu ala thla a, chuan chu kawrte sir a lung phek hlai tak chunga țhu chung chuan chu ip a a theirah leh a uain tlem pai chu eiin a in sawk sawk a.
Reivak lo chutia in hnawhpuar a a chawlh hahdam hnu chuan a tho va, sakawr chunga chuang leh in chak tak in hmalam pan chuan a tlan leh ta a.
Rei vak lo ah chuan ngaw pik tak chhung ah hian a tlan lut a, hahdam thlak a tih hmel hle mai.
Thingkung sâng leh buk tak tak hlir ani a, chuvang chuan ni pawh in a chhun tlang țha thei lo.
Chuvang ringawt pawh chuan hahdam thlak a ti a, a sakawr pawh chu a harhvang sawt in a hriat.
Mahse a tlan thui tial tial a, chu ngaw hmun pawh chu a veng ve tial tial a, reilo te an ram kawng, feh kawng kan tih ang deuh hi a pawh ta nawlh a, chuan chumi kawng chu a zawh zui leh ta zel a,
Niin a vanlai zawl a thlen hun lai vel chuan chu ngaw hmun zau tak chu a tlan chhuahsan ve mek bawk a, a sakawr chu tiding in a hmalam chu a thlir dauh dauh a, tuna a kawng zawh lai mek ina a pawh ni awm tak hian hla deuh tak ah chuan khaw pakhat hi ngaw kar ah hian alo lang veu veu a.
Chutah a rum nghut a, a sakawr chu a tlan tir leh ta a, chutia a kawng hmuh chhuah zawh a reife a tlan hnu chuan sakawr tawlailir, sakawr pahnih in a an hnuh hi amah tawk zawng chuan alo tlan a,
chu sakawr tawlailir ah chuan putar pui pakhat leh mipa naupang pahnih, kum sarih bawr vel tur hi anlo chuang a, chutia anlo tlan zel a, a bul an rawn thlen chuan Marcus-a chuan a ban alo vai a, chutia sipai thuam a in thuam tlangval in a ban alo phar a hmuh chuan tawlailir khalhtu putar pawh chuan a sakawr te chu a din tir a,
Marcus-a chuan pan hnaiin,
" khawngaihin ka lo tibuai lawk che u, sawlai a khaw hming saw min hrilh thei em?" in thlahrun hmel deuh tak hian an ti a.
chu putar chuan,
" Illion- khua anih saw, khawilam ațangin nge?" a ti a.
Marcus-a chuan,
" Phyra- khua ațangin, Athens-ah ka kal dawn a, mahse kawng ka bo tlat in ka hria," a ti leh a.
" tlan zel ta la, khaw luh dawn țep ah sawn kawng pengțhuam pathum alo awm anga, a lo hnai ber chhim lam panna kha i zawh dawn nia," tiin putar chuan maktih hmel taka Marcus-a en chung hian a chhang a.
" chhim lam pan zel in ngil tak in i kal anga, khaw lo hmasa ber kha Athens- khua chu ani ang," a tih chhunzawm lehnghal a.
" ka lawm lutuk e," ti a Marcus-a chuan chhangin, a sakawr chu a vaw tlan zui lehnghal a.
Naupang pahnih te chuan mak tih hmel tak hian an thlir zui vawng vawng a.
Chu putar sawi ang ngei chuan kawng pengțhuam chu a va hmu ta ngei a, chutah chhim lam panna kawng chu zawh in a tlan leh ta char char a.
Kawng pawh chu alo țha in a zau a, a tlan thui telh telh a a țha telh telh lehnghal.
Chutiang chuan chak tak in a tlan zel a, chawhnu her vel ah chuan a hma lawk ah chuan Athens- khawpui ropui tak mai chu alo lang ta uarh mai a.
Khawdai vel ah pawh chuan mi anlo tam hle a, ran rual veng lah an tam.
A tlan tlang zel a, khaw chhung a luh meuh chuan a rin aiin alo ropui ani ngei ang, a hawikual ve nasa hle mai.
Verna- khua kha a ropui in a changkang hle na a, mahse Athens- khua zawng a la tluk lo nasa hle in ahriat.
Chutianga tlan pah a hmuhnawm tih hmel tak a a hawi kual vel lai chuan khaw hmâr lam deuh ah hian Athens- khua dintu Finna Pathiannu Athena-i temple chu ropui tak hian a ding luah a, a awmna chu a fâl in, in pawh a bul vel ah chuan a awm lo, tlang bâwk chung ah hian a ding luah mai a.
a sakawr chu kuai her in temple lam pan chuan a tlan tir leh ta a.
