Chutianga thim chhahpui ina min tuam mek lai chuan a hma lawk a mipui hlim nui leh tawng ri ai ah chuan sakawr hmanhmawh tak a tlan leh ngunhnam in khak ri te, hah hmel tak a thaw hluam hluam ri te a rawn ri zawih zawih a, hmuh chian tum in kan thlek ngial na a engmah ka hmu thei chuang lo, eng emaw chen chutiang ka thlek vak vak hnu chuan tlem in ka hma a lemchanna dawhsan chu arawn eng deuh hlek a, mahsela engkim mai chu a paw phut ni mai hian ka hria, chhum a zing chuai a, chung chhum te chu an rawn zing chhuak a, ka awmna pindan ah te pawh an rawn chhuak hial anih chu(h).
Van chung sang tak ah chuan fiah lo ruai hian thla a eng bial kulh a, chhum dum chhah tak hian a hliah leh thin avang in chutiang em em chuan a eng hranlo, chutih lai a kar ah tiauchhum lah chu alo zing ve chuai bawk nen, a khat tawk hian thinlung dek zawk khawp a rapthlak hian chinghnia hi an u leh ruah ruah thin a chu chuan ka tiril ah min man a, ka tim sung sung mai lehnghal, tichuan fiahlo ruai chung chuan a rwn lang hnai zel a, ramhnuai pilril tak ni maiin ka hria.
Tiauchhum zing ruai kar ah chuan thir kawr, thir kawr awm a Dragon lem rangkachak rawnga inziak ha, a kawng a ngunhnam nalh tak pai leh a kut lehlam a thal chikhat (crossbow) ni maiin ka hria, keng sakawr chungchuang pahnih hi an lo lang a, eng emaw ni sawi a an phun nuah nuah lai chuan sakawr chungchuang rual khat an mahni ang tho a inthuam hi hmanhmawh deuh hian an lam pan chuan an rawn tlan a, an bulhnai an rawn thlen chuan, pakhat chuan,
" Hesiod- ahnu kan hlauh daih mai a, mahse a hliam nasa ang reng a, a dam rei vak lo maithei ani, khawi ah nge Marcus hi a awm a, in kal ho ani lawmni," tiin an zawt a. Chutah A biak pa ber chuan,
" chu zawng kan hlawhchham dawn loh chu, a kal hla theilo tawp ang, Marcus-a te chu in bulah a kal ve turah kanlo ngai asin, chhim lam a kal ho kha kan zawt tawh a, an hmu bawk silo," tiin a chhang a.
A zawt tu ngai bawk chuan," chuti anih chuan tuman akalna an hre lo anih chu, ram chinchang a hre bawk silo a, ka ngaih a tha lo khawp mai, nizan ka mumang a fuh lo em em mai lehnghal a, hetiang a nih dawn vang pawh hi ani mai thei," beidawn hmel ang reng tak hian a ti a chuai raih a.
Chutia beisei bo tak a a sawi lai chuan, lo kal thar te zinga pakhat chuan,
" lungngaihna tur a awm hleinem Hesiod, Oedipus, Marcus- te chu mahni in enkawl thei tur khawp chu ani a lawm, buk lam ah va phei phawt teh ang u, chhim lama kal ho te pawh chuan an hmu maithei asin," tiin a rwn hnem ve bawk a.
Chutia asawi rual chuan a sakawr chu a kuai her nghal a, chutah Hesiod chuan,
" Ni e, dam tak a a rawn thlen chu han ring phawt mai ila, mahse ramhnuai pilril a tla fal tur chuan ala nau deuh chu ani," an ti zui leh hram a.
Muangchang chuan a thiante ho chu a zui ve hnak hnak a, chutah a hmasa ber a kal chu a rawn hawi let zuai a,
" Hesiod i ngaihtuah lutuk anih kha, Marcus te chu pasaltha tamtak ai pawh in a pasaltha zawk asin, a kum naupan ang ngawt a en chi pawh ani tawh lo, hman deuh a kan sazuk kah thluk, sapui ina a rawn hauh ve tlat tum atang tawh khan a huaisen zia leh remhriat zia ka hre tawh a, chuvang chu ania, ka rilru pawh a hah vak loh ni," a rwn ti leh a. A sakawr chu a kuai her a, a kal lehnghal a. Chutah Hesiod antih pa bawk chuan ama hriat tawk lek hian, "Lal fapa anih na hian minti ngaihngam thei lo zawk, tawhsual zawng a tawk em lovang chu maw," ala ti niah niah a. tichuan an buk sualna lamah chuan ngui angreng tak chuan an in zui ta diah diah hlawm a, chung ngaw pik kar ah chuan thim tham ah lehnghal, an mahni pawh chu a hmuh fiah theihloh tih tawh nak alaiin lei hrul ah chuan nunna nei niawm tak hian tiauchhum a zing chuai reng a, chuvang chuan chutia an kal ta pawh chu hmuh reng tum in thlek vak vak mah ila reilo te ah an hmuh theihloh thuai a.
Chutianga hmuh chian zual tum a an kal na lam ka thlir reng lai chuan thawm dang ka hre leh ta thut mai. Mahse mihring thawm awzawng ani lo, ramhuai thawm ni maiin ka hria.
Reilo te an thawm chu afiah telh telh a, alo hnai telh telh ni ber in ka hria, a chang in mihring thinrim awka ni awm tak te hi ari leh zauh thin a, eng tak chu ni ang maw ti a ka ngaihtuah noh noh lai chuan chhum zing kar atang chuan ramsa lian deuh, dum ren run hi alo chhuak nawlh a, thinrim in a rum chhur chhur a, a mit mu lian tak, meialh ang mai a sen phut mai chu zawn nei ni awm tak in a melh rulh rulh a, sakei leh bawng thlah pawlh ang mai niin ka hria, hmul pawh anei lo, a vun chu a dum tliang hlurh a, thal mu hi a bet fur lehnghal, alu sakei lu ang tak mai ah chuan bawng ki ang zum tak mai pahnih hi a anei a, a ha lah chu a zum in a hriam hmel em em mai leh nghal, a hnar atang chuan meikhu ang hi a rawn khu chhuak dut dut a, thinrim in a hram ruai ruai mai bawk a, chu ramsa rapthlak leh mak lutuk mai, hmuhnawm ti tak a ka en lai chuan, thing lian tak hnung atang ni maiin ka hria, sakawr dum lian tak hi chu ramsa lam pan chuan chak deuh mai hian a rawn lim phei zuai a.
a chung ah chuan thir kawr, a hma a ka mi hmuh te hak ang chi deuh ha, thir lukhum dum khum, pa lian lam pang deuh hi a chuang bawk a, chu pa chuan a sakawr khalhna hrui pawh vuan chuang lo chuan a hma zawn a ramsa thinrim inhrosa chu a thal ken lai chuan a kap zawt zawt a, chu ramsa taksa hmun tin hmun tang ah chuan thal mu a bur fur tawh lehnghal, mahse na ti awm pawh in a lang lo, a tal vak vak a rapthlak deuh deuh hian a hram ruah ruah ringawt a, chu sakawr chungchuang pa chuan a tlan hual a, a thal chuan ka kap reng bawk a, mahse vawilehkhat ah chu ramsa thinur tawpkhawk chuan a mei rapthlak leh awle vun ang maia bawl hrup chuan chu sakawr chungchuang pa chu a hlap thut a
Thawklehkhat a thleng thut anih avangin insiam remna hun a awm silo a, mahse a vanneih asiam in, amah tak chu a fuh lo hlauh a, chu ramsa mei rapthlak chuan a sakawr chu a hlap fuh chiang ngei mai, a leng lawp a, tho leh tur reng a awm lo, amah pawh chu a leiah a hlawm thla tawp a, mahse hmanhmawh tak in a tho leh vat a, a ngunhnam chu rang tak mai hian a phawrh nghal vat a, mahse a inrin hman hma in chu ramsa hlauhawm chuan a rawn phin phei thut a, tlem chuan che rang lo deuh se chuan a ki zum lutuk chuan a thinnhun ah tak a chhun tlang ngei ang, nihloh pawn a ril zawng a phawrh sak ngei ang le. mahse vanneih a siam in a ki chu a bul thing kung ah chuan a bur chat a, a rawn tlanchak em avangin a ki chu a lut thuk in atang nghet hle a, a lu a hai deuh aniang, an awp deuh rup a, mahse mitkhap kar ah a ki tang phawi tum chuan an tal tak tak mai anih chu, a in hrosa hlauhawm a a hram ruai ruai reng bawk a, mahse chu chu remchang ah la in chu pa chuan a zak dawh ah tak mai a chem sei chu an vit tlum hrawk a, chu mai duh tawk lovin, a rem lai lai ah a vit mawlh mawlh bawk a, mahse a aikaih deuh nge ni alo in thlahdah deuh, chutia engdang mah ngaihtuahlo niawm tak a a vih mawlh mawlh lai chuan chu ramsa chuan a ki chu a tal phawi thut a, a mei hlauhawm tak mai chuan a hlap leng lawp a umzui nghal tur erawh chuan chakna anei tawh bik lo, mahse a thinrim chu an in sang mar vel a, muangchang hian a pan phei chhut chhut a.
