UTOPIA | Life Beyond Death (Chapter -2) BLOODLINE

  

(Chapter -2) BLOODLINE.

Kâr khat chhûng lai chu mut mumal leh rilru hahdamna hun pawh a nei thei meuh lo.
A taksa mai bâkah a rilru lam thleng chuan chawlh hahdam a mamawh tak meuh meuh a ni, mahsela a rilru hahna leh buaina avâng chuan Dr.Michael- chu chuti mai a hahdam thei a ni tlat lo.

An University lamah lah duh ang a chawlh alâk mai mai theih loh avângin inlamah pawh tlaivâr ṭhak ṭhakin a Lab- ah pawh a inkhung hial a.

University Of Utah, Salt Lake City a Genelogy Department Professor Dr.Michael Curtis Kay leh a nupui Mrs.Johana Kay te fa neichhun tleirawl Zoe Kay- ina natna mak tak mai a vei avâng chuan a nu leh pa te chu an mangang hle a, mahsela he a fanu natna chungchang erawh hi chu an chhungkaw ṭhian Dr.William Hopper tih loh chu an chhungkua chiah in an hria a tih theih.

A fanu zirpui leh zinchhuahpui te chuan chutiangin an zu hre si se lo a, a nat tirh lai ang vek khân thil a in her chhuak si lo.

 Hun a liam a, a enkawlna hrang hrang avângin natna danglam takah a chhuak ta mai e maw ni chu aw tih theih hial a ni.

He thil lo in ṭanna tak chu a hmâ thla khat liam ta a a fanu Zoe Kay leh a zirlai pui te, an thil zir Mihring hnam chhuina lam, Anthropology  chungchanga Tour an neihna New Guinea a ṭanga lo inṭan a ni a.

University Of Utah, Salt Lake City a Anthropology  Department te'n New Guinea a Eastern Highlands Province Of Papua Goroka District an fan na ah khaw tereuh te Kimoe- ah ni eng emaw zat an châm a,  New Guinea ah hian Tribes tam tak, Culture maksak tak tak an tam êm êm a,  héng tribe ṭhenkhat te hi chu an ral titih tawh hial bawk.

Heng tribes ṭhenkhat hi hringei( Cannibal) kan tih ang te hi anla nih hlawm avângin a ram khawilai mai pawh chu a râlṭi angreng viau mai a, a ram a chhengchhia in bo mai awl khawp in ngaw a chhah ṭha bawk si.

Chutiang kâr ah chuan zirlai sawmthum leh Zirtirtu pathum bâkah a ram mi, hruaitu patling pahnih te chuan hlim takin an paltlang ve zel a.

An thlenna ber Kimoe- khua chu Chimbu tribes- ho chenna a ni a, anni hi New Guinea tribes ah chuan an lâr ber hial âwm e.

  Chawlhkar khat an châm champha zan ah chiah chuan Zoe Kay chuan vanduaina a tawk ta a ni.

An khaw awmdan hi a mak angreng hle a, in an sak rêng rêng hi an in tlar pût vek mai a, a bial in, mau chîp takin an rem phui tlat a, a nih loh chuan dâp tah ang ve deuh hian an tah kual phui tlat ṭhîn bawk, kawngka pakhat siam in tukverh pawh a awm hranpa chuang lo, chhûnah pawh inchhûng chu a thim deuh khup mai ṭhîn.

A chung ah erawh chuan dî an hmang thung a, ruahsûr nasat pawh a a far loh nan an tih thuah tup bawk.

Chutiang a zân an mut lai chuan Zoe Kay puan sin chungah chuan mai mawm lian êm êm mai hi inchung aṭang chuan a rawn tla tawp a, a bân puam a a seh rual chiah chuan Zoe- chu harh nghal in a ṭe ring kher mai.

Hmu hman mahsela tihhlum hman lohvin chu maimawm chu a per bo nghal daih a.

A maimawm chu a len tham êm avângin a sehna hmuamhma pawh rûl chukna hnu hma ang mai hian alang hial mai.

A kiang a mu te pawh an harh vek a, hmun danga riak te pawh, a ram mi ho te pawh chu an rawn tlânkhawm nghal thuai a.

Chumi zân chuan tumah an mu thei hlawm lo, hmeichhe ho phei chuan an thawmhnaw leh mutbu te an check reng ringawt mai a.