A kawng chu a reh ang reng hle a, thlaler hnim buk hi kawng sir ah chuan a ding pheuh pheuh a, chumilo chu hnim dang țo hmuh tur pawh a awmlo.
Engemaw chen chutia atlan hnu chuan Parthenon temple thlen hma, hmar lam deuh ah hian Mei leh hmanraw siam thiam Pathian,
Trojan leh Greek ho indo lai a, Pasaltha Achilles-a, Xanthus lui leh a bula lui pahnih Pathian ten a an beih rawn lai a rawn chhan tu leh Achilles-a hmanrua siamsak tu, hmangaihna Pathiannu hmeltha Aphrodite-i pasal ni bawk Hephaestus-a temple chu a ding luah mai bawk a, chungte chu hmuhnawm tih hmel deuh hian a thlir vang vang bawk a, chutah a a tlan zel a, Athena-i temple Parthenon- hnung lam chhim lampang ah chuan Uain țhatna Pathian Dionysus-a biakna temple a ding luah mai bawk a.
Fan ngailoh fang ani bawk a, hmuhnawm a tiin a hawi nasa ve hle mai.
Chutianga tlan pah a a hawikual vu vu lai chuan Parthenon temple kawtkai chu a thleng ta der mai a,
a tual vel ah chuan thingkung siam chawp ni mai awm a mak leh lian tak tak te, pangpar chi hrang hrang, mawi tak tak mai te chu a khat luk a, mihring pawh tlemte chu an lo awm bawk a.
Athena-i hnena inthawina hlan niawm tak tak te hi temple ațang chuan an rawn chhuak leh zauh zauh țhin bawk a.
A sakawr ațang chuan a chhuk vat a, chutih lai chuan amah thlir reng tu putar deuh pakhat hian rawn pan hnaiin, enge a duh tih te leh alo kalna khua te a zawt luam a.
Eng eng emaw sawi a an titi luam hnu chuan chu putar chuan Marcus-a sakawr chu a kai a, temple sir lam ah chuan pheiin, a kalbo ta daih a.
Chutah Marcus-a chu Temple panna kailawn ah chuan muang fahran hian a chho ve ta chhut chhut a,
temple panna kailawn hi a zau țha hle a, a thui ang reng viau bawk a,
chutah temple chhungah chuan țit hmel tak hian a lut a, a hawikual vel ruai reng mai bawk a.
Chu temple chhungah chuan Lung maicham, a bik liau liau a chher ni awm tak hi alo ding luah a, chutah Maicham chung chu alo la khu vung vung bawk a,
a lut thûk zel a, Maicham hma zawnah chuan hrilhhai hmel tak hian a ding a.
" tlangval, Thi theilo Pathiannu hnenah inthawina i hlan dawn em ni?"
a hnunglam ațanga aw lo chhuak chuan a ti phu nasa kher mai,
rang tak in a lehhawi a.
Ahnung lawk ah chuan puithiam kawrfual, rawng thim lam ha putar lukawlh tul mai hi alo ding reng a.
" Marcus Valerious, Baculla Lal Alpheus-a fapa ka ni e," tiin chu putar lam hawi chuan a țawngchhuak a.
chu putar chuan,
" Delphi zawlneiin a a hrilhlawkna kha ihria em?" ringhlel hmel deuh hian an ti a.
Marcus-a chuan,
" aw hria e, Pathian ten he hun lo thleng tur atan hian tihtur min buatsaih sak ani," tiin a chhang leh a.
Chutih lai chuan Temple chhungah chuan mupui lian tak, rangkachak rawng nalh tak mai hi a lo thlawk lut a, temple chhung ah chuan a thlawk kual duai duai a, a mit lunghlu sen anga sen chu a tle leh zauh țhin a,
Maicham chung a inthawina mei, van lam hawi a la khu chho ruai ruai chu a thlawh hual pup pup a, reilo te an meikhu kar ah chuan a thamral ta daih a.