Chu pa chu a mei ina
a hlap len lawp khan thing lian deuh hi ava deng dawp a, chet pawh a che hleithei lo, a lukhum pawh atla hial a, thing ngheng chuan a thu peih chang chang chauh ani, a awm chu thei leh theilo hian an khawih a, ramsa mei ina a hlapna avang chuan a thir kawr pawh chu a khuar deuh dawk a, a awm ruh chu atliak vek ni maiin a hria ani ngei ang, a thawk zawng chuan a ka atang chuan thisen a rawn chhuak nguah nguah a, chutih lai a kar ah ramsa chuan a mah chu a la rawn pan chhut chhut lehnghal, chutia a pawhsawm hun nghah ringawt ai chuan tiin an inti pa chang a, a sir hlam li vel lai a hla a awm, a chemsei chu lak ngei tum in chet sawn an tum ngial a, mahse a lu pawh chu tihchet theihloh tluk ani si, ramsa lah chuan arawn hnaih chilh tawh ropui si.
Chutih lai chuan thli hi a rawn thaw deuh vuk a, a sir lawk a a ngunhnam chu boruak ah a kang lawp a, an en zui nak chuan kut zungtang sei leh mawi tak hian a chem chu alo hum reng tawh a, thei leh theilo in a mit an nuai a, chutih lai chuan a hma lawk a ramsa chu a hram ruai ruai a, an en leh nak chuan chu ramsa chung ah chuan hmeichhia hmanlai hmeichhia tena an hak ang chi kawr var fual ha hi alo ding a, a chem sei chu ramsa lu ah chuan a lo vit bur vun mai anih chu, ramsa chu a awp rawp a, che leh tur a awm tawh lo.
Rang tak mai hian chu hmeichhia chu ramsa chung atang a rawn zuang thla in thir kawr ha pa lam pan in a rawn tlan phei a, chu pa a hma a thi ang der a let reng chu a kaih kuah a, eng emaw chen an kal hnu chuan puk dangdai zet ah hian a luhpui ta a.
Chu puk chu a luh khan hmuh har zet mai hi ani a, a chhung ah chuan lo khawsak fe tawhna ni awm tak hian bungbel, puan leh eng eng emaw hi alo awm deuh nuaih a, chu nu chuan akaihkuah pa chu puan lo in phah sa ah chuan dim deuh hian an mut tir a, a thir kawr leh pheikhawk te chu a phelh sak sawk sawk a, chu mi hnu chuan thuk lo awmsa chu dawi hla enge maw ni hi an chham khum zauh a, chu veleh alo alh nghal a, puk thim tak chu a en eng phut a, chuan chu nu chuan nikhaw hrelova let reng pa chu duat tak mai hian a hmai vel chu a chul sak a, mit la lek lo hian a thlir ngawih ngawih a, chutah a kawr kar atang chuan darthlalang bur tereuhte, a chhunga thil tui lam chi rawng pawl dal deuh mai hi a rawn la chhuak a, dim tak mai hian chu pa ka ah chuan tlem tlem in a far tir zauh zauh a. Vawi li emaw vel a far tir hnu chuan chu bur chu a kawr kar ah chuan a thun leh daih a. Chutah chu pa chu khawngaih hmel deuh hian rei tawk fe chu an thlir leh ngawih ngawih a, chumi hnu chuan muangchang hian a tho va, puk chu a chhuahsan ta daih a.
Dar chanve emaw vel lai chutia a mut reng hnu chuan chu pa chu alo harh chhuak ve ta a, a mit a puk chhung melh kual rulh rulh pah chuan muangchang hian an in dap thuak thuak a, mahse na reng alo nei tawh lo..
in thin nawk nawk pah chuan an thu chhuak a, a mutna sir lawk a rangkachak thleng kum hlui tawh tak a theirah chi hrang hrang awm chu ban in riltam hmel tak hian a keih tuam tuam a, chutia thil a ei mek lai chuan puk pawn lamah chuan sakawr pen thawm hi alo ri a, chu veleh a chemte pai ruk chu an dap nghal rawk rawk a, hman inpeih sa at in a hum nghet sauh a. Puk kawngka bul ah chiah chuan chu Sakawr thawm chu areh a, ngaihthat loh hmel taka puk kawngka awmna lam a melh reng lai chuan thawklehkhat ah chu a melhna lai tak mai, puk kawngka ah tak mai chuan hmeichhe kawrfual var ha hi alo lang thut a, mitkhap kar lek a rwn lang thut anih avangin chu damlo pa chu a phu zawk lehnghal. Chu nu lah chuan a rawn nuih ver ver lehnghal a, makti tak in ka hau hian alo en a, mit khap nachang pawh a hre lawk lo. mahse chu nula i chuan a rawn nuih avang chuan hlauhawm lo tur ah ngaiin ngaihthat hmel tak hian a chemte pawh chu a dah zui ve lehnghal mai bawk a. Chu nu chu mit la lo lek hian an thlir zui leh veng veng phawt a, chutiang a ei theih melh niawm fahran a alo melh reng avang chuan tlem chuan chu nula i pawh chu a lai deuhin a hriat. Puk kawngkhar bulah chuan eng emaw chen chu a han tawi khawmuang leh hret a. sawisel na lai tur reng a hmu lo ni mai hian a hriat, mihring ni thei pawh in a hre lo, chung lai ram vel a Nymph, Forest Nymph(mizo te'n a lasi kan tih ang chi hi. CR) a nih loh pawh in amah tanpui tur a lo kal Hmangaihna Pathiannu Hmeltha Aphrodite-i ani hial ang tiin a ngaihtuah neuh neuh a, chutianga a hmuh tum loh tak mai niawm tak a han hmuh a, a makti lutuk ina a suangtuahna a kawm zui lai mek chuan chu nu chu alo kal hnai a, a hma ah chuan zahna entirnan a a kun zeuh hnu chuan a bulah chuan a rawn thu ve ta a. Chu pa chuan la thlir vung vung pah chuan, " Thitheilo Pathian, min tanpui tur a lo kal nge inih a, henglai ram a cheng Nymph-inih," an han ti mawl tawp ringawt a.
Chu nu chuan ngaihnobei si, mahse vawt leh dam thlup hian, " Ka hming chu Vivienne ani a, ramsa hlauhawm tak nen a in insual lai kha ka lo thlir reng a," tiin alo chhang let ve mai a.
In thlahrun hmel tak hian chu pa bawk chuan, "I chung ah hian ka lawm tak meuh ani, min rawn pui lo lang chuan kha ramsa khan min pawt darh ngei ang le, ka hming chu Marcus Valerious- ani a," tiin sehchilh deuh nuaih hian a hming chu an hrilh ve mial a.
Chutah lawmthu hrilh nan tiin chu nu kut no nalh tak mai chu fawh tumin an la kang a, mahse a khawih hman chiah tih chuan nasa fe hian a phu dawrh a, a thlah leh rang kher mai, a tawlh sawn dawrh a, thla chu nei se a thlawk ta hial ve ang(!)
chutah mak ti tak hian, " ekhai, engtizia nge ni? ava han mak ngai ve, Thi thei mihring ini tak meuh maw?" tiin hlauh hmel deuh hian an zawt zui leh ta nghal a.