Zan thil anih avângin leh eng maimawm in nge seh an hriat loh avângin tûr thahna te leh damdawi na chhâwkna lam chi an pe rih ringawt a, mahsela chûng damdawi te chuan a thawk nêp kher mai.

Zîng a lo nih a, khua a lo vâr fel chuan Zoe-  taksa pum mai chu a vûng chhuai vek hman a, mahsela chutia vûng puam erawh a ni lo.

Maimawm sehna hmuamhma vel erawh a duk kual ruih a, a bân tluan chuan thisen zâm a bawl ṭuk ṭuk a.

A nat dan an han zawh chuan, harsa ti tak in, "Mei a kan ang mai a ni," a ti chhuak thei hrâm a.

A chesawn thei lo mai pawh ni lovin men pawh a meng peih meuh lo, a thlan tuiin a bual nasa in a chal chu puan, tuivawt a chiah huh in an hrûk sak reng a.

A hliam hmuamhma an han en chian chuan Chimbu mi ṭhenkhat chu an kimki deuh zawk a; an phun deuh sap sap hlawm a.

"Giant Tarantulas"

Professor Samuel- hnenah chuan Guide- a tân a an hman pakhat chuan, " Doctor,  Hemi ram chhûng a maimawm hlauhawm tak mai hi ania, a hmuamhma leh a nat dan aṭang hian hai rual a ni lo," a ti zâwi sap a.

Midang, zirlai dang te pawh chuan chu a thusawi chu an hai bîk lo, hmeichhe lam phei chuan chau tak a mu reng Zoe- chu ṭih leh lainat hmel tak chung hian an thlír ṭhap hlawm a.

An awmna hmun ram fianrial lutuk ah chuan Phone- a hman theih bawk si loh, chu khawlum tak hnuaiah chuan rilru mangang tak in zirlai ho chu an awm a,  eng emaw hlek ah an phâwk hrû hlawm a, mipa lam pawh an bâng bîk chuang lo.

Enkawl dân vak an hriat loh avângin leh an damdawi ken te'n awmzia vak a neih hlawm loh avângin zirtirtu(professor) te pawh chuan mak an ti tlâng hlawm hle mai.

Mahsela chulai hmun a an puithiam, Chimbu doctor an rawn ko a, ani chuan enkawl dam ngei a intiam a, mahsela a hmel aṭang chuan chu pawh chu thil beisei awm tak anih a rinawm chuang loh.

Zoe Kay- seh tu hi Giant Tarantulas an tih chi, Maimawm lian tak a ni a, South America, Australia leh Asian ram ṭhenkhat ah an awm ṭhîn a.

Khawvel a Maimawm lian ber ber te an ni a, a lian chi ber Goliath Birdeater te chu 174 gram laia rit leh 12 inches lai a lian te an ni thei a, an ngho (ha)  pawh 1.5 inches laia sei te an ni bawk.

Tin, leihnuai ah bu an siam ṭhin a, an kaw ko tlang hi an rîl in an zam vek ṭhîn, (Mizo chuan chingchip lian kan ti mai awm e.)

Zoe Kay- seh tu hi Mygalomorphae, Rat spider an tih hi a ni a, a tûr hi a hlauhawm in khawvel a maimawm hlauhawm ber an ni.

Hmanlai ang a ni tawh lo a, Papua tribes ah pawh a hlauhawm ber an tih Chimbu tribe- mihring sa ei ṭhîn an tih te pawh chu chutiang êm êm an ni tawh lo mai ni lovin, an sakhua leh hnam thil vel la chhawm vek mahsela, hringei chu an ni tawh bîk lo.

He khua a Chimbu tribe te hian mingo pawh an hlau lutuk tawh lo a, mahsela an la mawl angreng hle thung.

Heng rawn tlawhtu zirlai ho lakah erawh chuan an fel hle a, an damlo pawh an buaipui sak êm êm a ni.

An puithiam chenna, an khaw pâwn deuh, thing lian pui pui awmna hnuai ah chuan Zoe- chu an zirtirtu pahnih, Dr.Samuel leh Dr. Maggie te chuan an awmpui ve tawp a, puithiam bâkah a tirhkah hmeichhe pakhat leh mipa pahnih an chêng ve bawk a.

Puithiam in chhûng chu a ṭawp ang aiin a rimchhe hran lo a, in chu a len hrim hrim avângin  chên pawh a nuam deuh.