( he mupui hi Pathian ropui ber Zeus-a lalțhuthleng ding lam ah a fu vang țhin a, Zeus-a chhinchhiahna ani a. Vanneihna thlen tir tu emaw, Zeus-a hriatpuina leh engemaw Zeus-a hnena thil an dil in, alo chhang ngei tih lantir nan Zeus-a hian Olympian tlang ațangin a mupui hi a rawn tir țhin ani. CR)
Chu mupui chu an pahnih chuan ngun tak mai hian an thlir dun a,
a maicham meikhu kâra a thamral tak daih hnu chuan, chu putar chu a rum nghut a, ngaihsan hmel tak hian Marcus-a chu a thlek vang vang a,
" Pasalțha Achilles-an Troy Lal fapa Hector-a a thah khan a ruang kha Greek ho riahbuk ah sakawr tawlailir in a hnuk haw daih a, Hector-a pa Lal Priam-a chuan a fapa ruang chu Achilles-an a pek let leh theih nan Zeus-a hnenah a dil a,
Zeus-a chuan chhangin, a thuchah kengtu chhimbal Pathiannu Iris-i chu Priam a hnenah chuan a tir a, Iris-i chuan Zeus-a thupek angin ngaihngam tak in awm rawh, Achilles-a chuan i fapa ruang chu a pe let leh dawn che, chuvangin tho la tunah hian va kal rawh tiin a zuk hrilh a, chutah chu a thusawi nemngheh nan Zeus-a chuan he a mupui hi Troy khua ah chuan zuk tir in, Lal Priam-a kut dinglam ah chuan a zu fu a, chutah chuan Priam a pawh chuan Zeus-an a remti ngei ani tih hria in ngaihngam takin Greek ho riahbuk lam ah chuan a fapa tlanna tur puan chi hrang hrang sawmpahnih, la suk ngai miahloh te, rangkachak buk sawm te, bel lian te, chawhtawlh te, Thracian- hovin an pek rangkachak zu no ropui te keng in a kal a, chutah hlawhtling takin a fapa ruang chu a va lalet leh a, chubak ah Achilles-ana a man, thi tawh a an ngaih a fanu Briseis-i pawh Achilles-a chuan alo pe kir leh anih kha, chu mi chu Lyrnessus Lal Mynes-a Apollo-a temple a puithiam ni bawk nupui ani a, chu chu Troy khaw bul lawk a awm, Achilles-a leh a ho Myrmidon ten a an chhutchhiat tak, Apollo-a puithiam te chenna, temple thianghlim awmna leh serh leh sang an sawngbawlna khawpui kha ani.
Chuvangin tunah ngei khan Zeus-a chuan a chhinchhiahna mupui a rawn tir a, nangmah ngei hi ini Pathian tena an lo hual lawk leh Delphi zawlneiin a alo puanlawkna chu ini tih ka hre ta," tiin an sawi duah a.
Chutah Marcus-a chuan,
" Ka lo kal hma khan Lycian- khua a awm, Zeus-a puithiam pakhat in min rawn tlawh a, Delphi zawlneiin a a thu puanlawk chu min lo hrilh a, Athena-i temple ah riak la, i mamawh chu Pathiannu zahawm chuan a pe ang che min ti ani," a ti a,
chu Puithiam chuan,
" Pathiannu chuan malsawm mawlh che rawh se, min lo zui la, i eiin i in ang a, i chawl hahdam dawn nia," a ti a.
Temple hnunglam ah chuan inzui pheiin pindan dang ah hian an lut ta daih a.
..............