A zawhna chu Lal fapa meuh zawhna atan chuan a mawl angreng kher mai, chutah chu nu chuan muangchanga a kut melh a kun deuh chung hian, " Ni e, thil tam tak a awm a ka la hrilh ngei ang che, tunah chuan min hlau duh suh, hlauhawm ka ni hleinem, nangmah tanpui tur che a helai hmun a awm hi ka ni a lawm," tiin a chhang a.
An pahnih chuan an inthiamloh dun hmel kher mai, rei vak lo chhung chu tumah inbe lo chuan an han ngawi dun vang vang phawt a.
" Ka thiam loh ani, engpawh chu nise ka nunna min chhanhim sak avang hian ka lawm tak meuh meuh ani," tiin chu nu hrilh hai leh nuamlo ti lutuk tur tih reh tum niawm fahran hian chu pa chu arawn tawng chhuak a. Zahzel ti niawm tak hian rankachak thleng dar a theirah awm chu tlem an la a, chu nu pek pah chuan, "Kha hei hi ei ve rawh, i ril atam tawh ang." an ti zui nghal a.
"Ka lawm e, ka ril atam rih lo a, nangmah khan ei zawk rawh." tiin inthlahrun hmel deuh hian chu nu chuan alo hnar a.
Chutah rilru hah niawm tak hian ringlo te hian an rum hak a,
" Enge i an tawh a, na te ila nei em?" tiin an zawt zui lehnghal a. Chu pa chuan a kut lehlama a awm khawih pah chuan, "Neilo ve, lak bo ang hmiah ani mai, kha ramsa ina min nghaisak lai khan ka thih loh reng kha ka lo ring lo asin." zangkhai vah mai hian alo chhang let a.
"Ni e, i tuarchhel khawp mai Marcus, hmanah Wizard (dawithiam mipa sawina. CR) ropui tak pakhat hian hnimhnah atanga damdawi tha tak mai siam dan min hrilh a, chu damdawi chu keiman siam ve in engtik lai pawh in ka kawl reng thin a, alo tha ngei anih dawn chu," tiin an nui sak a. A va han nui mawi teh reng em(!)
"Ka va han lawm leh zel ve aw, ka Nu leh Pa phei chu an lawm ngawt ang, lawm thusawina thil hlu tam tak an pe duh hial ang."
"Ni e, an lawm khawp ang, mahse heng Wizard te hi chuan lunghlu leh rangkachak tih vel hi an ngaisang ve em em lo va, nangmah a tidam che tih ahriat phei chuan amah alawm ngawt zawk ang chu, Lal fapa meuh tanpui te chu," tiin nula i chuan alo chhang ve leh mai a.
Chu nu thusawi chu mak ti a aka an an deuh zuau hnu chuan, "Engtin nge Lal fapa ka ni tih chu ihriat a." " Hriat ahar lo, i chetzia leh i hawiher ah te khan hai rual ani hleinem Marcus Valerious." , a ti a.
Chumi hnu chuan eng emaw chen chu an han ngawi dun deuh vang vang a, chu nu lah chu dam dup in tawng mah sela a chet dan leh enge maw ah tlem chuan zahna deuh chu anei deuh hian a hriat a, Lal fapa lah chu pasaltha te nen a sapel mah ni se ala naupang in a bul lawk a Lasi ang tak mai a hmeltha leh sawiselbo hmeichhia a awm tlat avang chuan a aw chhuak reng reng pawh chu ngaihtuah lawk fe a sawichhuak ni mai awm hian alang a.
Engemaw chen chutianga an ngawih reng hnu chuan a hmeichhia zawk chu a rawn tawng chhuak hmasa leh a, " i sakawr kha alo la thi lova, tlem enkawlna ka pe deuh hlek a, naktuk ah chuan i hmang leh thei tawh ang, i thian te pawh in an ngaihtuah tawh khawp ang che, i tello chuan i pa hmel an hmu ngam hauh lo ang." a ti a. Lal fapa chuan zawite hian, " Ni e, min ngaihtuah viau maithei ani, ka..." a sawi lak lawh lai chuan chu nu chuan, "Hei khawfing pawh a chat dawn ruai tawh a, ka kal tawh mai ang e." a ti leh a, A sawi zawh rual chuan a tho nghal deuh vut a. Chutah chuan Lal fapa chuan zah pawh dawn zo lovin rang tak hian akut ah chuan a man sak a, zam aw khur dar dar chung hian, "
Engtik ah nge kan in hmuh leh theih ang, khawiah nge ka hmuh leh theih ang che?" a ti lai deuh tuam a. Talchhuah pawh tum chuanglo hian chu nu chuan, " Kan in hmu leh tawh kher lo ang, kei chu Narbeth- ah daih ka awm asin, chulo ah inkhua ah hian ka lo kal thei lo hrim hrim a, kan inhmuh leh hi ka ring tawh lo Marcus Valerious." tiin alo chhanglet a.
Zak tak chung si hian Lal fapa chuan a huaisenna zawng zawng sawm khawm niawm tak hian, " Viviene, naktuk ah haw lo in helai hmun ah hian ka lo nghak che ang a, i lo kal leh thei angem?" tiin a zawt ta a. Zah hmel tak a nuih seih pah hian chu nu chuan ring fahran lo hian, "Marcus, min lo nghak duh dawn tak tak em ni, i thian te leh chhungte hmuh hlan i nghakhlel hle lo em ni?" tiin a zawt let a. Marcus-a chuan, " Ka chhung leh ka thiante bulah chuan ka tet te atangin ka awm tawh alawm, hmuh nan khua atlai hleinem, ilo kal leh thei dawn anih chuan ka lo nghak ang che tih ka tiam e," tiin a chhang a.
Chu Nula chuan, "I fel hle mai Marcus, naktuk zan ah chuan ka lo kal ang." a ti a. Chutia a sawi zo chu a in her vut a, mei tuah ina a enloh na thim lai chu a pan a, kawngkhar ah pawh a chhuak lo, thim zing ah chuan a bo daih ni maiin ka hria.
Chutia a kal tak hnu chuan Lal fapa chu ngui ruai hian a hriat a, puanthuah ah chuan zawi tak a mu leh in, a puan sin lai chu a sin tha mawlh mawlh a. Vartiani hmel alo lang a. nileng in a tawmna puk ah chuan a awm char char a, a changin puk chhung ah chuan a han vei kual leh thuak thuak thin a, khua chu thim har atih hmel ngei mai. Chutiang chuan engmah tilo in nula lo kal hun chu alo nghak a. A tawp a tawp ah chuan Ni Pathian Ropui Helios pawh chuan a mei tawlailir chuan khawthlang lamah Ni pawh chu a hnuk liam ve thei ta tawk mai. khua alo thim a, Ni atlak rual deuh thaw chuan Viviene pawh chu alo thleng a, puk kawngkhar bul thim deuh lai atang chuan alo chhuak hlawl ni mai hian a hriat a, hlim hmel tak leh zah hmel deuh hian a rawn nui var var a. Marcus-a mutna lam rawn pan pah chuan aw ngaihno bei zet hian," Marcus, minlo nghah duh tak tak ka ring ngam chiah lo a, i van fel ve." a rawn ti a. Zak tak chung si leh hlim tih hriat tak hian Marcus chuan nuih let seih pah hian, " I lo kal leh dawn tih ka hria a lawm, nghah lam hi chu ka thei ve phian ania aw, kumkhua pawn ka lo nghak char char thei ang che chu." tiin alo chhawn ve a. Chutah nula i bawk chuan, " Fiamthu i duh hle mai, hrehawm iti lo maw, i sakawr chu enge a an tawh a, a hman tlak em?" tiin a zawt a. Marcus-a chuan, " Ka hre miahlo mai, ka la en miahlo, vawiin ah puk hi ka chhuahsan lo anih ber chu." tiin alo chhang let a.