An hnam damlo enkawl dân leh damdawi maksak tak tak hmangin a enkawl a, ṭhat lam a pan ve zel avângin Zirtirtu te pawh chuan an sawisel bîk lo a.

Ni thum a ral chuan a khawsik pawh a ziaawm in a vûng te pawh a lo reh a, mahsela thil a ei ṭhat theih loh avângin a ala chau a, a zawi êm êm thung a.

A chângin thil tui, rim na tak mai in a ur a, a bân tluan in thil râwt kâwi a bel luam ṭhîn bawk a.

Kâr hnih lai chutianga a enkawl hnu chuan ṭawng pawh a lo ṭawng peih ta a, mahsela amah chu a dawldângin a chêr êm êm thung a, chuti chung chuan ṭhat lam a pan ve zel a ni tih an hriat chuan an vai mai chuan an hlim ve êm êm a.

Mahsela vanduai thlak tak maiin chu khawlum tak hnuaiah chuan Zoe-  chuan chulai hmun a natna ṭihbaiawm tak mai 'Kuru'- an tih chu a vei tel ta tlat mai le.

Kuru- natna hi hmanlai Chimbu tribes ho te chuan an vei nasa ṭhîn hle a, chulai ramah chuan natna lâr tak pakhat a ni. Chutiang vei mihring chu an taksa a zawiin an kal ṭha thei lova, a ṭhen chu an nui vak vak bawk ṭhîn.
Damchhuak an tlêm hle ṭhîn tih chu Chimbu ho aṭang chuan Zirtirtu te chuan an hre bawk a.

Thla sawm pakhat aṭanga thla sawmpali vel bâk an daih ngai lo tih thu te an han hriat tâkah chuan, ama taksa chak lo leh natna lo tawh mêk nen Zirtirtu te pawh chuan dam in an haw pui theih an in ring lo a.

An awmna Kimoe- khua lah chu motor thlen theihna a ni bawk si lo, an awmna aṭanga khua, motor luh theihna pawh  mel sawmnga aia hla mah a ni a, chu pawh chu thingtlang khua tho a ni si, ke a ramhnuai kawng, zawn chawp lehnghal a chuti khawp a thui chu damlo nen kal an huam bawk si lo, an manganna chu pui tak a ni ringawt.

Mahsela vanneih asiamin an Guide- pakhat leh chumi khua a rawlthar pakhat chuan Kimoe- khua an kalsak theih thu an sawi hlauh mai.

Rang takin an in puahchah nghal a, Professor pakhat  Dr.Francis leh zirlai mipa pahnih, Stephen leh Robert- te chu tel ve in an panga chuan a tûk zîng ni chhuah rualin an chhuak ta a.

Chutianga an chhuah aṭanga chawlhkar khatna ah chuan Helicopter pahnih hi Kimoe- khaw chungah chuan a rawn thlâwk ri ta vut vut mai le.

Chimbu ṭhenkhat chuan a thâwm chu an hlau hle a, kawtlai a awm te pawh an inchhûngah rang takin an tlân chhe lût rawk rawk hlawm a.

Rei lo tê an an kawtchhuah, hmun zâwl rem deuh laiah chuan Helicopter te chu an rawn ṭum khu luih a.

***********************************************************************************



Chumi ni chuan Zoe Kay- chu Goroka lamah an hruai ta a, Guide tu pakhat leh zirlai pahnih te kha an rawn tel ve tawh lo, anni chuan Goroka lamah an lo nghak thung a.

Chimbu tribe pakhat leh Dr.Francis- te an rawn tel ve thung a.

Khua alum êm avângin leh an awmna a hrisel teh chiam loh avângin hetia an awm chhûng hian zirlai mipa pahnih leh hmeichhe pathum lai chu  khawsik leh kawṭhalo in a tlâkbuak mêk bawk a.

Helicopter pahnih a an len vek loh avângin damlo paruk leh Dr.Francis bâkah zirlai pasarih chu thiar chhuah hmasak phawt an ni a.

Helicopter hian an ṭhiante lo nghahna Goroka khaw lamah an thlawh pui phawt a, a tûk ah midang pawh an hruai  veleh bawk a.


Khatia Dr.Francis- te, Kimoe khaw chhuahsan a an kal hnu khân, nithum leh zan thum lai ramhnuaiah an thang a, khaw hnai ber Kabona- aṭanga biakhlakna hmangin Rescue team te, Goroka khawpui lam ami an va bepawp leh a ni.
Chanchin pawh US lam an thlen nghal a, zirlai Zoe Kay chhûngte leh University lam hotu te'n Flight lam an lo buaipui sak nghal chung chung bawk a.