Chumi zân chuan Marcus-a chu Athena-i maicham hma ah chuan a riak a, A mumang ah chuan Pathiannu Athena-i chuan sakawr lakam rangkachaka siam a pe a, " i ram in a mamawh che a, chuvangin i kalna tur hmun i thlen vat theih nan sakawr thla nei, Pegasus i man ngei angai ani, naktuk ah ramhnuai ah kal la, Pegasus i man hunah ka thil pek che hmang hian i duh duhin i thunun thei tawh ang," tiin Pegasus man dan tur chu a hrilh a. Pegasus hi sakawr thla nei, sakawr chak tak leh sâwi hmin rual lohva kawlh ani a. Hmanlai kum tam tak kal ta khan Greek ram ah chuan nula hmelțha tak mai Medusa-i a awm a, a hmelțhat zia chu Greek ram mai ni lo khawvel ram dangah te hial a thang chhuak a, Medusa-i neih tum chuan Ram hrang hrang ațangin Lal fapa leh mi hausa tak tak te anlo kal a, Tin, Greek ram lal fapa te pawh in an rim huai huai reng bawk a, Mahse Medusa-i chuan tumah nei duh lovin Finna Pathiannu Athena-i tan a in serh hrang ta daih a, Athens-ah kal in Athena-i puithiam ni tur in Parthenon ah chuan a cheng ve ta a. Mahse a hmelțhat em avangin Pathiannu Athena-i chuan a îtsik a, chutih lai chuan Tuipui Pathian leh lei tinghingtu Poseidon-a chuan Medusa-i chu alo ngaizawng ve em em bawk a. Chutah Athena-i leh Poseidon-a chuan remruat dun in, Medusa-i chu Poseidon-a chuan a zui ru a, remchang la in Athena-i maicham hma ah chuan Medusa-i chu a sual lui ta a. Chu thil thleng chu Athena-ina alo hriat chuan Ka temple i ti bawrhbang tiin anchhia a lawh a, Medusa-i sam, rangkachak rawng mawi tak chu rul tamtak ang ah a tih chan sak a, a hmel mawi tak te chu ramhuai hmel rapthlak tak ah a chantir bawk a, tin anchhe rapthlak ber mai, tupawh ina a hmel an en apiang in leh mi a en apiang lunga chang nghal thei tur in a dawi bawk a. Chumai pawh ala duh tawk lo, kumkhua a thihna ramhuai thlarau Gordon- nena cheng ho tur in Temple Of Didyma ah dah in mitthi khaw Gate- a ven tir a. Poseidon-an a Medusa-i a sual hian Medusa-i chu a rai a, Pasalțha Chrysaor-a leh sakawr thla nei Pegasus hi a hring ta ani. Pegasus- hi Zeus-a leh Lal fanu Danne-i te fapa Mi huaisen Perseus- an Medusa-i thah nan hian a lo hmang tawh bawk a, tin Corinth Lal Glaucus-a nupui leh Poseidon-a fapa pasaltha Bellerophon-an Lycia ram a sakawlh rapthlak tak Chimera thah nan alo hmang tawh bawk ani. Zînga a han harh chuan a bulah chuan rangkachak sakawr lakam chu alo awm reng a. Tichuan chu sakawr lakam chu ala vat a, Pegasus- man tum chuan chhuah a tum ta nghal a. A in siam mawlh mawlh lai chuan a hma ni a a hmuh puithiam lukawlh kha alo kal a, " Pathiannu chuan malsawm che rawh se," a rawn ti a. Chutah chu putar vek chuan, " Pegasus- man tur in Pathiannu chuan a hrilh che ani maw? A awmna țhin i hria em?" tiin a zawt a. " Hre lo," tiin bul nghut hian Marcus-a chuan a chhang a. Chutah chu puithiam chuan, " Pegasus chu helai hmun ațanga hnaite, Mount Helicon-ah a awm țhin a, chu chu helai hmun ațanga hmar lam ah sawn ani, chumi hmun ah chuan i kal ang a, tui khawthla ropui tak Hippocrene i han zawng dawn nia, chumi bulah chuan i hmuh ngei ka beisei," a ti a. Chutah chu putar chuan mal an sawm leh te te a, " i lo kir leh dawn loh chuan mi hruai la, i sakawr hi ka lo hruai kir leh dawn nia, țha tak in kan lo enkawl ang e," a tih chhunzawm leh a, Marcus-a pawh chuan lawmthu an hrilh luam a, chutah hmanhmawh tak in a chhuahsan ta a. Puithiam chhiahhlawh tleirawl tê hian Marcus-a chu a zui a, tichuan Mount Helicon lam pan chuan an chhuak dun ta a. Hetia an chhuah hun lai hian khua ala var chianglo deuh a, leilung chu a lang țan tawh a. Marcus-a chu a hmanhmawh hle na a, a mi hruai pa sakawr chu