Chumi zan chuan zankhua in engemaw sawiin an titi luam a. Ni eng emaw zah chu chutiang chuan an in kawm a, Marcus pawh chuan in lam a haw reng a ngaihtuah tawh lo. An duh tawk in an in kawm a, sakawr chungah te chuang in chu ram ngaw durpui hnuaiah chuan zan thla eng lawm in an leng kual vel thin a.
Khawfing chah dawn ah Viviene- chu kal bovin Tlai ni tlak rual in a rawn kal leh ziah thin a. Amah chauh in Pukah chuan Marcus-a chu nilengin a lo awm leh mai thin..
Chutianga an pahnih a ramhnuai pilril tak a hlim tak a an awm lai chuan thawklehkhat ah ka hma zawn a lemchanna dawhsan chu arawn thim leh ta khup mai a, chumi rual chuan an hlim nui ri te pawh chu a tawp ve nghal bawk a.
Mahse mitkhap kar an arawn eng leh a, mahsela ramhnuai lam reng kha a lo lang tawh hauh lo mai.
Ramhnuai pilril tak aiah chuan Khaw ropui leh mawi tak mai hi alo lang ta zawk a, a lo lang hnai zel a. Lal in, Rorelna pindan ropui tak mai hi alo lang thut a, Lalpa leh Lalnu niawm tak te chu an Lalthuthleng ropui ah chuan ngui tak mai in an thu a, Lalnu phei chu a mit a bui nasat dan atang chuan a tap nasa tih ahriat a, Lalpa ngei pawh chu a bang bik chuang hauh lo, a hma a alan dan nen chuan in thlau tak ani, sa tha ver vawr, sen suah leh zahawm hmel tak kha tunah chuan a mitkhur a tla duk a, a cher in a dawldang em em a, a rilru a hah tih hi a hriat ngawih ngawih.
Lal fapa Marcus-a sa pelh pui, a thian te ho pawh Lalpa leh lalnu hma lam sir rangkachak a luan thutthleng mawi tak mai ah chuan an thu ngui lup hlawm a, sawi tur reng an hre lo.
Ni e, khatia an Lal fapa an hlauh ta kha an khaw lam a haw mai lovin, ni engemaw zah an zawng leh a, Sa te chu kap nual mahsela Lal fapa tello chuan an Lalpa te nupa hmel hmuh leh an hreh a hremna chu tawk mahse pawi anti lo, achhan chu an tih dik loh leh thiamlohna ah chuan an tuar mai ang a, tumah in thiamthu
an sawi lovang, mahse an Lal fapa, an thianpa an hloh chuan an rilru a kap a, an ngai ngawih ngawih zawk si.
An vanneih asiam in an sa pelh lai lo pel ve tu ramsa hlauhawm tak Marcus-a sawisa tu leh Vivienne-in a thah tak ruang kha an hmuchhuak hlauh mai a, mahsela rilru tha tho tak a an han zawn leh ngial pawh in Marcus- ber chu a reh hian a reh vawng vawng si.
Tichuan loh theihloh in inlam a an haw ngei chu angai si a, chuvang chuan ramsa Lu leh Marcus-a ngunhnam chu an hawn ta ringawt mai kha ani a.
Chu mi hnu ah pawh Lalpa thu pek in an sipai tha thlanchhuah ho ten ni engemaw zat an zawng leh a, mahsela chung ho pawh chu beidawngin an kir leh tho.
A zawngtu te chuan nungdam a hmuh pawh an in beisei ngam tawh lo, a chhan chu chu ramhnuai ah chuan Ramsa hlauhawm leh rapthlak pui pui an tam a, an chetna hnu hma leh an ke hniak atang ringawt pawhin sipai rual khat tan pawh a beih tham fe tur an ni si a, chuvangin an Lalpa te rilru dam nan an vakchhuak ve satliah chauh ani.
Chutia ka en reng lai chuan chu Pindan chu a rawn thim tial tial a, chhum a rawn paw chuai chuai a, tumah pawh an hmuh theih ta loh, chhum zing chuan engkim mai chu a hliah vek a, a kian leh meuh chuan puk chhung thim deuh ruai kha alo lang leh tawh a,
Marcus- chauh chu meilum bul ah chuan puan sin hlun chung hian alo thu a, enge maw ngaihtuah ni awm tak a a melh ngai melh ngur ngur chung hian zawi te hian alo phun neuh neuh a, enge tak sawi ang maw ti a a thusawi hriat tum a beng kan chhit hnaih chuan,
" Narbeth maw, a sawi sual nge ka hre sual zawk, a van mak ngai ve le, ka pa sawi dan in Druid(puithiam leh dawithiam ho) hnam ho khua bik, kum sawmhnih vel lai liam kal tawh a Persian- hovin a an suat mang tawh leh khaw ram kha ani sia, nge ni a, ka pa hian a hre sual zawk ni ." alo ti a.
Chutianga a rilru kawm a a phun nuah nuah lai chuan aw zangkhai vah leh hlim tih hriat tak a Marcus, Marcus- tih ri chu puk luhna kawngka lam atang chuan arawn ri chhuak a, an leh hawi chuan Vivienne- chu puk kawngka bulah hian alo ding reng tawh a, nui var var chung a alo phei in Marcus- a bul te ah chuan thut hmun a rawn rem ve a.
Zawi sap hian," thil dik lo a awm em ni Marcus, i va hlim loh hmel ve." a ti a. Marcus-a chuan bah deuh nuaih hian,
" Aw.. awm lo ve, hmuh hlan che ka nghakhlel tawh lutuk a." tiin alo chhang a. A bula nula thianghlim tak mai chu an nuih let ve bawk a, mahse a pawnlang tlat, thinlung taka nui hmel a pu lo, chu chu hrethiam ni awm tak in Vivienne- chuan,
" Sawi ta che, i rilru nawmlohna chu, puih theihna che ka nei em." alo ti var a.
Engemaw chen chu an han ngawi dun vang vang phawt a, a tawp a tawp ah chuan sawi hreh hmel tak hian Marcus- chuan,
" Vivienne- i chanchin hi ka hre duh ani, rem i tih chuan." in thlahrun hmel fe hian ati zawi sap a.
A sawi zawh rual chuan Vivienne- chuan Mei eng lam chu a bih ngar ngar a, Marcus-a chu a chhang lawk lo, a hlim hmel chu lungaihna leh thinrimna hmel in a in thlak thawk niin ka hria, a hmui sen duhawm tak chu a khur der der a. Zawi fahran hian,
" Marcus, nang leh kei hi engtik ah mah kan awm dun thei ngai dawn lo tih ka hria asin, mahse in ram kal ka hmuh khan ka zui zel che u a, i thiante i hloh a, ramsa nen a in in beih thleng khan i bul hnai ah ka awm reng asin." a rawn ti chhuak a. Chutia asawi lai chuan at hmel tak hian Vivienne- chu Marcus-a chuan a en ho a, Vivienne- lah chu a thu ngil et a, zel a awm ang mai hian a melh ngai a melh ngur ngur a, chuan ti hian an sawi zawm leh nghal a.
" Ni e, Marcus, i ngaihtuahna te kha ka hria alawm, kan khua Narbeth chu kum tam tak kal ta a Persian hovin an rawn run hma kha chuan khaw nuam leh ropui tak ani thin a, chuan ka pa hi kan khaw rorel tu ber ani a, Lal ang ani ang chu, kan hnam ah chuan nang ni ang hian Lal an awm ngailo va, rorel tu an ti mai thin,
Druid hnam ka nihna ang in dawithiamna chu ka pianpui reng ani a, mahse ka naupan lai deuh khan ka u Vladislaus- nen hnim damdawi zawng a ramhnuai kan kal laiin, mi thisen hmanga nunna zawng thin mi pakhat hian man tum in min um vak a, kan thiltihtheihna thiam ang ang kan hman pawh in awmzia anei thei lo, kan hman nasat poh leh kan chau tial tial a, a tawp ah phei chuan nikhaw hre lovin ram palai leng ah chuan kan let reng a.Chutia eng emaw chen ni khawhre lova ka awm reng lai chuan ramsa thinrim in hrosa thawm hian min ti harh a, an thawm atang chuan pahnih khat lek an ni lo tih ka hre thei, ka bul vel ni maiin ka hria, ka han meng a, mahse ka thil hmuh chu a fiahlo ruai a, ka taksa pum mai hi a na ngut ngut bawk a, ka kut pawh ka ti che thei lo, au ka tum leh ka hmui pawh ka ti che thei bawk silo, ramsa ho chuan min pawtsawm ngei dawn anih hi ka ti a, ka thinlung chu hlauhna leh lungngaihna in a khat a, ri silo hian ka rum tlawk tlawk ani ber mai.