Chuvang chuan Zoe Kay pawh Goroka Hospital ah enkawl a ni lo a, a pa Dr.Kay remruatna in hahdam hman mang lovin America lam ah an haw chung chung a.

An chenna Salt Lake City an thlen aṭanga chawlhkar khat aliam meuh chuan Zoe- chu mitthi ang tluk hial a ni tawh a.

Maimawm sehna chu antivenom hmanga enkawl dam mai theih a ni ang a, mahsela Kuru natna hlauhawm tak a kai mai bâk a Chimbu Tribes ho chenna boruak leh hmun ṭawp tak avâng chuan natna a dang dang pawh a kai thluah a ni tih chu Dr. Kay- chuan a hrethiam thuai a, a thawhpui leh an chhungkaw ṭhian ve ngawih ngawih Dr.Hopper- phei chuan a a beidawnna tûr tam takah beiseina thar siam sak reng a, chumi ni lo phei sela chuan rilru leh taksa chauh avâng in dam ni hmel a hmu tawh lo hial maithei.

Zoe- taksa chu a ni télin a râwp tial tial a, engmah a ei theih loh avângin damdawi (Drip) an khai reng a.

Mrs Kay- chu ṭhutkhawmna pindan ah a awm a, Dr Kay- pawh University lama a kal tûr a a chhuahna pawh ala rei lo.

Dr.Hopper- chuan nikhawhre lova mu reng Zoe- bânah chuan dîm tak hian syringe- a vit lût a, an ṭhian dûn a an damdawi siam chhuah, tui sen rîm rêm, V126-an tih chu a vawikhat nan a pe chhin mêk a.

Dr.Kay-Lab hi an in chhûng tho a awm a ni a, in hnuai lam a awm, room lian vak lo, thianghlim tak mai a ni.

A hnar ah Oxygen an pêkna a invuah mai bâkah a bân leh taksa ṭhenkhat ah chuan Pad an vuah thluah mai bawk a.

Damdawi a pek zawh hnu pawh chuan Zoe- chu ala che châng chuang lo. Dr.Hopper- chu a rûm hak a, a piah lawk a dawhkân lam ah chuan a phei zui a.

Zoe- hnungchhawn zâwng a ṭhû in, thisen test túrin a in buatsaih mawlh mawlh a. Mahsela, rei pawh a ni lo, minute thum emaw vêl emaw lek hnu chuan Zoe- chuan thâwm aneih avângin a in her zawk a, a lamah a phei thuai a.

Zoe- chu a lo tâl in, a ban te a lo vei deuh nawk nawk a, a hnâr a Oxygen- pêkna hrui invuah leh a pad te, a venflon te chu a lo phih thla vek a. A mutna Fowler Bed pawh chu a nghawr dawt dawt mai.

"Zoe, Zoe.." ti a ko in Dr.Hopper- chuan a nam bet a, mahsela Zoe- chuan hria awm pawhin alang lo. Awmze nei lo a a sarâk chiam hnu chuan  a ka aṭangin thisen a rawn phuh chhuak tuarh a.

Dr.Hopper- chuan a man bet hneh lo viau a, mahsela thisen a phuh chhuah rual chuan Zoe- chu  a zawi hnawk a, khumah chuan a let leh tawp a. Engmah a hre leh tawh lo.

A hmui leh khabe vel ah chuan thisen a kai luai a, thawmhnaw hâk lai leh Dr.Hopper-a hmai velah pawh chuan a per deuh nuaih lehnghal.

A hming a ko mawlh mawlh chungin a hmui vel a thisen kai te chu rang takin a hru thuak thuak a, Oxygen pawh a pêk zawm lehnghal vat a.

A phe buai kher mai, a bul a dawhkân hnawk nuaih chu a hai nawk nawk a, damdawi bûr eng emaw ber a zawng a ni, chhuatah te chuan damdawi bûr a hai thla nual a, a duh ang a hmuh veleh Syringe la in a thun sawk sawk a, Zoe- bân ah chuan a chiu lut leh ta vat a.

 Chutih lai chuan khum sîr a Zoe- lungphu enna ECG (Monitor) ah chuan Heart Rate a rawn mumal lo hle mai.