a chak em em loh avangin an kal sawt em em thei lo. A chângin Marcus-a chuan an kalna tur lam kawng chu an zawt a, chutah a tlansan leh daih țhin a, mahse kawng chin a hriatloh avangin a lo nghak leh nge nge țhin. Tukțhuan ei hun bawr vel ah chuan Mount Helicon bulțhut chu an thleng der tawh a, a tlang chu a sangin tlang chhip chu chhum in a bawh luau a, a bulțhut vel chu a chhengchhia in kal a harsa hle a, mahse an lawn sang telh telh a, boruak pawh alo nuam in tlem chuan kal vel pawh a lo awlsam ta deuh. Mahse an kal tumna tak leh hmuh an tum na hmun ber tui khawhthla Hippocrene- hmun chu a sang hle a. Chhunlai vel ah chuan a hmun chu an thleng thei ta chauh a. Mahse an pan nghal mai lova, an han insiam țha te te a, tichuan muangchangin thawm dim tak chungin an veh phei ta a. Mahse an vanneih asiam in Hippocrene tui khawhthla bulah chuan Pegasus chu thlamuan hmel tak hian a mah chauh hian alo tla a. Marcus-a chuan ala hmuh ngailoh avangin mak a ti hle a, an pahnih chuan thing phên ațang in ka hau chung hian an thlir reng a. chu sakawr Pegasus lah chuan hlauhawm a hnai tih reng a hre lo, thlamuang tak in tui chu a dawt karh karh a, a hnungzânga a thla mawi tak chu ti pharh in a zâp vel a. Chutia thingbul lian tak phen ațanga an thlir dauh dauh lai chuan a mi hruai pa chuan zawi sep hian, " heti hian kan en reng mai dawn emni? Kan man vat angai a kalbo vaih chuan alo kir leh mai mai tawh lo ang," a ti a. Chutah, " kan sakawr te hmang hian kan man thei mial mahna," an tih chhunzawm lehnghal a. Thawm dim deuh hian an sakawr awmna lam ah chuan a phei ta țhem țhem a, chutia a mi hruaipa a kal hnu lawk chuan thil hrechhuak thut ni awm tak hian a phu zuk a, a savun ip chu a dap nghal rak rak a, hruihrual sei deuh mai hi a phawrh chhuak a, a koki ah chuan bât in muangchang hian Pegasus awmna lamah chuan a phei ta a. A rim ațangin a hria ni ngei tur ani, a hnâr chu a len ruai ruai a, a hawi kual dun dun reng mai bawk a. Reilo te ah chuan alam pan a lo kal Marcus-a chu a hmu ta. Thinrim hmel tak hian a rûm a, a thla a zap vak vak bawk a, chutah rang tak mai hian Marcus-a chu a rawn phîn phei ta thut a. Lo awm sawn hmanlo selang chuan a nêk per lawp ngei ang, mahse a lo che rang hlauh a, rang deuh hian alo per sawn dawrh a, chutah alo tlan kir leh hma chuan rang takin țanhmun a siamrem ve nghal a. A hruihrual chu hmanhmawh tak hian a phelh sawk sawk a, thinrim tak a alam pan a lo tlan phei Pegasus chu a nghawng ah tak mai hian a lo phih awk chat a, mahse a tal nasa ngei mai, a hmel ațang chuan chutia alo phihawk chu a in chhir viau ni hian alang hial(!) a ke hma pahnih chu a vâwr a, a tal vak vak a, ring tak mai hian a hram ruai ruai mai bawk a. Marcus-a chuan a chelh hnehlo kher mai, leiah chuan a phih thlu tawp a, a hnuk ta hawn hawn mai a, a vawnna hrui pawh chu a thlah phah ta hial reng a. Pegasus chu a tlan chiam a, chutah a thla ti pharh in a thlawk ta a. Chutia chhuah mai chu a tum bik aw kawng lo mai, Pegasus thlawk chhuak a hmuh rual chuan a tho vat a, hrui chu vuan leh vat in thing lianpui pakhat hi a tlan hual a, chu thing ah chuan hrui chu vet in, thing rinchhan chuan a pawt ta a. Pegasus pawh chu a thlawk mai thei bik lo, a țan ve nasat em avang in lei char ah chuan a thum thla nawlh a, chutah rang tak a thovin thlawh chhuah leh an tum a, mahse thing rinchhan a Marcus-an a a pawh hneh em avangin a thlawh chu sawi loh, a tawlh hun hun a. Theih tawp tak meuh meuh a țang ani bawk a, reilo te ah chuan chêt pawh che sawn theilo hian thingkung ah chuan a pawt bet a. Chu veleh Pathiannu pek rangkachak lakam kha a vuah sak vat a. A