Chutia mu hlawm reng chung a ka in ngaihtuah lai chuan chung ramsa thawm te pawh chu a reh leh ta mai a, chutah tu emaw ni hian zo tak mai hian min rawn pawm kang nawlh a, thei leh theilo a min pawm tu kan melh tawk tawk chuan, mak ka ti kher mai.
Ka u ngei chu ani si a, a hmel ah chuan khawngaihna reng reng alang lo, a sam te chu a ther sung a, a mit te chu ramsa thinrim mit ang mai hian a sen rum a, a hmui ah te chuan thisen a kai luai lehnghal.
Thinrim rum nghut nghut chung hian min kal pui chhut chhut a, chuan kan awmna piah deuh a thing lian tak bul ah hian dimte hian min nghat a, ani chu ka bulah chuan a melh ngai melh reng chung hian a thu ngawi ta reng a, a chezia mak ka tih em avang chuan thil awmzia zawh tum in thei leh theilo hian ka ka kan ang zuai a, mahse ka aw ri a chhuak thei lo, ka chauh em avang chuan ka meng peih tawk tawk chauh ani.
Chutianga rei ngial kan awm hnu chuan a mit in a melhna lam chu thei leh theilo hian kan thlek phei ve a, chuta ka thil hmuh chu mak ka ti kher mai,
a hma lawk a min um tu pa lianpui kha lubung hian alo let reng mai a, chuan chu pa bul ah chuan chinghne lian tak tak mai pathum hi thisen a bual nuaih hian anlo thi ngut hlawm bawk a.
chu ka thil hmuh rapthlak tak avang leh a hma lawk a kan thil tawn avang khan ka chauh a zual ani ang, ka u lah a a zo tawh nge tih pawh ka hre bawk silo, chuti chuan nikhaw hrelo vin ka lo awm leh ta a.
Ka han harh leh meuh chuan khawthlang lamah Ni alo tla in khua chu a lo thim tawh a, ka u chuan thing alo la khawm ani ngei ang, ka bul lawk ah chuan meipui alo in chhep alh hluah mai bawk a, chutia ka harh a kan chet deuh chuan ka u chuan," I lo harh tawh maw, na te ila nei em, kan thil tawn rapthlak tak khan ati thlabar in ati chau ngawt ang che tih chu ka hria alawm, mahse zanin chu helai ah hian khua kan nghah var mai angai dawn anih hi." tiin aw dam leh pangngai tak chuan min be sawk sawk a, a hma lawk a a hmel leh mitmeng rapthlak tak te kha a pu tawh lova, tunah chuan a pangngai in ka u diktak kha ani leh tawh zawk, mahse a chauh hmel ngawih ngawih tih chu a hmel ah alang reng tho.
" Ka taksa hi a kang ni maiin ka hria, ka sa hulh hulh a, ka lu lah hi a na ngut ngut bawk si, ka u, eng thil nge kan chungah hian lo thleng ta hi, enge thil awmzia?" ti a ka zawh lai mek chuan kan piah lawk a meipui ina a en phak loh chin hnim vel chu a rawn ri sun sun a.
Chu veleh ka u chuan bengchheng lo tur a min hrilh pah hian a bul a thingtum chu muangchang hian a ban zui nghal a.
Ngawi reng a thawm lo chhuahna lam kan en lai chuan chu hnim zing atang chuan ramsa nge mihring zawk ni,
lian tak pahnih hi anlo chhuak hlawl mai a, min rawn hmu ni ngeiin ka hria, thum bul bul hian an inbia a, reife chutianga an awm hnu chuan kan lampan in muangchang hian an rawn phei a,
Ka u nen chuan ngawi reng in kan lo thlir a, kan hma lawk a ramsa leh mitthi ruang let reng chu an thlek zoh zoh a, mei eng in a a en phak chin an rawn thlen chuan an pianzia chu a mak kher mai.
An kawng achin hnuailam pang zawng chu ramsa, sakawr ang hi ania, an kawng achin chunglam zawng chu mihring pangngai ang chiah chiah tho hi anih chu, thal lian tak hi an keng dun a, pakhat zawk chu rawlthar chhuak hlim hlawl hmel pu, la naupan hmel deuh hi ania, pakhat zawk erawh chu hmuihmul leh khabe hmul nei chhup mai, zahawm hmel deuh hi ani thung.
Mak ti leh hlau tak chunga chumi te pahnih chezia kan thlir mek lai chuan pakhat zawk, hmuihmul nei chuan dam thlap hian,
" Min hlau suh u, hlauh tur kan nilo ve, kei hi Thi theilo Pathian, Titan Cronus leh Tuipui Pathiannu Philyra-i te fapa mifel leh dikna ngaina mi Chiron-a thlah te zing ami Oebalus-a ka ni a, chuan hei hi ka thian Breleus-a ani hi, tawhsual in tawk ani maw." a rawn ti a.
Chutia zaidam taka min biak tak ah chuan kan ngaih pawh a ngam ve sawt a, Tin a aw ka chhuak chuan min hneh in minti thlamuang sawt in ka hria.
A thutna ngaia la thu reng chung chuan ka u chuan,
" Ni e, thil rapthlak tak kan tawng ani, ka nau hian enkawlna a mamawh tak zet ani." tiin alo chhang a.
A sawi zawh rual chuan chu pa chuan,
" Eng pawh nisela, ka chung ah hian lo chuang ula kan awmna ah kan hruai phawt dawn che u nia, kha hei hi i nau chu intir phawt la." tiin a tawng lai mek chuan savun tuithawl niawm tak tereuh te hi ka u chu a pe a.
Chu a thil min intir chu a mak kher mai, Uain chu niin ka hre lo, thlum da lep hi ani a, lei hmawr a tem hlek ang chauh a ani, mahse ka pum ah chuan chuan a sa hut hut a, nachhawkna tha tak ani ang, hnim damdawi lam ni mai awm zawk hi ani..
Chutia ka û in min intir zawh chuan a thianpa nen chuan a chung ah ka u nen min hlang a, hmanhmawh fahran lo hian min tlanpui a, mahse an thil min in tir vang kha ani ang, ka na te chu zawi muang hian an dam tial tial a, ka zawi em em a, reilo te an ka lo muhil daih a..
Ka han harh leh meuh chuan khum dûp nuam tak mai ah hian ka lo mu reng a, ka piah lawk ah chuan ka u chu nichin a min hruaitu, a kawng a chin hnuai lam sakawr(centaur) ang chi tho enge maw zah hian anlo bial luih luih a..
Ka awmna chu khawilai nge ti a hriat tum in mit kan len a, pûk ni maiin ka hria, mahse inchhung ang tho vin an chei a, Lal in ang mai hian a mawiin, an cheina leh inchhung chu a in hmeh a, a len vak hmel loh na in engkim mai chu a awmna tur hmun ah a awm vek niin ka hria, uluk leh remhriatna fel tak neia din leh siam ani tih chu han en mai pawh hian a hriat em em lawi si..
Chutia ka mit kan len kual vel lai chuan min hruai tu Oebalus-a chu thei chi hrang hrang rangkachak thleng a chawi chung hian ka bulah alo kal a, hawihhawm tak hian,
" ka fanu, ilo harh tawh ani maw, enge i an tawh a, na te ila nei em? "
a rangkachak Thleng kum chu ka bula dawhkan te ah chuan a dah a, dim leh duat tak in ka hmai chu a chul heuh heuh a..
" nei tawh lo ani ber e, min tanpui a kan lawm khawp mai, enge ka û saw a an tawh a "..
A kut a ka chal dawm a, ka û lam thlir pah chuan,
" ni e, kha mi ruang i û ina a thah tak khan in taksa ah tur chak tak mai a hnutchhiah a, in thisen lum te chu thisen vawt ah a chang mek anih hi, mahse kan theih tawp in kan enkawl dawn che u alawm, engkim a tha leh mai ang "..