Zoe- chu a rawn thaw ri hrâwk hrâwk a, thawchham ang mai hian..........

A ko mawlh mawlh reng a, Cardioversion khawl lam te chu a check zung zung a, mahse a thaw a zâwi tial tial a, mit khap kâr lek an a zawi ta nghal  hnawk a, a thâw pawh a reh in ECG- ah pawh flatline show chauh a rawn lang ta.

Dr.Hopper- chu a mangang hle mai, Zoe- Ozygen vuah lai chu phawiin a ka ah te chuan a hâm a, a âwm ah te chuan a nem vak vak a, mahse awmzia a awm thei lo.

Hmanhmawh deuh a Defibrillator chu fit zung zung in Zoe- âwm chu a'n  nem a,
"Ni lo, a ni thei lo, Zoe, a ni thei lo," ti chungin a nem mawlh mawlh a, vawi sâwm vel lai a tih nawn pawh chuan engmah a ang thei chuang lo.

Beidawng takin khum sîr chhuat ah chuan a ṭhu hnawk ta hnawk a, a kekawr aṭangin muangchangin phone- a phawrh a Dr.Kay a call ta a, mahse a call tlang lawk thei lo, vawithum lai a dial nawn hnu ah a tlang thei chauh a.

Mahse Dr.Kay chuan a pick up lawk thei lo, muangchangin a tho a, hun tawn avâng chuan mu leh mal a nei bîk vak lo.

Khum kiang ata chu kalsawn in, a piah deuh a dawhkan sei leh hnawk nuai rinchhan chuan Zoe-hnungchhawn zâwng chuan a ding a.
Dr.Kay chuan a phone a la la thei chuang lo.

Zoe- bân leh taksa, a hmai vêl a thisen zâm te chu a rawn bawl ṭawk ṭawk a......

Dr.Hopper- chuan a hnunglam a thil ri deuh rak thâwm a hriat avângin a beng a phone la chelh reng chung chuan muangchangin a lehhawi a.

"Lalpa leh....Zoe"... a hriat tawk lekin a phun sup a.

Zoe- chu khum aṭang chuan a rawn chhuk a, a sam leh chu a hmalam ah a tla hnuang a, a pad vuah te leh a kut a venflon- la invuah chung leh a zawmna hrui te, wire- te chu a hnûk duah duah a, Dr Hopper- chu muangchangin a pan chhut chhut a, a hmui chu a tep deuh chuap chuap a.

Dr Hopper- mak ti leh hrilhhai lutuk chuan chêt lâk nachang pawh a hre lo, ka ho chung hian a lo thlîr reng ringawt a.

A bul a rawn thlen chuan Zoe- chuan Dr.Hopper- a hmai vel chu a hnim kual thuak thuak a, chutah a lu ah a kuai thut a, a nghawngah a seh ta thut mai anih chu.

Dr.Hopper na ti lutuk chu a sarak nasa ngei mai, a tal nawk nawk a, mahsela Zoe- chuan a man ngheh êm vâng leh a seh nasat êm avâng chuan a talchhuak thei bîk lo.

A seh mai pawh a ni lo, a tisa a seh thlâk chu a ṭhial a, a ei zui lehnghal anih chu. (rapthlak hian !)

Dr.Hopper chu tal nawk nawk chungin Zoe chuan kuai tlu in a bawhbet a, a nghawng mai ni lo, a remchang lai apiang chu a seh in a hmai te vun te chu a seh thla hlawk a, a ei zel a, a sehna leh a kut ina a ham na ah te chuan thisen a rawn chik in a luang zêi zûih a, rei lo tê an Dr.Hopper- chu a thi ta  mai.

Zoe- mai bâkah Dr.Hopper- pawh chu thisen in a nual nasa hle mai, chhuat zawng zawng deuh thaw ah chuan thisen a baw neih nuaih a.....



*************************************************************************************************************************************************


Inchunglam ah chuan Lab chhûng a an thawm chu a hriat theih loh hulhual a.

Ṭhutkhawmna pindan a Mrs.Johanna Kay-i'na Coffee no a dawm lai  chuan thil ri deuh dawt hi a hria a,
"Kay,- tiin a ko a,  pasal a lo haw emaw a ti ni tûr a ni.

Mahsela tuman an chhâng lo, inah chuan amah chauhin a awm tih a hria a, Dr.Hopper erawh Lab -lama ah a awm daih si a, Inchung lam a an room leh Zoe- room ah chuan tumah an awm lo tih pawh a hria.