mi hruai pa ina a sakawr leh ama sakawr a rawn hruai chuan Marcus-a chuan Pegasus lu chu alo chul heuh heuh a, chu sakawr pawh chuan tal a tum hran tawh lo, Pathiannu ina a hrilh ang ngei chuan lakam a vuah achin chu duh ang tawk a sawizawi ang mai hian Marcus-a tih dan ang ang chuan a awm a. " a va han mak ngai em? Pathiante chauh lo chuan an thunun theilo asin?" tiin a mi hruaipa chuan mak tih hmel tak hian Marcus-a leh Pegasus chu a entawn zak zak a. Chutah Marcus-a hma ah chuan a bawkkhup a, " Pathian tu emaw ber chu ini chiah mai?" a ti ta ruai mai a. Marcus-a chuan kaitho vat in, zaidam tak mai hian. " nangmah ang bawk a mihring thithei ve tho ka ni e, Thitheilo Pathian ten a mawhphurhna min pek hi ka tih hlawhtlin theih nan mal min sawm ani ngei mai" a ti a. " ka sakawr hi hawn kir leh ta la, kei chu ka lo let ve tawhlo mai ang e, minlo enkawl sak la, i enkawl man chu ka pe leh ngei ang che," a tih zawm leh a. Chutah a hmanrua leh mamawh tur ang chu ala sawk sawk a, chuan Pegasus chungah chuan lawnkai in an thlawk chhuak ta a. Van chung sang tak mai ah chuan chak tak mai hian a thlawk chho vang vang a, a thlawhsan em avangin Marcus-a chu a thaw a chham hman hial a. Chutah tlemin a thlawk hniam leh a, tichuan hmar thlang lampang pan in a thlawk leh ta a. Van chung sang ațang chuan Athens- khawpui chu a ropui ngei mai, hetih hunlai hian Sparta tihloh ah chuan Athens- hi khawpui ropui ber ani a. Mahse Pathiante biakna temple ropui leh mawi tak tak avangin Athens- chu a lang ropui daih zawk. Ni e, Athens- khua hi Pathiannu te zinga lar leh ropui ber te zing ami, finna leh indona Pathian Athena-ina a din ani a, chutah chuan amah biakna temple lar leh ropui Parthenon temple- chu a awm bawk anih kha. ( 'Parthéna' tih chu greek țawng ania, maiden, girl, virgin, virgin woman, unmarried woman, hmeichhe pasal neilo, hmeichhe thianghlim tihna ani a. 'Naos' tih chu temple, Biakin tihna ani bawk a, chuan he thu pahnih hi lakawp in Parthenon tih an vuah a, chu chu Hmeichhe pasal neilo biakin tihna alo ni ta ani. Chuan Athena-i hi Pathiannu pasal neilo ani bawk. CR) Chuan Athena-i hi Pathian ropui ber Zeus-a leh finna leh thilsiam, zirna lam Pathiannu Metis-i te fanu ani. Athens- khawpui ah hian Pasalțha hmingthang Theseus-an ro a rel țhin a. Theseus-a chu Athens Lal Aegeus-a leh Troezen Lal Pittheus-a fanu Aethra-i te fapa ani. Chuan Theseus-a hi Minataur that tu hmingthang tak kha ani a, chu lo pawh chu thil tam tak, hmingthanna ropui tak tak a nei bawk. Minataur- chu a taksa mihring, alu bawng lu, ramsa rapthlak tak, mihring sa ei țhin kha ani. Hmanlaiin Crete Lal Minos-an Tuipui Pathian Poseidon-a hnenah bawng vâr hmangin i hnenah inthawina ka hlan ang ati a, mahse a bawng zinga țha ber chu ahlan leh duhloh avangin Poseidon- chu a thinrim a, chuan Minos-a nupui Lalnu Pasiphaë-i rilru ah chuan châkna țhalo dahsak in, chu Lal Minos-a bawng lakah chuan Lalnu chuan he ramsa Minataur- hi anei ta ani. Pegasus chu chak tak in van boruak ah chuan a thlawk a, reilo te an Greek ram ropui tak chu an chhuahsan ta a. Zan ah chuan ramhnuai ah riahbuk an sual a, buaina leh harsatna em em an tawk hran lo. Marcus-a chu a hmanhmawh em avangin zing khawvar rualin an thlawk chhuak lehnghal a. Chutianga chak tak a an thlawh zel lai chuan Chawhnu her vel tur ah chuan an hma zawn hnuai ah hian khaw ropui tak mai, kulh, lung sang tak tak in a a hual khup mai hi alo lang a, reife a chung zawn a a thlawh kual hnu chuan zawi muangin an thlawk hniam telh telh a, kulh pawn si, mi awmloh na lai deuh ah chuan an țum ta a...
(end Chapter 13).
Comments
Post a Comment