Chu a thusawi avang vang chuan ka hlauthawng thut a,
" Tur maw ? Eng tur nge ni ngai a ? Kha dawithiam kha i hriat ngai em ni ? "..mangan hmel tak hian ka ti a.
Ani chuan ka chal chûl heuh heuh pah chuan, zaidam tak hian,
" Hlauh tur a awm hleinem, kan enkawl dawn che u alawm, kha mi kha dawithiam ti a han sawi tur chu ani lo mai thei, dawithiam chu alo ni maithei bawk a, a mi khawih tawh ah chuan nangni hi a vannei ber in la ni hial mai thei ani "..
Chutia a sawi lai chuan ka û chu thinrim hmel deuh hian zawite hian ramsa ang maiin a rûm chhur chhur a, a tal vak vak a, mahse reilo te ah a zawi leh hnawk a, tui deuh a muhil ang mai hian a muhil leh ta daih a, chutih lai chuan a enkawltu te chuan hriak emaw ni rim na deuh mai hi an chulh a, a nghawng chu an tuam bur mai bawk a.
ka hlauthawng chu ka mittui a parawl kuang mai. ka khur ru dar dar in ka hre hial ani, chu tah chu pa hnenah chuan,
" Vannei a..? I mi hriat zawng ani em ni ? Khawi lam mi nge anih a, chiang deuh in min hrilh thei em ? "..
Chutia ka hlauthawng hmel a hmuh chuan, ka rilru lak pen nan a eitur rawn ken te chu ei tur in min tia a, chu tih pah chuan,
" Kha mi kha a hming chu Velkan- an tiin ka hria, Baconshire- ram atanga lo kal ni awm tak ani, a mi thah te hi ka hmu zeuh zeuh tawh a, thil zum pahnih a chhun na hnuhma hi a mi sawisak te taksa ah hian hmuh ani thin a, tin, chungte chu thisen neilo vin an taksa a dâng vek thin, a mah tak hi chhun ah an hmu ngailo a, zan lam ah erawh chuan an hmu zeuh zeuh thin ani awm e, he kan chenna ramngaw piah deuh lawk Harzana leh Gunarin- khua ah te sawn a chetla deuh ber thin a, mipui nun ati ralti thei khawp asin ".. tiin a sawi ta a.
Chu a thusawi chuan ka tiril ah min man a, ka hit chuai chuai in ka hria, mahse min enkawltu pa chuan thudang min sawipui leh ta daih a.
" Tak ana, engtin nge ka koh dawn che, kan awmna hmun hi hrehawm iti em? "
" Ti love, hmun nuam tak anih hi, ka hming chu Vivienne- ania, ka û saw Vladislaus- ani, Narbeth- khua ah kan awm a, ka pa chu Callisto de laufour ania, ka nu chu Marshika- ani e,"
" I nu leh pa te chuan an ngaihtuah viau dawn che u anih chu, mahse tunah chuan heta in la chen ve hrih hi angai tlat ani, i hrethiam tho ang a, hlim tak leh nuam tak a in awm zel ka beisei ani,"
a thusawi lai chu an chawl det a, thlêng kum a grep rah bawr khat chu la in, a hmawm zoh zoh a, chutah an sawi zawm leh a,
" Kan awmna hi khua ti pawn an sawi ngai lem lo a, ramhnuai ah kan awm tawp ani mai a, a hma chuan in kan thlah tu te chu Pelion- tlang ah an awm thin a, mahse kan lo tam tak em avang in in ngeih tak a awm reng te alo harsa a, chulovah sapelh tur te an tam em em tawh lo a, a chhan pawh Ramsa leh Ramhnuai te chung a thuneitu leh enkawl tu Pathiannu Artemis-i lung kan ti awi lova, chuvang in kan chenna thin ram ah sa reng reng a chhuah tha duh tawh bawk silo a, chuvangin ram tha leh sa tamna hmun ah kan pemkawi kan pem kawi ta anih hi, helai ram ngaw hi Diolunaris forest anti thin a, forest nymph(lasi kan tih ang hi. CR) Dioluna-i leh a unau nu Arisynne- te enkawl na hnuai a awm ani a, a hming pawh hi an unau hming chawi a an phuah hi ani".....
Chutichuan thil tamtak min hrilh a, an hnam Greek- ho chanchin leh finna thu te, rimawi leh hriamhrei hman dan te, engkim mai hi min zirtir thin, tichuan an hnenah kum sawmhnih vel lai kan awm hnu chuan kan khua a haw leh tur in ka û nen chuan kan chhuahsan ta a, kan haw tur hi min ui em em a, engtik lai pawh a kan tan a an in hawn reng thu te sawiin, tlawh leh thin tur in min chah mawlh mawlh a,
Tichuan ka û nen chuan kan khaw lam pan in ram sakawr tha tak min man sak nen chuan kan kalsan ta a.
Chutia ka û nen a kan khaw lam pan a kan kal tak hnu chuan buaina leh harsat na em em chu kan tawk lo a, mahse chhûn Ni lan lai hi chuan kan taksa hi kang ang mai hian a awm thin a, kan chau vek zel thin, chuvangin kan thawmhnaw in kan in khuh deuh hlûn mai thin a, a hnu ah phei chuan zân khaw thim hnu ah lo chuan kan chhuak ngai tawhlo, chhuak thei pawh kan ni tawhlo hrim hrim..
Kum sawmhnih chuang mah kan hmuh tawh loh leh kan chhungten a thi tawh ang a min ngaih hnu tawh ang ah kan khua ngei chu kan pan mek ani si a..
Mahse kan khaw dai leh ramchin kan thlen hnu pawh chuan mihring tumah kan hmu lo a, mihring thawm reng reng hriat tur a awm lo.
Makti tak in ka û nen chuan kan kal zel a, mahse chutia ngaihthat lohna hranpa em em chu kan nei chuang lo..
..khua kan han lut chiah mai chu kan hmuh tum ang leh rindan, duhthu kan lo sam ve te zawng zawng chu a lo thlawn chiang kher mai, kan ding chawt a, engmah pawh kan ngaihtuah theilo, kan khua, thlen vat vat kan nghahhleh tehlul nen, enge lo thleng ta hi, mihring reng reng hmuh tur an awm lo a, kum tam tak kal ta a rauhsan tawh ni awm tak in a reh duk a, in ropui leh mawi tak tak awmna thin te chu thingkung leh hnim hlingnei ten an luah khat zo a, in lungrem sâng tak tak te chu a tla bal in, a chim rem rum bawk a.
Sakawr atang a chhuk in kan in lam pan in muangchang chuan kan kal a, ka nu leh pa te chenna, kan chhungkua a hlim tak a kan lo chenna thin ngei pawh chu a lung bang in tiang tha reng reng a awm lo, hnim leh hrui zam in a bawh chûk a..
Ka thingthi hnawk a, ka mittui a luang nghal zawih zawih a, ka û pawh chuan min hnem thei bik chuanglo, chuti chuan kan unau chuan lungchhe tak in kan tap dun tlawk tlawk a..
Kan awmna ngaia let leh tur leh khawdang pan leh tur pawh in zan tam tak kal leh angai dawn a, chhun ah kan kal thei bawk silo, chuti chuan kan in hlui leh rawp tak ah chuan kan cheng ve leh rih ta tawp a.
Chutia kan luahlum leh tak hnu chuan kan theih ang ang in kan chei tha ve zel a, hun a lo liam a, kan lunglenna te pawh alo reh ve tial tial a..