Coffee in pah chuan a melh kual ralh ralh a, chumi lai chuan kawngkhar ri deuh bur thawm hi a rawn awm leh a.

"Kay,...Kay...Hello..." 

an pa chu a ko nawn leh a, mahse chhângtu an awm chuang lo.

Inchung lam panna kailawn a chho thawm pawh a awm lo a, Mr.Kay- rawn haw nisela chuan a bul ah a rawn kal ngei awm si a.

A no chu dawhkan ah dah in muangchangin a tho a, a pasal ko chungin thawm lo chhuahna lam pan chuan a phei a.

An hawi kual vel a, inchung lam chhohna kailawn bul a dingin a pasal chu a ko leh a.

Mahse angaih a ṭha tehchiam lo, Kitchen lama bungbel tla ri bawl a hriat chuan a phu zawk a, thâwm dîm takin Kitchen chu a pan phei leh ta.

Dinning Hall a thlen chuan chhuat chu a'n enchiang a.

Ke hniak, pheikhawk thlâ, thisen kai luai hi Kitchen lam pan zâwngin a lo awm a, ke hniak mai bâkah chhuat, carpet chungah chuan thisen far a awm zauh zauh bawk a, chûng thil a hmu chu a ṭê chhuak ṭêp a, mahsela vanneih a siamin a hmui a hup hman hlauh mai.

Bang kil a golf tiang intung chu la lawkin nghet takin a hûm a, Kitchen lamah chuan a phei ta zel a.

Kitchen chhungah chuan Dr.Hopper- hi thisen kai luaiin a lo ding a, Mrs.Kay- hnungchhawn zâwngin ngawi reng hian a lo ding a.

"Dr.Hopper...Dr...."
A koh na chu hria âwm pawhin alang lo.

Muangchangin arawn hawi a, a mitmu lehlam chu a uai pûr a, a hmai lehlam chu a hêk huamin a thî sûng a, a nghâwng lah chu sakei seh hnu ang maiin a thlêr duai a, a thawmhnaw pawh chu thisen in a bual nasa kher mai.

"Lalpa leh....Dr.Hopper, engthil nge ni...Dr..." tiin a ṭe tuarh a, a makti leh rapthlak ti bawk chu a khûr zawih zawih a.

Ramsa ang maiin Dr.Hopper- chu a rûm chhur chhur a, hmalam a ban phar chungin rang takin Mrs.Kay- lamah chuan a tlân phut a.

Golf tiang chu a paih lawk a, sarâk chiam chungin Mrs.Kay- pawh chu a tlân chhe ve nghal a.

Mahsela a tlanchhe thui hman lo, tlanchhuah tum a kawngkharpui a hawn hma, a thlen hma deuh chuan Dr.Hopper- chuan a rawn zuan thlu a, bawhbet nghal in a taksa rem lai lai chu a seh nghal buan buan a.

A lo indanna a ban chu Dr.Hopper chuan man sakin a kut zungṭang chu a seh bun sak hmawk a, tui tih hmel deuh hian a ṭhial chup chup.

Chu mai ala duhtawk lo cheu mai, a tha chak tak chuan a man bet a, a nghawngah a seh sak leh ta a. Mrs.Kay- chu na ti in a ṭe tuarh tuarh a, a theihpatawp in a tâl a, mahsela a na tawrh mêk avâng chuan a chau telh telh mai.

Chutih lai chuan in luhna Kawngkharpui chu a rawn in hawng a, 

"Honey,...." Dr.Kay- chuan a rawn ti lut a.

Mahse a thil hmuh chuan a ti hrilhhai ngei mai, a phu zawk a.

Living room chhuatah chuan thisen a pherh nuaih a, a nupui duhtak chu nunna nei tawh lo tih hriat tak hian thisen nen a lo let reng a, chumai ala ni lo, a ṭhianpa Dr.Hopper chuan a nupui chu bawhbet in, thil a lo ṭhial mual mual a.

"Lalpa leh...Johanna....Johanna...Dr.Hopper.." a ti bah nuaih a.

Dr.Hopper-chuan Mrs.Kay- nghawng vun chu a pet duai duai a, a hmui leh hmai a thisen kai luai chung chuan a rawn hawi chhuak a.

"Dr.Hopper..." a ti zâwi sap a, chutih lai chuan rûm nghut pah in Dr.Hopper- chu a tho lawk a, Dr.Kay- chu pan in a rawn tlan phei a.

Chutihlai chuan Lab Kawngkhar chu a rawn in hawng ṭhuai a.....
Mahse chuti lam hawi hman a ni lo, an in hnaih chilh êm avângin tlanchhiatna hun pawh a awm lo, bân phar chunga rawn zuan tu chu Dr.Kay- chuan a Briefcase tê khai lai chuan a lo vawthlu tawp a, chutihlai chuan inchung lam panna kailawn chu a ri chho rawk rawk a.

Dr.Hopper- chu chhuat laiah a hlawm tawl a, tho leh tûr pawh a awm tawh lo.

A briefcase chu thlah in a nupui ko chungin alamah a tlan vat a.

Mahse tihngaihna rêng a awm lo, nunna nei tawh lo a nupui ruang chu ṭhutchilhin a pawm vawng vawng a.

"Honey, engthil eng ni ngai, ka va hrethiam lo êm, eng thil phiangsen nge....." a mittui a luang zawih zawih a.

Eng emaw chen chutia a nupui ruang bul a a awm hnu chuan, "Zoe..."  a ti chhuak sap a.

Lab lamah chuan a tlân thla nghal a, Lab kawngka chu a lo in hawng huau a, a chhûng ah tlân lut in a fanu chu a ko mawlh mawlh a.

Lab- chhûng chu a hnawk nuaih a, a damdawi lam ubungrua leh khawl te chu chhuat ah an lo tla in a glass tube hrang hrang te pawh chu chhuat ah an lo tla keh nuaih a.

Thisen lah chu chhuat ah a pherh nuaih mai bawk si.

A tlan kual thuak thuak a, mahse tumah an awm lo, a khawl ṭhenkhat te chu an lo la in on ri vut vut a, a fanu mutna khum pawh chu ruak in a va hmu a.

"Zoe..."  ti chungin a tlan chhuak leh a, an in chunglam, an nupa leh an fanu room lam pan in kailawn ah chuan a tlan chho leh rawk rawk a. 

A fanu room kawngkhar chu a lo in hawng huau a, inchhungah chuan lut an awm tih hriat takin bangah leh chhuatah chuan thisen a kai luai a, ke lawng hniak, thisen kai luai pawh chuan room chhûng chu a lût ngei a ni.

 Zawi te te a a fanu ko chungin a pan hret hret a, mahsela roomah chuan tumah a hmu lo, tukverh erawh a lo in hawng huau a, tukverh biang velah leh  a bul chhuat velah chuan thisen a kai nual a.

Tukverh ah chuan a'n dâk chhuak thuak thuak a, mahse tumah a hmu lo.

"Zoe.." a ti chuai raih a, rilru hah hmel takin a rûm ri hraih a, room chu a chhuahsan nghal a.

Kailawn a a chhuk lai chuan a hnuai lam Living room chhuat a a nupui thi tawh ngei chu a rawn che ṭalh ṭalh a, mumal lo zet a a rawn tho chhuak leh a hmuh chuan a mak ti chu a ding chawt a, ngawi rengin a thlîr ta reng a.

Mrs.Kay- chu a rawn tho chhuak a, kawi sawi zet a dingin a hnâr a lên chiam a.

A hawi vêl ruai hnu chuan Dr.Kay- chu a rawn hmu fuh ta, muangchangin bai chhut chhut a kal sâwi lâk lâk hian a rawn pan zel a.

A nupui pawh kha anna a nei tawh lo, a mitmeng rãpthlâk tak chuan khua a hmu lo ni ngeiin alang a. Dr.Kay- a chu bânphar chung hian a pan a, a âng zuau zuau mai bawk a.

Dr.Kay- chuan lainat hmel takin a lo thlîr reng a, a mittui a luang zawih zawih a.

A bul hnai a rawn thlen a, seh tum a a rawn ân zuau zuau lai chuan a hmaiah tak a lo hnek chawrh a.

Mrs.Kay- chu kailawn ah chuan a tlu in kailawn tãwp thleng chuan a lum thla tawp tawp a, che chãng túr rêng a awm tawh lo.

Ani, Dr.Kay- pawh chu kailawn tawp ah chuan a ṭhu hnawk a, a kut pahnih a a hmai hup in a insût hlawp hlawp a.