Chutia kan unau chauh a kan khawsak ve bek bek lai chuan, zan khat chu ka û ramchhuak chuan kan khaw chanchin ahriat thar thu min hrilh a,
" Nizan a ka sa pelhna ah kan khaw thenawm Aoregin- khaw dai vel ka va thleng a, mahse meikhu chhuak leh mihring che tla ka hriat loh avangin ngaihthalo tak chung in khua chu ka lut a, ka rinloh ang tak in kan khua ang tho in mihring in an lo rauhsan ve vek tho anih chu, makti tak a ani, muangchang a ka fan kual lai chuan in pakhat hniamte, a lungrem chim nuaih tawh atanga mei eng lo chhuak hi ka hmu a, chuan chumi in lam pan chuan muangchang leh thawm dim tak in ka phei them them a, thawm kan ngaithlak hnu pawh a engmah ka hriat tak loh ah chuan kawngka chu kan nam hawng thuai a, hawi kual ruk ruk chung a inchhung a kan luh chuan kawngka ep thuk bul ah hian, thuk lam hawi leh kawngka hnungchhawn zawng chuan putar pakhat, samtuak var vek tawh leh khabehmul var sei tak nei hi alo thu a, kawngka ka luh rual chuan ka lam alo hawi a, muangchang leh dam thlap hian,
" ka fapa, kawng i bo em chu anilo maw, lo thu chawl ve ta che, ei leh intur te i mamawh ang chu, hlauh tur engmah a awm lo."
min lo ti sawk sawk a, ka chauh em avang leh ka thil tawn in a min thawn em avang chuan abul ah chuan ngawi reng hian ka va thu ve ta chawt a..
Inbe lova enge maw chen kan thut ren rawn hnu chuan, muangchang hian a tho va, thing no tung sei tak a uain leh thleng a theirah eitur thahnem tak hi ava la a, in ei puar phawt rawh, i rawn kalna a hla awm si, ti a min pek pah chuan ka bulah chuan a rawn thu leh nghal a..
Chutia ei leh intur min hlui tak ah chuan zah pawh dawn zo lo in ka ei nghal bawrh bawrh a..
Chutia ka ei bawrh bawrh lai chuan, damthlap hian engti tur a chulai hmun pan nge ka nih tih te, khawi lam atanga lo kal nge ka nih thu te min zawt luam a..
Chuan kan chanchin zawng zawng, kan naupan lai a tawhsual kan tawh thu te, Centaur(a kawnga chin hnuailam sakawr. CR) ho in a min enkawl dan leh kan khua a kan hawn leh hnu a kan thil tawn leh kan khawsak dan zawng zawng te chu ka hrilh vek a, chu tah zaidam tak hian engkim abul atangin min hrilh ta vek a,
.a hming chu Mor'dret- anih thu te, he an khua Aoregin- chu sawmhnih dawn liam ta a Persian- hovin a an run thu leh kan khua Narbeth- pawh a mi cheng te tlemte sal tur a an hruai bak zawng chu an thah chimih vek thu te min hrilh a, chu bak ah a chanchin te min hrilh bawk a, rei tak kan in kawm hnu chuan kan chungchang thu pawh pawi ti tak leh min khawngaih tak chung in min hrilh asin, enkawl dam theih kan nih loh thu te, Druid(dawithiam hnam)- thisen kai kan nih avang chauh a kan thihpui loh thu te min hrilh a..
Chuan hun in her liam zel te chuan kan damchhung ni atan danglam na aneih tawh dawn loh thu leh hun alo kal zel ang a Ni sa leh êng hnuai ah kan chhuah theih loh tur thu te asawi a, zan thim chu kan tan chuan chet vel na hun ala nih tur thu te pawh, chuan mihring nun inthlak thleng hawk ang hian, mihring nun zia kan neih leh kan rilru te pawh ala in thlak vek tur thu te pawh."....
A thusawi lai chu a tawp chut a, hnuai lam a bih ta ngar ngar a, chutah muangchang hian alo hawi chhuak a, a mittui chu a parawl kuang a, țah erawh a insum hram hram niin ka hria, a thutna atangin arawn tho va, nghet tak in min kuah a, min kuah reng pah chung chuan ka unau pa duhtak chuan heti lungchhe tak in a thusawi lai chu a sawi zawm leh a,
" thisen lum te chu chaw ang ah in la hman hun ala thleng dawn a, mihring tana chaw tha tinreng te chu intan chuan engmah lo mai ala ni ang, ka fapa, i unau nu chu itheih tawp in i enkawl dawn nia, thlahthlam hauh suh ang che, he thu a hriat hun ah chuan a thinlung a na khawp ang, mahse thihna chuan a kalsan tawh che u a, mitthi kawngkhar te chu in tan khar ani tawh, chuvangin ngaihtuahna thalo te neilo hram tur in ka chah duh bawk che u ani, in mamawh hun apiang in ka hnen ah lo kal ula, ka theih ang ang a tanpui tur che u in engtik laipawh in ka awm reng ania,". tiin min hrilh a..
Rei fe kan inkawm hnu chuan reilo te tal chawl hahdam tur a min tih pawh chuan ka rilru ah a thusawi te chu a awm reng a, mu hahdam thei pawh niin ka in hre lo a, chuan khawfing chah hma deuh in ka lo kalsan ta ani.."
Chu thu rapthlak tak leh lungngaih thlak tak mai in a min den na chu ava na tehreng em, thi thei chu ni ila vawi tam tak ka inti hlum nawn duh hial ang..
Tichuan hun alo liam a, kan mizia te pawh alo danglam ve ta deuh deuh a, kum lo thar in hun lo danglam zel mah sela kan taksa chuan a hre tawh lo, kum za tam tak chu ni khat ang maiin kan taksa leh nunphung chuan a hmang a, chuan mihring tana chaw tha tha te chuan kan taksa ah awmzia anei lo in, kan chakna te pawh alo reh ve telh telh a, thisen lum te chuan kan riltamna leh tuihalna te chu a tireh in an chhawk ta telh telh a, tunah chuan chu chu kan tan chaw tha ber alo ni ta hial ani..
Chutianga khawsa zel chung chuan kum tam tak kan khawsa chho ve ta zel a, ka û chu sapel leh eng emaw tiin kan khaw thenawm khua ah te a kalchhuak deuh reng a, mihring nunphung a zir ni ber in ka hria..
Kan in hlui leh lian tak ah chuan mahni chauh in ka awm fova, ka khawhar leh lunglenna avang chuan ka tawm chawt a, khawiah mah ka chhuak ngailo..
Ka û nen pawh chuan kan in hmu khât in mahni in ka awm ngun a, kum tam tak chhung ka tawm im avang in ka rilru pawh a danglam phah dawrh hial reng ani.
Chu chu ka û chuan ahriat in țha ati lova, kan awmna bul hnai vel khua ah te lêng a, mihring te kawm a, rual pawl tur in min ti țhin a, chuan kan khua atanga hla vak lo khua ah te chuan ka chhuak ve ta zeuh zeuh a, Isle leh Eastland- khua ah te chuan hmelhriat leh kawm tur ka hmu nual a, kan chipui Druid- hnam awm te nen phei chuan kan in pawh in an zinga ka awm lai phei chuan mihring pangngai ni leh ta hial in ka in hre țhin.
Chuan nu leh pa nei tawhlo, fahrah naupang tê pakhat hi ka awmpui a, ani chuan minti hlim khawp mai, tunah pawh hian ka la awmpui a, a hming chu Emilia-i ania, ka khawhar hnem tu ber pakhat ani thin,
chuan ka û chu khaw hrang hrang a zinchhuak reng anih avangin hmelhriat te alo nei zau a, mihring pangngai ani leh ber in ka hria, ani pawn mak a inti a, mihring anga nun a, nunphung pangngai a nun leh khawsak leh theih hi a tum ber bawk a..
Ka û chuan Emilia- ka neih chin ah chuan ka hlim ve ta deuh tih a hria a, hma a min enkawl tu Oebalus-a ten a min pek lunghlu leh leh thil hlu engemaw zat chu keng in a thian thenkhat te nen sumdawnna bei tur in Wallachia- khua ah min kalsan ta a, bungraw phur lawng leh khualzin phur thei chi lawng te leiin a zinkual reng a, ram hrang hrang ah bungrua leh damdawi te la in a kual reng thin a, In ropui tak Wallachia- khua ah chuan alei a, a hnen a cheng ve tur in min sawm a, mahse ka nu leh pa te chenna leh ka naupan lai hun zawng zawng ka hmanna khua hi chhuahsan ka thei silo, chuan a chang chang in min rawn tlawh zeuh zeuh tih mai loh chu kan in hmu khat thei khawp mai,
chuan Hilda- khua a ka kal dawn laiin nang hi ka hmu che a, ka rawn zui zel ta che anih hi "..
Marcus-a chu sawi tur hre lo in a ka hau, a hmelah chuan a makti leh khawngaihna chu alang chhuak hial in ka hria..
Vivienne-i chu a kûn nghiai a, a lungchhiat hmel kher mai, sawi belh leh chuan tur pawh ahriat hmel tawh loh a, hria pawh nise sawi leh thei chi pawh ani lo ang..
Engemaw chen chutia an ngawih reng hnu chuan, Marcus- a chuan khawngaih hmel tak hian a va kuah a, a hmangaih thu a hrilh mawlh mawlh bawk a..
Chutia lungchhe tak a an awm lai chuan, Vivienne-i chuan țah aw lek lek hian,
" Marcus- ka chanchin engkim chu ka hrilh tawh che ang kha ani a, ka tan chuan hmangaih che hi thil theihloh anih ang bawk in, nang pawh hian min hmangaih tur ani lo, i nunkhua tih chhiatsak che hi ka phal theilo ani, i kianga awm reng theih chu ka duh ber ani alawm, mahse Pathiante rorelna chu tihdanglam theih ani silo, "
Marcus-a chuan chhan pawh a chhang lo, nghet tak in a kuah a, a hmangaih thu a hrilh mawlh mawlh reng a..
Vivienne-i chuan, " Marcus, ka kalsan che a ngai tlat ani, kei pawh hian ka hmangaih che a alawm, mahse tunah chuan awmdun reng thei kan ni lo, ka awmna lama ka kal leh vat hi a ngai ani, naupang Emilia-i amah chauh in ka rawn kalsan si a "..
Marcus-a chuan ala thlah duh chuang lo a, nghet tak in ala kuah reng a, chutah Vivienne-i beng bul ah chuan zawi te hian,
" I tello chuan engtin nge ka awm ang, haw leh mah ila, itello chuan ka hlim thei chuang lo ang, Lal ni mah ila ka hmangaih ber ka neih theih chuan si loh te chuan hlim tak in ka awm thei ngai dawn lo, chân che hi ka phallo che, kan pahnih in kan khua ah kan haw ang a, chuti chuan kumkhua in ro min rel pui ang chu "..
" Marcus- naupang ang maiin thu i sawi ani, Lal fapa ini a, mipui te chunga rorel tu tur leh la enkawl tur ini a, i kut ah i pa Lal ram a awm asin, nangnen hian kan awm dun theilo, chu chu hriatthiam tum rawh, kei pawh in ka hmangaih che alawm, i rilru leh ngaihtuahna an tho kha ka pu ve asin "..
Chutah an ngawi leh det a,
" tunah chuan ka kalsan che a hun tawh, khua pawh avar dawn tawh hi, nang pawh i nu leh pa ten an ngaihtuah tawh khawp che asin, nangmah zawngin i thian te leh i pa sipai ho ten an la zawng reng che ani, tunah chhuak ila, in khaw dai thleng chu ka va kalpui dawn che ania ".. a ti a.
Chutia a sawi zawh chuan Marcus-a kuah na ata chu a tal chhuak a, Marcus-a pawh chu a thawmhnaw te in bel tur a hrilh pah chuan a insiam pui mawlh mawlh a..
Marcus- erawh chu a ngawi reng a, thil ngaihtuah muk tih hriat tak hian, engmah asawi lo, ngawi reng in a in siam mawlh mawlh ringawt a..
A ralthuam famkim an in bel meuh chuan a zahawm hmel in sawt in a hriat, a pumrua han en mai chuan mi pangngai ani ve mai a, mahse a pumrua chuan belhchian a dawl hle, a pianțo a țha a, a hmel chu ngaihsam tak leh tumah huphurh reng reng neilo hmel hi ani a, enchian a dawl hle a. Amaherawh chu a mitmeng chu ala naupangin, hmeichhia an na deuh a nei a, chu chuan hmelma lak ah chuan a ti zuamawm viau thung ngei ang.
Vivienne-i pawh chuan mit la lek lo hian a thlek vawng vawng a..
Indona Pathian ropui, Amazon Lalnu hmeltha Troy-indo na a Greek Pasaltha huaisen Achilles-an a a thah tak Penthesilea-i pa Ares-a, ralthuam famkim inbel a hmu ta ni mai awm hian khawdang haw lek lo hian a thlir vawng vawng a..
Marcus-a chuan a in peih tawh thu sawiin, an in zui chhuak ta hnak hnak a..
A sakawr thi mai tur a a kalsan tak, dam leh hrisel taka an hmuh leh meuh chuan alawm kher mai.
Chuan sakawr chung ah chuan chuang dun in Marcus-a te khaw lam pan chuan an tlan ta a..
Inbe miah lova rei tak an tlan hnu chuan Marcus-a te khaw dai chu an lo thleng ta der a, Vivienne-i chu hlâng thla in duhthawh tak in a kuah a,
Zawi sap hian Vivienne-i chuan,
" Marcus, tunah chuan kan in țhen rih angai dawn ta, ka ngai dawn hle mai che, engtik ni ah emaw chuan kan la in hmu leh ngei dawn nia " a ti a. Marcus-a pawh chuan,
" Vivienne- duhtak, khawvel a ka hmangaih awmchhun leh ka hlimna ber ini e, ka hmangaihna che hi kumkhua pawh in a reh ngai lovang, kan in hmuh leh hunah chuan ka ta ini kumkhua thei tawh ang chu ti raw ? "
" engtik lai pawn ka thinlung chu i ta ani kumkhua ang Marcus. "
" duhtak, chatuan mi thi theilo Pathian te remruat sa pawh ni se, nangmah zawng tur hian ka lo kal leh ngei ang, mitthi khua nen pawh ni se, ka la rawn zawngchhuak leh ngei ngei ang che tih hi Chhûm la khawm țhin tu Pathian chungnung ber Zeus-a leh Styx- lui thianghlim hming in ka intiam e, chu tih hunah chuan ka ta ini kumkhua thei tawh angem ?"
" Marcus, i ram in a mamawh che a, a enkawl tu tur chu ini, chu chauh chu i rilru ah dah tum ang che..
Marcus, min la rawn zawng chhuak leh duh te anih ngai chuan ita ka ni kumkhua tawh ang tih ka tiam a che, ka hmangaih che a, ka hmangaih reng fovang che "a ti a.
In ngai em em in an in kuah leh a, a chal ah chuan Marcus- chuan a fawp zauh a, chuan an khaw lam pan in chak deuh in a tlan ta a,
Vivienne-i chuan a tlan liam thleng in a thlir vawng vawng a, che sawn lova a din na ngaia Dar chanve emaw lai thil tam tak ngaihtuah ni awm tak a a din reng hnu chuan, a ral riai riai a, hmuh theihloh va a awm hma zawng chuan Marcus-a tlan liamna lam chu a hawi reng a..
Chutia lemchan dawhsan lam lama ka rilru zawng zawng ka pek lai chuan, ka awmna in chu a rawn nghing dur dur a, ka khaw hmuh a fiah lo ruai ruai a, lemchanna dawhsan chung atanga țiau chhûm niawm tak lo chhuak leh chinghne û ruah ruah ri te chu hla tial tial in ka hria, tichuan ka phu dawrh a, ka mit kan men leh meuh chuan ka khum pangngai ah ka lo mu leh der tawh a, ka thil hmuh te kha inlarna nge mumang zawk ni ang tiin ka ngaihtuah a...
Engpawh chu ni se kha ka thil hmuh khan ka rilru leh ngaihtuahna a luah khat vek a, awmze nei tak chu niin ka hria a, thuruk in thup enge maw chu ka hmu ni ngeiin ka hria..
Mutthilh leh mai ka tum a mahse ka thei lo, mutthilhna thlarau te chuan min thlawh bosan ta ani ta hial ve ang(!!)
ka harh tulh tulh a, chu ka thil hmuh chu a awmzia hriat tum in ka rilru leh thlarau zawng zawng sawmkhawm in kan ngaihtuah a..
Comments
Post a Comment